Wednesday, December 31, 2008

نهاية عام

السلام عليكم و رحمة الله و بركاته
كل سنة و أنتم طيبين و بخير
باقي ساعة و شوية علي السنة الجديدة فكرت مكتبش خالص عن السنة اللي فاتت و يكون البوست ده مجرد أمنيات و أهداف و أحلام للسنة الجديدة بس بعد أما فكرت في السنة اللي فاتت لاقيتها من أهم سنين حياتي أو هي أهم سنين حياتي و يمكن تكون أكتر سنة في حياتي فرحت فيها بالرغم من نهايتها اللي مقدرش غير إني أحمد ربنا علي كل حال
يعني حتي النهاردة صحيت و أنا معنديش أجازات متأخر قوي علي الشغل و كنت ممكن أكون في موقف حرج في الشغل علشان معنديش أجازات بس الحمد لله ربنا ستر و جريت و لحقت أوصل في الميعاد و بالليل بردوا و أنا نايم أخويا دخل كسر لي المج بتاعي اللي كان عندي من رابعة إبتدائي و يمكن حادثة المج دي خليتني أعيد تفكيري في إرتباطي بأي حاجة في الحياة لأني أنا السنة دي فقدت حاجات و ناس كتير قوي كنت رابط نفسي بيهم بدرجة كبيرة و معتمد عليهم بس و ده يمكن يكون غلطي أو يكون إستفادتي من السنة دي
طبعا كمان يوم الأحد عمي توفي إلي رحمة الله ربنا يرحمه و إن شاء الله هيكون مثواه الجنة علشان هو فعلا كان طيب و مؤمن و ملتزم ربنا ينير قبره و يدخله في رحمته و يجعله مع الصديقين و الشهداء عمي كان متعود يجي لنا دايما يوم الجمعة بعد الصلاة علي طول كان شئ مزدوج مع حديث الشيخ الشعراوي رحمة الله عليهم هم الأتنين
يمكن يكون موت عمي مكنش مفجاة لأنه كان تعبان قوي و يمكن تكون دي الحاجة الوحيدة الكويسة في المرض إنها بتقلل من صدمة الفراق شوية يمكن مش كتير بس الواحد بيكون مستعد عكس موت الفجأة اللي سيدنا محمد صلي الله عليه وسلم إستعاذ منه
ربنا يرحمه
عظة الموت دي مش فاهم إزاي الناس و أنا منهم مش بنتعظ بيها يعني عمي ده الله يرحمه كان ممكن يقعد نازل طالع يسافر البلد و يرجع و يرجع يسافر تاني في نفس اليوم ده مرة كان عندنا و نزل و راح العتبة و جه مرتين في أقلل من ساعتين
و أنا كمان أشتركت في غسله و تصوروا الشخص اللي أنت بتكون شايفة داخل خارج قدامك تلاقيه قدامك كده كأنه حتة حجر و لا خشب تجيبه يمين و شمال زي ما تحب
سبحان الله
ربنا يرحمه و يجعل مثواه الجنة
*****
صورة إجمالية للسنة اللي فاتت
هي السنة اللي توثقت علاقتي بيها و قربنا من بعض قوي قوي قوي فوق ما أنا كنت بأحلم و أتخيل
الحمد لله و منساش عمري لما كانت الناس في الشغل تقولي أنت متغير ليه كده
يارب رحمتك بيا
ربنا يكرمها و يوفقها في حياتها الجديدة
و يارب و قدر لي الخير حيث كان ثم أرضني به
و طبعا مش هأقدر أقول عمري إنها تجربة فاشلة بالعكس هي أنجح قصة ممكن حد يعيشها لأني تحولت لإنسان أظن أنه أحسن من قبل كده بكتير إن شاء الله
و يارب الناس كلها تعيش تجربة زي تجربتي الناجحة دي بس تكون نهايتها أسعد إن شاء الله
.
هي السنة اللي تحولت فيها معرفتي بمحمد مفيد من مجرد شخص كويس أعرفه لصداقة و أخوة إن شاء الله تتدوم لأخر العمر
و يارب يكون لي ناس كتير زيه كده
فاهم يا منذر
.
هي السنة اللي زادت فيها معرفتي بالمدونين و صلتي بيهم و عرفت منهم ناس جديدة زي الفل
و طبعا هي السنة اللي سمراء النيل و طارق أتجوزا فيها
و السنة اللي منذر كمان أتجوز فيها
ربنا يبارك لهم جميعا
و هي السنة اللي هي اتجوزت فيها
ربنا يبارك لها
.
هي السنة اللي أشتركت فيها الحمد لله في أعمال خيرية و أتعرفت علي ناس و شباب زي الفل زي مروة و أمجد و الحسيني و أية و ناس تانية كتير مفيش حد منهم بيدخل هنا خالص غير واحدة بس و يمكن بقية الناس متعرفنيش كويس و لا تعرف المدونة و يمكن متعرفنيش أنا شخصيا بالرغم من إننا أتقابلنا كتير
ربنا يبارك فيهم و يجازيهم خير علي أعمالهم الصالحة و علي صبرهم علي في غلاستي و خنقتي
.
شكل البوست ده هينزل بعد السنة الجديدة ما تبدأ لذلك هأسرع شوية و يمكن أختصر بقة
.
هي كمان السنة اللي حدث فيها نوع من أنواع الصدام الحميد مع العيلة هنا
.
هي السنة اللي بدات أقرأ فيها و يارب تكون البداية فقط و أستمر للأخر
.
هي السنة اللي مبقيتش أخاف قوي لما اروح مكان جديد لوحدي و لا لما أقابل ناس جديدة و بقيت أتكلم مع أي حد مش قوي يعني بس أحسن من الأول الحمد لله
.
فشل السنة دي
فقدي لإنسانة قليل قوي لما الأقي زيها تاني بس بردوا الحمد لله
فشل في التمهيدي
فشل بسيط في الشغل
فشل إني أحوش فلوس الحقيقة
فشل في العبادة و العلاقة مع ربنا
.
أمنيات للسنة الجديدة
نفسي ترجع لي تاني أو أنساها خالص أو علي الأقل مش عارف أقول أية مهو أنا لو نسيتها هأنسي الحاجات الكويسة اللي أتعلمتها منها
يارب حلها لي من عندك أنا مش عارف أدعي بأية
يارب قدر لي الخير حيث كان ثم أرضني به
.
نفسي أخلص التمهيدي و أبدأ في الماجستير
.
نفسي أظبط الدنيا و الجو في الشغل
أنا هأطمع يارب و أدعيك بشغل تاني أحبه و أتميز و أنجح فيه قوي يارب
.
نفسي أقرا كتاب أسبوعيا
نفسي أقرا مجلة العربي كلها و أفهمها كلها
نفسي أقري حاجات معينة بتصدر يوم الرابع عشر من كل شهر و افهم معناها صح و بترمز لأية *
نفسي أخلص كورس الإنجليزي و أتكلم إنجليزي كويس و أكتب بوستات بالإنجليزي
نفسي أعرف كمبيوتر كويس قوي
نفسي أسافر كتير
نفسي أشوف البحر
نفسي أفرح يارب
.
يارب نفسي أفرح قوي و كتير و علي طول يارب بلاش حزن يارب
يارب فرح الناس كلها و خفف عنها
يارب أنت رب قوي و قادر و عبادك مذنبين ضعفاء و أنا منهم يارب فأغفر لهم و لي و أرحمنا
يارب رجعنا لدينا و أجعل الإسلام دستورنا في الحياة
يارب أرفعنا بالإسلام و أرفع الإسلام بنا
يارب أغفر لي ذنوبي و ضعفي و فشلي في الإختبار اللي أنت عملته لي السنة دي و يارب أكون أتعلمت منه
و يارب سامحني
و يارب أقبل توبتي و أقبلني يارب
الحمد لله
الحمد لله
الحمد لله

Monday, December 22, 2008

سواد وطني

السلام عليكم و رحمة الله و بركاته
أزيكم يا أصدقائي الأعزاء أخباركم أية يارب تكونوا بخير و سعادة
حاولت أغير الموضوع اللي بقالي شهرين عمال أتكلم و أحكي فيه حاولت و الله علشان خاطركم أنتم مش عاوز حد يزهق
:)
مش عارف بالرغم من إنه مفيش أي حاجة بس فرحان أو حاسس إني مرتاح مش عارف ليه يارب تكون بشرة خير من عند ربنا و يحصل اللي بأدعي به يارب الخير من عندك
يارب
يارب
يارب
.
نرجع لموضوع البوست كنت قاعد بأذاكر ورق كويس الإنجليزي فجاة خطر علي بالي البوست ده و بما إن النت كان فاصل فكتبته علي ورق و دلوقتي هأنزله
.
مصر هي
اللي كنت بأخد فيها دروس من رابعة إبتدائي و لما مدرس عرف إني بأخد درس عند مدرس تاني كان بيضربني قال أية علشان بألعب كورة في الشارع
.
اللي و أنا في ثانوي كنت بأشوف مدرس بيدخل يغشش واد بلطجي ابن بلطجية كان معايا في اللجنة
.
اللي بعد أما خلصت ثانوي و جيت أدخل كلية لاقيت صحابي اللي مجموعهم أقل مني دخلوا كليات خاصة أحسن من الكلية اللي دخلتها أو بيدفعوا فلوس علشان يدخلوا كلية سيادية
.
اللي و أنا صغير كنت بأخاف قوي لما نخرج علشان ممكن نركب أتوبيس زحمة
.
اللي كنت بأحب أعيا علشان مروحش المدرسة
.
اللي لما كانت جدتي تقولي روح هات لنا عيش من الفرن كان بيبقي أسود يوم في حياتي
.
اللي لحد دلوقتي لو حد قالي تعالي نعدي من قدام القسم قلبي يقع في رجلي
.
اللي هيرودت قال عليها هبه النيل و المتفزلكين قالوا مصر هبه النيل و المصريين النيل ده بقة مرتع للشواذ و القوادين و المدنين
.
اللي قنواتها الفضائية أصبحت قنوات لعرض بنات الدعارة و طريقة أدائهم
.
اللي بأفكر ألف مرة قبل أما أسيب الشغل اللي لو سبته مش هلاقي شغل تاني
.
اللي أول أما أتخرجت أشتغلت شغلانة اليوم بعشرين جنيه
.
اللي لما جيت أقدم للجيش بعد أما أتخرجت ملاقيتش و لا واحد عاوز يدخل جيشها و اللي يدخله كأن أبوه مات
.
اللي فيها لو الشريف سرق تركوه و لو سرق الضعيف قطعوه
.
اللي مفيش فيها شاب واحد بعد أما أتخرج قرر يقعد فيها
.
اللي بقيت أخاف علي أختي لو خرجت و مطمنش غير لو رجعت
.
اللي بأفكر مليون مرة قبل أما أتجوز علشان بأقول لنفسي الأيام اللي جاية هيكون شكلها أية و أية مصير أولادي؟
.
اللي كفاية عليكم كده علشان محدش ينتحر بسببي
.
في الأخر طبعا مقدرش أخلص من غير ما أقول لكم إن أنا
مصري
مصري
مصري

