السلام عليكم و رحمة الله و بركاته

مقدمه و أستهلال لابد منه
أخباركم أية يا أحسن ناس
مبدئيا أنا بتأسف لأي حد قرا البوست اللي فات و ممكن يكون اتضايق مني بس ربنا يعلم بنيتي في كتابة الموضوع ده أنا مش ندمان علي إني كتبته بس مش عاوز حد يزعل مني و إن شاء الله مش هأشرب كابتشينو تاني
أما بعد
انا من يوم السبت نفسي أكتب لكم عن يوم رهييييب عيشته
الحكاية تبدا أنه حصل لي الشرف و فجأة لاقيت نفسي بأتكلم مع سمرا النيل علي المسنجر و قالت لي أنت فاضي بكرة علي يوم السبت قلتلها أة خير ليه قالت لي تعالي هنتقابل بكرة كم مدون كده قلتلها لا بسابق خبرتي في الموضوع ده حكيت لكم عن لقاء المدونين السابق قالت لا تعالي الناس مش هتكون كتير و فعلا رحت الميعاد كان الساعة الثانية عشر ظهرا بعيد عنكم الجو كان فل

.

كان نفسي ناس تانية تعرف و كانت ممكن تيجي زي مانو مثلا و لا ساسو و لا رفقة العمر و لا أي حد تاني من الناس الجميلة اللي الواحد يعرفها هنا بس الحمد لله

.
المهم المحترمين محدش جه لغاية الساعة كم الثانية عشر و النصف كنت يأست و شكيت في اللي كلمتني علي المسنجر الحقيقة بس كنت متأكد أنها سمرا بس مش عارف ليه محدش ظهر المهم كنت خلاص هأمشي قلت أقعد علي القهوة و أشرب حاجة و أروح الحمد لله محصلش و قمت حتي قبل أما أشرب حاجة المهم خرجت الحمد لله لاقيت سمرا و كنت عرفت شكلها من اللقاء السابق و سلمنا علي بعض و بعد كده جت واحدة مشعاوزة تقول علي أسمها و بعد كده أحمد الهواري و أتفقنا نروح علي كافيه أهم حاجة فيه التكييف علشان مش عاوز أقولكم الجو كان عامل إزاي المهم قعدنا و أتكلمنا أو بمعني أصح أتكلموا علشان صاحبكم سكتم بكتم خالص بس أنا كنت سعييييييييييد جدا مكنش في حاجة مضيقاني غير إني مش بتكلم معهم و هم حاسين إني خنقة شوية الحقيقة و بصراحة عندهم حق

.
احمد الهوراي ده شخصية عبقرية بس كان صعبان علي قوي إني مش بتكلم معه بس كنت حاسس أنه مخنوق مني بس أنا كنت سعيد بالكلام معه و كمان كان حاطط سماعات الموبيل في ودنه يعني كان في حاجة بتهون عليه اليوم الشخص المجهول طلعت ساكنة قريب مني البنت دي بقة حكاية بتتكلم معاك كأنها تعرفك من زمان و تلقائية خالص و شكلها طيب قوي و سمرا بقة مش عاوز أقولكم فضيحة الحقيقة ربنا يكون في عون طارق ممكن تعمل له مشاكل في أي مكان بس هي تقدر تجذبك لكلامها و كأنك تعرفها من زمان و هي للعلم متختلفش عن اللي في المدونة خالص بس أفظع كتييييييييييييييييييييير

.
و بعدين قررنا نتغدي في كنتاكي و بعدين رحنا هناك جبنا الغدا بعد معاناة شوية و الأخت اللي شغالة هناك مكنش في حد طايقها من الناس كلها و تحس أنها شبهه عروسة المولد كده

.
المهم بعد كده أثناء الغداء أو أثناء غداء سمرا علشان إحنا كلنا قلبنا علي طول بس هي أبدا جه أخف دم و بهدل سمرا علي الأكل الحقيقة و أتكلمنا شوية و بعدين قلنا ندخل سينما بس الأخت سمرا ضيعت علينا ميعاد الحفلة و هي بتتغدي أو تقريبا ده كان شئ كويس علشان طارق يجي معانا السينما و بعدين قلنا نقعد علي قهوة لحد اما ميعاد الحفلة التانية يجي و قعدنا نتكلم أو بردوا أتكلموا أة الشخص الخفي مشيت من غير ما تسلم علي أنا و أحمد ماشي ماشي

.
المهم قعدوا بردوا يتكلموا عن الصحافة شوية و أنا بردوا بسمع بس مستمتع جدا جدا جدا و بعديت جت واحدة كمان مش مدونة صديقة أخف دم و راح أخف دم بايع أحمد قدمها و قالها بيقول علي الجرنال بتاعكم عميل و خاين مصيبة أخف دم ده و كان ماتش الزمالك و البلدية شغال و قمت و الزمالك مغلوب واحد صفر بس الحمد الله الزمالك كسب بعد كده عرفت و أنا في السينما من واحد صاحبي

.
دخلنا فيلم كده رضا و أحمد الهواري لم يدخل معانا
و العبد لله اللي حجز لهم التذاكر و أخترت لهم أحسن مكان في السينما كلها حاجة كده تكسر الرقبة و طارق جه و إحنا في السينما و كانت سمرا حجزت له و كانت خايفة طبعا لأحسن ميدخلش بس الحمد لله دخل و بعد الفيلم طبعا كلنا كنا ضايعيين سلمنا علي بعض و روحنا
ياااااه أخيرا وصلت للنهاية

.
تعليقي بقة علي اليوم ده
أنا فرحاااااااااااااااااااااااااااااااااااااااااااااااااااااااااااااااااااااااان قوي
بس زعلان أنهم ممكن ميقولوش لي علي أي خروجة تانية من الخنقة اللي خنقتهم بها بس مش مشكلة اليوم ده يكفيني بجد كان يوم حلو قوي
و حبيتهم كلهم و الله متعرفش ليه تحس أنك تعرفهم من زمان

.
رسائل
أحمد الهواري معلش يا أبو حميد أنا و الله اللي شكلي كده دايما تحس إني خنقة بس مش خنقة قوي يعني
سمرا شكراااااااااااااااااااااااااااااااا علي دعوتك و انك عرفتيني علي الناس الروعة دي
الشخص المجهول انا زعلان منك جدا علشان مشيتي من غير ما تسلمي
أخف دم أخف دم أقول أية أكتر من كده انت شكلك كنت حاسس بمأساتي إني مش بتكلم بس أنا بارغي هنا كتيييير
طارق معلش أنا عذبتكم في السينما بس و الله مكنش في غير كده و كان نفسي نتعرف علي بعض أكتر
.
مش أنا كنت قلتلكم إني حاسس إن ربنا الحمد لله بدا يعفو عني أهوة دليل كمان إني اتعرفت علي الناس الروعة دي كلها
و كمان الزمالك كسب ده شئ مهم
:)

بس

.
لما رجعت بقة كان عندي تقرير المفروض يتكتب من عشر أيام تقريبا ربنا قدرني و كتبته و نمتتتتتت و محسيتش غير الصبح و انا عايش بروح هذا اليوم من ساعتها
أنا عارف أنهم ممكن ميكنش اليوم ده يفرق معهم كتير بس أنا يفرق معايا كتير قوي لذلك ممكن محدش يتكلم عنه غيري
مش عارف أكتب تاني و لا لا انا عندي كلام كتير قوي
حول العالم بقة و خلاص

.
حول العالم
أنا متضايق قوي قوي قوي من موقف حصل عندنا في الشغل في حوار المكافأة في ناس من برة أصلا أخدت و إحنا أتخصم مننا كتير إحساس الظلم سئ قوي أنا الحمد لله الفلوس مش فارقة معايا بس حاجة تحرق الحقيقة

.
و لاد الحلال بتوع الشغل التاني مش عاوزين يتصلوا مش عارف ليه

.
أنا عملت حاجة عبقرية نزلت موسيقي أخير علي البلوج المتواضع بتاعي سعييييييد جدا شكرا لساسو علي مساعدتها

.
في خبر ظريف قريته في المصري اليوم عن الضابط المسئول عن تنظيم الإخوان في أمن الدولة ميعرفش مقر مركز الإرشاد و لا يعرف إن الأخوان بيعملوا مائدة رمضانية أية مش بيتفرج علي العاشرة مساء

.
كفاية عليكم كده
كل سنة و أنتم طيبين
ياريت نعمل حاجة جامدة في رمضان أية هي مش عارف بس ربنا يقدرنا علي فعل الخير

السلام عليكم و رحمة الله و بركاته
مقدمة
مش عارف ليه بقيت أحب عالم التدوين قوي أنا أحيانا من أول أما بأنزل بوست بأبدا أفكر و أكون عاوز أكتب بوست جديد بس الحمد لله بأسيطر علي نفسي و مش باعمل كده علشان محدش منكم يجي له شلل و أقعد بذنبه المهم أكيد طبعا تفهموا إن عندي موضوعات كتير عاوز أتكلم فيها و ياريت تعتبروا كل موضوع حلقة لوحده مفيش ربط بينهم و مش عاوز حد يربط أوك
اللي بيحب النبي يزق
بصراحة حالة الفرح و التفاؤل اللي عندي هي لسه موجودة الحمد لله حاسس إنها قربت تروح مني فياريت تقفوا جنبي قوي اليومين دول علشان مش عاوز أرجع تاني ربنا يكرمكم ماشي
أنا و الكابتشينو
يوم الثلاثاء الماضي قعدت كده مع صحابي و شربنا حبه كابتشينو هو الموضوع ده ممكن يكون غلط إني أتكلم فيه بس ممكن يكون نصيحة بردوا للشباب اللي مش بيدخلوا عندي صحيح مش ملاحظين إن معظم اللي بيعلقوا عندي بنات ما عدا أتنين و لا تلاتة
المهم الكابتشينو بقة مش بيعمل أي حاجة خالص من اللي الناس بتقول عليها بصراحة الواد صاحبي اللي قالي عليه بعضه حصل
المهم مفيش إحساس و لا بسعادةو لا ضحك و لا أي حاجة
أنت بتحس أنه فيه هلبين كل عين فيها هلب الهلب ده مربوط فيه بتاع تلاتة طن بيشدوا عينيك لتحت و طبعا عاوز تنام
بالنسبة للدماغ هي حاجة من حاجتين أولا تحس أن دماغك زي البلية محطوطة في حلة و واحد عمال يهز في الحلة ده نص كلام صاحبي أنا حسيت بالأولي التانية لا انا من سعتها حاسس إن دماغي تقيلة قوي بتتشد لورا
الخلاصة أنا جربت الموضوع ده علي أساس التجربة في حد ذاتها هو غلط بس اهوة
نصيحة بقة لأي حد بلاش تجربوا الموضوع ده مالهوش فايدة ده أنت حتي بتكون خايف تتقفش من البوليس و لا من عايلتك لما تروح أية إحساسك
و أية إحساسك بقة لو قضاء ربنا جالك و أنت في الموضع ده أية الفايدة مفيش
بجد عبيط اللي بيعمل كده
انا إن شاء الله مش هأعمل كده تاني علشان محدش ينصحني و يديني درس في الأخلاق ماشي يا روني
في موقف كوميدي بقة حصل انا لما بأروح من عند صاحبي ده باعدي علي كمين الواد قالي أية لما تعدي من الكمين رن علي علشان أطمن عليك قال يعني لو أتقفشت هو هيكون فايق لي أصلا علي العموم فيه الخير
حاولت أركب ميكروباص لاقيت مفيش غيري قلت خلاص أنزل و أخد تاكسي أخدت تاكسي و عديت من الكمين الأول مش أتنيل علي عيني و أصبر لما أروح و أرن عليه لا رنيت علي طول يا دوب مائة متر تانية لاقيت كمين قلت بس هو ده اللي هأتقفش فيه و لولا خفت يحسوا إن شارب و سكران ولا حاجة كنت مت من الضحك علي نفسي مادام أنت جبان كده بتعمل كده ليه و بعدين تخاف من الناس و متخفش من ربنا حتي أتكسف علي دمك المهم الحمد لله الليلة عدت علي خير
و دي كانت حكايتي مع الكابتشينو
أنا و الجامعة
نمت و صحيت تاني يوم فجأة كده محسيتش بالوقت من الصداع و الدوخان اللي كنت فيه رحت قدمت في الكلية علي التمهيدي الحمد لله و يارب أقبل فيه علشان أنا خايف لأحسن مقبلش ربنا يستر علشان لو مقبلتيش بس أنا أدعو الخير من ربنا

