كوليكشن

السلام عليكم و رحمة الله و بركاته

مقتطفات و يبقي حد يقابلني لو حد فهم حاجة

.

إحساس قميئ إنك تفتقد إحساس اللمس

.

إحساس أقمئ (مش عارف جبتها منين دي)إنك يكون نفسك تعيط كل أما تنفعل و متقدرش تتطلع كل اللي جواك مش عارف هي إحترام و لا ضعف و لا الواحد مقتنع إنه مريض نفسي فبيعفي نفسه من إن الناس تفهم كده

و لا هو الواحد فعلا مش صح

.

من زمان الواحد بيحب أغاني نكد و هو مش واخد باله إنه هيسمعها و هيعيشها

زي أنا ليه مكنش علي الجراح قادر كنت باعيط لما بأسمعها مش عارف ليه مع إنها مكنتش بتفكرني بحاجة و مكنش في أي حاجة

و هي دموع و لا أكتر كنت بحبها جدا و سمعتها النهاردة في نجوم إف إم و بيني و بينكم هي في محلها خالص خصوصا النهاردة هي دموع و لا أكتر و كل ما بنقيد شمعة في عيون مش مبتسمة تيجي تاخدها القسمة و تسيب حزن تصور

قشطة علي النكد اللي جاي

و يا أهلا بالنكد اللي جاي

و هأنسي الموضوع اللي فات تماما و شبعتكم منه نكد محدش يقلق خالص زورونا تجدوا ما ينكد عليكم

نكدنا جديد في جديد

.

مش فاهم أنا الدائري حوادثه كتير و الأعداد في زيادة مفيش حاجة تزورنا كده قريب

.

و بما إن الفنون جنون

فغالبا أنتظروا مني فنون رهيبة المرحلة اللي جاية

.

يارب كفاية كده علي

أنا لو أذنبت من قبل أما أتولد ميكنش جزاءك كده

يارب أنت الغفور الرحيم

رحمتك

بوستات في بوست

السلام عليكم و رحمة الله و بركاته

عارف مكتر أنا في الكلام اليومين دول بس اللي مش عاجبه عنه ما عجبه و ميدخلش هنا تاني

المهم

حاولت من الساعة تمانية إلا ربع إني أنام علشان أصحي علي الساعة تلاتة الفجر علشان أكمل ترجمة قائمة المراجعة العالمية للتصنيع المعروفة ب دبليو سي إم شيك ليست اللي المفروض أقد منها جزء بكرة و ربنا يستر علشان شكلي مش هأقدمه علشان طبعا بعد أما أخلص البوست هأنام و مش هأصحي بدري و مش هأخلص الجزء اللي متحدد له الأسبوع ده

قلت أقوم أخرج الكلمتين المحشورين في نفسي يمكن أنام تخيلوا باحاول أنام ساعة

مش عارف أبدأ منين في خزعبلات كتير في دماغي

نبدأ بسم الله

.

الصبح قبل أما بانزل من الشغل بأشغل في المطبخ وأنا باعمل النسكافيه إذاعة القران الكريم بيكون فيها قران من ستة لستة و نص و بعد برنامج بريد الإسلام الحلقة الصباحية

المهم

النهاردة كان جزء صعب قوي من سورة الحج ربنا يرحمني و مكنش منه و يرحكمك و متكونوش منه

يقول الله تعالي

وَمِنَ النَّاسِ مَنْ يَعْبُدُ اللَّهَ عَلَى حَرْفٍ فَإِنْ أَصَابَهُ خَيْرٌ اطْمَأَنَّ بِهِ وَإِنْ أَصَابَتْهُ فِتْنَةٌ انْقَلَبَ عَلَى وَجْهِهِ خَسِرَ الدُّنْيَا وَالْآَخِرَةَ ذَلِكَ هُوَ الْخُسْرَانُ الْمُبِينُ (11)

ربنا يستر

خسر الدنيا و الأخرة ذلك هو الخسران المبين

بعد كده جه برنامج بريد الإسلام

السؤال عن المنتحر

كانت إجابة الشيخ واضحة و صريحة

مرتد و لا يصلي عليه و لا يدفن بمقابر المسلمين

قشطة يعني

واضح الكلام ماشي

و قفلت باب الشقة و نزلت علي باص الشغل

.

اللي بعد كده

لماذا لا نتعلم من الشيطان و لماذا نتبع أسلوب اللمبي و الكراسة الصفرا

لا عنوان جامد صح

الفكرة

في حوارات تدوينية و ثقاقية و سياسية كتير بتحصل اليومين دول

من العدد الثالث من مدونات مصرية للجيب مثلا بالإضافة لتوقيع دشليون كتاب و أخيرا حفل توزيع جوائز دار الكتب

يارب محدش من العيال المفترية اللي عاملة الموقع ده ميقروش التدوينة دي

خلاصة الموضوع إنهم مكسبوش حد جديد من سنة و لا أتنين تقريبا

يعني هنفرض عدد الناس كلها ألف هتلاقيهم هم هم اللي في كل حاجة يعني اللي عمل منهم كتاب يدعوا الناس يروح ناس تانية عاملة حاجة جديدة تروح دعاية نفس الناس اللي عزمتهم و الناس اللي الناس راحت لها في الأول تتضطر تساند الناس التانية ردا للجميل و هكذا

هلم جر

دي نقطة

النقطة التانية

كنت قاعد مع جماعة مثقفين يوم شم النسيم منهم الناصري و منهم الناصري التائب و منهم و الله اعلم الشيوعي أو المهلس يعني

المهم عمالين يتكلموا في التاريخ و بس و مين غلطان و مين صح و المهلس يقولك اليهود مؤثرين و العالم بيحترمهم علشان إنجازاتهم و المسلمين هم اللي فشلة كنت هأموت و أناقشه بس أبويا كان قاعد و طبعا مش عاوز أفهمه إني بأفهم يعني المهم كان نفسي أقوله خلاص نتهود كلنا بقة و الإسلام هو اللي غلط و هو اللي جايب لنا التخلف

يعني بروح أهلك يعني عملت أية للإسلام علشان تتكلم أنت طول عمرك بتشرب و بتتسرمح في الشوارع و أنت اللي بتقول كده

و يقولك تلاقي اللي بياخد رشوة ده ميرضيش ربنا يعني هو ربنا موافق علي الرشوة

خلاصة النقطتين دول

ليه منتعلمش من الشيطان ربنا يزيد النار اللي هيولع فيها و نروح للناس في الجوامع تلاقيه بيروح للناس في الجوامع يخليهم ينتشوا الركعتين و يخرجوا جري و تلاقيه أبعد ما يكون عن الخمارات و البارات لأن الناس اللي فيها شياطين أساسا

يعني تلاقي المثقفين قافلين علي نفسهم و هم هم في كل محفل حلوة محفل دي ليه مش بنكسب ناس جديدة

ليه بنتبع أسلوب اللمبي في المجاملة نصرف فلوس و نديها للناس و نرجع نلمها مع إننا لو كنا أستثمرنا الفلوس دي كان عائدها هيبقي أكبر

مش فاهم حد فاهم حاجة و لا لا

و غالبا محدش فاهم حاجة لأني أنا شخصيا مش فاهم حاجة

.

أية كمان ياسيدي

الإمتحانات بعد شهر و لسه مفتحتش حاجة و ربنا يستر

.

بمناسبة جلسة شم النسيم و المثقفين اللي فيها ربنا يستر علشان العلاقة شكلها هتتوطد قوي بيهم

و ربنا يستر

.

للأسف مش هأحضر حفلة تخرج ابن أختي من كي جي تو و اللي هيغني فيها و أااسفاه

.

