Sunday, August 30, 2009

وحشتيني أيتها المدونة

السلام عليكم و رحمة الله و بركاته
أخباركم أية ياشباب
يارب تكونوا بخير حال
أهوة العشر ليالي الأولي في رمضان عديت إزاي الله أعلم
ربنا يجعلنا ممن نالوا رحمته في أيام الرحمة
الواحد أينعم ماشي علي سطر و سطرين بس أهوة ماشي الحال فين أيام رمضانات اللي فاتت اللي كنت بأدعي إن ربنا يعديها بسرعة و كنت بأكون متضايق فيها لأنني في الشغل القديم كان اللي بيعدي اليوم هو المشروبات الكافيينيه و كنت بأتعذب أيام رمضان أحلي حاجة في الشغل الجديد اللي مش عارف إزاي بردوا مر عليه سبع شهور أهوة إنه مفيش وقت الواحد بيشرب أتنين درينك في اليوم بس واحد الصبح و احد الضهر و ممكن ميلحقش يشرب غير واحد بس كمان في أيام كتير
ربنا يجعلنا من عتقاء الشهر الكريم يارب
.
و الله أيتها المدونة أنت وحشتيني فعلا و كنت كل أما أجي أكتب أخاف حد يفتكر الكلام عنه يعني بعد مقابلتي مع مفيد و الحسيني و الساعاتي و مهنا و ميدو و الغزالي حبيت أكتب خفت مفيد يفتكر إني باكتب بسبب السحور و كده كسلت
و بردوا مش بأكتب النهاردة علشان موضوع و حوار دار أمبارح هو يمكن بس باكتب علشان لاقيت وقت محدش فيه بيكلمني علي المسنجر و أنا نفسي أكتب و نمت لي ساعتين قبل الفطار و فايق و شكلي كده من صوتي في حديثي مع نفسي داخل علي دور برد ربنا يستر
و كمان قررت أكتب بوست تاني في شهر تمانية أشمعني معرفش و قلت ألحق أكتب النهاردة زي الشغل كده علشان بنقفل شغل الشهر قبل أخر يوم في الشهر من أوامر إنتاج و خلافه
.
الإخوة المدونين و الله وحشني جدا و نفسي أدخل عندكم و أعلق و أقرا زي زمان بس و الله مفيش وقت خالص و لا صحة الواحد بيرجع من الشغل مش شايف قدامه ياكل و ينام و يصحي يروح الشغل و يرجع و ياكل ينام بس أكيد هأفوق من الساقية دي قريب إن شاء الله
.
أيها الشهر الكريم بلاش كده بقة عاوزينك تبقي شهر خير أنت لتاني مرة ورا بعض بتيجي بشوية وجع الحمد لله المرة دي أخف أو يمكن أنا اللي أقوي بس مش كده يعني
عاوزين رحمة و مغفرة و عتق من النار
بس شغال أهوة الواحد ماشي الحال
.
نفسي أكتب لكم عن يومياتي في الشغل مع سليمان اللي بحبه و مع سيد أبوح أو سيد بزازة أو سيد أبوحفيظة و صلاح بستلة و التوربيني الأسود و الطن و كمارا و كريم البركة بس بجد مفيش وقت و لا صحة بردوا
الواحد بيسمع شوية مصطلحات في الشغل ده عجب و بيسمع شوية قصص أعجب
أنا الحمد لله في طور توافق مع سيد بزازة هو مركز مع ناس تانية دلوقتي و أنا طبعا بعد سبع شهور بقيت سوسة اية فل و مظبطه يا مسهل علي أخر السنة نبقي من الناس اللي بتفقع خوازيق عيني عينك و الكل يعمل لي حساب
:)))
.
فين رمضان اللي فات الساعة سبعة عند هارديز أييييييييييييية أيام الشئ المشترك بين الأيام دي و اليومين دول إن الزمالك بيتغلب بردوا
:)
.
و بمناسبة رمضان لازم بردوا أفتكر احلي بوست قريته في رمضان مش فاكر عند مين أو فاكر و بأستهبل عن العودة من الشغل و الزحمة و بابا ولازم أدخل عليه و أقوله مش عاوزة أروح الشغل ده تاني
و لازم بردوا بعد رمضان أفتكر أحلي أول يوم عيد عيشته في حياتي لما ركبت ميني باص ميه و خمسين و رحت بيه السيدة عيشة و الدنيا كانت فاضية إزاي طول الطريق و بعد كده فجاة لاقيت الناس كلها متجمعة عند القلعة و المقطم و حال المقطم و الكافتيريا اللي كنت قاعد عليها لوحدي و مع نفسي
الحمد لله علي كل
ربنا يجعل الخير فيما قضا
.
الكلام
الواحد اليومين دول نفسه يتكلم بس مش لاقي كلام يقوله و مش لاقي شخص يسمعه سيبنا من الشخص اللي يسمع ده دلوقتي علشان هنفرض لو لاقيناه و ملقيناش الكلام هيبقي أية موقفنا
سبحان الله
ساعات كتير بيبقي نفسي أتكلم بس الكلام مش بيكون موجود مش عارف ليه بأحس إني معنديش موضوعات أتكلم فيها و لا حتي مجرد كلمات أي كلام تتطلع مني
إحساس رخم بجد
.
أمبارح بقة بعد الموضوع اللي حكيت لكم عليه طبعا أتضايقت و زعلت بس الحمد لله حسيت إن في هم إتشال من علي صدري حسيت بهواء و راحة هي مصحوبة بشوية زعل إن شاء الله مش هيستمروا بس أهوة حتي علشان مضحكش علي نفسي و أستني الترام علي رأي حازم صديقي الأسكندراني النوبي الكمبيوتري
.
كفاية كده و لو لحقت أعمل تعديل علي البوست ده بكرة و لا حاجة قبل تقفيل الشهر يبقي خير و بركة و لو ملحقتيش يبقي ننزل أمر إنتاج جديد لبوستات جديدة أو الشهر الجديد
و حياة جديدة
سلامزززززززززززززززززززززز