Friday, December 12, 2008

سلطة

السلام عليكم
النهاردة السبت
شغل يع و أنا متعود أخد السبت أجازة بس علشان العيد نزلنا بدري
أربعة مبروووووووك للأهلي
:)))
اليوم النهاردة عدي بسرعة غير طبيعية مش مصدق إن الساعة عشرة و عشرة و لازم أقوم أنام
قابلت مفيد أمبارح و أشتري كتاب مبسوطة يا مصر لأشرف توفيق
المهم النكد يعني
كانت هي قالت لي شريط علي الحجار الجديد اللي هينزل في العيد الكبير و الشريط نزل العجيب و الغريب إن علي مفتكرش يسجل أغنية علي قد ما حبينا اللي سمعتها و نزلتها و عملت عليها حاجات مش تمام غير في الشريط ده
سبحان الله
الحمد لله
أنا لسه مسمعتش و لا أغنية في الشريط غير التوزيع الجديد لعلي قد ما حبينا و طبعا معجنيش خالص و عمال أسمع التسجيل القديم بتاعها
في أغنية في الشريط أسمها دفا الأحزان أنا من أسمها خايف أسمعها أسمها حلو قوي و خايف تزود الحالة اللي عندي اللي هي مش ناقصة
.
نفسي أطمن عليها قوي قوي قوي بأي طريقة و مش عارف أعمل أية
حاسس إن في جديد خير شر مش عارف بس في جديد
جالي إحساس غريب قوي أمبارح بالليل مش عارف ده أية صح و لا غلط
.
نفسي الحياة ترجع بيا قوي قوي قوي لحد شهر سبتمبر 2006و كنت أفضل زي ما أنا و خلاص
أهوة دلوقتي بأقول لنفسي لا مترجعش حلو كده
.
جالي إحساس إني أقول دي أنجح قصة حب حد عاشها في حياته علي الأقل بالنسبة لي بالرغم من إن نهايتها مش مثالية
.
تعليق بسيط علي رواية شيكاجو أولا أنا أعجبت بيها جدا جدا جدا جدا جدا بس الغريب إنها كلها لقطات و مواقف جنسية ممكن يكون الكاتب يقصد بيها حاجة بس ده أنا مش فاهمة
السؤال بقة اللي بسأله لنفسي إزاي الرواية عجبتني للدرجة دي و أنا في نفس الوقت لما بأفكر في اللي مكتوب فيها باقول لا مينفعش يتكتب إزاي مثلا بنت تقرأ الكلام اللي مكتوب ده
يمكن ده اللي بيقولوا عليه مش فاكر و الله بيقولوا عليه أية
.
يلا تصبحوا علي خير
خدي دي عندك يا منذر
بعد يومين من حديث نميمة بيني و بين مفيد عن صديقنا العزيز و أخونا الصغنن منذر قررت أكتب البوست ده مش عارف هانزله أمتي بس غالبا بكرة علشان منذر لما يروح الشغل يوم الأحد يقراه و تصعب عليه نفسه و يخلي عنده دم و يتصل بيا
الواد منذر ده واحشني جدا جدا جدا من زماااااااااان قوي مشفتوش أو بمعني أصح محستش بيه أنا بقابله يعني كل فترة و لسه واخد منه شيكاجو اللي خلصتها أمبارح الحمد لله و هأكتب عنها بردوا بس شوية كده النهاردة الجمعة بالمناسبة و بكرة شغل يععع المهم بداية معرفتي بمنذر كان يوم ما قابلت مفيد لأول مرة و الحسيني لتاني مرة كان هو معهم بيني و بينكم قلقت منه قوي معرفش ليه حسيت إنه شيوعي مثلا و وراه مشاكل هو شكله كان يوحي بكده بنطلون جينز و تي شيرت رصاصي علي ما أتذكر و شنب عجيب و دقنه مش محلوقة المهم طبعا قاعد طول القعدة مقلق منه و الغريب إني توقعت إن عنده علي الأقل تلاتين سنة و أكشتفت بعد كده إنه لسه صغنن و لسه متخرج
منذر كان شعلة نشاط و حركة و حماس يتصل يقولي تعالي نروح القرصاية أنا لسه جاي من كفر العلو أبناء مصر نزلت شغل جديد أنا كتبت مش عارف أية مش عارف مين عمل أية مع أية كنت النهاردة في مظاهرة غطيت النهاردة حادثة كذا هتيجي النهاردة يوم دار الكتب مش هأروح الشغل يوم 6 أبريل سمعت الهاتك بامر الله لعبدالرحمن يوسف و هكذا و هكذا
من فترة منذر ده أختفي تمام مش عارف راح فين و مش عارف أية السبب لدرجة إني تخيلت إنه كان بيخدعنا مثلا بس قلت لا هيخدعنا ليه يعني بس اللي نفسي فيه دلوقتي منذر يرجع فاكر يا منذر يوم ما ضحكت عليك و مشيتك من القرصاية لحد البورصة و توهتك في المنيل و أكلنا عند مؤمن السندوتش الغريب اللي أكلناه ده لدرجة إني من ساعتها كرهت مؤمن و مش بأحب أكل من عنده تاني و فاكر الظرف الأصفر و فاكر الظرف اللي نسيته عند مؤمن و كنا هنروح في داهية بسببه
أرجع يا زوزو خلي عندك دم
متتصورش فرحتي قد أية يوم ما جيت لنا عند مفيد اليوم المشهود
أخيرا يا منذر ربنا يكرمك متتصلش بيا تسألني في أي حاجة في البوست ده علشان مش هأعرف أكلمك و لا أشرح لك اللي عندي قلته تسمع له أهلا و سهلا متسمعوش براحتك طبعا
و ياريت متزعلش

Thursday, December 11, 2008

هلاوس عيد 2

متهيألي مفيش حد غيري بيدون في العيد حتي الناس اللي بتتدخل علي النت في العيد مش بتفكر تتدخل علي المدونات
.
حاسس إني هأتجنن خلاص
.
نفسي أحط صورة واحد ماشي علي شريط قطر و مدي ضهره للناس و ماشي و ماشي و ماشي
.
ساعات بأحس إني بدأت أرجع زي مسلسل سارة في أخر حلقة و الغريب إني بأحس بالموضوع ده جسديا بجد
.
طبعا صحابي نكدوا علي أهلي أمبارح أو أول أمبارح بالتحديد و رحنا قريب من بيتها قوي قوي قوي
.
عمال باهبل و أعمل حاجات غريبة
أضيف ناس علي المسنجر
أرخم علي ناس في الفيس بووك
محدش يزعل
أعذروني
ضايع
.
بأدعي ربنا إنه لو أختبرني تاني بأي حاجة مكنش بالضعف و القرف اللي كنت عليه في الموضوع ده
.
زهقااااااااااااااااااااااااااان
.
حاولت أشغل نفسي بس بردوا بألف ألف ألف و أتعب نفسي و أجهد نفسي بس بردوا أرجع و أعمل بلاوي
محدش يسأل أية البلاوي دي
.
تعبااااااااااااااااااااااااااان
.
الحمد لله علي الأيام الجميلة معها
.
كنت حسيت خلاص إني فقت و الدنيا أهيه هتمشي
أية اللي حصل بس
.
تخيلوا دخلت نمت حوالي ساعة منها نص ساعة عياط و لا يهمني و نص ساعة نوم و صحيت فايق جدا و كتبت البوست العبقري ده
.
مش عارف أعمل أية؟
ده أنا حتي مش عارف نفسي في أية؟
بالرغم من إني لسه معيط بس نفسي فيه تاني
:)
.
أنا يمكن مكنتش فارق معها
بس هي كانت كل حاجة بالنسبة لي
يمكن ربنا حرمني منها علشان كده
.
حاسس إني هأخسر ناس كتير قوي قوي قوي الفترة دي
ربنا يستر
.
نفسي الواحد يكون عنده المقدرة يقول ستوب و أفكر في اللي حصل لي و أعيد حسباتي بس ده شئ صعب أقرب للمستحيل
.
تعرفوا أجي أستغطي باللحاف أكون حران جدا و أتخنق منه و أجي أشيله من فوقي أبرد جدا
.
يااااااااااااااااااااااااااااااااااااااااارب
هو أنا لو دعيتك ترجعها لي يبقي غلط
أستغفر الله العظيم
أةةةةةةةةةةةةةةةةةةةةةةةةةةة
يارب
يارب
يارب
يارب
يارب

Tuesday, December 09, 2008

هلاوس عيد

السلام عليكم
كل سنة و أنتم طيبين أخوكم محمد مفيد كان هيخليني أكتب لكم بوست نكد بسبب الكومنت اللي سابه لي علي الفيس بووك تعليقا علي حالتي بس الحمد لله سيطرت علي نفسي و قلت بلاش ننكد علي نفسنا و علي الناس الطيبة اللي هنا في العيد
بالمناسبة معرفش فايدة البوست ده أية؟
طبعا لحد دلوقتي مخرجتش في العيد غير إني يوم الوقفة خرجت قابلت واحد صاحبي متعودين نتقابل كل وقفة عيد مع بعض من و إحنا في ثانوي و بما إننا إحنا الأتنين مكنش لينا نفس تخرج قررنا نتقابل لعدم قطع عادتنا بس ننزل نقعد علي أي قهوة في شارع شبرا
.
و من ساعتها مخرجتش غير لصلاة العيد اللي الشيطان كان خلاص هيخليني مصلهاش بس الحمد لله قدرت عليه
و ننسي بقة موضوع الصلاة و اللي أفتكرته و أنا بأصلي علشان منكدش عليكم
أنسي أنسي أنسي
.
المهم من الصبح لحد دلوقتي قاعد قدام الكمبيوتر مش لاقي حاجة أعملها كنت دخلت أمبارح علي موقع هي اللي قالت لي عليه المهم بلاش نكد بردوا نزلت منه كتاب في الإختبارات مهم قوي و قاعد باقلب فيه شوية و أدخل علي الفيس بووك شوية و رخمت علي واحدة علي الفيس بووك و حاولت أتكلم معها بس هي غالبا موافقتش يعني
و بردوا من يوم الوقفة عمال أرخم علي واحدة تانية صاحبتنا و مش عاوزة ترد علي
متقلقوش مش اللي في دماغكم
.
طلعت في دماغي بقة دلوقتي أعمل مشروب خزعبلي دلوقتي هو قهوة بالقرفة معرفش في حاجة كده فعلا و لا لا بس أنا جربتها مش عارف طعمه أية الحقيقة يعني
الكم يوم اللي فاتوا كنت كل أما اكون برة البيت أقول نفسي أشرب قهوة لما أروح و طبعا مبيحصلش أنا مش بأحب القهوة قوي يعني بس كل فين و فين لما تهف علي طبعا أنا مدمن نسكافيه بلاك مش عاوز أقولكم لأي درجة
الإختراع ده عجيب قوي اللي هو قهوة بالقرفة أهو أي عك و خلاص
.
في كلمة نفسي أقولها قوي مش عارف ليه كتبتها كبداية لبوست كنت ناوي أسميه خواطرجامدة جدا كان هيضم حاجات كتير بس مش قادر مكتبهاش هنا دلوقتي علشان شكلي مش هأكمل البوست التاني ده
مش كل واحد بيحب حاجة يبقي لازم يكون متفوق و ناجح فيها و لازم نقتنع بالموضوع ده جدا
و في نفس الوقت ياريت مش كل أما تقوم هوجة في حاجة نلاقي الناس كلها وراها
دي حاجة
الحاجة التانية ياريت منحاولش نفرض رأينا و تفكيرنا علي اي حد حتي لو عن طريق إننا نحجب عنه بعض الحاجات و الظروف اللي تأثر علي رأيه و فعله و منفرضش حاجات من دماغنا و نقول هو هيعمل كده أو حتي أنا شايف إن ده صح ليه
مش بمزاج اي حد يتحكم في حياة أي حد بأي طريقة حتي لو في نيته خير
.
كفاية كده سلام