و طبعا لما رحت الجامعة حسيت بإكتئاب و أفتكرت أيام الجامعة و الشقاء العلمي و العاطفي و الخلقي و كل حاجة

بس بردوا الحمد لله

علي فكرة عيد ميلادها بكرة

و بردوا الحمد لله
أنا في الشغل
كنت في دورة تدريبية زي ما قلتلكم المدير بتاعي خانقني عاوز مني تقرير عن الدورة دي و هو كل أما يشوف ورق الدورة ده وأنا مدية لواحد عندنا في الشغل متخصص في المجال بتاع الدورة يفتكر التقرير و يسالني عليه أنا طلعت ناصح رحت جبت الورق من عند الرجل ده فهو كده مش هيفتكر التقرير
عندنا بنتين بيتدربوا حاولت أشرح لهم أي حاجة نوع من أنواع التعارف عليهم لاقيت نفسي فاشل شوية بس كويس إنه جت الشجاعة إني أتكلم معهم أصلا بس بيخنقوني بيقوليلي يا أستاذ محمد أستاذ مين
في الشغل كمان واحد عندنا اللي بيوزع المكافأة السنوية أنا مكنتش موجود و هو بيقسم علي الناس المهم انا هأقبض متخافوش بس اللي يضايق أنه في ناس كتير حقها مهضوم أنا منهم بس أنا مش متأكد يعني و الغريب أنه في ناس من بره واخدة من فلوس المكافأة بتاعتنا أنا مش فارقة معايا كتير بس اللي يخنق في ناس كبيرة حقها مهضوم و ربكم و الحق الظلم و قلة التقدير شئ بشع قوي للناس اللي عندها دم
مش عارف أنا بقيت اكتب كتير ليه فبأضطر أقلل في حول العالم بس مش مشكلة ربنا يقويكم
حول العالم
نقول ألف مبروووووووووووووووك لرنا علي خطوبتها أنا كنت عارف من زمان الحقيقة بس محبيتش أقول غير لما هي تقول
و كمان مرة مبروك و متزعليش مني و الله بجرب بس
الأهلي نادي المبادئ بيشغل ناس بيضحكوا عليه أسألو شريف أشرف
الأهلي نيههههههههههههههههههه أتبهدل في السودان بالرغم من إني فرحان قوي إن الأهلي أتغلب علشان ده من الحاجات اللي بنخليني متفائل و بتفكرني بأيام حلوة كانت و هترجع تاني إن شاء الله بس بجد الواحد زعل قوي كل الحقد و الغل ده عند الإخوة السودانيين مننا ليه طيب يعني قلنا شمال أفريقيا و كمان السودان
هي مصر بقيت ملطشة كده للكل
حسبنا الله و نعم الوكيل
و بما إن مصر ملطشة مش صعب يعني نسمع خبر تعذيب مصريين في الكويت أنا معرفش التفاصيل بس أرجع و أقول لو الناس دي عملت حاجة تتعاقب قانونيا حتي لو إعدام بس مش تتعذب و بردوا أرجع و أقول ما هو ده بيحصل عندنا مننا فينا مش حرام يحصل من الغرب سبحان الله قريبة قوي من العرب
أخيرا
الجو حر قويييييييييييييييييييييييييييييييييييييييييي
و تصبحوا علي خير

السلام عليكم و رحمة الله و بركاته
منذ كتابة البوست اللي فات وأنا نفسي أكتب قوي مش عارف ليه
اولا شكل البلوج بتاعي عاجبني قوي و بحبه و كان نفسي أقول كده
ثانيا كنت عاوز أقولكم علي اللي حصل معايا في الدورة و المقابلة
ثالثا خروجي مرة تانية مع صاحبي بتاع البوست السابق
رابعا أصدقائي الجدد
خامسا قضية تعذيب طفل المنصورة و برودي
سادسا بلطجي منطقتنا
سابعا روح التفاؤل بداخلي

.

.
أولا شكل البلوج بتاعي بحس فيه بسعادة و دفء الحمد لله
الدورة و المقابلة
بعيد عنكم المنحوس منحوس رحت لاقيت اللي معايا في الدورة من شركتي بس يعني مفيهاس و لا مزز و لا حتي ناس جديدة اتعرف عليها و كان المحاضر علي قده كمان و كنت كرهت الدورة دي كمان علشان عرفت إنها نص كم و ناس تانية في الشركة بتروح الدورات الأحسن
في أيام الدورة دي كان في موعد المقابلة علشان الشغل الجديد بعد جري و تنطيط الحمد لله وصلت للميعاد و المكان بالثانية و كنت رحت بالبدلة طبعا و كنت حضرت الأول الدورة فكانت الناس فاهمة تقريبا أنا رايح فين بس عملت عبيط
رحت بنت زي القمر عملت معايا المقابلة و مش عاوز أقولكم علي أسمها أسمها لوحده حكاية
بس هي اللي كانت كلمتني في التليفون قعدت تكلمني أنجليزي بصوت مش ظاهر أصلا و طبعا أنا كنت بفهم اللي بأسمعه بس مش بفهم اللي مش بسمعه المهم قعدت اهبل معها في الكلام و تأكدت إني مش هأقبل في الشغل ده بس لاقيتها قالت لي هأبعت الورق بتاعك للشركة اللي عندها الوظيفة و هم هيكلموك يحددوا ميعاد و لما يكلموك أتصل قلنا أدعو أنهم يتصلوا بقة
و انا في الدورة عرفت إن رئيس القطاع بتاعنا طايح في الناس كلها ولما رحت يوم الخميس كنت مرعوب الحقيقة و بيقول للناس كل واحد يكتب اللي بيعمله يوميا و إحنا طبعا مفيش شغل كتير و هو عارف كده بس مش عارف أية اللي هيحصل ربنا يستر
عديت الدورة الحمد لله

__________________________________________________
خرجت تاني مع صاحبي و هو عنده الجديد دايما يعني عنده منحة نصف مجانية بيحاول ياخدها مجانية كلها و بيعمل إختبارات و راح تدريب في كم شركة كده و جاب لي شوية كتب علي الكمبيوتر في الكيمياء مش ممكن الحقيقة و كمان أسعد خبر أنه قابل خطيبته الأولي تاني يوم كنت معه و هو إن شاء الله إن شاء الله هيرجع الموضوع مرة تانية

__________________________________________________
أصدقائ الجدد انا بشكرهم جدا جدا جدا بلاش أسامي بس بجد كلامي معهم بيسعدني فوق ما هم متصورين

__________________________________________________
للأسف شفت فيديو بتاع طفل المنصورة اللي أتعذب
بجد بانصح أي حد ميشفوش لو لسه مشفهوش خصوصا الأنسات
مش عارف أقول أية و لا أية

اللي يضايقك أنك تحس إن الناس اللي نشرت الكليب ده بتاجر به مش عارف ليه
حسبنا الله و نعم الوكيل ميتقلش غير كده تعرفوا نفرض يعني الولد ده ربنا يرحمه كان زي التوربيني كده حرام اللي حصل معه ده
ربنا ينتقم من اللي عمل كده و اللي بيساعد علي كده و اللي بيتستر علي كده و ينتقم منا إحنا كمان علي سكوتنا
حسبنا الله و نعم الوكيل

نفسي اعمل حاجة و أنا باقول كده مش عاوز ادعي بس يارب ساعدني

__________________________________________________
بلطجي منطقتنا ده بقة حكاية إحنا منطقتنا فيها بلطجية كتير مش بالصورة اللي هتتخيلوها بس بانواع الأخ ده بقة متفهموش بيكون شارب و لا هو متخلف عقليا أصلا المهم مرة لاقيته بيرمي نفسه علي العربيات و هي ماشية تخيلوا بجد شفتها بعيني يعني ممكن يموت و يجيب مصيبة لواحد برئ
و مرة كمان صحيت من النوم علي خناقة في الشارع شارع رئيسي كبير واقف الأخ في النص و مانع العربيات انها تمشي تخيلوا و العربية اللي تعدي يخبط عليها و يبوظها لصحابها تخيلوا و مفيش أي عسكري و لا ظابط و لا أي حاجة و الناس بردوا اللي يعتبروا بلطجية في المنطقة بيتحايلوا عليه علشان يمشي تخيلوا
حسبنا الله و نعم الوكيل

نفسي أعمل حاجة يارب

__________________________________________________
بالرغم من البلاوي دي كلها الحمد لله حاسس بتغيير داخلي يارب يستمر و المنغصات دي كلها متأثرش فيه
و حاسس بفرج ربنا قريب قويييييييييييييييي إن شاء الله
في حاجة كمان أكتشفتها أمبارح بس تأكدت إن ضعفي أمام البنات هو عيبي أنا علشان أنا كمان عادي تلاقيني ممكن أبص علي بنت محترمة و محجبة مش فكرة أنها تكون لابسة مش محترم ده كده تأكد أنه ضعف مني ربنا يهديني

__________________________________________________
و كمان انا حاسس إن البلد دي حالها مش هيتغير غير بثورة زي الثورة الفرنسية
أنا معفن قوي بعد أما شفت كليب الطفل بتاع المنصورة عادي جدا قمت أتغديت و بسمع دلوقتي عمرو دياب و لا كأن حاجة حصلت بالرغم من إني و أنا بأتفرج كرهت نفسي و البلد و الدنيا كلها
أخيرا

__________________________________________________
كل سنة و أنتم جميعا بألف خير و في سعادة و فرح و طاعة دايما
و يارب تكونوا أصدقائي علي طوووووووول و تزيدوا
و اللهم بلغنا رمضان و أرزقنا صيام نهاره و قيام ليله و شفع فينا الصيام و القران و حبيبك المصطفي صلي الله عليه وسلم

لو في جديد هأبقي أضيفه

سلام

السلام عليكم و رحمة الله
شكرا يا رفقتي لو تسمحي لي أقولك كده
علي فكرة بفرح لما حد بيعمل لي تاج بحس إني في دماغ حد
بس الموضوع دع صعب جدا
ياريت بلاش تاجات تاني
بس طبعا شكرا
و ياريت إجابتي تحوذ رضي السادة الزائرين
و لو محذتش عادي يعني
_____________________________________

