Thursday, December 31, 2009

ملخص 2009

السلام عليكم
أزيكم ياشباب
كل سنة و أنتم طيبين و ربنا يوفقكم دايما يارب
و يارب 2010 تكون أحلي من 2009 يارب
فكرت أكتب بوست عن اللي أنا عملته امبارح في الشغل
و يارب يكون اللي عملته صح
بس لاقيت نفسي عاوز أكتب ملخص سريع الأول عن 2009
العلاقة مع ربنا في تحسن الحمد لله إن شاء الله نستمرعلي نفس الطريق
الشغل خبرة محترمة الواحد أكتسبها السنة دي في الشغل الجديد
الماجستير الحمد لله نجحت في التمهيدي بس لسه مسجلتش
البيت الدنيا ماشية حبة فوق و حبة تحت
الحب لا تعليق
مصر لا تعليق بردوا
الزمالك يامسهل
*
بالنسبة للي عملته أمبارح في الشغل بقة
أخدت قرار من أسبوعين تقريبا إني مش هأستمر في الإنتاج السنة اللي جاية لأنه مينفعش أستمر تحت سيد بزازة و حتي لو هو مشي لأي سبب مش هينفع أنا تعاملي مع الناس يتغير لأنه ببساطة كسر حاجز معين كان المفروض يكون موجود بيني و بين العمال
فكان قدامي حل من اتنين في الشركة إما أتنقل لأي إدارة تانية أو خلاص نهاية عقدي يوم تسعتاشر يناير و يبقي كده شكرا و علي هذه الأساسا بدأت في البحث عن شغل جديد للعلم حتي لو ملاقيتش شغل جديد و منفعش أتنقل إدارة تانية مكنتش هأستمر بردوا حتي لو قعدت في البيت
المهم كنت قبل كده كلمت مدير المصنع في الموضوع ده و أوضاع الشغل في الإنتاج و مدي التدهور اللي فيها و الهبل و عدم التنظيم اللي موجود
هو طبعا كلامنجي جامد جدا و ضحك علي بكلمتين كل مرة و خلاص
و أحيانا كتير كنت بأدخل أكلمه و أنا كاتب إستقالتي بس هو كان بيلفني بكلمتين و خلاص
و أنا كان أهم شئ عندي أكمل سنة في الشغل
و الحمد لله صمدت هذه السنة الصعبة بس بصراحة الواحد أكتسب خبرة كويسة جدا الحمد لله
من أسبوع تقريبا دخلت لمدير الموارد البشرية و كلمته و ده كان بعد موقف معين حصل في الشغل الموقف ده مش معايا بس مع سيد بزازة المهم هو قالي أنا عارف شوية حاجات و في مؤشرات عن اللي بتقوله بس عاوز تفصيل منك شوية و لينا قاعدة تانية مع بعض
و حصلت شوية مواقف في الشغل منعتني من القعدة مرة تانية معاه
أمبارح بقة كلمت الشباب في إدارة الموارد البشرية و قلت لهم إني يا أتنقل يا إما مش هأجدد عقدي هم أفتكروا في حاجة معينة حصلت قلتلهم عادي مفيش حاجة و أنا كنت كلمت أ طارق قبل كده بس مش عارف أقعد معه تاني
خمس دقايق لاقيتهم بيتصلوا بيا تعالي كلم أ طارق
طلعت حكيت له كل حاجة
و قلتله عن البوظان اللي تحت و الدنيا ماشية عشوائي بدون تنظيم و تخطيط و توزيع مهام شغل
و حتي في كيميائي جديد جه الإنتاج المفروض سيد بزازة كمدير يقعد معانا و يقسم و ينظم الشغل بس ده محصلش
و أكدت له إمبارح إني مش هأستمر في الإنتاج يا أتنقل أو أمشي
هم حاولو الأول يقوليلي ممكن ننظم قعدة بينكم نوضح فيها الخطوط الأساسية قلتلهم لا موقفي مش هيتغير
يا النقل يا البيت
أية رأيكم فيا بقة يا شباب؟
:)
كنت علي وشك دور برد امبارح قضيتها كونجستال و نمت و مرحتش الشغل النهاردة
عملتها و هربت
:)
دعواتكم
*
أحلام 2010
أحلام و أمنيات كتير قوي مش هتكفيني المدونة لذكرها
يلا
كل سنة و أنتم طيبين

Friday, December 18, 2009

أفتكرت

المريلة البمبي بتاعت حضانة عمر بن عبدالعزيز
باب العربية لما أتقفل علي صباعي و فرمة
مريلة حدائق شبرا الكحلي الكاروه
أبلة هانم أهم شخصية اثرت في حياتي مدرستي من أولي لتالتة إبتدائي
أحمد و طارق و هيثم و محمدات كتييييير و نشوي و فاطمة و أسماء زملائي في إبتدائي
أستاذ حمدي و أستاذ سعيد
مدرسة الترعة في إعدادي خصوصا سنة أولي السنة الوحيدة اللي في حياتي كانت فترتين
مدرسة التوفيقية ثانوي و مايكل جاكسون و أيشة الشاب خالد
التمثيلية اللي كانت بتيجي الساعة 12
سنبل أبنائي الأعزاء شكرا ضمير أبلة حكمت أبو العلا البشري (إحنا الثنائي محسن و عمرو
ميعاد الفطار عند جدتي الساعة تمانية الغداء أتنين و نص العشا براحتي لما أطلع من الشارع
مدرسة الكورة بنادي إسكو و الرجل بتاع السجق اللي جنب النادي و التروماي اللي أتلغي
أيام الإمتحانات في إبتدائي لما كنت بأذاكر المنهج كله من الأول للأخر مرة تانية ليلة الإمتحان
رحلات الدروس الخصوصية في البيت و الشارع
فاكرين الأذان كان زمان إزاي كان جميل قوي خصوصا أذان الضهر في التلفزيون كان جميل قوي
فاكرين بقة الموسيقي بتاعة الأذان علي القناة التانية
الشيخ الشعرواي يوم الجمعة الساعة أتنين
عالم الحيوان و سر الأرض
تتر الماتشات بتاع زمان هييييييييييييييييييه
سينما مودرن و شبرا بالاس اللي اتهدت و أفلام نادية الجندي و فيفي عبده و عادل إمام
مترو شبرا لما كان بيتعمل و قافل شارع شبرا
الزلزال بتاع 92 لما أخدنا أجازة بتاع شهر في البيت
عفت نصار و إسماعيل يوسف و أحمد رمزي و إيمانويل و حسين السيد و هشام يكن و جمال عبدالحميد و أشرف قاسم و أيمن منصور و نادر السيد و حسين عبداللطيف و الجوهري لما درب الزمالك
و لما مدرس الرسم قال كل واحد يرسم حلم حياته و رسمت ملعب كورة
الشارع و لعب الكورة
بيت هاني صاحبي اللي كنا بنقضي عنده النهار
لما كنت بألعب كورة أنا و أخويا في الشقة و لما نتخانق مع بعض و نضرب بعض و الجيران تقول لماما و هي راجعة من الشغل حرام اللي بيعملوه في بعض ده

Saturday, December 05, 2009

سياسية و ربنا يستر

السلام عليكم
مش فاهم ليه إحنا بنهدم في بعض من تحت لتحت و مش بندي فرصة للمنافسة الشريفة المحترمة و لو حتي ظاهريا ليه كلنا بنحاول نظهر ولائنا الأعمي الرخيص للحفاظ علي منصب و لا جاه و بأقول للناس اللي بتعمل كده نظرة بسيطة علي أسلافكم في هذا المجال هتلاقوهم في مكان واحد هو مزبلة التاريخ
أتقوا الله في وطنكم و أولادكم و الأجيال اللي جاية
الدكتور محمد البرادعي بيفكر يرشح نفسه بس لإنتخابات الرئاسة و قال شوية شروط بسيطة علشان يترشح الرجل مكفرش يعني و لا يعني قال هنحارب و هأقاتل علشان الشروط دي تتحق هو قال لو حصلت هأرشح نفسي متحققتش مش هأرشح و شكرا
ليه نقول عليه أوهام ما بعد التقاعد يعني خلاص الرجل أتخبل يعني بعد أما ترك وكالة الطاقة الذرية عيب الرجل لسه عنده سبعة و ستين سنة بس يعني ها
أنت بتتدعي إن الشروط اللي هو بيقولها دي إنقلاب علي الدستور مرة واحدة إنقلاب بالمناسبة طبعا لو يعني حصل و التعديلات دي حصلت بكرة هتبقي فطنة و حكمة و رؤية مستقبلية و ديموقراطية و ووحي من الله لأسيادنا في الحزب
و بتقول كمان إنه معه جنسية تانية الرجل قال مفيش غير جواز سفر مصري عاوز أية يعني يقلع لك ملط في ميدان التحرير و يحلف إنه مش معه غير جواز سفر مصري
و بتقول كمان إنه معندوش خبرة سياسية مش هأقولك لا عنده ياسيدي
طبعا كلنا عارفين الرئيس مبارك كان خريج كلية حقوق و رئيس إتحاد الطلبة و تتدرج في العمل السياسي السري و العلني و أسس تلات جماعات سرية حاربت الإحتلال و أعتقل خمستاشر مرة في المعتقلات السياسية
صح مش هي دي الخبرة السياسية اللي أنت بتقول عليها
و لا أنت تقصد سياسة بوس الأيادي اللي ماشية في البلد اللي خليت السيدة المحترمة وزيرة القوي العاملة مصدرة الخادمات تبوس إيد حرم الرئيس علني عيني عينك ياتاجر
حاجة تقرف أنتم بتبصوا في المراية إزاي و إزاي بتتعملوا مع ولادكم و أهلكم الواحد قرف منكم الحقيقة
.
أنت تعرف الغريب إني حبيت الدكتور البرادعي بسبب مقال أتكتب في الأهرام العربي لما كنت رئيس تحريرها و كنت ساعتها بأقرا الأهرام العربي من الجلدة للجلدة ما عدا المقال بتاعك
:)
عبقري من يومك
.
بالمناسبة طبعا مفيش حد بيدخل المدونة دي اليومين دول علشان يقرأ اللي بأكتبه و طبعا اللي كتب الكلام ده هاكرز جزائريين أحتلوا المدونة بتاعتي علشان أنا حاطط صورة عمرو زكي

Friday, November 27, 2009

The Green Mile

Great Tom Hanks's Movie

COFFEY (Black Man)

I'm tired, boss. Tired of bein' on

the road, lonely as a sparrow in

the rain. Tired of not ever having

me a buddy to be with, or tell me

where we's coming from or going

to, or why. Mostly I'm tired of

people being ugly to each other.

