Saturday, December 29, 2007

السلام عليكم و رحمة الله و بركاته
أزيكم يا أصدقائي كل سنة و أنت طيبين
فكرة البوست العبقري ده جت علي بالي علشان أوضح لكم مدي كسلي و ضعفي ده بالنسبة للناس اللي علقت علي البوست اللي فات و كان نفسي أرد عليهم بس بجد مش لاقي حاجة أقولها
الأسئلة دي كانت في مدونة واحد مش فاكر مين بالظبط بس اللي فاكره إنها عجبتني قوي و كان نفسي أرد علي الأسئلة دي و أخطط و أعمل اللي فيها بس طبعا بسبب فشلي و ضعفي معملتش أي حاجة منها و لا حتي كنت قريت الأسئلة كلها غير و هي علي المدونة و لما أخدت منها نسخة مقريتهاش كلها غير دلوقتي النسخة دي كنت أخدتها بتاريخ 7/1/2007 والمرة دي أول مرة أقرها شفتم كسل و فشل أكتر من كده
الأسئلة أهيه يمكن حد منكم يستفاد منها
.
يا ترى ناوى تعمل ايه بخصوص دينك وعلاقتك مع ربنا؟ هل أنت قريب منه كفاية؟ايه اللى نفسك تعمله على المستوى الأسرى؟ هل أنت مزعل حد من قرايبك ونفسك تصالحه؟ مقصر فى حق فرد من أفراد عيلتك؟
ايه أهدافك على المستوى العملى سواء كانت فى دراستك أو شغلك؟
بالنسبة للعلاقة العاطفية؟ هل أنت راضى عن علاقتك بالنصف الأخر فى حياتك؟
يا ترى أنت مقصرفى حقه أو حقها؟ليك اهتمامات معينة أنت اهملتها ونفسك ترجعلها تانى؟
على المستوى الشخصى, ياترى أنت متصالح مع نفسك؟ راضى عن حياتك؟
أخر سؤال بقى علشان أنتم شكلكم جعتوا وهتأكلونى… ايه الأمنية أو الحلم اللى
فى بالك دلوقتى ونفسك تحققه فى السنة الجديدة سواء كان على المستوى
الشخصى أو الأسرى أو حتى العالمى؟
.
شكرا لكل اللي علق عندي المرة اللي فاتت مفيد و رفقةو ميرمايد وإنسانة و محمود و مازن و الباشمهندس و منذر بالرغم من إنه معلقش
.
نفسي يكون عندي أمل
No Hope
تعرفوا فكرت أغير عنوان المدونة و أسميها كده بس قلت بلاش سواد قوي كده حرام علي انتم بتتعذبوا بردوا مش عارف ليه هأقولكم علي حاجة مكنتش حابب أنكم تعرفوها عني أنا بشرب شيشة و سجاير نوع من أنواع الموت البطئ هو حرام إني أقول كده بس بجد انتم غاليين قوي علي و نفسي تعرفوا عني كل حاجة حاولت اخبي عنكم الحاجات السيئة دي بس مش عارف ضعفت المرة دي معلش يا مفيد مش هأقدر أقولك علي اللي نفسك فيه
.
الحمد لله عرفت من ميرمايد شكرا لها أنه لسه فرصتي في الحصول علي الجرين كارد ممكنة لأن السحب بيكون لسه في شهر سبتمبر أو أكتوبر اللي جاي قال يعني هأكسب بس أهوة
.
في فكرة في دماغي حاليا إني أسيب البيت و أعيش لوحدي هو هيكون صعب أو مش صعب مش هأعرف أكون نفسي لو عملت كده بس أهوة يمكن أرتاح بحاول و بافكر في الموضوع ده
.
في واحد كان جاب لي شغلة في السعودية مش شغلة يعني مقابلة لسه لما أتصلت عرفت إن الرجل مسافر و مش هألحق أقابله نحس بعيد عنكم بس عادي و لا تفرق
:)
.
بدأت اذاكر النهاردة يا مسهل يمكن
.
خايف قوي أعمل اي حاجة أرجع أندم عليها و أنا في الحالة دي ربنا يستر
.

