السلام عليكم و رحمة الله و بركاته

بلوجي العزيز وحشني قوي عارف من فترة أنا مقصر في حقك و حاسس إني مهملك حتي البوستات اللي كنت بأكتبها مكنتش زي بوستات زمان بس بجد و الله كنت بأكون حاسس قوي باللي بأكتبه مش مشكلتي إن أنت مش حاسس

بس بردوا حسيت إنك ممكن تكون زعلان مني فحبيت أفهمك علشان متكنش زعلان مني علشان أنا مش بحب حد يزعل مني و خصوصا أنت

.

مش عارف أنا حسيت بنوع من أنواع التكلف و أنا بأكتب فيك علشان بقيت أقابل الناس اللي بتعلق عندي

بس المشكلة إني بحبك قوي و بحب تصميمك جدا ساعات بفكر أعمل بلوج تاني علشان محدش يكون عارفني عليه بس مش قادر بحبك قوي بجد بس مش عارف أعمل أية و بعدين عقبال أما أتعرف علي ناس تاني و أدخل أعلق عندهم و عقبال هم ما يتعرفوا علي هياخد وقت و كمان مش هأقدر أخبي نفسي و هيبان إن أنا اللي عملت البلوج ده مش عارف أعمل أيةالمهم متكنش زعلان و ربنا يقدم ما فيه الخير

.

المفروض بقة تخلي عندك دم و تسألني عن أخباري و حالي

.

بص ياسيدي في التمهيدي للأسف طبعا كعادتي بأخر كل حاجة للوقت الحرج زي التقارير و التحضير اللي مش بحضره بالرغم من إن اللي المفروض أحضره هو مجال شغلي بس الكسل علي كمان حبه إن الوقت بيجري فعلا يعني أنا باروح الكلية يوم الأتنين من تسعة الصبح لسبعة بالليل عقبال اما بارجع بأكون أنتحرت و عقبال أما أفوق قوي بيكون يوم الخميس جه الحمد لله أفتكرت إن النهاردة الثلاثاء هأقوم لما أخلص أتفرج علي المصارعة علي الأية أر تي بس للأسف جون سينا مش هيلعب لمدة سنة يا خسارة

أنا نسيت كنت باقول أية أة كنت بتكلم عن التمهيدي بس هأحاول أجتهد و أظبط نفسي شوية و ربنا يكرم مش عارف فعلا الأيام بقت بتجري بسرعة رهيبة ربنا يستر

.

الشغل زهقان منه و لما ربنا بيكرمني فيه تلاقيني أتخنقت من الناس بس انا بأشوف ناس في التمهيدي مثلا أنا الحمد لله أحسن منها في الشغل اللي أنا فيه مليون مرة بس هتقول أية فعلا ميملاش عين إبن أدم غير التراب

.

في موضوع كده هتكلم فيه في النص يمكن محدش ياخد باله منه أنا زي ما أنت عارف أناني قوي مش عارف ليه بأحب أكون متميز و وفريد يعني الحاجة اللي بعملها محدش تاني يعملها مش عارف ليه حتي إذا كان لو هو عملها مفيش أي ضرر علي بس مش عارف باتضايق أكيد ده غلط بس مش عارف أعمل أية بأحاول أرود نفسي يعني فاكر زمان لما كان في أتنين من صحابي مثلا يقربوا من بعض كنت باتخنق قوي حتي لو كان ده بسبب ظروفهم هم و إنشغالي أنا بس أنانية مش عارف ليه الموضوع ده لسه موجود معايا يارب أقدر أسيطر عليه قبل أما يدمرني

.

في واحد مش عارف ليه هو بيعمل معايا كده بالرغم من إني واثق فيه قوي و هو عارف و متأكد من ده و بيعملي زي إختبارات كده هو مش واثق في أو مخبي عني حاجات كتيرأو كل حاجة عنه مش عارف ليه خايف من أية مش عارف علي العموم ربنا يسهله و يهديه أو أنا هأقلبه ياريت ياخد باله بدري

.

