Friday, July 24, 2009

كتابة للكتابة

السلام عليكم و رحمة الله و بركاته
المرة دي باكتب لأن الكتابة في المدونة بجد وحشتني قوي
هتسألوني طيب ليه مش بتكتب
هأقولكم يمكن علشان في حاجات كتير ممكن تتكتب أو يمكن بردوا علشان مفيش حاجة ممكن تتكتب
اللي كان بيهون علي الواحد شوية هي الأستاتيوس بتاعت الفيس بووك
:)
نويت أمبارح أني أكتب و خلاص كتابة للكتابة منها أخبار عن نفسي مواقف مختصرة بس أفضفض و خلاص شوية
.
واحد معايا في الشغل قعد يقولي هات الأكونت بتاعك علي الفيس بووك أضطريت إني أعمل أكونت تاني علشان محدش في الشغل يعرف البلاوي اللي بأعملها في الحياة اللي بعد الشغل و عملت تحديد للأكونت الأساسي بتاعي علشان لو حد عرفه ميعرفش يدخل عليه غير اللي انا أعرف هم مين
للأسف عملت كده مكنتش حابب أقفل الأكونت بتاعي
يعني مثلا زي ما رحت يوم مناقشة رواية دارية في دار الشروق و أمبارح رحت مع الساعاتي لبيت السحيمي و كان في أنا الحكاية و تخيلت مين كان لازم يبقي موجود و يحضر الأتنين دول
و كمان يعني مثلا لو حد في الشغل عرف إني صاحب محمد مفيد ممكن يرفدوني من الشغل
.
إنجي أو أم حنين خلاص ربنا رزقها بحنين رسميا و ربنا يبارك فيها
أتصلت النهاردة بصديقي العزيز محمد فتحي
أمبارح الواد الساعاتي هد حيلي مشي و أتمشينا شوية حلوين من العتبة لشارع المعز و بيت السحيمي للباب الشعرية و العودة للبستان بعد كده روحنا
أمبارح بردوا صلحت كم حنفية و خربت الدش اللي بنستحمي بيه مش بتاع التلفزيون بس الحمد لله خالي جه النهاردة و ظبطه شوية
.
أول مرة أزعل لأني مش باعرف أكتب كلام جميل مش واضح
يعني زي ما الناس بتكتب كده
و أستيقظ فوجد الساعة تدق
و تنسم عبير الصباح
و نظر إلي السماء الدهماء
أنا مش عارف يعني أية دهماء دي أساسا و هو أساسا ممكن الشمس تبقي دهماء
.
الحزن شئ وحش قوي
و الأوحش منه إنه يكون في شئ يفرح و متعرفش تفرح بيه يمكن الواحد نسي إحساس الفرحة مش واخد عليه تأقلم مع الحزن و عاش معه
.
الحمد لله نعم ربنا علي الواحد كتير قوي
الحمد لله
.
رمضان علي الأبواب خلاص ياتري السنة دي يارمضان جايب لي معاك أية ؟
.
تواريخ كتير اليومين دول بتفكرني بحاجات كتير و شوارع و أماكن و مواقف و أغاني
.
الحمد لله فضفضت شوية معاكم
أنا مسافر دلوقتي علي الزقازيق في خطوبة هناك و راجع علي طول إن شاء الله ياريت الأقي تعليقات كتير علشان كده بجد مش هينفع ياريت نعلق بقة خمس تعليقات بس عيب و الله في حقكم مش في حقي
يلا سلام
و كل سنة و أنتم طيبين و راضيين و فرحانين و سعداء و أمنين

19 comments:

المهندس said...