Monday, December 08, 2008


كل سنة و أنتم بخير
ربنا يغفر لنا جميعا و يتقبل منا
ويرزقنا زيارة بيته الحرام
ربنا يجعل أيامنا كلها عيد و سعادة و فرحة و طاعة
يااااااااااااااااااااااااارب

Friday, November 28, 2008

فضفضة من بتوع زمان

السلام عليكم
ازيكم يا شباب أخباركم أية؟
يارب تكونوا بخير
عندي كده كم موضوع نفسي أقولكم عليهم
أولا أحب أطمنكم أنا غالبا تخطيت مرحلة إفتقادها من ناحية التعود علي عدم وجودها بس اللي مش متخيلة إني ممكن الأقي حد أي حد ممكن يجي مكانها هي دي المشكلة القائمة
و بالنسبة لموضوع التعود علي عدم وجودها مشكوك فيه علشان أخوكم حاليا مشغول بحاجة تانية و هي موضوع الشغل و إن شاء الله هأقدم الإستقالة يوم الأحد و ربنا يستر هي الشركة التانية بعتت لي عرض الشغل خلاص بس اللي مش عارفة الشركة اللي أنا فيها دلوقتي هتخلص الإستقالة بسهولة و لا لا و طبعا لو لا الشركة التانية مضمنش ممكن تستناني لحد أمتي أنا يعني مش أحمد زويل
يلا ربنا يستر
أخوكم في حالة عجيبة
لدرجة إن الحلاق أمبارح و أنا باحلق قالي مالك تحت عينك أسود ليه قلتله من قلة النوم قالي فاضي شوية و أنا أظبطك قلتله فاضي علشان مكنتش عاوز أروح علي طول هأقولكم ليه بعد شوية المهم سيبت نفسي للحلاق من الساعة حداشر و نص لحد الساعة واحدة و ربع معرفش كان بيعمل أية و أية الفرق بس السواد اللي تحت عينيا راح شوية الحمد لله
سبب السواد ده غالبا إن أنا مهما أنام لازم أقلق طول الليل و بأصحي بالأقي نفسي فايق جدا بس مش باكون نمت كتير يعني لو دخلت نمت الساعة حداشر لازم أقلق الساعة واحدة لو دخلت نمت الساعة سبعة لازم أقلق أكتر طبعا بالمناسبة نمت الساعة سبعة يوم ماتش الأهلي للأسف مشفتوش و هو بيتغلب يمكن النحس عندي
المهم بأصحي كمان الأقي نفسي في وسط التفكير يعني بأفكر و أنا نايم
و اللي مضايقني أكتر إني بقالي فترة طويلة قوي مصلتش الفجر في الجامع و نفسي أصليه في الجامع أصحي و أقلق دايما بيكونوا بيصلوا
.
تخيلوا الرجل اللي مطفشني من الشغل بقالي سنتين و شوية في الشغل و عارف إنه ساكن قريب مني و النهاردة أشوفه بيصلي الجمعة معايا و بالمناسبة هو مسافر يحج يوم الأتنين يعني لو أستندل و ممضاش الإستقالة يوم الأحد يبقي أنا كده لبست و لا مني طولت الشغل الجديد و لا ينفع أرجع الإستقالة و ربنا يستر
و بمناسبة إنه مسافر يحج ربنا يهدي بس أنا إن شاء الله ماشي ماشي
.
الشغل الجديد بالنسبة لي تحدي شخصي علي إنه مش فارقة
بس بيني و بينكم لو جد في الأمور أمور و ملحقتش الشغل بعد الإستقالة محدش منكم يدخل هنا المدونة هتبقي بلااااااااااااك أكتر من اللي هي فيه
الشغل ده مهندس إنتاج يعني بأتعامل مع عمال من جميع الأنواع و ناس أقل و أعلي منك في التربية و التعليم و الشغل في حركة و تنطيط و سهر و ورديات و بلا أزرق و ربنا يستر بردوا
بس أنا مرتاح للشركة الجديدة إن شاء الله شكلهم عندهم نظام محترم و عندهم حاجات بسيطة توحي إنهم ناس بتفهم و بتستغل كل حاجة صح و ده طبعا لأنها شركة خاصة بتاعت واحد له مجموعة كبيرة و دي شركة صغيرة من شركاته هو نشاطه الأساسي مش في مصر و ربنا يسهل
يعني مش مال سايب زي الشركة اللي أنا فيها يعني حتي لو الرجل بهدلني هيبقي أسمه بفلوسه لا مؤاخذه يعني
و ممكن أنتقل للمعيشة لوحدي قريب من الشركة و أخد شقة و أقعد هناك علي طول
.
البيت بقة
ركزوا معايا قوي
حصلت أمبارح مواجهة عنيفة ليست في الصوت لكن في الموقف نفسه أنفجرت في بابا و ماما بس مش بقلة أدب الحمد لله قلتلهم كل حاجة خنقاني
بالمناسبة كنت قلت لبابا كمان عن القرف اللي في الشغل اللي كنت شايلة في قلبي من سنتين وشوية
المهم كانوا بيقولولي علي موضوع و قالولي الموضوع ده لسه قريب و مكناش عاوزين نشغلك علشان موضوع الشغل قلتلهم موضوع الشغل ده من أربع أيام والموضوع ده من أمتي قالولي من قريب قلتلهم لا مش من قريب الناس كلها تعرف و مين جه كلمني عن الموضوع ده الموضوع ده و أنا أضطريت أعمل نفسي عارفو الموضوع ده بقالوا تلات أسابيع بأمارة كذا و كذا و حصل كذا و كذا و محدش رد و انتم كذا و كذا هم أنتم فاكرين إني هأزعل ليه
الغريب بقة إنهم مردوش يعني أنا صح و هم غلطوا في حقي و هم مقالوش السبب و مش مشكلتي السبب المشكلة الأكبر إن أنا كنت متخيل بالمناسبة أنا مكنتش متخيل اليوم ده يجي أصلا الغريب فعلا إن انا مش مرتاح مش عارف ليه بالرغم من إنا قلت كل اللي كان نفسي فيه و هم مزعلوش مني و لا غلطوني بس أنا مرتحتش مش عارف ليه؟؟
يلا معلش دوشتكم شوية كمان
و متنسوش الدعوات علشان لو الشغل حصل فيه لغبطة هتشوفوا أيام هنا مش عاوز أقولكم و بالمناسبة لو أشتغلت الشغل ده غالبا هأغيب شوية علشان هتبقي الدنيا طحن و بهدلة
يلا تصبحوا علي خير
و أياكم تنسوا تصوموا أيام ذي الحجة اللي هتبدا من بكرة إن شاء الله
كل سنة و أنتم طيبين
:))))))

Sunday, November 23, 2008

صوتك أمانة بجد مش كلام

أزيكم يا شباب
مش عارف أعمل أية في شركة قبلتني عندها
دلوقتي بقة مش عارف أروح و لا لا
إن شاء الله هأصلي صلاة أستخارة
بس عاوز تفكيركم معايا بردوا
.
ملاحظات
الإستقرار القديم
الفلوس الجديد مش فرق كبيرقوي يعني لو في فرق هيكون قصاد السهر لو في سهر
الخبرة الجديد
الراحة النفسية هي معدومة في القديم
أنا نفسي أغير
ياريت رأيكم بسرعة النهاردة قبل بكرة علشان مفيش وقت قدامي
و أيا كان أختياركم متنسوش الدعاء

Wednesday, November 19, 2008

أنا تعبااااااااااااااااااااااااااااااااااااااااان
قويييييييييييييييييييييييييي
و الله
أةةةةةةةةةةةةةةةةةةةةةةةة
دعواتكم يمكن ربنا يستجب منكم أنتم
يااااااااااااااااااااااااااااااااااربي

Saturday, November 15, 2008

بيني وبينك

اولا أنا عارف إن أنا تقلت عليكي قوي في الكم بوست اللي فاتوا دول و ممكن أكون حملتك أكتر من طاقتك
و ممكن اكون ضايقتك في وقت تكوني فرحانة فيه
بجد أنا أسف سامحيني علي ضعفي اللي أنت متعودة عليه دايما مش عارف إزاي كنتي مستحملاني
.
أية رأيك في الأغنية اللي فاتت دي بأفهم صح
:)
.
أنا حاليا بأقرأ في يوتوبيا و لما تخلص هأقرأ شيكاجو و بأتصفح كل كم يوم كده كم ورقة من العربي أوعي تكوني مش جبتيها بس مش عارف أقرأ أية بعد كده
.
بأسمع مارسيل يا نسيم الروح و قالو مشت و موسيقي أسمها مداعبة لمارسيل بردوا هي جميلة قوي و رباعيات علي و جاهين
.
الحمد لله أنا كويس عن الأول في العلاقة مع ربنا
و الحمد لله بردوا علي كل شئ بس مش كويس في إني فقدتك
.
في حد أول ما بدأت أتكلم عنك علق و قال إن كل حاجة في الأول بتبدأ صغيرة و بعدين تكبر ماعدا الحزن بيبدأ كبير و بعدين يصغر
للأسف القاعدة دي مش عاوزة تشتغل معايا خالص
.
عملت بطل و مسحت الإيميل بتاعك من علي المسنجر بس طبعا طلعت عيل و مقدرتيش و رجعته تاني
و الله مسحت نمرتك بس للأسف حافظها
.
عارف بردوا إني قليل الأدب و الذوق و كل حاجة و لسه بأتقل عليكي و بأتعبك بس معلش أنت الكبيرة بقة
و عارف إن في ناس كتير قرفانة مني و بقيت غالبا مش طايقاني و ندمت إنها دخلت عندي في يوم حتي لو مرة غلط بس بجد أنا مش قادر و بادعي مفيش أي إنسان في الدنيا يتعرض للي أنا فيه
.
هأطلب منك طلب غالبا مش أخير يعني
أستحمليني الفترة دي لحد ما ربنا يريد يخفف عننا

