Saturday, August 30, 2008

شعور غريب

السلام عليكم و رحمة الله و بركاته
كل سنة و أنتم طيبين و بخير دايما و ربنا يكرمنا كلنا بشهر رمضان و يكون فيه خير لنا كلنا
.
أنا باكتب البوست ده أولا علشان حاسس إن في ناس كتير منكم ممكن تكون زعلانة مني عندي إحساس بكده و بمناسبة رمضان انا باعتذر لهم و ياريت هم كمان يتقبلوا أسفي و يسامحوني بمناسبة الشهر الكريم و الأيام الجميلة اللي جاية
ده أولا
.
ثانيا أمبارح بالليل كنت تعبان جدا و دخل علي دور برد مفاجئ و غريب و قوي بس الحمد لله كله تمام دلوقتي
كنت قلقان علشان رمضان و الصوم و الشغل علشان معنديش أجازات و حاجات تانية
بس الحمد لله
.
معرفش في شعور غريب كده بأحس بيه مش عارف ليه سبب و حتي مش عارف له أسم
ده أنا حتي مش عارف بحب الإحساس ده و لا لأ
ممكن يكون خوف علي قلق علي فرحة علي برد مش عارف
كنت باحس بيه مثلا زمان و أنا صغير لما اسمع صوت نجاة في إذاعة أم كلثوم
كنت باحس بيه الساعة خمسة المغرب كده في الشتا
كنت باحس بيه لما أطلع رحلة مع المدرسة في إبتدائي و أرجع الساعة خمسة المغرب مع صحابي عند المدرسة
كنت باحس بيه لما أقعد أذاكر و أحس إني مش هأقدر أذاكر و مش عاوز أذاكر
كنت بأحس به أول يوم في كل سنة دراسية من إبتدائي لحد البكالوريوس
هو تقريبا الشعور ده متكرر الساعة خمسة المغرب في الشتا مش عارف ليه
دلوقتي الشعور ده عندي و باكتب و أنا حاسس به مش عارف فرح و لا خوف و لا قلق إني أكون باعمل حاجة غلط أو أكون مقصر في حق حد او باخدع حد مش عارف بس هو إحساس مش حلو مش عارف له تفسير و مش عارف له أسم
ياريت لو حد يعرف له تفسير أو علاج أو حتي أسم ياريت يفيدني
شكرا لكم
و كل سنة و أنتم طيبين و ياريت نسامح بعض في الأيام المباركة دي
أنا ماليش غيركم في الأخر

3 comments:

A.SAMIR said...

فعلا
ساعة المغربية في التوقيت الشتوي دة بتبقى غريبة جداا
بتحس فيها بطلة الدراسة ولمذاكرة ورمضان
وشوية مشاعر كدة متلخبطة على بعضها
سبحان الله
كل سنة وانت طيب
تحياااتي

رفقة عمر said...

كل سنه وانتم بالف خير
تقبل الله منا ومنكم صالح الاعمال

hend...hanady said...

كل سنة وانت طيب وربنا يتقبل منا ومنكم صالح الاعمال