السلام عليكم
مش فاهم ليه إحنا بنهدم في بعض من تحت لتحت و مش بندي فرصة للمنافسة الشريفة المحترمة و لو حتي ظاهريا ليه كلنا بنحاول نظهر ولائنا الأعمي الرخيص للحفاظ علي منصب و لا جاه و بأقول للناس اللي بتعمل كده نظرة بسيطة علي أسلافكم في هذا المجال هتلاقوهم في مكان واحد هو مزبلة التاريخ
أتقوا الله في وطنكم و أولادكم و الأجيال اللي جاية
الدكتور محمد البرادعي بيفكر يرشح نفسه بس لإنتخابات الرئاسة و قال شوية شروط بسيطة علشان يترشح الرجل مكفرش يعني و لا يعني قال هنحارب و هأقاتل علشان الشروط دي تتحق هو قال لو حصلت هأرشح نفسي متحققتش مش هأرشح و شكرا
ليه نقول عليه أوهام ما بعد التقاعد يعني خلاص الرجل أتخبل يعني بعد أما ترك وكالة الطاقة الذرية عيب الرجل لسه عنده سبعة و ستين سنة بس يعني ها
أنت بتتدعي إن الشروط اللي هو بيقولها دي إنقلاب علي الدستور مرة واحدة إنقلاب بالمناسبة طبعا لو يعني حصل و التعديلات دي حصلت بكرة هتبقي فطنة و حكمة و رؤية مستقبلية و ديموقراطية و ووحي من الله لأسيادنا في الحزب
و بتقول كمان إنه معه جنسية تانية الرجل قال مفيش غير جواز سفر مصري عاوز أية يعني يقلع لك ملط في ميدان التحرير و يحلف إنه مش معه غير جواز سفر مصري
و بتقول كمان إنه معندوش خبرة سياسية مش هأقولك لا عنده ياسيدي
طبعا كلنا عارفين الرئيس مبارك كان خريج كلية حقوق و رئيس إتحاد الطلبة و تتدرج في العمل السياسي السري و العلني و أسس تلات جماعات سرية حاربت الإحتلال و أعتقل خمستاشر مرة في المعتقلات السياسية
صح مش هي دي الخبرة السياسية اللي أنت بتقول عليها
و لا أنت تقصد سياسة بوس الأيادي اللي ماشية في البلد اللي خليت السيدة المحترمة وزيرة القوي العاملة مصدرة الخادمات تبوس إيد حرم الرئيس علني عيني عينك ياتاجر
حاجة تقرف أنتم بتبصوا في المراية إزاي و إزاي بتتعملوا مع ولادكم و أهلكم الواحد قرف منكم الحقيقة
.
أنت تعرف الغريب إني حبيت الدكتور البرادعي بسبب مقال أتكتب في الأهرام العربي لما كنت رئيس تحريرها و كنت ساعتها بأقرا الأهرام العربي من الجلدة للجلدة ما عدا المقال بتاعك
:)
عبقري من يومك
.
بالمناسبة طبعا مفيش حد بيدخل المدونة دي اليومين دول علشان يقرأ اللي بأكتبه و طبعا اللي كتب الكلام ده هاكرز جزائريين أحتلوا المدونة بتاعتي علشان أنا حاطط صورة عمرو زكي
6 comments:
لله فى لله انا لا احب الدكتور محمد البردعى ولا اعرف السبب سوى انه على راى عبد السلام النابلسى لاسماعيل يس -رحمهما الله - فى احد الافلام يقول النابلسى لاسماعيل - خبى وشك وشك بيلبش جدتتى
ورغم هذا فان للرجل الحق كل الحق فيما يقول
كنت احترم الدكتور عبدالمنعم سعيد وكنت اقرا كل ما يكتب ولكن بكل اسف منذ اصبح رئيس مجلس ادارة الاهرام وهو منحاز الى الحزب الحاكم - وهذا حال المنصب يجعل بعض الناس تبيع كل شئ من اجل الكرسى - وقد اصبت بقرق شديد من هجوم الدكتور سعيد على الدكتور البردعى
تحياتى
متلخبطه خالص
أولا أنا مش مع ترشيح البرادعي للرئاسة قوي يعني لكني مش بأكرهه
لكن المهم إن حكاية ترشيحة دي فتحت بكابورت المقالات اللي ضد البرادعي وبتنحاز للحزب الحاكم بشكل صفيق ومكشوف ومقزز جدا
طيب داروا خيبيتكم شوية .. مش كده قدام الناس
انا مش من مؤيدى البرادعى,, انت عارف من مؤيدى جمال ومن رأيى اخد فرصته زى اى حد بيحاول يصلح فى البلد بعيد عن انه ابن الرييس
لكن مش اللى بيتعمل مع البرادعى من حقه يرشح نفسه
او يمكن يكون بيتلكك عشان عارف ان مطالبه مش هتتحقق !!!!!!!!!!!!!!!
المشكله ان كلمه لاء بتسبق اي حاجه عندنا قبل ما نفكر
ايه المشكله يترشح مش يترشح
ينزل يطلع
تحس اننا خلاص اصبحن نعترض من اجل الاعتراض
8-)
Post a Comment