السلام عليكم

بعد سلسلة من الحاجات اللي مش حلوة حصلت لي اليومين اللي فاتوا

زي

فشلي في أول أمتحان في الكورس و حاجات رخمة في الشغل و كم حاجة تانية بتحصل مش لذيذة لا داعي لذكرها

و كمان كان في حاجة كمان سيئة قوي عرفت من موقع ساقية الصاوي إن في حفلة بمناسبة ذكري أحمد منيب أتفقت مع واحد صاحبي نروح و للأسف رحنا

كانت حفلة سيئة جدا الحقيقة

للأمانة أنا رحت ساقية الصاوي مرتين مرة في حفلة بمناسبة عيد ميلاد فيروز كانت لسلمي و كانت حفلة أكثر من الرائعة و دي المرة التانية يارب تكون مرة غلط بس علشان جو الساقية بحبه جدا الحقيقة

و علشان أنا أحتفل بذكري أحمد منيب هأكتب بعض كلام أغانيه

أولا

وإن شاء المولي

راح نرسي في مينا

أيامنا علي الله

و قمر ليالينا

يا مراكبي

شد القلوع يا مراكبي

مفيش رجوع يا مراكبي

ياليل من غير حبيب

ياليل أمرك عجيب

الورد كان في كل مكان طارح مطارح لحبي

والكون ده كان زمان ميسعش حتة من قلبي

حاجة كمان

صدقني يا صاحبي

إن خفت متقليش و إن قلت متخفشي

الكدب طبعة يخون

الصدق ميخنش

الكرهه يوم بيهون

الحب ميهنش

فوق الجبين مكتوب الخطوة فين تمشي

أمشي في طريق الخير

في الشر ماتمشي

الدنيا بحر كبير و الحال ما بيدومش

صدقني يا صاحبي إن خفت ما تقليش

و إن قلت ماتخفشي

حاجة أخيرة

مين اللي يسهر جنبي الليل

مين اللي بالو معايا طويل

مين لما أتعب يساعدني و معايا حمل الهم يشيل

مين هي غير ست الستات

و ياها بتصبح و أبات

و أجيب لمن غيرها و أهادي

أم العيال العشرية

يا عم يا بتاع الطيب

المسك ريحه ما يتعيب

إديني من العطر الطيب

و أخد لمحبوبتي هدية

أم العيال العشرية

أخيرا مش عارف الحقيقة أقول أية

الناس مش عارف ليه بتعمل كده

عروستي

صح

حكمه اليوم - من ورق النتيجة-

قبل ان تحكم علي الأخرين احكم علي نفسك

دي بقة تسمي هلوسة ما بعد الصدمة

أو هلوسة الصباح

سلام

السلام عليكم

و الله العظيم كنت نايم خلاص بس عندي عادة سيئة إني بسمع البي بي سي و أنا نايم حصاد اليوم الإخباري سمعت ثلاثة أخبار مقدرتيش قلت لازم أبقي أكتبهم بوست بس مقدرتيش و قمت من تحت اللحاف علشان أكتب البوست ده

الخبر الأول

إستقالة الحكومة الكويتية علشان في بكرة إقتراع بسحب ثقة من وزير الصحة اللي هو من الأسرة الحاكمة بيغلوشوا علي النواب يعني قبل أما يشيلوا الوزير

و نعم الديموقراطية

أنا للعلم مش بقول حال مصر كويس يعني علشان لو في حد كويتي هنا و معتقدش هيقولي روح أتشطر علي اللي عندك

الخبر التاني

وصل إلي غزة الرئيس الفلسطيني محمود عباس و كأن محمود عباس ده مش رئيس غزة مثلا ده كويس إنهم مقلوش كان مين في إستقبالة

الخبر الثالث

الأمين العام عمرو موسي يقول هناك محاولات لإقناع ليبيا بحضور القمة العربية و كأنها هتنعقد في إسرائيل مثلا بصرف النظر عن الخلافات بينهم في حاجة أسمها الأهم فالمهم

أقول أية بس

يارب أعرف أتنيل أنام بعد الحاجات دي كلها

الله عليكم يا عرب

ربنا يحميكم كمان و كمان

ملحوظة

انا عندي اليومين دول مرض البوستات و هو عمل بوستات كتيرة مش عارف ليه

ياريت الزباين تبقي تمر علي اللي فات علشان بيجيلي إحباط

يا جدعان وصل للبي بي سي الأن خبر هام

تلقي الرئيس معمر القذافي دعوة رسمية من السعودية بحضور القمة العربية

هم مكنوش دعوة أصلا

يالهويييييييييييييييييييييييييييييييييييييييييييييييييييييييييييييي

السلام عليكم

ده إيميل من إنسانة

هي محاولة لي الشرف إني أشترك فيها

هاام جدا وعاجل

انقذوا الأقصى

أعمال الحفر ما زالت مستمرة مهددة بسقوط المسجد الأقصى
رجاء طبع الرسالة الموجودة بالأسفل وارسالها للعناوين البريدية المرفقة

اليوم السبت 3 مارس

:سبب اختيار اليوم

يوافق ذكري الأحداث التالية: 1949 - اعتراف الأمم المتحدة بدولة إسرائيل ، 1982 - قدمت مجموعة من الشباب اليهودي المتدينين على اقتحام المسجد الأقصى عبر باب الغوانمة, فتصدى لهم الحراس المسلمون وأصيب أحدهم, ولما حضرت الشرطة الإسرائيلية اعتقلت الحارس المصاب واستجوبت الحراس الآخرين ،. 2005 - افتتاح مصلى يهودي جديد جنوبي حائط البراق لليهود المحافظين يكرس السيطرة على المسجد الأقصى.

بأقترح نبعث في اليوم ده (3 مارس) رسالة إلي اليونسكو لتخصيص
لجنة دائمة لمراقبة والحفاظ علي المسجد الأقصى (كأثر تاريخي)وفقا لاتفاقية حماية التراث الثقافي والطبيعي أسوة بحملتهم للحفاظ علي أصنام أفغانستان وننشر نسخة من الرسالة دي علي كافة مدواناتنا ومنتدياتنا ومجموعاتنا البريدية. مع العلم أنهم بالفعل قرروا إرسال بعثة تقصي للحقائق يوم 23 فبراير

مكتب اليونسكو برام الله
h.tannous@unesco.org
to Ms Hala Tannous .
مكتب اليونسكو بجنيفgeneva@unesco.org
to Mr. Koïchiro Matsuuraولو نجحنا وقدرنا نحرك الجبال بصوتنا نعمل يوم تاني للتضامن مع حقن دماء العراق فدم الانسان أعظم حرمة.ممكن أعرف رأيكم وهل دي أولوياتكم زي ما هي أولوياتي ولا أنا غلطان والأولي أشغل بالي بكريم وهالة وهند وتامر؟أفيدوني أفادكم الله________
الرسالة المقترحة

Mr. Koïchiro MatsuuraUnesco GMDear Sir,We acknowledge and appreciate your great efforts to protect and save the priceless human heritage all over the world. Recently, we read that a group of professional investigators has been sent by the Unesco to Jerusalem to investigate the situation of Israeli excavations at the area of Al Masjed Al Aqsa, which we have a big concern that this may affect the foundations and lead to buildings collapse for one of the most important historic elements of this area and allover the world.We do support your efforts and your investigation group and looking for assigning a permanent chamber near this area to monitor, announce and stop any trial to destroy our heritage either for political or religion reasons.Thank you and best regards,Sincerely,
..............
لن تخسر شيئا

دافع عن الأقصى حتى لا تُسأل يوم القيامة

السلام عليكم

أزيكم يا مدونين مصر

بما إني إنسان كئيب بطبعي أو بحب الكأبة أو الله أعلم الكأبة و النكد هم اللي بيحبوني زي الغوريلا كده في فيلم عادل إمام

طبعا مقدرتيش يكون في بلوج فرايحي علي المدونة لازم واحد وراه علي طول يمحي أي فكرة في دماغكم إني إنسان متفائل

و الله أنا متفائل الحمد لله بس المشكلة في الناس اللي حواليي مش يختاروا وقت كده كلهم مرة واحدة ينكدوا علي لا تلاقيهم ورا بعض بحيث أن أي حد فيهم يحس يحس بس إني هأخرج من مود النكد و الكأبة يزقني جوة علي طول زي الإخوة في المترو أيام جامعة حلوان أنا كنت الحاجة الوحيدة اللي بعملها بإرادتي إني أخرج من باب الشقة فجأة ألأقي نفسي في جامعة حلوان بقوة الدفع

المهم طبعا للأسف كعادتي السيئة أيام الأجازة بأصحي بدر طيب ليه أفتكر أيام الشغل تصحي بتعيط علشان تنام خمس دقايق المهم صحيت و دخلت علي النت و نمت تاني و صحيت دخلت علي النت تاني و قفلت النت و كنت هأنام أيوة دلوقتي كده خطرت علي بالي فكرة جامدة هي مستوحاة من واحد صاحبي الحقيقة بس جت علي بالي دلوقتي مع بعض التطوير

تخيلوا كده كل إنسان فينا دماغه فيها زر زي بتوع الكيبورد دول بيعمل فورمات للدماغ يسلام كل مشاكلنا تتحل بزرار

و كل واحد يروح منزل نسخة ويندوز جديدة علي دماغه

اللي عاوز القديم بتاع الألفية السابقة 95 و 98 براحته و اللي عاوز إكس بي براحته أو ألفين و لو واحد أهبل يروح منزل ويندوز فيستا الجديد و يسلام بقة واحد فنان يشتغل علي نظام الدوس أحي أي بني أدم يختار النظام ده ليه معرفش

المهم مضطر أسيبكم علشان عندي تقارير و وروق من الشغل من ساعة أما أشتغلت كل جمعة و سبت أقول هأخلصه الأسبوع ده الكلام ده من مثلا شهر أغسطس 2006 و لحد النهاردة بأجل أدعو لي أخلص و الناس اللي بتنكد علي دي ربنا يهديها و محدش يدعي عليهم علشان مزعلش منكم علشان حرام بجد مش تهريج