الصديق / محمد
نبدأ بالتهريج شوية
اولا : هوه ده ايه بالظبط ؟ دي تدوينة ؟ ... ولا حكاية بتحكيها لواحد صاحبك عارف كل حاجة عنك ؟ ... انا كنت اسمع عن الادب الحداثي ... وبعد الحداثي .... التدوينة دي بقي ... تصنف علي انها تدوينة من التدوينات ... ما بعددددددددددد الحداثة ... انا قعدت ادور في الارشيف بتاعك ... اني اتلم علي معلومة ... تخليني افهم مين اللي بتتكلم عنهم .... ابدااااااا ... قلت اه ... اكيد دي المنشور الاول في التنظيم السري ... اللي كنت عاوز تعمله ... بس مكتوب بالشفرة اللي ما يعرفهاش غير اعضاء التنظيم ... ( هوديك في داهية ... انا عارف ) ... فيكون " امبارح " الذي ورد في التدوينة ...معناه الثلاثاء القادم ... و " واحد معايا في الشغل " معناه ... نائبك في هذا التنظيم السري
ثانيا : يا تعترف بانه ده منشور مكتوب بالشفرة ... وتروح في داهية .... يا تقلنا نوع " الدماغ" اللي كنت عاملها قبل ما تكتب " البوست " ... الاسطورة ده .... فعلا انت لو كنت داخل تحدي معانا اننا منفهمش حاجة ... مكنتش هتبدع اكتر من كده ... ده تحدي ... ولا تحدي " برسيل " كده
ثالثا : انت ليه زعلان انك مش بتعرف تكتب كلام جميل ..مش واضح ... انت اهه اثبت انك بتكتب كلام مش واضح خااااااااالص ... اما جميل دي ... فربنا امر بالستر
حبة جد بقي
اولا :مرحبا بعودتك للتدوين مرة اخري ... ومازلت مصرا علي ان تحجب عنا اخبار دراستك في التمهيدي ... ولم تخبرنا بتطورات السمك ايه ؟
ثانيا: اسوأ شئ علي الاطلاق ... ان يفقد شخص ما القدرة علي الفرح و السعادة .. فهذا مؤشر خطير علي انه من شدة ضغطه علي اعصابه - ليقنع نفسه بوضع ما لا يستسيغه - ..من كثرة هذا الضغط ... وصل الي درجة انه عندما يريد ان يعود لحالته الطبيعية ... لا يعرف الطريقة ... او متعبير " الميكانيكية " ...كما لو انه " كلبش " في الضغط النفسي .... فأرجو الا يكون هذا هو حالك ... واتمني لك السعادة الدائمة
ثالثا : كل عام وانت بخير ... وفي اتم صحة واحسن حال ... والف مبروك لصديقك او قريبك الذي ذهبت لخطوبتة ... وعقبالك
رابعا : لا تطل الغياب مرة اخري ... و دمت بخير ...والسلام عليكم

No Fear said...

الصديق المهندس
السلام عليكم
و الله أنا فكرت أخد كوبي من التعليق بتاعك ده و انزله بوست لوحده بجد جميل جدا و الله
.
بصرف النظر عن أي كلام قلته
خلينا في المهم
نفرض إني في حالة كلبشة أفكها إزاي ده لو ممكن تتفك
.
سابق عصري بعددددددددد الحداثة
نوع الدماغ شاي بالقرنفل عجب
.
التمهيدي إن شاء الله النتيجة الأسبوع ده
السمك تمام و عايش
ياريت أكون شجاع لدرجة كفاية علشان أقول التفسير بتاع المنشور السري ده
و الله شكلك صحيح هتودينا في داهية
.
علي فكرة بعد إذنك أنا ضيفتك علي المزنجر يعني
:)

المهندس said...

قصدك ... " مازنجر " اللي كان بياجي زمان مع " افروديت " .... انا عني نفسي بافضل "جرانديزر " ... علي الاقل مش معاه افروديت اللي كان كل اللي حيلتها " صاروخين " ...وبعدين تنضرب بقية الحلقة
طبعا يشرفني ويسعدني انه حضرتك تضيفني علي " مازنجر " ... بس لو حضرتك عاوز تكلمني اون لاين ... يبقي تبلغني قبلها ... لاني نادرا ما بافتح الميل ده ...الا صدفة ... لانه طبعا مش الايميل الرئيسي بتاعي ... ولو اتكلمنا ... هبقي ابلغك بالايمل " الشغال " ....ده كده يعني لزوم المدونة فقط
حكاية انه ازاي الواحد يفك حالة الكلبشة ... دي حكاية طويلة ... لكن اهم شئ - من وجهة نظري المحدودة - انه يحاول يزيل " او حتي يخفف " من الحمل اللي عاملة علي اعصابه ... المشكلة اننا مرات بنفكر اننا بنهتم باللي حوالينا ... وبنجاحنا المادي والمهني ... والاجتماعي ... وننسي حاجة بسيطة جدا بس في نفس الوقت مهمة جدا ... انه الحاجات دي محتاجة حد يفرح بيها ... فلو الشخص مفرحش ... يبقي - للاسف الشديد - كل ده مالهوش لازمة
قلي صحيح ...انت متأكد انه كان قرنفل بس ؟ ... طيب ابقي ابعتلي شوية ... عشان انا قاعد هنا لوحدي في الغربة ... ومرات بتطلب معايا ... اشرب شوية من قرنفل متعدد المواهب زي ده
رغم اني زرت مدونتك بالصدفة ايام " بوست " السمك ... الا انه صارت لمدونتك - وانت ايضا - معزَة .. - وليست معزة - خاصة في قلبي .... شكرا لثنائك الرقيق و الجميل علي تعليقي ... واتمني لك كل نجاح وتوفيق ... وان تتابعنا بالتدوينات ..والا تنقطع عنا مدة طويلة .... لكن رغم كل ده ... انا مازلت مصر انه " البوست " ده ... اعجوبة من اعاجيب التدوينات في الاونة الاخيرة .... حرام عليك ...كل ما اقراه ... احس انك قلت والله لاكتبلهم بوست يخليهم ما يدخلوش البلوجر تاني.
شكرا والسلام عليكم
ملحوظة : في انتظار ان تطمئنا علي نتيجة التمهيدي - ان شاء الله - ... وجهز نفسك للعزومة من دلوقتي ... رأيي تقدم علي قرض من دلوقتي

مـحـمـد مـفـيـد said...