Sunday, December 23, 2007

بسم الله الرحمن الرحيم
أسباب كتيرة ورا كتابتي للبوست ده و في الحقيقة هم بوستين مش بوست واحد الموضوعين مش مرتبطين ببعض قوي بس موضوع هو اللي قسم ضهر البعير في الموضوع التاني
و كنا أصدقاء
البوست ده عن إنسانة غالية قوي في حياتي وقفت جنبي كتير و جه الوقت اللي لازم نفترق فيه عن بعض هي طبعا مش قصة حب هي قصة صداقة أولا أنا كنت مش مقتنع أنه ممكن يكون في صداقة علي النت و ثانيا مش مقتنع أنه ممكن يكون في صداقة بين ولد و بنت هي قدرت تفهمني الأتنين و تفهمني حاجات كتير قوي تانية
هي اللي طلبت إننا نفترق و طبعا انا وافقت علشان ده كان إتفاق بينا
مبدئيا أنا مش عاوزها تزعل مني علشان بكتب الكلام ده هو المفروض يكون بينا بس بما إني مش بقدر أمسك نفسي عن المدونة دي فكتبت الكلام ده بعد رسالتي الأخيرة لها و تفكيري إني أتصل بها بس قلت لا الإيميل هو الأخير و الأحسن و بعد كده حاولت أنام و اللحاف أهوة قدامي و قلت مش هأكتب البوست ده غير لما أهدي كده بس علشان يكون بوست يليق بها فجأة أفتكرت حاجات كتير اديت إني عملت شئ المفروض معملوش بس عملته و بعدين مسحت وشي و قمت شغلت الكمبيوتر و بكتب دلوقتي هي تقريبا لسه متعرفش إني فقدت جدتي لأنها كانت في مرحلة صعبة لكلامنا مع بعض بس مش مشكلة هو الواضح إن الفترة دي فترة فراق
عمري ما هأنسي خناقتنا في الأول مع بعض أنت مهتم بيا لا أنت مش مهتمة بصداقتنا
عمري ما هأنسي إنها هي اللي علمتني أسمع مروان خوري صوتك وشك عطرك
و لا هأنسي أغنية أصالة أكتر
و لا هأنسي وقوفها جنبي كتيييييييييييييييييييير
و لا هأنسي لما كانت عاوزة تتجنن و فاكراني أهبل و أخليها تكلم أختي
و لا هانسي حاجات كتير
و كفاية أنها هي اللي عرفتني التدوين يعني
و لا هأنسي إني كلمتها في حاجات مينفعش أكلمها فيها و هي اتكلمت معايا و نصحتني
بس اللي عمري فعلا ما هنساه لما كنا متخانقين جامد و مش بنكلم بعض لمدة شهر تقريبا و هي أتصلت بيا و أنا في السينما لوحدي بتفرج علي فيلم 300 و كنت مش طايق نفسي و انقذتني من علي حافة الإنهيار بمعني الكلمة ربنا يكرمها و يوفقها في حياتها
أنا بجد نفسي أكتب عنها أكتر من كده
و أكيد إن شاء الله بعد أما أهدي هأكتب عنها تاني
الموضوع التاني اللي فراقي عن صديقتي أشعله بداخلي هو
نفسي أبقي بني أدم يشرف
يارب نفسي أكون بني أدم يشرف انا عارف بابا و ماما و أخواتي مش فخورين بيا و لا بأي حاجة بعملها
و مفيش إنسان علي وجهه الأرض فخور بيا و فخور أنه يعرفني
أنا عارف إني مستاهلش بس بجد بحاول
مفيش حد من عيلتي فخور بيا ده لو حد واخد باله مني أصلا
الشئ اللي وجعني قوي النهاردة كمان إن محمد مفيد كاتب أسمي عنده نفسي يبقي فخور أنه يعرفني زي ما أنا فخور إني عرفته هو بيقول عني إن طيب أنا ممكن أكون طيب بس مش إيجابي لأي حد و لا أي حاجة مين يقول إن أنا عندي خمسة و عشرين سنة ده أنا أعيل من أعيل عيل
انا عارف يارب إن أنا كلب و لا أسوي بس حاولت كتير و فشلت في حاجات كتيرة قوي
و عارف أنك أنت يارب حتي مش فخور بيا و باللي بعمله بس مش عارف أنا ضعيف قوي يارب انت اللي خلقتني علي الضعف ده و أنت عارف أنا حاولت قد أية في حاجات كتيرة
نفسي في حياة تانية يارب
اللهم إن كانت الحياة خيرا لي فأحيني و إذا كان الموت خيرا لي فأقبض روحي إليك يارب
اللهم أجعل الموت راحة لي يارب
معلش نكدت عليكم
سلام