6 comments:

No Fear said...

السلام عليكم
هيييييييييييييه أول تعليق
إزاي يعني
أية الإستهبال ده إزاي محدش علق لحد دلوقتي
ماشي يابني أدمين

يا مراكبي said...

تصدق بقى انت من غير ما تآخد بالك كتبت بوست كوميدي؟

سيد بزازة

وهتعرف تفقع خوازيق على آخر السنة

والزمالك اللي بيتغلب

كوميديا الموقف هي اللي خلقت النص الساخر ده .. رغم انه كلام شخصي

المهندس said...

لا حول ولا قوة الا بالله

هوه الصيام بيعمل كده في الناااااااااس ؟؟؟ ... انت ياباشا .. تنضم لجماعة المدونين السرياليين علطووووووول ... ده اعجاز مش تدوين يا عمنا ... ايه الحلاوة دي ... الفن الشديد ده عاوز قرون لحد " محدودي " الذكاء امثالي ما يفهموه

هههههه كفاية عليك كده ... احسن تمسح البوست التحفة ده

المهندس said...

كل سنة وانت طيب ... وتنعاد عليك الايام وانت في اتم صحة واحسن حال

انت ياباشا مشكلتك انك " حياتك ... عاوزة تتملي شوية " ..مش بالشغل والدراسات العليا فقط ... لكن بحاجة تانية ... مش مكانها هنا ... لكن لو قابلتك علي الماسنجر .. هحكي معاك فيها

وبعدين انت شغال فيييييييين ..." سيد بزازة " ..و " صلاح بستلة " .. و " التوربيني الاسود " .. ايه الاسامي الشاعرية دي كلها ... متكونش شغال موسيقار ... او رساااااام ...

تهانينا علي تعرفك علي اصدقاء من المدونين في الحياة الحقيقية ... بس لو كانوا " هياخدوك " مننا ... هنتقدم ببلاغ عااااااجل ... للبوليس الدولي .. للمدونين ... للقبض عليهم فوراااااااا

يالا انا رغيت كتير النهاردة ... اتركك في رعاية الله ... السلام عليكم

Ola said...

رمضان كريم يا بشمهندس:)

كلام على بلاطة said...

كل عام وانت بخير
تحياتى