السلام عليكم و رحمة الله و بركاته
أزيكم يا شباب أخباركم أية
يارب تكونوا بخير و في أحسن حال
و الله أنا مكنتش ناوي أكتب حاجة عن الموضوع ده لكني للأسف أتصلت بمفيد علشان أطمن عليه علشان العملة الهباب اللي هو عملها و في وسط الكلام سألني ليه مش بتكتب مفيش حاجة جديدة قال أية هو بيطمن علي لما باكتب بالرغم من إني في البوست اللي فات هو قراه و معلقش عليه علشان معرفش يقول أية المهم
البوست ده عن موقف حصل لي النهاردة أنا نزلت علشان أشتري حاجات و محتاجات المهم و أنا بألف في الميدان لاقيت واحد زمااااااان كنا بنقرأ قرأن مع بعض في الجامع في الفجر و بما إني كنت باسمع محمد جبريل كتير و كنت قبله بقرأ قرأن فكان مستوي القراية عندي أحسن منه الحمد لله و هو أكبر مني و متجوز و مخلف المهم قال و الله يا محمد أنت بتيجي علي بالي بصراحة الرجل أنا كنت بحبه بس لما قال لي كده حبيته اكتر و قلته أدعي لي و أخدنا الكلام و قلته هات نمرة الموبيل بتاعك بقة مادام أنا باجي علي بالك و أنا مكنش معايا الموبيل قلتله رني لي و أنا هأعرف النمرة المهم اللي خنقني قوي قال بص أنا هأكتب أسمك محمد مسجد الكلمة و جعتني قوي تخيلوا هيكتبني محمد مسجد و أنا حاليا مش بادخل المسجد ده غير يوم الجمعة بس
زمااااااان لما مكنتش راضي عن نفسي كنت بأصلي في الجامع و أصلي الفجر و أقرأ قران و أسمع قرأن و أقرا نص جزء قبل أما أذاكر دلوقتي المصحف الواحد بيشيل من عليه التراب كل أسبوع و مش بادخل المسجد غير الجمعة
تخيلوا زمان مكنتش راضي عن نفسي دلوقتي بقة أية حالي
هتقولولي طبعا كلنا كده و كلنا بنقرب و نبعد بس أنا من زمان قوي بعدت من أربع أو خمس سنين و معتقدش دي فترة سهلة ده الواحد كان ممكن يموت فيها و لا مليون مرة
تخيلوا كان هيسميني محمد مسجد و أنا ساعات في اليوم مش بأصلي غير الصبح
ده اية القرف ده
الله يسامحك يا مفيد ليه بس تقولي أكتب
و الله العظيم أنا أصبح حلم من أحلامي أكتب لكم هنا شئ كويس علشان أفرحكم أنا كرهتكم في عيشيتكم أنا عارف و نفسي بقة كده أكتب بقيت ناجح و سعيد و كويس و زي الفل علشان أفرحكم معايا مرة
معلش مين بس اللي بيقولكم أدخلوا هنا
حاجة تقرف
11 comments:
يابني مش صعبه و لا حاجة بس انت إبدأ!! يعني حيكون حالك أسوأ من حال الناس قبل الإسلام؟؟ الصحابي من دول أسلم و هوه عنده خمسين سنة و رغم كده مش عارفين نجيب ربع إيمانهم!! بلاش يا سيدي، كلنا من كام سنه كده كان التدين غريب شوية على ودننا، سيبك من حفظ القرآن، ده كان عاده في البيوت المسلمه، أنا بتكلم عن التدين بمعناه الحالي، و حنروح بعيد ليه؟ تعرف معز مسعود؟؟ الشاب ده جميل أوي و مع ذلك لما بيتكلم عن نشأته الأولى كان بيقول أنا مفيش حاجه غلط ماعملتهاش!! و دلوقتي ما شاء الله عليه! شوف، عايز نصيحتي؟ اسمع حلقات عمرو خالد القديمة كل يوم و ارجع ابدأ بالراحه، يعني الفروض جماعة و بعدين خد السنن و بعدين الفجر و بعدين قيام الليل، و لو باظت منك يوم مش مشكلة إبدأ تاني!! و الله ربنا كبير و بيكرم
ياريتني ما قلت لك أكتب
:)))))
بهرج يا ابني
بص يا محمد
كتير اوي الانسان ربنا بيخليه يتحط في مواقف مش مرتب لها علشان يذكره بشئ ممكن يكون دافع لتغيير شئ ما
ممكن تسمع ايه قرأنيه مره تكون سمعتها كتير بس وقع تأثيرها المره دي غير كل مره
هي كده المواقف
كلنا مقصرين
كلنا في لهو
بس اهم حاجه اللي يلحق
انا نصحتى انك تتمسك بالشخص دة