تفتكروا هأقدر أصحي الساعة تلاتة أخلص ترجمة

معتقدش

:)))

:((((

معقول

معقول

كل النشوة و الفرحة و الصحيان بدري

بسبب كده بس يارب

أومال

يارب

لو حصل كده

هيحصل لي أية؟

؟؟؟؟؟؟

أنا و العزاء

السلام عليكم
صحيت الصبح علي تليفون من مفيد علي الموبيل طنشت و مردتيش لاقيته مصمم و أتصل بيا في البيت قلت في سري أنت فاضي بقة يا مفيد الساعة لسه تمانية و ربع و كنت ناوي أروح الكلية بس كسلت
المهم قمت رديت عليه
قالي والد منذر البقاء لله
سبحان الله والد منذر تعبان من فترة و أنا من ساعة أما رحت الشغل الجديد ده و أنا بأفكر في اليوم ده إزاي هأقدر أروح لمنذر و سبحان الله والده توفي في يوم أنا كنت فيه أجازة و حضرت الجنازة أنا أهم شئ عندي حضور الجنازة نفسها و مش مهم العزاء
ربنا يرحمه و يجعل مثواه الجنة و يرزق منذر وعيلته الصبر
.
بعد العودة من جنازة والد أخويا منذر و كان معايا محمد فتحي و الساعاتي ريحت شوية و بردوا صحيت علي تليفون مفيد ما صدق لاقي حاجة يتلكك و يتصل علشانها و أتفقنا نتقابل و نروح لمنذر بالليل
بعد كده كان نفسي أكتب فبأكتب أهوة
.
أول عزاء و جنازة أحضرها بالتفصيل كانت جنازة أخو صديقي الأنتيم في الكلية في البكالوريوس في 30 ديسمبر 2003
صاحبي أتصل بيا و إحنا خلاص بنستعد لإمتحانات التيرم الأول و طبعا مش مذاكرين بربع جنيه و بهرج معه أزيك أية اللي مصحيك بدري كده ناوي تتجنن و تذاكر و لا أية
هب قالي أخويا مات
قلتله أية
قال لي أخويا مات
و أتصلت بالناس كلها و رحنا بالليل و رحنا دفناه بالليل في السيدة عائشة و رجعنا و العزاء كان تاني يوم ليلة راس السنة
و كنا إحنا تلاتة أنا و الواد ده و واحد تاني أول أما شفت التاني ده قالي خلاص غحنا كده مالناش نصيب ننجح الترم ده مفيش وقت و أدي كمان كم يوم ضايعين و كان خلاص فاضل حوالي عشر أيام علي الإمتحانات
في العزاء بقة ده كان غالبا أول عزاء أحضره طبعا أي حد بيروح عزاء بيجي في دماغه علي طول الله يسامحه يحي الفخراني في فيلم الكيف
في أنت جاي تعزي و لا جاي تهرج بصراحة جاي أهرج
و بما إن كل صحابي في الكلية كانوا و غالبا لازلوا مهاطيل بعدت عنهم خالص و قعدت لوحدي
و بردوا و إحنا ماشيين مسبونيش في حالي و قعدنا نهرج حتي صاحبنا اللي أخوه متوفي ضحك معانا و قال لنا تعالوا نبعد بدل ما تفضحوني
.
مش عارف أنا قلت لكم قبل كده و لا لا أنا من صغري مفيش حد من عيلتي قريب توفي لي غير إبن عمتي توفي و أنا في إبتدائي و لحد ما خلصت الكلية مكنش في حد قريب قوي توفي بس من 2005 تقريبا العيلة حصل فيها إنهيار عمي و عمتين و خالتي و جدتي و إتنين أزواج خالاتي
و و الواحد حضر غسل و نزل القبر و شاف حال ناس كانت مالية الدنيا صيت و زعيق و الناس بتخاف منها حالها بقة أية
سبحان الله
إنا لله و إنا إليه راجعون
.
النهاردة محمد فتحي نام مني في الجامع و إحنا مستنين الظهر يأذن علشان نصلي و سامع صوت و أقول لا ده مش فتحي ده الموبيل فيبراشن بس للأسف يا أبناء مصر هذا الصوت اللي سمعته كان صادر من زعيمكم محمد فتحي
و زعيم المستقبل أحمد الساعاتي أنا عارف إنه صغير و طبعا اللي كانوا معايا عارفين إنفعالي كان قد أية يوم ما عرفت إن أحمد الساعاتي مواليد تسعين و بعد كأس العالم كمان و مش عارف هدوني إزاي ساعتها
بس بعد أما تقبلت الموضوع ده
النهاردة بردوا و إحنا في الجامع حسيت قد أية الساعاتي ده صغير في السن بس طبعا و حسيت إنه ماماته لسه محمياه و مستخدمه بودرة تلك و كريم جونسون أند جونسون
ريحته يا جدعان حتي ريحة أطفالي خالص
.
مفيد مش معني إننا هنتقابل النهاردة إني رجعت عن تفكيري و اللي قررت أعمله
اهوة حتي أنت فاضحني دلوقتي تاني
أمي عمالة تسألني محمد مفيد صاحبك من الكلية و لا من الشغل
كنت ما صدقت أنها نسيت يا أخي
.
أخيرا و يمكن ده السبب الأساسي علشان أكتب البوست ده مش هأقولك يا ساعاتي سبب دموعي النهاردة أية و أحنا رايحيين ندفن والد منذر في المقابر بالسيدة عائشة

هلاوس

السلام عليكم و رحمة الله و بركاته
أولا
نكرر الرسالة مسجلة
هذه رسالة مسجلة إذا كنت من المتابعين لهذه المدونة العبقرية و لكنك مش بتتدخل بشكل دائم و ناوي تقرا بوست واحد و تتكل علي الله بعد كده من فضلك إقرا البوست بتاريخ 11 أبريل 2009
و شكرا
تييييييييت

.

حلو عنواين هلاوس دي

نتيجة الضغط الرهيب من الناس اللي بتعلق علي البوستات فأهضطر أزيد من عدد البوستات الهلاوسية اللي بأكتبها

.

أمبارح رجعت من الشغل و كنت مظبط مع صديقي الصدوق من الكلية و هنتقابل و كويس إننا كنا متفقين علشان رجعت البيت لاقيت البيت مقلوب راسا علي عقب في حملة تنظيف

.

الزمالك كسب بتروجيت للأسف متفرجتش علي الماتش علشان البستان مش بتتطلع التلفزيون غير في ماتشات الأهلي عنصرية واضحة

.

متراهن مع الواد محمد طن إنه وزنه هيزيد في هذه الأجازة الطويلة أكتر من 4 كيلو

طن ده وزنه بسم الله ما شاء الله 125 كيلو فقط لاغير

طبعا معظم العمال اللي معايا من الشرقية و طبيعة شغلهم بدنية جامد باتخيل كده بعد شوية يحصل صدام بينا

يعني أقلل واحد فيهم بيزق برميل وزنه 225 كيلو تخيلو العبد لله هيعمل معهم أية و أنا كلي علي بعضي بالهدوم 83 كيلو

ربنا يستر و مخرجش من الشركة دي علي المستشفي متكسر

:))

.

في مشكلة بتواجهني في الشغل حاليا مش عارف لها علاج هي لسه محصلتش بس أكيد أكيد هتحصل

المشكلة هي

أنا الشركة السابقة مكنش فيها التنوع اللي في الشركة الجديدة فخبرتي في بعض عمليات الإنتاج معدومة و الواد اللي و لا بلاش اللي معايا مش بيقولي حاجة و مدير الإنتاج بتاع ذنب و أنا مش مرتاح له و لا هو مرتاح لي و مدير المصنع اللي بحبه و مطلع عينه و هو خلاص قرب يفقد الأمل فيا مالوش الخبرة في المجال بتاعنا فأنا ملتصق بالعمال حاليا و باتعلم و باشوفهم بيعملوا أية

المشكلة الأساسية في الشغل هي تتضيع الوقت العمال بتتكاسل علشان تتطول في الشغل و تاخد سهر و إضافي اللي ممكن يوصل مرتبهم في الشهر للضعف إلا قليلا

أنا دوري اللي جاي أجلا أو عاجلا و يارب ميجيش هو تقليل فترات الشغل دي و العمل علي عدم ضياع الوقت

يعني هأدخل في صدام مع الجميع تقريبا بعون الله

اللي مسبب لي حيرة إني أتعلمت منهم و لسه بأتعلم منهم لأن مفيش حد غيرهم أتعلم منه الشغل

هي مش هتكون أكيد خيانة ده شغلي و لازم مقصرش فيه

بس أنا حاسس إن فيها بردوا خيانة يعني أنا لازق معهم دلوقتي عارف بيضيعوا وقت إزاي و بيعملوا أية و العيال من حبهم لي و شوية خبث من العبد لله بيخروا لي كل حاجة من ساعة الشركة ما فتحت و عرفت بيعملوا اية و بيروحوا فين و هكذا

و كل شوية إحنا أسرة مع بعضينا و ياويل امه اللي يخرج من الأسرة دي بيشوف كوارث

مش عارف أعمل أية

هو حتي الأن مدير المصنع قالي مش عاوزك تتدخل في أية حاجة بس أكيد زي ما قلت لكم لازم أتدخل و مش عارف أعمل أية؟

تذكروا ياويله اللي يخرج من الأسرة

.

