Sunday, June 21, 2009

مش عارف أسميه أية؟؟

السلام عليكم ورحمة الله
أخباركم ياشباب
بادئ ذي بدئ أي بني أدم محترم يدخل لازم يعلق مش هينفع كده الله يسامحه اللي أررر علي المدونة و زائريها من الجنس الناعم
الله يسامحه
:)
المهم
بردوا أولا حد ياكل تورتة أيس كريم
لا أحسن
المهم تاني
الفترة اللي فاتت الحمد لله كويسة نوعا ما بالرغم من إنه كان يتخللها بعض الأيام الصعبة الشوية اللي الواحد الحمد لله قرب من ربنا قوي فيها علشان ميغلطش غلطات جامدة يرجع يندم عليها زي ما ندم علي اللي عمله قبل كده يعني مثلا من تسع عشر أيام كده كان يوم صعب شوية
ليه
مالكمش دعوة
:)
بس الحمد لله عدي علي خير
أية كمان أمبارح صحيت قرفان مش عارف بقيت عادة عندي الخنقة من يوم السبت و القعدة في البيت مع إني بيطلع عين اللي خلفوني في الشغل علشان كده بيكون نفسي في يوم أجازة أرتاح فيه
.
الحمد لله الواحد أيضا بدا يسترجع شوية حاجات كويسة كان بيعملها زمان و بيحاول يرجع لها حتي لو بقدر فليل و اهوة يمكن ربنا يكرم إن شاء الله
.
النهاردة سيد بزازة كان أجازة و أنا طلع عيني زيادة النهاردة بس الحمد لله سديت في الشغل
مش عارف مش مبسوط في الشغل ليه مع إن الواحد تحت أيده شوية سلطات زي الفل تجنن و الشركة كلها تعرفني و تقدر أهمية الإنتاج و شغل عالي بس مش مبسوط مش حاسس بإنجاز نفسي أرجع معمل تاني
طبعا غالبا دكتورة علا هتظهر و تزعق فيا كعادتها مش بتظهر غير لما باتكلم عن الشغل
.
مستني ظهور النتيجة و ربنا يكرم و أبشركم بنجاحي
هو أية اللي في تورتة الأيس كريم ده مش مشلكة عادي شغال
.
معرفش ليه عمي الله يرحمه بيخطر علي بالي كتير قوي اليومين دول ربنا يرحمه
يمكن علشان أنا حاسس إني شبهه شوية بس بيني و بينكم هو أتظلم كتير مش أتظلم تعب نفسه زيادة علشان ناس كتير
ربنا يكرمني بالصفات الكويسة اللي فيه و يكرمني و أكون أحسن منه كمان
معتقدش ده عيب يعني أكتسب منه الصفات الكويسة بس مكنش طيب زيادة عن اللزوم يعني
ربنا يرحمه
.
الواد منذر و الواد حازم بيعملوا عمرة حازم ده صديقي الوحيد اللي من الكلية اللي يعرف طريق المدونة دي و طبعا منذر غني التعريف يمكن يطمر فيه و يعرف إني مسيطه علي المدونة
ربنا يكرمهم و يدعوا لي كده ربنا يفرجها لي من عنده
.
حسن شحاته بس كده
.
إيران مولعة نار دلوقتي هل ياتري هيجي لنا يوم و نكون زي أيران كده و لا لبنان و لا العراق
.
في حاجة سيكولوجية عاوز أسألكم عنها
هل ياتري الصح الواحد يخرج من الشغل ينسي كل شئ فيه و ميفكرش فيه و لا يفكر فيه بعد أما يسيب الشغل و يروح ياتري النجاح أي واحدة من الأتنين؟؟؟
بس لو أفتكرت حاجة تاني هأبقي أقولكم

9 comments:

Pinky said...