Thursday, December 20, 2007

السلام عليكم و رحمة الله و بركاته
ازيكم يا أصدقائي كل سنة و أنتم طيبين و بخير
يارب تكونوا في أحسن حال
المهم السبب اللي شجعني علي كتابة هذا البوست هو الجو الرائع بتاع النهاردة أنا بحب جو الشتا و الغيوم ده و كمان ربنا سهل و بدات تمطر كمان أية الحلاوة دي
أخباركم أية في العيد عملتوا أية روحتوا فين و كده؟
أنا مفيش خرجت يوم الوقفة خروجة فاشلة لم أدخل فيها فيلم الجزيرة و روحت بدري للأسف
أول يوم العيد مصليتش العيد مش عارف ليه و بالرغم من إني لو زمان عملت كده كنت بزعل قوي العيد ده مصليتش و عادي تقريبا مبقاش عندي دم ده لو كان في قبل كده أصلا
المهم صحوني الساعة عشرة تقريبا و قالولي تعالي أدبح أنا كنت ناوي أتعلم الدبح بس مش من أول مرة أروح دابح كده بس الحمد لله دخلت علي الوحش بقلب بارد و يد لا ترتجف و تمت المهمة
المهم خلصنا و عقبال أما محيت أثار الجريمة كانت الساعة واحدة تقريبا قعدت شوية و قمت أتفرج علي ولاد أقول اية بس الله يحرقهم لاعيبه الزمالك مش هاين عليهم يفرحونا حتي في العيد اتغلبوا من بتروجت عادي يعني اتعودنا علي كده مش بناخد تسعه نقط ورا بعض أخرنا ستة
بس و قعدت بقة معهم في البيت عادي يعني و نمت بالليل متأخر بعد أما قريت شوية في كتاب مذكرات أرنستو تشي جيفارا أية العيد الغريب ده بأقرا جيفارا في العيد لأنه مكنش في حاجة في التلفزيون خالص الواحد يتفرج عليها
المهم نمت و صحيت و بأكتب البوست أهوة
بس ماما و بابا و بقية العيلة طبعا راحوا الترب علشان جدتي و طبعا كانوا قالولي بس أنا قلتلهم لا علشان مش لازم يعني نروح القبور في العيد
نفسي أذاكر بقة علشان خلاص الدكاترة شالت مننا و مش هترحمنا الترم التاني يدبحونا كما فعلت بالمدبوح امبارح و ربنا يستر
مفيش جديد تاني عندي لو عندكم حد يقول
.
نداء إلي مجموعة أبناء مصر اللي مش بيدخل منها غير محمد مفيد
ياريت تتبنوا موضوع الناس اللي بتنام في الشوراع الناس دي كترت قوي اليومين دول و حالهم بؤس قوي
انا نفسي أكتب بوست أو أعمل حاجة بس طبعا و لا عارف أكتب و لا عارف أعمل حاجة ياريت أنتم تقدروا علشان تريحوني
.
و نداء إلي جميع الناس ياريت نرحم بعضنا و نقبل إعتذار الناس و مش لازم نعلق المشانق لأي حد بيغلط ده ربنا بيقبل التوبة و مفيش حد مننا مش بيغلط بس في ناس حظها غلطها بيكون كبير و صعب بس بردوا لازم نتسامح مع بعضنا علشان نشجع اللي بيغلط علي عدم الرجوع للغلط و عدم فقده الأمل فبيقوم بغلط أكبر و أكبر
.
كل عيد و أنتم بخير و كل سنة و أنت طيبين