يا نسيم الريح
شعر:منصورالحلاج
مارسيل خليفة
***
يا نســــيم الريح قولي للرشــــــا
لـــــــم يزدني الورد إلا عطشـــا
لي حـبيب حبـــه وسط الحشــــا
إن يشـــا يمشي على خدي مشى
*
روحه روحي وروحي روحه
إن يشا شئت وإن شئت يشــــــا
*
يا نســــيم الريح قولي للرشــــــا
لـــــــم يزدني الورد إلا عطشـــا
لي حـبيب حبـــه وسط الحشــــا
إن يشـــا يمشي على خدي مشى

Tuesday, November 11, 2008

تحديث بسيط علي البوست اللي فات
و الله حاجة تتضحك فعلا
تخيلوا أول درس في الكورس النهاردة كان أية؟
LOVE and MARRIAGE
تعليق بسيط
لاقيت كل الصفات اللي الواحد بيحتاجها في مراته فيها و زيادة و لا قيت و لا صفة من الصفات اللي ممكن تكون في اللزوج فيا

علشان تعرف بس إنه مش بمزاجي يا مفيد

بجد ياريت أنت متقريهوش
بجد
أزيكم يا شباب معلش هي ماسورة بوستات و فتحت قال كنت عاوز أبطل كتابة قال
المهم
.
أنا هأحكي الموقف ده بس علشان خاطر مفيد يعرف إن أنا مش بمزاجي و مش كيف عندي تعذيب نفسي هو هيقولي بردوا مش هأعلق و ممكن يزعل مني بس أنا بأقوله متزعلش و متفتكرش أنا مبسوط كده و مش ناقصة كمان في الظروف دي نتخانق مع بعض و طبعا في الأول و في الأخر أنت حر طبعا و تعمل اللي أنت عاوزة
و أنا أسف لو كنت زعلتك
.
الموقف بقة
طبعا أنتم عارفين إن أنا في دورة حاليا في الدقي و أول يوم نزلت أتمشيت في حديقة الأورمان و غالبا حيكت لكم و كنت عديت علي شغل منذر في وسط البلد و أنا مروح و فكرت أنزل و قلت بلاش
قدرا منذر أتصل بيا أمبارح حكيت له قال ليه معدتيش و كده المهم أخدنا الكلام و قلتله أنا هأروح المكتبة اللي هأبدأ فيها الكورس النهاردة بدري علشان أقرأ شوية في شيكاغو قال يابني هي عندي عدي علي بكرة في الشغل و أنا أجيبها و تاخدها قلتله تمام بعد الدورة ما خلصت النهاردة قلت أروح له فكرت مركبش المترو علشان منزلش التحرير و أمشي حتة معينة لاقيت واحد معايا في الدورة بيقولي تعالي معايا التحرير علشان عندي مشوار في وزارة الصحة قلتله طيب و أمري لله طبعا سيبته بعد كده علشان أروح لمنذر عديت علي بي تك اللي مرة رحنا مع بعض علشان ندفع إشتراك النت و لو أخدتي بالك أنا بعدت علشان مضايقكيش و أعرف النمرة ياريت تكوني أخدتي بالك المهم كمان النهاردة المفروض أدفع إشتراك النت بتاعي أنا لو تفتكري أنا سيبت الناس اللي كنت مشترك معهم علشان كانوا بيقطعوا علينا الكلام و كمان كان نفسي نروح ندفع إشتراك النت مع بعض لذلك حاولت أظبط معاده مع ميعاد الدفع بتاعك بس و قدرت فعلا بس للأسف ملحقناش نعمل حاجة الحمد لله مشيت خطوتين و أفتكرت إن انا المفروض ادفع الإشتراك دخلت دفعته و علي فكرة غيروا مكانه بقة علي اليمين أول تتدخلي و قعدت أمشي بأيدي علي المكان اللي قدام الرجل يمكن تكون أيدك لمست الحتة دي قبل كده و دي كمان عادتي في محطة المترو القريبة منك لما
بأروح هناك
.
و إني دخلت دفعت الإشتراك هي دي الحاجة الوحيدة اللي عملتها بمزاجي يا مفيد يعني هي الظروف الي مش عاوزاني أنسي أي حاجة مين قال لمنذر يكلمني أمبارح و مين قالي لصحابي يروح وزارة الصحة النهاردة و مين قال إن النهاردة يكون أول يوم أقدر أدفع فيه إشتراك النت يعني لو ده كان حصل أمبارح مكنش ينفع أدخل النهاردة
متفتكرش أنا مبسوط كده
.
تعرف أنا أمبارح عملت أية نزلت طبعا أساسي علي البستان قعدت شوية لاقيت الدنيا لسه بدري رحت ماشي و ركبت أتوبيس مكيف و كان نفسي أنام فيه و دعيت ربنا أنام فيه مصحاش بس للأسف منمتش خالص أساسا و وصلت لميدان تريومف و نزلت ركبت و رجعت علي البيت
فكرك أنا مبسوط بإني بألف في الشوارع زي المجانين كده
.
عارف هتقولي اية
تعرف أنا حتي فكرت إنها مكنتش بتفكر بيا و مش مهتمة بيا و عادي أنا بالنسبة لها لاقيت نفسي بردوا محسيتش باي تحسن كانت بتعلمني حاجات كتير قوي أكتر حد غالبا أتعلمت منه في الفترة البسيطة اللي قابلتها فيها دي كل حاجة بأعملها بتفكرني بيها هي علمتني أستمتع بالأكل و الشرب يعني علشان مفتكرش انسي يبقي ما أكلش و مشربش و معملش حاجات كتير حلوة أتعلمتها منها
.
نفسي أعيط قوي في حضن حد أي حد و الله أمبارح فكرت أقعد جنب أي ست كبيرة في الأتوبيس و أقولها ممكن أعيط جنبك بس الحمد لله معملتش كده علشان متفهمش غلط
:)
النهاردة بقة كنت فرحان شوية مش عارف ليه هي أينعم بعد البوست الكئيب ده خلاص باعيط و هأقوم أنام علشان محدش يشوفني بس كنت فرحان مش عارف ليه يمكن علشان الثلاثاء و انا بأحب يوم الثلاثاء علشان ده اليوم اللي أتولدت فيه الغريب بردوا إنه كان يوم فرحها و تخيلوا عدي عليه أهوة ما يقرب من شهر كل ده شهر بس
و أنا زي ما أنا
يلا الحمد لله
.
معلش يا شباب خانقكم أنا شوية بس مفيد بردوا غالي عليا و عاوز أشهدكم عليه علشان هو زعلان مني و حد يفهمه إنه مش بمزاجي
.
أنا حاليا مش بافكر غير في الموت بطريقتين تعتمد علي الحالة مع ربنا لو كويسة بأدعيه بطريقة طبيعية لو مش كويسة بتكون فيه بس بطريقة صناعية محدش يقلق أنا أجبن من إن أنا أعمل كده إن شاء الله يعني بس دعواتكم معايا علشان ربنا مضيقها علي قوي اليومين دول أكيد لحكمة عنده أنا مش عارفها بس أنا مش قادر أستحمل ده كله
.
يارب وجودي أو عدم وجودي في الحياة مش هيفرق مع أي حد جامد يعني و بعدين أنا عمال أتزفت من قرف لقرف كفاية علي كده يارب
يارب أنا مش عاوز أبعد عنك أكتر من كده و لا حتي كده نفسي أقرب زي زمان يارب في أية يارب أنا يعني معملتش حاجة علشان يكون عقابي كده يارب أنا كنت أفتكرت خلاص إنك هتفرحني علي طول و مفيش وجع تاني
يارب
أستغفر الله العظيم