اسم مدونتك؟
No Fear
لماذا اخترته ..وماهي نيتك من وراء اختياره؟
أنا علاقتي بألأسم ده من زمان قوي كان أخويا أشتري بوستر أسود كده و مكتوب عليه نو فير و لزقته علي دولابي بس و من ساعتها الأسم عجبني قوي بستخدمه في حاجات كتير
هل فكرت في إغلاق مدونتك؟ والسبب؟
ياااه كتير بس في الأول لأنني كنت بأزور ناس كتير في مدونتها الأقي اللي كاتب شعر و اللي كاتب قصص أحسن من نجيب محفوظ و اللي بيحلم حلم كبير و اللي بيكتب في السياسية كأنه مصطفي كامل حسيت إني صغير قوي بالنسبة للناس دي علشان كده فكرت أقفلها بس أنا كنت متعود أصلا أكتب حاجات ظي مذكرات أو يوميات قلت خلاص بدل ما أكتبها علي الورق أكتبها علي النت بالرغم من شعور إنها تافهة بس أهوة علي أمل الحاجة اللي أحبها تبقي تدخل و تقري
صورتك في المدونة ورمزيتها ؟؟
الكابتن الصغير اللي واقف في الشباك مستني فرج ربنا في أي صورة
بحس إن و أنه اللي في الصورة يعني مستنين إي تي فون هوم كده يعني
لماذا دخلت عالم التدوين من الاساس؟
كنت عرفت هذا العالم من الكاتب الكبير محمد حسنين هيكل لما جه في الجزيرة و بعدين عرفت تفاصيله من رنا و هي كانت قالت لي عليه من غير ما أسألها علي فكرة توارد أفكار يعني
جمله قيلت لك فى وصف مدونتك؟
و الله كتير أنا أصلا لما بالأقي حد معلق عندي أصلا بأطير من الفرح
التعليقات بالنسبه لك ,اهميتها؟
أهم من كلامي شخصيا علي فكرة ساعات في ناس بتعلق عندي و تقول كلام عن الموضوع اللي بتكلم فيه أحسن مني
تحس كده بروح تتكلم و ناس ترد عليك

احلى بوست كتبته ...ضع اللينك , ثم اذكر لماذا؟
كلهم أبنائي
حتي البوستات اللي شايف أنها سيئة أو هي فعلا سيئة بردوا بحبها علشان كان لها تأثير في بعد كده و الحمد لله حالتي كويسة و أنا بأجاوب علي التاج ده
و يارب تكون كويسة و في طاعة دايما
أفضل بوست قرأته؟ وضع لينكه؟
و الله كتير قوي
أنا مش عاوز أقول أسامي بس بجد مدونات مانو و سمرا و ساسو تحس أنهم عاليين قوي خصوصا مانو خسارة في صيدلة الحقيقة دي سياسة و اقتصاد خسرتها جامد
أفضل مدونة قرأتها؟
كتيرررررررر
حد قل أدبه فى التعليق إيه رد فعلك؟
الحمد لله لا و يارب دايما
أسوأ مدونة؟
سمعت عن مدونات كتير سيئة بس الحمد لله لم أقع في أي منها
أسوأ بوست أسوأ مدون
الحمد لله مشفتيش و بعدين لو شفت هأغتاب الرجل يعني
هيحصل ايه لإيميلك لما تموت ؟؟
أسألو الهوتميل و الجيميل و ياهوو
اديت الباسوورد لحد قبل كده؟
عمري
في هذه اللحظة حسيت إني جاوبت التاج ده قبل كده بس هأكمل بردوا
كانت إيه طبيعة علاقتك بيه؟
قلنا مفيش
اسمك؟
محمد
المشهور بيه وسط اصحابك؟
أسم العيلة
شخصيتك نوعها إيه؟
تشريد بتشريد
جبان
قليل الأدب مع نفسي
حالم كبير
عمل مفيش
أفكار مؤدبة
أفكار قذرة
السفر بالنسبة لك؟
حلم عمري
وقت فراغك بتعمل فيه إيه؟
نوم
كمبيوتر
رايح جاي في الشقة
المود بتاعك؟
عتيق تحس إني من أيام الهكسوس
الأكلة المفضلة؟
كتير
بس البفتيك أهم
الصفات اللي أخدتها من بابا؟
بعيد عنكم السلبية
الصفات التي أخدتها من ماما ؟
معتقدش في
اكتر ست حاجات بكرهها؟
الخيانة

الظلم
الفقر
بعدي و بعد الناس عن ربنا
التكبر
ضعفي
البنات الجميلة لحد ما أتجوز
الأهلي
اكتر ست حاجات بحبها؟
هي مش حاجات بس بحبهم
ربنا
سيدنا محمد صلي الله عليه و سلم
الإسلام
:
:
:
النجاح
الطموح
الإخلاص
العلاقات الإنسانية الدافئة اللي بأشوفها و نفسي أعيشها
:
:
:
:
الزمالك
عمرو دياب
الشغل بالنسبة لك؟
أهم شئ في الدنيا بس لو شغل حقيقي يارب أجده
الانترنت بالنسبه لك؟
الصداقة حاليا

فيضان معلومات

السلام عليكم و رحمة الله و بركاته

أزيكم يا شباب

أخباركم أية

يارب تكونوا دايما في سعادة و فرح و خير من ربنا

.

بسمع حاليا أغنية كان صديقي لكاظم

سبب سماعي لهذه الأغنية هي خروجي أمبارح مع واحد صاحبي من فترة لم نتقابل المهم الواد ده بقة دايما لما بخرج معه بحس إني فعلا حياتي مفيهاش أي حركة بيقعد يحكي لي حاجات غريبة سافر مرة عمل مقابلة في دبي و رجع في نفس اليوم و أتعرف علي ناس مستواها غريب و عمل حاجات كتير معهم و أتكلموا في حاجات كتير كل ده ممكن يكون في فترة قليلة جدا

صاحبي ده مجنون شوية بجد دماغه فيها حاجة و بيعيش معايا دايما في دور الحويط

المهم الواد ده كان خاطب أيام الكلية و أول أما أتخرجنا فشكل الخطوبة علي طول و بعدين خطب تاني و فشكل من قريب أنا بقة سبحان الله كنت بسمع الأغنية دي أيام خطوبته الأولي و أحس إني هأكون زي كاظم كده بينه و بين خطيبته الأولي مش عارف ليه

و فعلا سبحان الله عمال أقنع فيه من فترة أنه يرجع للبنت الأولي بالرغم من إني معرفهاش بس مرتاح لها و نفسي بجد يرجع لها تاني

الواد صاحبي ده عنده سبحان الله قبول رهيب ساعات بأحسد للأسف عليه بس بأحاول أسيطر علي نفسي و أدعي له ربنا يوفقه و يحميه من حسدي و يكرمني زيه مع أنه بجد مجنون يعني

يبقي كده خلصنا نقطة الواد صاحبي اللي بيحسسيني إن حياتي واقفة و فعلا ساعات مش بحب أقابله علشان كده

و نقطة خطيبته

.

.

شغلت شريط عمرو دياب الجديد

ضحكت

كمان نقطة أمبارح مع صاحبي عرض علي ندخل سينما قلتله لا علشان بحس إن الأفلام العربي دي بأتسرق لما بدخل فيلم عربي و قلتله أعفن فيلم أجنبي تلاقي في حاجات أحسن من أي فيلم عربي

و سبحان الله النهاردة أتفرجت علي فيلم الطفل لبروس و يلز و شكل الفيلم عبيط جدا و من إنتاج والت ديزني يعني مش عبقري بس الفيلم كان رهيب بجد عبقري جدا جدا جدا

أنا عاوز أقولكم إني بأشرب شيشة تفاح ماشي علشان محدش يتفاجأ

شفت أهي ضحكت تاني يعني اللي شفته مكنش خيال

جامد يا عموووور

.

.

النهاردة كان أول يوم في الدورة اللي قلتلكم عليها و كنت مستني أتعرف علي ناس جديدة من شركات مختلفة

قوم أية

طلع إن اللي الدورة دي من شركتنا بس و إحنا أربعة و طبعا عارف الأربعة و كمان طلع المركز أي كلام و المحاضر شكله مش قوي

الفقر فقر يا جدعان مش قلتلكم

و أكتشفت إن حتي الدورات دي الناس اللي أي كلام تروح دورات في أماكن أي كلام زي أخوكم كده

و الناس اللي متظبطه بتروح مراكز محترمة

حتي الدورات يا جدعان

.

.

يوم الخميس لاقيت واحدة بتكلمني في التليفون

عندي مقابلة يوم الأتنين علشان شغل جديد

تفتكروا يكون فرج ربنا و أقبل في الشغل ده و أنطلق و لا أفشل

و لو نجحت شايل هم زي ما قلتلكم علي الشغل السابق هم أسيب الشغل اللي انا فيه و مستقر بس مش حاسس إنه بيفيدني و أجرب حاجة تانية و ممكن أتسوح مش عارف

أولا أنا لسه مقبلتيش و شايل الهم

شيل الهم ده كيف عندي تقريبا

أة في حاجة جامدة جدا حصلت

طبعا البنت اللي كلمتني كلمتني في الشغل كنت متوتر طبعا علشان محدش من الشغل يسمع و كمان علشان أنا أصلا بتوتر لما بكلم بنات و البنت بنت ال و لا بلاش بتكلمني أنجليزي أنا فاهم بس مش عارف أرد بأية يعني تقولي مرسي أقولها شكرا تقلي صباح الخير أقولها و عليكم السلام وكده يعني

و قعدت تشرح لي العنوان كأني كفيف هو كويس و عمكم مش بيرد عليها خالص و بعدين في الأخر بتقولي هو أنا ليه حاسه أنك مش مستوعب اللي بأقوله

يعني كانت خلاص هتقولي أنت متخلف يابني

المهم أدعو لي ربنا يوفقني ربنا يكرمكم

أخوكم مذنوق

.

.

الأهلي كسب السوبر للأسف

و عمل حركة ندالة و ضاف أسم شريف أشرف في القايمة بتاعته و أتحاد الكورة وافق علي طول

و كمان أتحاد الكورة وقف وسام العابدي

مش فاهم هو الزمالك ده أسمه زمالك تل أبيب و أنا مش واخد بالي

مش بأقول إن الزمالك نادي عبقري و لا علي حق دايما بس مش كده أرحمونا يعني

.

.

أنا عاوز أعتذر لرنا هي نفسها هتتفاجأ بأعتذر ليه بس أنا حاسس إني مقصر معها في أية مش عارف

بس أنا أسف يا روني و يارب متكونيش زعلانة مني أنت أصلا مش زعلانة عارف بس حاسس إني مقصر معاكي

.

.

أية كمان

مش عارف

.

عاوز أتكلم عن الأخ اللي أسمه خسارة فيه اللي أتنصر و رجع و محسسيني أنه راكب قطار رايح جاي

.

النهاردة كمان في بنت ماتت ربنا يرحمها بسبب الختان و طبعا الدنيا هأتقوم و مش هتقعد تاني و اللي بيحب الهيصة هيلاقي حاجة يهيص فيها

.

كفاية عليكم كده

تصبحوا علي خير

.

تعديل بعدها بكم دقيقة

مش عارف ليه بأقولكم كده

في مذيع في البي بي سي العربية بيجي بالليل أسمه مصطفي الزياتي صوته مش ممكن بحبه جدا

طلبين

ياريت حد يشرح لي إزاي أضيف أغنية علي البلوج بتاعي بطريقة زي اللي البنت اللي شرحت لي العنوان

و ياريت كمان حد يقولي علي أسم موقع أنزل من موسيقي زي اللي بتجي في العالم هذه اللحظة علي قناة العربية أو البرومات بتاعت قناة دبي وان

السلام عليكم و رحمه الله و بركاته

أزيكم يا شباب

أنا أسف لكم جميعا علي إن معظم أو تقريبا كل البوستات اللي بعملها كئيبة بس بجد كل ده بأحس به و بأرتاح شوية لما بأكتبه و حد يرد علي أو بنسي و أفكر في الرد

مش عارف من فترة طويلة حاسس إنه خلاص الفرحة الكبيرة جاية عارفين أنتم مش عارف بيقولوا العقدة أو ذروة العقدة الدرامية في الأفلام حاسس إني وصلت عندها و خلاص علي بعد خطوة من لحظة التحول للسعادة الطاغية و فرج ربنا قريييييييييب جدا

بس اللي مخوفني إني حاسس بكده من زمان حاسس إني ممكن أفتح باب أروح مكان انام و أصحي ألأقي الدنيا أو حياتي أتغيرت بس للأسف مفيش حاجة عاوزة تيجي لو في حد عنده تفسير ياريت يقول

إحساس و خلاص و لا ممكن يحصل

قولوا يارب

حول العالم

هنري ميشيل

رود كرول

الزمالك

للأسف مش عارف أتكلم

.

