السلام عليكم و رحمة الله و بركاته
أزيكم يا شباب أخباركم أية؟
يارب يكون كله تمام
النهاردة صحيت بدري كالعادة يوم الأجازة اللي بأستناه علشان أنام فيه براحتي بس غالبا الساعة البيولوجية بتاعتي أتظبطت خلاص يا دوب نص ساعة او ساعة بالكتير بعد ميعاد الشغل تلاقيني صاحي زي العفريت
المهم قلقت الساعة سبعة و تلت تقريبا قلت اقوم أتفرج علي ماتش النهائي في الأولمبياد هيكون أول و أخر ماتش أتفرج عليه المهم الأرجنتين كسبت نيجيريا
قلت أنام ساعة بقة الناس لسه نايمة و كمان أنا عندي مشوارين واحد الساعة تلاتة و التاني الساعة سبعة و يارب مكسلش عن الأتنين

.
لاقيت تليفون البيت بيرن و أخواتي عندهم عادة نفسي أكستبها علشان بتسبب لي مشاكل كبيرة لو نايمين و التليفون رن بيطنشوا يعني حتي لو صحيوا انا بقة الوسوسة بتشتغل قوم يمكن حد في مشكلة و لا حاجة محدش بيتصل بدري كده انا بقلق بسهولة يعني

.
المهم رديت لاقيت بابا بيتصل من البلد بيقولي أنزل أعمل قيد عائلي لجدي علشان ابن عمتي بيقدم في الشرطة
و أنا مالي أنا يقدم شرطة ولا مش شرطة المهم قمت جبت صورة شهادة وفاة جدي و نزلت باشتم في سري يعني
المهم كنت خايف الأقي السجل المدني زحمة و شايل همه في الحر ده مع إن الساعة تسعة يعني الجو مش وحش بس أنا عمال أجيب جاز
المهم نزلت الست قالت لي لازم صورة البطاقة بتاعه جدي أجيبها منين ده الرجل توفي من سنة أتنين و ستين قبل أما ابويا يتجوز أمي يعني المهم أتصلت ببابا قالي أدور عليها في شنطة كده عندنا
إحنا الوثائق القيمة السرية عندنا في مكانين الشنطة دي و علبة صفيح طويلة كده شبه مدفع الأر بي جيه و بما إن بابا أكبر إخواته فكل هذه الوثائق عندنا و قالي دور يا عم الحج
أجيب الشنطة و أطلع رزمة رزمة من الورق

.
الورق يا جدعان خلاص بيبوش في أيدي كنت بأتعامل مع الورق زي نبيل الحلفاوي في فيلم الطريق إلي إيلات لما كان بيوسع فتحة الديناميت و كنت عمال أجيب عرق زيه كده و زي لينول ميسي و رفاقه في ماتش الصبح
لاقيت شوية ورق تلاقي الخط جميل و القلم الكوبيا ووثائق بالأنجليزية يعني لاقيت وصل المياه بالأنجليزي ده طبعا غير شهادات الوفاة و الميلاد اللي علي حتة ورقة مالهاش لازمة و أسم الملك فاروق و كمان بطاقات أنتخاب لجدي كان وفدي هو تقريبا عليه علشان تعرفوا إحنا عيلة سياسية من زمااااان
:)

المهم الحمد لله ملقيتش البطاقة علشان منزلش تاني
أنا أنصح الناس اللي شغالة في الأثار تيجي تستولي علي الورق اللي عندنا منها أثار و منها تبعده عننا علشان كل شوية بنطلعه و بيكون ورا تتطليعه مشاوير صعبة
بس المهم كنت لازم أقوم أخد دش علشان حالتي البؤس اللي كنت فيها و أحلي حاجة في الدنيا إنك تأخد دش و متنشفش تلبس الهدوم و تخرج علي طول بس المشكلة إنك ممكن تتضطر تأخد دش تاني علشان تغير الهدوم المبلولة دي
بس يا جدعان في شوية هوا كده جمال قوي الواحد من زمان محسش بيهم هو أينعم الواحد بينزل الفجر بيروح الشغل بس بنقعد بعد كده في المعمل و التكيف و مش بنحس بروعة الهوا الطبيعي سبحان الله

.
أمبارح بالليل نزلت ادفع إشتراك الأية أر تي دفعوني إشتراك قناة السينما إجباري مش عارف ليه
و أنا راجع أتصلت بأي حد أقابلة بس للاسف ملاقيتش قعدت علي القهوة ظبطت نفسي و كان في نسمة هوا بالليل و روحت و أنا ماشي لاقيت اتنين صغيرين بيلعبوا كورة كان نفسي قوي ألعب معهم زي زمان و أفتكرت لما كنت بألعب مع صحابي في الشارع لحد الساعة أتناشر و الناس تخنق علينا و ترش مياه ايام بقة كنت ساعات بتطلب معانا عفانة و نلعب في المياه و الطينة علشان نخنق الناس بس
مش عارف صحيت فجأة قلت لنفسي أية فايدة البوست الطويل ده لاقيت مالوش فايدة
قلت كفاية عليكم كده نكمل حكايات مرة تانية
دعواتكم ربنا يكرمكم
سلام