من أسبوع تقريبا أخويا عمل كارثة فعلا يعني و كل اللي في البيت عرف بها و مش هأقولكم هي أية علشان ربنا أمر بالستر الغريب اللي في الموضوع بقة أبويا حاسس أنه مش بيكلمني كويس و زعلان مني أنا ليه هو ده السؤال مش عارف و بيكلم أخويا عادي جدا

دي نقطة النقطة التانية بالنسبة لأبويا كل أما أحاول أفهمه يعني أنه لو طلب مني حاجة هأعملها يعني علشان هو ميتعبش نفسه في حاجات مالهاش لازمة و هو ساعات بيكون تعبان بيصدني مش عارف ليه أو للحق ساعات بيقولي علي أتفهه االحاجات اللي بيعملها و لما أسأله عن حاجات تخصنا يرد علي رد ناشف مش عارف ليه بالرغم إن لو حد من الشارع سأله عنها ممكن يعمل له البدع و يفهمه عمل أية و هيعمل أية

علي العموم عادي الحمد لله أهم حاجة رضي ربنا عني هو أينعم أنا ساعات باكون خلاص علي أخري و هأنفجر فعلا بس الحمد لله كفاية سعادتي ببداية عودتي لربنا تاني ربنا يديمها نعمة يارب

.

يارب يعدي الكم شهر الطحن بتوع التمهيدي علي خير علشان كل دكتور يهرش يقولنا عاوز تقرير عن الهرشة دي فاضيين إحنا نلف علي المكتبات كفاية إننا بنحضر أصلا فاكرينا صيع

.

الناس اللي فوقنا عمالين يكسروا في شقتهم من عشر أيام و صداع مش عاوز أقولكم و فتحوا السقف علي بعض مش عارف أنا كانوا هيعملو سلم داخلي بينا و بينهم تقريبا

.

التمهيدي فيه ناس كتير ربنا يستر ها فاهم

.

بفكر أخلع من الواد اللي معايا في الدي إس إل و أجيب واحد لوحدي أية رأيكم

.

منذر عاملها مناحة علشان هيدخل الجيش مش عارف ليه ربنا يكرمه و ميدخلش

منذر نفسي أشوفك يا بني

.

محمد مفيد مخنوق من المدونة التانية بتاعت الأغاني مش عارف ليه و كل شوية يسألني أنت عملت أية يوم سبعة و عشرين رمضان مش هأقولك يا محمد خلاص

.

هههههههههههههههههههههههههههههه الأهلي ههههههههههههههههههههههههههه

.

صوتي من يوم السبت عامل زي صوت القطر كده ربنا ما يوريكم بس الحمد لله شكله بدا يتعدل شوية

.

أنا سعيد قوي إني قدرت أحول الدعاء اللي شغال ده لإم بي ثري علشان أقدر أنزله علي البلوج

أنا تعبت بقة بصراحة هأقوم أتفرج علي المصارعة

كفاية عليكم كده النهاردة

بلوجي مش عوزك تكون زعلان

سلام

وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللّهَ يَجِدِ اللّهَ غَفُورًا رَّحِيمًا [110] النساء

***

إِنَّ اللّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللّهِ فَقَدْ ضَلَّ ضَلاَلاً بَعِيدًا [116] النساء