تحديث تافهة

أنا عارف أنه مش مستواكم بس شريط محمود العسيلي جميييييييل

بس بيوجععععععععععععععع

.

تحديث كمان

أمتي بقة أي حاجة ده أو ده او علي الأقل ده

و لا هو مفيش أمتي أساسا

ها

هلاوس

مش عارف الحالة السخصية أيوة السخصية اللي عندي دي من أية

يا تري هي فعلا صحيح و كرم من ربنا

و لا هلاوس الإقتراب من حافة الجنون

و لا هي خزعبلات شيطانية

بس بالمناسبة الحالة اللي أنا عليها تدل علي شئ واحد

ألا و هو

خزعبلات شيطانية شديدة يعني

ربنا يستر

طراطير

طراطير

و الله مفرقتش كتير

هلاوس جديدة

السلام عليكم و رحمة الله و بركاته

أولا

رسالة مسجلة

هذه رسالة مسجلة إذا كنت من المتابعين لهذه المدونة العبقرية و لكنك مش بتتدخل بشكل دائم و ناوي تقرا بوست واحد بس من فضلك إقرا البوست السابق أهم

و شكرا

تييييييييت

.

نبدأ الهلاوس

في الميدان عندنا قصروا شجرتين كبار قوي جنب الجامع بالإضافة لوضع مئات اللمبات علي مئذنة الجامع بمجرد اما بانزل الميدان باحس إني تهت

قعدت يومين أقول خسارة و زعلت قوي مش عارف ليه لحد من خمس دقايق و أنا باخد دش بعد اليوم الطويل السريع الغريب النهاردة تذكرت إن أنا من يجي ست سبع سنين كده لما كنت في الكلية و أيام ما الواحد كان بيصلي الفجر معرفش ليه كان بيكون عندي شوق أدعي ربنا و أنا ماشي تحتهم كان بيكون عليهم تقريبا مئات العصافير و صوتهم في الفجر جميل قوي كنت بأقعد اجري و أنا رايح و أنا راجع من الفجر و أدعي ربنا تحتهم طبعا كلام أهبل بس يمكن علشان كده زعلت عليهم قوي و أنا مش واخد بالي

.

اليوم النهاردة مش عارف عدي إزاي في الشغل إذ فجاة لاقيت الساعة تلاتة و غالبا يوم الأحد بيعدي بسرعة في الشغل بس الأحد ده عدي بسرعة زيادة و تنطيط أكتر و أنا في الشغل الناس في الشركة السابقة أتصلوا بيا و قالولي إن المدير بتاعنا عمل عملية طلعت من الشغل عليه و طبعا هيسنا شوية و كشري و قهوة و شيشة و تمام التمام قبل أما نروح

و الأدهي الرجل كان لسه في البنج قعد يهيس معانا شوية

.

و أنا رايح لمديري السابق واحد صاحبي من أيام ثانوي أتصل بيا و قالي تعالي نقعد شوية قلتله يسلام أوكي زي الفل رجعت علي شارع شبرا قعدنا شوية و طبعا شيشة فل

طبعا الواد كان هيتجنن مني لما لاقي ظرف في الأكلاسير بتاعي و مصدقش إنه إستقالتي علشان لو أي كلب فتح بقة معايا في الشغل

و قعدنا نفتكر أيام ثانوي و نقول ياااه نعرف بعض من خمستاشر سنة تقريبا كفاية لحد كده قوي فل

:)

و قلتله تخيل كده تتصل بيا مرة في البيت تسأل علي محمد يقولولك البقاء لله هتعمل أية

بصراحة رد علي رد و الله عاجبني جدا قالي عادي هامسح نمرتك من علي الموبيل الميموري مليانة أسامي و عاوز أخفها شوية

.

بمناسبة الموت

الحوادث في المنطقة اللي بأشتغل فيها عالية جدا اليومين دول يعني خمستاشر من أسبوعين و خمستاشر أمبارح يا مسهل يارب

.

سؤال و ليس إستنكار حاشا لله

هو ليه ربنا حرم علينا قتل أنفسنا أنا مش بأفكر بكده أنا بأدعي بس

بس ليه

يسلام كده تخيلوا لو كل واحد يتضايق من حاجة هب يخلص علي طول تلاقي مفيش مشكلة سكان و لا بطالة و لا أي حاجة تلاقي الناس السعيدة بس اللي في الشارع ده لو لايقت حد في الشارع أساسا

:)

هو أكيد ربنا له حكمه في كده

.

بعد اما سيبت صاحبي علي شارع شبرا و هو أخد طريقة للبيت و أنا بردوا عديت علي بيت جدتي اللي قضيت فيه أيام طفولتي

الأطلال

:)

خطرت علي بالي قصيدة حافظ إبراهيم غالبا يعني مش متأكد و مش قادر أدور

قصيدة الصخرة و لما رجع لها عنده تسعين سنة و الهجس ده

الغريب بقة تخيلوا أفتكرت أية أفتكرت حاجة غريبة جدا

أفتكرت أخت واحد صاحبي هي كانت أكبر مننا بكتير يعني هي كانت في العشرينات و إحنا في الأحاد لسه المهم أخته دي كانت ملتزمة و كنا بنخاف منها بس في نفس الوقت بنحبها يعني مكناش بنكرهها غير لما تمنعنا من اللعب المهم إذ فجأة بردوا أختفت في فترة التسعينات و غالبا أنضمت للجماعات الإسلامية و من ساعتها لم تظهر أنا ايام الحرب علي أفغانستان تخيلت إنها هناك مش عارف ليه

و مش عارف ليه أساسا دون عن المواقف السودا و المواقف الجميلة اللي عشتها هناك الحادثة دي بس اللي جت علي بالي

.

تخيلوا هذا من الشعارات التي كانت بتدعوا لما يسمي إضراب ستة أبريل بالله عليكم يعني شعار زي ده مين يفهمه عمال مش بيعرفوا غير السكس و الأغاني الهابطة علي الموبيل مش عاوزين عبط بقة

و مش عارف مين عاوز سواقين الأتوبيس و المترو يشاركوا في الإضراب هم أساسا يا حبيبي لو اليفطة دي في وشهم كده مش هيفهموا منها حاجة

و الله الحزب الوطني ده تمام قوي عامل في الإنتخابات بالصور الجمل الهلال الكوز كده يعني أة

ضربة مطوة لطشة سكينة أة يعني ماشي حالك يا أستاذ سرحان

و الله و بردوا عامل شغل جميل يعني و أنا ماشي عند هندسة شبرا لاقيت لوحة كبيرة كده مش مش فاكر و الله بتقول أية

غالبا عاوز شباب واعي يبني حاجة كده كلام كبير يتفهم

و بردوا نحي الحزب الوطني علي حفلة محمد حماقي اللي سمعت أنها كانت مكسرة الدنيا في جامعة عين شمش

و نشكر جميع مزز جامعة عين شمس مزة مزة اللي غامرت و نزلت من بيتها يوم الإضراب علشان حفلة حماقي

مهو أكيد محدش يشارككم في إضرابكم الأهبل اللي أنتم عملتوه

أنتم نصكم أساسا مش بيعرف يتكلم كلمتين عربي علي بعض ده لو أتكلم كلمتين مستنين الناس تسمع لكم هنفرض سمعت لكم مش هتفهم حاجة يعني تخيل او تخيلي أنت كده قاعد وسط تلات أربع عمال ميعرفوش في الدنيا غير الموبيل و الدش و السكس هتقنعوه إزاي و أنت أساسا مش بتتكلم عربي و في نفس ذات الوقت مش عاوز الناس بقة تعيش لي في دور ولاد البلد و يعملوا حفلة و إحتفال لو مرة أكلوا أكله فول و طعمية و الرجل أستعبطهم و أخد منهم خمسين جنيه

عاوزين نعيش عيشة أهلنا اللي فوق فوق و اللي تحت تحت و كل واحد في حاله أحسن

بداية جديدة سلام يا أصدقائي

السلام عليكم

ازيك يا جمعه اخبارك؟مش عارف امبارح انت كنت متغير أوي معايا مش عارف كان قصدك والا انت بتهرج وانت زعلان بجد ياريت ترد عليا

ده نص إيميل وصل لي النهاردة الصبح من صديقي الغالي محمد مفيد

معرفتش أرد عليه أقول له أية؟

إحنا أمبارح أتقابلنا كلنا و ناس زيادة كمان علشان نهنئ صديقنا الغالي منذر بمناسبة العروسة الجميلة اللي ربنا رزقه بيها

.

