Sunday, July 05, 2009

تنفيس

السلام عليكم
أزيكم أخباركم أية
الحمد لله مبدئيا السمك بدأ يتعايش معايا الحمد لله و أهوة بقي معايا أربع سمكات بيقاوموا الحياة معايا
نمت بعد أما رجعت من الشغل و أنا باصص عليهم و الحمد لله قمت و لحقت الماتش و مصر كسبت تلاتة
و المصريين اهمه
.
أول أمبارح الجو كان حر شوية
و كان نفسي الشتا يجي و بأدعي ربنا إني أسافر بلد جوها شتوي طول السنة أنا بحب الشتا قوي و بأكرهه الصيف و بأكرهه الناس في الصيف
أمبارح بقة الحمد لله الجو كان جميل قوي و كان هيقلب علي شتا و نزلت أشتر عوامة بنزين للعربية اللي نفسي أسوقها المهم كنت قريت إن في بيت في وسط البلد إنهار و من وصف مكان البيت عرفت إنه اللي عند الشابوري و أنا دايما في المواقف المؤثرة معايا كنت باعدي و أركب من قدام البيت ده سواء زمان لما أشتغلت لمدة شهر ميديكال ريب و لما بأخرج لوحدي علي البستان و بعد خروجات حلوة كتير وكنت بانهي لفتي في وسط البلد في المكان ده و كان البيت ده مكتوب عليه إسم الشارع اللي هو شارع سليمان الحلبي و كنت دايما باستغرب من حاجتين إن سليمان الحلبي و هو من حلب قاوم الإحتلال الفرنسي لمصر و الحاجة التانية بشاعة الطريقة اللي إعدم بيها و قسوتها
و طبعا في نفس المنطقة دي بينتهي معظم خروجاتي في وسط البلد لأني بأركب من هناك
المهم اللي وقفت قدامه كتير البيت ده كان معمول له شدات معدنية و كان شكل البيت بيقع يعني من زمان و عرفت من الإخبار إنه كان له قرارا إزالة و المحافظة أخليته و السكان عاملين طعن علي القرار و البيت وفر و وقع لوحده
الظريف بقة إن جزء من البيت اللي حصل له إنهيار و كان فيه جزء كبير واقف سليم المضحك جدا إنهم مش يهدوا الباقي و يخلصوا لا دول موقفين الدنيا و محولين الشوارع اللي وقفة أساسا
معتقدش في حد في العالم ممكن يعمل كده
ده حتي ممكن المحافظة تستلف جرافة إسرائيلية من الجرافات اللي نازلة طحن في فلسطين و تستخدمها لإزالة الجزء الباقي من البيت يعني و منها بردوا نرحم إخوانا الفلسطينين من الجرافة دي يوم علي الأقل
أكيد مش الحل إننا نستني بقية البيت أما يقع لوحده
أكيد في حل تاني يعني
فعلا شئ مستفزززززززززززز
.
الموضوع التاني
هو قراري تأسيس منظمة غير شرعية سرية محدش يعرف عنها حاجة خالص من أهم مبادئها تخليص البلد من الباعة الجائلين و القهاوي و البلطجية و الأصوات العالية و عدم التنظيم و الظلم و التغيير و اللي يحب الإنضمام للمنظمة غير الشرعية عليه إنه يوافق علي الطاعة العمياء لرئيس المنظمة اللي هو أنا يعني و المنظمة بتاعتي معندهاش أي إعتراض علي الإنضمام لتحالفات مع تنظيمات سرية تانية بردوا يكون متفقة في الأهداف بس طبعا بردوا يكون رئيس التحالف أنا و محدش له رأي غيري
بس ما هي الطرق المستخدمة في تنفيذ هذه المبادئ الله أعلم
:)
بجد يا جدعان البلد دي تستحق أكتر من كده بكتير و و الله الناس الغلابة الطيبة كتير قوي و هي مختفية دلوقتي و مغلوب علي أمرها بس مش معقول هي دي النهاية أكيد في حاجة تانية هتحصل
أكيد إن شاء الله
و يارب تكون قريبة
هو مفيش حد يا جدعان نفسه يغير البلد دي بجد مفيش حد عنده ضمير يخلص للبلد دي من غير ما يفكر في مصلحة شخصية و لا يدور علي مجد شخصي مفيش حد يا جدعان لو في أنا مستعد أكون معه بس يكون في الواحد نفسه يشارك بس مش شايف مرشد قدامي مخلص مش شايف نموذج مشرف
بجد لو في حد شغال في أي إتجاه تحت أي شكل يقولي بس
حتي لو الشيخ أسامة
فين أيامك يا شيخ أسامة
.
في ملحوظة وجدتها اليومين دول تؤكد مية في المية إن مجلس الشعب مش هيتحل خالص خالص
الملحوظة دي تتمثل في إن أعضاء مجلس الشعب من الحزب الوطني بيسلموا شقق سكنية لمحدودي الدخل و بيشتروا أراضي علشان يعملوها مراكز شباب و بينشئوا عيادات طبية و طبعا ده علشان هم طيبين و خيرين و ولاد حلال مش علشان أي حاجة تاني
و طبعا كل ده دليل أكيد أكيد علي إن مجلس الشعب مش هيتحل خالص خالص خالص
:)
فاهمين طبعا
.
الحمد لله الدنيا ماشية في الشغل
و حاسس إني مش هأستمر فيه نفسي بس أكمل سنة و الغريب إني مرتاح الحمد لله و مطمن معرفش ليه و حاسس إن فرج ربنا قريب قوي قوي قوي في كل حاجة إن شاء الله
أفرجها من عندك يارب
و تصبحوا علي خير