مبروك السوبر للأهلي من دلوقتي

.

أنا رايح دورة تدريبية من يوم السبت للأربعاء

.

الشرطة و حكايتها الكتير

.

قاعد لوحدي النهاردة و بكرة و ممكن بعده

وضبطت الأوضة بتاعتي و عامل أحلي جو و معايا النسكافيه التمام و الملفات المختفية للأسف

.

للأسف مفيش سهرات جميلة عارفها

.

نفسي أخرج يا جدعان خروجة جديدة

.

قالو يا ما إن القمر عالي و بعيد و الملايكة مستحيل تلمسها أيد

و أنا الليلة دي كله ده في أيديا يمكن في الدنيا دي أكون أنا الوحيد

.

الموبيل بتاعي الأستريك بتاعه للأسف من البنطلون الجينز بدأ يخرب ربنا يستر علشان معيطش

.

فتاة العرب المثالية زي القمر الحقيقة ربنا يرزقنا بس تكون دماغها حلوة

:D

من كم يوم كنت في الشغل و شغلت أغنية لكاظم الساهر علي الموبيل بتقول أية

عيناها بيتي و سريري و وسادة رأسي أضلعها تمحو كل هموم حياتي لو مس جبيني أصبعها

سألت واحد معايا هو في كده بصرف النظر عن أنه كان بيغني لبغداد الجريحة

قالي لا مفيش كده كاظم ده كداب يا زميل

و بعدين قالي حاجة غريبة قالي حتي لو موجود هيروح بعد الجواز

ليه بيروح بعد الجواز ده موضوع كبير جدا عارف

بس مبدئيا مش هأشغل نفسي به علشان هو مش موجود قبل الجواز عندي أصلا

.

تصبحوا علي خير

.

أرجو من كل من ضافني عنده يشيل البلوك اللي حاطه علي علشان ساعات كتير بأكون عاوز أتكلم مع حد و مش بلاقي ماشي علشان منزعلش مع بعضينا

.

حصلت حاجة غريبة قوي بتحصلي كتير

و أنا بأراجع البوست ده قبل أما أنشره حسيت إني كتبته قبل كده

أية اللحظة قربت قوي كده

في حد علق عندي و أنا بأحدث في البوست

السلام عليكم
أزيكم يا أصدقائي
من كم يوم كده نفسي أعمل بوست جديد بس مش عارف ليه الأفكار بتروح مني نفسي أعيشكم معايا و أعيش معاكم يعني مثلا أمبارح قلت لبعض الناس عن فيلم الراقص مع الذئاب علشان احس إن في حد مشاركني حاجة بعملها
الحقيقة في الأول كنت بعمل الموضوع ده مع روني علي فكرة روني دي حاسسيتني إنه ممكن يكون فعلا في صداقة في الحياة مشكلتها معايا أنها بنت مش باقدر أخد راحتي معها بردوا لازم أكون مؤدب يعني علشان هي أكيد هتسألني أقصد أية
و بعدين أنتم يا أصدقائي المدونين نفسي أشاركم معايا في كل حاجة في حياتي
ممكن يكون ده غلط علشان أحنا بنرسم للناس اللي بنتكلم معهم علي النت صورة خيالية أقرب للملائكة بس اهوة متنفس يعني مش معقول يبقي واقع مؤلم و نت مؤلم كمان
مشكلة النت أنه مفيهوش أحاسيس جامد حتي مفيهوش صوت ساعات كتير بيجي في دماغي إني أكتب رقم الموبيل بتاعي علشان حد يكلمني منكم بس الحمد لله مبيحصلش
يوم الأربعاء قبل اللي فات اللي فات تقريبا كان في مقالة في الأهرام الفكر الديني وصايا الأمام أبو حنيفة للشباب ملخص الكلام أنه بينصح الشباب بالعلم أولا و بعد كده المال و بعد كده الزواج و مينفعش حاجة قبل حاجة و لا حاجة مع حاجة
بصراحة الكلام ده يريحني قوي نظريا بس المشكلة في عمليا أنا نفسي أستقل في حياتي و أرتبط جدا نفسي أحب بجد و في نفس الوقت أكمل دراسة و لسه لم أبني نفسي ماديا يعني عكس كل اللي الإمام أبو حنيفة قاله خالص

مش عارف مشكلتي إني في حاجات مقتنع بها بس مش بأقدر أنفذها يعني مثلا مقتنع تمام أنه غلط ندور علي الحب بس بأدور
مقتنع إن الموضوع ده نصيب بس بردوا بأفكر في ناس كتير
مش عارف أعمل أية زهقتكم أنا بالموضوع ده عارف بس هي دي مشكلتي
عارفين الواحد بيمشي في الشارع يشوف بنات قمرات بس المشكلة نفسي واحد أحبها يعني من غير قلة أدب الواحد ممكن يجيب واحدة بفلوس علشان يعمل حاجة غلط بس مش هتكون السعادة اللي بأدور عليها مش عارف أنتم فاهمين قصدي و لا لا

نفسي في بيت دافئ أرجع أنام تحت رجليها و أكل و أشرب معها و نتفرج علي التلفزيون مع بعض و نتخانق نتفرج علي الماتش و لا علي الفيلم
مش عارف ممكن الحلم ده يحصل ولا لا
مش مشكلة المهم إني بأحلم
في موضوع كمان الحمد لله بعيد عن أفكاري تماما بس بما إن في حاجات كتير مكنتش متخيل نفسي ممكن أعملها و عملتها مش بعيد اعمل الموضوع ده بس يارب إلا ده
موضوع الإنتحار للأسف في موضوع البنتين و أبوهم اللي انتحروا بسبب الفقر
هو طبعا بلا شك انه غلط و حرام
و مدام حرام يبقي أكيد في منعه الخير و المصلحة
بس في حاجة أفتقدنا للأمان في حياتنا مشكلة صعبة جدا هتخلق فوضي كبيرة جدا
قال رسول الله صلي الله عليه وسلم
"من أصبح آمناً في سربه، معافىً في بدنه، عنده قوت يومه.. فكأنما حيزت له الدنيا بحذافيرها" (رواه الترمذي).
أول حاجة أمنا في سربه
ربنا يستر
مش عارف يارب موصلش للمرحلة دي و لا أي حد
بس يارب لو كانت الحياة خيرا لي فأحيني و لو كانت الوفاة خيرا لي فتوفني
و يارب أجعل الخير لي في الوفاة
مش ضعف و لا عن عدم ثقة بالله بس المشكلة إني حاسس إنه مش عالمي و لا وقتي خالص
حاسس إني من كوكب تاني بجد
كل حاجة بفكر فيها لوحدي مش ممكن يكون في حد في الدنيا دي كلها عنده أفكاري و لا أحلامي علي فكرة مش بأقول إن عبقري و لا مفيش حد زي لا أقصد أهتمامتي غير أهتمامات الناس حتي الناس اللي أفكارها كلها خير مش زيي خالص حاسس إني لوحدي جدا
ده غير الصفات السيئة اللي فيا ده موضوع تاني بس لما باكون في حالة كويسة باكون لوحدي بردوا مش عارف ليه
معلش هأحرمكم من حول العالم البوست ده علشان البوست طويل و دمه بايخ
سلام

السلام عليكم و رحمة الله و بركاته

مش عارف ليه يا أصدقائي أنا متفائل هذه الأيام الحمد لله طبعا بالرغم من إن مفيش حاجة أتغيرت عن الأول بل علي العكس الذنوب في زيادة حتي في الأيام الجميلة من الشهر الحرم رجب اللي الذنوب كبيرة فيه للأسف

مش عارف ليه

يمكن يأس يمكن ثقة بالله و إيمان كبير يمكن ده من ربنا و بيمهلني و بعدين هيأخذني أخذ عزيز مقتدر مش عارف

خايف و في نفس الوقت فرحان و قلقان خليط غريب مش عارف سببه أية؟

.

أنا علي فكرة هأقدم في الشغل التاني يوم الأحد إن شاء الله

.

مخنوق قوي من الشغل اللي أنا فيه المجال و الناس بالرغم من إني الحمد لله عملت علاقات جامدة بس أنا مش حابب أكون زي الناس اللي المفروض هأكون زيهم في المستقبل و في نفس الوقت مش عاوز أكون بأتمرد علي نعمة ربنا اللي أنعمها علي

.

في واحد كان متعين معايا في الشغل في الأول كان في بينا منافسة بس بعدين علاقتنا ببعض أتحسنت و كان في منافسة بردوا بس بتعاون للأسف رجع عمل معايا كم حاجة كده مش حلوة و بينت لي إنه قلبه مش أبيض من ناحيتي هو رجع و أتأسف لي و مشكلتي إني بصراحة مش هأعرف أرجعه في قلبي زي الأول مش عارف أعمل أية مش بحب أتعامل مع حد قلبي مش صافي من ناحيته بحس إني بأضحك عليه ماليش دعوة به بس المشكلة إن وشه في وشي بجد طول اليوم

.

في حلم عندي نفسي أحققه نفسي أهاجر مش بسبب أي حاجة نفسي في بداية جديدة مالهاش ماضي هتقولولي مينفعش يكون مفيش ماضي لا إن شاء الله ينفع نفسي في السفر أدعو لي أتوفق في فرصة سفر متقلقوش أنتم كده كده مش بتشفوني و أكيد البلد اللي هأروحها هيكون فيها نت يعني مش هتتحرموا من عبقريتي

.

أة أفتكرت فكرة كده كانت بتخطر علي بالي كنت عاوز أكتب لكم عنها من كم يوم لما شفت فيلم النت لساندرا بلوك

أنا كنت من طلبة جامعة حلوان العريقة المهم كنت رايح جاي في المترو و كنت خلاص أتظبطت بدون تفكير أول أما بنزل الصبح علي اللي هأعمله يعني أمشي كم خطوة في الإتجاه ده و بعدين كده في أتجاه المترو و بعدين من جديد فقديم كنت بتخيل أنهم في يوم يروحوا مغيرين أتجاهات المترو يعني الخط اللي رايح حلوان يكون رايح المرج كده يعني و أنا أروح عامل نفس الخطوات و الطريقة اللي بمشي بيها لحد أما أوصل لشقة تانية و الغريب كمان خزهبلات و الله إن مفتاح الشقة يفتح الشقة التانية اللي هأوصل لها و الناس اللي هأدخل شقتهم يتقبلوني يا خرابي علي الهبل و أبدأ حياة جديدة

.

كفاية عليكم كده النهاردة

حول العالم

متفائل قوي بالزمالك بالرغم مع أنه لسه محتوي علي كم لاعب أكتع و معندهمش دم وبيبلطجوا كمان بس متفائل

.

الليلة دي ضحكت خليك معايا عمرو دياب بس كده

.

فيلم كاست أواي لتو هانكس أتفرجت عليه أمبارح تاني فيلم رهيييييييييييييييب

.

ظبطت الكمبيوتر قولوا يارب ميعلنيش تاني

.

الجو أنتم عارفين

.

ساسو حارقة دمي و مش عاوزة تعمل بوست جديد

.

أة أفتكرت شئ مهم جدا كنت بأتفرج علي ماتش للسعودية في كأس أسيا الأقي المعلق يقول خبر رهيب بصراحة إن المنتخب السعودي مانع الجزيرة رياضة من متابعة أخباره و تقولولي وحدة عربية

كفاية كده

.