***

قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ (53) الزمر

حسبنا الله و نعم الوكيل

***

كنت راجع من الشغل ماشي لاقيت نمرة مصطفي صاحب البوابة بترن علي بعد شوية قلت أرد الرنة كما هو متبع حلو لاقيته فتح علي قلت مش مشكله نسلم عليه لاقيت صوت جهوري غريب غير صوت مصطفي قالي حضرتك أنا لاقيت الموبيل ده في التحرير و عاوز حد يجي ياخده قلتله طيب خليك و أنا هأكلمك تاني قلت أكلم محمد مفيد علشان هو قريب من التحرير و كمان أحتمال كبير مادام مصطفي في التحرير يكون هيقابل محمد كلمت محمد قالي أنا في التحرير و مستني مصطفي من الساعة أربعة و كانت الساعة ساعتها خمسة و ربع قلت حلو يبقي محمد يروح للرجل يقابله و ياخد منه الموبيل لاقيته بيقولي كلم انت الرجل و أديه نمرتي وخليه يكلمني من علي موبيل مصطفي و أقابله علشان مش معايا رصيد قلتله ماشي كلمت الرجل عاش في دور الغبي بطريقة فظيعة أنا عبدالهادي بتاع الفول و عاوز أروح و ربنا يكرمك ياباشا أنت اللي تيجي تاخده و بسرعة عاوز أروح و خايف و من الأخر كده عاوز الحلاوة خمسميه جنيه قلتله ماشي يا عم كلم الرجل ده علي محمد مفيد و هو هيظبطك بجد عمري ما شفت غباوة كده يعني قالي لا مش بعرف أتكلم في الموبيل قلتله طيب و قالي في واحد كلمني من شوية و قالي هأكلمك تاني قلتله يا عم الحمار في سري طبعا أنا اللي كلمتك قالي طيب يبقي أنت اللي لازم تيجي تاخده و عاوز أمارة يا عم الغبي الموبيل مش بتاعي أديك أمارة إزاي قلتله أستني بس هأبعتلك الرجل ده و هو هيظبطك كلمت محمد مفيد تاني علي أساس هو اللي يكلمه و خلاص من أي حتة قالي أنا كلمت الرجل و هو صوته عجيب كده و قالي كلام غريب

رحت قلتله علي طول شكلكم كده بتشتغلوني

و طلعوا و لاد ال بيشتغلوني صحيح

يرضيكم كده أنا يتعمل في كده

أنا عاوز راجل يجيب لي حقي من الناس دي

مصطفي و محمد مفيد

مطلوبين أحياء أو أموات

حسبي الله و نعم الوكيل

مش هأسيب حقي

و حياة

ماشي ماشي

منوعات

انا كنت رايح مع واحد مشوار مهم للواد ده كنت خلاص علي وشك أبيعه و أروح أجيب الموبيل

من الأول خالص حسيت انها أشتغالة بس كان في دماغي ممكن يكون اللي بيكلمني ده واحد صاحبهم تالت بصراحة مستحيل يكون مصطفي في نفس الوقت قلت لأحسن أطلع غلطان و الموبيل يضيع من الواد معدوم الضمير مصطفي و كمان هو لسه مضيع موبيل من فترة قلت هو مسطول و شكله بيضيع موبيلات و محمد مفيد الله يسامحه مش عارف إزاي مضحكش يعني

الرجل يا جدعان مصطفي معدوم الضمير يعني عاش في دور غبي بدرجة مش ممكن يعني و المشكلة إني كنت باحاول مزعلوش علشان يستني

هو أنا عارف إن انا العبيط علشان صدقت و شيلت الهم للواد معدوم الضمير بس اعمل أية ده أنا

الواد صاحبي اللي كان معايا بيقولي أنا لو الموبيل بتاعي اللي ضاع مكنتش هأعمل اللي أنت بتعمله

يا جدعان ربنا يكرمكم عاوز الإنتقام من الأتنين متعرفوش انا فضلت بتاع ساعة متوتر بعد الموقف ده