صباح الجمال عليكم و يارب يكون يوم سعيد علي -مش باين- و سعيد عليكم إن شاء الله

سلام

السلام عليكم

معلش بعد كم بوست كئيب

لازم واحد يفرح شوية

هو مش بيع للقضية و لا حاجة بس لازم علشان الإكتئاب ميقضيش علينا

دي أغنية لتامر حسني بالرغم من إني أحيانا كتيرة مش بحبه كشخص بس أغانيه لذيذه

مش عارف مين اللي كتب الأغنية

بقلكم أية كفاية رغي و نسمع الأغنية

ريح بالك و أنسي اللي نسيك
عيش لييييك لياليك
مش ده يا قلبي اللي بنتمناه
داري الأشواق لو مهما أشتقاك
لعينيييييك
مش لييييييك
أنساه و لا ترجع يوم لهواه
خليك قد الفرقة مهيش فارقة
معدي سنين ضايعة
و لو راحت منك مش راجعة
لو تعمل أيييييية!!!
ليه ترجع تتحمل و تكمل
حب مالوش أخر من الأول
جرح مالوش أخر
ليه تتعب لييييييه!!
أنسي الأيام و أنساه
أنسي ياقلبي اللي جراحني
أديته عمري و ليه؟
و لا مرة يا قلبي ريحني!
خليك قد الفرقة مهيش فارقة
معدي سنين ضايعة و لو راحت
منك مش راجعة
لو تعمل أييييية!!!!
ليه ترجع تتحمل و تكمل
حب مالوش أخر من الأول
جرح مالوش أخر
ليه تتعب ليييييييه!!!!
و لا وجع القلب يا قلبي
بكرة الأيام تعدي
تضحك و تقول
مش معقول أنا كنت بعمل كده
ريح بالك و أنسي اللي نسيك
عيش ليييييييك!!!
ليالييييك

داري الأشواق لو مهما أشتقاك
لعينيييييك
مش لييييييك!!!!
أنسي و لا ترجع يوم لهواه
خليك قد الفرقة مهيش فارقة
معدي سنين ضايعة
و لو راحت منك مش راجعة
لو تعمل أيييييية!!!
ليه ترجع تتحمل و تكمل
حب مالوش أخر من الأول
جرح مالوش أخر
ليه تتعب لييييييه
و لا وجع القلب يا قلبي
بكرة الأيام تعدي
تضحك و تقول
ياااهه
مش معقول أنا كنت بعمل كده

السلام عليكم

أزيكم يا شباب مع إن مفيش زباين من فترة

المهم أكيد الزباين هترجع تاني بعد التخفيضات اللي عملتها

بعد يوم رخم في الشغل و لأنني مضطر معملش عادتي الرائعة و هي النوم لأنني عندي إمتحان في الكورس بكرة و مضطر أقعد أذاكر قلت أجهز محموعة من الأغاني علشان أسمعها و أنا بأذاكر لو ذاكرت المهم معرفش إزاي أيدي وصلت لأغنية عمرو دياب أخر كلام عندنا القدس دي أرضنا و طبعا تذكرت مشهد الشهيد محمد الدرة منظر مؤلم و خصوصا إن أنا أول أما شفته قعدت أقولي زي المجنون هم قتلوه قتلوه قتلوه فاكر اللحظة دي كويس جدا

المهم جه علي بالي إنني عاوز أساعد في تحسين حالة البلد دي بجد البلد دي ممكن تكون حلوة قوي بجد

و ربكم و الحق أنا بخاف جدا من الشرطة الحقيقة يعني

بس جه علي دماغي سؤال هم إزاي الناس دي بتعمل كده التعذيب و التخويف و بهدلة الأهل ليه في سبيل أية يعني أنا ساعات بأتنرفز علي صحابي و أقول لهم كلام جارح ممكن ما أنامش من تأنيب الضمير إزاي الناس دي ممكن تموت بني أدم برئ أو حتي مش برئ بس عقوبته متنكش الموت و التعذيب و البهدلة و الأهم أية ذنب الأهل مثلا لو في حد منهم مش كويس

بجد شعور الغدر لما يكون من حد قريب منك بيكون صعب قوي

يعني مثلا أيام إحتلال الأنجليز علي ما أعتقد اللي كان مضايق الثوريين و يخوفهم أكتر من الإحتلال هم أعوان الإحتلال لأن الإحتلال معروفين المشكلة في أعوانه اللي مش معروفين

و برده خطر علي بالي دلوقتي كمان منظر بشع للأسف شفته علي موبايل واحد صاحبي مشهد نحر واحد بيقولوا أنه جاسوس لأمريكا في العراق

مين أنتم علشان تحكموا عليه و تنفذوا الحكم

و كمان الطريقة دي علي ما أعتقد و أعرف عن الدين العظيم اللي هو أعظم نعمة من نعم ربنا علينا الإسلام مش بيقول كده خالص و لا حتي فيه حاجة ممكن يحصل فيها لبس يؤدي لفهم حاجة زي كده غلط

مش عارف إزاي إي بني أدم أصلا يموت و لا يعذب أي بني أدم تاني بصرف النظر عن دينه و جنسيته و عقائده مش عارف

بس هأقول أية دي حكمة من حكم ربنا في الكون

يارب جنبنا هذا الظلم و أرفع مقتك و غضبك عنا

في جملة قرايتها النهاردة للأسف علي عربية نقل بس هي جملة قرأنيه

و هل لك في الأمر من شئ

سبحان الله

الجملة دي ريحتني قوي لما قرايتها يارب تريح كل اللي يقراها و شايل هم لحاجة تشغله

ربنا يوفقنا جميعا

السلام عليكم

أزيكم يا مدونين خلي بالكم بقت تهمة اليومين دول

بعد البوست اللي فات ده و الحمد لله أنه فات بس مش قوي

المهم

مش عارف في سؤال علي بالي و هو سؤال مش عارف حرام و لا أية بس بجد الجو النهاردة سئ قوي غير الحالة النفسوية بتاعتي اللي هي حضيض المهم

عندي شعور بالوحدة رهيب مش عارف من أية و إزاي أقضي عليه هو تقريبا مش هيتقضي عليه لأنه غالبا عامل زي أنفلونزا الطيور

المهم السؤال هو

لماذا ربنا خلق هذا الشعور بالوحدة ؟

بجد شعور متعب جدا أصعب شئ في الدنيا أنك تحس أنك لوحدك

حتي تحس أنك مش بني أدم ده حتي ربنا في كتابه الحكيم بيقول

و جعلناكم شعوبا و قبائل لتعارفوا

ليه بقه في هذا الشعور بالوحدة مش عارف

علي العموم يارب هي دعوة ممكن تحصل او لا هو أكيد مفيش حاجة صعبة عليك و أكيد أنت لك حكمة في كده بس يارب يارب يارب محدش في الدنيا دي كلها يحس بالوحدة و ألغي الكلمة دي من قاموس البشر

لعنة الله علي الوحدة

كفاية كأبة

قصة أنا شخصيا مش مصدقها حتي الأن

يوم الأربعاء واحد صاحبي أتصل بي و قال لي أنه هيكتب كتابة و يتجوز يوم الجمعة كلكلم هتقولوا عقبالي المهم روحنا كلنا إحنا أربعة كل واحد لوحدة و صاحبنا ده أتصل بكل واحد لوحدة و كتب الكتاب كان بعد العصر العصر أذن و صلينا حد يبان مفيش قلنا نأكل خرجنا أكلنا كشري و رجعنا قلنا ممكن كتب الكتاب بعد المغرب و لا حياة لمن تنادي و طبعا صاحبنا ده مش من القاهرة بس العروسة من هنا فالفرح كان هنا و مفيش حد في بيته اللي في البلد نتصل نسأل عليه و الموبايل بتاعه مسروق المهم بعد أعتكاف في الجامع من العصر حتي الساعة سابعة محدش بان خالص مش عارف بقه في أية علي العموم ربنا يرحمه

بس قضينا بقيت اليوم مع نفسنا طلعنا علي النيل و ركبنا عربية واحد صاحبنا حاجة كده زي عربيات سيد سيما بتاعت الأفلام و و بعدين توجهنا للمعادي قعدنا علي قهوة كنا بنقعد عليها أيام الكلية و عملنا حاجات غريبة و سجلنا لبعض إعترافات عن البلاوي اللي كانت بتحصل لنا أيام الكلية و مواقف صاحبنا رحمة الله عليه اللي كان هيتجوز النهاردة أمبارح يعني و دعونا له أنه ربنا يرحمه و يخفف عنه العذاب لأننا كده كده مش هنكلمه تاني سواء مات أو مماتش

هتقولولي كل ده وحاسس بالوحدة هأقولكم أة حاجة غريبة جدا صح

ربنا يكرمنا

الحمد لله علي كل شئ

هأقوم بقة علشان عاوز أذاكر علشان عندي أمتحان في الكورس يوم الثلاثاء و معرفش حاجة فيه خالص

سلام

تحديث

حتي الموبايل النحس الجديد ده من ساعة أما جبته محدش بيتصل بيا عليه و لا رن حتي مش عارف ليه

حاجة غم بعيد عنكم

بجد أنا مقتنع تماما أن العيب فيا بس مش عارف أعمل أية

سلام تاني

السلام عليكم

أزيكم يا شباب

وحشاني جدا

المهم هادخل في الموضوع علي طول

معلش البوست ده هيكرهكم فيا بس مش مشكلة مخنوق قوي و حاسس إن هأنفجر لو مقلتيش الكلام اللي هأكتبه يارب محدش يشوف الكلام ده من الناس اللي بحبها علشان ميزعلوش مني

المهم

اليومين اللي فاتوا دول خطر علي بالي الموضوع المؤلم و هو موضوع الجواز و كنت خلاص علي وشك أخذ إحدي الخطوات المجنونة اللي ساعات بأخدها المهم الحمد لله رجعت لرشدي تاني و الحمد لله النوبة مرت بسلام و بدون حاجات مؤلمة المهم مش هأينفع أرتبط دلوقتي علشان انا عاوز أكمل دراسة و لسه مش مظبط قوي في الشغل و عايز أعيش لي يومين كده

المشكلة إننا مش عارف أعيش لي يومين كده

مش عارف أعمل أية قلت أروح أخد كورس لغة جديدة يمكن أتعرف علي ناس جديدة الكورس قرب يخلص و معرفتيش حاجة في اللغة و لا في الناس لا و أية كل اللي رايح الكورس عنده عيال و عاوز يدخلهم مدرسة علشان كده هو جاي يتعلم لغات