لو أفتكرت حاجة تانية هأبقي أقول لكم

لو في حد بيكون زهقان و عاوز يعمل شات

newmido26@hotmail.com

السلام عليكم

أزيكم يا اصدقائي و حشتوني جدا

طبعا مرحتيش أي رحلة و لا نيلة كله كلام بس

المهم الحمد لله الحوافز جت النهاردة و مش عارف أعمل بيهم أية هم كتيييييير قوي أروح الرحلة و لا أشتري هدوم و لا أشيلهم لتقديم التمهيدي و لا أشتري رامة جديدة و لا سماعات جديدة و لا أية و أية و كمان اللي هيفيض هأعمل به أية

المهم

في حاجات كتير عاوز أقولكم عليهامش عارف أقول أية و لا أية

أولا الحمد لله أنا نوعا ما سعييييييييييييييييد و متفائل اليومين دول مش عارف من أية من عند ربنا كده بالرغم من إن الظروف هي هي أو ممكن أسوأ بس الحمد لله الواحد من كتر ما كان يتخيل إن نهاية العالم هتحصل لو أية اللي حصل و بعد اللي يحصل يحصل الحياة تمشي عادي جدا

المهم في واحدة كانت معايا في الكلية قالت لي علي شغل مطلوب عندها مش عارف أقدم و لا لا

أنا مخنوق من الشغل اللي أنا فيه و من الناس و من المجال بس الواحد أسمه بيشتغل شغل مستقر مش عارف أعمل أية مش بأحب أكون في وضع أختيار أحب أكون مسير كده

أمي نداء محبة المهم مش عاوزاني أقدم في التمهيدي مش عارف ليه حاسس من كلامها إني لما هأقدم مش هأقبل أصلا و علشان تكونوا معايا في الصورة هتكون أيام مش حلوة لو مقبلتيش في التمهيدي

أنتم عارفين إني نفسي أتجوز فكرت في واحدة قريبتنا كانوا بيتحايلوا علي من و أنا في الكلية علشان أتقدم لها بس أنا مكنتش مرتاح لها و لعاليتها بس لما فكرت عقليا و نويت الأقيها أية طبعا أتخطبت في نفس اليوم اللي أخدت فيه القرار المهم أتقابلنا في فرح عارفين أنتم الأفلام و الغيظ و الله الواحد لما يعيش ياما يشوف و أنا المفروض بتغاظ اللي مضايقني إن بابا زعل من العايلة دي علشان معاملتهم تقريبا أتغيرت معه من أم البنت دي بس أبوها هو اللي لسه كويس معايا يعني و بيحبني أنا فرحان ربكم و الحق إن الموضوع مكملش أنا لسه عيل أساسا و ربنا يكرمكم لو قلتلكم إني هأخطب و لا حاجة حد يقلي و يفكرني بالكلمة دي أنت عيل

بابا عمال يقلي أتجوز أتجوز يعني أتجوز و هو اللي يصرف علي مش فاهم أنا أروح أقول لأبو اللي هأتقدم لها أنا عاوز أتجوز بنتك و أبويا اللي هيجيب كل حاجة مش فاهم أنا صحيح معنديش دم

الحمد لله الناس في الشغل بأعمل معهم كل خير و الله يعني المفروض يخلوا عندهم دم و مش عاوزين خزوقة

أنا عملت حاجة كده وطنية دعوة لتغيير النفس يمكن البلد عبارة عن أفراد و أنا في فترة إختبار دلوقتي مش عارف أكمل و لا لا انا بأدي نفسي فترة أختبار و الحاجة اللي بعملها ثلاثة شهور هأبقي أقول لكم عليها بعد النتيجة إن شاء الله

نتيجة الثانوية للأسف بالرغم من إن أبن عمتي جاب 92 مش مرحلة أولي مش فاهم أنا حاجة تحرق الدم

الزمالك في فترة إزدهار إن شاء الله ربنا يكرم مشو محمود محمود و القباني عقبال باقي الكتع اللي عندنا

ربنا يخلي هنري ميشيل

شريط عمرو دياب بالرغم من أنه مش في المستوي اللي كنت أتمني بس فيه كم أغنية روعة

عاوز أخرج مع ناس كتير قوي مش عارف اليومين اللي جايين دول هأخرج مع حد و لا مش هأخرج أصلا

أشتريت شيكولاته

الأستاذة ساسو دي مش عارف جابت أغنية بنام اللي حاطها علي البلوج بتاعها دي منين

نفسي أجتهد يا جدعان كسووووووووووووووووووووول جدا مش عارف أعمل أية

تخيلوا ياجدعان لاقيت واحد في شركة خدمات بيجي الشركة عندنا بينظف تخيلوا بكالوريوس زراعة

و كمان عندنا عمال بكالوريوسات كليات و معاهد و تلاقي رئيسهم معه أبتدائية و بيشتم فيهم

نفسي أنطلق يا جدعان

و نفسي أتجوز

و نفسي أكون كويس

و نفسي الزمالك ياخد الدوري و الأهلي ينهار بقة

بس بجد نفسي أرجع تاني أواظب علي الصلاة و الصوم و قراءة القرأن

للأسف لم أصم اليومين اللي فاتوا دول في رجب

يارب أهديني

يارب

.................

الحمد لله

الحمد لله

الحمد لله

الحمد لله

الحمد لله

الحمد لله

الحمد لله

قال تعالي

أنا عند ظن عبدي بي

فظنوا بالله خيرا تجدوه إن شاء الله

تصحيح الحديث أضافته

Bella

حسن الظن بالله

عن أبي هريرة رضي الله عنه أن رسول الله – صلى الله عليه وسلم

قال

يقول الله تعالى

أنا عند حسن ظن عبدي بي

رواه بخارى ومسلم

السلام عليكم

أزيكم يا أصدقائي و يا أعز الناس بجد و الله

أنا عاوز أستشيركم في حاجة أنا عاوز أروح مكان رحلة يعني يوم أو أتنين بس أرتاح فيها و أجدد نشاطي علشان أنا لسه مخنوق و خايف أرجع تاني للحالة اللي كنت عليها المكان ده يكون مش محتاج ناس كتير معايا أو الأحسن أروحه لوحدي أستجم كده بس يوم أو أتنين بالكتير علشان أنا مش عاوز أخد أجازة من الشغل

و طبعا مش غالي قوي يعني مش لازم رحلة أي حاجة أعملها تفوقني كده

أنا بأفكر من فترة مش عارف الأقي حاجة و الروتين ده بعيد عنكم يعني حاجة تشل السليم فما بالكم بي أنا

سلام

السلام عليكم
معلش هي حالة من الطفح البلوجري جت علي بس كان لازم أكتب البوست ده علشان البوست اللي فات يتنسي هتقولولي ما تشيله هأقولكم لأ علشان كنت شلت البوستات القديمة مرة في واحدة قالت لي ليه شلتهم دول كانوا بيمثلوا عنك و عن حاجات حسيت بها و أقتنعت بكلامها جدا
تاني حاجة أنا أسف لبيلا و البنت الشلبية و مانو و سمرا علشان هم اللي قروا البوست اللي فات يعني أتنين أول مرة يدخلوا عندي و أتنين بأحب و أتمني يشوفوني في حالة كويسة محترمة بس للأسف
مش عارف خطر علي بالي حد خنيق كان بيكتب في جرنال خنيق بيكتب عامود خنيق أسمه تلكسات يعني أيام التخلف الأزلي المهم أنتم عارفين للناس القديمة أنا كنت بأحب بأكتب بالطريقة دي و كنت بأسميها عناوين الأخبار
المهم في حاجة جميلة النهاردة حصلت الجماعة العصبجية اللي قدمنا النهاردة واحد منهم أتخانق مع واحد الواحد ده مسكه أكله علقة راح الواد ده جري علي قرايبه و مسكوا المسكين التاني بصرف النظر عن كونه غلطان و لا لا و دخلوه عندهم و ضربوه فعلا مصر تحولت لغابة بشعة القوي فيها هو اللي يعرف يعيش
اللي يخنق إن الناس الرجالة اللي في الشارع اللي عامله نفسها كبرات المنطقة و طبعا أهم صفة بيهرولوا علي الصلاة في وقتها كأنهم مش شايفين حاجة محدش كلف نفسه و اتصل بالمطافي حتي
مش عارف الحل أية
كمان الأخ العزيز بابا النهاردة كان المفروض يروح مشوار النهاردة قلتله خليك و أروح أنا علشان هو تعبان أي خدمة أهوة قالي روح للناس أعمل كذا و كذا و في حاجة لو قالولك عليها أعملها و لو لا خلاص بطريقة السيكوسيكو
طيب يعني أنا اللي عرضت عليك علشان أنت تعبان كبرني و فهمني الموضوع التافهة ده علشان يعني مبنش كوز درة قدام الناس اللي أنا رايح أمثلك عنهم
الغريب إن الناس دي قالت لي علي الموضوع التافهة و الغريب أتضح إن البيت كله هنا عارف الموضوع يعني مش سر أصلا
يارب
في طريقي لهذا المشوار عديت علي مكانين غاليين قوي علي قلبي مكان شغلي السابق الله يحرقه بجاز وسخ و كمان علي جامعة القاهرة مكان التمهيدي الفاشل الله هي كمان
و كنت هأعيط خلاص الحمد لله بس شدني حوار في الكنبة الخلفية لي كان واحد و مراته مطلقين تقريبا و كان الرجل العيل كاتب ورق علي طليقته و كان بيساومها علي تنازل عن أبنها
بس الموضعات خلصت
نرجع لعناوين الأخبار
الأهلي ده مش فاهم هيخسر أمتي
الزمالك بقة محترم قوي الحمد لله و ياريت فعلا منلعبش السوبر
كفاية عاملة حركة خليك بالبيت
مش فاهم يعني إحنا شعب بنفهم

قوي العصيان المدني المسالم ده للناس اللي بتفهم مش لينا و لا مؤاخذه مع كل الأحترام لكفاية لأحسن يرفعوا علي قضية
في حركة خزعبيلة عملتها محدش يعرفها غير روني لما أختفي هي هتقولكم عليها
مش عارف ليه بترن في ودني من شوية كلمة الليمبي فشل يا جدعان مش عارف
حد عارف
مش عاوز أقولكم أخوكم بقي يشوف أي كوز درة معدي في الشارع زي القمر بصراحة
مش عارف روحي كوميدية قوي بالرغم من السعادة اللي أنا عايش فيها
كفاية عليكم كده علشان مفيش حد هيقرا أصلا
سلام

مش قادر و المصحف
هم بيستحرموا يحسوا إني هأبقي مبسوط مش عارف فيه أية
ماما لازم تخليني أزعق في وشها علشان تسيبني أقسم بالله العظيم أنا مش بأقدر أزعلها بس هي مش بتسيبني غير لما أعمل كده
يارب خدني
أختي متخصصة في نكد وطي الكمبيوتر أطفي الكمبيوتر مش هتقوم من قدام الكمبيوتر
أخويا كأني العبد اللي في البيت
محدش بيفتكر إني رجل معهم غير لما يكونا مش عاوزين هم
بابا كأني لسه في الروضة كأني أصلا مش موجود
مش بيعرف يكلمني غير في الجواز خلاص أتخطبت أنيلك أية مش عارف
و الله العظيم حرام عليهم كده يارب خدني بقة مش قادر كفاية حرام