يا حد ينتقم لي او يقولي أنتقم إزاي

علشان أنا خلاص مش قادر

السلام عليكم و رحمة الله و بركاته

لمن يهمه الأمر

قبلت في التمهيدي و الحمد لله

دعواتكم بالنجاح بقة

التفاصيل لاحقا

السلام عليكم و رحمة الله و بركاته

أزيكم يا شباب أخباركم أية؟

يارب تكونوا بخير

أولا بالنسبة لي زي ما قلتلكم كنت مقدم في التمهيدي الحمد لله مقبلتيش بس قالولي لو جبت ورقة من الشغل تفيد أنه موافق أنك تكمل و يعتبر جهة بحثية بالنسبة لي ممكن ممكن يوافقوا طبعا بعد بوس الأيدي في الكلية و بما أني علشان أجيب الورقة دي لازم أبوس الأيدي في الشغل يعني هأبوس أيدين كتير اليومين دول أو خلاص بدات يعني بوس الأيدين و يارب أقبل

بقيت منبطح علي رأي مصطفي

المهم دعواتكم أخلص الورقة دي و ألحق أبوس الأيدين في الكلية

ثانيا الجميل بقة أني لما عرفت أني مقبلتيش في التمهيدي كان عادي لم أتضايق قوي يعني زيي ما كنت متخيل و الحمد لله كان ربنا هداني إني أسمع درس التوكل للأستاذ عمرو خالد

كنت متخيل نفسي لو مقبلتيش هأورح أقفز من فوق قصر النيل

مشكلتي إني مش مخطط هاعمل أية لو مقبلتيش مش زعلان بس مش عارف هأعمل أية

بالمناسبة هأقدم في السحب بتاع الجرين كارد لأمريكا و عمال أبعت لشركات

شركة قطر للبترول كانت عاملة إعلان في الجرنال يوم الجمعة مش عاوزة كيميائين عاوزة وظائف تانية عملت عبيط و بعت لهم تفتكروا يردوا علي

:)

...

موضوعي التاني عمرو خالد

انا عرفت عمرو خالد من و أنا في أولي كلية و بدات أسمع له شرايط و أشتري السلاسل بتاعته و كمان كنت متابع الأهرام العربي كانت بتنزل شرايط معها له

كنت وصلت لمرحلة من الحب له كبيرة قوي وصلت لدرجة كنت قربت أحفظ الشرايط بتاعته و كنت برتاح لصوته بس للأسف دلوقتي مش لاقي عمرو خالد اللي كنت بسمعه الأول

زمان كنت بأشتري الشرايط بتاعته من مصروفي و أنا طالب و ماكنش عندنا دش دلوقتي بقيت مش بتفرج علي البرامج بتاعته بالرغم من أنها بتتذاع أكتر من مرة في أوقات مختلفة و ببلاش

يارب يرجع عمرو خالد بتاع زمان

أنا عارف في ناس هتختلف معايا بس ده رأيي

بالمناسبة تقريبا وشي نحس علي عمرو خالد محدش يقوله أنا كنت عارف الجامع اللي بيقول فيه الدرس بتاعه الأول في العجوزة و لما ربنا كرمني يعد جهاد للنفس و تشجيع لنفسي حضرت درس عمري ما أنساه كان أول حلقة من قصة سيدنا ابراهيم عليه السلام و خرجت منها أشتريت شريطين الشباب و الصيف و بعد كده رحت المصيف و لما رجعت كان أتنفي لأكتوبر و بعدين أتنفي بره و بعدين أتغير للأسف ما أنا كنت قاعد أية اللي خلاني أروح بس

:)

.....

النهاردة قابلت مفيد أبا عبدالله و عبد الرحمن ربنا يبارك فيهما و منذر و ابن ناصر و مازن أبو العلا و مصطفي

و أنا رايح أقابلهم سمعت حتة أغنية في الميكروباز اللي كنت راكبه هي تقريبا للمطرب الكبير عماد بعرور البحة دي مش موجودة غير عنده أسمها تقريبا أو بتقول خش عليه خش عليه أغنية أية عجب

....