I'm tired of all the pain I feel

and hear in the world ever' day.

There's too much of it. It's like

pieces of glass in my head all the

time. Can you understand?

Saturday, November 21, 2009

إفتقاد

السلام عليكم و رحمة الله
أخباركم أية ياشباب يارب تكونوا في أفضل حال يارب
و كل سنة و أنتم طيبين و بخير
و ربنا يكرمكم بالبركة و الخير اللي ربنا مقدرها في الأيام دي
مفتقدكم
هي دي خلاصة هذا البوست
بجد مفتقدكم قوي كل الناس اللي هنا مفتقدهم جدا
و نفسي يظهروا و يعلقوا عندي زي الأول
كلامي ده مش بسبب إن في تعليقات قليلة علي البوستات بتاعتي
انا مش محتاج منكم تعليقات بس بجد مفتقدكم قوي
أنا من زمان التعليقات قليلة عندي بس كنت بأحس إن في ناس معينة متابعة مدونتي و التدوين عموما
لدرجة إني نفسي أكتب بوست من زمان قوي و مش عارف و مش قادر
لأني حاسس إن في ناس كتير بعدت عن التدوين
خصوصا الناس اللي أتعرفت عليهم في بداية التدوين
نفسي يرجعوا تاني و يظهروا تاني و يكتبوا تاني عن مشاكلهم و أحلامهم و حياتهم
للأسف في ناس كتير قوي أختفت من عالم التدوين سواء نهائيا أو بتظهر كل فترة
أنا بأرجوهم يرجعوا تاني و يظهروا تاني
لأني مفتقد فيهم الإخوات قبل الأصدقاء
دعواتكم

Friday, October 30, 2009

حكاوي

مش عارف أبدأ منين
نبدأ إني مني نفسي أكتب و أحكي لكم عن حاجات كتير زي زمان تفهمومها متفهموهاش مش مشكلة بس أفضفض ليكم
حادثة سرقة بالشغل
أكتشفوا يوم الأربعاء قبل اللي فات حادثة سرقة في المصنع من عمال المخازن بالشركة إنهم بيطلعوا منتجات الشركة لحسابهم و طبعا كانت أيام سودا في المصنع و كمية إستقالات رهيبة من بلد الأتنين اللي عرفوا إنهم بيعملوا كده و مدير المخازن أعلن مسئوليته السياسة عن الحادث و قدم إستقالته إسوة بالسيد محمد منصور شيفورليه اللي إستقال من الوزارة بسبب حادثة العياط اللي حصلت قبل اليوم اللي قبل عيد ميلادي مش باقولكم
:)
و طبعا تم عمل جرد كامل علي المخزن و أكتشفوا منتجات ناقصة و منتجات زيادة طبعا النقص مشكلة و الزيادة مشكلة بردوا و طبعا لما سألوا العيال قالوا كنا بناخد حاجات زيادة من الإنتاج و طبعا بما إني من الإنتاج كان هيصيبنا من الحب جانب بس الحمد لله مفيش حاجة لحد دلوقتي و الحمد لله أنا بعيد عن تسليم المنتجات للمخازن
المشكلة بقة كان في مرة مشرف التعبئة مش موجود و حصل موقف كده مرتبط بالموضوع ده و العبد لله أكتشفه قبل السرقة بكتير بس أنا مبلغتش حد كنت متخيل إنها شئ بسيط مش سرقة و خفت علي العمال اللي معايا لو بلغت عنهم كانوا هيرحوا ورا الشمس و لما أكتشفوا العيال اللي تبسرق طبعا قلبي وقع في رجلي و من ساعتها قررت مش هأغطي علي حاجة أبدا بعد كده أنا مالي ياعم و فعلا ياشباب الصح صح و الغلط غلط
.
اليومين اللي فاتوا دول غريبين ساعات باكون فرحان و مبسوط و مطنش و منفض للحياة و ساعات باكتئب لوحدي كده لله في لله
نفسي كده أحدد موقفي
طبعا نفسي مكتئبش بس يعني أثبت علي حال و يارب يكون حال كويس
و الشغل اليومين دول في قرف شوية زيادة عن اللي كان موجود و مديري يارب يصدق المرة دي و يقدم إستقالته بسبب الضغط الرهيب من إدارة الجودة علينا
يسلام لو بزازة إستقال الأمور هتبقي عنب
:)
الجميل في الشغل ده الخبرة العملية و الإدارية و المواقف اللي الواحد بيكون فيها و صباح المكانة في الشغل يعني
بس أنا مش عاوز كده و مش هأستمر علي كده و ربنا يكرم
.
عيد ميلادي عدي و خلص و وأتممت السنة 27 و بدأت ال 28
الزمالك الله يحرقهم
السمكات بتاعتي كلها ماتت و بقي معايا واحد بس من النوع جوبي فقط
نفسي مانمش كتير
و نفسي و لا بلاش
يلا كفاية عليكم كده و إلي اللقاء في فضفضة جديدة

Sunday, October 25, 2009

After 27 Years

بعد ساعات قليلة سوف تنتهي السنة السبعة و عشرين من عمري و تبدأ الثامنة و العشرين
أسوا حاجة في عيد الميلاد ده إنه بيفكرك إنك جيت
ملخص بقة السبعة و عشرين سنة اللي فاتوا أية؟
ME = Lonely = Loser
و شكرا
و أنتم طيبين

Friday, October 16, 2009

بيــــــــــــــــــــــان هــــــــــــــــــــــــــــــــــــام

السلام عليكم و رحمة الله و بركاته
لقد أتخذت قرارا أريدكم جميعا أن تساندوني فيه لقد قررت
مادة واحد
عرض طلب نقلي من إدارة الإنتاج لأي إدارة أخري بالمصنع علي مدير المصنع يوم الأحد إن شاء الله بسبب السيد مدير الإنتاج المدعو سيد بزازة
مادة أتنين
في الغالب هيرفض
مادة تلاتة
إستقالة
مادة أربعة
ربنا يسترها
:)))
و مش عاوز حد يثنيني عن هذا الأمر

Friday, October 09, 2009

أنا اسف

أنا أسف جدا يا مدونتي العزيزة فلقد مر عيد ميلادك الثالث بدون أن اشعر و بدون أن أحتفل بك لكن أنت عارفة الحال
:)
كل سنة و أنت طيبة و أنت معايا
و مشاركاني كل حاجة
لأنه غالبا مش هيفضل لي غيرك بس مش عارف لما أكبر و أدور علي حد يهتم بيا هتهتمي بيا و لا لا
كل سنة و أنت طيبة و يارب تكوني مدونة مفرحة بقة علشان خلاص الجماهير قلت و الأصدقاء أختفوا غالبا زهقوا من النكد اللي فيكي
:))
بس عجباني و الله و أحيانا بأفتقدك كتير
ربنا يخليكي ليا يارب
و شكرا لكل اصدقائي القدامي و الجداد بس القدامي لهم معزة متميزة عندي الحقيقة
و ربنا يديم صداقتنا

Saturday, October 03, 2009

النهاية

يارب هو ليه تتر النهاية أتأخر كده؟
يارب ينزل بقة

Friday, September 25, 2009

تهييس

سنوحي و حابي و تي تشيري
تامر حسني
.
لولااااااا الهوا
لولا الهوا
ما كنت جيبت
لولا الهوا
حبيبتي جيت و بأقولها بالعربي
مسيطرة علي بالي
علي فكري
و كان(زيادة من عندييييييي) نفسي أقولها من قلبي
لا أنا عبد الحي سلامة و لا سيد درويش
تامر حسني
.
بعد المديح في المكمل
أحمد أبو درب صادق
أحكي في سيرة و أكمل
عرب يذكروا قبل ذلك
ويا أة يعني علي أة
يسمي الهلالي سلامة
مقدمة السيرة الهلالية
بصوت منير غيره لأ
.
سوسو ضربها و مسك الحبر اللي أيدها و قلبوا
علي فستانها و شافهم بابا و ضربها وضربوه
ذهب الليل
فوزي
.
اللهم شرد لاعيبة الزمالك
.
يبقي أنت أكيييييييد في مصر
.
حسبنا الله و نعم الوكيل فيهم
إنتحار شاب في الأسكندرية
المصري اليوم
.
اللهم أتخلص من الكسل اللي عندي
لسان حالي
كل ويك إند
.
اللهم إن كتبت علي الوحدة فهونها علي
.
اللهم إني لم تكتب علي الوحدة
اللهم لا تجعلني أضيع من أعول
اللهم حقق لي ما أتمني
؟؟؟
.
اللهم أنصرني علي الظلمة اللي في الشغل
و هون الحرب إذا أذنت لها أن تشتعل
:))
.
أنا قلتهالك من أولها
أنا اي حاجة ليك هأعملها
ده أنا مش هأعيش غير ليييييييييك
قبلييييييييييك أنا تهت سنين
حبك حبيبي ده جالي في وقته
قلبي اللي كان جوايا في وقته
لؤي
.
كل منايا تبقي معايا
و أحلم و أصحي و أعيش حواليك
لؤي
.