حاجة تشل بعيد عنكم

و الشغل كمان عندنا مافيهوش أي بنات و لا بني أدمين أساسا هم عبارة عن ناس عمالة تجيب في سيرة بعض و كل واحد فاكر أن الشركة لو مجاش يوم هتقف علشان هو مش موجود

و الحياة مملة و كمان لسه متفرج علي بضع ثواني من فيلم هيت لروبرت دي نيرو و هو يمثل لي كل النواقص اللي عندي من الصداقة والحب المفقود و العلاقات الجميلة

أقصد هنا الصداقة بين رجل و رجل علشان أسمها أية دي متزعلش ماشي

و أقصد كمان الصداقة باللحم و الدم مش من ورا النت ماشي يا ر

و كمان الحب اللي مش موجود

و اللي يخنق يا جدعان أنه وجد العلاقة اللي هو عاوزها من واحدة ميعرفهاش هي اللي كلمته الأول كمان حاجة تشل

بس اللي عنده حاجة ظريفة كده يقلها يمكن نضحك كلنا شوية

بس

يارب محدش يدخل هنا علشان ألحق أشيل البوست ده من هنا قبل أما حد يشوفه علشان منزلش من نظركم

أقولكم كمان علي حاجة تكرهكم فيا خالص

أوك و لا يهمكم

أنا هأتفرج دلوقتي علي قيلم مش محترم

خلاص

و الزمالك أتعادل مع الترسانة و الأهلي أخد السوبر

و د / أسامة الغزالي حرب قدم و رق الحزب بتاعه

و الدستور هيكون في منها يومي من شهر مارس

و أنات مضطر أقوم يمكن أنام و أصحي علي يوم القيامة كده

قولوا يارب

سلام و تصبحوا علي خير

و وحياة اغلي حاجة عندكم محدش يزعل مني و لا يفتكر إني بني أدم زبالة

بسم الله الرحمن الرحيم
السلام عليكم و رحمة الله و بركاته
مش عارف فجاة كده الناس أفتكرت تبعت لي تاجات مش عارف ليه
المهم التاج اللي جاي ده مبعوت لي مرتين في نفس الوقت من الأنسة مريم - مانو- و الأنسة رنا –روني-

مش عارف ليه مصعبين الموضوع أصلا من السؤال

و السؤال هو
أكتب السطور الثلاثة الأولي بعد الخمسة الأولي في الصفحة 123 من الكتاب اللي بتقرأة الأن؟
متقولوا من السطر السادس للثامن مش فاهم هي ناقصة عقد
المهم
السؤال ده محرج جدا بالنسبة لي بمعني الكلمة لأنني من البشر اللي بتبدأ في شراء الكتب و البدء في قراتها و عدم تكملتها
فلذلك قلت أكتب كل الكتب اللي لازالت مفتوحة الأن علي أمل إني أتحرج منكم و أكملها

الكتاب الأول

و أنتظرت أن أتعلم درسا من تلك التجربة إلا أنني لم أستوعب منها شيئا يذكر و للأسف فقد مارست نفس التجربة فيما بعد و لكن في مجال التأليف حيث استعنت بأراء جميع المؤلفين الذين كتبوا عن الخطابة العامة و جدواها لرجال الأعمال و اكتشفت أن جميع هذه الأراء متناقضة و من شأنها أن تصيب رجال الأعمال بالسخط و الضيق و ربما ألقي بهذا الكتاب في قارعة الطريق و هكذا بعد أن بذلت جهودا خارقة لمدة عام من أجل تجميع مادة هذا الكتاب و جدتني ألقي به جانبا
كتاب دع القلق و أبدأ الحياة
المؤلف ديل كارنيجي
تعريب أماني ماهر سالم
مكتبة النافذة
بدأت في قرأة هذا الكتاب من ما يقرب من السنة و لم يتنهي بعد

الكتاب الثاني
لو أنك تمكنت من الخروج بهذا الشئ فقط فلسوف يصبح حجر الزاوية في مجري حياتك.
لذلك إذا أردت أن تغير أي إنسان دون أن تزعجه أو تثير أعصابه فعليك بإتباع القاعدة (8) – حاول مخلصا أن تري الأشياء من وجهة نظر الشخص الأخر--
كتاب كيف تكسب الأصدقاء و تؤثر في الناس
المؤلف ديل كارنيجي
تعريب أماني ماهر سالم
مكتبة النافذة
بدأت في قرأة هذا الكتاب منذ ما يقرب من ستة شهور تقريبا و لم ينتهي طبعا
المؤلف بتاع الكتابين دول تقريبا هو منشأ علم البرمجة اللغوية و العصبية
و سمعت أن المؤلف ده أنتحر مش عارف لو في حد عارف الصح يقولي و النبي

الكتاب الثالث
و قد عرفت جما من أصحابي يقلدون الرجل فيما دق أو جل من شأنه كله و يحبون في التقرب إليه أن يكونوا صورا متشابهة من أعماله و أحواله
الكتاب جدد حياتك
المؤلف الشيخ المرحوم محمد الغزالي
نهضة مصر
أشتريت هذا الكتاب في شهر ديسمبر 2006 و لم أنتهي من قرأته
الكتاب ده كتبه الشيخ الغزالي بعد قرأته للكتاب الأول اللي كتبته فوق
يعني نفس الفكرة من وجهة النظر الإسلامية
أشتريت هذا الكتاب بنصيحة من الأنسة رنا إحدي صاحبتين السؤال اللي بجاوب عليه ده

الكتاب الرابع
, but we didn't want seeing home. He received that piece of information with a yell of laughter, and dropped back, but came slouching after us at a little distance

Great Expectations
Charles Dickens
Penguin Popular Classics
تقريبا أشتريت هذا الكتاب في سنة 2005 و لم أنتهي من أول عشرين صفحة في القصة المكونة من 443 صفحة



الكتاب الخامس
و هناك بحث تم إجراؤه علي الفئران لمعرفة قدرتهم علي التصرف فوضعوا فأرا في متاهة في أخرها قطعة جبن و بدأ الفأر يبحث و يبحث و في كل مرة يجرب طريقا مختلفا إلي أن وصل أخيرا لقطعة الجبن و أكلها.

الكتاب المفاتيح العشرة للنجاح
الدكتور إبراهيم الفقي
المركز الكندي للتنمية البشرية

الكتاب السادس
لَيْسَ عَلَى الَّذِينَ آمَنُواْ وَعَمِلُواْ الصَّالِحَاتِ جُنَاحٌ فِيمَا طَعِمُواْ إِذَا مَا اتَّقَواْ وَّآمَنُواْ وَعَمِلُواْ الصَّالِحَاتِ ثُمَّ اتَّقَواْ وَّآمَنُواْ ثُمَّ اتَّقَواْ وَّأَحْسَنُواْوَاللّهُ يُحِبُّ الْمُحْسِنِينَ

الأية 93 سورة المائدة
القرآن الكريم
بدأت في هذه القرأة من شهر رمضان الماضي و مستمر فيها إن شاء الله

أنتم أتخنقتوا صح
هأكتب أسامي الكتب الباقية
Advanced Chemistry Mathews
The Molecular nature of matter and change Silberberg
Introduction to physical chemistry Ladd

نفسي حد يشجعني علي الإنتهاء من قرأة هذه الكتب

منتظر نصائح واقعية أهم شئ الواقعية

سلام

مخنوقين مني صح

Happy Valentin
السلام عليكم
أنا بما أني خبير عبقري في هذا الموضوع عندي إقتراح لشراء هدية قيمة جدا بمناسبة هذا العيد الذي يمثل لنا أهم شئ في الحياة فمشهد البنات هم الأكتر الحقيقة اللي بيشتروا هدية الفالنتين جميل و ممتع و منظر الشباب و هم عائدون للبيوت يحملون الأقفاص الحمرا في نشوة و فخر أنهم جعلوا هذه الجميلة تشتري له هدية الفالنتين أروع
و بعد مشاهدة برنامج فالين ويك علي القناة العملاقة زوووم علي المكشوف
و بعد خمس دقائق امام الجزيرة مباشر مش فاهم أية العلاقة
هبط علي الإلهام في هذه اللحظة تماما لهذا البوست الرائع و جاْت علي بالي هدية رائعة كنت أتمني أن يكون لي حبيبة هذه الأيام لأشتري لها هذه الهدية تتمثل في قطعة حجر من المسجد الأقصي
ما رأيكم في هذه الهدية الجميلة ؟ روعة صح
خلي بالكم لأن هذه القطعة ستصبح نادرة الوجود بعد إزالة الأقصي في القريب
و سيصبح ثمنها غالي جدا بعد إتمام الحياة الزوجية ممكن يعني بعد إتمام الزواج إن تم ممكن تبيعوها بالشئ الفلاني علشان تدخلوا الأولاد المدرسة الأمريكية أو ممكن حتي عقبال أما تخلفوا يكون في فرع هنا للمدرسة الإسرائيلية مش صعب و بردو ستايل
أقول أية بس حسبنا الله و نعم الوكيل
حرام عليكم
يارب نفوق كلنا و أنا معكم
سامحوني علي كلامي بس بجد مش قادر
مش في دماغي غير جملة واحدة عمالة ترن في دماغي كنت بسمعها أيام الجامعة
هذا الأقصي قد نادنا من سيعيد القدس سوانا
للأسف مكنش عندي الشجاعة و لسه مش عندي علشان أنفجر بالكلمة دي في أي مكان
تصبحوا علي خير
و هابي فالنتين

بسم الله الرحمن الرحيم

السلام عليكم و رحمة الله و بركاته

من ساعة أما دخلت عالم المدونات بحلم يتبعت لي تاج و بصراحة كنت متأكد من أنه خلاص علي وشك الوصول من شخص معين بس موصلش و ربنا كرمني بالأستاذ أحمد و بعت لي و بعد أما وصل التاجين كمان مش تاج واحد قلت ياريتني ما دعيت بكدع علشان أتضح أنه موضوع صعب بجد بس هأحول السؤال اللي مش هأعرف أجاوبه مش هأعرف هأعمل اية يعني

التاج الأول

أية اللي هيحصل لإيميلك لما تموت؟

أولا عمري ما فكرت في الموضوع ده بس عادي زي اللي بيحصل لحد يعمل إيميل و ما يستخدموش تاني أسألو مواقع الإيميلات

أديت الباسورد لحد قبل كده؟

لأ طبعا عمري

هو في واحد مرة أتزنقت و أستخدمت الكمبيوتر بتاعه و تنح و وقف و أنا بأكتب الباسورد و لما رجعت البيت غيرتها علي طول

لو أة علاقتك بيه أية؟

قلت لأ

أسمك؟

محمد

أسم الدلع اللي مشهور به وسط صحابي؟

أسم العائلة مش هينفع أقوله معلش

عمرك؟

24

برجك؟

العقرب

مجال الدراسة؟

الكيميــــــــــــــــــــــــــــــــــــــــاء

السفر بالنسبة لك؟

حلم كبير

يارب يتحقق و يكون فيه الخير

المود بتاعي؟

كوكتيل

وقت فراغك بتعمل فيه أية؟

هو تقريبا اليومين دول حياتي كلها وقت فراغ

يعني داخل مرحلة إدمان النت و الكمبيوتر

الأكلة المفضلة؟

البفتيك

بس بتعذب بعدها و أقعد أشرب مياه للصبح

الصفات اللي أخدتها من بابا؟

!!!!!!!!