المهم

لأول مرة من فترة طويلة أكون راضي علي نفسي شوية أو زي ما إعلان بيريل بيقول أسترجل أنا راضي الحمد لله شوية بس تعبان و مش هأتكلم و يمكن أنا راضي عن نفسي علشان مش هأتكلم

لأول مرة أسترجل و متكلمش غير مع ربنا

أنا حاليا بأحاول أرجع زي ما كنت قبل أما أعرف التدوين أو علي الأقل زي أول أما دخلت التدوين محدش يعرفني و مقابلش حد و أعيش مع نفسي و أواجهه الحياة لوحدي زي العادة حتي لو بأواجهها بطريقة غلط و سلبية و مشكيش همي لحد و متكلمش مع حد و متعلمش من حد حتي لو كنت باتعلم منكم الخير و كل شئ كويس و طول عمري كان نفسي أعمله و معملتوش غير لما عرفت التدوين و أصدقائي و أحبائي منه و حتي لو متعلمش أي حاجة تاني جديدة بقية حياتي

و الله هي مش سهلة علي خالص و أنا الأكيد الخسران و محدش يعرف حالتي و أنا باكتب الكلام ده دلوقتي بس هو ده الحل بس اللي في أيدي و اللي متخيل إنه صح

.

ياريت يا مفيد أنت خصوصا متزعلش مني علشان أنت الوحيد اللي عارف اللي أنا خسرته و كمان علشان لو حصل و أتكلمنا تاني مش هاقدر أنفذ الطلب اللي أنا طلبته منك و ساعدتني عليه الفترة اللي فاتت و ممكن كمان الموضوع يكبر أعمل حاجة أنا مش عاوز أعملها

علشان كده يا مفيد أنا متكلمتش معاك أمبارح علشان كان نفسي أسألك عن حاجات كتير قوي أنا طلبت منك منتكلمش فيها و مش عاوز أسألها و كمان متكلمتش معاك أمبارح علشان كان بردوا يوم صعب قوي عليا ليه؟ هأفضل راضي علي نفسي و مش هأتكلم

و كويس أخر يوم نتقابل و نتكلم فيه يوم حلو بمناسبة هيام و كويس بردوا إن منذر رجع يكتب تاني و يرغي و يقول كلام أهبل و أنا معرفش أنتم وصلتم لأية أمبارح و يارب تكونوا وصلتوا لحاجة كويسة و تبدأو من جديد

و تقريبا هي دي فترة الجديد في جديد

و طبعا يا مفيد أنت لو عاوز تعرف أخباري أنت شايف كله علي المكشوف هنا متقلقش ده لو مزعلتش مني و كنت لسه عاوز تعرف أخباري

.

للأخوة المدونين اللي هيحصل لهم إنهيار لو قفلت المدونة

:)

أنا مش معني كلامي ده إني هأقفل المدونة مقدرش بس مش هأقدر أتكلم و أتقابل مع حد من إخواتي اللي ربنا بعتهم لي عن طريق التدوين

.

علي فكرة الحياة صعبة قوي علي

دعواتكم إني أستمر علي القرار اللي وصلت له و استرجل

و دعواتكم إن ربنا يعيني علي الحياة أو يريحني منها

يااااااااااااااااااااااااااااارب رحمتك

السلام عليكم و رحمة الله و بركاته
.
أولا قبل كل شئ مبروك للواد منذر مجئ إبنته الغالية بعد إنتظار و ربنا يجعلها كده سبب في هدوء منذر شوية من الشقاوة و العفرتة اللي هو فيها و ربنا يبارك له فيها إن شاء الله
انا عندي عريسين يلا شد حيلك كده و حوش من بدري
.
البوست بقة
البوست ده مش عارف نفسي أكتب فيه حاجات كتير و مش عارف أبدا منين و لا منين
بدات الحمد لله قراءة رواية واحة الغروب و كنت بدأت فيها أول أما حصلت عليها بس مكملتهاش و بعد كده مكنتش قادر أقرها و لا حتي أمسكها بأيدي بس الحمد لله بدأت أقراها و طبعا هي شكلها وهم
مش ده موضوعنا دلوقتي
الموضوع بقة في بدايتها بتذكر سيرة الشيخ جمال الدين الأفغاني و أحمد عرابي خطر علي بالي سؤال ملح هل في وقتنا هذا حد زي الناس دي
و هل كده بعد كم سنة لما يحصل تغيير هيذكر الناس دي في روايات زي واحة الغروب كده
السؤال الأهم بقة هل سيحدث هذا التغيير
أشك
و لما بأفتح العاشرة مساءا لاقيت إعلان عن إستخراع جديد إسمه مصريين من أجل التغيير قعدت أدور بينهم عن سعد و لا أفغاني و لا غاندي حتي و شكلي معرفتش الأقيه يارب حد منكم يكون شافه
أشك بدرجة كبيرة في حدوث التغيير بالرغم من حلمي الدائم بحدوثه
و أحلامي في الموضوع ده كتيرة قوي
موضوع جديد
أحلامي
أحلم باليوم الذي تتغير فيه الناس و ترجع طيبة تاني و مليانة خير

أحلم كده لو أتنين خبطوا في بعض في الشارع يتأسفوا لبعض في يقعدوا يشتموا في بعض

بأحلم بإلغاء التليفون الصيني و منع أي كلب يشغل الموبيل بتاعه بصوت عالي في أي مكان

أحلم باليوم اللي البنات ترجع البيت الساعة خمستاشر بالليل و متكنش خايفة و أهلها مش قلقانين عليها
ملحوظة: بس ترجع من شغلها مش من حتت نص كم
:)

