السلام عليكم و رحمة الله و بركاته
منذ كتابة البوست اللي فات وأنا نفسي أكتب قوي مش عارف ليه
اولا شكل البلوج بتاعي عاجبني قوي و بحبه و كان نفسي أقول كده
ثانيا كنت عاوز أقولكم علي اللي حصل معايا في الدورة و المقابلة
ثالثا خروجي مرة تانية مع صاحبي بتاع البوست السابق
رابعا أصدقائي الجدد
خامسا قضية تعذيب طفل المنصورة و برودي
سادسا بلطجي منطقتنا
سابعا روح التفاؤل بداخلي

.

.
أولا شكل البلوج بتاعي بحس فيه بسعادة و دفء الحمد لله
الدورة و المقابلة
بعيد عنكم المنحوس منحوس رحت لاقيت اللي معايا في الدورة من شركتي بس يعني مفيهاس و لا مزز و لا حتي ناس جديدة اتعرف عليها و كان المحاضر علي قده كمان و كنت كرهت الدورة دي كمان علشان عرفت إنها نص كم و ناس تانية في الشركة بتروح الدورات الأحسن
في أيام الدورة دي كان في موعد المقابلة علشان الشغل الجديد بعد جري و تنطيط الحمد لله وصلت للميعاد و المكان بالثانية و كنت رحت بالبدلة طبعا و كنت حضرت الأول الدورة فكانت الناس فاهمة تقريبا أنا رايح فين بس عملت عبيط
رحت بنت زي القمر عملت معايا المقابلة و مش عاوز أقولكم علي أسمها أسمها لوحده حكاية
بس هي اللي كانت كلمتني في التليفون قعدت تكلمني أنجليزي بصوت مش ظاهر أصلا و طبعا أنا كنت بفهم اللي بأسمعه بس مش بفهم اللي مش بسمعه المهم قعدت اهبل معها في الكلام و تأكدت إني مش هأقبل في الشغل ده بس لاقيتها قالت لي هأبعت الورق بتاعك للشركة اللي عندها الوظيفة و هم هيكلموك يحددوا ميعاد و لما يكلموك أتصل قلنا أدعو أنهم يتصلوا بقة
و انا في الدورة عرفت إن رئيس القطاع بتاعنا طايح في الناس كلها ولما رحت يوم الخميس كنت مرعوب الحقيقة و بيقول للناس كل واحد يكتب اللي بيعمله يوميا و إحنا طبعا مفيش شغل كتير و هو عارف كده بس مش عارف أية اللي هيحصل ربنا يستر
عديت الدورة الحمد لله

__________________________________________________
خرجت تاني مع صاحبي و هو عنده الجديد دايما يعني عنده منحة نصف مجانية بيحاول ياخدها مجانية كلها و بيعمل إختبارات و راح تدريب في كم شركة كده و جاب لي شوية كتب علي الكمبيوتر في الكيمياء مش ممكن الحقيقة و كمان أسعد خبر أنه قابل خطيبته الأولي تاني يوم كنت معه و هو إن شاء الله إن شاء الله هيرجع الموضوع مرة تانية

__________________________________________________
أصدقائ الجدد انا بشكرهم جدا جدا جدا بلاش أسامي بس بجد كلامي معهم بيسعدني فوق ما هم متصورين

__________________________________________________
للأسف شفت فيديو بتاع طفل المنصورة اللي أتعذب
بجد بانصح أي حد ميشفوش لو لسه مشفهوش خصوصا الأنسات
مش عارف أقول أية و لا أية

اللي يضايقك أنك تحس إن الناس اللي نشرت الكليب ده بتاجر به مش عارف ليه
حسبنا الله و نعم الوكيل ميتقلش غير كده تعرفوا نفرض يعني الولد ده ربنا يرحمه كان زي التوربيني كده حرام اللي حصل معه ده
ربنا ينتقم من اللي عمل كده و اللي بيساعد علي كده و اللي بيتستر علي كده و ينتقم منا إحنا كمان علي سكوتنا
حسبنا الله و نعم الوكيل

نفسي اعمل حاجة و أنا باقول كده مش عاوز ادعي بس يارب ساعدني

__________________________________________________
بلطجي منطقتنا ده بقة حكاية إحنا منطقتنا فيها بلطجية كتير مش بالصورة اللي هتتخيلوها بس بانواع الأخ ده بقة متفهموش بيكون شارب و لا هو متخلف عقليا أصلا المهم مرة لاقيته بيرمي نفسه علي العربيات و هي ماشية تخيلوا بجد شفتها بعيني يعني ممكن يموت و يجيب مصيبة لواحد برئ
و مرة كمان صحيت من النوم علي خناقة في الشارع شارع رئيسي كبير واقف الأخ في النص و مانع العربيات انها تمشي تخيلوا و العربية اللي تعدي يخبط عليها و يبوظها لصحابها تخيلوا و مفيش أي عسكري و لا ظابط و لا أي حاجة و الناس بردوا اللي يعتبروا بلطجية في المنطقة بيتحايلوا عليه علشان يمشي تخيلوا
حسبنا الله و نعم الوكيل

نفسي أعمل حاجة يارب

__________________________________________________
بالرغم من البلاوي دي كلها الحمد لله حاسس بتغيير داخلي يارب يستمر و المنغصات دي كلها متأثرش فيه
و حاسس بفرج ربنا قريب قويييييييييييييييي إن شاء الله
في حاجة كمان أكتشفتها أمبارح بس تأكدت إن ضعفي أمام البنات هو عيبي أنا علشان أنا كمان عادي تلاقيني ممكن أبص علي بنت محترمة و محجبة مش فكرة أنها تكون لابسة مش محترم ده كده تأكد أنه ضعف مني ربنا يهديني

__________________________________________________
و كمان انا حاسس إن البلد دي حالها مش هيتغير غير بثورة زي الثورة الفرنسية
أنا معفن قوي بعد أما شفت كليب الطفل بتاع المنصورة عادي جدا قمت أتغديت و بسمع دلوقتي عمرو دياب و لا كأن حاجة حصلت بالرغم من إني و أنا بأتفرج كرهت نفسي و البلد و الدنيا كلها
أخيرا

__________________________________________________
كل سنة و أنتم جميعا بألف خير و في سعادة و فرح و طاعة دايما
و يارب تكونوا أصدقائي علي طوووووووول و تزيدوا
و اللهم بلغنا رمضان و أرزقنا صيام نهاره و قيام ليله و شفع فينا الصيام و القران و حبيبك المصطفي صلي الله عليه وسلم

لو في جديد هأبقي أضيفه

سلام