عادي بقة أصبح شئ عادي جدا إني أقابل مدونين عادي جدا ناس عادية خالص مالهاش لازمة مش عارف مين محمد مفيد ده و لا مصطفي و لا منذر و لا ابن ناصر و لا أبوالعلا

مش عارف ناس خنقة دماغها فاضية

طبعا بهرج و بستهبل يا جدعان الناس دي بجد بتحب مصر قوي و نفسها تغيرها للأحسن قوي و ربنا يوفقهم و يهديني لطريقة أشترك معهم في التغيير ده

بس أسوأ حاجة فيهم المواعيد الغريبة اللي بنتقابل فيها

ياريت كده يختاروا أيام و مواعيد مناسبة

ملحوظتين

محمد مفيد الثلاثاء

ابن ناصر السبت

مصطفي الخميس

متنساش يا مصطفي

و متنساش كمان يوم الجمعة اتصل بابن ناصر

:)

..........

علشان تعرفوا أن اتحاد الكرة بيحب الزمالك و لاعيبته اهوة موقف الدوري علشان محدش يدعي علي اللعيبة اليومين دول كفاية الدعاء اللي أخدوه في رمضان بس للأسف مش قادر يوقف الدوري أكتر من كده

يعني لا حول و لا قوة إلا بالله هندعي عليهم تاني من يوم الجمعة

.......

هأحكي لكم موقف بوس الأيد اللي في الشغل عاجبني قوي

طلعت أقول لرئيس القطاع عن الورقة دي غبائي قلتله إني مقدم و مقبلتيش قالي ماشي شكلك ماشي في الموضوع من غير ما تقولي هأجيب لك الورقة و ماليش دعوة بك بعد كده بطريقة مقلقة يعني

و بعدين حاولت أحور عليه و أقوله كنت مقدم قبل كده و كنت قلت لحضرتك قالي أنا دماغي مش دفتر

و أفتكر لي موقف قديم معه و ذلني بمكافأة كان أدها لي بعد فترة قليلة من شغلي كأني شحات و فكرني بموقف غبي كنت عملته معه

و قالي أنت مش هتكمل للعلم علشان أنت كسول و لو مش كسول هتكون مهمل و أية كلام من اللي قلبكم يحبه و في الأخر قالي كفاية عليك كده صعبت عليه من اللي عمله في مش مشكلة و لا يهمني

بس أدعو لي ربنا يوفقني و أقبل

ربنا يسهل و يكرم يارب و يقدم ما فيه الخير

........

عناوين الأخبار

النهاردة كانت محاكمة ابراهيم عيسي و أتأجلت للشهر اللي جاي

مصر كسبت كأس العالم العسكري البطولة اللي مش عارف لازمتها أية

يقال أن الدكتور فاروق الباز قال مصر في النازل و العلماء لم يقدموا لها شيئا يعني ممكن يكون كويس إني مقبلش في التمهيدي

سبحان الذي قدرنا علي صوم رمضان

في ناس كتير زعلان منها

الجو اليومين دول رائع مش عاوز أقولكم الهوا و أنا راجع من الشغل بيكون جميل قد أية

بالمناسبة أشترينا البويلر في الشغل بس إحنا ناصحين أشتريناه و المدير بتاعنا في دورة علشان نمتص الناس المسخنتية و لما يرجع يكون بقالة فترة و محدش يسخنه بس هو هيتخسن بردوا بس أنا ربنا يسهل و أظيطه ما أنا منبطح خلاص

السلام عليكم و رحمة الله و بركاته

أزيكم ياشباب

مش عارف كان نفسي أكتب حاجة قوي و مش عارف فكرت أكتب لكم كل سنة وأنتم طيبين

طبعا كل سنة و أنتم طيبين

بس قلت لا عاوز أكتب حاجة تاني مش عارف قررت مش هأكتب طول ما أنا مش لاقي حاجة أكتبها

مش عارف ليه خطر علي بالي هذا الحديث بحثت عنه و و جبت النص بتاعه يارب يكون سليم

كل سنة و أنتم طيبين

و الله مش عارف أشمعني الحديث ده

.