Monday, September 21, 2009

حاولت و فشلت

أخباركم ياشباب
كل سنة و أنت طيبين
أنا حاولت كتير مكتبيش هنا علشان كان نفسي أكتب بوستات فريحية كده و مليانة سعادة و ضحك بس للأسف محصلش و البوست ده هأحاول مطلعش فيه كل الأحاسيس اللي جوايا و ياريت أقدر أكتمها كلها بس الواضح إني مش قادر
مر يوم العيد ممل و طويل و رخم و مش عارف محسيتش بالعيد أساسا ياتري ده بسبب العيد ده بس و لا حلاوة العيد اللي فات اللي كان أحلي عيد في حياتي و لا إني فقدت أحاسيس الفرح أساسا و تعودت علي أحاسيس الحزن و الألم و حتي دي كمان مش موجودة و الله هو تقريبا اللي أنا فيه ده عدم إحساس أساسا شعور إنك كوباية إزاز كان في زمان حلمي إني أكون زي البطيخة عايش و خلاص زي بقية الناس بس للأسف تحولت لكوباية إزاز بتتملي حاجات كتير قوي سخنة باردة حلوة مرة و هي مش بتحس باي حاجة منها
عندي شعور أقرب لشعور الموتي اللي معرفوش و أتمني أعرفه بسرعة قوي شعور بجد مالوش وصف يارب متحسوش به
بجد عندي حالة غريبة بجد حالة عدم إحساس
حاولت بطرق كتير أخرج من الحالة دي بس من الواضح إن حل الحالة دي واحد بس و لو حتي مش واحد هي الحلول كلها بإختلافها في أيد ربنا
.
يمكن الشئ الإيجابي الوحيد الفترة دي إني مسيطر علي نفسي في كلام و حاجات كتير قوي نفسي أقولها وأعملها بس الحمد لله في أخر لحظة بأقول لنفسي كل اللي حصل و هيحصل بأيد ربنا كلامي و أفعالي مش هتجيب لي و لغيري غيرالذنب و الحزن و الوجع و تأنيب الضمير
و اللي مقدره ربنا كده كده هيحصل و هيكون
يارب يكون اللي جاي أحسن من اللي فات يارب
يارب يارب يارب

Sunday, August 30, 2009

وحشتيني أيتها المدونة

السلام عليكم و رحمة الله و بركاته
أخباركم أية ياشباب
يارب تكونوا بخير حال
أهوة العشر ليالي الأولي في رمضان عديت إزاي الله أعلم
ربنا يجعلنا ممن نالوا رحمته في أيام الرحمة
الواحد أينعم ماشي علي سطر و سطرين بس أهوة ماشي الحال فين أيام رمضانات اللي فاتت اللي كنت بأدعي إن ربنا يعديها بسرعة و كنت بأكون متضايق فيها لأنني في الشغل القديم كان اللي بيعدي اليوم هو المشروبات الكافيينيه و كنت بأتعذب أيام رمضان أحلي حاجة في الشغل الجديد اللي مش عارف إزاي بردوا مر عليه سبع شهور أهوة إنه مفيش وقت الواحد بيشرب أتنين درينك في اليوم بس واحد الصبح و احد الضهر و ممكن ميلحقش يشرب غير واحد بس كمان في أيام كتير
ربنا يجعلنا من عتقاء الشهر الكريم يارب
.
و الله أيتها المدونة أنت وحشتيني فعلا و كنت كل أما أجي أكتب أخاف حد يفتكر الكلام عنه يعني بعد مقابلتي مع مفيد و الحسيني و الساعاتي و مهنا و ميدو و الغزالي حبيت أكتب خفت مفيد يفتكر إني باكتب بسبب السحور و كده كسلت
و بردوا مش بأكتب النهاردة علشان موضوع و حوار دار أمبارح هو يمكن بس باكتب علشان لاقيت وقت محدش فيه بيكلمني علي المسنجر و أنا نفسي أكتب و نمت لي ساعتين قبل الفطار و فايق و شكلي كده من صوتي في حديثي مع نفسي داخل علي دور برد ربنا يستر
و كمان قررت أكتب بوست تاني في شهر تمانية أشمعني معرفش و قلت ألحق أكتب النهاردة زي الشغل كده علشان بنقفل شغل الشهر قبل أخر يوم في الشهر من أوامر إنتاج و خلافه
.
الإخوة المدونين و الله وحشني جدا و نفسي أدخل عندكم و أعلق و أقرا زي زمان بس و الله مفيش وقت خالص و لا صحة الواحد بيرجع من الشغل مش شايف قدامه ياكل و ينام و يصحي يروح الشغل و يرجع و ياكل ينام بس أكيد هأفوق من الساقية دي قريب إن شاء الله
.
أيها الشهر الكريم بلاش كده بقة عاوزينك تبقي شهر خير أنت لتاني مرة ورا بعض بتيجي بشوية وجع الحمد لله المرة دي أخف أو يمكن أنا اللي أقوي بس مش كده يعني
عاوزين رحمة و مغفرة و عتق من النار
بس شغال أهوة الواحد ماشي الحال
.
نفسي أكتب لكم عن يومياتي في الشغل مع سليمان اللي بحبه و مع سيد أبوح أو سيد بزازة أو سيد أبوحفيظة و صلاح بستلة و التوربيني الأسود و الطن و كمارا و كريم البركة بس بجد مفيش وقت و لا صحة بردوا
الواحد بيسمع شوية مصطلحات في الشغل ده عجب و بيسمع شوية قصص أعجب
أنا الحمد لله في طور توافق مع سيد بزازة هو مركز مع ناس تانية دلوقتي و أنا طبعا بعد سبع شهور بقيت سوسة اية فل و مظبطه يا مسهل علي أخر السنة نبقي من الناس اللي بتفقع خوازيق عيني عينك و الكل يعمل لي حساب
:)))
.
فين رمضان اللي فات الساعة سبعة عند هارديز أييييييييييييية أيام الشئ المشترك بين الأيام دي و اليومين دول إن الزمالك بيتغلب بردوا
:)
.
و بمناسبة رمضان لازم بردوا أفتكر احلي بوست قريته في رمضان مش فاكر عند مين أو فاكر و بأستهبل عن العودة من الشغل و الزحمة و بابا ولازم أدخل عليه و أقوله مش عاوزة أروح الشغل ده تاني
و لازم بردوا بعد رمضان أفتكر أحلي أول يوم عيد عيشته في حياتي لما ركبت ميني باص ميه و خمسين و رحت بيه السيدة عيشة و الدنيا كانت فاضية إزاي طول الطريق و بعد كده فجاة لاقيت الناس كلها متجمعة عند القلعة و المقطم و حال المقطم و الكافتيريا اللي كنت قاعد عليها لوحدي و مع نفسي
الحمد لله علي كل
ربنا يجعل الخير فيما قضا
.
الكلام
الواحد اليومين دول نفسه يتكلم بس مش لاقي كلام يقوله و مش لاقي شخص يسمعه سيبنا من الشخص اللي يسمع ده دلوقتي علشان هنفرض لو لاقيناه و ملقيناش الكلام هيبقي أية موقفنا
سبحان الله
ساعات كتير بيبقي نفسي أتكلم بس الكلام مش بيكون موجود مش عارف ليه بأحس إني معنديش موضوعات أتكلم فيها و لا حتي مجرد كلمات أي كلام تتطلع مني
إحساس رخم بجد
.
أمبارح بقة بعد الموضوع اللي حكيت لكم عليه طبعا أتضايقت و زعلت بس الحمد لله حسيت إن في هم إتشال من علي صدري حسيت بهواء و راحة هي مصحوبة بشوية زعل إن شاء الله مش هيستمروا بس أهوة حتي علشان مضحكش علي نفسي و أستني الترام علي رأي حازم صديقي الأسكندراني النوبي الكمبيوتري
.
كفاية كده و لو لحقت أعمل تعديل علي البوست ده بكرة و لا حاجة قبل تقفيل الشهر يبقي خير و بركة و لو ملحقتيش يبقي ننزل أمر إنتاج جديد لبوستات جديدة أو الشهر الجديد
و حياة جديدة
سلامزززززززززززززززززززززز

