Saturday, August 18, 2007

السلام عليكم و رحمة الله و بركاته
منذ كتابة البوست اللي فات وأنا نفسي أكتب قوي مش عارف ليه
اولا شكل البلوج بتاعي عاجبني قوي و بحبه و كان نفسي أقول كده
ثانيا كنت عاوز أقولكم علي اللي حصل معايا في الدورة و المقابلة
ثالثا خروجي مرة تانية مع صاحبي بتاع البوست السابق
رابعا أصدقائي الجدد
خامسا قضية تعذيب طفل المنصورة و برودي
سادسا بلطجي منطقتنا
سابعا روح التفاؤل بداخلي
.
.
أولا شكل البلوج بتاعي بحس فيه بسعادة و دفء الحمد لله
الدورة و المقابلة
بعيد عنكم المنحوس منحوس رحت لاقيت اللي معايا في الدورة من شركتي بس يعني مفيهاس و لا مزز و لا حتي ناس جديدة اتعرف عليها و كان المحاضر علي قده كمان و كنت كرهت الدورة دي كمان علشان عرفت إنها نص كم و ناس تانية في الشركة بتروح الدورات الأحسن
في أيام الدورة دي كان في موعد المقابلة علشان الشغل الجديد بعد جري و تنطيط الحمد لله وصلت للميعاد و المكان بالثانية و كنت رحت بالبدلة طبعا و كنت حضرت الأول الدورة فكانت الناس فاهمة تقريبا أنا رايح فين بس عملت عبيط
رحت بنت زي القمر عملت معايا المقابلة و مش عاوز أقولكم علي أسمها أسمها لوحده حكاية
بس هي اللي كانت كلمتني في التليفون قعدت تكلمني أنجليزي بصوت مش ظاهر أصلا و طبعا أنا كنت بفهم اللي بأسمعه بس مش بفهم اللي مش بسمعه المهم قعدت اهبل معها في الكلام و تأكدت إني مش هأقبل في الشغل ده بس لاقيتها قالت لي هأبعت الورق بتاعك للشركة اللي عندها الوظيفة و هم هيكلموك يحددوا ميعاد و لما يكلموك أتصل قلنا أدعو أنهم يتصلوا بقة
و انا في الدورة عرفت إن رئيس القطاع بتاعنا طايح في الناس كلها ولما رحت يوم الخميس كنت مرعوب الحقيقة و بيقول للناس كل واحد يكتب اللي بيعمله يوميا و إحنا طبعا مفيش شغل كتير و هو عارف كده بس مش عارف أية اللي هيحصل ربنا يستر
عديت الدورة الحمد لله
__________________________________________________
خرجت تاني مع صاحبي و هو عنده الجديد دايما يعني عنده منحة نصف مجانية بيحاول ياخدها مجانية كلها و بيعمل إختبارات و راح تدريب في كم شركة كده و جاب لي شوية كتب علي الكمبيوتر في الكيمياء مش ممكن الحقيقة و كمان أسعد خبر أنه قابل خطيبته الأولي تاني يوم كنت معه و هو إن شاء الله إن شاء الله هيرجع الموضوع مرة تانية
__________________________________________________
أصدقائ الجدد انا بشكرهم جدا جدا جدا بلاش أسامي بس بجد كلامي معهم بيسعدني فوق ما هم متصورين
__________________________________________________
للأسف شفت فيديو بتاع طفل المنصورة اللي أتعذب
بجد بانصح أي حد ميشفوش لو لسه مشفهوش خصوصا الأنسات
مش عارف أقول أية و لا أية
اللي يضايقك أنك تحس إن الناس اللي نشرت الكليب ده بتاجر به مش عارف ليه
حسبنا الله و نعم الوكيل ميتقلش غير كده تعرفوا نفرض يعني الولد ده ربنا يرحمه كان زي التوربيني كده حرام اللي حصل معه ده
ربنا ينتقم من اللي عمل كده و اللي بيساعد علي كده و اللي بيتستر علي كده و ينتقم منا إحنا كمان علي سكوتنا
حسبنا الله و نعم الوكيل
نفسي اعمل حاجة و أنا باقول كده مش عاوز ادعي بس يارب ساعدني
__________________________________________________
بلطجي منطقتنا ده بقة حكاية إحنا منطقتنا فيها بلطجية كتير مش بالصورة اللي هتتخيلوها بس بانواع الأخ ده بقة متفهموش بيكون شارب و لا هو متخلف عقليا أصلا المهم مرة لاقيته بيرمي نفسه علي العربيات و هي ماشية تخيلوا بجد شفتها بعيني يعني ممكن يموت و يجيب مصيبة لواحد برئ
و مرة كمان صحيت من النوم علي خناقة في الشارع شارع رئيسي كبير واقف الأخ في النص و مانع العربيات انها تمشي تخيلوا و العربية اللي تعدي يخبط عليها و يبوظها لصحابها تخيلوا و مفيش أي عسكري و لا ظابط و لا أي حاجة و الناس بردوا اللي يعتبروا بلطجية في المنطقة بيتحايلوا عليه علشان يمشي تخيلوا
حسبنا الله و نعم الوكيل
نفسي أعمل حاجة يارب
__________________________________________________
بالرغم من البلاوي دي كلها الحمد لله حاسس بتغيير داخلي يارب يستمر و المنغصات دي كلها متأثرش فيه
و حاسس بفرج ربنا قريب قويييييييييييييييي إن شاء الله
في حاجة كمان أكتشفتها أمبارح بس تأكدت إن ضعفي أمام البنات هو عيبي أنا علشان أنا كمان عادي تلاقيني ممكن أبص علي بنت محترمة و محجبة مش فكرة أنها تكون لابسة مش محترم ده كده تأكد أنه ضعف مني ربنا يهديني
__________________________________________________
و كمان انا حاسس إن البلد دي حالها مش هيتغير غير بثورة زي الثورة الفرنسية
أنا معفن قوي بعد أما شفت كليب الطفل بتاع المنصورة عادي جدا قمت أتغديت و بسمع دلوقتي عمرو دياب و لا كأن حاجة حصلت بالرغم من إني و أنا بأتفرج كرهت نفسي و البلد و الدنيا كلها
أخيرا
__________________________________________________
كل سنة و أنتم جميعا بألف خير و في سعادة و فرح و طاعة دايما
و يارب تكونوا أصدقائي علي طوووووووول و تزيدوا
و اللهم بلغنا رمضان و أرزقنا صيام نهاره و قيام ليله و شفع فينا الصيام و القران و حبيبك المصطفي صلي الله عليه وسلم
لو في جديد هأبقي أضيفه
سلام