Monday, November 10, 2008

ذنب أهون من ذنب

السلام عليكم
أزيكم يا شباب
انا باكتب البوست ده علشان في حاجة غلط عملتها و مش عاوز أعملها تاني
أنا أسف
.
محدش يسألني أية الذنب اللي أكبر من الكلام اللي هأكتبه من دلوقتي لحد أمتي مش عارف بس الفترة دي هتبقي بوستات صعبة قوي و ياريت متقريهاش و محدش منكم يقراها و محدش مرة تانية يسألني أية اللي ممكن يكون غلط أكبر من البوستات دي فاهم يا مفيد
.
و ياريت أنت كمان تفهمي أية اللي أنا أقصده من البوستات دي و اللي مش هأقدر عمري أقوله
مش عارف نفسي تقري و لا متقريش البوستات دي
يلا مش مشكلة أنت طبعا هتقدري تتقرري أية اللي هتعمليه
شاطرة طول عمرك طبعا
.
طبعا أيام الويك إند بقيت أقضيها علي البستان بالمناسبة غالبا الحاجة غليت
:)
المهم يوم الخميس كنت تعبان و مقدرتيش أنزل و الجمعة و السبت طبعا قضيتهم هناك
المهم يوم الجمعة بعد ماتش الزمالك الزبالة أخدت دش و نزلت جري علي البستان قعدت شوية و سمعت كم أغنية و لاقيت نفسي عاوز أقوم بس مش عاوز أروح هي بقيت صفة ملازماني حاليا إن أنا مش عاوز أروح المهم قلت تعالي نتمشي مشيت الأول في إتجاة التحرير خطوتين قلت ما تيجي نمشي العكس رحت راجع و مشيت الطريق اللي أنا فكرتك بيه اللي في طريق الدكتور بتاعك المهم مشيت و بعد كده وصلت لحد مكان اللي كنت بأكرهه علشان بأسيبك فيه مش عارف ليه عمرنا ما سلمنا علي بعض و إحنا مروحين كنتي تقوليلي سلام و تمشي كأننا بنتقابل كل يوم و هنتقابل بكرة المهم قلت يلا بقة أروح كالعادة
مش عارف لاقيت نفسي أمشي في طريق بيتك قلت تعالي و نشوف هأعرف أوصل للبيت و لا لا طبعا أنا عارف تفاصيل بسيطة جدا بس الغريب إني وصلت و شفت بتاع اللبن و شفت العمارة العالية اللي قدام الجامع و شفت المدرسة و شفت عربية حمرا غالبا عربيتكم و كانت المنطقة هادية جدا و مش عارف ليه حسيت إنك هنا و هتشوفني و أستنيت ترني علي بس محصلش
هو أنت كنتي هنا
:)
و طول ما أنا ماشي كنت عمال أقول لنفسي هي كانت بتشوف الحاجات دي إزاي و نظرتها لأي حاجة إزاي و المحل ده كانت بتقول عليه أية في سرها
.
عارف كلام زبالة اللي بأقوله و ياريت محدش منكم يكمل لأن غالبا اللي جاي أنيل و أزبل
.
و أنا راجع كنت فرحان قوي و سبحان الله رجعت بسهولة بالرغم من إن الوقت كان أتأخر و أنا ماشي في شارع شبرا دعيت ربنا و أستشفعت بسيدنا محمد إني أروح أنام و مصحاش تاني و كنت فرحان قوي و حسيت إنه خلاص فعلا ربنا هيستجيب لي و مش هيطلع علي صبح السبت بس للأسف فعلا واضح إن ربنا مش راضي عني خالص و غالبا الشيطان بقي مسيطر علي بصورة كبيرة
.
أنا ممكن أكون تخطيت مرحلة أفتقادها بس حاسس إني مش قادر أعيش مبقاش لي نفس في أي حاجة نفسي مروحش نفسي مشتغلش نفسي أقعد كده و خلاص نفسي أموت مبقاش لي نفس في الحياة و الله يارب مش معترض علي حكمك خلاص الحمد لله اللي حصل حصل و ربنا يسعدها بس مش قادر أعيش من غيرها و حاسس إني عمري ما هأفرح تاني كده أنا راضي بقسمتي و شوية الفرحة اللي أنت أنعمت بيهم علي بس أنا مش عاوز حياة تاني خلاص
.
و أنت كمان شايف حال الناس كلها مع بعض و شايف حال الناس و الدنيا معايا و أنا بجد مش قادر
.
يارب متكونش أتخليت عني أنا عارف إنك غالبا أتخليت عني و سيبتني للشيطان خلاص يعمل فيا اللي هو عاوزة و أنا كمان مبقيتش أقاومه علشان أنا خلاص معنديش أي قوة لمقاومة أي شئ و مش عاوز أقاوم أي شئ
.
عارف طبعا في ناس كتير قوي غالبا كلكم هتقولوا علي تافهة قوي و أهبل و عبيط بس مش فارقة خلاص يمكن أنا اكون فعلا كده و في ناس تانية همومها أكبر من همي التافهة بكتير بس أنا ضعيف و مش قادر أستحمل الهم البسيط ده
و في ناس هتزعل مني و في ناس هتندم إنها عرفتني
للناس دي كلها أنا اسف حقكم علي
.
ربنا عالم بالحال بعت لي دورتين في الشغل علشان يأخر مرحلة الصدام هناك و الإنفجار اللي أنا مستنيها في أي لحظة النهاردة الدورة التانية بدأت هي في الدقي بعد أما خلصت دخلت حديقة الأورمان و لفيت فيها شوية معرفش كان نفسي أدخلها علي نفسي مروحش علي نفسي كانت تبقي معايا علي نفسي أشوف ناس بتحب بعض حتي لو بتضحك علي بعض
و طبعا و أنا مروح قعدت بردوا أبص علي كل حاجة و أقول هي كانت بتبص للحاجات و هي مروحة من الكلية إزاي و أبص قدامي ألأقي القلعة و المقطم و كل أما أمشي ألأقي محلات بأسمك
.
أنا مش عارف تايهة ليه و مش عارف أكتب أو بأكتب كده و خلاص من غير ترتيب و تفكير
في مشروع شغل جديد مقدم فيه يارب أقبل حتي لو طلع أزبل من الشغل اللي أنا فيه أهوة اسمي هأضيع شوية وقت في معرفة المكان حتي لو بعد كده قعدت في الشارع أبيع لب و كمان مواعيده أطول من الشغل اللي أنا فيه يعني هأقعد برة البيت اطول فترة ممكنة
.
طبعا لسه مفيش حد في البيت حاسس بيا و لا بأي حاجة بالرغم من إن حالتي الأعمي يحس بيها و كمان نازلين ضغط علي قوي بدون ما يحسوا أوي يعني خلاص هم و أنا أتعودت علي كده طبعا في المصايب يفتكروني و في الحاجات التانية لا
مش عارف في حاجة مش فاهمها لحد دلوقتي غالبا أخويا هيخطب وراح أتقدم لواحدة علي ما أعتقد مش عارف محدش قالي علي الموضوع ده لحد دلوقتي مش عارف ليه لو عرفت هأبقي أقول لكم
.
بمناسبة اخويا من أسبوعين تلاتة تقريبا عمل حاجة منيلة قلت بيني و بين نفسي أنصحه و لا لا قلت لا عيب هو أخوك الكبير و مش هينفع أنت تنصحه خصوصا إنها حصلت قبل كده و أختي و بابا كلموه و قال خلاص بس عملها تاني
قلت ممكن أعمل حاجة تانية إيجابية ممكن تأثر فيه قلت مكلموش و أتجاهله يعني يجي يقعد في مكان أسيبه و أمشي و متكلمش معه كده يعني ممكن يحس الغريب إنه محسش عادي جدا و هو مبقاش يكلمني
عجبي
ماما كلمته مرة بالليل و الغريب إن أنا مكنتش نايم في أوضتي و سمعتهم بالليل و هو بيني و بينكم ضحك عليها بكلمتين زي الفل الحقيقة
:)
.
بابا كمان كان في مشكلة ماما جت قالت لي روح معه بكرة علشان كذا و كذا هو في الأول أساسا معبرنيش و لا هي و لما بقي فيها مشاكل أفتكروني طبعا قلت كبر دماغك و طنش محدش يقولي غلط أنا قلتلكم ربنا سابني للشيطان خلاص و كمان حتي بابا لحد دلوقتي مكلمنيش في أي حاجة و لا حتي عرض علي أروح معه
.
من كم يوم واحد معرفة قوية من البلد جه عندنا يوم الخميس بالمناسبة أنا افتكرت يوم الخميس خرجت بس واحد صاحبي كانت رجله أتكسرت رحت زرته
بابا قعد يحكي له عن موضوعات كتييييييييييير قوي و عملت في أية أية و كلفني كم و كم و رحت و جيت و لازم بسرعة علشان كذا و كذا
ماشي
لبست و نزلت
اعمل أية يعني
.
حاسس إني هأتجنن و هأقعد أكتب لحد ما صوابعي تتأكل
معلش يا حازم كان نفسي أعرفك المدونة في ظروف أحسن من كده أنت جاي علي النكد و لا علي رأي الناس كلها هي من يومها مدونة نكد
قلت لكم أقفلها أحسن
.
بقالي كم يوم نفسي أنزل تاني بوست نزلته علي المدونة اللي أسمه
alone
اللي عاوز يقراه يتفضل شهر تسعة ألفين و ستة
.
هأكتب لكم بعض الحالات اللي كنت باكتبها أو كان نفسي أكتبها علي الفيس بووك
كل ده ليه يارب
listening to devil
شفت أنت كبرتي فين
كفاية كده يارب
كده يارب سيبتني
not need survive

Monday, November 03, 2008

العيل رجع في كلامه زي ما كنت متوقع

أفكار مبعثرة
هو عنوان بلوج حد صديقي بس مش فاكر مين حاليا
من كم يوم
نفسي أكتب بوست جديد
عنوانه
.
عدنا و الحمد لله و لكن للأسف أضعف ههههههههه
فكرته إني مش قادر أنساها و مش عاوز أنساها و هأعيش كده و هأستمر في الحياة لوحدي و أكمل لوحدي جت علي دماغي فكرة إننا ممكن نكمل كأصدقاء بس مش عارف هتنفع و لا لا
حتي الشغل مش مظبط خالص اليومين دول و الناس بقيت وحشة قوي و الله و كل أما علاقتك تزيد بهم سوادهم بيبان لك أكتر
أسوأ حاجة تلاقيهم بيصلوا و عايشين لي في دور المؤمنين
الله يخرب بيتهم
.
حاولت انساها بكل الطرق مش قادر حاولت أكرهها مقدرتيش حاولت أقول عليها عادي و هتلاقي واحدة تانية يمكن أقدر أنساها مقدرتش
سمعت أغنية أم كلثوم أهرب مني قلبي أروح علي فين ليالينا الحلوة في كل مكان ماليناها حب إحنا الأتنين و مالينا الدنيا أمل
أمل
.
مش عارف ليه معلق معايا اليومين دول الحتة اللي كنتي هتقعي فيها عند جروبي فاكرة لما كنتي هتقعي
:)
.
ساعات بأنساها خالص و أحس إنه خلاص الفترة الصعبة عديت
و الغريب إني بأفتكرها و أنا فرحان قوي و أنا زعلان قوي
و أنا فرحان فرحتي بتقل و ساعات بتروح و أنا زعلان بأقول كلام أقرب للكفر لربنا و أنام
أستغفر الله
.
من كم يوم
محمد مفيد أتخانق معايا
و قالي يا تنساها يا أما مش هأكلمك
و الله أنا نفسي أرتاح يا محمد
.
انا خلاص حاطط قطرة فايزين تحت المخدة للطوارئ لإزالة الإحمرار
بقالي فترة بأحاول أقرا يوتوبيا و مش عارف طبعا واحة الغروب في الدولاب و غالبا مش هتتقري
.
الأتنين الصبح
و أنا في طريقي للدورة لنفسي عادي ياعم مش مشكلة كأنها موافقتش علي اللي قلته لها ولا أي حاجة تانية
الحمد لله علي كل شئ
بأسمع أغنية علي الحجار علي قد ما حبينا و جت علي دماغي أغنية عيد ميلادك لمحمد فوزي هأنزلها لما أروح
الأتنين بردوا و أنا في الدورة
جت علي بالي و تعبت قوي و افتقدتها قوي مش عارف ليه
الأتنين بردوا
بأتفرج علي برنامج للغيطاني علي دريم قاهرة نجيب محفوظ أكيد طبعا أفتكرتها قوي
و العجيب إني قلت لنفسي أنت كنت هتعتمد عليها كتير في حياتك ليه متعتمدش علي نفسك
و كنت جامد قوي
:)
دلوقتي بقة
أفتكرتها قوي
رحت طلعت الكلام اللي قلناه علي المسنجر بعد أخر يوم كنا مع بعض و الحمد لله قفلته قبل أما الأمور تتطور قوي
هأكتب البوست ده علي الوورد و أنام مش عارف هينزل أمتي و هينزل و لا لا
بعد ساعتين تقريبا كل سنة و يويو طيب
ياتري هتديه الهداية أمتي و إزاي
.
رحت من كم يوم مقابلة لشغل جديد يارب أقبل و خلاص
حتي لو أية علشان شكلي هأضرب حد في الشغل اللي أنا فيه و ربنا يستر
.
من كم يوم بردوا
أديت لأول مرة لينك المدونة لصحابي من الكلية زيمو و منصو زيمو خلص المدونة تقريبا و الحمد لله لاقي بوست مكتوب عنه و منصو مش عارف هو فين غالبا راح ورا اللانهائية و ما بعدها
و حكيت طبعا لهم عن الموضوع ده
زيمو سألني يوم بعدها ليه مكنش باين عليك حاجة قلتله علشان الناس مش هتستفاد حاجة لما أنكد عليها و مش هتحل لي مشكلتي قال لي تفكير غريب قلتله عارف مين اللي علمني كده قلتله هي
حكيت لواحد صاحبي تاني عن الموضوع شردت لنفسي جامد أنا اليومين دول كويس إني مش بأركب المترو كان زمان مصر كلها عرفت
حكيت له قالي مش مصدق اللي أنت بتحكيه عنها ده قلتله صدق قالي هو لسه في حد كده أنت صعب تلاقي زيها تاني
و الغريب إنه لفينا بالعربية شوية و أشتري لب من الرجل اللي أنت أشتريتي من عنده لب لأختك فاكرة
حاليا اليومين دول فاتح حساب دائم علي البستان يتضمن شيشة تفاح بتنزل لوحدها و ينسون و نسكافيه بلاك الحساب ستة جنيه أو سبعة ونص لو تلاتة تفاح
.
علي فكرة المكان اللي قعدنا عليه في البستان أسمه شاورمة واحد
:)
عارف في ناس هتشتم علشان الموضوع ده بس الله يسامحهم
الله يسامحك خصوصا أنت يا مفيد
.
صحيح مش بتتصل ليه أنت كويس الحمد لله انا بصراحة خايف أتصل بيك انت لسانك طويل و كلامك طوب اليومين دول علي فكرة انا مش زعلان منك علشان طبعا مقدرش بس بجد مش قادر أنساها
الشغل في لخبطة كتير اليومين دول و ربكم يستر و لا نخلص منه كمان أصل الجدول ناقص في حتة مش كاملة نكد
أنا حاليا في دورة تبع الشغل و هتخلص يوم الأربعاء بس بجملة التعذيب هأنزل الشغل بكرة و بعده أي الثلاثاء و الأربع .
قدمت في دورة إنجليزي و طلعت المستوي العاشر أنا مش مصدق لحد دلوقتي باين عليهم كتع اللي بيمتحنونا
.
أمبارح جه فيلم بحبه لتوم هانكس أخويا خنق علي كالعادة و خلاني أقوم خالص