Saturday, August 08, 2009

بوست محتاج مدونة لوحده

مقدمتان و إستهلال لابد منه
المقدمة الأولي
نجحت
الحمد لله
و ها قد جاء اليوم الذي ذكرت فيه كلمة نجاح في هذه المدونة و الله أعلم سيأتي تاني و لا لاء إن شاء الله يجي كتييييييييير قولوا أمين
يوم الخميس واحد صاحبي أتصل بيا و قالي النتيجة طلعت رسمي إني الحمد لله نجحت يااااه بعد معاناة و كفاح دامي و مسلح دام ماي قرب من أربع سنوات نجحت الحمد لله في التمهيدي هو أينعم حتي مش عارف النقطة اللي هأكمل فيها و لا حتي الدكاترة بس أهوة الحمد لله ذكرت كلمة نجاح يارب تكون بداية لخير كتير
و لا أستطيع أن أترك هذه النقطة بدون أن أشكر إنسانة عزيزة هي بصراحة اللي شجعتني علي المذاكرة بعد أما كنت خلاص بأفكر أقدم إعتذار السنة دي
جزاها الله كل خير
بلاش إستظراف يا مفيد أنا عارفك مش زي ما نيتك السو هتسول لك أن تفكر
المقدمة الثانية
حقيقي انتم صعبانين علي فعلا مش فاهم إزاي ممكن تعلقوا علي البوستات بتاعتي أنا شخصيا لو قريتها مش هأعرف اعلق علي أية و لا أية
بس لازم تعلقوا بالذوق أهوة
البوست ده ملخص لأفكار كتير قوي جت علي بالي علي مدار أسبوع و أنا باقضي المصيف السعيد في مرسي مطروح
لذلك هتلاقوه متقطع و مش مترابط زيادة عن الطبيعي يعني
يعني ممكن تلاقوا نقطة فيها تفاؤل و سعادة و وراها نقطة في غاية الكأبة أو نقطة كلها إيمان و قرب رضا من الله و نقطة نكد كده يعني
محدش يقلق
أنا كنت فتحت نوت علي الموبيل سجلت فيها كل الأفكار اللي خطرت علي بالي علشان منساش اي نقطة
أوك
يلا بينا نبدأ
.
بسم الله
مش عارف أية اللي فكرني تقريبا لما كنت باتفرج علي موجة كوميدي في برنامج التوك شو البترول و الجاز أفتكرت هالة سرحان و إيناس الدغيدي و لا جو المصيف نفسه اللي فكرني مش عارف و الله أعلم هو أية السبب
كنت زمان أسمع اللي بيسموهم المدافعين عن المرآة و أنبهر بكلامهم عن إن الشهوة دي صفة حيوانية و لازم الرجل يتجنبها و يعيش في الحياة ويتعامل مع المراة عادي و كان نفسي أبقي كده
يعني طيب ماهو الأكل و الشرب و حب البقاء شهوة و غريزة حيوانية يبقي منجعوش و لا نعطش و واقفين و شايفين قطر داخل علينا نسيبه يدخل علشان حب البقاء ده غريزة حيوانية و إحنا مش عاوزين نبقي حيوانات يعني
كلام أهبل و عبيط و لو جه العيب من أهل العيب ميبقاش عيب
الحب أجمل شئ في الوجود فعلا بس لازم نحب في الوقت اللي لازم يكون الحب ده له معني يعني أية مثلا حب بين أتنين في ثانوي و لا حتي في كلية هيكونوا نفسهم في قد أية و هيعملوا أية خلال الفترة دي كلها يعني لازم نستقبل الحب في وقت نكون بينا و بين نفسنا مستعدين نتجوز
و كمان الحب ده مش بأيدينا يعني فجاة نلاقي نفسنا بنحب ده هيكون رد الناس أنا عارف و متأكد من كده الحب مش بزرار يعني أحب و محبش
أنا حبيت في الوقت الغلط و أتألمت بسبب كده و ما بالكم أنا الرجل و أتألمت كده البنت اللي المشاعر عندها أكتير و أهم هتتألم إزاي
هتسألوني يبقي أية الحل
الحل في اللي ربنا شرع به لأنه سبحان الله هو الصح أكيد و طبعا مش منتظر يعني إني أنا اللي أقول كده
اللي هو منع الإختلاط و منع التبسط و التساهل بين الشباب و البنات حل بسيط و سهل جدا
و و الله اللي هيعمل كده هيلاقي سعادة بعد كده في حياته محدش هيقدر يحس بيها غير اللي هيعمل زيه
ربنا يهدينا جميعا يارب
.
الأسرة أجمل شئ في الدنيا
اللي حسيت به في المصيف أحسايس متداخلة و مش مفهومة
شوق رهيب لتكوين عيلة و إني أتجوز و أخلف و أسعد مراتي و أولادي و نعيش عيشة و لا في الأحلام علي قد ما أقدر و في نقس الوقت إنا لا أستحق هذه العيلة و لا أستحق مساندة أي حد و غالبا أنا في زمن غير زماني مش عارف
و كمان وصلت لحل إني أستعد للوحدة و إستكمال حياتي لوحدي علشان مسببش ألم لأي حد سواء مراتي اللي هتكون تعيسة لو أتجوزتني و أولادي اللي ممكن يلعنوا اليوم اللي أنا كنت فيه أبوهم
.
يوم الخميس قبل أما أسافر في واحد أتصل بيا لعرض شغل جديد هو لسه مش أكيد بس بنسبة كبيرة هيكون في عرض أستعدوا علشان نتناقش قي الموضوع ده بس الشغل الجديد الإستقرار فيه أقل شوية لو جه العرض رسمي هأبقي أخد رأيكم
دعواتكم
.
كان في متعة كمان في المصيف ده إني أتفرجت علي التلفزيون من فترة طويلة مش باتفرج علي تلفزيون كتير كان في قناة موجة كوميدي الرهيبة و القناة الأولي و التانية الأرضي و الحياة
موجة دي بشعة و سيد أبو حفيظة رهيييييييييييييييييييييييييييييب بجد و التوك شو و اتفرجت علي شوية أفلام جميلة و الأولي و التانية و الشنرات العقيمة بتاعتهم و كده و الأفلام و السهرات بتاعتهم و البيت بيتك كانوا حلوين و الله
و شوية إعلانات جميلة
بيبسي مين قدك
و شويبس الله يرحمك يا حسن ياعابدين إحنا بقالنا خمسة و عشرين سنة معملناش إعلان
و عندنا فائض في الميزانية هنوفر ليه في الإنفاق أعيادنا هتبقي يومية و الدبدوب هيقول واك واك ده إعلان عن برنامج أبوحفيظة
و الحياة خنقتني كل شوية إسأل مجرب من رمضان اللي فات
.
و مرة في سهرة كان في فيلم فريد الأطرش حكاية العمر كله و كان في تصوير في القناطر سبحان الله علي الجمال و الروعة و النظافة فين القناطر دي دلوقتي بقيت مرتع للمدمنين و قلة الأدب و القذارة مكان نضيف و جميل و قريب من القاهرة
و طبعا منساش أذكركم بعبط الفيلم يعني و جماله
:))
.
كان معايا حتة بنوته صغيرة عندها ست شهور في المصيف بسم الله ماشاء الله عليها زي القمر حاجة زي الأطفال بتاعت البوسترات كده ربنا يبارك فيها و يخليها لباباها و ماماتها
الواد ابن أختي بردوا جه يوم الثلاثاء و كمل المصيف معايا عملتله البدع بدال و عجل و ملاهي و طفطف و كله عيشت دور الأب شوية
:))
يمكن منعرفش نعيشه في الحياة دي
.
و أنا في المصيف عرفت إني في واحد في شركتي السابقة قدم إستقالته و رايح شركة تانية أحسن طبعا ربنا يوفقه هو ولد مجتهد بصراحة بالرغم من إن عنده سلبيات بس هو مجتهد
و لا أنكر ظهور شعور مش كويس من ناحيتي تجاهه
حقد يعني من الأخر
ربنا يهدينا جميعا
.
طبعا الناس اللي عندي علي الفيس بووك مبسوطة بالتغطية الحية اللي كنت عاملها و أنا في المصيف
:)
نفسي أفتح الكونت تاني
.
عندي شعور بشع قوي نفسي أقول لناس كتير أنا بحبكم أو مش نفسي أقول نفسي أحس بإحساس الحب تجاه ناس لازم أحبهم و نفسي أقولهم كده و نفسي يحسوه بس للأسف مش بيحصل أي حاجة من دي خالص
الحمد لله علي كل شئ
.
أتفرجت كمان علي فيلم حكايتي مع الزمان و كان نفسي أبعت لكم أنتم كمان و أقولكم
وحشتوني وحشتوني وحشتوني بجد
ربنا يكرمكم و يخليكم ليا يارب
.
أنتهيت و أنا في المصيف من قراة واحة الغروب و بدات في عزازيل
و هم الأتنين رووووووووووووووعة بجد
شكرا جدا للي أقترح علي قراة واحة الغروب و شكرا للي جابها لي هدية
بجد شكرا
.
أكتشفت إن المتعة مش في الماضي بس ليه منستمتعش بالحاضر و نستعد للمستقبل يعني لما كنت بأتفرج علي نشرات الأخبار علي التلفزيون الأرضي أفتكرت نشرات زمان و بنرامج انباء و أراء يوم الجمعة حتي الموسيقي اللي كانت بتيجي قبل الأذان زمان و صوت الموسيقي بتاع القناة التانية بدل الأذان و السهرات بتاعت زمان و جمالها
الواحد كان ساعتها مش بيستمتع قوي بالحاجات دي ساعتها دلوقتي بيشتاق لها طيب ليه منستمتعش بالحاجات المتاحة لنا دلوقتي علشان أكيد قدام شوية هنشتاق لها و هنكتشف إننا عديناها منغير ما نستمتع بيها و عشنا في ألم و خلاص
.
و أبي المصيف يعني رفض إني أرجع علي الحالة الجميلة اللي كنت عليها هناك و إحنا راجعين لاقيت واحدة بتقولي لما ماما تعمل العملية بالسلامة تبقي تتصل تقولنا و تتطمنا
عملية أية او هتتعمل أمتي أو أية ظروفها الله أعلم عملت عبيط و سكت
يرضيكم كده
عارف في واحدة هترد علي المسنجر و تقولي أنا كمان حصل معايا كده و أنت عارف بس في فرق كبييييييييييييييييير
.
كفاية عليكم كده لحد هنا
معلش ياشباب شحططتكم معايا
كان نفسي أحقق رغبتك يا بينكي بس زي ماأنت شايفة مش نافع خالص
سلام