.........رسالة إليك

كنت سابقا أكتب هذه الرسائل أو أذكرها في خاطري دون التحدث عنها لأحد خوفا من ضياع ثوابها
لكنني هذه المرة أكتبها لكي يشفق علي إحد الصالحين ليدعو لي مخلصا بالهداية
هذه الرسالة إليك يارب
يارب ما بي من ضعف أمام المعاصي لا يعلم سببه غيرك أنت خالق نفسي و خالق هذا الضعف في نفسي أنا عبدك صاحب المعاصي أعلم أنك تغفر الذنوب لكنني كلما تقدم بي العمر زادت ذنوبي و قلت حسناتي فيكون جزاءك شديدا علي و كلما زاد تضييقك علي زادت نفسي بعدا عن الطاعة و قربت من المعصية بل أستلذت بها و تمتعت كنت سابقا أندم علي المعاصي الأن أبحث عن المعصية بعد المعصية و لا أستحي منك و أنت تراني علي المعصية أنت إلي الأن تغرقني في نعمك و لا تحرمني إلا من القليل الذي يؤثر في نفسي جدا و يجعلني أحزن و أندم و أكتئب و أنا أعلم أن في هذا الخير لكن نفسي الضعيفة تحزن و تضعف أمام شيطانها و تقابل الحسنة منك يارب بالمعصية تلو المعصية و كلما عاهدتك يارب علي العبادة بعد المحن تزيل محنتي و تزيد معصيتي لك
يارب أنت الذي خلقت نفسي علي هذا الضعف و لا أعلم أفي هذا الخير أم أنت كتبتني عندك من عبادك العاصين الضالين إن كان هذا فيارب أكتبني من الصالحين و فرج همومي و كروبي و هذه المرة لن أعاهدك علي الطاعة كما سبق لأنني ضعيف لكن أدعوك أن تعينني علي طاعتك
يارب كفاية معاصي كفاية ذنوب كفاية ضعف أريد أن أستحي منك يارب فأعيني علي نفسي و أهدها لي يارب

ربنا يكرمكم أدعو لي ربنا يهديني

السلام عليكم و رحمة الله و بركاته

بالرغم من تناقص أعداد الزائرين و إن مفيش حد بيدخل علي البلوجين التنين لن أيأس و لن أتوقف عن الكتابة

مش هنسلم مش هنبيع مش هنوافق علي التطبيع

ده أولا

ثانيا مش عارف ليه بيكون في دماغي فجأة مليون حاجة في وقت واحد

يعني أمبارح شفت برنامج مع هيكل الحلقة الخاصة التانية

و حسسيني إنه خلاص الدنيا هتنتهي بكلامه عن شركات الأمن و الفظائع اللي بتعملها في العراق و إحنا ساكتين و كلامه عن شركة بلاكوتر و الناس اللي بتشتغل فيها

و ربنا يستر

كل أما بشوف الرجل ده بيتكلم بصراحة بقول إزاي واحد زي الرجل ده مش بناخد رأية و الناس اللي زيه في مشاكلنا و و بعدين الرجل ده بسم الله ماشاء الله بيقرأ أمتي و يحلل أمتي و بيجيب الكتب دي منين ربنا يكتر من أمثاله بالرغم مني إني ساعات مش بفهم اللي بيقوله و ساعات مش بوافق علي حاجات بيقولها

و كمان بستغرب إزاي الرجل ده تعلم في عصر الملكية و بحسد كل اللي أتعلموا في نظام الملكية بجد دول كانوا بيطلعوا عباقرة حتي الجهلة منهم

و كمان أتكلم عن دولة أسمها فرسان مالطا الدولة الوحيدة الغير كاثوليكية اللي معترفة بها هي مصرطبعا الدولة دي تعتبر بقايا الصليبين بجد

مش عارف هو بيعرف الحاجات دي إزاي و منين

و ليه مصر تعمل كده أساسا

مش عارف علي قد ما هو كلامه ممتع بس الحلقة دي كانت سوداوية شوية و الدنيا مش ناقصة الحقيقة

ربنا يستر

________________فاصل_

واحد صاحبي عامل عملية و منتظر نتيجة تحليل يوم الثلاثاء ياريت تدعو له يطلع مفيش حاجة

أدعو لي أنا كمان إني أنساها

أدعو لي بالهداية و السكينة علشان أنا خايف جدا و الغريب إن البلوج بتاعي أسمه لا خوف

___________________

الأهلي أتهزق من برشلونة

راح الزمالك علشان ميزعلناش أتهزق من الدراويش علشان ميكنش الأهلي أحسن منه

__________________عدنا_

دماغي مش مرتبة خالص

مش عارف أفكر و لا أخطط لنفسي

و لو لو حصل و خططت مش بكمل

مش عارف أعمل أية

يارب

أكيد الحل عندك

كان في حاجات تانية في دماغي بس مش مهم

لو أفتكرتها هأرجع أكتبها تاني

سلام

بوست مش كئيب عاطفيا كئيب مصريا

السلام عليكم و رحمة الله و بركاته

بالرغم من خروجي بدرجة كبيرة جدا من الحالة اللي كنت فيها و ممكن أمخمخ في بوست علشان أقولكم إزاي خرجت من الحالة بس للأسف لما خرجت من كأبة العاطفة لاقيت كأبة من نوع أخر

للأسف شفت حلقة من حلقات البرنامج عن التعذيب في مصر سمعت فيه كلمة طلعت من واحد علي قدر متوسط من التعليم و المستوي زي كتير مننا

قال كلمة حسيت إنها بتتردد في دماغي زي الصدي اللي الواحد بيسمعه في الأفلام الرجل قال

مصر مبقتيش بتاعتنا

حسيت بالكلمة دي قوي حسيت إنها طالعة مني شخصيا و حسيت إن نفسي أقولها بصوت عالي

مش عاوز حد يقلي بقي البلد دي لو مهما حصل مش هنسيبها هنفضل وراهم لحد أما يتعدل حالها

أنا شايف خلاص أنه مفيش أمل (أو مفيش أفل علي رأي زعيم الأمة اللمبي مستنين أية من بلد العلماء فيها بتخرج و الناس مشغولة بالرياضة و الحوادث و سيرة الناس أكتر من حال بلدهم و أصًبحت الحوادث الفتاكة زي المياه و الأكل يعني تسعين واحد ماتوا النهاردة اللي من حوادث علشان سرقة و علشان بلطجة و علشان شكلهم معجيش و النهاردة كمان يا عشر بنات بس أغتصبوا و تلات ولاد في سن السابعة هتك عرضهم بس ده أمبارح مش عارف كانوا كم و النتيجة مصمص ياعم شفايفك و أتفرجت علي العاشرة أمبارح شفت مش عارف مين سرق كم و مين حط أية في أية و لا تسعين دقيقة شفت جابوا أبو الواد اللي و لا البيت بيتك ده بقة بيجيب حاجات جامدة و عديت علي كم محطة علي الأوربي عجب مش عاوز أقلك

هو ده شعبنا يا سادة

شعب كان فيه أتنين جالهم سكتة قلبية علشان الزمالك طلع من بطولة أفريقيا و وراها بطولة العرب و لا تهتز منه شعرة علشان 170 قتيل في العراق و خمسين في فلسطين و جوع في الصومال فين الأمل

مش عارف

بس لاقيت بردو حتو نور من بعيييييييييييييييييييد لاقيتها جاية من أمريكا بس للأسف أنطفأت قبل أما توصل

النقطة دي أسمها وليد شعلان المهندس اللي أستشهد في الجامعة في أمريكا و هو حاول يوقف المجرم و أنقذ زميله من القتل

بس للأسف ربنا لم يكمل فرحتنا به

لحكمة لا يعلمها غير الله

ليه كده كل ده بيحصل مش عارف

يارب أرحمنا برحمتك

السلام عليكم و رحمة الله و بركاته

معلش البوست ده طوييييييل

بسبب النت الهباب كنت بأكتب علي الكمبيوتر و أول أما أتصلح عملت بوست لهم علي طول

هم يومين السبت و الأحد من الأحدث للأقدم

الأحد 15/4
تعبان قوي
مش عارف هأخرج من الحالة دي إزاي
و هو ممكن أصلا أخرج منها
يارب قريب
الحمد لله علي كل شئ
في شركة شافتني علي موقع إجي رك و أتصلوا بي النهاردة و طبعا مش هأروح علشان أنا أشتغلت أخدت التفاصيل علشان واحد صاحبي
المهم أتصلت به و قلتله لاقيته أشتغل شغل جديد
مخنوق و قرفان قوي
يمكن يكون قضاء ربنا إن الموضوع مكملش أني لسه مش مستقر نفسيا مع نفسي و أكيد ده الخير
الحمد لله انا راضي بقضاءك يارب
بس في نقط ضعف عندي مش قادر أتغلب عليها
و هي التفكير
و مسح الصور
و الموضوع عموما
و في نفس الوقت خايف يكوني كرهي للشغل الزائد بسبب فشل الموضوع ده
أنا مش عاوز أقولكم أنا مخنوق من المجال نفسه
لا و اللي ناقص البشر اللي الواحد بيتعامل معها
في حاجتين عاوز أفضفض بهم
الأول موضوع بابا اللي قلته البوست السابق
الموضوع التاني المدير بتاعنا ترقي و هو لسه المدير بتاعنا أخد درجة عاليا بس و في نفسي وظيفته حاجات كده من مخلفات النظام الحكومي
من ساعه أما شتغلت كنت بهرج معه و هو بيهرج معايا
من ساعة أما ترقي مبقاش يبص في وشي علشان انا متكلمش حتي معه
مش عارف هو اللي أتغير بسبب الترقية الجديدة و لا حد سخنه علي
في كلتا الحالتين ليه إحنا كده
في كل مكان تلاقي الناس المنصب بيغيرها
ليه منفضلش زي ما إحنا أو نتغير للأحسن مش للأسوأ
حاجة تقرف

النت الهباب خنقني من أربع أيام أهوة
و كمان كملت الشاشة بتاعت الكمبيوتر اللي فش الشغل باظت يعني حتي مش هاعرف في حد بيعلق علي اللي كتبته و لا لا
يسلام كده لو أدخل الأقي حد قلق علي علشان مدخلتيش من يومين
يااااااااااه

الزمالك هيحرق دمي بكرة أكيد سواء كسب أو خسر ربنا يستر

أنا من يومين مش عارف نفسي أنام كويس مش عارف
بالمناسبة أنا أمبارح عملت زي يوم الأثنين ده كود لشئ بعمله بأكتبه كده في مذكراتي علشان محدش يعرف أية ده

الحمد لله مضيت تجديد العقد يعني شغل سنة كمان يارب يدوم أو يجي الأحسن منه

في فكرة بتراوضني ليه مكنش بطيخة كده و أعيش زي البشر ماهي عيشه لازم يعني أكون متفزلك و عاوز أعمل حاجات كتير
أرجع من الشغل أتلقح قدام التلفزيون و خلاص و أتجوز أي جوازة من القرايب و أخلف و أدخل المدرسة و أجيب في سيرة الناس في الشغل و أخزوق صحابي مش عارف