5 comments:

sherehan84 said...

أولا ميرسي جدا جدا جدا جدا على الكومنت بتاعك وانك لسه فاكرني.. بجد بجد انا اتفاجئت وفرحت جدا جدا.
ثانيا انا قريت البوست دا طبعا أول حاجة لازم أقولها هي مبروك على السمك وتاني حاجة لازم أقولها بردو ايه التشتت دا لخفنتني وشتتني وخلتني مش عارفة أركز!!!
بس عموما هذا هو حال كل العظماء متقلقش على نفسك .. هههه
وفي النهاية وتعليقا على البوست وما داخل البوست وما يوحي بيه البوست أحب أقولك يبقى انت أكيد أكيد في مصر .. وسمعني سلام سلملي عليه لفيروز

المهندس said...

الصديق العزيز / محمد
اولا الف مبروك علي السمك ... والف مبروك طبعا لمصر ... لكن انا شايف انه مصر مش هتكمل ... ومش هنصعد لكأس العالم .... خسارة ..كان نفسي ابو تريكة يلعب في كأس العالم .... لكن يبدو انه ليس هناك نصيب
ثانيا : لماذ انت مختفي ... تدوينات قليلة ... ومش بتزور حد في مدونته ... ومش بتعلق .... ... اتمني ان تكون الاحوال كلها بخير معك ... اما لو السمك هياخدك منا ... هنروح نجيب عشر سمكات " عترة ... اقصد فيترا " ... وانت عارف العتـ ... الفيترا بتعمل ايه للسمك ... فارجع بالتي هي احسن ... احسنلك واحسن للسمك
ثالثا : ابكيتني بحكاية انه مصر تستاهل احسن من كده .... فعلا مصر تستاهل احسن من كده بكتيييييييييير ... لكن للاسف كما لن يصعد المنتخب لكأس العالم ... لن تصعد مصر للحياة في المكان الذي يليق بها ... لانه للاسف ... لم يعد يوجد من يستطيع ان يصعد بها لتلك المكانة ... المعارضون والمثقفون ... صاروا ابشع من الذين يتصدرون الصورة ... وكله بيزايد علي كله
رابعا : لا اعرف لماذا احس ان لديك روحا قلقة بخصوص مجال العمل ... اهدأ يا صديقي العزيز ... انت قلت سابقا ... انك مرتاح في شغلك ... ولديك مكانة جيدة فيه ... فتمسك به ... ولا تستسلم للهواجس ... واعلم إن الله غالب علي امره ... اي لو ان الله شاء ان تتركه ... فسوف تتركه ...مهما حاولت ... ولكن دع القدر لله ... وابذل انت قصاري جهدك
خامسا : لم تطمئنا علي نتيجة الماجستير ... اتمني ان تكون هناك اخبارا جيدة
سادسا : انا رغيت كتير ... اتركك في رعاية الله ... واتمني ان تستعيد نشاطك قريبا ... السلام عليكم

No Fear said...

شيريهان
السلام عليكم
شكرا علي مرورك و ياريت تكتبي بوست قريب
مفيش شكر علي أية؟
في ناس اول ما دخل عالم التدوين اتعرف عليها خسر شوية منهم مش عاوز يخسرهم كلهم
أكيد في مصر
:)
سلملي عليه
سلام

No Fear said...

المهندس
السلام عليكم
كله تمام الحمد لله
ربنا يسهل و يفرجها من عنده
:)
مختفي بس علشان الشغل تعب بعيد عنك وقفة طول اليوم بيكون نفسي أحيانا كتير أكتب بس بجد مش بيكون عندي نفس
باحاول أجمع نقط كتير و أكتبها كلها مرة واحدة علشان الناس تتوهه بالمرة
:)
و الله أنا سعيد بتعليقك جدا جدا جدا
ربنا يكرمك
ياريت تبقي تعلق كتير مش لازم أختفي يعني
:)
المدونة بتنش زي ما أنت شايف
:)

يا مراكبي said...

انا عجبني موضوع التنظيم السري ده .. ماحدش عرف عنه غير مجتمع المدونين بس

:-)

المفاجأة بقى يا عزيزي ان التنظيم ده عايز حماية .. يبقى لازم تستعين بمجموعة من البلطجية .. شفت الزمن؟