Friday, July 24, 2009

كتابة للكتابة

السلام عليكم و رحمة الله و بركاته
المرة دي باكتب لأن الكتابة في المدونة بجد وحشتني قوي
هتسألوني طيب ليه مش بتكتب
هأقولكم يمكن علشان في حاجات كتير ممكن تتكتب أو يمكن بردوا علشان مفيش حاجة ممكن تتكتب
اللي كان بيهون علي الواحد شوية هي الأستاتيوس بتاعت الفيس بووك
:)
نويت أمبارح أني أكتب و خلاص كتابة للكتابة منها أخبار عن نفسي مواقف مختصرة بس أفضفض و خلاص شوية
.
واحد معايا في الشغل قعد يقولي هات الأكونت بتاعك علي الفيس بووك أضطريت إني أعمل أكونت تاني علشان محدش في الشغل يعرف البلاوي اللي بأعملها في الحياة اللي بعد الشغل و عملت تحديد للأكونت الأساسي بتاعي علشان لو حد عرفه ميعرفش يدخل عليه غير اللي انا أعرف هم مين
للأسف عملت كده مكنتش حابب أقفل الأكونت بتاعي
يعني مثلا زي ما رحت يوم مناقشة رواية دارية في دار الشروق و أمبارح رحت مع الساعاتي لبيت السحيمي و كان في أنا الحكاية و تخيلت مين كان لازم يبقي موجود و يحضر الأتنين دول
و كمان يعني مثلا لو حد في الشغل عرف إني صاحب محمد مفيد ممكن يرفدوني من الشغل
.
إنجي أو أم حنين خلاص ربنا رزقها بحنين رسميا و ربنا يبارك فيها
أتصلت النهاردة بصديقي العزيز محمد فتحي
أمبارح الواد الساعاتي هد حيلي مشي و أتمشينا شوية حلوين من العتبة لشارع المعز و بيت السحيمي للباب الشعرية و العودة للبستان بعد كده روحنا
أمبارح بردوا صلحت كم حنفية و خربت الدش اللي بنستحمي بيه مش بتاع التلفزيون بس الحمد لله خالي جه النهاردة و ظبطه شوية
.
أول مرة أزعل لأني مش باعرف أكتب كلام جميل مش واضح
يعني زي ما الناس بتكتب كده
و أستيقظ فوجد الساعة تدق
و تنسم عبير الصباح
و نظر إلي السماء الدهماء
أنا مش عارف يعني أية دهماء دي أساسا و هو أساسا ممكن الشمس تبقي دهماء
.
الحزن شئ وحش قوي
و الأوحش منه إنه يكون في شئ يفرح و متعرفش تفرح بيه يمكن الواحد نسي إحساس الفرحة مش واخد عليه تأقلم مع الحزن و عاش معه
.
الحمد لله نعم ربنا علي الواحد كتير قوي
الحمد لله
.
رمضان علي الأبواب خلاص ياتري السنة دي يارمضان جايب لي معاك أية ؟
.
تواريخ كتير اليومين دول بتفكرني بحاجات كتير و شوارع و أماكن و مواقف و أغاني
.
الحمد لله فضفضت شوية معاكم
أنا مسافر دلوقتي علي الزقازيق في خطوبة هناك و راجع علي طول إن شاء الله ياريت الأقي تعليقات كتير علشان كده بجد مش هينفع ياريت نعلق بقة خمس تعليقات بس عيب و الله في حقكم مش في حقي
يلا سلام
و كل سنة و أنتم طيبين و راضيين و فرحانين و سعداء و أمنين

Sunday, July 05, 2009

تنفيس

السلام عليكم
أزيكم أخباركم أية
الحمد لله مبدئيا السمك بدأ يتعايش معايا الحمد لله و أهوة بقي معايا أربع سمكات بيقاوموا الحياة معايا
نمت بعد أما رجعت من الشغل و أنا باصص عليهم و الحمد لله قمت و لحقت الماتش و مصر كسبت تلاتة
و المصريين اهمه
.
أول أمبارح الجو كان حر شوية
و كان نفسي الشتا يجي و بأدعي ربنا إني أسافر بلد جوها شتوي طول السنة أنا بحب الشتا قوي و بأكرهه الصيف و بأكرهه الناس في الصيف
أمبارح بقة الحمد لله الجو كان جميل قوي و كان هيقلب علي شتا و نزلت أشتر عوامة بنزين للعربية اللي نفسي أسوقها المهم كنت قريت إن في بيت في وسط البلد إنهار و من وصف مكان البيت عرفت إنه اللي عند الشابوري و أنا دايما في المواقف المؤثرة معايا كنت باعدي و أركب من قدام البيت ده سواء زمان لما أشتغلت لمدة شهر ميديكال ريب و لما بأخرج لوحدي علي البستان و بعد خروجات حلوة كتير وكنت بانهي لفتي في وسط البلد في المكان ده و كان البيت ده مكتوب عليه إسم الشارع اللي هو شارع سليمان الحلبي و كنت دايما باستغرب من حاجتين إن سليمان الحلبي و هو من حلب قاوم الإحتلال الفرنسي لمصر و الحاجة التانية بشاعة الطريقة اللي إعدم بيها و قسوتها
و طبعا في نفس المنطقة دي بينتهي معظم خروجاتي في وسط البلد لأني بأركب من هناك
المهم اللي وقفت قدامه كتير البيت ده كان معمول له شدات معدنية و كان شكل البيت بيقع يعني من زمان و عرفت من الإخبار إنه كان له قرارا إزالة و المحافظة أخليته و السكان عاملين طعن علي القرار و البيت وفر و وقع لوحده
الظريف بقة إن جزء من البيت اللي حصل له إنهيار و كان فيه جزء كبير واقف سليم المضحك جدا إنهم مش يهدوا الباقي و يخلصوا لا دول موقفين الدنيا و محولين الشوارع اللي وقفة أساسا
معتقدش في حد في العالم ممكن يعمل كده
ده حتي ممكن المحافظة تستلف جرافة إسرائيلية من الجرافات اللي نازلة طحن في فلسطين و تستخدمها لإزالة الجزء الباقي من البيت يعني و منها بردوا نرحم إخوانا الفلسطينين من الجرافة دي يوم علي الأقل
أكيد مش الحل إننا نستني بقية البيت أما يقع لوحده
أكيد في حل تاني يعني
فعلا شئ مستفزززززززززززز
.
الموضوع التاني
هو قراري تأسيس منظمة غير شرعية سرية محدش يعرف عنها حاجة خالص من أهم مبادئها تخليص البلد من الباعة الجائلين و القهاوي و البلطجية و الأصوات العالية و عدم التنظيم و الظلم و التغيير و اللي يحب الإنضمام للمنظمة غير الشرعية عليه إنه يوافق علي الطاعة العمياء لرئيس المنظمة اللي هو أنا يعني و المنظمة بتاعتي معندهاش أي إعتراض علي الإنضمام لتحالفات مع تنظيمات سرية تانية بردوا يكون متفقة في الأهداف بس طبعا بردوا يكون رئيس التحالف أنا و محدش له رأي غيري
بس ما هي الطرق المستخدمة في تنفيذ هذه المبادئ الله أعلم
:)
بجد يا جدعان البلد دي تستحق أكتر من كده بكتير و و الله الناس الغلابة الطيبة كتير قوي و هي مختفية دلوقتي و مغلوب علي أمرها بس مش معقول هي دي النهاية أكيد في حاجة تانية هتحصل
أكيد إن شاء الله
و يارب تكون قريبة
هو مفيش حد يا جدعان نفسه يغير البلد دي بجد مفيش حد عنده ضمير يخلص للبلد دي من غير ما يفكر في مصلحة شخصية و لا يدور علي مجد شخصي مفيش حد يا جدعان لو في أنا مستعد أكون معه بس يكون في الواحد نفسه يشارك بس مش شايف مرشد قدامي مخلص مش شايف نموذج مشرف
بجد لو في حد شغال في أي إتجاه تحت أي شكل يقولي بس
حتي لو الشيخ أسامة
فين أيامك يا شيخ أسامة
.
في ملحوظة وجدتها اليومين دول تؤكد مية في المية إن مجلس الشعب مش هيتحل خالص خالص
الملحوظة دي تتمثل في إن أعضاء مجلس الشعب من الحزب الوطني بيسلموا شقق سكنية لمحدودي الدخل و بيشتروا أراضي علشان يعملوها مراكز شباب و بينشئوا عيادات طبية و طبعا ده علشان هم طيبين و خيرين و ولاد حلال مش علشان أي حاجة تاني
و طبعا كل ده دليل أكيد أكيد علي إن مجلس الشعب مش هيتحل خالص خالص خالص
:)
فاهمين طبعا
.
الحمد لله الدنيا ماشية في الشغل
و حاسس إني مش هأستمر فيه نفسي بس أكمل سنة و الغريب إني مرتاح الحمد لله و مطمن معرفش ليه و حاسس إن فرج ربنا قريب قوي قوي قوي في كل حاجة إن شاء الله
أفرجها من عندك يارب
و تصبحوا علي خير