________

السبت 14/4

السلام عليكم و رحمة الله و بركاته
البوست ده من البوستات القليلة قوي اللي بأكتبها علي الورد الأول و بعدين هاعمله علي البلوج ده علشان النت النهاردة للأسف زبالة
مش عارف أكتب عن أية و لا أية
في حاجات كتير قوي في دماغي
هأبدأ واحدة واحدة علشان محدش يتوهه مني
نزلت رحت عند دكتورة الأسنان علشان كنت مرعوب لأحسن يطلع عندي ضرس مسوس و الحمد لله طلع سليم و مفيش غير تنظيف فقط
المهم بعد جلسة تنظيف حسيت إن في حاجة غريبة في فمي أية هي مش قادر أوصفها بصراحة اللي عمل إزالة جير أكيد يعرفها
المهم خرجت جري بعد كده علشان ألحق فيلم 300 إسبرطي و للأسف بعد جري و هرولة وجدت الفيلم هيبدأ الساعة 11 مش عارف أية الرخامة دي
أنا كنت عاوز أدخل الفيلم ده علشان أنا كنت عاوز أكافأ نفسي علي كم حاجة كويسة بأحاول بأحاول بس أعملها و كمان بأحاول أخرج نفسي من جو أغنية محمد فؤاد غصب عني المشكلة إني حاططها علي الموبيل وبأسمعها كتيررر المهم قلت خلاص أقعد علي أي قهوة رحت قعدت علي قهوة في وسط البلد تكتظ بالسياح و بالمصريين اللي بيعلقوا السياح و دي شغلة معروفة يعني و الناس دي أساسا معروفين في القهوة المهم عملت دماغ و خنقت علي نفسي و كرهت نفسي في نفسي أكتر علشان أنا شخصية مالهاش ملامح يعني مش متدين و لا صايع و لا متروشن و لا دحيح مذاكرة و لا عايش حياتي و لا راضي بحياتي بس مش مشكلة كل ده المشكلة إني مش لاقي حد زي علشان أصاحبه و يبقي صديقي الصدوق علي رأي بومبا حاليا صديقي الصدوق هو الموبيل بصراحة عامل معايا أحلي شغل هو و السماعتين بتوعه بأحطهم في ودني في أي مكان صحرا إن كان أو بستان و بعيش مع نفسي شريط تامر حسني الجديد أغاني عمرو و فؤاد و قبل كل دول القرأن الكريم بصوت حبيبي محمد جبريل
الحمد لله بدأت أخرج أو بأحاول أخرج من الحاجة اللي الحمد لله حصلت لي بس مشكلتي هي عدم وجود حد شبهي أو قريب مني في صفاتي و دماغي و دي بعيد عنكم كارثة بجد ربنا مايعديها عليكم
المهم قمت من علي القهوة و روحت أشتريت سندوتشات كبده و أكلت و دلوقتي بشرب كوبية شاي معتبرة علشان أدخل أنام علشان أروح الشغل بكرة إن شاء الله إن طلع علي صبح يعني
مش عارف أنا هأبقي أعمل البلوج ده بدل الكشكول اللي بأكتب فيه علشان أية مش عارف
بالرغم من إني لسه قرأ في مكان ما المفروض متشتكيش لحد همومك و أنا مقتنع بكده بس مش قادر الحقيقة و بعدين البلوج ممكن يكون مصدر رزق أقصد أصدقاء يعني

وسط البلد ده مكان غريب قوي تحس فيه بحاجات غريبة قوي بجد متتوصفش تحس إن البلد متنوعة بأشكال غريبة تلاقي المتشدد و المنفتح علي الأخر خالص و اللي مش كويس و بلاش أفسر أنتم عفاريت و تفهموا و اللي مش كويسين للأسف كتير علي جميع الأنواع و تلاقي الشباب لابسين حاجات غريبة و لهم أشكال أغرب تحس أنهم لا مؤاخذة يعني و طبعا لا يخلو من عقد الصفقات بجميع أشكالها و أنواعها و علاقتها و رعبها في نفس الوقت تحس إن أي حاجة ممكن تشتريها و تبيعها في وسط البلد أو علي رأي صديقي المتفزلك الدوان تاون
بخاف جدا و أنا في وسط البلد مش عارف ليه بحس فيه بكمية غربة غير الطبيعي يعني زيادة عن الطبيعي شوية

أنا عاوز أتكلم معلش اللي معندوش وقت يقدر يبص فوق كده هيلاقي زر أخضر مكتوب عليه باك و يرجع مكان ما جه مش عاوز صداع و كلام فارغ علشان بقي أصلا حاسس فيه شوارع

يا جدعان برنامج قطوف من حدائق الإيمان اللي بيجي علي إذاعة القرأن الكريم حلو قوي خصوصا خصوصا حلقات شحاته العرابي البرنامج بيجي الساعة 12 باليل

يا نهار كل ده بوست بس مش مشكلة
الزمالك هايجيب لي أقول أية بس جاب لي كل حاجة خلاص

كتب الكيمياء منورة قدامي أهية و بتسلم عليكو و ترابها كمان بيسلم عليكو

أنا مشترك في منتدي أسمه الحصن النفسي أنا مش بدخل عليه غير كل ردح من الزمن و لاقيت محاضرة عن النجاح و السعادة و بأحاول أنفذ اللي فيها

تعبان قوي و مش عارف أعمل أية محدش يقلي صلي و أقرأ قرأن علشان الحمد لله بأعمل ده كله بس عاوز بقة اللي بعد كده مش بأقول إنهم مالهمش لازمة علشان محدش يعمل علي غضنفر لا دول اهم حاجة بس ساعات الواحد بيكون عاوز حاجة لحم و دم تتجاوب معه أنا الحمد لله أخدت الواد إبن أختي في حضني أمبارح و نمت و كان نفسي أعيط بس مقدرتيش للأسف

أفتكرت حاجة كمان بابا سمعته بيقول لواحد في التلفيون إن السن ده هو السن المناسب علشان محمد أنا يعني يتجوز متقلوش الرجل حاسس باللي الحمد لله حصلي و عاوز يزوده مش فاهم اللي يخنقك أنه عمري ما كلمني بالطريقة دي يقلي أتجوز و خلاص طيب يقعد معايا يقنعني يفهمني بس الحمد لله علي كل شئ و الحمد لله علي ما كان و ما هو كائن و ما سيكون
بجد ياشباب كلمة الحمد لله دي كلمة روعة مش هتكفيها حقها تحس و أنت بتقولها كده إن في بلاوي بتخرج معها و هي بتخرج من علي لسانك
و كلمة يارب
يارب

أنا خلاص يعني فضيت شوية من اللي جوايا علي أمل أكتب تاني بكرة و علي أمل إن النت هو كمان يتصلح و أنشر الكلام ده علي البلوج الرائع بتاعي

تصبحو علي خير
علي فكرة هأعمل باسورد للملف ده علشان الحظ و محدش يقراه
و علي فكرة هاعمل أسمها هو الباسورد و يارب يكون دي أخر مرة أكتب أسمها و يارب يقدرني و أمسح الصور بتاعتها علشان أنا بأحتقر نفسي أنا الحمد لله مبصيتش فيها من ساعة أما عرفت إنها أتخطبت بس يارب أمسحها

المهم بقة
الله يسامحكم
تصبحوا علي خير

معلش أخر حاجة
أغنية كل سنة و أنت طيب لتامر حسني لذيذة قوي
و أغنية صوتك تلائم حالتي و تقلي إن ممكن الخير يكون في اللي حصل

السلام عليكم و رحمة الله و بركاته

أزيكم يا شباب

مبدئيا علشان الأمانة البوست ده ممكن أمسحه قريب

معلش هأرجع بكم مرة تانية لحالة النكد اللي كنت فيها الأول

بس إن شاء الله مش هتتطول

فاكرين الموضوع اللي كنت قلتلكم داخل عليه

اللي قعدت أقولكم داري علي شمعتك

أنا داريت لحد اما الشمعة أتطفيت

في حاجة كمان قبل أما أبدا الموضوع ده

مش عاوز نصايح و لا حد يعطف علي ربنا يكرمكم

أنا أصلا قرفان من نفسي علشان هأكتب الموضوع ده بس خلاص مش قادر

و لعلمكم ممكن مكملش كتابته أصلا

و في نفس الوقت نفسي أتكللللللللللللللللللللللللللللللللللللللللللللللللللللللللللم

تعباااااااااااااااااااااااااااااااااااااااااااااااااااااااااااااااااااااااااااااااااااااااان

ياااااااااااااااااااااااااااااااااااااااااااااااااااااااااااااارب

رحمتك

المهم

كنت و أنا في الكلية أعجبت بواحدة و كلمتها و هي قبلت بس رجعت خفت علشان مكنتش عارف ظروف الدراسة و الشغل و الجيش

قلت يا واد حرام و اللي مترضهوش لأختك مترضهموش لبنات الناس المهم قلنا لما نخلص نشوف الحياة هتمشي إزاي

خلصت و مدخلتيش جيش و شوية معاناة علشان أشتغل و الحمد لله أشتغلت و ده كله أنا مش علي أي إتصال بها خالص مش بعمل غير إني بفكر فيها و جبت نمرة تلفونها من علي النت و طبعا بقعد أكتب النمرة علي الموبيل و عمري ما أتصلت بها طيعا

و كم صورة معها علشان كنا مع بعض في رحلة

المهم كنت شايل فكرة الجواز دلوقتي من دماغي و في نفس الوقت متفق مع نفسي أول أما أفكر في الجواز هيكون الإنسانة دي علشان الكم مرة اللي كلمتها فيها كلامي معها في دماغي و فاكر مشينا فين في الجامعة و أتكلمنا في أية و طريقتها في الكلام

كنت حاسس قوي إن هي دي اللي ربنا مختارها لي سواء كويسة أو وحشة للعلم علشان أنا مكنتش أتكلمت معها كتير

و كفاية إنها الإنسانة الوحيدة اللي جت لي الشجاعة إني أكلمها في الموضوع ده بالرغم مني إني هوائي أصلا

بس و من فترة فكرت في الزواج يمكن يكون ده حل لمشاكلي مع نفسي يكون عندي حد أخاف عليه و يخاف علي علشان اليومين دول محدش من الأصدقاء و لا الأقارب بيخاف علي حد و ممكن تشكي له همك و أنت مرتاح

فطيعا فكرت فيها علي طول و أنا أصلا بفكر فيها من غير حاجة

المهم عملت خزعبلات و جبت عنوانها و في واحد صاحبي قريب منها قلتله يسأل عليها

جاب لي خبر إنها لسه لم ترتبط

و هو هيسأل تاني و يعرف بقة الحاجات التانية عن أهلها و الحاجات دي

و رد علي إمبارح

و قال لي إنها أتخطبت من فترة قريبة جدا

مش عارف أعمل أية

مخنوق

و الله أنا عملت إستخارة كتيرة

و متاكد إن شاء الله إن الخير في اللي ربنا قسمه بس بجد تعبان

مش قادر

كنت خلاص تخيلت شكل حياتي معها إزاي أصلا و هنعمل أية مع بعض

عارف إني هأرجع أنسي أكيد بس أنا في دلوقتي تعبان

و الله العظيم راضي باللي قسمه لي ربنا بس أنا كنت حاسس إنها هي

يارب صبرني و نسيني بسرعة

أنت عالم بيا و إني حمدتك أول أما عرفت مش بعد أما زعلت بس بجد أنا تعبان قوي يارب

و مش عارف هالأقي حد زيها تاني

أو الخير فين

يارب سامحني لو الكلام اللي بقوله ده فيه حاجة غلط

يارب مش عارف أدعي بأية

أدعي إنها ترجع لي و يكون فيها الخير لي

و لا أدعي أنك توفقها و تبارك فيها للي كتبتها من فضلك عليه و يبارك لها فيه و يبارك في أولادهم و يسعدهم

و لا أدعي إنك هتعوضني بأحسن منها

يارب

يارب

يارب

يارب

يارب

يارب

يارب

الحمد لله

السلام عليكم و رحمة الله و بركاته

أنا كنت فكرت أكتب الكلام ده في الرد علي التعليق في الموضوع السابق بس قلت أعمل له بوست لوحده أحسن

أمبارح رحت حفلة في جميعة عندنا علشان الإحتفال بتاع إمبارح أنا مش بحب أستخدم أسمه الحقيقة المهم أنا كنت قلت للي أقترحت عليه علشان يبلغ الناس اللي في الجميعة دي إني عاوز أشارك علي طول و بحاجة جامدة فقالي قلتلهم قالو يجي اليوم ده و نتفق بعد كده فعلا رحت و قابلت الناس و حاولت اعرف بيعملوا أية و أية الحاجة اللي الواحد ممكن يشارك فيها

المشكلة أنهم مركزين مجهودهم علي الجانب المادي أنا عارف و الله أهمية الجانب المادي بس ممكن يكون في جانب معنوي يعني مثلا رحلات للأطفال دول المساعدة في تعليمهم هم بيروحوا مدارس بس زي ما أي طفل بيحتاج حد يذاكر معه و يسأله عمل أية و كده يعني

هم اللي بيعملوه الحاجات المادية من فلوس و هدايا حسب المناسبات و تحفيظ قرآن بس أنا مش هيأس إن شاء الله و أروح و أساعد في اللي بيعملوه و ربنا يقدرني و أقدر أساعد المحتاجين زي ما انا حابب

هأقولكم حاجة بس محدش يضحك علي

بحلم في يوم ولد من الأولاد دول من حبه لي يجي يقلي ممكن أقولك يا بابا

و لا بنت لما تكبر تقل للي عاوز يتجوزها يجي يطلب أيدها مني الأول

شغل أفلام صح

مش عاوز تريقه و النبي هو حلم مش عارف كتيته ليه أصلا بس يمكن أقدر أحققه إن شاء الله

__

في حاجة كنت بعملها زمان في المدونة أسمها نشرة الأخبار مش عارف أفتكرتها دلوقتي بالرغم من أنه مفيش أخبار

.