مش عارلاف لما يجي فيلم حلو يجي بدري أنام بدري يجي الصبح مش عارف أعمل أية
.
قلت لماما عن الأخوة و الأخوات اللي زي الفل اللي بأشترك معهم في المشاوير الخيرية اللي مش بأعمل معهم حاجة غير إني بأروح قلتلها عرفتهم من النت قالت لي خلي بالك مش عاوزين مشاكل
أصل لسه في واحد ابن صاحبتها متاخد غلط مع الإخوان
.
بالمناسبة الناس دي عملت لي أحلي عيد ميلاد في حياتي و أشتروا لي هدية أي كلام بس أشتروا معها حاجة كده أسمها مستر شامبنزي شايلة في الدولاب و مهتم بيه أكتر من الهدية شكرا لكم جميعا خصوصا مروة طبعا
و أكيد مش هأنسي لك الموقف ده يا منذر ماشي
.
أية الصداع ده كله البوست شدني قوي و شكلي هأنزله بس مش عاوز عياط
يارب إذا كانت الحياة خيرا لي فأحيني و إذا كانت الوفاة خيرا لي فتوفني
و يارب فرجك يارب و يارب يكون الفرج في الوفاة علشان بجد مش حاسس بطعم أي حاجة في الحياة و حاسس إني مش هأحس بطعم أي حاجة تاني و مش عارف أعمل أي حاجة تاني
كفاية كده علي يارب
الحمد لله أنا راضي بس بجد مش قادر
يارب رحمتك و نهايتي يارب
يارب
يارب
يارب

Wednesday, October 15, 2008

مش عارف العنوان ممكن يكون أية غير-خلص الكلام

السلام عليكم و رحمة الله و بركاته
البوست ده ممكن يكون طويل شوية و ملخبط كالعادة و غالبا هتوهوا مني بس مش مشكلة معلش
.
صدق اللي قال المصائب لا تأتي فرادي
أمبارح كان أخر يوم لسه متعلق بالأمل فيه يعني من الأخر علشان مطولش عليكم كان فرحها و ربنا يكرمها بحياة سعيدة و مليانة خير و سعادة
غالبا القدر كان مصمم إني أكره شهر أكتوبر اللي بحبه قوي علشان فيه عيد ميلادي بس مش عارف غالبا هأكرهه
أمبارح بردوا تأكد الخبر الرسمي إن في واحد جاي بعد مني في الشغل و هيسافر تدريب برة قبلي يلا الحمد لله تعرفوا عرفت من زمان قوي الموضوع ده و سبحان الله كان اليوم ده هأقابلها للمرة التالتة حكيت لها عن الموضوع ده قعدت تقولي و لا يهمك الرزق بتاع ربنا أنت تجتهد بس و قالت لي في ناس تانية تعبانة قوي و مش عارفة تعمل أية في حياتها كانت بتتكلم عن جوزها اللي كان لسه متقدم و هي رافضة و أهلها مصممين و إن شاء الله يكون فيه الخير و يطلع ابن حلال و تحبه
علشان كده أمبارح كنت فاكرها قوي فرحها علي موضوع الغم في الشغل اللي هي وقفت جنبي فيه
و تم النهاردة كمان الرجل اللي ظلمني أنا و واحد تاني في الشغل دخل علينا النهاردة و قعد يهزق فينا علشان يقنعنا إننا إحنا اللي مقصرين و هو عادل علشان كده اللي جاي بعدنا إحنا الأتنين هو اللي مجتهد و علشان كده أختاره يسافر
يعني ظالم و عاوز يحسسنا إننا المقصرين يعني هنفرض أنا قصرت معه قبل كده زميلي التاني ذنبه أية و هو مقصرش
يلا الحمد لله بس أنا مفرقش معايا الموضوع ده كتير لأني أفتكرت كلامها و نصيحتها لي و قلت الحمد لله و اللي خلاني متقصرش أكتر زعلي عليها أكبر من زعلي علي أي حاجة تانية
الحمد لله
.
أمبارح بقة كمان أخويا محمد مفيد كان عازمني علي الفطار علشان كنا صايمين و اليوم كان جميل قوي و أحلي حاجة فيه إن منذر كمان كان موجود و قعدنا نتكلم و نفضفض و نحكي
معرفش محمد كان قاصد يعزمنا في اليوم ده بالذات و لا هي جت صدفة
شكرا يا محمد و شكرا يا منذر إنك جيت و يارب تتدوم صداقتنا علي طول
و ربنا يخليكم لي
.
و الشكر واجب كمان لإنسانة محترمة وقفت جنبي الفترة اللي فاتت و هونت علي كتير و ربنا يجازيها خير هي للأسف مش بتتدخل علي المدونة بس الشكر واجب بردوا
.
و شكرا لكل الناس اللي وقفت جنبي و أتكلمت معايا سواء علي المدونة و لا علي المسنجر و ربنا يكرمكم يارب و يخليكم لي و نفضل أصدقاء علي طول
.
خلص الكلام
الفترة اللي فاتت حاسس إن أنا أتكلمت كتير قوي و زمان كنت بأسمع كلمة خلص الكلام دي و باقول لنفسي هو الكلام ممكن يخلص أمبارح بس حسيت و فهمت معني الكلمة دي خلص الكلام
و كمان حسيت إن معظم كلامي هنا ممكن يكون إعتراض علي تدبير ربنا
أنا زمان كنت بأقعد أتكلم مع ربنا كتير و من ساعة أما عملت المدونة حاسس إن الموضوع ده قل قوي
و كمان لو أتكلمت الفترة اللي جاية دي كلامي مش هيكون غير عنها و مش هينفع أتكلم عنها
علشان كده قلت أقعد ساكت شوية
دعواتكم لي إن أطلع رجل و متكلمش فترة طويلة علشان أعيد الحسابات و التفكير و كل أما الفترة اللي هأقعد فيها ساكت تتطول يكون حالي أحسن لحد أما أقدر أرجع أفيد و أستفيد
أنا كده كده طبعا هأتابع المدونات أكيد طبعا علشان هي بقيت إدمان و أساسا شاكك في نفسي إني أقدر أقعد ساكت أنتم متعرفوش مدونتي دي حاليا بتمثل لي أية و أنت كلكم بتمثلوا لي أية بس بجد يارب أقدر و اقعد ساكت شوية
أنا أكيد مش عاوز أشكر حد بالأسم لأنكم كلكم و الله العظيم غاليين عندي قوي فوق ما تتصورا حتي اللي بيقرا و مش بيعلق و معرفوش
.
لها لو دخلت ياريت تتطمنيني عليكي و علي حياتك إن شاء الله تكون مليانة خير و حب و سعادة
.
جزاكم الله جميعا كل خير
و متنسونيش في دعائكم

Friday, October 10, 2008

كان نفسي تكوني معايا إمبارح أنا طبعا عمال أخرج مع اي حد يقولي يلا نخرج علشان مش عاوز أقعد في البيت و مش قادر أقعد في البيت
المهم نزلت مع صحابي قعدنا شوية علي القهوة و قلنا نروح ناكل عند واحد معرفش فين
المهم لاقينا سورضخم قوي و بوابة عليها حراسة سألت صاحبي قالي باب الفتوح و بعد أما أكلنا قلنا ندخل نشوف في أية جوة بمجرد ما دخلت تخيلت يوم نخرج فيه مع بعض نروح هناك و نتصور
المكان جميل و روحه زيك جميلة و مشينا في شارع المعز لحد شارع الأزهر من الناحية التانية و رجعنا و عدينا علي بيت السحيمي اللي أول مرة أعرف مكانه و تخيلت إحنا مع بعض و نتصور هناك و أصورك هناك و كان نفسي نكون لسه علي إتصال علشان أقولك أنا هناك دلوقتي
و نتفق علي ميعاد نتقابل فيه نروح هناك و طبعا لازم يكون بدري علشان نلحق نروح و كمان المكان بيكون الناس فيه قليلة بالليل
و أكيد هترجعي البيت مبسوطة و فرحانة و أنا كمان
من كم يوم مشيت في الطريق اللي كنا بنمشي فيه و مش عاوز أقولك إن أنا شفت حاجات كتير مشفتهاش قبل كده بالرغم من إننا مشينا في الشارع ده كتير مش عارف كنت باكون فين و أنا ماشي معاكي
هأقولك أخيرا بيت شعر لاقيته عندي صدفة في وقت تمنيت أكون فيه باكتب شعر علشان أكتب لك
الأبيات لإبن حزم
وددت بأن القلب شق بمدية
وأدخلت فيه ثم أطبق في صدري
تعيشين فيه ما حييت فإن أمت
سكنت شفاف القلب في ظلم القبر