Sunday, June 28, 2009

كآبة مجتمعية

السلام عليكم
لما رجعت من الشغل النهاردة أمي أستقبلتني بخبر مفزع جدا بالنسبة لي
أنا زي ما أنتم عارفين ساكن في حتة حيوية جدا يعني الساعة أتنين الفجر متفرقهاش عن الساعة أتنين الضهر بالنسبة لمناطق تانية كتير
.
أمي قالت لي إن في بنت جارتنا في الدور اللي فوق اللي فوقنا في واحد طلع كان هيتهجم عليها في الشقة و البنت طبعا صوتت و لمت الناس و هو نزل جري و محدش لحق جابه
أولا العيلة دي محترمة جدا و بناتها متربية أحسن تربية و أساسا البنات دي بيخافوا من السلم الضلمة و القطط و ياما هي و إخواتها الكبار جدا عدوا علينا علشان حد يطلع معهم
ثانيا الكلام ده كان الساعة أتناشر الضهر
.
و كمان ماما أتكلمت مع واحدة في شقة جنبنا حكيت لها علي البنات اللي كانوا بيجوا يفتحوا عيادة عندنا الصبح و قبل أما الدكتور يجي كان بيطلع لهم رجالة بيعملوا لهم حركات مش تمام
تخيلوا وصل بينا الحال لحد فين
.
يعني بنتهجم علي الناس في بيوتها و عشوائي يعني زمان كان يقولك اللي بيحب يعمل عملة يخطط و يفكر و يدرس و يحوم حوالين المكان و ينفذ بعد كده
دلوقتي لا خلاص الشهوة و المادة و المخدرات مسيطرة علي الناس يعني هي بتقول إنه كان ماسك سكينة معه يعني كان ممكن يقتلها و ممكن يقتل اي حد يحاول يمسكه
طيب فين الأمن اللي حاليا مش باشوفه غير قدام الجوامع في صلاة الجمعة و العيد و قدام الكنايس و كأن دور العبادة هي مكمن الخطر اللي بتواجهه البلد
ده علي أساس إن الأمن قوي يعني
.
يعني أنا و الله بأشوف شوية عساكر البندقية اللي ماسكينها أتقل منهم و هم شكلهم أساسا مجهدين جدا لدرجة إنهم بيناموا و هم قاعدين و لو حد قال لهم بخ مش هيعرفوا يعملوا أية
طيب بالذمة عسكري مثلا قاعد قدام كنيسة و إحنا المسلمين الأشرار يعني طلعنا علي الكنيسة دي هو هيعمل أية مش هيلحق يعمل حاجة و عربيات الشرطة الفخمة اللي موجودة علي طريق أكتوبر و اللي تحسسك إن مصر بقيت بلد جبالية بقدرة قادر جايبين عربيات جيب فور بي فور ليه يعني
مش فاهم
ده غير طبعا الحشود اللي بتكون مثلا في أماكن المظاهرات و الجيوش اللي جندت لزيارة أوباما و للتشريفات و الماتشات مش عاوز أقول لكم بيكون فيها شرطة قد أية
فين الأمن
فين الأمان اللي كان موجود زمان بردوا مكناش بنحتاج لبوليس كانت الناس بتخاف علي بعض و تنجد بعض و اساسا الفجر مكنش كده يعني
و مش هأقول الناس كانت ملايكة لا كان فيها الوحش بردوا بس كان بيخاف من الناس تتطلع عليه تمسكه تذله يكون عبرة لأهله
أنا متهيأ لي إن الناس دلوقتي بتتراهن و تتمنظر بقلة الأدب يعني ممكن تلاقي واحد يقولك أنا عملت في كذا بنت كذاكذاكذا و بيحك هو وصحابه
معندكش بنات معنكش إخوات معندكش قرايب معندكش دم
.
طيب في حاجة كمان البنات اللي مش كويسة علي قفا من يشيل و ببلاش و الله مش محتاجة فلوس حاليا يعني كمان نتهجم علي الناس المحترمة في بيوتها
طبعا مش باشجع يعني علي الزنا و قلة الأدب بس يعني المحترم نسيبه في حاله يعني منخليهوش يندم إنه محترم كمان
يعني بنت خارجة من بيتها تشتغل زي البنت اللي بتشتغل في العيادة أجي كمان أقرفها في عيشيتها هي هتلاقي حالتها بؤس أساسا مش ناقصة رعب كمان يعني
ده أية ده
أرحمنا و افرجها من عندك يارب
حتي لو بالطاعون و أنفلونزا الخنازير علشان شكلنا مش هنتعدل غير بكده
ده حتي ممكن كده ميعملش مع التلامة و النحاسة اللي بقينا فيها حاجة
حسبنا الله و نعم الوكيل
حسبنا الله و نعم الوكيل
حسبنا الله و نعم الوكيل

Saturday, June 27, 2009

عن الأسماك أتحدث

هي كبرت في دماغي فجأة أجيب حوض سمك أنا كان نفسي فيه من زمان خصوصا زي اللي في توم جيري اللي من غير أي تجهيزات و كنت فاكر إنه مفيش كده يعني لازم أي حوض يبقي فيه تجهيزات بس عرفت مؤخرا إنه في ممكن يعيش من غير أكسجين زي اللي كنت عاوزة
المهم نزلن مع صديقي الصدوق من الكلية و أتمشينا شوية في شارع شبرا و أشتريت شبشب أحمر عجب و بعد كده رحت أشتريت بللورة متوسطة و سمكتين نحس مش عارف حتي أسمائهم غالبا يا فانتايل يا إما جولدن المه جيت ظبطت التظابيط و حطيت المية و الأكل الصيني و سميت البرتقالي نيمو و التانية كيمو مش عارف ليه كرهتهم أساسا شكلهم في البللورة اللي بتعمل كعدسة مكبرة كبير قوي و مقرف و نيمو كان بيفتح بقة بطريقة مش كويسة و تخين كده المهم نمت و صحيت لاقيت نيمو إنتقل إلي رحمة الله و كيمو كان لسه صاحي قلت خلاص الحمد لله رميت نيمو و رحت الشغل و رجعت من الشغل لاقيت كيمو أنتقل إلي رحمة الله هو كمان لم أيأس بس نمت الخميس كله من بعد الشغل كان الجو حر و عطشان و نمت و صحيت الجمعة بالليل لاقيت صديقي الصدوق من ايام ثانوي بيتصل بيا تعالي ننزل قلت ماشي و قعدنا علي قهوة و الحمد لله لم أشرب شيشة و رحت علي محل تاني للسمك أشتريت خمس سمكات أتنين جوبي و أتنين فيتر و واحدة جرامي ظبطت التظابيط أبص الأقي الجرامي ماسة الفيتر الرجل و مبهدلة في أمه عملتلها عزل في كيس و أتصلت بالرجل قالي هاتها بكرة و بدلها شوية لاقيت الفيترة الست ماسكة جوزها مبهدلاه قلت اعزل الرجل الهفا ده لحد ما يسترد صحته و صحيت رحت للرجل بدلت الجرامي باتنين زيبرا و حطيتهم مع الفيترة و الأتنين الجوبي لاقيت الفيترة ماسكة الرجل الزيبرا مبهدلة أمه مش عارف أنا أية السمك المتشرد البلطجي اللي أنا جايبه ده رحت عامل حاجة حلوة رجعت الرجل الفيتر من الحجر الصحي اللي كان فيه لوحده في برطمان التانج و عزلت الفيترة الست عقاب لها يمكن تهدي كده و تعرف ربنا في العزلة و في إنتظار المتابعة و ربنا يستر و كنت رميت شوية الصخور المعفنة اللي الست الأولانية بتاعت السمك اللي مات أديته لي هي الست كانت ضحكت علي تقريبا بكلمتين و قالت لي خد الملونين دول علشان العيال تفرح بيهم و أمهم أنا بصراحة أي حد بيقولي كده لو باع لي تراب هأشتريه قلت بشرة خير بس رجعت كرهت الست علشان لم أحتفظ بشئ أشتريته من عندها غير البللورة يعني السمكتين ماتوا و الصخور الملونة رميتها و الأكل حتي بيعكر المياه أشتريت كيس تاني من عند الرجل الجديد و أشتريت مزيل الكلور و أهوة في عملية مراقبة ربنا يكرم الرجل الفيتر يسترد قوته و أرجع له مراته يبقي عندي زوجين فيتر و زوجين جوبي و زوجين زيبرا و ربنا يستر و مش عاوزين أرررر و أنا مشغل لهم موسيقي هادية أهوة خالص علشان ربنا يهديهم كده الله يسامحها الفيترة شكلها جابت أجل الرجل الزيبرا راقد في قعر الحوض أهوة شكله بيطلع في الروح ربنا يسترها بقة مش عاوزين حد يكون لوحده حلو قوي كده أتنين و أتنين و أتنين مش عاوزين حد وحيد
:)))
مش عارف أنا أية الحوسة اللي أنا فيها دي و أية اللي عملته في نفسي ده
أنا تقريبا منمتش طول الليل قاعد مستني ياتري هيطلع عليهم النهار و لا هيحصلوا إخواتهم
لاحول و لا قوة إلا بالله الرجل الزيبرا الله يرحمه
حسبي الله و نعم الوكيل ثلاث سمكات في أقل من يومين
أنا زعلان هأكمل بعدين

Sunday, June 21, 2009

مش عارف أسميه أية؟؟

السلام عليكم ورحمة الله
أخباركم ياشباب
بادئ ذي بدئ أي بني أدم محترم يدخل لازم يعلق مش هينفع كده الله يسامحه اللي أررر علي المدونة و زائريها من الجنس الناعم
الله يسامحه
:)
المهم
بردوا أولا حد ياكل تورتة أيس كريم
لا أحسن
المهم تاني
الفترة اللي فاتت الحمد لله كويسة نوعا ما بالرغم من إنه كان يتخللها بعض الأيام الصعبة الشوية اللي الواحد الحمد لله قرب من ربنا قوي فيها علشان ميغلطش غلطات جامدة يرجع يندم عليها زي ما ندم علي اللي عمله قبل كده يعني مثلا من تسع عشر أيام كده كان يوم صعب شوية
ليه
مالكمش دعوة
:)
بس الحمد لله عدي علي خير
أية كمان أمبارح صحيت قرفان مش عارف بقيت عادة عندي الخنقة من يوم السبت و القعدة في البيت مع إني بيطلع عين اللي خلفوني في الشغل علشان كده بيكون نفسي في يوم أجازة أرتاح فيه
.
الحمد لله الواحد أيضا بدا يسترجع شوية حاجات كويسة كان بيعملها زمان و بيحاول يرجع لها حتي لو بقدر فليل و اهوة يمكن ربنا يكرم إن شاء الله
.
النهاردة سيد بزازة كان أجازة و أنا طلع عيني زيادة النهاردة بس الحمد لله سديت في الشغل
مش عارف مش مبسوط في الشغل ليه مع إن الواحد تحت أيده شوية سلطات زي الفل تجنن و الشركة كلها تعرفني و تقدر أهمية الإنتاج و شغل عالي بس مش مبسوط مش حاسس بإنجاز نفسي أرجع معمل تاني
طبعا غالبا دكتورة علا هتظهر و تزعق فيا كعادتها مش بتظهر غير لما باتكلم عن الشغل
.
مستني ظهور النتيجة و ربنا يكرم و أبشركم بنجاحي
هو أية اللي في تورتة الأيس كريم ده مش مشلكة عادي شغال
.
معرفش ليه عمي الله يرحمه بيخطر علي بالي كتير قوي اليومين دول ربنا يرحمه
يمكن علشان أنا حاسس إني شبهه شوية بس بيني و بينكم هو أتظلم كتير مش أتظلم تعب نفسه زيادة علشان ناس كتير
ربنا يكرمني بالصفات الكويسة اللي فيه و يكرمني و أكون أحسن منه كمان
معتقدش ده عيب يعني أكتسب منه الصفات الكويسة بس مكنش طيب زيادة عن اللزوم يعني
ربنا يرحمه
.
الواد منذر و الواد حازم بيعملوا عمرة حازم ده صديقي الوحيد اللي من الكلية اللي يعرف طريق المدونة دي و طبعا منذر غني التعريف يمكن يطمر فيه و يعرف إني مسيطه علي المدونة
ربنا يكرمهم و يدعوا لي كده ربنا يفرجها لي من عنده
.
حسن شحاته بس كده
.
إيران مولعة نار دلوقتي هل ياتري هيجي لنا يوم و نكون زي أيران كده و لا لبنان و لا العراق
.
في حاجة سيكولوجية عاوز أسألكم عنها
هل ياتري الصح الواحد يخرج من الشغل ينسي كل شئ فيه و ميفكرش فيه و لا يفكر فيه بعد أما يسيب الشغل و يروح ياتري النجاح أي واحدة من الأتنين؟؟؟
بس لو أفتكرت حاجة تاني هأبقي أقولكم