العمير والنغير
عَنْ أَنَسِ بْنِ مَالِكٍ رضي الله عنه قَالَ : كَانَ رَسُولُ اللّهِ أَحْسَنَ النَّاسِ خُلُقاً. وَكَانَ لِي أَخٌ يُقَالُ لَهُ أَبُو عُمَيْرٍ. قَالَ: أَحْسِبُهُ قَالَ: كَانَ فَطِيماً. قَالَ: فَكَانَ إِذَا جَاءَ رَسُولُ اللّهِ فَرَآهُ قَالَ: «أَبَا عُمَيْرٍ مَا فَعَلَ النُّغَيْرُ؟» قَالَ: فَكَانَ يَلْعَبُ بِهِ )) وفي يوم من الأيام رأى النبي صلى الله عليه وسلم عميراً يبكي فقال : " ما يبكيك يا عمير ؟ " فقال : يارسول الله لقد مات النغير . فجلس النبي صلى الله عليه وسلم ساعة يلاعبه ، فمر الصحابة فوجدوا النبي يلاعب عميراً ، فنظر إليهم النبي صلى الله عليه وسلم وقال : " مات النغير فأردت أن ألاعب العمير" رواه البخاري

صلي الله عليك وسلم يا رسول الله

ما تيجي نتصاحب و نحب بعض
أنا و أنت
أنا عارف أنك من ساعة أما شفتيني
و أنت مش قادرة تنسيني
صح
و أنا كمان بالرغم
مع إني كنت بحبك قوي وبعد كده مكنتش مرتاح لك و مش طايقك
بس بجد خلاص
أتعودت عليكي
و شكلي مش هأقدر أستغني عنك
و شكلك كده نصيبي اللي ربنا قسمه لي
في الدنيا الجميلة دي
انا أقتنعت بكده النهاردة
معرفش ليه قعدت أفتكر
مواقف كتير و فرص كتير عديت علي
مش عارف أية اللي خلاني أسمع أغاني وائل كافوري النهاردة
ما وعدتك بنجوم الليل و ليل و رعد و بعترفلك
أفتركت أول مرة رحت أسكندرية و أنا في أجازة الإنتقال من إعدادي لثانوي فاكر يا أهبل و الجزمة الحمرا و الساعة الجديدة
و أفتكرت أسكندرية كل مرة رحتها بعد كده و مرسي مطروح و كل مرة هبلت فيها
و أفتكرت رحلة الأقصر و أسوان
و أفتكرت فيلم كاميلوت
و أفتكرت يوم السبت اللي فات لما نمت و أنت لوحدك و صحيت فطرت في العشا
و أفتركت مرات رمضان كلها اللي كنت بفطر فيها لوحدي
و أفتكرت رمضان و الجو بتاعه لما كنت في أيام الدراسة بعد الفطار و دخولي أوضتي بعد الفطار و وقوفي في الشباك
و أفتكرت هاني و اللي عمله و الفرصة اللي ضاعت
و أفتركت أبتدائي و أحمد و طارق
و بردوا اللي طارق عمله و ضيعت الفرصة كمان مرة
علشان تعرفي أنه نصيبنا أننا اتكتبنا لبعض و مالناش غير بعض
و أفتكرت و أفتكرت و أفتكرت
و أفتكرت السحور عند محروس يوم الجمعة اللي فاتت
و أفتكرت كلام حسام و حال تامر و عمرو
و معه أفتكرت و أفتكرت
و السواد اللي جوايا زاد و زاد
أنا علي فكرة معفن قوي
و اسود قوي من جوه
يمكن علشان كده ربنا كتبك لي
أوعي تكوني أنت كمان عملتي حاجة علشان كده ربنا بيبتليكي بيا
أوعي ها
أنا أسف سيبتك أمبارح بتصلي التهجد
و دخلت من وراكي فيلم مات ديمون
بس أنت عارفة حالتي كانت عاملة إزاي
بسبب الفطار اللي كنت فيه أمبارح
بتاع يوم الأحد و العربية الحمرا و كده يعني
و كمان النهاردة
عملت ذنب ما يعلم به إلا ربنا في ليلة القدر
بس أنا أسف
و أوعدك منساكيش تاني
و تكوني معايا في كل مكان
و عمرنا ما هنفترق تاني
بحبك يا وحدتي

