Sunday, November 09, 2014

كسل

السلام عليكم
 
الواحد بقاله فترة كده مش بيعمل حاجة إيجابية و لا أنشطة و لا قراية و لا إطلاع ده بالإضافة إلي ضياع فرصة الماجستير و عدم التطور في الشغل بصورة كبيرة فين أيام زمان الواحد كان كل سنتين في شركة شكل :) و مغامرات شكل إنما خلاص بعد الجواز بقة الإستقرار و التفكير بالعقل و بعد الخلفة كمان أصبحت الأمور أصعب و أصعب
و أساسا مفيش فرص كبيرة في البلد و بردوا الواحد بقي كسلان خلاص يعني أنا بأكتب البوست ده و أنا بأقاوم النوم بالرغم من إن لسه الساعة تسعة بس مفيش ماتشات النهاردة دي الحاجة الوحيدة اللي بتسهرني و أشتركت في كورسات تبع  الغرفة الأمريكية للتجارة و أهوة شهر نوفمبر و لسه مخلصتش و لا كورس و مش عارف أزود مهاراتي خالص و بالرغم من إن عندي وقت بس مش عارف أستفيد بيه بتيجي لي حالة كسل رهيبة في البيت
 
الموضوع اللي مضايقني بجد هو موضوع الماجستير ده كل شوية بيحز في نفسيتي أوي خصوصا إني كنت خلصت التمهيدي الحمد لله علي كل حال بس نفسي الموضوع ده أنساه خالص بس مش عارف إزاي أنا عارف إن مالوش علاقة بالشغل أوي لأن الشغل مختلف بس معرفش بيضايقني خصوصا كمان إن بابا كان نفسه أكمل في الماجستير جدا
 
الحمد لله علي كل حال و يارب أنسي و الأقي حاجة مفيدة تشغلني
 
 السنة دي جريت أوي مش عارف ليه بس كويس
 
دعواتكم ليا

Wednesday, October 22, 2014

أخيرا

السلام عليكم و رحمة الله

أخيرا هأكتب تاني هو أينعم ماتش ريال مدريد و ليفربول شغتل بس هأحاول ما صدقت نزلت نسخة الويندوز علشان كانت اتضربت بسبب الإعلانات و الاسبام
بس الحمد لله مفيش خسائر

من فترة طويلة أوي نفسي أكتب و مش عارف مفيش وقت مش عارف اليوم بيجري في أية
عندي أخبار كتير  و مواقف كتير و أحلام كتير و إيجابيات كتير و سلبيات كتير

نسيت أقولكم إن من أكتر الحاجات اللي خلتني أقل في الكتابة هي عدم التفاعل فبرجاء اللي يقرأ ينتش تعليق
و من الحاجات اللي شجعتني علي الكتابة موضوع رجوع يوسف و ماماته اللي قلب الدنيا و بوست من إنجي سمراء النيل و حديثها عن لقاءات المدونين في 2006 و في نفس ذات الوقت عدم مقابلة الشلة من فترة ليست بقصيرة

علي فكرة المعلق حفيظ دراجي اللي بيعلق علي الماتش ده خنيق أوي

الحمد لله الدنيا ماشية اليومين دول في الشغل كويس و مفيش أفكار تراودني عن تغيير الشركة و لا المجال حاليا بعد الجواز و الخلفة و كده

الحمد لله في فترة نفسية متزنة
ناقصني بس إني أجتهد شوية و مضيعش وقتي في كلام فاضي

ريال مدريد جاب جول
رئيسي في الشغل اليومين دول عاوز بوستات لوحده و حال الشركة اللي بأشتغل فيها كله محتاج بوستات لوحده و لا أبالغ لو قلت عاوز مدونة لوحده بإختصار هي عاملة زي مصر سرقة كتير كلام كتير خناقات كتير حقد كتير رضا وشغل قليل جدا

بس اللي لاحظته في تنقلي المهني إن كل أما المرتب يزيد حرص الناس علي الفلوس و المناصب و صراعاتهم تزييييييييييد جدا

مفيش رضا مفيش قناعة مفيش إقتناع إن الدنيا دي مش مستاهلة و مش مضمونة و المتعة اللي في الحياة  صدقوني مش في الفلوس و لا المناصب
المتعة الحقيقية في السعادة و السعادة مش بتيجي غير بالرضا و القناعة

يعني ممكن يكون واحد مليونير و يبص علي اللي عنده مليارات فيبقي تعيس
و ممكن يكون واحد عنده أوضه علي السطوح فيبص للي بيبات في الشارع فيرضي فيسعد

المهم التدوين وحشني أوي و ناس التدوين وحشوني أكتر

اليومين دول بقيت أحلم و أنا نايم و أفتكر الحلم و أصحي منتعش معرفش ده بسبب الشتا و لا أية
في أغاني بترن في ودني كتير اليومين دول زي علي قد ما حبينا و مدام معاي و أنا عايز صبية

الريال جاب التاني

هأعتبر البوست ده بداية العودة و ياريت أكتب لكم تاني قريب
وحشتوني و الله