الشركة بتاعتنا شكلها خلاص هيتباع ميه في المية

ضحكوا علي إيران و أول أما البحارة رجعوا قالوا أنهم قبضوا عليهم في المياه العراقية

الزمالك يارب يتحل بقة علشان خلاص معنديش دم عاوز يتحرق

الأهلي ربنا يوفقه و يكسب النهاردة كده وكده يعني

نفسي أذاكر حاجة بقة الواحد قرف

وفد من الكونجرس قابل وفد من الإخوان في السفارة الأمريكية نيهههههههه

الدستور بقت يومية

في مشروع مجنون داخل عليه و ربنا يستر

كفاية كده و صباح الخير

السلام عليكم و رحمة الله و بركاته

أزيكم يا شباب يارب تكونوا كلكم بخير

النهاردة يوم مهم النهاردة اليوم اللي كل الناس بتعمل فيه حاجات كتيرة لزوم التلميع الإعلامي

مش مهم ده معايا

.

عاوز النهاردة أقولكم لازم كلنا نبدأ من النهاردة مساعدة المحتاجين بصراحة أنا أول مرة هأشارك النهاردة في حاجة زي دي مش عارف بردوا هتيجي لي الشجاعة و أروح و لا هأتحجج و أرجع في أخر لحظة

أنا مبدئيا مش بحب أسم اليوم ده و مش عارف الأقي له أسم و اللي يعرف ياريت يقول عليه و مبدئيا مخنوق أنه يوم واحد و نفسي يكون كل يوم

علشان فعلا الواحد قبل أما يدخل السعادة و الإحساس أنه الأيتام دول مش لوحدهم بيحس هو شخصيا براحة من عند ربنا أكبر

ياريت ميكنش يوم و ياريت نساعد في تعليمهم و تربيتهم و ياريت اللي عنده أسلوب علمي للتعامل معهم و الإجابة علي ٍأسئلة الأيتام و اللي مش معروف لهم أباء يشرح الطريقة دي و إزاي نرد علي أسئلتهم بدون كذب و بدون ما نسبب لهم ألم

.

و كمان الناس اللي بتعمل حاجة غلط و تصلح الغلط بغلط و ترمي ولادها قدام جامع و لا ملجأ و لا كنيسة ربنا يهديهم و يقلوا علشان هم مش هيخلصوا

.

ربنا يكرمنا جميعا و نكون كلنا في عون بعض عند الحاجة

و يارب ناخد العظة و العبرة من الأولاد دول و نعرف أن الخير اللي بنعمله هو اللي بس هيفضل لنا و هيعود علينا

(يارب ساعدني علي كده)

وداعا و مرحبا

وداعا للكسل
وداعا للحقد

(وداعا للخوف (مش قوي يعني لسه
وداعا للتواكل
وداعا للتفاهة
وداعا للكرهه
وداعا لتضيع الوقت
وداعا للبكاء علي اللبن المدلوق
وداعا للهم
وداعا للحزن
وداعا للشر
و
مرحبا للتوكل علي الله

مرحبا للثقة بالله
مرحبا للعمل و العمل و العمل
(مرحبا بالشجاعة (بردوا مش قوي لسه
مرحبا بالطمأنينية
مرحبا بالعقل
مرحبا بمعاملة الناس بالحسني مهما كانوا
مرحبا للأمل
مرحبا للتفاؤل
مرحبا للخير
مرحبا للحب

السلام عليكم

بقلك أنا كنت عاوز أكتب بلوج بس نسيته

هأنام و لو ربنا كرمني و أفتكرت هأكتبه

بس علي العموم حبيت أسلم عليك

تصبح علي خير

السلام عليكم

محدش يسأل ده أية هو كده و خلاص

____

لا يدري كيف وصل إلي هناك لكنه وجد نفسه هناك و لا يعلم أكان في حي شعبي قديم أم في نجع من النجوع البعيدة لا يتذكر أذهب مع صديق أم مع قريب لكنه وجدهم هناك إنهم مجموعة من الذين يطلق الناس عليهم السينمائيين المثقفين المجانين بشعورهم الغريبة و ملابسهم الأغرب و أدواتهم المتداخلة و أصواتهم العالية و إختلاطهم فلا تعلم أكلهم أخوة أم كلهم أزواج
لكنه فرح جدا بوجوده معهم و أخبر من كان معه أنه سيجلس حتي ينتهوا و هكذا بقي وحيدا في هذا المكان و بعد فترة بدات أعدادهم تقل و تقل و فجأة أصبح وحيدا و بدأ يسأل كيف يخرج من هذا المكان و حاول بكل الطرق معرفة طريق الخروج
و كعادته عند يضل في أي مكان يسأل عن وسط البلد كيف يذهب إلي هناك و فعلا بدأ يسأل و لا أحد يجاوبه و بدا الخوف يتسلل لنفسه.
و هنا وجد شخصا تبدو عليه علامات التحضر فحمد الله و توجهه إليه ليسأله عن الطريق و سأل الرجل كيف أذهب إلي وسط البلد؟
و صعق عندما أخبره هذا المتحضر أنت في وسط البلد فعلا
فمنذ ذلك الوقت لم يسمع عنه خبر أهو ضل في هذا المكان أم في مكان أخر لا يدري هو نفسه ما الذي حدث

My Blog

I Love you so much


why?


I swear I don't know


I promise you we will be together to the end


see you my love

السلام عليكم و رحمة الله و بركاته

أزيكم يا شباب

أولا كل سنة و كل أم طيبة و بخير

و ثانيا كل سنة و أنتم طيبين بمناسبة بدء شهر ربيع الأول و بدا العد التنازلي للمولد

في ناس بتشوف الإحتفال بالمولد ده بدعة و ناس لا

أنا بصراحى بحب أو أتمني أحتفل بالمولد بأنني أحاول أقترب من حياة سيدنا محمد صلي الله عليه و سلم و سنته

أنا عاوز أستشيركم في حاجة

لي واحد صاحبي و الله العظيم مش أنا

كان متفوق جدا في الكلية و عايش حياته زي الفل هو حالته المادية مش قوي

هو من فترة طويلة في خناق و عناد مع أهله

انا مش عارف حله أية الحقيقة

و كمان بيعاند معهم علي حساب مصلحته يعني هو معيد في الكلية مش بيروح و عاوز يسيب تكملة الدراسات العليا و هو متفوق جدا جدا جدا

بس مش عارف أية اللي حصله و غالبا بدأ أول مراحل الإنحراف الكبير يعني

هو كان بتاع بنات و كده و الصلاة مثلا عنده بمزاجه يعني ميحبيش حد ينصحه بالصلاة يعني لو مثلا هو رايح يصلي و واحد قاله متيجي نصلي ممكن يعاند و ميرحش متفهموش ليه

ياريت لو عندكم إقتراحات تقوليلي يمكن أقدر أساعده

المشكلة كمان إنه مش عاوز يكلمني بتصل به من أسبوعين مش بيرد علي الموبيل و ممكن ميكنش قاعد معهم في البيت أصلا

مش عارف أعمله أية

ربنا يهديه علشان ده دماغه في العلم بصراحة مش عاوز أقولكم

ملحوظة برنامج عمرو خالد الجديد هيبدأ النهاردة

المحور الثلاثاء الساعة 7م و الأربعاء 11م و الجمعة 2 ظ

الرسالة الثلاثاء 9 م الخميس 10 م

الراي الثلاثاء 7م و الأربعاء11ونص ص و 11وعشرة م

أبوظبي الأربعاء 8 مو الخميس 4 ظ و الأثنين 3 فجرا

كله بتوقيت القاهرة

ربنا يوفقكم يا شباب

متنسوش هدية عيد الأم

و اللي والدته متوفية يديها هدية هو كمان بعمل الخير و يوهب لها الثواب بتاع العمل ده و يحاول يتصل بالناس اللي كانت هي بتتصل بهم

سلام

السلام عليكم

صباح الخير عليكم و علينا إن شاء الله

عندي كلميتن علي السريع

الكلمتين دول بفكر أكتبهم قبل أما أتجنن و أروح أعمل حاجة اندم عليها بقية عمري أو الله أعلم الخير فين بالمناسبة اللي يدخل يدعي لي بالهداية

المهم

الموضوع الأول

مش عارف ليه دايما بحس إن حال البلد دي مش ممكن يتعدل غير بحاجة زي الثورة الفرنسية مش عارف ده بسب تأثير قصة مدينتين علي و لا أية بس المشكلة إننا لو عملنا حاجة زي الثورة الفرنسية الله يمسيها بالخير مدام ريفينج مش هنلاقي حد موجود في البلد لأننا بلا إستثناء بنعمل في بعض اللي نستحق عليه الإعدام
بدأ من عزيزي سائق الميكروباص مرورا بالمدرس المطحون اللي بيطلع غله في الطلبه من أبنائي الطلبة و الطالبات اللي حالهم ما يعلم به إلا ربنا مرورا بالأب اللي بيطلع غل الدنيا في عيالة مرورا لكل واحدة محترمة بتبيع إحترامها بأي شكل مش لازم الشكل اللي هيجي في دماغكم في أشكال كتير لبيع النفس
أة و الله جه في دماغي موقف جامد قوي واحدة بنت شكلا محترمة قوي ركبت معايا الميكروباص مرة هي و واحدة صاحبتها و المفروض يدفعوا جنيه لكنها أبتسمت إبتسامة الموناليزا للسواق و أعطته خمسين قرش بس و لما رفض و صمم علي الجنيه أديته بس و هي عاملة زي فرانكشتين مش عارف حالنا هيوصل لحد فين ده مثال لبيع النفس غير الأنسات المحترمات اللي شغلتها بتجذب الزبون بس في المعارض و المؤتمرات
هأقول أية حسبنا الله و نعم الوكيل
أنا مش بهاجم الأنسات و الله بس بجد حال البلد دي مش هيتعدل غير لو الأمهات أتعدلت و بصراحة الأنسات دلوقتي لا تبشر بالخير أبدا أو علشان محدش يزعل مني نسبة 99بالمائة لا تبشر بالخير
و ربنا يسترها علينا
أنا مش عارف الموضوع بيوسع مني ليه
في أشكال كتيرة بس مش عارف ساعات بحس أنهم عندهم حق في اللي بيعملوه هاياكلوا منين هتقوليلي لا مش المفروض يعملوا كده مش عارف يعني ينزلوا يلموا زبالة من الشارع مش عارف بجد الحل فين
ربنا ياخدني و يريحني من الهم اللي أنا فيه ده
تاني نقطة عاوز أتكلم عنها التحكم في مخاليق ربنا ليه كلنا بتغير لما ربنا بيحكمنا علي حد
سواء أبنائنا حلوة أبنائنا دي اللي يسمعني بتكلم يحس إن عندي تسعين سنة
و الموظفين اللي تحتنا
ليه مش عارف بالرغم من إننا بنكون حاسين بالظلم من اللي فوقنا
مش عارف

الموضوعين دول مش عارف الحل فيهم أية بالظبط

الحمد لله شكلي عقلت و مش هأروح المشوار أياه و هأقوم أنام أحسن علشان أنا أجازة النهاردة من الشغل

تصبحوا علي خير