على فكره ربنا بعته ليك دة اشارة من ربنا احيانا بيجعل اشخاص تظهر فجأه فى حياتنا لاسباب هو وحده يعلمها وطالما انه من اهل الخير والايمان فالصحبه الصالحه خير معين على الطاعه
كان هناك رجل عبد الله 20 سنه
ثم عصاه 20 سنه ثم بكى واراد العودة الى الله فقال فراى الله فى المنام يقول له اطعتنا 20 سنه وعصيتنا 20 سنه واالان تريد العوده ونحن قبلناك
لا اتذكر نص الحديث بس هو دة معنى الحديث
وتذكر ان سيدنا دوادود سماه الله اواب لانه كان كثير العودة الى الله
بس ارجع لله لانك تحبه لو عبدت الله عن حب ان شاء الله ستستمر على طاعته ولن يحدث انتكاسه تانى ان شاء الله
اسال الله لك الهدايه والتوفيق اللهم امين
مفيش شئ اسمه صدفه
مقابلتك للشخص ده مقدره
لأن ربنا بيحبك وبيفكرك به
تخيل ربنا بيفكرك به
مقابله جعلتك تفكر في حالك وأكيد نادم
فقط لا تنسى أننا بشر
نخطئ ونصيب
يعني مش ملايكه
كلنا خطاء
إنت بس ابدأ
إبدأ بتوبه وأقبل على الله
الأمر هيبقى صعب في الأول لأنك مش متعود
إبدأ واحده واحده
وبعدين اسأل نفسك
إنت ليه بعدت ؟
إنشغلت في إيه ؟
إيه جد عليك وخلاك تغير حياتك ؟
دور جواك
هتلاقي طريقك
وحتى لو اتأخرت شويه
أنا عارفه إنك هتوصل
لأن جواك كويس
وإلا مكنتش قابلت الشخص ده
ولا كنت كتبت البوست ده
وكنت كبرت
ربنا يهديك وينور بصيرتك أخي
السلام عليكم اولا مش عيب انك تحس انك مقصر ومعنى كده ان لسه ايمانك فى قلبك بس مش عارف تطلعه وتستفيد منه انما العيب انك تحس انه عادى والكلام مش يقصر فيك ساعتها ازعل على نفسك وكمان ابكى عليها لان كده تكون خسرت وممكن تكون دى خطوه تدفعك للحاجات اللى كنت بتعملهاوربنا يكرمك ان شاء الله ويكون دافع ليك للتقرب اكتر من ربنا ودعواتك لينا
اول مره تقريبا اعلق هنا رغم انى متابعه المدونه من زمان
بس حاسه المره ادى انك احسن كتير رغم كل اللى انت بتقوله
صدقنى لما تحس انك مقصر احسن الف مره لما تقول اهو انا احسن من اللى بيعمل كذا وكذا
ان شاء الله ربنا يعينك وترجع احسن من زمان
يا ريت تقرب اكتر من الناس اللى كنت تعرفهم فى الوقت اللى كنت احسن فيه
ربك مش هيردك ابدا انتى مش اسوء ن الكافر ولا القاتل ولا ولا ولا
اللى لما بيرجعوا لربنا بيفرح بيهم
تخيل ربنا مستنيك
يا الله
ازاى تقدر تتاخر بعد كده
يا رب يا رب يا رب
رده وردنا جميعا اليك الرد الجميل
ولا تحرمنا متعه الوصل معك
ولا تضلنا بعد اذا هدتنا
وارزقنا خير الدنيا وفردوس الجنه
قول امين وتوكل على الله
كمان بتتنرفز علينا ياعم نوفير
براحتك ياعم
بس خلاص بقي وقفة قوية كدة مع النفس
وطبعا مش هقولك ان كلنا ضعفا والكلام دة لان كلنا عارفين ومتاكيدن من كدة
بس ياريت نبدا بالصلاة
دي اهم حاجة
وخطوة خطوة كلة هيرجع تاني بامر الله
ها يلة نبدأ؟؟
رفقة عمر
بجد يابنت انتي
بيجي في دماغك حاجات
وافكار نفس اللي بتجيلي
كذا مرة والله
الاحظ كدة كتيييييييير
بحبك في الله
علي فكرة كنت هكتبلة
النقطة بتاعة الراجل اللي
عصا الله عشرين سنة واطاعه عشرين سنة
بحبك بجد يارفقة
السلام عليكم
جزاكم الله كل خير
و دعواتكم
السلام عليكم ورحمة الله وبركاته
انا مش حاطول عليك ولا حازود كتير على اللي الناس قالوه ولا حاقوم بدور الواعظ لاني اكيد لست اهلا له على الاطلاق، بل على العكس انا محتاجه اللي ينصحني
بس ياريت بجد بلاش الجهر بالافعال دي وكشف ستر ربنا علينا
ربنا يكرمك يارب ويباركلك ويجازيك كل خير يارب في الدنيا والاخرة
خالص تحياتي
:)))
أحلي حياة
السلام عليكم
جزاكي الله كل خير
إن شاء الله ربنا يكرم
Post a Comment