الصفات اللي أخدتها من ماما؟

!!!!!!!

أكتر ست حاجات بكرهها؟

الخيانة

الكذب

الخوف الصفة دي في

الكسل الصفة دي كمان في

التفاهة

التملق هو في كلمة مش مؤدبة بتتقال عليه و الحدق يفهم علشان في بنات هنا

أكتر ست حاجات بتحبها؟

الأيام اللي بأكون فيها سعيد بعلاقتي مع ربنا و الحمد لله كانت كتير و أختفت بس بدأت ترجع تاني الحمد لله

النجاح

الأمل

الصداقة مش موجودة حاليا بس بردوا في مشروع مهم شغال حاليا فيه يارب يستمر

جو الشتا

النسكافيه تفاهة معلش

الشغل بالنسبة لي ؟

أهم شئ في الدنيا

أنا بشتغل حاليا بس مش بحب الشغل اللي أنا فيه بس إن شاء الله بأجتهد فيه علشان ربنا يرزقني بالشغل اللي أحبه إن شاء الله

الكمبيوتر بالنسبة لي ؟

حاليا كل شئ في حياتي الصداقة عالم المدونات حتي الإنحراف عليه

نفسي أستخدمه كمحترف في شغل

التاج التاني

أية الخمس حاجات اللي محدش يعرفها عنك؟

شخصيتي الحقيقية محدش يعرفني خالص حتي أقرب صحابي أنا مع كل مجموعة بشخصية مختلفة أو علشان محدش يقول علي بوشين بجزء من شخصيتي مع كل مجموعة من الأصدقاء بس الشخصية الكاملة محدش يعرفها غير تقريبا واحد

إني عاطفي جدا و حالم جدا

إني ساعات الحمد لله بيكون رأئي صح

إني جدع جدا

إني طيب لدرجة الهبل

أية ده الحمد لله خلصوا

شكرا جدا أستاذ أحمد علي التاجين دول بجد كان نفسي أعمل تاج جدا الحقيقة مكدبش عليك

بأمرر التاجين دول لكل حد يلاقي أسمه في قائمة الإتصال السريع بتاعتي

و اللي وصل له قبل كده خلاص مش مشكلة و

و الزائريت اللي مش موجودين في القائمة ممكن لو عايزين كأني بعته لهم بس بجد هو موضوع صعب جدا

سلام يا أصدقائي

بسم الله الرحمن الرحيم

متي نحب؟

خطر علي ذهني هذا السؤال بعد ليلة عصيبة تعرضت فيها لإرتفاع درجة حرارتي فقررت عدم الذهاب للشغل لزيادة الإطمئنان و قد تم الشفاء الحمد لله

فعند إستيقاظي بصوا أنا بصراحة مش عارف أكمل بالعربي هأكتب عامية و خلاص ماشي

المهم صحيت و شربت مج النسكافيه السادة المعتبر وقفت أبص علي الناس في الشارع من الشباك في صباح شتوي جميل أعشقه الحقيقة

وجدت مجموعة من الشباب طلبه و طالبات يبدوا عليهم أنهم أولاد ناس محترمة و هم محترمين الحقيقة و تقريبا هم في ثانوية عامة و غالبا كانت بتبدأ بينهم ملامح صداقة أو مش صداقة علاقة ممكن تكون إعجاب بين كل و لد و بنت

تضايقت من هذا المنظر و قلت لنفسي لماذا يفعلون هذا لماذا يلعبوا أو يتسلوا مع بعض كده مش عارف

و بعدين قلت لنفسي أشمعني أنت و أنت في هذا السن كنت تحب و أة كنت لا تصرح و كنت تخاف من التصريح بهذا الحب ممكن يعني تكون عقدة نقص مش عارف المهم و أة كنت تعرف بعد كده أن الذي شعرت به ليس حب لكن كنت تشعر به فلماذا تحجر عليهم أنهم لا يحبوا و إزاي تعرف أصلا أنهم بيضحكوا علي بعض

بالمناسبة كل قصص الحب التي عشتها كانت من طرف واحد لخوفي من إظهار هذا الشعور للإنسانة التي أحبها ما عدا قصة واحدة أعترفت فيها و ياريتني ما عملت كده و لم أجعلها تستمر أكتر من شهر تقريبا المهم

مش عارف إجابة السؤال الحقيقة متي نحب؟ هل هو الحب الذي يأتي كما يقولون أم يجب أن نحكم العقل أم يجب أن نبدأ هذا الحب إلا عندما يكون هناك شئ ممكن تحقيقه من هذا الحب أنا في رأي أن قصص الحب تزدهر بعد الزواج اكـتر و أكتر و يكون الزواج بداية جديدة للحب الحقيقة في ناس بتقول مش لازم نتزوج الذي نحبه مش فاهم إزاي الحقيقة

و في سؤال تاني عندما نحب و نفشل و نعود نحب من جديد هل نخبر الحبيب الجديد بالقصة القديمة و ما شعرنا به أم لا؟

و كيف نجعل القصة القديمة لا تؤثر علينا في الحب الجديد ؟

و كيف إذا لم نتزوج من أحببناه لا يظهر لنا شبحه في المستقبل بعد الزواج من حد تاني؟

بس كده

الحمد لله

يا من خلقت الإنس و الجن

يا من قلت للنار كوني بردا و سلاما علي ابراهيم

يا من قالت فيك هاجر إذا لن يضيعنا

يا من أنزلت القرأن علي نبيك

يا من لا يُهدي لنورك إلا لمن أَذنت له

يا من تقلب القلوب و الأبصار

يا من ترزق الطير فتغدو خماصا و تروح بطانا

يارب

يارب

يارب

أهدني لنورك و ثبتني علي دينك و أجعل القرأن نور صدري و جلاء حزني و ذهاب همي

يارب إذا نسيتك فلا تنساني

يارب

يارب

يارب

هداك يارب

هداك يارب

هداك يارب

رحمتك يارب

رحمتك يارب

رحمتك يارب

يارب

يارب

يارب

بسم الله الرحمن الرحيم

السلام عليكم و رحمة الله و بركاته

أزيكم أخباركم أية ؟

كله تمام إن شاء الله

يارب يوفق كل المدونين الممتحنين و اللي مش ممتحنين كمان

أنا أسف علشان منفذتيش كلامي بزيارة ألف مدونة في اليوم لأني أكتشفت أن ده ممكن يكون غلط فعلا علي رأي الناس اللي علقت علي الموضوع ده

و كمان الظروف اللي كنت متضايق منها الحمد لله أنتهت - يارب تكون أنتهت خالص يعني أنتهت و لا أية؟

الحمد لله

علي فكرة الكلمة دي جميلة قوي حاولوا تكرروها كتير بجد مش تهريج

السنة دي جميلة حتي الأن و يارب تستمر و إن شاء الله هأجتهد في كل حياتي العملية و الإجتماعية و كله إن شاء الله

المشكلة بس ساعات بأكون و الله ماشي في الشارع كده من غير أي حاجة بحس بضيق رهيب مش عارف من أية و تلاقي بعدها علي طول كم حاجة تزود الخوف و القلق و الضيق و الحقد ده مش عارف ليه

بس الحمد لله بتروح علي طول بس أنا نفسي الموضوع ده ميجيش تاني علشان ساعات بتكلم مع نفسي بطريقة سيئة جدا و باكون مخنوق من حياتي لدرجة كبيرة

أصدقائي عاوزين نساعد بعض بأي طريقة مش عارف أية هي الحقيقة بس لو حد يعرف يقترح

الحمد لله صديقي الله يسامحه صلحت علاقتي معه مرة تانية يارب يخلي عنده دم و ميكنش لسه زعلان و أنا مش زعلان

يارب نكون صحاب علي طول

اللغة اللي بتعلمها دلوقتي بأعاني فيها شوية و الحمد لله أتعلمت السواقة مش بإحتراف يعني بس بداية مقبولة

بأحاول أجتهد في الشغل إلي أن يرزقني الله بشغل أحبه علشان كمان الواحد بيبص لصحابي اللي لسه ما أشتغلوش و بيقول الحمد لله

مش قلتلكم الحمد لله كلمة حلوة قوي

اللي بيتعبني كمان دلوقتي قوي حال الناس و تعاملهم مع بعض بكل الصفات السيئة مش عارف ليه و أية الفايدة من كده مش عارف

ده زي ما بيقولوا الكفن مفيهوش جيوب يعني

بس بردوا الحمد لله و واثق فيك يارب و منتظرفرجك و الفرحة الكبيرة و التغير الكبير اللي أنت شايله لي و أنا كمان مش هأسكت و أجتهد

في كمان موضوع مش عاوز يسيبني شوية موضوع الجواز مش عارف أتجوز و لا لا بالرغم من إني واخد القرار و موصي ناس تساعدني علي تنفيذه و هو عدم الجواز خلال الفترة دي المشكلة أنه ساعات بيكون نفسي أتجوز بس بردوا الحمد لله

أستفسارات

لو حد عنده معرفة إقتصادية أو يعرف موقع إقتصادي يقدم بشرح مبسط المفاهيم الإقتصادية ياريت يقولي عليه أنا مش عاوز أكون خبير بس أفهم اللي بيتقال ده معناه أية

