Friday, March 27, 2009

بأسأل في الدين

سبحان الله اليومين دول طلع فتوتين مش فاهمهم
واحدة من شيخ الأزهر تبيح نقل الأعضاء من المحكوم عليهم بالإعدام بدون أخذ موافقتهم و لا موافقة أهلهم
و أستند في حكمه علي إن جسد المحكوم عليه بالإعدام مش ملكه مش فاهم إزاي
في شيوخ معارضة و حتي الأطباء مش موافقة علشان بتقول إن لازم اللي يتبرع بأعضائه يكون مش مجبر و لا مقيد و غير فاقد لحريته و حتي لو واحد محكوم عليه بالإعدام وافق إنه يتبرع مش هيعملوا عملية النقل ده علي لسان الدكتور حمدي السيد نقيب الأطباء
أنا عندي سؤال لفضيلة شيخ الأزهر
مين اللي قال إن جسم المحكوم عليه بالإعدام مش من حقه علي قد ما فهمت يعني يمكن أكون أنا اللي فهمي قليل
ثاني حاجة هو المحكوم عليه بالإعدام ده خلاص الجرم اللي عمله أخد جزاءه ربنا يعني قال اللي يقتل نفسا بغير نفس يقتل ده حكم ربنا كان ممكن ربنا يقول ممكن نمثل بجسده بعد كده لو ربنا شايف إن الحكم بالإعدام غير كافي ممكن يكون اللي أتحكم عليه بالإعدام ده تاب توبة جعلته أحسن من أي حد مثل المرأة التي زنت و ذهبت لرسول الله اعترفت بذنبها و تابت
و الله اعلم
لو حد شايف إني فاهم غلط يوضح لي و أنا مش بأفتي أنا بسأل محدش يستهبل و يفهمني غلط
انا بأصلي بالعافية
.
الفتوي التانية
لا يجوز إجبار المواطنين علي دفع الزكاة بالقوة
و الفتوي دي من مجمع البحوث الإسلامية
انا قريت الشرح للفتوي دي و ملخصه إنه مش المفروض نجبر أحد علي إخراج زكاته و أين يخرجها و علي مين يصرفها
أنا سؤالي بقة
هو مش سيدنا أبوبكر الصديق رضي الله عنه حارب حروب كتير أستشهد فيها صحابة كتير علشان بعض الناس منعت فلوس الزكاة
و قال لو منعوني من شئ كانوا يعطونه لرسول الله لحاربتهم عليه
هي مش دي كانت فلوس الزكاة و لا أية؟
و في المسلسلات التاريخية الحمضانة الي بنتفرج عليها في حاجة أسمها بيت مال المسلمين كانت فلوسه بتتجمع منين
و يعني اللي عاوز يصرف فلوس زيادة محدش يعرف عنها حاجة يتصدق مش لازم فلوس الزكاة و الزكاة مش تتطوع دي فرض
علي ما أنا فاهم يعني
يعني لو واحد شاف واحد بيزكي بفلوسه مش بيكون رياء يعني زي الصلاة اللي بيشوف حد بيصلي الصلوات الخمس مش بيكون بيتفضل علي ربنا ده فرض عليه
اللي عاوز يتتطوع و يخلص مع ربنا بيقوم الليل مثلا
و الله اعلم
لو حد يعرف شيخ الأزهر او حد في مجمع البحوث و لا موافق علي الكلام ده ياريت يفهمني بجد
علشان أنا محتار و مش فاهم
و الله أعلم

2 comments:

kochia said...

الحقيقة انا سمعت الموضوعين
الموضوع الاول برده اعترضت عليه
المحكوم عليه بالاعدام هو انسان وجسده ملك لاهله بعد وفاته طبعا

والموضوع الاخر اعرف ان الشيوخ اعترضوا عليه وهو غير منطقي اصلا

ساعات بتطلع فتاوي كدة ربما تكون مسندة لشئ ما لكن اكيد ناقصة برده كتير
للاسف

تحياتي

اصحى يا مصر : اسلام ديو said...

ولله هما كل يوم يقعدوا يقولوا شوية كلام مش عارف بيطلعوا يفتوا كتير الايام دى على ايه ولله انا معارف

الموضوع اللى فتوى نقل الاعضاء طبعاً انا مش معاه فعلاً لإن الانسان مش مجبر انه ينقل عضوه لازم من المفروض يتسأذنوا منه الاول

ولا يمكن هما استندوا ل "لايهم الشاه سلخها بعد ذبحها"
الله اعلم

المدونة جميلة ، والبوستات اجمل
يمكن دى اول زيارة بس مش الأخيرة بإذن الله