Tuesday, December 18, 2007

كل سنة و أنتم جميعا بخير
ربنا يجمعنا علي عرفات السنة الجاية إن شاء الله
و ربنا يحقق لنا كل أمانينا و يكرمنا و ينصرنا و يهدينا و يرحمنا و يدخلنا الجنة إن شاء الله
اللهم أعنا علي ذكرك و شكرك و حسن عبادتك

Saturday, December 08, 2007

السلام عليكم و رحمة الله و بركاته
فاكر لما كانت بتصحيك الساعة عشرة تقريبا كل يوم و تفطرك و تتفرج علي التلفزيون الساعة عشرة و ربع علي برامج الأطفال
فاكر لما كنت بتعمل لها كوباية نعناع و أنا بعمل لنفسي كوباية شاي الصبح
فاكر لما كنت بتخليها تلعب معاك كوتشينة و دومينو و هي مش بتعرف أصلا
فاكر لما كنت بتتفرج معها علي المسلسل بتاع الظهر
فاكر لما كنت بتخاف منها قوي
فاكر لما كانت بتبعتك تشتري فطار و الفول من عند عم يعقوب
فاكر قعدتها جنب الشباك الساعة 2 تنتظر خالتي و هي راجعة من الشغل عشلان نتغدي
فاكر لماكنا نتلم عندها كل جمعة و كل عيد
فاكر لما كنا بنعمل عندها كحك العيد
فاكر شهر الزلزال اللي أخدناه أجازة و قعدته طبعا عندها
فاكر يوم الجمعة لما كنت بتتغدي عندها و تتفرج علي الشيخ الشعرواي و أنت مش عاوز تتفرج عليه
فاكر أجازات الصيف و نص السنة و الخميس و الجمعة لما كنت بتقعد عندها علي طول
فاكر لكا كنت بتحب تقعد عندها و مترحش الحضانة
فاكر لما كنت بترجع من المدرسة تقعد عندها للساعة أربعة لحد ما تروح
فاكر لماكبرت شوية و بقيت تعرف تروح لوحدك و كانت هي بتقف تستناك في البلكونة تتأكد أنك عديت شارع شبرا في أمان و أنك في طريقك للبيت لوحدك
أفتكرت ده كله و كتير تاني لما كنت في طريقي بجوارها و هي في طريقها لمثواها الأخير أمبارح
ربنا يرحمها
كلنا كنا بنتمني إن ربنا يرحمها من الحالة اللي وصلت لها و كلنا كنا حاسين أنه خلاص أيامها قليلة بس بردوا كلنا بكينا عليها كأنها أتاخدت مننا فجأة
ربنا يرحمها
و يرحم جميع أمواتنا يارب
أدعوا لها بالرحمة
إحنا مكناش بنقولها غير يا جدة أنا شخصيا معرفتش أسمها غير مثلا علي تالتة أبتدائي
الناس كلها كبير و صغير بيقولها يا جدة أحفاد مش أحفاد هي جدة
كانت شديدة قوي معانا و طبعا كنا بنخاف منها قوي
بس هي كانت بتقف جنبنا لو حد زعلنا من خلانا أو بابا و ماما و أة يومه أسود لو حد أتخانق معنا في الشارع
أنا أكتر واحد من أحفادها قعد معها لوحدها بحكم سني المختلف عن باقي أحفادها و أحفادها اللي في سني ماكنوش بيجوا كتير
و طبعا كلنا كنا لازم نقضي أول خمسة عشر سنة مثلا عندها مش كل يوم بس تقريبا أكتر ما بنقعد في بيتنا
أن بقي قضيت عندها أكتر و كنت أكتر واحد بيقعد عندها
كنت أي أجازة أروح عندها علي طول
و كان صحابي عندها أكتر من اللي عند بيتنا و تقريبا مكنش في عند بيتنا صحاب لي
أنا شخصيا من رمضان تقريبا مرحتيش عندها لأني مكنتش عاوز أشوفها و هي كده
هي دي جدة اللي كانت بتبص لحد يترعب هي دي اللي كان الشارع كله يخاف علي زعلها و الناس كلها عارفاها
ربنا يرحمها
أدعو لها و اقروا لها الفاتحة
ربنا يرحمنا و يرحم جميع أمواتنا يارب

Wednesday, December 05, 2007


.......................................
..............................