27 comments:

مـحـمـد مـفـيـد said...

كل سنه وانت طيب بمناسبه رمضان وبجد انت مدون جميل

رفقة عمر said...

بجد مش عارفه اشكرك ازاى على مساندتك لى وكلامك الطيب جزاك الله كل خير
وربنا يوفقك وييسر لك الخير
ويوفقك فى عملك الجديد اللهم امين يارب العالمين
ويارب دايما مودك يفضل حلو كدة على طول
ويبعد عنك اى شئ يعكره اللهم امين يارب العالمين

علوة said...

أنا أسف جدا لعدم التعليق على الموضوع
بس انا عايز منكوا خدمة يا جماعة
يا ريت تدخلوا البلوج بتاعي وتشوفوا الموضوع بالظبط
أنا أسف تاني لعدم التعليق بس انا معتمد على إننا اصحاب
أرجو انكوا تيجوا عندي أول م تقروا الكلام ده

No Fear said...

السلام عليكم
محمد مفيد
منور المدونة عندي بصراحة كنت زعلان انك مبقتيش تدخل و تشرفني بالزيارة بس الحمد لله المدونة نورت بك مرة تانية
ربنا يجازيك كل خير
بلاش إحراج قوي كده
و بعدين أنا مش زي ما أنت متخيل قوي كده
كل سنة و أنت طيب و الأسرة كلها بخير

No Fear said...

السلام عليكم
رفقة العمر
و الله كل اللي قلته حقيقة فعلا
ربنا يجازينا كلنا بالخير
و يهدينا للخير و الطاعة
إن شاء الله ربنا هيكرمني بدعائك
و يديم نعمته علينا جميعا إن شاء الله

No Fear said...

السلام عليكم
علوة و لا يهمك يا باشا
علم و جاري التنفيذ

حــكــايــة said...

