Monday, March 16, 2009

EgyRec Again :)))

السلام عليكم و رحمة الله و بركاته
أزيكم يا شباب أخباركم أية؟
يارب يكون كله تمام
خلاصة البوست ده بدأت معارك ضارية في الشغل الجديد اللي أنتقلت له مع مدير المصنع و مدير الإنتاج مدير المصنع ده راجل فاهم قوي و المقابلة اللي عملتها معه هي تقريبا اللي شجعتني علي الإستقالة من الشركة اللي كنت فيها و أروح الشركة دي بس هو شخصية كويسة مقدرش أغلط فيه و لا أقول عليه و لا كلمة بس فاكر الناس كلها محترفة إكسل و تتطلب أي معلومة من أي حد تجيبه طلبه هو مش واخد باله إنه هو مدير المصنع و أنا مهندس إنتاج في واحد زيي فاهم الدنيا أكتر من و الخبايا أكتر مني و هو سبب الأزمة كلها الواد ده بقة من تاني يوم لي في الشركة الناس كرهتني فيه ومحدش شافني غير و قالي خلي بالك منه و اللي يقولي أنت صعبان علي شكلك طيب و هكذا و زي ما بيقولوا الزن علي الودان أمر من السحر كرهت الواد ده أساسا و هو واد أليطة أصلا و متعنطظ مش فاهم ليه مع إنه مكبر دماغه في الشغل الإشرافي اللي أنا بأقوم به بس هو رهوان في التخطيط الحقيقة و عارف الناس كويس و عارف شغله تمام و زكي مقدرش أنكر بس للأسف هي عصابة كبيرة و أنا سهل جدا أخترقها بس لازم أكون قوي فنيا في الشغل طبعا محدش فاهم حاجة بس مش مشكلة المهم النهاردة حصل نقاش بيني و بين مدير المصنع و قالي هأعتبر الكلام اللي أنت بتقوله مسمعتوش و نكمل بكرة و ربنا يستر و علي العموم انا جهزت الإستقالة خلاص و ماشي بيها في ظرف محترم و عند أي لحظة مستعد لكي أضحي
:)
مدير الإنتاج بقة هو مش فاهم أي حاجة في أي حاجة هو بيسمع للناس و خلاص و أهطل كده و العيل سموه في الإنتاج أسامي كتير قوي عم شكشك و القرد أبو سديري المشكلة هو مش فاهم حاجة يسمع من مدير المصنع كلمتين ينزل يقولهم لي انا طبعا بأكون عارف هو بيقول أية لأن مدير المصنع اللي فاهم كان قالي كده قبله و هو طبعا بيحاول يفهمني إن ده كلامه هو و هو أساسا مش فاهم يعني أية معدلات إنتاج و حسابها و كي بي أي و لا أي كفتة و العيال الشياطين اللي في الإنتاج خلوه يبوظ شحنتين و أنا مش عاوز أكون زيه كده
في شوية عيال في الإنتاج نفسي أحي لكم عليهم بس أنا هأقول لكم علي أتنين بس واحد أسمه محمد و محمد ده تخين قوي العيال مسمينه طن تخيلوا بتنادي علي واحد أسمه طن و في كمان الأستاذ كريم بركة طبعا أي شحنة بيشتغل فيها نقول الحمد لله لو مشيت في أول يوم بعد معاناه لأنه هو كما واضح من الإسم بركة بيخرب أي شحنة يشتغل فيها ده مرة ساب خرطوم المياة مفتوح رجعنا تاني يوم الشغل لاقينا صالة الإنتاج بحر و كان يوم بركة فعلا
.
الغريب و العجيب و الخزعبلي في الحوارات دي كلها إني مش خايف و مش زعلان و مش قلقان مش عارف ليه و لا حتي ندمان علي إني سيبت الشغل اللي فات
و الحمد لله أتعلمت حاجات كتير هي أينعم في شهرين بس أهوة أحسن من مفيش
أنا يعني مكملتش شهرين أهوة و خلاص قربت أودع الشغل ده بس الحمد لله مش خايف و لا زعلان
هو بيني و بينكم ربنا يستر بس انا مش متكهرب و منفض و دماغي في الخلعون خالص
غريبة قوي الموضوع ده هو ده اللي قلقني
.
المهم أستأذنكم بقة علشان أرجع مرة تانية لحسابي اللي علي موقع إيجي ريك علشان أبدا في مرحلة جديدة من البحث عن عمل جديد
و إلي اللقاء في ظروف أحسن من كده
:))