أحلم إن مصر وقتها كله يكون زي وقت الصبح جوه جميل و يشجع و يفرح كده

خش علي النكد
موضوع جديد
يوم الخميس اتعزمت علي فرح واحد معايا في الشغل طلعنا من الشغل عليه علي طول قلنا لو روحنا هنكسل
المهم ياسيدي
كان من ضمن الواجب اللي أتعمل معانا أية طبعا أكل و شرب و لحمة و حشيش علني كده يا جدعان في الشارع في منطقة ضيقة جدا يعني الشقق زي ما بيقولوا مفتوحة علي بعض و العريس نفسه كان بيشرب قدام أهله و أبوة عادي جدا و عمه بسم الله ما شاء الله هو اللي كان بيجيب الحشيش
طبعا لا أخفيكم سرا إن هذه المنطقة هي التي أفرزت من قاموا باعمال التخريب في التحرير و السيدة عايشة و كانت ملاذ و مستقر التوربيني و أبشركم و أهنئكم أنكم سوف ترون منها الكثير و الكثير
تخيلوا تمشوا في شارع العربيات متعرفش تمشي فيه
طيب الإسعاف تتدخل إزاي و لا المطافي و لا البوليس لفرض النظام يدخل إزاي طبعا ميعرفش
إستكمالا للنكد
فاكرين البوست اللي أتكلمت فيه عن المخدرات و البوليس متدخلش غير لما ظباط منه أستشهدوا فالبوليس حس إن كرامته أتجرحت
و قلت أكيد في ناس ماتت من غير ما حد يسمع عنها حاجة
تأكدت من هذه المعلومة قدرا في واحد كرامته و شجاعته و دينه شجعوه علشان يروح يبلغ عن ناس منهم طبعا الناس دي عرفت و اخدت خذرها من الشرطة و لما البوليس مشي دخلو علي بيت الرجل ده قتلوا كل من فيه و لا كانهم إسرائليين و البيت ده مليان فلسطنين
و لا من شاف و لا من دري
حسبنا الله و نعم الوكيل
.
بوست جديد
إكتشاف
أكتشفت و تأكدت إن الكلام في الفاضي و المليان هو ما يصنع شخصية و أهمية الإنسان يعني اللي يعرفني يعرف إني مش بأتكلم كتير طبعي كده خلقتي كده
بس في الشغل و الحياة عموما لازم تتكلم علشان الناس تقدرك
بخ أي كلام بس أهم حاجة تبخ بخ بخ حتي لو بتبخ غلط مش مشكلة بس الناس تشوفك بتتكلم فتقول عليك بتفهم علي طول
دي نصيحتي للي عاوز يحس بأهميته و إنه شئ في هذه الحياة أنا مش هأتغير و مش هأتكلم غير في اللي عارفة و مش هأفتي في أي حاجة معرفهاش مية في المية اللي عاجبه علي كده عاجبه و اللي مش عاجبه
و لا بلاش
.
صورة أردوجان بقة مناسبتها إن الرجل ده رجل بجد و ربنا يستر عليه و محدش يغتاله و لا يلفقه له تهمة موافقش علي تولي رئيس وزراء الدنمارك أمانة الناتو غير بعد أما يعتذر عن الرسوم المسيئة و كان رفض قبل كده و يكون النائب له تركي و يكون مبعوث الناتو لأفغانستان تركي
أية الحلاوة دي كلها لازم طبعا أحط صورته
يلا بقة كفاية عليكم كده
سلام

AGAIN

السلام عليكم و رحمة الله

عملا بما لايفعله بعض الإصدقاء هأكتب بوستات ورا بعض يعني لسه منزل واحد أمبارح و هانزل واحد طويل النهاردة معرفش طلبت معايا رغي

المهم

الكلام النهاردة كتير

علشان الناس اللي مش فاضية تقصر من الأول

و للأسف في حاجات كنت مجهزها بس في ناس سبقتني و كتب عنها

:)

كان في موضوع بأجهزه من زمان لاقيت الصديقة كوشيا للأسف كتبت واحد زيه و الموضوع التاني الأهرام كتبت عنه النهاردة

المهم

نبدا بالموضوع اللي الأهرام كتبت عنه النهاردة موضوع هل تتحول بؤر المخدرات بالقليوبية لباطنية جديدة

أنا شغلي في العبور و انا راجع ساعات الطريق الدائري بيكون مقفول فبناخد طريق خلفي كده أسهل نوعا ما المهم من فترة انا عارف الطريق ده بعد الإنتقال للشغل الجديد كنت في الطريق بأسمع اللي معايا في العربية بيقولوا هنا كوم السمن و الجعافرة و حتت تانية مكنتش واخد في بالي و يوم بعد يوم فهمت و عرفت إن الحتت دي معروفة لعامة الشعب إنها مصدر و معقل تجارة الحشيش في مصر تقريبا كنت بسأل نفسي لما الناس التعبانة اللي معايا في الشركة و متعرفش في حياتها غير الشغل و البيت و معاناة العيشة تعرف الحتت دي أومال فين الجهاز اللي يسمي المباحث و مكافحة المخدرات و كنت بسأل هم فين و بيعملوا أية؟

و جه طبعا في دماغي علي طول موضوع النخيلة و سيد حنفي اللي لحد دلوقتي مش عارف هو أعدم و لا هرب و كمان أفتكرت حملة كان قام بيها حبيبي مصطفي الحسيني أسمها أفضحوا تجار الكيف

و قلت هو الموضوع ده شغل مين الناس و لا البوليس و المباحث و طبعا الناس هتتبرع و تقول الشرطة فيها ناس بتاخد فلوس من الناس دي و حاجة مقابل حاجة زي فيلم الجزيرة كده

بس انا هأطلع طيب و أقول لا الشرطة مش بتعمل كده

بس الشرطة بتعمل أية؟

كانت فين اول ما المناطق دي أتعرفت و قويت كده معتقدش إنها طلعت فجاة و لا هبطت من السماء أكيد كانت لهم بداية و طبعا لما سكتنا عليهم كبروا للدرجة دي

و الشرطة للأسف و الجرايد حتي متحركتش جامد غير لما بدأ إستشهاد الظباط واحد ورا التاني لحد ما وصلوا تلاتة دلوقتي هنا كرامة الشرطة أتجرحت و بدأت في التتضييق عليهم و وضع الأكمنة و كأن مسئولية جهاز الشرطة حماية نفسه بس و الشعب لا

أكيد في ناس أبرياء كتير ماتوا هناك في خناقات و مشاجرات مكنش لهم علاقة بيها و محدش أتكلم و لا بان لهم أثر حتي

يارب الشرطة تنجح في السيطرة عليهم سريعا و في نفس الوقت تمنع وجود بؤر جديدة في مكان تاني

.

الموضع التاني

الجواز

:)

مش عارف أحيانا بيكون نفسي أتجوز علشان يكون عندي اولاد بس هو ده السبب الوحيد اللي بيخليني نفسي أتجوز بس في نفس الوقت خايف من حاجات كتير الجواز في حد ذاته مسئولية كبيرة

و خايف أظلم اللي أتجوزها لأني هأطلب منها تكون حد تاني انا نفسي فيه و هي مش هتفهم أنا باعمل كده ليه و خايف يكون في ده خداع ليها

و خايف منجحش في الجواز و مسئوليته

و نفسي اعرف مراتي المدونة بتاعتي و مخافش من اللي كتبته هنا قبل كده

ساعات بيكون نفسي اتجوز واحدة مدونة تعرف المدونة هنا علشان تقصر علي حاجات كتير و خلاص و هي تبقي فاهمة كل حاجة

و خايف أكون أب فاشل و زوج فاشل

و كمان في نفس الوقت نفسي ميكنش في شئ حد يلوي ذراعي بيه يعني لو في أي وقت حبيت أسيب الشغل و مفكرش في حاجة و خايف أضيع من أعول و ادخل تحت حديث سيدنا محمد كفي بالمرء ذنب أن يضيع من يعول

و الظروف و الجو و البيئة اللي حوالينا خليت تربية الأولاد شئ صعب قوي وسط البيئة الفاسدة اللي إحنا عايشين فيها

و كمان في حاجة خايف أكون ضعيف قدام أولادي

يعني تخيلوا كده واحد ماشي في الشارع لا ليه و لا عليه يلاقي واحد بيرمي بلاه عليه في الشارع و طلع عربجي و لا حاجة الواحد هيعمل أية لو معه عيلته

و كمان تخيلوا لو واحد سايق عربيته و دخل شارع غلط و أتجاه عكسي ممكن يتحبس فيها

:)

.

الشغل

الحمد لله الدنيا تمام في الشغل و مدير المصنع متهاون معايا شوية و أنا بدات أدخل الجو الحمد لله بس لسه طالب مني حاجات كتير و عمال يطلب و يطلب نوع من أنواع بيديني فرص يعني و ربنا يكرم

الغريب في موضوع الشغل إني مش قلقان مش عارف إيمان الحمد لله إن شاء الله و لا لامبالاة و بطيخ لا قدر الله

.