لو حد يعرف التغييرات الدستورية اللي بيتكلموا عنها كلها ياريت يقولها

أنا خطي سئ جدا عربي و إنجليزي لو حد يعرف طريقه لتحسينه ياريت يقول

مبروووك لكل الأهلوية الدوري علشان تعرفوا عندي روح رياضية بس علي فكرة اللي باقي من الدوري هيكون رخم جدا

الله يسامح ممدوح عباس علي غلطته في حق الزمالك أقصد عبد الظاهر السقا

تمام كده في حاجة تاني

لا

يارب أشوفكم علي خير دايما و متفوقين و بنحب البلد المظلومة دي

سلام

و إلي لقاء قريب إن شاء الله

بسم الله الرحمن الرحيم

السلام عليكم و رحمة الله و بركاته

معلش هأصدعكم بكلامي أنا مش متعود أكتب أكتر من بوست في اليوم المهم اللي عاوز يقرأ أهلا و سهلا و اللي مش عاوز براحته طبعا كفاية أنه وصل هنا

المهم

مش عارف أقول اية

أنا أكتشفت مؤخرا أن فيه صفة كمان أتضح لي أنها موجودة فيا مكنتش واخد بالي منها خالص هي بعيد عنكم جميعا الغباء مش عارف إزاي وصل بيا الحال إن أنا مش بفهم خالص اليومين دول أنا كنت حاسس إن دماغي فعلا بدأت تصدأ بعد الكلية لذلك أخذت القرار العجيب إني أكمل دراسة بس مكنتش متصور أن ده هيحصل في الحياة العادية انا أصبحت الناس تقولي الكلام كده و أنا مش عارف مش بفهم ليه أو يمكن مش عاوز افهم و لا ممكن ده يكون سبب القعدة أمام الكمبيوتر و النت كتير مش عارف متخافوش مش هأخد القرار اللي كل مدونة تلاقي خمسة كاتبن أنا مش هأدون تاني لأني بجد مش متخيل حياتي بدون تدوين التدوين ده شئ رائع و بجد اللي أبتكر الموضوع ده بصرف النظر عن أهدافه في التدوين ده و ده ممكن أتكلم عنه بعدين بس أنا سعيد بالفكرة قوي جميل جدا أن في حد يشاركك حلمك و كلامك و أحلامك بدون أدني سبب للمشاركة و التشجيع فقط بصرف النظر عن المواهب بجد اللي الواحد بيشوفها في عالم التدوين المهم مش عاوز أخرج عن موضوع الغباء اللي أنا فيه مش عارف ده من أية

الغباء هل هو قدر و لا جهل و لا ممكن يكون الواحد بيتعمد بس أنا مش متخيل إني ممكن أكون متعمد لأني في موضوعات نفسي أنساها و مفكرش فيها زي كتير من صحابي عايشين و خلاص يسلام لو أوصل للمرحلة دي يبقي ربنا راضي عني أروح الشغل أرجع أكل و أتفرج علي التلفزيون و خلاص بعد كم سنة أتجوز و أعيش كده أنتخة و خلاص

مع إني عارف أن ده مش هيحصل و أنا مش هأكون مبسوط لو حصل الحقيقة

نفسي أكون إيجابي الإيجابية دي أجمل شئ في الدنيا هي بالرغم من المشاكل اللي ممكن تسببها بس هي حلوة قوي

و يااه لو أكون أديب و لا شاعر زي الناس اللي مش عارف هي مش مشهورة ليه في البلد الغريبة دي و بشوفها هنا

بس الحمد لله علي كل شئ أنا عارف أنكم مش فاهمين أنا كاتب البوست ليه بس أنا عارف و متزعلوش مني البوست ده لنفسي مش ضروري يعني تعلقوا لو مش لاقين حاجة تكتبوها

بس الغباء دي شئ صعب الحقيقة

و بما إني داخل كمان علي دور وحدة رهيب فممكن تجدوني أكتب شوية بوستات في اليوم مش بوست و لا أتنين أنا هأعمل عكس كل الناس اللي بتعتزل التدوين أنا هادمن التدوين بس إدمان حميد إن شاء الله

و مش هأكون سلبي أو أدعو ربنا إني مكنش سلبي و هأعمل علي كده إن شاء الله و هأقضيها فترة كده نت كتيرررر

و إحتمال تلاقوني زاير بتاع ألف مدونة يوميا يمكن الواحد يلاقي طريقة في الحياة في مدونة من المدونات المحترمة اللي بدخلها

محدش يقلق و يقول كده غلط أو مش حل انا عارف أنا هأعمل أية إن شاء الله متخافوش

بس أنا بأدعي ربنا و أحمده علي كل نعمه اللي نعمها علي

بس الغريب إن نفسي أعيط قوي مش عارف أنا كان سهل علي من كم سنة إني أعيط مع نفسي طبعا بس دلوقتي بحس بالدموع محبوسة في عيني و مش عاوزة تنزل مش عارف ليه

يمكن علشان مفيش سبب طيب هي أتجمعت في عيني ليه من الأول مش عارف و لا ممكن عيني تكون تعبانة مش عارف بردو

مش عارف دي كلمة رخمة قوي كتير بكررها

هأحاول أبطلها إن شاء الله

أقول لكم أية كمان كفاية كده

و لو في جديد و أكيد هيكون في هأكتب لكم علي طول

بس أنتم متزهقوش و لو حتي زهقتم أهوه بردو هأكتب و اللي مش عاوز يقرأ ممكن ميكلفش نفسه و يدخل هنا بس بجد أنا كل اللي بأقوله ده جوايا و ياريت لو في حد حاسس أنه ممكن يفيدني ميبخلش عني بأي نصيحة

سلام

بسم الله الرحمن الرحيم

السلام عليكم و رحمة الله و بركاته

مش عارف ليه نفسي أكتب بوست قوي بس للأسف مفيش موضوع معين في دماغي أو في موضوعات بس كلها هتتفهم غلط المهم

قعدت أفكر أكتب أية وصلت لحاجة جميلة قوي اللي هي:

اللهم إليك أشكو ضعف قوتي و قلة حيلتي و هواني علي الناس يا أرحم الراحمين أنت رب المستضعفين و أنت ربي إلي من تكلني إلي بعيد يتجهمني أم إلي عدوا ملكته أمري إن لم يكن بك علي غضبا ٌ فلا أبالي و لكن عفيتك هي أوسع لي أعوذ بنور وجهك الذي أشرقت له الظلمات و صلح عليه أمر الدنيا و الأخرة من أن تنزل بي غضبك أو يحل علي سخطك لك العتبي حتي ترضي و لا حول و لا قوة إلا بالله

بسم الله الرحمن الرحيم

السلام عليكم و رحمة الله و بركاته

أزيكم يا أحلي شباب عرفتها في حياتي

مقدمة

أنا دايما في أيام الشغل بنام في حدود من 10 ل 11 علي نشرة أخبار البي بي سي حصاد اليوم الإخباري

و دلوقتي كنت خلاص هأنام بس مكنتش صليت المغرب و العشا و مش هأكدب عليكم علشان بحس إني مش بخجل منكم و نفسي تساعدوني ساعات بطنش كتير و مش عارف قمت علشان أصلي و لا علشان أكتب البوست ده و مش هأكدب عليكم ممكن مكنتش قمت لو مش في دماغي موضوع البوست ده و الله اعلم و يارب يغفر لي

الموضوع

ليا واحد صاحبي أو مش عارف علي الأقل كنت معتبرة صاحبي أو أتمني أنه يكون صاحبي مش عارف هو ليه حاليا بيعاملني بالطريقة دي

علشان بردو محدش يتوقع منه رد هو ممكن مبيدخلش هنا غير كل قرن و ساعات مش بيدخل المهم بردوا علشان شكلي قدامه مش هأقول علي أسمه

مش عارف هو بيعيد حساباته مع نفسه و لا فجأة عرف إني مش أصلح له كصديق أو لظروف تانية الله أعلم مش عارف بيعاملني معاملة غريبة

أنا معتقدش إني عملت حاجة تزعله

بس اللي مضايقني فعلا إننا كنا واخدين علي الصراحة مع بعض يعني اللي بيزعل بيقول للتاني بس هو المرة دي مفيش كلام و اللي غيظني كمان حاسس أنه كان بيضحك علي الفترة دي أو بيتريق علي في سره مش عارف ليه الإحساس ده عندي

بس بجد مش عارف ليه الناس كده بتحب تخدع ليه مش نكون صرحين مع بعض مش قادر أعرف يعني أنا مش عاوز أتكلم معاك مش أسيبك معلق كده لا ممكن نفترق عادي أو نكون زملاء مع بعض أنا شايف بصراحة أن ده ممكن يحصل

و هنسأل علي بعض و نسلم علي بعض عادي يعني ممكن تكون مش فرحان بصداقتي زي ما انا فرحان

مش هأزعل و علشان ما أكنش بكدب هأزعل بس هأزعل أكتر لما تعاملني كده علشان أنت كده بتخليني أفقد الثقة في الناس كلها بجد

و معتقدش أنا عملتله حاجة تضره في حياته

ليه هو يعمل معايا كده مش عارف

أنا عاوز أقوله بس إن أنا مستعد منه أنه يقول مش هينفع نكون صحاب و عادي و الله ميقلقش بس يقول و لو قال و رجع طلب مني أي حاجة أنا مستعد بجد أنفذ له كل اللي يطلبه علشان مكنش بردوا متجني عليه أنا أتعلمت منه حاجات كتير قوي و ممكن أكون مدين له بالفضل بيعني سعادتي خلال هذه الفترة

ليه الصراحة في حياتنا مش موجودة

حرام و الله كده

بس الحمد لله

نشرة الأخبار

صاحب المدونة دي مش عاوز أقول لكم سعيد بجد هذه الأيام بطريقة مش ممكن الحمد لله علشان أصدقائه من المدونين في زيادة و الحمد لله مش عاوز أكتر من كده بس عاوز اللي دخل هنا مرة يرجع تاني و تالت و تريليوووووووون

نياهههههها الأهلي أتهزق من الإسماعيلي بالتلاتة معلش شيريهان و روني و دودي و هيومان و المراكبي و كل الأهلاوية