11 comments:

مـحـمـد مـفـيـد said...

قلنا كده
قالوا اطلعوا من البلد
بص يا عمنا
لازم تصبر
كل شغل في قرف وانت لسه بتبدأ

مـحـمـد مـفـيـد said...

هو زوزو قصده ايه بكلمه
اغنيه شعبيه جمعه بيحبها

Monzer said...

ههههههههههههههههههههههه


والله يا مفيد انت عسسسسسسسسسسسسسسسسسل

No Fear said...

العزيزين اللي بقيوا لي في المدونة
أزيكم واحشني قوي و عاوزين نتقابل قريب بقة
تعرف يا مفيد أنا من طبعي الندم علي أي قرار و اي حاجة عملتها ما عدا موضوع الشغل ده سبحان الله الحمد لله مرتاح قوي لحد دلوقتي بالرغم من الصعوبات اللي قدامي
ربنا يكرم كده دايما
مش هأكلمه علشان خاطرك يا مفيد لولا كده كنت عرفته غلطته
سلام
بجد نفسي أقابلكم أنتم الأتنين بس

Monzer said...

ماشي يا جمعة

مفيد هو الى مقويك

ماشي يا جمعة

Ola said...

ايه الأخبار يا عم الحج؟ سبت الشغل ولا ايه؟ بس يا محمد، من خبرتي في شغلي أقدر أقولك ان أي واحد جاي يقدم على شغل و تلاقي ال CV بتاعه فيه كذا شغلانة سابقة في أوقات متقاربة بتبقى فرصة مش كبيرة!! عدم الاستقرار من الحاجات اللي بتقلق أي صاحب عمل، و على فكرة، مهما كانت أسباب تركك للأماكن السابة قوية ده برضه بيقلل فرصك، يبقى الحل إيه؟ متروحش أي شغل إلا لو كان حيضيفلك!! لازم تبتدي و انت ناوي تكمل مش و انت ناوي تقضي وقت لغاية متلاقي حاجة أحسن!! اسمع كلامي و ركز، و ربنا يوفقك ان شاء الله

No Fear said...

علا
السلام عليكم
جزاكي الله كل خير علي النصيحة
أنا لسه مسيبتش الشغل بس ماشي و الإستقالة في الفيل معايا بجد مش تهريج
و إن شاء الله مش هسيبه
أنا رايح مقتنع جدا و لحد دلوقتي مقتنع جدا الحمد لله
مش عاوز أقولك أنا أساسا من طبعي الندم علي أي شئ
بس الحمد لله الشي الوحيد اللي غالبا مندمتش عليه الحمد لله هو تغيير الشغل لأنه ضاف لي و بيفيدني بس هو إختلاف في وجهات النظر مع مدير المصنع اللي هو السبب إني حبيت الشغل في الشركة دي
هي دي الحكاية
و ربنا يكرم

انت تسال والكمبيوتر يجيب said...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

No Fear said...

أختك
هو الردايو ده للبنات بس و لا أية؟
:)))))))

يا مراكبي said...

ما تستعجلش في الحكم على الأمور

قلبي حاسس إنك هتكمل معاهم

No Fear said...

يامراكبي
السلام عليكم
أنا مش مستعجل بس بأحكي للناس من الأول علشان تكون متابعة معايا
:))
انا إن شاء الله مستمر معهم
ربنا يكرم
نورت مصر
:))