.... ..............
.............................


.......................................

Saturday, December 01, 2007


السلام عليكم و رحمة الله و بركاته
الواحد مخنوق و زهقان اليومين دول بالرغم من إن الحياة الحمد لله حلوة بدرجة كبيرة بالنسبة للسابق بس زهقان و عندي حالة ملل غبية كان نفسي أقابل منذر و مفيد و الحسيني و ابن ناصر و مازن لكن للأسف المقابلة لم تتم و أتأجلت المهم مبدئيا نسمع أحلي سلام بمناسبة فلتان منذر من الجيش
المهم اللي أهم من منذر يعني
حاولت أذاكر كتير و كنت بأبدا بس مش بقدر أذاكرو بزهق علي طول مش عارف كبرت في دماغي أخرج و معرفش أية اللي فكرني بحديقة الأزهر أو الأزهر بارك علشان الناس الهاي اللي بتدخل المدونة المهم بعد معاناة و مجاهدة كبيرة كادت تودي بوجهي و أنا بحلق و مكسل إني أروح الحمد لله قدرت أروح بس قبل كده كان نفسي أروح مع حد أي حد حاولت أفكر في حد من صحابي مفيش مش محدش وافق أنا اللي مقلتيش لحد عارف هنتكلم في أية و هنقول أية ملل جم يعني كثير و كنت عاوز أعمل عملية ريفريش لنفسي و دماغي المهم و أنا رايح قلت أخد معايا كتاب اللي هو خير جليس أشتريت كتاب مذكرات أرنستو تشي جيفارا و أشتريت المصري اليوم و رحت الحمد لله و لفيت البارك كلها تقريبا و أخترت إني أقعد عن البحيرة و كان في مجموعة مش عارف هندسة فنون جميلة او تطبيقية بس عيال شكلها حلو كده زي بتوع الحزب الوطني عمالين يرسموا رسم هندسي و أنا قعدت جنب واحد منهم و أشتريت زجاجة مياه و كنز و شغلت الموبيل علي فيروز و قعدت أقرأ في المصري اليوم زهقت قفلت الموبيل و قفلت الجرنال و قعدت أتفرج علي البحيرة و اسمع صوت النافورة و الوقت عدي المشكلة أنه عدي من غير أما أفكر و لا أرتب و لا أعمل ريفريش لدماغي بس كنت مستمتع بصوت الميا و الخضرا و الهوا و الأطفال كبرت في دماغي في الأخر و قعدت أصور الحديقة بالموبيل و طبعا أحرجت إني أطلب من الناس أنها تصورني لوحدي يعني
أخيرا لا يسعني غير التوجهة بالشكر لساسو علي تشجعيها أياي للذهاب لحديقة الأزهر و أشكر أولاد أختي أنهم خنقوني الصبح و شجعوني علي الخروج من البيت
عناوين الأخبار
قدمت في اليانصيب الخاص بالجرين كارد يمكن ربنا يكرم و أسافر
.
مؤتمر أنابوليس محدش حس به زي الحقنة اللي سميرة أحمد أديتها لصالح سليم في فيلم الشموع السوداء
.
بدات مرحلة جديدة في الشغل
.
بدأت مرحلة جدية في حياتي كلها أو مش بدات حاسس بتغيير يارب يكون للأحسن
.
الخروجة القادمة أحتمال ادخل فيلم ماجيك او هي فوضي
.
نفسي يكون معايا بني أدمين في الخروجة اللي جاية
.
هو ليه مينفعش الواحد يعيش و يستقل بحياته
.
مشروع الجواز بدأ يخطر علي بالي و بفكر في واحدة يعني هي كده شكلها هتتخطب علي طول
.
مش عارف عاوز أدخل في مشروع تجاري أية هو مش عارف مع مين مش عارف بس عاوز أدخل و خلاص
.
الدفا اليومين دول روعة يسلام علي اللحاف مع البطانية
.
أدعو لي ربنا يكرمكم
الصور

في صور تاني بس تعبت من تنزيل دول