أحلي ما في الحياة عيشة البطيييييييييييييييييييييييييييييييييخ

أصدقائي علي المسنجر عددهم قل الحمد لله لستاشر و علي الفيس بوك إنهار العدد للعشرينيات و من أخر شهر فبراير الحياة لوووووووووووووووز و بطيييييييييييييييييييييييييييييييييخ و معرفش حاجة عن أي حاجة

و السلام ختام

بأسأل في الدين

سبحان الله اليومين دول طلع فتوتين مش فاهمهم

واحدة من شيخ الأزهر تبيح نقل الأعضاء من المحكوم عليهم بالإعدام بدون أخذ موافقتهم و لا موافقة أهلهم

و أستند في حكمه علي إن جسد المحكوم عليه بالإعدام مش ملكه مش فاهم إزاي

في شيوخ معارضة و حتي الأطباء مش موافقة علشان بتقول إن لازم اللي يتبرع بأعضائه يكون مش مجبر و لا مقيد و غير فاقد لحريته و حتي لو واحد محكوم عليه بالإعدام وافق إنه يتبرع مش هيعملوا عملية النقل ده علي لسان الدكتور حمدي السيد نقيب الأطباء

أنا عندي سؤال لفضيلة شيخ الأزهر

مين اللي قال إن جسم المحكوم عليه بالإعدام مش من حقه علي قد ما فهمت يعني يمكن أكون أنا اللي فهمي قليل

ثاني حاجة هو المحكوم عليه بالإعدام ده خلاص الجرم اللي عمله أخد جزاءه ربنا يعني قال اللي يقتل نفسا بغير نفس يقتل ده حكم ربنا كان ممكن ربنا يقول ممكن نمثل بجسده بعد كده لو ربنا شايف إن الحكم بالإعدام غير كافي ممكن يكون اللي أتحكم عليه بالإعدام ده تاب توبة جعلته أحسن من أي حد مثل المرأة التي زنت و ذهبت لرسول الله اعترفت بذنبها و تابت

و الله اعلم

لو حد شايف إني فاهم غلط يوضح لي و أنا مش بأفتي أنا بسأل محدش يستهبل و يفهمني غلط

انا بأصلي بالعافية

.

الفتوي التانية

لا يجوز إجبار المواطنين علي دفع الزكاة بالقوة

و الفتوي دي من مجمع البحوث الإسلامية

انا قريت الشرح للفتوي دي و ملخصه إنه مش المفروض نجبر أحد علي إخراج زكاته و أين يخرجها و علي مين يصرفها

أنا سؤالي بقة

هو مش سيدنا أبوبكر الصديق رضي الله عنه حارب حروب كتير أستشهد فيها صحابة كتير علشان بعض الناس منعت فلوس الزكاة

و قال لو منعوني من شئ كانوا يعطونه لرسول الله لحاربتهم عليه

هي مش دي كانت فلوس الزكاة و لا أية؟

و في المسلسلات التاريخية الحمضانة الي بنتفرج عليها في حاجة أسمها بيت مال المسلمين كانت فلوسه بتتجمع منين

و يعني اللي عاوز يصرف فلوس زيادة محدش يعرف عنها حاجة يتصدق مش لازم فلوس الزكاة و الزكاة مش تتطوع دي فرض

علي ما أنا فاهم يعني

يعني لو واحد شاف واحد بيزكي بفلوسه مش بيكون رياء يعني زي الصلاة اللي بيشوف حد بيصلي الصلوات الخمس مش بيكون بيتفضل علي ربنا ده فرض عليه

اللي عاوز يتتطوع و يخلص مع ربنا بيقوم الليل مثلا

و الله اعلم

لو حد يعرف شيخ الأزهر او حد في مجمع البحوث و لا موافق علي الكلام ده ياريت يفهمني بجد

علشان أنا محتار و مش فاهم

و الله أعلم

EgyRec Again :)))

السلام عليكم و رحمة الله و بركاته

أزيكم يا شباب أخباركم أية؟

يارب يكون كله تمام

خلاصة البوست ده بدأت معارك ضارية في الشغل الجديد اللي أنتقلت له مع مدير المصنع و مدير الإنتاج مدير المصنع ده راجل فاهم قوي و المقابلة اللي عملتها معه هي تقريبا اللي شجعتني علي الإستقالة من الشركة اللي كنت فيها و أروح الشركة دي بس هو شخصية كويسة مقدرش أغلط فيه و لا أقول عليه و لا كلمة بس فاكر الناس كلها محترفة إكسل و تتطلب أي معلومة من أي حد تجيبه طلبه هو مش واخد باله إنه هو مدير المصنع و أنا مهندس إنتاج في واحد زيي فاهم الدنيا أكتر من و الخبايا أكتر مني و هو سبب الأزمة كلها الواد ده بقة من تاني يوم لي في الشركة الناس كرهتني فيه ومحدش شافني غير و قالي خلي بالك منه و اللي يقولي أنت صعبان علي شكلك طيب و هكذا و زي ما بيقولوا الزن علي الودان أمر من السحر كرهت الواد ده أساسا و هو واد أليطة أصلا و متعنطظ مش فاهم ليه مع إنه مكبر دماغه في الشغل الإشرافي اللي أنا بأقوم به بس هو رهوان في التخطيط الحقيقة و عارف الناس كويس و عارف شغله تمام و زكي مقدرش أنكر بس للأسف هي عصابة كبيرة و أنا سهل جدا أخترقها بس لازم أكون قوي فنيا في الشغل طبعا محدش فاهم حاجة بس مش مشكلة المهم النهاردة حصل نقاش بيني و بين مدير المصنع و قالي هأعتبر الكلام اللي أنت بتقوله مسمعتوش و نكمل بكرة و ربنا يستر و علي العموم انا جهزت الإستقالة خلاص و ماشي بيها في ظرف محترم و عند أي لحظة مستعد لكي أضحي

:)

مدير الإنتاج بقة هو مش فاهم أي حاجة في أي حاجة هو بيسمع للناس و خلاص و أهطل كده و العيل سموه في الإنتاج أسامي كتير قوي عم شكشك و القرد أبو سديري المشكلة هو مش فاهم حاجة يسمع من مدير المصنع كلمتين ينزل يقولهم لي انا طبعا بأكون عارف هو بيقول أية لأن مدير المصنع اللي فاهم كان قالي كده قبله و هو طبعا بيحاول يفهمني إن ده كلامه هو و هو أساسا مش فاهم يعني أية معدلات إنتاج و حسابها و كي بي أي و لا أي كفتة و العيال الشياطين اللي في الإنتاج خلوه يبوظ شحنتين و أنا مش عاوز أكون زيه كده

في شوية عيال في الإنتاج نفسي أحي لكم عليهم بس أنا هأقول لكم علي أتنين بس واحد أسمه محمد و محمد ده تخين قوي العيال مسمينه طن تخيلوا بتنادي علي واحد أسمه طن و في كمان الأستاذ كريم بركة طبعا أي شحنة بيشتغل فيها نقول الحمد لله لو مشيت في أول يوم بعد معاناه لأنه هو كما واضح من الإسم بركة بيخرب أي شحنة يشتغل فيها ده مرة ساب خرطوم المياة مفتوح رجعنا تاني يوم الشغل لاقينا صالة الإنتاج بحر و كان يوم بركة فعلا

.

الغريب و العجيب و الخزعبلي في الحوارات دي كلها إني مش خايف و مش زعلان و مش قلقان مش عارف ليه و لا حتي ندمان علي إني سيبت الشغل اللي فات

و الحمد لله أتعلمت حاجات كتير هي أينعم في شهرين بس أهوة أحسن من مفيش

أنا يعني مكملتش شهرين أهوة و خلاص قربت أودع الشغل ده بس الحمد لله مش خايف و لا زعلان

هو بيني و بينكم ربنا يستر بس انا مش متكهرب و منفض و دماغي في الخلعون خالص

غريبة قوي الموضوع ده هو ده اللي قلقني

.