محمد باشا
بقالى كام يوم مشوفتش مدونتك
منه لله النت بئا , كل شوية يفصل
بس عازة اقولك انى بتعجبنى تلقائيتك اوى , ربنا يكرمك
و ان شاء الله تقبل فى الشغل الجديد و يكون خير ليك

( رحت بنت زي القمر عملت معايا المقابلة و مش عاوز أقولكم علي أسمها أسمها لوحده حكاية )

هتلبسونا تهمة ولا ايه , معملتش انا مقابلات مع حد :p
بس الا قلى صحيح , اسمها ايه , هه

و ربنا يوفق صاحبك

بس ايه موضوع طفل المنصورة دا , للأسف معرفوش
بقالى فترة شبه منعزلة و حاجة تخنق

البلطجى بئا فشفت زيه قبل كدا , شكلهم بقوا موضة

بالنسبة للثورة فبجد هههههههههههه
صحيح , هم يبكى و هم يضحك
على العموم يا ريت يطلع لنا دم و نتحرك , ربنا كبير بردو

و كل سنة و انت طيب , ربنا يبلغنا رمضان و يرحمنا

و يا سيدى ربنا يخليلك صحابك و كل حبايبك و يرزقك زوجة صالحة يا رب :)

حــكــايــة said...

لا حول ولا قوة الا بالله
خلاص عرفت موضوع طفل المنصورة
حسبى الله و نعم الوكيل فيهم كلهم
منهم لله المرضى دول منهم لله

No Fear said...

السلام عليكم
حكاية
أنا اللي حظي مش حلو علشان مدونتي مكنتش بتنور بيكي
كلنا بنعاني من النت و كمان مش عاجب الحكومة و هتعمل نظام جديد تضحك به علينا
معلش مش حكاية دي يا جدعان حكاية تانية خالص
:))
ربنا يستر علي البلد دي و علينا و نفوق قبل فوات الأوان
ربنا يكرمنا جميعا
معلش أنت عرفتي موضوع طفل المنصورة يارب متكونيش شفتي الفيديو
حسبنا الله و نعم الوكيل
ربنا يجعل رمضان اللي جاي شهر الصحوة يارب
ربنا يسمع منك و إن شاء الملائكة تقول و لك مثله

البنت الشلبية said...

ههههههههههه
محمد ازيك
ربنا يوفقك فى حياتك ويحققلك امانيك
ومتضايقش من البرود لما شوفت الكليب...عادى من كتر ما بنشوف جتلنا الحالة دى انا شخصيا كده
معلش انا اليومين دول مختفية شوية لكن مشغولة بجد وكمان النت وحش اوى معايا
رينا يوفقك سلام

No Fear said...

السلام عليكم
البنت الشلبية
انا الحمد لله فل قولي يارب الحالة دي تستمر علشان في ظروف كتير حواليا بتدفعني ورا
المهم
يعني البرود مش للدرجة دي تلاقيني دايما في المصايب بأكل مش عارف ليه
أنت و لا يهمك براحتك بس أبقي طمنينا عليكي
ربنا يكرمك
كل سنة وأنت بصحة و سعادة يارب

mariam said...

كل سنه وانت طيب يا محمد
انا مسنيه رمضان بفارغ الصبر

بلاش تفكرنى بطفل المنصوره
الواحد مش عارف يلاقيها منين و لا منين

ربنا يكتر اصدقائك
انت تستحق كل خير

saso said...
This comment has been removed by the author.
saso said...
This comment has been removed by the author.
saso said...

احم احم
دايما انا بره الموضوع كده

نرجع للغنوة علي البلوج
افتح يا سيدي الصفحة دي
هـنــا

واعمل اكونت عليها
كده بقي عندك مكان تعمل عليه ابلود للأغاني من الكومبيوتر
بس اختار الاغاني ام بي ثري علشان الموقع اللي بعد كده مبيقراش الرام والحاجات التانية

كده تمام الغنوة اتحملت وعرض عليك اللينك بتاعها
خلي اللينك دلوقت وتعالي نسجل كمان علي الصفحة دي
هـنـــا

اختار شكل البلاير اللي يعجبك-ربنا يخليك متاخدش شكل الكاسيت العتيق ده علشان باكرهه- وبعدين دوس كرييت

لحد هنا ايه الاخبار؟
بعد كده ناخد لينك الام بي ثري ونحطة في القايمة اللي طلعت -سمي الغنوة الاسم اللي عاوزة وبعدين البلاير هيطلب منك تسجل اكونت عليه هو كمان
ويديلك كوود

خد الكود حطه في صفحة التمبليت -يا سلام لو تحت مج النسكافية يبقي كويس اوي- ومتنساش تصغر حجم البلاير في الكود
هتلقي الراندوم ميتين وعشرة خليها ميه وتسعين ولا تمانين علشان ميبوظش شكل السايد بار
------
باعرف اشرح؟ طبعا لا
جرب مرة لو معرفتش توصل لحاجة من الهبل اللي بقولة ..قوللي وانا اعملهولك.. متفقين
---------
اه صح وانا كمان عاجبني شكل الصفحة بتاعتك اوي
:)

No Fear said...