السلام عليكم و رحمة الله و بركاته

أزيكم يا شباب

أخباركم أية محدش بيشوفكم ليه وحشني و الله أنا هأحاول أخلص قبل أما البوابة يكلمني علشان كان معايا علي التليفون دلوقتي و هو شكله مش هايسيبني غير لما أروح معه

المهم

البوست ده لازم يكون له مقدمه ليه بقة علشان أنا هاتكلم كالعادة عن حاجات كتير منها شخص عظيم و محترم و هو رمز بالنسبة لناس كتير بالرغم من جهلي به بس أنا هأمحو جهلي به قريب و منها حاجات خنقتني و ٍاستفزيتني و منها حاجات تافهة نوعا ما بس أنا حابب أتكلم عنها

أولا الشخص المحترم الرمز بالنسبة لناس كتير هو الأستاذ أبو الفتوح شوشة أنا بصراحة معرفتي به من خلال المدونات بس و إن ناس كتير بتطالب بإطلاقه من محبسه و صاحب البوابة عامل البوست الأخير عنه و بيقول أنه أتنقل للمستشفي في حالة حرجة و هناك من الإهمال الكتير تجاهه

أنا شايف في الموضوع ده أمل كبير قوي يعني تخيلوا معايا إنسان عنده ثمانية و سبعون سنة مسبب خوف لهذا النظام العسكري يبقي فعلا الخوف موجود في نفوسهم لدرجة أنهم خايفين من إنسان عنده ثمانية و سبعون سنة

يارب يكون عندنا دم و نزيل الخوف من جوانا بقة

أنت خصوصا خلي عندك دم و حس علي دمك

.

الموضوع التاني

أنا من أول رمضان مصليتش التراويح غير أول ليلة اللي هي يوم 30 شعبان و من ساعتها مش بصلي التراويح في الجامع علي ما أتذكر و كم مرة في البيت و كتير مش بصليها خالص طبعا غلط

و أسبابه لو صح يكون ليه أسباب هي عدم وجود شيخ أستمتع بصلاته عندنا و الشيخ الكويس بعيد بصراحة عن البيت و مش بلحق أروح و بكسل المهم النهاردة أستجمعت قوتي و حاربت الشيطان و قلت زي ما عمي جزاه الله خير ما لايأخذ كله لا يترك كله و ياواد متخليش ولا إبليس الصغيرين يضحكوا عليك و نزلت و بسم الله ما شاء الله لاقيت الناس بتصلي في الشارع كأنها صلاة الجمعة قلت حلو ربنا يكرم و طلعت للجامع و وجدت لنفسي مكان و صليت فوق بس مدخلتيش الجامع نفسه مش عارف أشرح لكم إزاي المهم صليت العشا و دخلت الجامع معرفتي بردوا أجد مكان كويس أصلي فيه رجعت تاني لمكاني و صليت أربع ركعات من التراويح المهم بعد كده دخلت جوة لاقيت الشيخ اللي كان بيخطب في يوم الجمعة المشهود اللي كتبت عنه و فجأة ببص شدني لون أحمر ببص لاقيت بنات كتير بتصلي ورا في أخر الجامع بدون فاصل و لا حاجة و الموضوع ده خنقني قوي يعني لو مفيش مكان خلاص تصلوا في البيت و الله أعلم أحسن يعني خصوصا الصغيرين منكن قلت ياواد أنسي و متبصش و متتخنقش من الموضوع ده فجأة لاقيت تراك تراك ببص لاقيت شباب زي الفل شايلين حاجة كده زي صناديق الحاجة الساقعة من الحديد بسم الله ماشاء الله يعني الواحد لو وقع علي دماغ حد مش هيقوم من مكانه و ماليان زجاجات مياة فيتراك و علشان الإعلان شايلين الورق من عليها زي الأفلام كده المهم للأسف بقة في زجاجات ساقعة و زجاجات ساخنة فالناس بتتنافس علي الساقع طبعا يعني خلاص هنموت من العطش ده حتي الشيخ ربنا يكرمه مش بيتعبنا و بيقرا خمس أيات تقريبا في الركعة المهم و الله زعلت قوي و نزلت روحت للبيت و قلت مش مكمل أو أصلي التراويح في البيت و هو تقريبا مش هيحصل