الحمد لله حفظت سورتي النازعات و عبس أدعو لي أكمل يارب

مش عارف متفائل قوي السنة دي الحمد لله يارب دايما و يتحقق اللي مستنيه منك يارب

و الله يا جدعان الحياة دي فعلا مش مستهلة نكرهه أي حد خالص علي أية يعني مش عارف

صدق رسول الله حين قال : من أصبح أمانا في سربه معافا في بدنه عنده قوت يومه فكأنما حيزت له الدنيا بحذافيرها صدق رسول الله

الله يسامحكم ضيعتوا مني مقدمة النشرة

- شغال في كورسات حاجات كتير قوي عاوز أخلص كم كبير منها خلال فترة البيات الإجباري اللي في التمهيدي حاليا علي أمل العودة للتمهيد السنة الجاية بقوة إن شاء الله

سلام و تصبحوا علي خير

السلام عليكم

كل سنة و أنتم طيبين

مش عارف أبدأ البوست ده إزاي من القديم للجديد و لا من الجديد للقديم زي نشرات الأخبار

و مش عارف ليه جو نشرات الأخبار ده لذيذ معاي من البوست قبل اللي فات المهم

أنا صحيت علشان عندي ورق للشغل المفروض يتذاكر المهم كنت عاوز أصحي الساعة 9 بالليل بعد محاولات مضنية من ماما و أختي وأنا شخصيا قمت علي الساعة 1و نص بالليل

الحمد لله إني قمت أصلا في البرد ده

المهم جهزت جو المذاكرة بتاع زمان و سمعت أسامة منير قدرا علي نجوم إف إم أنا بصراحة مش بحب البرنامج ده بس بحب أسمعه و محدش يزعل مني ساعات بضحك جدا في البرنامج ده من القصص و الحكايات الغريبة اللي بسمعها محدش يزعل كل واحد له رأية و الإختلاف في الرأي لا يفسد للود قضية

بس بعد البرنامج شغلت فيروز علي حليم

و الحقيقة كل حاجة بالليل لها جو مختلف حتي إذاعة القران الكريم من الساعة 12 بالليل لها جو غريب

أسمعوا كده برنامج قطوف من حدائق الإيمان خصوصا حلقات الأستاذ شحاته العرابي و لا برنامج المستغفرون بالأسحار

المهم كنت بسمع البرامج دي أيام المذاكرة و يارب ترجع تاني و أذاكر

المهم جو الليل ده جو لازم يكئبك أو يخليك تخاف من المستقبل انا الحمد لله مؤمن و كل حاجة بس مش عارف خايف من المستقبل

يعني مثلا مش عارف قلتلكم و لالا

أنا كنت في تمهيدي السنة دي و فشلت و هأغير الجامعة اللي كنت فيها و مش عارف الجامعة التانية دي هتقبلني و لا لا السنة الجاية و لا ممكن تاخد من تقدير عالي و لا ظروف الحضور أية نظامها و مش عارف حاسس إني كبرت قوي و خلاص مفيش وقت للفشل و أي فشل تاني حاسس أنه النهاية و حتي لو جه عارف أنه مفيش نهاية للحياة بس بردو بخاف

و نفسي أسافر بره و مش عارف مؤهلاتي هتساعدني و لالا و هأنجح أزودها علشان تسهل لي السفر و لا لا

و مش هأكلمكم عن الموضوع الأزلي اللي بتكلم فيه دايما

مش عارف أعمل أية الحقيقة

جو رعب اللي أنا فيه يارب يكون في حد معايا

و تكون يارب أنت كمان معايا و تهديني و تثبت قلبي علي دينك و الثقة بك

نشرة الأخبار

مش عارف ليه مصر الطيبة الشعبية اللي كلها شعراء و مغنين محترمين مش بشوفها غير في الأفلام زي مثلا فيلم

خيانة مشروعة هو حلو بس تحس أن مصر اللي في الفيلم مش هي اللي أنا شخصيا عايش فيها خصوصا جو الأستاذ العبقري اللي بأعشقه إبراهيم عيسي

الزمالك اتغلب من الأهلي كما هو متوقع بس الحمد لله ملامح التغيير بدأت تهل

قضيت رأس السنة مع هاري بوتر 1 و 2كان نفسي أشوف الفيلم ده قوي

تاني يوم شفت إعادة الفيلم العبقري تيتانيك

و الله متفائل جدا الحمد لله الأيام دي و يارب يدوم التفاؤل ده

سمعت لواحد صاحبي سورة النبأ و أدعو لي أستمر في حفظ القرآن

مش عارف أنتم بتوحشوني جدا بجد

و أنا بحبكم كلكم و الله

سلام و تصبحوا علي خير

حسيت بإحساس غريب بعد أول مرة في التكبير للعيد و كانت في صلاة الجمعة
و نفسي أدعي قوي و قلت لازم تشاركوني الدعاء

يارب الناس تبقي كويسة مع بعضها

و يارب الناس في العالم كله تكون في أمان

يارب أنا عارف أن الشر موجود في الحياة بس يارب

يكون الخير أكتر من الشر

و كل سنة و المسلمين و المسحيين و المصريين

و العالم كله بخير و سلام و أمان

السلام عليكم
كل سنة و أنتم جميعا بخير
طبعا مصمتش أول يوم في ذي الحجة و صوم ذي الحجة لم يحافظ الرسول علي صومها بإستمرار و هذا ما علمته مؤخرا
المهم طيعا إعلامنا المحترم لم يعلن عن بدء ذي الحجة غير لما فطرت أو علشان لا أظلمه و أنا نايم
هتضايق علي أية ماجدة الخطيب ماتت عرفت يعدها بساعتين الشيخ عطية صقر مات عرفت بعدها ب 3 أيام
حسبنا الله و نعم الوكيل
المهم مش عاوز أكئب عليكم في الأيام المفترجة دي
كل سنة و أنتم طيبين و بخير و أحذركم من المعاصي في هذه الأيام كلها الأشهر الحرم خاصة
مش عارف مفيش نفس الواحد يكتب في أي موضوع بس أنتم وحشني جدا و عاوز أكتب لكم أي حاجة
تصدقوا جه علي دماغي موضوع دلوقتي
الجمعة اللي فاتت أتقابلت مع أتنين صحابي المهم طبعا أنتم عارفين أن أهم موضوع بيشغل دماغي هو موضوع البنات
المهم أتفقت مع واحد كان جايب لي عروسة علشان أخرج معها و أنا قلتله أنا مش بفكر خالص في الجواز دلوقتي و بيني و بينكم موصي كم واحد لو قلتله أتجوز قبل سنتين يمنعني بأي شكل
المهم أقنعته إني أقابل البنت دي و لو ربنا كرم و عرفت أتعرف عليها كان بها كصداقة فقط و ليس جواز
و الأخ التاني ظبطت معها علشان بردوا يعرفني علي بنت تانية بس بدون إحراج منكم علشان أنتم إخواتي مش محترمة يعني
بس مش زي ما أنتم هتفهموا عادي يعني صداقة بردوا بس متقدمة شوية
المهم صاحبي الأول قلق و خاف خصوصا أن البنت اللي كان جايبها دي صديقة خطيبته و قال لا يا جواز يا بلاش قلتله بلاش
أما صديقي التاني للأسف أنه صديقي فهو يعرفني كويس
طبعا طنش علشان عارف هبلي و إني قفل مصدي و هكذا و للأسف فشلت القصتين اللي كنت معلق عليهم أمل كبير قوي
الحمد لله الجايات مش أكتر من الريحات
خلاص
المهم محدش يقولي ليه عاوز تعمل كده و لا الكلام ده يدور في البوستات السابقة علشان يعرفني و يعرف بفكر إزاي
في حاجة تاني عاوز أكلمكم فيها
أنا سعيد جدا إني بدأت أكتب تاني الإلهام نزل علي و لا أية مش عارف
لو في حد عنده حل لمشكلتي لا يتردد في الكتابة لي
بس
معرفش اليومين دول بسمع حليم بطريقة غريبة
الزمالك يا جدعان مش عاوز أقولكم أكيد كلكم عارفين متبهدل خالص ربنا معانا
لبسو الأخ التوربيني حادثة قطر كمان
ممكن علي يوم الأحد يشيل مسؤلية البطالة و التضخم كمان علشان بيقولوا أنهم كل يوم بيطلبوا ياكلوا كفته
الباشمهندس مانويل جوزيه بيقبض 46 ألف دولار في الشهر يا بلاش
هيدو كاجودا 100 ألف دولار تعويض بس أومال لو كان جاب الدوري كان أخد كم
حسبنا الله و نعم الوكيل
أنا زملكاوي بس ياريت مصر كلها تكون زي المحترم المؤدب الجامد قوي الخلوق بجد المتواضع اللي فعلا ربنا كرمه علشان أخلاقة أبو تريكة
الإخوان لها ميليشيات كمان
حماس و فتح بيقتلوا في بعض
البانجو سمعت أنه هيتسعر
(دي من عندي )
نفسي أذاكر و أقرا
لو حد عنده حاجات تساعدني علي الموضوع مستني نصائحكم
معتقدش إن في حد منكم هيوصل هنا
لسه متفرج علي كم فيلم عجب
فيلم كيفن كوستنر كنت هأعيط فيه
الزنبقة في الشغل علي نار و علي قدم و ساق
كفاية كده أنا حاسس إني شخصيا تهت مش عارف أنتم هتوهوا و لا لا

علي العموم
كل سنة و انتم بخير و صحة و في عبادة و قرب من الله إن شاء الله
أرجوكم أدعوا لي من قلبكم

وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللّهَ يَجِدِ اللّهَ غَفُورًا رَّحِيمًا [110] النساء

إِنَّ اللّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللّهِ فَقَدْ ضَلَّ ضَلاَلاً بَعِيدًا [116] النساء

قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ (53) الزمر

السلام عليكم
أزيكم يا من أتمني تكونوا فعلا أصدقائي
مش عارف ليه نفسي أكتب بوست عن روني
بصراحة أنا حتي وقت قريب جدا جدا كنت شايف إن الصداقة بين بنت و ولد حرام أو مالهاش لازمة
علشان كده عمري ما حاولت إني أكون صداقة مع بنت
و كنت طبعا نفسي أحب و أعيش حالة حب بس
مش صداقة
المهم فشلت طبعا تريليون مرة في الحب لأني كنت عبيط جدا في الموضوع ده الطريقة يعني
المهم بعد كده بعد التخرج من الكلية أتعرفت علي رنا عن طريق النت
و كعادتي في صداقات الشات كنت بعد شوية بأقول رأي في العلاقة بين البنت و الولد
و كتير فقدت ناس كانت ممكن تكون أصدقاء كويسة جدا معايا بسبب الرأي ده بنات طبعا
لكن روني حصل معها كده بردو و فعلا قعدنا ما يقرب من سنة منتكلمش مع بعض بس معملناش بلوك لبعض
لغاية فترة قريبة أنا بدأت أتكلم معها مرة تانية
و بجد عرفتني أنه ممكن يكون في صداقة بين ولد و بنت و عرفتني أنه ممكن يكون أصلا في صداقة كويسة بين إنسان و إنسان
المشكلة بس أنها في الفيوم و أنا في القاهرة
بس بجد كان نفسي أعترف بجميلها علي أنها أستحملتني و وافقت تكلمني تاني أصلا
و أتعلمت منها حاجات كتير
ده حتي هي اللي عرفتني علي عالم المدونات الرائع ده
ياريت نكون أصدقاء علي طووول يا رنا
شكرا يا رنا

وحدة

وحدة

وحدة

وحدة

وحدة

وحدة

وحدة

نكد علشان خاطر نور
الوحدة من أسوأ الشعور اللي بيراودني دلوقتي كل أما أفكر أتصل بحد أو أكلمه أقول لنفسي ليه دايما أن اللي أبدأ
المفروض الأصدقاء تسأل علي بعض
مش لازم يعني المصلحة اللي تحكمنا (ملعون أبو الصداقة اللي علشان المصلحة )
ليه مفيش صدق و حب بجد
دايما الخيانة أو مش الخيانة النفاق هم اللي مسيطرين
ليه مفيش حد يعرف حد من غير ما يكون عاوز منه مصلحة
نفرض في الأول كده طيب عملتلك مصلحتك مطنش بعد كده نحافظ علي الأتصال بس علي الأقل
مش مشكلة ماليش نفس أكتئب
بس نفسي في صديق قوي بجد
نفسي في صديق
و هتندموا علي اللي بتعملوه في وقت لا ينفع الندم
بجد

شكرا م/محمد عبدالمنعم الصاوي علي.......ساقية الصاوي

شكرا وينكي علي....... إعلانك عن حفلة سلمي

شكرا حازم علي........إنك شجعتني نروح الساقية و الحفلة

طبعا شكرا سلمي .......علي الحفلة الجميلة جدا عن فيروز

السلام عليكم
الحمد لله أنا حاليا أحسن ده للي عاوز يطمن علي حالتي النفسية
معلش أنا قرفتكم معاي الفترة اللي فاتت و اللي متقرفش ممكن يقرا أخر كم بوست و هو يتقرف المهم
في موضوع عاوز أستشيركم فيه أنا أتكلمت فيه قبل كده بس بجد الموضوع ده عقدة بالنسبة لي
هو موضوع الحب أو موضوع الإعجاب ببنت
هأكتبه في نقط و لو حد عنده حل ربنا يكرمه و يقوله
أولا أنا مش بفكر في الجواز خالص دلوقتي
و بما أني مش بفكر في الجواز مش عاوز أفكر في الحب
لكن الغريب إني
بأعجب (دايما مش حب)جدا بأي بنت بسهولة جدا و ممكن يعني أعمل فيلم علي أي حاجة
و أقعد أحب فيها مع نفسي طبعا لحد أما واحدة تانية تظهر
وهكذا
أنا زهقت من نفسي بسبب الموضوع ده و مش عارف أعمل أية
مش عارف أنا قدرت أوصل لكم اللي في نفسي و لا لا
مش عارف أعمل أية
أرجو النصيحة بحاجات واقعية مش عاوز حاجات صعبة و مستحيلة

يارب أنا عارف إن كل اللي أنا فيه ده من غضبك علي و أنا عارف إني أستاهل بس بجد يارب انا خلاص مش قادر يارب يارب يارب يارب يارب يارب يارب يارب يارب يارب يارب يارب يارب يارب يارب يارب
تعبان قوي يارب و أنت الأعلم بي
مش عارف فيه أية ده أمتحان و لا عقاب
و لا أية يارب حتي لو مش هتعفو عني في كل شئ
في حاجات أتمني تعفو عني منها
أشكو إليك ضعف نفسي أمام شهواتها
أشكو إليك ضعف قلبي و إشتياقه للحب الزائف
أشكو إليك ضعف عقلي في التفكير الخاطئ دائما
يارب أشكو إليك الوحدة
أشكو إليك معاملة الأهل
أشكو إليك كسلي
يارب أرحمني
أدعو لي بالعفو
أدعوا لي لعل الله يتقبل منكم
مش عاوز أي حاجة منكم غير الدعاء الخالص لوجهه الله
أنه يعتقني من اللي أحاطني به
يارب

هي حالة القرف دي مالهاش نهاية
طيب ليه حالة الفرح اللي الواحد أحيانا بيقع فيها مش بتستمر
يعني مثلا الشغل مش حابب المجال خالص
الكمبيوتر البرسيسور 3 جيجا و بطئ جدا
النت دي أس إل و بيفصل
مقلش الكبيرة قوي
الأصدقاء
إما مفيش إما مش أصدقاء
الناس اللي في الشارع يا مش لا بسين هدوم يا مكشرين أكتر مني
الجيران زبالة
أية تاني
حال البلد مش هأتكلم عليه
حال الإسلام بردوا مش هتكلم عليه
طيب أهاجر
فين الدولة العبيطة اللي تاخد واحد زي
طيب ندور علي الشيخ أسامة
مش لاقين الشيخ أسامة
طيب نعمل أية
نحلم أدينا بنحلم
طيب نحقق حلم واحد من اللي بنحلمه
قولوا يارب
طيب بلاش و النبي نفكر في الحب الحياة مش ناقصة نكد
هأطلب منكم طلب
لو قبل 3 سنين قلتلكم إني هأحب أو هأتجوز أمانة فكروني بأحلامي
و طموحاتي و قولولي أرجع
دي أمانة
سلام

البلد دي خلاص مبقاش ينفع يتعاش فيها
أي حد عنده طريقة علشان أمشي منها ياريت يبعت لي
كفاية كده
و مش عاوز نصايح

سا محيني رسول الله

خطر لي هذا الموضوع من مدونة" حفصة" فقد كتبت بوست عنوانه وحشتيني يا مصر
و قمت بالتعليق عليه و قامت هي بالرد علي المهم
محاور هذا الموضوع خطرت لي في طريقي لصلاة الجمعة و خلال الخطبة التي لا تتضمن سوي حكايات عن ناس من الصالحين و كيف يرضون بالقليل و لا يقومون بشئ في الحياة غير عبادة الله لذلك هم في نعيم بالرغم من حالتهم الرثة
لا يتسرع أحد منكم في الظن السئ بي من كلامي
و أيضا تذكرت إعلان عقيم من التلفزيون كان بيقول مش فاكر عن أية بالتحديد المهم كان بيقول
الجهل المرض الفقر مش فاكر بقه بيعملوا أية
فتجمعت نقاط الموضوع كله في رأسي
و فكرت بكتابة أربع كلمات في البوست بدلا من ثلاثة بس و الناس تفهم بس قلت ما دام أنا فاضي ليه مشغلش الناس بكلام فاضي فسوف أقوم بتفصيل الأربع كلمات
والأربع كلمات تلك هي

البلطجة + النفاق + القناعة الزائفة+ السلبية = مصر

ملحوظة:أثناء الكتابة دلوقتي دخلت علي مدونة" سارة زهرة التيولب" قال يعني الموضوع ناقص نكد

البلطجة

أصبحت هذه الكلمة منتشرة جدا هذه الأيام و أصبح البلطجية كتير
و أصبحت الحكومة تستخدم البلطجية يعني شغلهم قانوني و المعارضة تستخدم البلطجية حتي الإخوان يستخدموا البلطجية و رجال الأعمال الشرفاء قبل الحرامية و لا أنسي طبعا أصدقائي الشباب اللي متربين في الجيم و الله مش حقد
و أصبح الأنسان لا يأمن علي نفسه في بيته في الشارع في الشغل في أي مكان و زمان
و هناك أنواع جديدة من البلطجة أو ما أسميه تقنين أي جعلها قانونية و ليست تقنين أي تقليل
فكل من يريد أن يكون زائع السيط يفتح أي حاجة في الشارع حتي لو وقف بكرتونة فاضية و يشارك في جميع الخناقات للناس الكبيرة أي التجار وأصحاب المحلات
و من الظريف خالص أصبح هؤلاء الناس يتحكمون في كل شئ حتي مصير الأنتخابات فمثلا في منطقتنا الغراء هؤلاء يتحكمون في كل شئ و يفعلون مايريدون و الغريب أنك تجد جميع الناس تريد رضاهم أو أمان شرهم ومن صفات هؤلاء الناس وجود أهم معلم و هو زبيبة الصلاة
و الصلاة في المسجد هو أة لما بيصلوا في الجامع بيجعلوني أنسي الوقوف أمام الله و متابعتهم في الجامع لكن بيصلوا في الجامع و يقومون بالإشراف علي موائد الرحمن و كما سبق و قلت الأشراف علي الإنتخابات و تحديد النتيجة
و مش عارف ليه معظم هؤلاء الناس حلاقين و الله مش معترض عليهم علشان حلاقين لكن المشكلة تلاقيهم بيعملو بلاوي و تلاقي القرأن شغال
أة في واحد ظربف قوي سمعتوا بيقول لواحد كلمة جميلة بالرغم من إقتران أسمه و للأسف بكلمة حاج بيقول " لو نزل لي نبي من السما مش عارف هيعمل فيه أية " معلش علشان في بنات و كده أنا أتكلمت في البلطجة و جزء من السلبية
لو كلامي كويس قولوا علشان أكمل لو مش عاجبكم أكيد هأعرف
و إلي اللقاء في النقطتين الأخرتين بناء علي رغبتكم
و النبي قولوا أكتبهم علشان أنا كده كده هأكتبهم

"إختبارات"