ياعم هو انا عملت لك حاجه دلوقتي
انت عارف انا ايه اللي بيحصلي اليومين دول
:))))

Monzer said...

ربنا يكرمك يا جمعة

المهندس said...

الصديق العزيز / محمد
انت مدعو لقراءة هذا البوست
http://elmohandes2010.blogspot.com/2009/07/blog-post_26.html
والمشاركة ... ولا تحاول التهرب ... هتشارك يعني هتشارك
شكرا والسلام عليكم

rony said...

السلام عليكم ورحمه الله وبركاته
ازيك ياابني عامل ايه
يارب تكون كويس
واحسن من اي وقت فات يارب
حاولت انا اكلمك من كام يوم كده بس مش عارفه انت غيرت رقمك ولا ايه
عموما يارينت تدخل عندي وبعدها عايزه اعرف رايك
سلام

صاحب المضيفة said...

أهو بنعلق أهو ياعم

:):):):)

كل سنة وانت طيب يا حمادة ويارب دايما أيامك كلها في سعادة وهنا


دمت سعيدا

smraa alnil said...

يعني نقدر نقول ان البوست دة في شوية تفائل

وسعادة نوعا ما

ربنا يتوب عليك من النكد

وحلو اوي ان انجي او ام حنين دي

نردهالك في الافراح يا عم فرايداي

فى القلب said...

أزيك يا محمد كان نفسى اشوفك اوى مع مفيد فى حفل توقيع كتاب احمد القاضى و سألته عليك و قلتله يبلغك سلامى يا ترى وصل ولا لاء
ونفسى اشوفك فى اقرب فرصه يا ريت يكون فيه يوم فطار جماعى فى رمضان و نتقابل

Pinky said...

كل سنة وانت طيب عشان رمضان
مبروك لانجي او ام حنين الي انا معرفهاش
تروح وتيجي بالسلامة من الزقازيق
.
.
.
ملحوظة: نفسي مرة اعلق عندك واتكلم في موضوع محدد
سلام

No Fear said...

مفيد
السلام عليكم
أية اللي بيحصلك مش فاهم أنا قول الحمد لله

No Fear said...

منذر
السلام عليكم
بتحسسيني إنك بتشحت علي مش فاهم ليه
ربنا يكرمك و يجازيك خير و يهدييييييييييك

No Fear said...

المهندس
السلام عليكم
تؤمر هأقرأ حاضر

No Fear said...

روني
السلام عليكم
حمد لله علي السلامة منورة
طبعا الف مليون خمسين ألف مبروك ربنا يبارك فيه يارب
أول قرد عقبال الباقي

No Fear said...

صاحب المضيفة
السلام عليكم
لازم يعني نطول لسانا علشان تعلقوا
:))
كل سنة و أنت طيب و سعيد
ربنا يكرمك يارب و يوفقك دايما و نكون إخوات علي طول
جزاك الله خيرا

No Fear said...

سمراء النيل
السلام عليكم
بعينك تفاؤل في مدونتي هزلت هي و لا أية؟
:)
مش هأكلمك علشان خاطر حنين
ربنا يبارك لكم فيها يارب

No Fear said...

في القلب
السلام عليكم
أنا الحمد لله تمام
كل سنة و أنت طيبة و في خير دايما يارب
مفيد لغاية دلوقتي موصلش أي سلامات مع إني كلمته كتير
السلام أمانة يا مفيد
إن شاء الله يكون في لقاء قريب أنا نفسي فيه من زمان و الله بس في رمضان صعب و الله أعلم
علي العموم ربنا يكرم يارب
أخبار العروسة الصغننة أية ياسمين صح لسه فاكرانا و لا نسيتنا خلاص
:))
ربنا يبارك فيها و في إخواتها يارب

No Fear said...

pinky
السلام عليكم
لا حول و لا قوة إلا بالله هو أنا عذبتكم قوي كده معايا
:)
معلش
مش هأقدر أوعدك باللي بتتطلبيه خالص
ده حتي البوست اللي جاي هيكون أنيل من ده بكتييييييييييير
:)
كل سنة و أنت طيبة و بخير
الحمد لله رجعت بالسلامة من الزقازيق و رحت صيفت و رجعت بالسلامة من المصيف
:)