Saturday, June 13, 2009

الحمد لله

و الله يا شباب بصرف النظر عن أي حاجة و عن أي حاجة هتحصل أو حصلت ربنا كريم قوي و غفور قوي بس إحنا بس نمشي في طريقه خطوة واحدة و هو مش هيسيبنا
الحمد لله علي كل شئ
اللهم أغفر لنا ذنوبنا و تقبل توبتنا و أقبلنا و لا تردنا
اللهم قدر لنا الخير حيث كان ثم أرضنا به

Tuesday, June 09, 2009

أزمة قلبية

السلام عليكم
أزيكم يا شباب أخباركم أية و الله ليكم وحشة
طبعا أنت عارفين إني لسه معايا مادتين من التمهيدي اللي هأخلل فيه ده من السنة اللي فاتت
و الله التمهيدي ده جميل قوي الواحد مش عارف مصمم و صابر عليه ليه يعني جربت في القاهرة و بعدين رجعت لحلوان و شيلت مادتين و كملت بردوا
المهم امتحنت مادة من كم يوم و طبعا مادام مكتبتش فمحدش يسأل عملت فيها أية الحمد لله علي كل شئ المهم بقة المادة التانية كانت النهاردة هي في الأصل كمبيوتر تتضمن مقدمة إتش تي إم إل و أي سي دي إل و جزء من الكيمياء محدش يسأل إزاي جزء الكيمياء ده المهم
المفروض كان في جزء أكيد من الكيمياء جاي و جزء بونص و الباقي بقة كمبيوتر
انا من أمبارح أخدت أجازة من الشغل و قاعد أحرت في الإتش تي إم إل و أفتح موديولات الاي سي دي إل و كنت بأستغرب و أنا بأذاكر
كان نفسي أكمل في نفس المود اللي بدأت فيه الكتابة بس الحمد لله قدر الله و ما شاء فعل بس هأكمل بردوا
المهم و أنا بأذاكر كنت بأستغرب إزاي الدكتور هيمتحنا في الكلام ده بالكتابة ياربي إزاي إزاي
الي أن ذهبت للإمتحان مش عاوز أقولكم دي أول مرة تقريبا في حياتي الدراسية كلها أروح الإمتحان علي وقته بالظبط دايما بأروح بدري و أحب أقعد أراجع و أهرج شوية قبل الإمتحان سواء مذاكر و لا لا المرة دي أتأخرت
المهم دخلت الإمتحان
أن أن أن
لاقيت السيكشن كله مردوم لاب توبات و الناس عمالة تقول أوبن بوك و في بنت كانت معايا السنة اللي فاتت جت لي و حاسة و شايفة شكلي عامل إزاي قالتي يا محمد الإمتحان أوبن بوك خد معاك أي ورق قلتلها ورق أية أنا حفظت كل حاجة و الدكتوة اللي واقفة تراقب علينا تقولي يابني خد أي ورق معاك أعمل أي حاجة أقولهم أعمل أية بييييييييييه و قلت بقة كمان الدكتور طالب عملي و أنا كده خلاص ضعت و كنت خلاص علي وشك ألف و أروح مهو مالوش لازمة بقة أكمل و كان نفسي أتف تفة كبيرة كده علي كل العيال اللي في السيكشن اللي كانوا معايا السنة اللي فاتت و السنة دي محدش منهم يقولي حتي علشان الصدمة يعني
يا جدعان منظر اللاب توبات في اللجنة يخض
و حظي الهباب كمان كنت قاعد في الأول و سامع نقاشات الدكاترة اللي بتوزع الورق ده إمتحان عبقري سابق زمانه أية التهريج ده مش في لايحة
قلت اللهم صلي علي النبي إذا كان الدكاترة عاملة كده أنا بقة هأعمل أية
و الورق أتوزع ثواني أروح أعده لكم أررررربعتاشر ورقة سبع ورقات وش و ضهر قلت تمام كده وضحت الرؤية الحمد لله الإمتحان نفسه أتحل في خمس ورقات تقريبا لأنه كان إختياري و أسئلة تتجاوب في سطر واحد بس مش عاوز أوصف لكم شعوري و أنا داخل اللجنة و ألاقيها كلها لاب توبات ربنا ما يوريكم
و أنا عمال أحفظ أكواد حفظت أكواد الإتش تي إم إل يا جدعان مش ممكن يعني ده أنا حتي مبصيتش في الورق اللي الدكتور كان جايبة إسترشادي في الأررررررررررربعتاشر ورقة
ختاما دعواتكم علشان الواحد خبط شوية في المادة اللي فاتت و ربنا يستر و يارب النتيجة تظهر بسرعة بقة علشان الواحد يعرف راسه من رجليه و يعرف هيعمل أية
أمانة عليكم الدعاء بالتوفيق في كل حاجة
.
إضافة بسيطة و أنا راجع من الإمتحان لفيت لفة غريبة و عجيبة المهم وصلت لشئ غريب قوي إن لو واحد ماشي دايما في إتجاه واحد و فجاة رجع نفس الطريق بس في الإتجاه العكسي بيشوف حاجات كتيييييييييير جديدة قوي
و يبقي حد يقابلني لو فهم حاجة علشان أنا أساسا مش فاهم
.
الواد عمر بيقولي عاوز أعمل ال كا تا كيت مش عارف أعمله الكتاكيت مع مين
؟؟؟؟؟؟؟؟؟؟
:)

Friday, June 05, 2009

أنواع الشرك

شرك الطاعة
شرك الدعاء
شرك المحبة
شرك النية و الإرادة
.
اللهم باعد بيننا و بين كل ما يقربنا من الشرك

Sunday, May 17, 2009

بسرعة

بالرغم من نجاح البوست السابق الشديد و اللي هو واضح في عدد التعليقات 
أستفذني خبر سمعته النهاردة الصبح و أنا رايح الشغل لدرجة إني لو كان عندي رصيد أجازات كنت نزلت من عربية الشغل و جيت علي البيت كتبت البوست ده
الخبر هو زيادة العلاوة الإجتماعية من خمسة في المية لعشرة في المية بتعليمات من السيد الرئيس
بالرغم من إن السيد الرئيس في خطابه في عيد العمال ترك تحديدها لمجلس الشعب و الدنيا هاصت قالت السيد الرئيس بيسمع كلام وزير المالية علشان مفيش موارد و لازم العلاوة تقل فحفاظا علي هيبة السيد الرئيس ترك تحديدها لمجلس الشعب اللي بدوره قام بتحديدها بسرعة لخمسة في المية
مما أثار حفيظة الناس فقرر السيد الرئيس رفع العلاوة لعشرة في المية
مبدئيا الناس بقيت بتكرهه العلاوة لأنها لو كانت عشرة في المية الأسعار بتزيد تسعين في المية 
و كمان معظم العاملين في مصر حاليا بيشتغلوا في القطاع الخاص أو بعقود فموضوع العلاوة ده مش بيوصل لهم
ليه 
لأن الزيادة في القطاع الخاص حسب ما يترأي للصاحب المنشأة في ضوء الأرباح و السوق و هكذا
ده مبدئيا
بعد كده
ليه السيد الرئيس محددهاش من الأول عشرة في المية كما هو متبع و خلصنا
ليه مجلس الشعب قرر إنها خمسة في المية
ليه الحكومة وافقت في الحالتين
السؤال المحيرني ليه السيد الرئيس غاوي يظهر حكومته و مجلس شعبه بأنهم شبه الهدوم الداخيلة اللي من تحت
.
يا جدعان نشرة أخبار الخامسة و العشرون دي فظيعة
أورررررررررطو السخنة
جامدة جدا