السلام عليكم
مانو
كل سنة و أنت بألف صحة و خير و سعادة يارب
ربنا يبلغنا رمضان و يرزقنا حسن العبادة فيه جميعا إن شاء الله
و الله الواحد نفسه ينسي حاجات كتير مش المسكين ده بس
ربنا يرحمه
و حسبنا الله و نعم الوكيل

ربنا يكتر من أصدقائي الصالحين و كمان يعيني علي حسن صداقتهم علشان بصراحة ساعات بأكون مش كويس في الصداقة
ربنا يخليكي
بتحرجيني بذوقك
مدرستك كانت أية في شبرا؟؟؟؟

No Fear said...

السلام عليكم
المحترمة ساسو
شكرا جزيلا علي معاناتك في شرح الكلام اللي أنت قلتيه ده كله بس أنت بهدلتي المدونة خالص عمالة تحطي و تشيلي بس طبعا شكرا
أنت ضيفتيني علي الهوتميل و لا مش أنت
كل سنة و انت طيبة
سلام

saso said...

اممم يعني ايه دول يادوب تعليقين مسحتهم
شيلهم انت بقي دي حاجة صغيرة
لا انا مضفتكش شوف مين وسلملي عليها
:P

mariam said...

مدرستى كانت
saint mary
و دى الفرع الأنجليزى لمدرسة
bon pasteur
و بيطلق عليها راهبات الراعى الصالح
هى فى شارع شبرا

اى خدمه

No Fear said...

السلام عليكم
ساسو
أنت براحتك تعملي في المدونة اللي أنت عاوزه بس نتدخليش أزعل منك
ماشي
خلاص متزقيش طيب
هأبقي أسلملك عليها بس لما أشوفها أونلاين أصلا
؛)
سلام

No Fear said...

السلام عليكم
مانو
كنت متأكد من كده
مش عارف ليه
كنا قريبين من بعض شوية

catroz said...

تصدق
و الله بدخل هنا بحس انى عارفه الشخصيه دى من زمان اوى
مبحسش ان دى بوستات بتكتبها
تؤ
بحس انك واحد جاى تدردش معانا
بس بستمتع اوى بكلامك
بجد بجد
:D

صحيح
كل سنه وانت طيب يا جميل

Unknown said...

ياااااااااااه

كل ده جواك وعايز تحكيه

بس ان شاء الله كله حيبقى تمام لأنك عايز تنجح فحتنجح فى حياتك ان شاء الله

يارب دايما الى الامام ويارب يتصلوا بيك ويارب نفسيتك متظبطة كدة على طووووووووول

اللهم امييييين

تحياتى
:)

No Fear said...

السلام عليكم
catroz
و الله يشرفني الكلام اللي بتقوليه ده
يعني في مدونات كده تستفادي منها و مدونات ترفيهه زي بتاعتي كده و الله أنت جبتي لي فكرة جامدة قوي دلوقتي

كل سنة وأنت بالف خير

No Fear said...

السلام عليكم
إنسانة
أولا أنا مش مصدق المدونة منورة بتشريفك أنا سعيد بجد
عارف أنك مكنتيش بتعلقي عند حد
شفتي بقة جوايا قد أية
اة و الله و في تاني بس مش كله مرة واحدة
ربنا يحقق كلنا كل اللي نتمناه و يكون فيه الخير
كل سنة وأنت طيبة
ياريت تنوريني علي طوووول

Unknown said...

يارب أمين
وانت طيب
والحمدلله ياسيدي ان في أحداث كتير في حياتك شغلاك

sherehan84 said...

كل سنه وانت طيب وشكرا أوي على سؤالك عليّه واهتمامك ..
على فكره كلنا عملنا زيك لما قرينا عن تعذيب محمد ..زعلنا شويه وبعدين كملنا حياتنا العاديه هنعمل ايه يعني .. أنا عن نفسي عرفت من الدستور الاسبوعي زعلت حبتين ورجعت تاني لحياتي العاديه ..
ربنا يجمعك بحبيبتك يا رب .. ويوفقك في شغل جميل زيك
وجميا أوي موضوع انك جمعت صاحبك بحبيبته القديمه .. يا رب بس يعزموك على الخطوبه هههه