سلام عليكم
تاكل جيلي
لا
احسن :p
ربنا يكرمك ان شاء الله وتقرب من ربنا اكتر
وصدقني لو كنت بتنزل الشغل يوم السبت كان زمانك بتقول يا رب يووووووووم اجازة
هو كدة محدش عاجبه حاله :p
ان شاء الله تكون زي عمك واحسن ربنا يوفقك
وربنا يرحمة
ربنا يستر علينا منبقاش زي ايران ولا العراق ولا لبنان
كفاية كدة طولت عليك
سلام

catroz said...

هو ايه حكايه الجيلى
:D

اكسر الروتين شويه ..
شلك محتاج شويه تغييرات كبيره فى حياتك

No Fear said...

Pinky
و عليكم السلام
هي بقيت كده يعني
طيب أكل جيلي بقة
يارب نقرب من ربنا أكتر و أكتر
عارف و الله بالنسبة ليوم السبت الشغل بس بيقلب علي المواجع
:)
ربنا يرحمنا جميعا
طولي ياستي براحتك شايفة حد بيعلق أساسا
:)))

No Fear said...

catroz
السلام عليكم
مش عارف بصراحة موضوع الجيلي ده
:))
ربنا يكرم بتغيير أنا نفسي فيه و الله
:)

Ola said...

على فكرة إنت بتطلع عليا إشاعات!! أنا ولا بزعق ولا حاجة، بس أنا بيتم استفزازي بسهوله! خد عندك يا سيدي، الكيميائي منكم يبقى لسة متخرج و ييجي المعمل و يبقى مستعد يشتغل، نعلمه و ندربه على أجهزه كتير و يبقى ليه وضعه و مرتب محترم كمان، فجأة يقولك أنا رايح شركة ولا مصنع و يسيب الشغل في يوم و ليلة و يسيب الدنيا تضرب تولع!! بذمتك ده اسمه كلام يا بشمهندس؟ و بعدين النتيجة طلعت في كل حته خلاص، هو انت بتاخد applied biochemistry ولا Micro ولا ايه؟؟ يلا ربنا معاك
بالنسبة لسؤالك، الموضوع ده بيفرق من شخصيه لشخصيه، مالوش دعوة بالنجاح، يعني أنا مثلا ممكن أفضل في السرير ساعة مش عارفة أنام علشان بفكر في الشغل و مشاكلة لكن الأستاذة الكبيرة صاحبة واحد من أكبر و أنجح معامل اسكندرية و مثلي الأعلى و سيدة المجتمعات ممكن تطفي دماغها و تسافر اسبوع مثلا من غير ما تبقى مضايقة ولا قلقانة ولا حاجة

No Fear said...

د/علا
السلام عليكم
أسفين علي الإستفزازات اللي بنسببها لحضرتك
بس يعني الواحد بيفضفض يلاقيكي داخلة ضرب ضرب علي طول
:))
طيب خلاص أبعتي لي أنا اجي أتدرب عندكم و وعد مش هامشي
ده أنا نفسي جدا أشتغل في معمل :) حقيقي مش تهريج
بصراحة ردك علي السؤال حيرني بس أنت جاوبتي عليه بطريقة مش مباشرة
منورة المدونة حقيقي

Ola said...

بما انك بتتكلم جد، أنا معنديش مانع!! لو تقدر تيجي تشتغل في الأسكندرية اتفضل!! و بعدين أنا مش بتكلم عن معمل واحد، الموضوع عبارة عن سلسلة و عندنا شغل بالهبل يعني ممكن تشتغل طول اليوم و سهر كمان في معامل المستشفيات اللي إحنا ماسكينها، بس قرر الأول حينفع تسيب القاهرة؟

No Fear said...

د/علا
السلام عليكم
طيب بما إنه ممكن يعني فين بقية التفاصيل المرتب و خلافه يعني مش عمياني كده هو حد يطول يعيش في الأسكندرية
:)

واقعى said...

السلام عليكم
ايه ياعم انت ود.علا انا داخل مكت توظيف ف القوى العاملة ولا ايه بس
هههههههههههههههههههههههههههههههه
الله يوفقك اخى الفاضل