Saturday, November 15, 2008

بيني وبينك

اولا أنا عارف إن أنا تقلت عليكي قوي في الكم بوست اللي فاتوا دول و ممكن أكون حملتك أكتر من طاقتك
و ممكن اكون ضايقتك في وقت تكوني فرحانة فيه
بجد أنا أسف سامحيني علي ضعفي اللي أنت متعودة عليه دايما مش عارف إزاي كنتي مستحملاني
.
أية رأيك في الأغنية اللي فاتت دي بأفهم صح
:)
.
أنا حاليا بأقرأ في يوتوبيا و لما تخلص هأقرأ شيكاجو و بأتصفح كل كم يوم كده كم ورقة من العربي أوعي تكوني مش جبتيها بس مش عارف أقرأ أية بعد كده
.
بأسمع مارسيل يا نسيم الروح و قالو مشت و موسيقي أسمها مداعبة لمارسيل بردوا هي جميلة قوي و رباعيات علي و جاهين
.
الحمد لله أنا كويس عن الأول في العلاقة مع ربنا
و الحمد لله بردوا علي كل شئ بس مش كويس في إني فقدتك
.
في حد أول ما بدأت أتكلم عنك علق و قال إن كل حاجة في الأول بتبدأ صغيرة و بعدين تكبر ماعدا الحزن بيبدأ كبير و بعدين يصغر
للأسف القاعدة دي مش عاوزة تشتغل معايا خالص
.
عملت بطل و مسحت الإيميل بتاعك من علي المسنجر بس طبعا طلعت عيل و مقدرتيش و رجعته تاني
و الله مسحت نمرتك بس للأسف حافظها
.
عارف بردوا إني قليل الأدب و الذوق و كل حاجة و لسه بأتقل عليكي و بأتعبك بس معلش أنت الكبيرة بقة
و عارف إن في ناس كتير قرفانة مني و بقيت غالبا مش طايقاني و ندمت إنها دخلت عندي في يوم حتي لو مرة غلط بس بجد أنا مش قادر و بادعي مفيش أي إنسان في الدنيا يتعرض للي أنا فيه
.
هأطلب منك طلب غالبا مش أخير يعني
أستحمليني الفترة دي لحد ما ربنا يريد يخفف عننا

4 comments:

esraa said...

ربنا يخفف عنك يارب

Towtor said...

شبراوى ..زملكاوى ..مكتئب ..حبيت ولا طولتش .بصرة ..اهلا بيك ..اظنها لعنةتمسك بكل زملكاوى شبراوى .

انا كمان بحب اغنية على قد ما حبينا وام كلثوم دايما بتغنى فى ودانى اغانى الهجر والعتاب ..اخرج من الحالة دية ..خليك راجل ..بكرة تحب غيرها ..كفايه انك ملك قلبك ..لا مجتمع هيقولك عيب ولا حرام ولا احترمى نفسك واسرتك ..ولا زوج هيستجوبك ويقولك "حبيتى قبل كده "كأنه اتهام بالخطيئة الكبرى .
انا قريت يوتوبيا فى قعده واحدة ..تقريبا التهمتها وهى حتى صغيرة مش كبيرة ...وشيكاغو كذلك ..بس الكيميائى طولت معايا شوية ..ركز فى شغلك ..هو اللى هيبقالك ..اهم حاجة انك تاخد خبرة كويسه فى شغلك ..مش وقت وشغل والسلام ..اخرع من القوقعة دى ..بصراحة فى الاول حسيت انى بقرا لطفل فى ثانوى سابته البنت اللى كان بياخد معاها الدرس ..فى ايه يا ابنى ..اوقات كتيرة ببقى اصغر من كده بس انت زودتها .

عجبتنى جملة ان الحزن هو الحاجة الوحيدة الى بتبدأ كبيرة وبعدين تصغر ..لكن نسيت حاجة ان كل نار تصبح رماد الا نار الشوق ..دى يوم عن يوم تزيد .

ايه حكاية الشوارع والمشى ومش عايز اروح دى ...ليه ؟ ربنا يخفف عنك زى ما قالت اسراء .هى قوقعة نستلذ البقاء داخلها بعيدا عن الحياه لنستيقظ فنجد انفسنا متأخرين لاميال عمن كانوا معنا .

مشمشة

LAMIA MAHMOUD said...

كبداية انا كنت داخلة اسئلك اية معنى تعليقك عندي
مفهمتش
ومستغربة
بس قريت البوست ده واللي قبليه
مش حقولك غير زي ما اسراء قالت ربنا يخفف عنك
عارف ليه
لان لا نصيحة في الحب
مش حقولك ولا حتهون ولا حتعدي عشان كل ده انا متاكدة انه بالنسبة لك مجرد كلام من ناس بتهذي متعرفش حاجة عن اللي انت حاسس بيه
بس اللي عاوزة اقولهولك كل الناس تقريبا حست باللي انت حاسس بيه ده قبل كده وفي منهم اللي بيحسه لحد حالا واللي بطل يحس اصلا واللي حيفضل يحسه لمدة عشر سنين كمان قدام
متقلقش على نفسك يعني

عموما حسالك بقى السؤال اللي جابني
يعني اية التعليق ده؟؟؟؟؟؟

wafaa said...

لا تشكو للناس جرحا انت صاحبه لا يؤلم الجرح الا من به الالم
احلم باللى جاى تعيش مرتاح