المهم أستأذنكم بقة علشان أرجع مرة تانية لحسابي اللي علي موقع إيجي ريك علشان أبدا في مرحلة جديدة من البحث عن عمل جديد

و إلي اللقاء في ظروف أحسن من كده

:))

اللهم أجعله خير

السلام عليكم و رحمة الله و بركاته

أرخم حاجة في البوست ده إن مفيد هيفتكر إني خفت منه و كتبت بوست

المهم من كم يوم نفسي أكتب قوي قوي أية مش عارف

بس أنا الكتابة هنا بقيت إدمان عندي و الحمد لله حاولت أقلل شوية علشان مش ناقصة هي نكد و كأبة و كان نفسي أكتب حاجة تفرح بس يعني البوست ده شغال شوية مش نكد قوي يعني

:)

لما طلبت معايا كتابة و مش لاقي حاجة أكتبها فكرت أطلع مذكراتي الخزعبلية اللي باكتب فيها من زمان قوي و أول تاريخ شفته فيها كان 31 أغسطس 1998 يا نهار أبيض القرن الماضي و كان في محاولات قبلها كتير و أتقطعت بس بعد أما طلعت الكرتونة السحرية اللي مخبيهم فيها لاقيت نفسي كنت رغاي قوي بس هي مذكرات لذيذة قوي و الله و تحس كده إنها متختلفش عن هنا كتير بس أية قعدت أضحك ضحك و الله رهيب ثانوي بقة و ستاشر سنة و الكلية و التنسيق و أيام الكلية الأولي يااااه تاريخ

المهم الغرض من كتابة المذكرات الخزعبلية دي إني كنت فاكر نفسي هأطلع حاجة مهمة فكنت بأكتب الأحداث المهمة في حياتي و بعد كده بشوية تحول الغرض و هو الإحتفاظ بالحاجات المهمة في حياتي للإنسانة اللي هأحبها و أتجوزها و أقدر أطلع لها المذكرات دي علشان تعرف كل حاجة عني من زمان و منساش أحكي لها عن أي حاجة طبعا المذكرات اليومية هذه الأيام تتمثل في المدونة بالإضافة لبعض الأحداث اليومية اللي بأكتبها في أجندة سنوية المشكلة إن الأجندات كترت و بقيت ظاهرة قوي و مش عارف لو وقعت في أيد حد شكلي هيكون أية

.

المهم بعد أما فشلت في إختيار أحد المذكرات علشان أكتبها قررت أتكلم عن حلم حلمت به أمبارح خير اللهم أجعله خير حلمت بمين بالريس بالرغم من إن اللي بأحلم بيه بيحصله حاجة كده بعد بعد فترة بس الغريب إن في الحلم ده حبيت الريس مش عارف ليه صعب علي و حسيت إننا ظلمناه غالبا ده اللي فاكره من الحلم مش فاكر تفاصيل الحلم بس اللي فاكره إني في أخر الحلم كنت بحبه مش عارف ليه

.

من كم يوم كنت رايح عند خالي علشان تعبان المهم قدري ساقني لركوب توك توك الله يخرب بيتهم المهم الواد كان سايق و معلق علي الأزاز بتاع التوك توك كله دباديب مغطي الإزاز خالص و هو واد عنده بتاع خمستاشر سنة كده و سايق و مطلع دماغه برة التوك علشان يشوف الطريق و مركب سماعات زي الهباب ورايا و مشغل أغنية الدنيا دي أحوال كلماتها جامدة جدا علشان كده نزلتها في المدونة المهجورة بصرف النظر عن اللي بيسمعها و علو الصوت اللي بيشغلوه بيها و المطرب اللي بيغنيها أساسا بس كلماتها جامدة

.

يوم الخميس مدير المصنع اللي إعجابي بيه هو اللي شجعني علي ترك الشغل القديم و الذهاب للشغل الجديد تحول و اتخنق مني و هو طالب مني تقارير معينة كده من ساعة أما أشتغلت بس أنا مش عارف أعملها و مش فاهم هو عايز أية المهم هو قالب وشه معايا من كم يوم و كمان علشان أنا لما باشوفه مش بأسلم عليه خنقة أنا مش بحب كده أنا بحبه أة بس مش لازم أتمحلس له يعني

المهم نفسي كده أقعد مع نفسي أخلص الحاجات المطلوبة

المهم هو قالي هتخلص أمتي قلته يوم الخميس اللي جاي قالي ماشي هأسألك يوم الأربع عملت أية

بيهددني بسلامته ماشي يا هندسة

هتشوف

.

في اليوم الأخير من فبراير عملت شئ رهيب مسحت ناس كتير قوي من عندي علي الفيس بووك و الهوتميل و المدونة

ربنا يقدم مافيه الخير

ناس كتير جدا و مهمين قوي

يارب

.

كفاية كده بقة هأقوم أنام و أصحي بدري علشان أخلص الشغل اللي ورايا و ربنا يستر و أخلصه

بالمناسبة أنا جهزت إستقالتي و حطيتها في الدرج علشان أي كلب يفتح بقة معايا بالجزمة بعد كده و أقدم إستقالتي

مفيش حد ممكن يصحيني بدري

عاااااااااااااااا

أيام

السلام عليكم و رحمة الله و بركاته

أزيكم يا شباب أخباركم أية

يارب تكونوا بخير و في أحسن حال

و الله أنا مكنتش ناوي أكتب حاجة عن الموضوع ده لكني للأسف أتصلت بمفيد علشان أطمن عليه علشان العملة الهباب اللي هو عملها و في وسط الكلام سألني ليه مش بتكتب مفيش حاجة جديدة قال أية هو بيطمن علي لما باكتب بالرغم من إني في البوست اللي فات هو قراه و معلقش عليه علشان معرفش يقول أية المهم

البوست ده عن موقف حصل لي النهاردة أنا نزلت علشان أشتري حاجات و محتاجات المهم و أنا بألف في الميدان لاقيت واحد زمااااااان كنا بنقرأ قرأن مع بعض في الجامع في الفجر و بما إني كنت باسمع محمد جبريل كتير و كنت قبله بقرأ قرأن فكان مستوي القراية عندي أحسن منه الحمد لله و هو أكبر مني و متجوز و مخلف المهم قال و الله يا محمد أنت بتيجي علي بالي بصراحة الرجل أنا كنت بحبه بس لما قال لي كده حبيته اكتر و قلته أدعي لي و أخدنا الكلام و قلته هات نمرة الموبيل بتاعك بقة مادام أنا باجي علي بالك و أنا مكنش معايا الموبيل قلتله رني لي و أنا هأعرف النمرة المهم اللي خنقني قوي قال بص أنا هأكتب أسمك محمد مسجد الكلمة و جعتني قوي تخيلوا هيكتبني محمد مسجد و أنا حاليا مش بادخل المسجد ده غير يوم الجمعة بس

زمااااااان لما مكنتش راضي عن نفسي كنت بأصلي في الجامع و أصلي الفجر و أقرأ قران و أسمع قرأن و أقرا نص جزء قبل أما أذاكر دلوقتي المصحف الواحد بيشيل من عليه التراب كل أسبوع و مش بادخل المسجد غير الجمعة

تخيلوا زمان مكنتش راضي عن نفسي دلوقتي بقة أية حالي

هتقولولي طبعا كلنا كده و كلنا بنقرب و نبعد بس أنا من زمان قوي بعدت من أربع أو خمس سنين و معتقدش دي فترة سهلة ده الواحد كان ممكن يموت فيها و لا مليون مرة

تخيلوا كان هيسميني محمد مسجد و أنا ساعات في اليوم مش بأصلي غير الصبح

ده اية القرف ده

الله يسامحك يا مفيد ليه بس تقولي أكتب

و الله العظيم أنا أصبح حلم من أحلامي أكتب لكم هنا شئ كويس علشان أفرحكم أنا كرهتكم في عيشيتكم أنا عارف و نفسي بقة كده أكتب بقيت ناجح و سعيد و كويس و زي الفل علشان أفرحكم معايا مرة

معلش مين بس اللي بيقولكم أدخلوا هنا

حاجة تقرف

الإحتياج

إحساس الإحتياج إحساس صعب قوي

ممكن الواحد يكون نفسه في حاجة ويحاول يحققها و ميقدرش يحققها بس لو هو نفسه في حاجة و حتي محرم عليه المحاولة لتحقيقها شئ صعب أكتر

.

من ساعة أما عرفتها كان نفسي أي مناسبة تمر علينا علشان اجيب لها هدية للأسف عرفتها بعد عيد ميلادها و ملحقناش نوصل لأي مناسبة بعد كده غير مناسبة الفراق

الشئ الوحيد اللي هي حققته معايا و كان نفسي فيه كان اليوم اللي قضيناه مع بعض في حديقة الأزهر

انا كنت رحت قبل كده حديقة الأزهر مرة لوحدي و قعدت أصور صور مع نفسي و نزلت الصور دي هنا

و دعيت ربنا إني أجي مرة مع حد بحبه هنا و نقضي يوم مع بعض

و تاني مرة أقابلها أتفقنا نروح حديقة الأزهر

حسيت إنك قربتي مني قوي قوي قوي اليوم ده

.

