Thursday, April 12, 2007

السلام عليكم و رحمة الله و بركاته
أزيكم يا شباب
مبدئيا علشان الأمانة البوست ده ممكن أمسحه قريب
معلش هأرجع بكم مرة تانية لحالة النكد اللي كنت فيها الأول
بس إن شاء الله مش هتتطول
فاكرين الموضوع اللي كنت قلتلكم داخل عليه
اللي قعدت أقولكم داري علي شمعتك
أنا داريت لحد اما الشمعة أتطفيت
في حاجة كمان قبل أما أبدا الموضوع ده
مش عاوز نصايح و لا حد يعطف علي ربنا يكرمكم
أنا أصلا قرفان من نفسي علشان هأكتب الموضوع ده بس خلاص مش قادر
و لعلمكم ممكن مكملش كتابته أصلا
و في نفس الوقت نفسي أتكللللللللللللللللللللللللللللللللللللللللللللللللللللللللللم
تعباااااااااااااااااااااااااااااااااااااااااااااااااااااااااااااااااااااااااااااااااااااااان
ياااااااااااااااااااااااااااااااااااااااااااااااااااااااااااااارب
رحمتك
المهم
كنت و أنا في الكلية أعجبت بواحدة و كلمتها و هي قبلت بس رجعت خفت علشان مكنتش عارف ظروف الدراسة و الشغل و الجيش
قلت يا واد حرام و اللي مترضهوش لأختك مترضهموش لبنات الناس المهم قلنا لما نخلص نشوف الحياة هتمشي إزاي
خلصت و مدخلتيش جيش و شوية معاناة علشان أشتغل و الحمد لله أشتغلت و ده كله أنا مش علي أي إتصال بها خالص مش بعمل غير إني بفكر فيها و جبت نمرة تلفونها من علي النت و طبعا بقعد أكتب النمرة علي الموبيل و عمري ما أتصلت بها طيعا
و كم صورة معها علشان كنا مع بعض في رحلة
المهم كنت شايل فكرة الجواز دلوقتي من دماغي و في نفس الوقت متفق مع نفسي أول أما أفكر في الجواز هيكون الإنسانة دي علشان الكم مرة اللي كلمتها فيها كلامي معها في دماغي و فاكر مشينا فين في الجامعة و أتكلمنا في أية و طريقتها في الكلام
كنت حاسس قوي إن هي دي اللي ربنا مختارها لي سواء كويسة أو وحشة للعلم علشان أنا مكنتش أتكلمت معها كتير
و كفاية إنها الإنسانة الوحيدة اللي جت لي الشجاعة إني أكلمها في الموضوع ده بالرغم مني إني هوائي أصلا
بس و من فترة فكرت في الزواج يمكن يكون ده حل لمشاكلي مع نفسي يكون عندي حد أخاف عليه و يخاف علي علشان اليومين دول محدش من الأصدقاء و لا الأقارب بيخاف علي حد و ممكن تشكي له همك و أنت مرتاح
فطيعا فكرت فيها علي طول و أنا أصلا بفكر فيها من غير حاجة
المهم عملت خزعبلات و جبت عنوانها و في واحد صاحبي قريب منها قلتله يسأل عليها
جاب لي خبر إنها لسه لم ترتبط
و هو هيسأل تاني و يعرف بقة الحاجات التانية عن أهلها و الحاجات دي
و رد علي إمبارح
و قال لي إنها أتخطبت من فترة قريبة جدا
مش عارف أعمل أية
مخنوق
و الله أنا عملت إستخارة كتيرة
و متاكد إن شاء الله إن الخير في اللي ربنا قسمه بس بجد تعبان
مش قادر
كنت خلاص تخيلت شكل حياتي معها إزاي أصلا و هنعمل أية مع بعض
عارف إني هأرجع أنسي أكيد بس أنا في دلوقتي تعبان
و الله العظيم راضي باللي قسمه لي ربنا بس أنا كنت حاسس إنها هي
يارب صبرني و نسيني بسرعة
أنت عالم بيا و إني حمدتك أول أما عرفت مش بعد أما زعلت بس بجد أنا تعبان قوي يارب
و مش عارف هالأقي حد زيها تاني
أو الخير فين
يارب سامحني لو الكلام اللي بقوله ده فيه حاجة غلط
يارب مش عارف أدعي بأية
أدعي إنها ترجع لي و يكون فيها الخير لي
و لا أدعي أنك توفقها و تبارك فيها للي كتبتها من فضلك عليه و يبارك لها فيه و يبارك في أولادهم و يسعدهم
و لا أدعي إنك هتعوضني بأحسن منها
يارب
يارب
يارب
يارب
يارب
يارب
يارب

7 comments:

saso said...

يارب
هيعوضك باللي احسن منها ان شاء الله، انت عملت الصح ومعلقتش البنت بيك واستنيت لما ظروفك تتناسب ..مادام ربنا عمل كده يبقي في حكمة ما ، الموضوع هياخد وقتة وان شاء الله هتنساة وبدلة بخير منه

عبوووووووود said...

اطمن ربنا هيهديك للي فيه الخير سواء كان معاها أو مع غيرها

قول يا رب

تحياتي

سكينة said...

أيها المخنوق المتضايق والرافض للتعاطف والنصائح اسمحلي أن أذكرك بحديث الرسول عليه الصلاة والسلام لما راح يعزي أم سلمة وطلب منها أن تدعو
"لا حول ولا قوة إلا بالله أللهم أجرني في مصيبتي واخلفني خيرا منها"
تعجبت في البداية ولكنها استجابات لنصيحة الرسول ولما خلصت عدتها تقدم لها الرسول وأفتكر مفيش عريس أحسن من سيد الخلق
فاتبع نصيحته
اللهم أجرني في مصيبتي واخلفني خيرا منها
وعشان أنت راجل بجد مش بتعلق حد سيأتيك رزقك في الوقت الحلو

No Fear said...

السلام عليكم
ساسو
عبووووود
سكينة

شكرا لكم جميعا

ثانيا أنا عارف كل اللي قلتوه
و إن شاء الله الخير في كده

أنتم عارفين أنا عامل زي أية
زي واحد ذاكر كويس قوي و يوم الإمتحان تعب و مرحش الإمتحان
هو متأكد أن في ده الخير لأنه أجتهد و ربنا هو اللي أراد له كده
بس من حقه يزعل محدش يقلي أنه هيفرح لما يسقط
الله أعلم ممكن أكون غلطان بس أنا زعلان و ممكن ده كمان شئ مضايقني من نفسي أمام ربنا اللي مغرقني في نعمه
الحمد لله

يا مراكبي said...

وعسى أن تكرهوا شيئا وهو خير لكم

وعسى أن تكرهوا شيئا ويجعل الله فيه خيرا كثيرا

Tamer Nabil said...

ربنا يوفقك

ويصلح ليك الحال

تحياتى

may said...

وعسي ان تكرهوا شيئا وهو خير لكم
يمكن ربنا شايف انها مش هاتبقي خير ليك عشان كده كافئك وبعدها عنك
ويمكن بردو العكس ولو ليك خير فيها
هاترجعوا لبعض من تاني
اولا واخيرا الحمدلله علي كل حال
وشكلك فعلا انسان كويس
وربنا هايعوضك عنها باحسن منها