أخيرا أتمني منك تسامحيني علي أي حاجة عملتها سببت لك أي ألم او حزن زمان أو دلوقتي أو مستقبلا
أنا أسف
.
طبعا يا أصدقائي غلط الكلام اللي أنا باكتبه ده بس هي مش هتقرأ الكلام ده علشان هي مش هتتدخل علي النت لفترة طويلة و إن شاء الله لما هتتدخل هتكون فرحانة و نسيتني و مش هتتأثر بالكلام ده بس بجد أنا مش قادر أشيل الكلام جوايا
مش عارف زمان كنت سهل قوي متكلمش و مكتبش و أشيل جوايا و خلاص بس سبحان الله بعد المدونات و بعد أما وصلت لسن الواحد فيه بيكون أقوي في الكتمان أنا سبحان الله العكس و أنا صغير كنت ممكن أكتم و أخبي جوايا بس حاليا مش بأقدر لازم أطلع أي كلام جوايا حتي لو أنا عارف إن مجرد خروج الكلام ده غلط و حرام بس فعلا مش قادر دعواتكم معايا إن ربنا يعدي الفترة دي علي و عليها بسرعة و يكون ربنا شايل لنا الخير قدام
تعرفوا أنا طلبت منها إن أنا أكتب عن كلامنا مع بعض و هي رفضت طبعا مش هأقدر أكتب ما دام هي قالت لا بس بجد أحلي فرحة في حياتي كلها عيشتها يارب ترجع لي تاني أو أفرح نفس الفرحة تاني بس معتقدش هأفرح الفرحة دي مع حد غيرها
تعرفوا أنا مش بأبعد عن التليفون خالص و كل شوية أبص عليه لو بعدت عنه شوية مستني إنها تتصل و تقولي خلاص المشكلة أتحلت
.
يارب أنا مش عاوز أرجع للحالة اللي كنت عليها اللي بدات فعلا ترجع لي و أعمل حاجات حرام و غلط و أكرهه نفسي
يارب أنت اللي أديتني الأمل وأخدته مني و أنت اللي قادر ترجع لي الأمل مرة تانية
إزاي و لا بأية أنا مش عارف و أي حاجة أنا هأرضي
أنا حتي مش عارف أدعي بأية يارب
حيران حتي في الدعاء
يارب هدايتك يارب
و يارب أجعل لي الخير معها يارب و قدر لنا الخير
أنا حتي مش عارف أتخيل إزاي ده ممكن يحصل في الوقت القليل ده بس أنت يارب مسير الدنيا كلها و مش هيكون صعب عليك و لا بعيد عنك حل الموضوع ده
يارب
يارب
يارب
يارب أنا عصيتك أكيد كتير و لما هتكرمني إن شئت هأفرح و هأنسي ذلتي ليك دلوقتي بس دي حكمتك و مش هأكون العبد الصالح بردوا بس أنت يارب غفور رحيم و أنا إنسان ضعيف و ما بي من ضعف أنت أعلم به مني و قادر تقويني
يارب أنا مش عاوز أرجع للقرف تاني يارب

Friday, October 03, 2008

ياربي

Saturday, September 27, 2008

يارب أنت أعلم مني إني عصيتك كتير
و إحتاجت لك كتير
و لجأت لك كتير
و عاهدتك علي الطاعة و العبادة
و رحمتني و خففت عني كتير
و رجعت أخلفت عهودي معك كتير
ورجعت إحتاجت لك
و عاهدتك علي الطاعة و العبادة تاني
و رحمتني و خففت عني و وفقتني كتير
و رجعت بعدت عنك
و تاني
و تاني
يارب بلاش جزائك لي يكون كده يارب
خفف عني يارب
مهما كان أنت رب و أنا العبد الضعيف و ما بي من ضعف أنت أعلم به مني
ياااااااااااااااااااااااااااااااربي

Tuesday, September 23, 2008

فضفضة

السلام عليكم و رحمة الله و بركاته
أزيكم يا شباب أخباركم أية؟
يارب تكونوا بخير
بالرغم من إعجابي الشديد جدا بالبوست اللي فات و كان نفسي أسيبه أطول فترة ممكنة بس صعبتم علي كل اللي يدخل يترعب و بما إني نفسي أكتب و أفضفض لكم و حاولت كتير أمنع نفسي من الكتابة بس طبعا واضح إني مقدرتش
هتسألوني ليه بأمنع نفسي
.
زهقت تعرفوا أنا حاليا في موضوع منتظره جمييييل و هيغير حياتي كلها للأحسن إن شاء الله بس بردوا زي ما تقولوا كده الواحد بقة متكيف من النكد و الخنقة
.
للأسف مش هأقدر أقولكم الموضوع بس هأديكم مثال له و شوفوا مدي نكدي و خنقتي علي نفسي و كأنني صادقت النكد يعني هنفرض واحد مستني شغل و الشغل ده محتاج واسطة جامدة جدا و هو مش معه أي واسطة و هو مستني الشغل تخيلوا بيتخيل نفسه بيشتغل الشغل ده و بيفشل فيه طيب أحلم بإنك تتقبل بالرغم من الظروف الصعبة و ربنا يوفقك و تتفوق لا أنا بأتخيل إني أتقبل بالرغم من صعوبة القبول و الغريب إني أتخيل إني بأفشل مش عارف ليه
.
و كمان كنت بادئ رمضان مش كويس قوي بس أحسن من السنتين تلاتة اللي فاتوا و أستبشرت خير قلت مش مشكلة مش كويس قوي بس أحسن من مفيش و ربنا يكرم و أكون علي أخر رمضان أحسن بس للأسف أديني أهوة منزلتش أصلي العشا و لا التراويح و كان نفسي تكون السنة دي أول سنة أصلي فيها التهجد بس طبعا واضح إنه محصلش
مش عارف في أية و لا أعمل أية و لا أهمد إزاي و لا هأهمد أمتي
فعلا زهقت
.
ده غير بقة موضوع الشغل مش حابب أستمر فيه و مش بأجتهد علشان أغيره علي موضوع الدراسات مش عارف أكمل و لا لا مش أستمر في الشغل بالشهادة و لا أشوف لي مشروع و لا أعمل أية مش عارف ده حتي طلعت في دماغي رحت رايح مغير الشبكة اللي أنا عليها في التليفون بنفس الرقم قال يعني أنا مثلا وزير و لا رجل أعمال ما كنت أشتري خط جديد و خلاص لا فضي بعيد عنكم علي توهان علي مش عارف أعمل أية
زهقتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

Saturday, September 20, 2008

البقاء لله
أنا عاوز أقولكم خبر مؤلم وتعبني قوي ومش مصدقه لحد دلوقتي و بأتمني أكون بأحلم توفي إلي رحمة الله أخويا و حبيبي محمد صاحب مدونة نوفير
دعواتكم له بالرحمة وأن الله ينير قبره بالقرأن و يدخله فسيح جناته

متقلقوش أنا لسه حي أرزق
بس الكلمات دي تصوري علي لسان محمد مفيد خصوصا إنه هيكتب كده في مدونته لو أتصل بيا في البيت يتطمن عليا علشان بقالي كتير متصلتش بيه و لا رنيت له فأتصل بالبيت قالوله محمد تعيش أنت

طبعا هيتصدم أو المفروض يتصدم و يخلي عنده دم يعني و ميكتبش فترة طويلة و يكتئب و يقعد في البيت شوية بس هو مش هيربي دقنه علشان هو عنده دقن أساسا اللي ممكن يربي دقنه يومين تلاتة هو الواد منذر

بصرف النظر عن سبب موتي تعددت الأسباب و الموت واحدا هيكون شعوركم أية تعليقاتكم عن البوست ده هتفيدني قوي و حابب أشوفها و أنا عايش مش زي ما الدولة بتكرم الناس دايما بعد أما تموت و تلاقيها و لا مهتمة بيها في حياتها

من ساعة أما دخلت التدوين الفكرة دي علي دماغي إني أموت و اللي كان مجنني أنتم هتعرفوا إزاي
بس الحمد لله الطريقة وجدت بتوطيد علاقتي بمحمد مفيد و مدونين كتير و معهم تليفون البيتو الموبيل و بنتصل ببعض بإستمرار

عاوز كل واحد يكتب نعي محترم
و ميكترش في الكلام علشان النعي تكلفته كبيرة

Sunday, September 07, 2008

فرحة

السلام عليكم و رحمة الله و بركاته
أزيكم يا شباب أخباركم أية يارب تكونوا في إحسن حال
و كل سنة و أنتم بألف خير
و كل سنة و أنتم طيبين بمناسبة هذا الشهر الكريم و ربنا يوفقنا لحسن العبادة و العودة فيه لربنا إن شاء الله
أنا بأكتب البوست ده و مش عارف هأقول فيه أية بس أنا حسيت إن أنا مقصر في حقكم من ناحية إن أنا في أي مشكلة كبيرة ولا صغيرة تلاقوني داخل عليكم زي القضا المستعجل و منكد عليكم و أي تقصير و أي فشل أنتم أول و أخر ناس باقول لهم عليه و أقرفهم بيه
بس الحمد لله المرة دي لأ
أنا داخل أفرحكم
انا فرحااااااااااااااااااااااااااااااااااان قوي اليومين دول يارب أفضل كده علي طول و أكتر و أكتر و أكتر
فرحان ليه مش هأعرف أقول لكم دلوقتي بس فرحان و خلاص و قلت لازم أقولكم مش لازم أفتكركم في النكد بس
فرحان فوق ما تتصورا و من كتر الفرحة اللي أنا فيها مش مصدقها
و كمان الحمد لله رمضان الواحد أة مش زي زمان فيه بس مش زي السنتين التلاتة اللي فاتوا اللي كنت مقصر فيهم جدا
الحمد لله نوعا ما يعني مش قوي بس إن شاء الله في زيادة من خير هذا الشهر
دعواتكم لي ربنا يكرمكم مش منغص علي حياتي حاليا غير الشغل و قرفه بس الموضوع التاني مفرحني قوي و منسيني هم الشغل
نفسي بجد أقولكم علي التفاصيل قريب إن شاء الله بس دعواتكم
شكرا لكم قوي إنكم كنتم جنبي دايما في الخير و الشر
و يارب نفضل أصدقاء علي طول و أفضل أحكي لكم فرحتي اللي جاية إن شاء الله

Saturday, August 30, 2008

شعور غريب

السلام عليكم و رحمة الله و بركاته
كل سنة و أنتم طيبين و بخير دايما و ربنا يكرمنا كلنا بشهر رمضان و يكون فيه خير لنا كلنا
.
أنا باكتب البوست ده أولا علشان حاسس إن في ناس كتير منكم ممكن تكون زعلانة مني عندي إحساس بكده و بمناسبة رمضان انا باعتذر لهم و ياريت هم كمان يتقبلوا أسفي و يسامحوني بمناسبة الشهر الكريم و الأيام الجميلة اللي جاية
ده أولا
.
ثانيا أمبارح بالليل كنت تعبان جدا و دخل علي دور برد مفاجئ و غريب و قوي بس الحمد لله كله تمام دلوقتي
كنت قلقان علشان رمضان و الصوم و الشغل علشان معنديش أجازات و حاجات تانية
بس الحمد لله
.
معرفش في شعور غريب كده بأحس بيه مش عارف ليه سبب و حتي مش عارف له أسم
ده أنا حتي مش عارف بحب الإحساس ده و لا لأ
ممكن يكون خوف علي قلق علي فرحة علي برد مش عارف
كنت باحس بيه مثلا زمان و أنا صغير لما اسمع صوت نجاة في إذاعة أم كلثوم
كنت باحس بيه الساعة خمسة المغرب كده في الشتا
كنت باحس بيه لما أطلع رحلة مع المدرسة في إبتدائي و أرجع الساعة خمسة المغرب مع صحابي عند المدرسة
كنت باحس بيه لما أقعد أذاكر و أحس إني مش هأقدر أذاكر و مش عاوز أذاكر
كنت بأحس به أول يوم في كل سنة دراسية من إبتدائي لحد البكالوريوس
هو تقريبا الشعور ده متكرر الساعة خمسة المغرب في الشتا مش عارف ليه
دلوقتي الشعور ده عندي و باكتب و أنا حاسس به مش عارف فرح و لا خوف و لا قلق إني أكون باعمل حاجة غلط أو أكون مقصر في حق حد او باخدع حد مش عارف بس هو إحساس مش حلو مش عارف له تفسير و مش عارف له أسم
ياريت لو حد يعرف له تفسير أو علاج أو حتي أسم ياريت يفيدني
شكرا لكم
و كل سنة و أنتم طيبين و ياريت نسامح بعض في الأيام المباركة دي
أنا ماليش غيركم في الأخر