معلش انت كنتي طلبتي مني السكوت و عدم كتابة أي حاجة عن تفاصيل بينا بس بجد اليوم ده يوم صعب قوي علي حاولت مكتبش بس لاقيت نفسي هأنفجر و مش عارف أعمل أية

فقررت أكتب

المهم اليوم اللي روحنا فيه حديقة الأزهر كان نفسي أطلع لساني للناس و للدنيا كلها و أقولهم خلاص مبقيتش لوحدي و مش محتاج منكم حاجة

بس للأسف الدنيا هي اللي بتتطلع لسانها ليا دلوقتي

.

في موقف غريب حصل لي اليوم ده أول مرة أقولك عليه اليوم ده كان يوم جمعة قابلت فيه واحد صاحبي بعد الصلاة من الطفولة و قعد ينصحني و يقولي الدنيا فيها حاجات كتير غلط و لازم نعمل الصح و نصحني إني أروح أتعلم علوم الدين في معهد و أحفظ قرأن غالبا علشان مسمعتش كلامه اليوم ده المفروض بعد اللي كان قاله لي مكنتش قابلتك بس أنا قابلتك فغالبا عقابي من ربنا علي اليوم ده الإحساس اللي عندي اللي مش قادر أوصفه لحد دلوقتي إحساس أقرب للموت و محاولة خروج الروح بس مش عاوزة تخرج حاسس إنها واقفة عند رقبتي و كل أما تيجي تخرج خلاص ترجع تاني و تاني

.

كان نفسي أبعت لك رسالة أقولك هابي فالنتين و اللي وجعني أكتر إني حسيت إنك مستنية إني أبعت الرسالة دي و أنا خذلتك و مبعتهاش بس هو ده الصح

.

في الأخر بقة لازم أعتذر لكل الناس اللي للأسف بتحترمني و بتدخل عندي هنا و أنا خذلتهم و خصوصا البنات منهم و نزلت نمرة تليفوني هنا و بعتها للي عندي إيميلاتهم

بس بجد كان نفسي أكلمها قوي و كنت باحاول بكل الطرق إني متصلش بيها و كان أحد الحلول إني أسمع صوت اي بنت أو أخرج مع أي بنت و ده اللي خلاني أنزل النمرة هنا

معلش سامحوني

.

ده حتي في بنت مالهاش علاقة بالتدوين حظها اللي مش كويس في يوم خلاها تتدخل علي مدونتي غلط و عجبها كلامي و ضافتني علي المسنجر و تخيلوا واحدة أول مرة تتكلم معايا أديها نمرة تليفوني هي تقريبا خلاص اخر مرة كمان و هي غالبا مش هتعرف توصل للمدونة تاني

أنا أسف لها بردوا

.

بس بجد أنا عاوزكم تعذروني و تسامحوني و تدعوا لي ربنا يخفف عني و يهديني و يرحمني

Happy

Valentine

أخر لغز

بعد سلسلة الألغاز السابقة اللي مش هيفهمها غير شخص واحد مش بيدخل هنا حاليا

هاكتب أخر لغز ملحوق بقصة تانية وصلت لي من الإيميل من واحد صاحبي علشان الأذكياء يمتنعون عن التخمين

.

اللغز الأخير

ياتري هوفعلا و لا حاجة تانية؟

لو فعلا هو زي ما بأحلم هل هو بداية جديدة ؟

و لا هو الحاجة التانية اللي خفت أسألها

و هتكون النهاية الحقيقة

ربنا يقدم مافيه الخير

.

هذه قصه قصيرة رائعة بعنوان
هكذا بدأت قصة الحب
للشاعر سلطان الرواد
كتبها عام 2001
وحازت على جائزة أفضل قصه قصيرة على مستوى جامعات الخليج العربي أترككم معها
فى قديم الزمان
‏حيث لم يكن على الأرض بشر بعد
‏كانت ‏الفضائل والرذائل ,
تطوف العالم معاً
‏وتشعر بالملل الشديد
ذات يوم وكحل لمشكلة الملل المستعصية
اقترح الإبداع لعبة
وأسماها الأستغماية
أو الغميمة
‏أحب الجميع ‏الفكرة
والكل بدأ يصرخ : ‏أريد أنا ان
أبدأ .. أريد انا ‏أن أبدأ
‏الجنون قال :- أنا من سيغمض عينيه
ويبدأ العد
‏وأنتم ‏عليكم مباشرة الأختفاء
‏ثم أنه اتكأ بمرفقيه على شجرة
وبدأ
‏واحد , اثنين , ثلاثة
وبدأت الفضائل والرذائل
‏بالأختباء
‏وجدت ‏الرقه ‏مكاناً لنفسها
فوق ‏القمر
‏وأخفت ‏الخيانة ‏نفسها في كومة زبالة
‏وذهب ‏الولع ‏بين الغيوم
ومضى ‏الشوق ‏الى باطن الأرض
‏الكذب ‏قال بصوت عالٍ :- سأخفي
نفسي تحت الحجارة
ثم ‏توجه لقعر البحيرة
‏واستمر ‏الجنون :- ‏تسعة وسبعون
, ‏ثمانون , واحد ‏وثمانون
‏خلال ذلك
‏أتمت كل الفضائل والرذائل
‏تخفيها
‏ماعدا ‏الحب
‏كعادته لم يكن ‏صاحب قرار
وبالتالي لم يقرر ‏أين يختفي
‏وهذا غير مفاجيء ‏لأحد , فنحن
نعلم كم هو صعب ‏اخفاء الحب
‏تابع ‏الجنون :- ‏خمسة وتسعون ,
ستة وتسعون , سبعة وتسعون
‏وعندما ‏وصل ‏الجنون ‏في
تعداده الى :- المائة
‏قفز ‏الحب ‏وسط أجمة من الورد
واختفى بداخلها
‏فتح ‏الجنون ‏عينيه ‏وبدأ
البحث صائحاً :- أنا آتٍ ‏إليكم ,
‏أنا آتٍ إليكم
‏كان ‏الكسل ‏أول من ‏أنكشف
لأنه لم يبذل أي جهد في ‏إخفاء
نفسه
ثم ظهرت ‏الرقّه ‏المختفية في
القمر
‏وبعدها خرج ‏الكذب ‏من قاع
البحيرة مقطوع النفس
‏واشار الجنون على ‏الشوق ‏ان
يرجع من باطن الأرض
الجنون ‏وجدهم ‏جميعاً واحداً
بعد الآخر
‏ماعدا ‏الحب
‏كاد يصاب بالأحباط واليأس في
بحثه عن ‏الحب
واقترب الحسد من الجنون , ‏حين
اقترب منه ‏الحسد همس في أذن
الجنون
قال :- ‏الحب ‏مختفاً بين شجيرة
الورد
إلتقط ‏الجنون ‏شوكة خشبية أشبه
بالرمح وبدأ في ‏طعن شجيرة
‏الورد بشكل طائش
‏ولم يتوقف الا عندما سمع صوت
بكاء يمزق القلوب
‏ظهر ‏ الحب من تحت شجيرة الورد
‏وهو يحجب عينيه بيديه والدم يقطر
من ‏بين أصابعه
صاح ‏الجنون ‏نادماً :- يا إلهي
ماذا فعلت بك ؟
لقد افقدتك بصرك
‏ماذا أفعل كي أصلح غلطتي بعد أن
أفقدتك ‏البصر ؟
‏أجابه ‏ الحب :- ‏لن تستطيع
إعادة ‏النظر لي , لكن ‏لازال
هناك ما تستطيع
‏فعله لأجلي
( كن دليلي )
‏وهذا ماحصل من يومها
يمضي ‏الحب ‏الأعمى ‏يقوده
‏الجنون

أخر فرصة

النهاردة أخر فرصة؟

مش عاوز أنكد علي نفسي

لو سمحتي

ممكن بعد إذنك؟؟؟