Friday, May 15, 2009

حوار نفسي يتم بقة

مالك يابني في أية؟
أية مضايقك ليه قاعد علي طول في أوضتك و مش بتيجي تقعد معانا.
مفيش
لا مفيش حاجة اسمها مفيش
متفتكرش إحنا مش واخدين بالنا
و كمان بنسمعك لما بتعيط كل يوم قبل ما بتنام و كمان بتنام كتير و كمان متفتكرش إننا مش بنشم ريحة الشيشة اللي بتطلع منك لما بترجع لما بتخرج بعد الشغل في أية؟
الشغل مش عاجبك ندمان علي إنك سيبت الشغل القديم و لا في حاجة تاني؟
لا و الله الشغل هو متعب و مقرف بس مش ندمان إني سيبت الشغل القديم الحمد لله لأني أتعلمت فيه كتير هو أة في مشاكل بتوحي إني مش هأكمل كتير في الشركة دي بس أنا مش ندمان لأني باتعلم كل يوم شئ جديد
أومال مالك في أية؟
كمان ورايا حاجات كتير قوي و مش عارف أعملها يعني عندي حاجات مطلوبة من الشغل و مش عارف أعملها و مذاكرة المادتين اللي إمتحانهم قرب و مش عارف عندي حالة كسل و لا مبالاة غريبة مش عارف حاسس إني معمول لي عمل علي حياتي كلها عمري ما كنت كسول و لا فاشل للدرجة دي طول عمري
لا إن شاء الله خير
ربنا هيوفقك و شد حيلك كده و هات جدول الإمتحانات و ربنا يوفقك و هنبقي نصحيك كل يوم تذاكر ساعة بس قبل الشغل و كمان لما تنجح إن شاء الله و كمان ينزل لك أجازات في الشغل ممكن تسافر تعمل عمرة إن شاء الله
بس بردوا مش هو ده بس اللي مضايقك
في حاجة تاني كل الحاجات دي متخليكش تعيط كل يوم قبل أما تنام
مفيش كان في موضوع كده و ربنا موفقش فيه
سكوت علي دموع علي الحكاية من أولها لأخرها
ياااااه كل ده حصل و شايل في قلبك محكتش لحد خالص حرام عليك أنت كده ممكن يحصل لك حاجة
حرام عليك يا محمد مقلتش ليه و أحنا اللي فاكرين إن الدنيا متظبطة معاك و مش شايلين همك و مش قلقانين عليك علشان عارفين إنك بتاع ربنا و مش بتعمل حاجة غلط
يلا الحمد لله علي كل شئ
بس أنت لازم تنساها خالص لأنها مش هترجع لك تاني خلاص لازم تفوق لنفسك و تكمل حياتك
الحمد لله علي كل شئ
بس أنا عايش علي أمل إنها ترجع لي و بأدعي ربنا إنها ترجع لي
اةةةةةةةةةةةةةةةةةةةةةةةةةةةةة
و حضن و دموع بحرقة و بصوت عالي
و نووووووووووووووووووووووووووووووم
.
بعد فاصل النكد ده كنت مجهز موضوع تاني أضحكم عليه و كنت مجهزه علشان أنزله في موضوع يكون زي الكوليكشن اللي فات هو تقريبا أنتم هتقولوا علي أتجننت علشان نزلت البوستين دول مع بعض بس مش مشكلة هأنزله بردوا
تعرفوا الرجل اللي أبتكر موضوع الرصيف الأسمنتي ده ربنا هيعذبه جامد قوي علشان أهدر فلوس كتير الرصيف بيكون نضيف و جميل و لسه متبيض بس تلاقيهم كسروه علشان يحولوه للرصيف الجديد اللي علي الموضة أنا بانصح الرجل اللي أبتكر موضوع الرصيف ده إنه يطلع كل فلوسه في وقف زي بتاع نوبل كده علشان يكفر عن ذنوبه اللي أرتكبها في حق الشعب المصري من هدر للفلوس علي الرصيف ده لأن أضراره و الفلوس اللي طلعت فيه تساوي تقريبا ميزانيات حروب
جايزة الرصيف الأسمنتي في الأداب و الكيميا و الفيزيا و هكذا
.
شكلي هأتجنن قريب
صح
محدش يقول لا
المهم بالنسبة للشغل بقة بدات أتجنب السيد مدير الإنتاج و مش هأعمله علي إنه رئيسي في الشغل حتي وزعوا علينا ورقة للتقيم خزوقته فيها مش عاوز أقولكم العيال العمال مسمينه سيد بزازة و سيد أتوح و كل أما يشوفوه بيقعدوا يغنوله سيد يا سيد هو يحبه هو
و الله أنا باتحرج و بأمشي
.
الأمتحانات الأسبوع اللي جاي و مش معايا حتي جدول الإمتحانات و عندي شغل بكرة حاجة تقرف
.
يلا الحمد لله علي كل شئ
في شخص نفسي أديله اللينك بتاع المدونة بتاعتي أية رأيكم أديهوله و لا لا

Friday, May 08, 2009

كوليكشن 2

طلب جواز

كبرت في دماغي من كم يوم أكتب طلب جواز للعروسة المطلوبة

كانت الفكرة تتدور حول أنها لازم تكون مهندسة زراعية فاهمة و شاطرة ليه بقة علشان ناخد حتة أرض و نعيش فيها و خلاص و ننغلق و نبعد عن الناس و نعيش كده مع نفسنا

و حتي ممكن الموضوع يتتطور و لما نخلف إن شاء الله حتي منوديش العيال المدرسة ونعيش منغلقين علي نفسنا المهم يوم الأربعاء بعد تمخض الفكرة في رأسي كان يوم الحنة بتاع الواد عماد الأهتم ده عامل شغال معايا المهم و إحنا في طريقنا كانت الدنيا حوالينا معظمها حقول قمح كان شكلها جميييييل قوي و تحس إنها أقرب للمعان الدهب بجد مش مبالغة و الله طبعا كمان منساش أقولكم إن معظم العمال و الناس اللي معايا في الشركة بعد أما بيروحوا و يوم الجمعة و السبت شغالين حاليا في حصاد القمح اللي هي أسمها عندهم غلة و بيجوا لونهم كأنهم كده بلغة الفرافير لسه جايين من مارينا بيلمعوا من الشمس

:)

الفكرة ترسخت في دماغي أكتر و كتبت عنها

ياتري في حد هيتقدم بطلب و لا مفيش

عارف طبعا مفيش

.

يوم الأربعاء السابق السيد مدير الإنتاج فقعني خازوق محترم و لا خازوق سليمان الحلبي عند مدير المصنع اللي هو أساسا أتخنق مني و كرهه اليوم اللي عمل معايا فيه إنترفيو و قبلني فيه لقيته جاي بيقولي مدير الإنتاج بيقول عليك مش بتشتغل و قاعد في المكتب و هو اللي بيلف علي طول قعدنا في شد و جذب و حسيت بغبن رهيب حلوة غبن دي محدش ينكر المهم بعد ما كنت خلاص هاتخنق و كان نفسي أعيط رجعت البيت و أنا راجع سمعت أغنية كل ما بنقيد شمعة اللي كتبت عنها في البوست اللي فات و غالبا الساعاتي سرقها مني و عملها في الفيس بووك زي ما أحمد مهني سرق فكرتي بعد ما قريت شيكاغو و كتبت عنها هنا و هو أخد الفكرة و ألف عليها قصة قصيرة بس الحمد لله كل شئ موثق هنا و مكتوب بالتاريخ و الاخ جوجل يشهد علينا

بمناسبة جوجل مش عارف حابب قوي متصفح النت بتاع جوجل ده حلو قوي و سهل و مرتاح له لله في لله

المهم بعد أما روحت و كان مدير المصنع قالي بلاش نكمل كلام دلوقتي علشان أنت شكلك رايح لسكة غلط علي أساس أنا كنت خلاص ثانية و هأقوله أشوف وشك بخير

المهم رجعت البيت كتبت اولا طلب نقل و جددت الإستقالة اللي كنت ماشي بها و صليت إستخارة و حسيت براحة و رحت الشغل و الورقتين لسه في المكتب مستعدين للطلوع في أي لحظة

تخيلوا رئيسك يخزوقك طيب زميلك ماشي اللي تحت منك أوكي إنما مديرك اللي الفرق بينكم بتاع خمستاشر سنة خبرة يا نهار أسود خايف من أية و لا هأعمله أية يعني

الله أعلم

لو عرفت هأقولكم

.

خالي كمان في المستشفي و مش عارف أروح أزوره

.

أنفلونزا الخنازير شغالة الله ينور

.

أة في قناة علي الراديو جديدة أسمها محطة مصر النشرة اللي فيها بيشتغل معها موسيقي تحسسك كده غن الحرب هتقوم حتي لو بتذيع خروج الأهلي من بطولة افريقيا و إن شاء الله حصول الإسماعيلي علي الدوري

وشك حلو عليهم

:)

.

الأمتحانات بعد كم يوم و مش عارف أذاكر و لا أخلص حاجات الشغل و لا أروح أرمي نفسي في النيل زي الرجل بتاع الدقهلية النهاردة

.

الواحد بيسمع أخبار السياسة و الرياضة اليومين دول بيضحك

يعني مثلا إسرائيل النهاردة بترد علي تسريبات وجود نشاط إشعاعي في مصر و بتقول هنعرف بطريقتنا الخاصة

قشطة يعني علني

و بالنسبة للرياضة

حسام حسن بيقول للاعيبه هنلاعب الإسماعيلي و لو في تل أبيب

و كمان القيعي يشبه تقليص القائمة بقانون الإصلاح الزراعي .

أيش جابك يا صعلوك جنب الملوك

مش فاهم أنا

.

أمبارح خرجت مع أنتيمي من الكلية كنت حكيت لكم عنه من فترة و هو واد جدع و غلبان و طيب و فرحان بصداقته و ربنا يديمها

و كنت قبل كده فضفضت معه في الموضوع أياه و أمبارح أتكلمنا عن الشغل و البنت اللي هو رايح يتقدم لها النهاردة أدعو له ربنا يوفقه علشان هو مجنون

.

مش عارف كان في حاجات كتير نفسي أكتب عنها بس كل يوم بأرجع من الشغل مش شايف قدامي و أنام زي القتيل للصبح النهاردة الحمد لله بعد يوم نوعا ما كويس و عملت فيه شئ كويس كتبت أهوة

ياريت بقة تعليقات بلاش قلة أدب بقة و اللي يقرا لازم يعلق زي الناس المحترمة اللي بتعلق

مش هينفع كده

في مقطع موسيقي نفسي أنزله علي المدونة التانية بس مش عارف هأنزله أمتي ياريت تسمعوه و تقولولي رأيكم

.

يارب أنا عاصي

و لا يغفر الذنوب إلا أنت فأغفر لي ذنوبي

يارب لا تزيد من ذنوبي بذنوب لن ترضاها و لن أرضها و مش هأسامح نفسي لو عملتها

يارب أعيني علي عدم فعل الذنب اللي كل شوية الشيطان بيوحي لي بيه

يارب ضاقت قوي

أفرجها يارب