Saturday, April 28, 2007

السلام عليكم و رحمة الله و بركاته
بالرغم من تناقص أعداد الزائرين و إن مفيش حد بيدخل علي البلوجين التنين لن أيأس و لن أتوقف عن الكتابة
مش هنسلم مش هنبيع مش هنوافق علي التطبيع
ده أولا
ثانيا مش عارف ليه بيكون في دماغي فجأة مليون حاجة في وقت واحد
يعني أمبارح شفت برنامج مع هيكل الحلقة الخاصة التانية
و حسسيني إنه خلاص الدنيا هتنتهي بكلامه عن شركات الأمن و الفظائع اللي بتعملها في العراق و إحنا ساكتين و كلامه عن شركة بلاكوتر و الناس اللي بتشتغل فيها
و ربنا يستر
كل أما بشوف الرجل ده بيتكلم بصراحة بقول إزاي واحد زي الرجل ده مش بناخد رأية و الناس اللي زيه في مشاكلنا و و بعدين الرجل ده بسم الله ماشاء الله بيقرأ أمتي و يحلل أمتي و بيجيب الكتب دي منين ربنا يكتر من أمثاله بالرغم مني إني ساعات مش بفهم اللي بيقوله و ساعات مش بوافق علي حاجات بيقولها
و كمان بستغرب إزاي الرجل ده تعلم في عصر الملكية و بحسد كل اللي أتعلموا في نظام الملكية بجد دول كانوا بيطلعوا عباقرة حتي الجهلة منهم
و كمان أتكلم عن دولة أسمها فرسان مالطا الدولة الوحيدة الغير كاثوليكية اللي معترفة بها هي مصرطبعا الدولة دي تعتبر بقايا الصليبين بجد
مش عارف هو بيعرف الحاجات دي إزاي و منين
و ليه مصر تعمل كده أساسا
مش عارف علي قد ما هو كلامه ممتع بس الحلقة دي كانت سوداوية شوية و الدنيا مش ناقصة الحقيقة
ربنا يستر
________________فاصل_
واحد صاحبي عامل عملية و منتظر نتيجة تحليل يوم الثلاثاء ياريت تدعو له يطلع مفيش حاجة
أدعو لي أنا كمان إني أنساها
أدعو لي بالهداية و السكينة علشان أنا خايف جدا و الغريب إن البلوج بتاعي أسمه لا خوف
___________________
الأهلي أتهزق من برشلونة
راح الزمالك علشان ميزعلناش أتهزق من الدراويش علشان ميكنش الأهلي أحسن منه
__________________عدنا_
دماغي مش مرتبة خالص
مش عارف أفكر و لا أخطط لنفسي
و لو لو حصل و خططت مش بكمل
مش عارف أعمل أية
يارب
أكيد الحل عندك
كان في حاجات تانية في دماغي بس مش مهم
لو أفتكرتها هأرجع أكتبها تاني
سلام

13 comments:

مـحـمـد مـفـيـد said...

عاده الزمالك والا هيشتريها

يا مراكبي said...

هيكل ده نموذج لناس تانية كتيرة بتمثل ثروة للبلد لكن للأسف ماحدش بيستغلها وعلشان كده تلاقينا دايما وراء ومتخلفين وبنبدأ كل حاجة من الأول وجديد ونجرب تاني وتالت ومانستفيدش من الخبرات المتراكبة اللي عندنا

Memo said...

يا محمد كل لما تحصل حاجه هتقعد تكتئب و تحط ايدك على خدك عيش و تعايش و استمتع بالحياه
تحياشتي

Dody said...

هو انت بتقارن بين برشلون والاسماعيلى
ههههههههههههه نكته الموسم

وعلى رأى محمد مفيد عاده الزمالك ولا هيشتريها

واحد من الناس said...

هو لسه في فريق بيلعب اسمه الزمالك

واحد من الناس said...

انت فين مش باين
ولا زعلان عشان الزمالك
ههههههههه

sherehan84 said...

صاحبك عمل ايه ؟؟
وانت ايه أخبارك دلوقتي يارب تكون نسيتها .. مفيش حد يستاهل نضيع عمرنا في الحزن عليه .. في حاجات تانيه اولى انك تعملها بدل ما تضيع وقتك في الحزن .. اقف على رجليك وكمل حياتك ربنا شايللك اللي تناسبك وتناسبها واللي ان شاء الله هتموت فيها و تموت فيك ..
اظهر وبان عليك الأمان

Noran said...

مممم ....صدقنى مش هيكل بس بالحالة ده

الدور و الباقى على مصر المهتميه بيه اوى

أنا عمرى ما شوفته عمل برنامج على التلفزيون المصرى

واضح أن الحكام بيحبوه
:(
حاجة تكسف
:(

بغير و بفخر فى نفس الوقت ..لأن برامجه على الجزيرة
:)



متقلقش هندعيلك
:)
ربنا يستر
بس تقولنا نتيجة التحاليل



رتب دماغك والنبى ...عشان بدأت أتوه
;)

No Fear said...

السلام عليكم
محمد مفيد
الزمالك راجع إن شاء الله

يا مراكبي
يارب نستغلها قبل أمت تروح مننا و نقعد نعيط عليهم
مش عارف ليه بلدنا بتكرم الناس دايما بعد موتها مش قبل

ميمو
ربنا كريم الحمد لله علي كل شئ
تحياتشي

دودي
ردي يوم 21

واحد من الناس
في فريق بيكسب أسمه الزمالك
ربنا يخليك و تسأل علي دايما
بس النت فصل شوية و بنغير الشركة

شريهان
حمد لله علي السلامة البلوج منور
الحمد لله صاحبي بخير
و التحليل كويس
لازم الواحد يزعل شوية
بس ربنا كريم الحمد لله

نوران
الحمد لله التحليل تمام
يارب يجي حد يقدر الناس دي و يستفيد بهم مش عاوزين نكرمهم بس
و الله يا نوران أنتم بتصعبوا علي و أنا بكتب البلوج أنا شخصيا بتوهه فيه مش عارف انتم بتعملوا أية

بحبكم كلكم و ربنا يخليكم لي و ربنا يكرمكم
معلش النت مبهدلني اليومين دول و أنا بكتب لكم من الشغل
أنا بشوف ده حرام نوعا ما
و مش بعرف أخد راحتي و الناس حواليا
بس إن شاء الله قريب هأرجع النت في البيت

و نعيش مع بعض
وحشتني جدا يا بلوجي العزيز
علافت قيمتك اليومين دول
سلام علشان في حد جاي

esraa said...

بالنسبه لهيكل فهو تجسيد للفرق بين كلل حاجه كانت زمان وبينها دلوقتي, مش تعليم وثقافه وبس




ربنا معاك
ويحققلك اللي انت عايزه ويخليك تنسي ((:

mesh2dra said...

السلام عليكم

ادينا احنا بندخل
بس صاحب البلوج نفسه
مش بيدخل

فييييييييييينك

يا مراكبي said...

وإنت مش ناوي ترحع وألا إيه؟ ألغي إسمك خلاص من قائمة المدونين اللي عندي وألا إيه؟

mariam said...

ايه ده فينك
يعنى بتسأل عنى و انت مش موجود
ارجع اكتب تانى
تحياتى ليك