مش عارف البوست ده علشان الأمتحانات اللي أنا فيها دلوقتي و لا أية

هو الموضوع ده كان بيخطر علي بالي من زمان و كنت عاوز أسأل فيه حد متخصص و بما إني عرفت عالم المدونات فقلت ده أحسن مكان للسؤال

هما سؤالين عن موضوعين مختلفين

الموضوع الأول هل من الممكن إننا نبتكر نظام من الإختبارات قبل الزواج؟

مش اللي هيخطر علي بالكم

لكن اللي أقصده إننا نحكم هلي هذين الزوجين يصلحان لأن يكونا مسؤولين عن أبناء أم لا فلو كانت الأجابة لا لا نسمح لهم بالإنجاب

طبعا هتقولوا أية المجنون ده أنا شايف ده جنون بصراحة بس الجنون الأكبر إننا نري أبنائنا يضيعون ليس بسبب أي شئ لكن بسبب أبائهم

الذين لا يعلمون أصول التربية أو حتي لا يكلفوا أبنائهم بأي قدر من الأهتمام و الرعاية

أنا الأسبوع ده قرأت خبرين مش عارف قدرت أقأرهم إزاي أصلا

الأول أنه هناك أب مسك رأس بنته اللي عندها ثمانية شهور و قعد يخبطها في الحيطة لحد طبعا أما المسكينة ربنا رحمها كل ده علشان أمها مش عاوزة تعطيه فلوس للمخدرات أنا أساسا لو شيلت عيل صغير بخاف أمسكه جامد علشان لا يتألم ده مسكها و خبطها في الحيطة كتير مش مرة و النهاردة خبر كمان أن أب عذب بنته بالضرب و الحرق حتي الموت علشان أية غيرة زوجته التانية

طيب أنتم مش عاوزين و لاد ليه تخلفوا من الأول مش عارف

طبعا مش هتكلم عن حالات الإنجاب الغير شرعية و ما يحدث فيها أنا بتكلم في القانوني بس

و هناك من يكون سبب في فساد أبنه سواء بالإهمال أو بالدلع الزيادة أو الشدة الزيادة فمش عارف الأقتراح ده ممكن يتحقق أم لا أنا أتمني من الله أن يتحقق و يشترك في هذا الموضوع كل متخصص من شيوخ و دكاترة نفسيين و إخصائيين إجتماعيين

أتكلم في الموضوع التاني و لا كترت

لا لازم أتكلم علشان الموضوع ده يمسني شخصيا

ممكن أختصر

هو ممكن يكون هناك نوع من الإختبارات علشان الواحد يقدر يحدد هو الشغل المناسب له أية

علشان أنا بصراحة بالرغم من إن عندي 24 سنة مش عارف حتي أتمني نفسي أكون أية

مش مثلا تمنيت و فشلت في تحقيق الحلم لا مش عندي حلم أساسا

ياريت لو حد يعرف الإختبار ده بالذات يبعته لي حتي لو في طور الإختبارات

مش عارف أية موضوع الأختبارات اللي نازل علي ده

كل سنة و أنتم طيبين

و الله عارف إنكم مالكوش نفس تفرحوا بعد الموضوع الكئيب اللي أنا كلمتكم فيه بس ياريت لو حد صوته واصل ياريت يوصل الأقتراح الأول الأهم

علشان حرام علينا الأطفال دول

وحشتوني

بالرغم من حداثة عهدي بعالم المدونات إلا أنني كنت توقفت عن الكتابة و ألغيت كل مشاركاتي بعد أن رأيت كم أن هذا العالم يضم أناس كثيرة علمتني أن هناك أمل و هناك ناس فعلا لا تزال تحلم و تتمني الخير لها و لبلدها و للعالم كله
و كنت قد قررت عدم العودة غير بمشاركة فعالة و للذي لا يعرفني كانت معظم مشاركاتي كئيبة و متشائمة إلا أنني بالرغم من الظروف التي تمر بي حاليا إلا أنني أجد نفسي متفائل لا أدري هل لإنضمامي لهذا العالم سبب في هذا التفاؤل أم لأشياء أخري
لكن في إنتظار مشاركتي الجديدة المتطورة
أجد نفسي في شوق كبير جدا للحديث معكم جميعا
فتقبلوا مني هذه المشاركة إلي أن أجد ما أعود به لكي أشعر بأني أستحق الإنضمام إلي عالمكم الرائع هذا
بجد وحشتوني جدا

وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللّهَ يَجِدِ اللّهَ غَفُورًا رَّحِيمًا [110] النساء


إِنَّ اللّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللّهِ فَقَدْ ضَلَّ ضَلاَلاً بَعِيدًا [116] النساء



قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ (53) الزمر

فاصل من النكد المتواصل

هو الموضوع كده خلاص كل شوية نكد علي نفسي و خلاص مش عارف أفرح ليه

أبلغكم بشري جميلة جدا أكتشفت اللي عندي ده منين

الأول كنت محتار نفسي أمارة بالسوء و لا من الشيطان لعنة الله عليه

لكن الحمد لله ربنا وفقني تأكدت أنها نفسي الأمارة بالسوء

فيها أية لو أعيش كده و خلاص مش عارف لازم أعمل نفسي عبقري زماني و نفسي أكون كويس

فيها أية لو أعيش زي أي بني أدم عادي صفر علي الشمال أو مش موجود أساسا

مش عارف

أنت كده كده بتجلد نفسك بس قضيها كده و خلاص عيش اللحظة زي ما هي

مش لازم تعمل صلاح الدين و لا يحزنون

طيب عاوزين نصيع

حاجة سهلة خالص

حتي دي كمان مش عارف تعملها

طيب مش عارف و الله انت ممكن تنجح في أية

أة

مفيش حد عنده إختبار كده يقدر يحدد مواهب الانسان و يعرف الشغل المناسب ليه و المجال اللي ممكن يتفوق فيه

هو مش علشاني الاختبار ده انا عرفت أنا ناجح في أية

النواااااااح

مش بعرف أعمل حاجة غير إني أنوح علي حالي

مش عارف نواح دي جبتها منين

هأختار لنفسي لقب هو محمد ابن المنوح

أسم جامد صح

عارف هتقولوا صح

مش عاوز شغله فيها تشغيل دماغ ليه علشان أنا مش بعرف أشغل دماغي اللي اعرف أعمل شات أو أتفرج علي افلام و ماتشات

مفيش شئ مفيد في حياتي

الصبح أصحي ألبس أنزل أركب علشان أروح الشغل في عربية الشغل

أقف جنب الناس الصبح اللي حفظت خلقهم الكريمة و في واحد كل شوية يسألني علي الساعة و سبحان الله كل يوم الساعة بتكون سبعة إلا ربع

بس هو من فترة مبقاش يسألني لأنه تقريبا أشتري ساعة أو عرف خلاص إني هقول له الساعة كم

و السواق كل يوم بيأكد لينا إن نهايتنا هتكون علي أيده في الطريق الدائري و غالبا في هذا الشهر الكريم لأن مهاراته زادت قوي مش عارف ده من اية

كل يوم بنكون خلاص علي وشك لكن مش عارف في حد مبروك في العربية بتاعتنا

و أنا كل يوم في العربية أقول لنفسي خلاص الانطلاقة النهاردة و أحفظ تاريخ اليوم علي أساس يعني لما هأرجع من الشغل هأذاكر التمهيدي و أقرأ ورق الشغل و أجهز التقارير و كمان أتصفح النت علشان أجيب أحدث المنتجات التي نستخدمها في الشغل

و طبعا اللي بيحصل كل يوم أرجع من الشغل أنام لتاني يوم و ساعات لتالت يوم

و اصحي أروح الشغل

و يوم الجمعة أصحي أصلي الجمعة و أرجع طبعا مش بنسي حفظ تاريخ كل يوم علي أساس أنه يوم الانطلاقة

في حاجة تقتكرو أروح أنضم للحزب الوطني حاسس إني شبهة خالص لأن الانطلاقة دي مش تعني العبور للمستقبل ممكن

و يوم السبت الاجازة بقه مش عاوز أقولكم بعمل فيه أية

علشان متحسدونيش

طبعا بعمل أية

مش بعمل حاجة

و يوم الاحد أصحي أروح الشغل

علي ما أعتقد خلاص عرفتو اللي بعمله

في تفاصيل قليلة هأكتبها لكم في مرة تانية ليه بقه

علشان انا دلوقتي هأقوم أنام علشان أصحي أروح الشغل

محمد ابن المنوح

اللعنة

مش عارف الموضوع ده أنا اتكلمت فيه مع ناس كتير و طبعا في ناس هتقرا الكلام ده و تقول تاني يا محمد حرام عليك مش أتكلمنا مليون مرة في الموضوع ده هو موضوع العلاقة مع البنات أنا كنت في الكلية مش بتكلم مع بنات تماما علشان بصراحة مش بعرف و تاني حاجة شايف ده حرام من ناحية إني مش بأرضي الموضوع ده لأختي لذلك لا أرضاه لأخت حد و في حديث عن سيدنا محمد صلي الله عليه و سلم لا يؤمن أحدكم حتي يحب لأخيه ما يحبه لنفسه لحد هنا الكلام حلو و جميل المشكلة فين إن الموضوع ده يشغل دائما في دماغي نسبة 99.99% مع الإعتذار لأصدقائنا أصحاب هذه النسبة لكن الفرق إن السنبة دي واقعية أنا متأكد من كده

مش عارف أعمل أية
نفسي أحب و أجد واحدة أحبها و يسلام لو ربنا يسهل و الموضوع يكمل
لكن مش بعرف خالص
مش عارف ده عيب في
مش عارف أعمل اية
و مش قادر أشيل الموضوع ده من دماغي بالرغم من إني شايل موضوع الجواز في الفترة دي من دماغي
و للعلم لو في واحدة جت لحد عندي و قالت لي بحبك و ده مش بيحصل هأقول لها لا
علشان دع غلط
مش عارف أنا منافق و لا أهبل بصراحة محتار جدا
منافق أهبل مجنون مش عارف
بس بجد جوايا أحسايس جميلة جدا نفسي تترجم لحد و مش عايز و مش قادر مش عارف أعمل أية
للعلم الموضوع ده ممكن يكون سبب وقوفي في الحياة
في حد عنده علاج للحالة المستعصية دي بس و النبي الحل يكون واقعي بلاش الكلام الكبير اللي مش بقدر أنفذه