Saturday, August 23, 2008

السلام عليكم و رحمة الله و بركاته
أزيكم يا شباب أخباركم أية؟
يارب يكون كله تمام
النهاردة صحيت بدري كالعادة يوم الأجازة اللي بأستناه علشان أنام فيه براحتي بس غالبا الساعة البيولوجية بتاعتي أتظبطت خلاص يا دوب نص ساعة او ساعة بالكتير بعد ميعاد الشغل تلاقيني صاحي زي العفريت
المهم قلقت الساعة سبعة و تلت تقريبا قلت اقوم أتفرج علي ماتش النهائي في الأولمبياد هيكون أول و أخر ماتش أتفرج عليه المهم الأرجنتين كسبت نيجيريا
قلت أنام ساعة بقة الناس لسه نايمة و كمان أنا عندي مشوارين واحد الساعة تلاتة و التاني الساعة سبعة و يارب مكسلش عن الأتنين
.
لاقيت تليفون البيت بيرن و أخواتي عندهم عادة نفسي أكستبها علشان بتسبب لي مشاكل كبيرة لو نايمين و التليفون رن بيطنشوا يعني حتي لو صحيوا انا بقة الوسوسة بتشتغل قوم يمكن حد في مشكلة و لا حاجة محدش بيتصل بدري كده انا بقلق بسهولة يعني
.
المهم رديت لاقيت بابا بيتصل من البلد بيقولي أنزل أعمل قيد عائلي لجدي علشان ابن عمتي بيقدم في الشرطة
و أنا مالي أنا يقدم شرطة ولا مش شرطة المهم قمت جبت صورة شهادة وفاة جدي و نزلت باشتم في سري يعني
المهم كنت خايف الأقي السجل المدني زحمة و شايل همه في الحر ده مع إن الساعة تسعة يعني الجو مش وحش بس أنا عمال أجيب جاز
المهم نزلت الست قالت لي لازم صورة البطاقة بتاعه جدي أجيبها منين ده الرجل توفي من سنة أتنين و ستين قبل أما ابويا يتجوز أمي يعني المهم أتصلت ببابا قالي أدور عليها في شنطة كده عندنا
إحنا الوثائق القيمة السرية عندنا في مكانين الشنطة دي و علبة صفيح طويلة كده شبه مدفع الأر بي جيه و بما إن بابا أكبر إخواته فكل هذه الوثائق عندنا و قالي دور يا عم الحج
أجيب الشنطة و أطلع رزمة رزمة من الورق
.
الورق يا جدعان خلاص بيبوش في أيدي كنت بأتعامل مع الورق زي نبيل الحلفاوي في فيلم الطريق إلي إيلات لما كان بيوسع فتحة الديناميت و كنت عمال أجيب عرق زيه كده و زي لينول ميسي و رفاقه في ماتش الصبح
لاقيت شوية ورق تلاقي الخط جميل و القلم الكوبيا ووثائق بالأنجليزية يعني لاقيت وصل المياه بالأنجليزي ده طبعا غير شهادات الوفاة و الميلاد اللي علي حتة ورقة مالهاش لازمة و أسم الملك فاروق و كمان بطاقات أنتخاب لجدي كان وفدي هو تقريبا عليه علشان تعرفوا إحنا عيلة سياسية من زمااااان
:)
المهم الحمد لله ملقيتش البطاقة علشان منزلش تاني
أنا أنصح الناس اللي شغالة في الأثار تيجي تستولي علي الورق اللي عندنا منها أثار و منها تبعده عننا علشان كل شوية بنطلعه و بيكون ورا تتطليعه مشاوير صعبة
بس المهم كنت لازم أقوم أخد دش علشان حالتي البؤس اللي كنت فيها و أحلي حاجة في الدنيا إنك تأخد دش و متنشفش تلبس الهدوم و تخرج علي طول بس المشكلة إنك ممكن تتضطر تأخد دش تاني علشان تغير الهدوم المبلولة دي
بس يا جدعان في شوية هوا كده جمال قوي الواحد من زمان محسش بيهم هو أينعم الواحد بينزل الفجر بيروح الشغل بس بنقعد بعد كده في المعمل و التكيف و مش بنحس بروعة الهوا الطبيعي سبحان الله
.
أمبارح بالليل نزلت ادفع إشتراك الأية أر تي دفعوني إشتراك قناة السينما إجباري مش عارف ليه
و أنا راجع أتصلت بأي حد أقابلة بس للاسف ملاقيتش قعدت علي القهوة ظبطت نفسي و كان في نسمة هوا بالليل و روحت و أنا ماشي لاقيت اتنين صغيرين بيلعبوا كورة كان نفسي قوي ألعب معهم زي زمان و أفتكرت لما كنت بألعب مع صحابي في الشارع لحد الساعة أتناشر و الناس تخنق علينا و ترش مياه ايام بقة كنت ساعات بتطلب معانا عفانة و نلعب في المياه و الطينة علشان نخنق الناس بس
مش عارف صحيت فجأة قلت لنفسي أية فايدة البوست الطويل ده لاقيت مالوش فايدة
قلت كفاية عليكم كده نكمل حكايات مرة تانية
دعواتكم ربنا يكرمكم
سلام

Monday, August 18, 2008

إن شاء الله بداية جديدة

السلام عليكم و رحمة الله و بركاته
أزيكم يا شباب أخباركم أية؟
ياريت يعني لو أي حد هيعلق يكتب لي أخباره أية علشان انتم وحشني جدا جدا جدا حقيقي و الله معلش الفترة اللي فاتت دي كنت مش بأكتب كتير لأسباب كتير مختلفة يعني النتيجة البؤس إني شيلت مادتين و الغريب إني عرفت إن الدكتور اللي كرهه الدفعة كلها و شيلها كلها مادته اللي هي كمبيوتر و تخصصنا إحنا كيمياء أتغير السنة اللي جاية بعد أما عمل اللي عمله في دفعتنا و كمان بعد أما إحنا عرفنا الكورس بتاعه و بقة سهل المذاكرة يلا الحمد لله
الواحد مش عارف يكمل و لا لا و محتار قوي دعواتكم
و عرفت موضوع في الشغل بيسرع من أسبابي للبحث عن مكان تاني أشتغل فيه و يسلام لو ربنا يكرم و مجال تاني أشتغل فيه
.
بس الحمد لله الحياة لسه فيها أمل إن شاء الله
يعني أهوة الأخ منذر ربنا كرمه و أتجوز و أسف مش هأقدر أنزل الصور علشان ممنوعة النشر
ألف مبروك يا منذر و بجد أنت واحشني قوي و نفسي أشوفك قوي أنت و مفيد و الحسيني علي فكرة من يوم جوزاك متقابلناش خالص مش قادرين نتقابل من غيرك أو بصراحة مش عارفين لو عرفنا هنتقابل متأخدش مقلب في نفسك و قول لمفيد يخف عني شوية أحسن له
.
و كمان في موضوع تاني كده الحمد لله مخليني مش مصدق السعادة اللي أنا فيها بجد ربنا يديمه يارب و مضيعهوش بغباوة مني كالعادة طول عمري
.
معرفش كانت طالبة معايا تفاؤل أمبارح قوي من الصبح
يعني ربنا كرمني بسواق أتوبيس طيب كده و حسسني إن لسه الناس فيها خير و ممكن تخاف علي بعض
معرفش خلاني نفسي أكتب بوست و أدعي فيه ربنا إنه يهدينا كلنا و يخلينا نخاف علي بعض و نحمي بعض و إن شاء الله الأخلاق و التربية الحسنة هترجع لنا تاني و إن شاء الله مش هيكون زمنا اللي الرسول صلي الله عليه و سلم قال فيه ستكون فتن كقطع الليل المظلم و إن شاء الله مش هيكون زمنا اللي ماسك فيه علي دينه كالقابض علي الجمر و هيكون اللي إحنا فيه ده فترة ضعف و بعد عن ربنا مش هتطول و هنرجع كلنا لربنا تاني
.
بيني و بينكم لو زمنا اللي الرسول حذرنا منه ربنا يستر علي علشان أنا مش قوي كده و غالبا ممكن أضعف
لا
إن شاء الله هنرجع تاني لربنا و هترجع الطمأنينة لينا و الأمان
.
و أمبارح كمان زي ما تقولوا ربنا كان كارمني فيه قوي يعني عرفت فيه الموضوع اللي ضايقني في الشغل أو كان المفروض يضايقيني و يخليني أكتب بوست أسب و ألعن فيه بس الحمد لله قبله مباشرة ربنا كان كارمني بهدية من عنده مكنتش أحلم بها
الحمد لله
.
و يوم الجمعة اللي فاتت كان يوم من أسعد أيام حياتي بجد أو يمكن أسعدها فعلا
يوم مفرحتش فيه كده من زمان
الحمد لله
.
و يوم الخميس ظبطت الكمبيوتر تمام لأنه كان خانقني و سبحان الله ناس كنت بأحسدها علي حياتها لاقيتها بتقول علي مهتم عنها في حاجات هي شايفها أهم
هو تقريبا مفيش حد راضي بحالة غير القليل و إن شاء الله أكون من هذا القليل اللي هيكتر إن شاء الله برجعونا لربنا كلنا مرة تانية إن شاء الله
.
معكننش حياتي الفترة اللي فاتت دي غير الزمالك و لاعبيته أقول أية اللي معندهاش دم
.
في حاجة كمان معرفش عندي حالة كسل غريبة و عدم مقدرة علي عمل شئ مش عارف ليه
ربنا يعجل بزوال هذه الحالة علشان مفيش وقت يضيع لسه كمان
.
يوم الجمعة اللي فاتت بردوا بعد الصلاة قابلت واحد صاحبي من الطفولة و هو ألتزم حاليا وأفتكرت أيام حلوة قضيتها و أنا صغير و قعدنا نحكي و نحكي
و أنا قاعد معه جه علي بالي فيلم طيور الظلام علشان إحنا كنا أربعة صحاب واحد مسيحي وثلاثة مسلمين أنا و و احد بقة ظابط شرطة و صديقي الأخير الملتزم
صديقنا المسيحي تجنبنا من إعدادي أو بداية الثانوي و الأتنين التانين واحد ألتزم و التاني ظابط بيسلموا علي بعض بالعافية و أنا اللي طبعا عمال أترنح في هذه الحياة
محدش يسألني فين فيلم طيور الظلام
:)
.
كفاية عليكم كده بقة علشان الواحد صايم وعطشان قوي بيني و بينكم
ربنا يكرمنا جميعا
دعواتكم لي ربنا يكرمكم