فين أيامك يا شيخ أمير ربنا يكرمك مكان ما أنت موجود

.

ربنا يكرمكوا أدعو لي بالهداية علشان كل فترة في رمضان كده بأضعف و أعمل بلاوي

و كمان أدعو لي علشان أقبل في التمهيدي علشان النتيجة المفروض ظهرت و أنا خايف لأحسن مكنش قبلت و هيكون ده يليه بتاع تسعين بوست كأبة دة لو لحقت أكتب قبل أما أكون في قاع النيل

و كمان أدعو لي ربنا يفرج كل همومي و ينهي وحدتي دي بقة علشان خلااااااااااااااااااااااااص

.

اللهم اهلك الظالمين من لاعبي الزمالك

.

تلفزيون رمضان

أنا الحمد لله مش متابع غير ظاظا و جرجير بالرغم من تدني مستواهم بالنسبة للسنة اللي فاتت و كمان متابع يتربي في عزو بالرغم من تافهتها بس هي اللي بتيجي في الوقت اللي فيه بأكون قدام التلفزيون

مش عارف ليه طالبة معايا أتكلم شوية عن الإعلانات

أول في إعلان

سمنة جنة جنة جنة أة جنة

و في إعلان عن أية أر تي رياضة جامد جدا خصوصا لما بيفتح الدولاب يطلع له المعلق

و كمان إعلان تي إي داتا جامد

و إعلانات موبينيل بتاعت ياسمين و القرد

و إعلان هيونداي لما الميكانيكي بيقوله خمساية تلاتة و قول سبعمية جنيه

للأسف أنا مش متابع إعلانات كتير لأن تقريبا بتوع القنوات الفضائية بيحترموا و طبعا مش بعرف أجيب تلفزرونا المخضرم اللي بيكون مردوم إعلانات علشان الإريال مش هيكون مظبوط

لو أفتكرت حاجة هأضيفها

.

أنا مخنوق من الشغل و نفسي في شغلانة تانية و مش عارف فكرة أني أفتح مشروع لوحدي تروادني أية و منين الله أعلم

كنت زمان و أنا في الكلية مش عارف ليه كانت عندي رغبة أفتح محل بقالة فكرة جامدة جدا

.

خلال كتابتي للبوست اللي وشه حلو ده

كلمت مصطفي علي الموبيل و محمد مفيد و روني و ساسو مش ممكن ساسو كمان علي المسنجر ده شرف كبير لي

.

أستلمنا حتة جزمة سيفتي في الشغل روعة حاجة كده بتاع 3 كيلو بتوجع الرجل اية مش عاوز أقول كم

.

في أية كمان أتكلم عنه

.

كفاية كده النهاردة

بس نفسي أقول

الحمد لله

الحمد لله

الحمد لله

أستغفر الله

أستغفرالله

أستغفر الله

السلام عليكم و رحمة الله و بركاته

أزيكم يا شباب

أنا بعد تفكير كبير أكتب و لا لا الحمد لله قررت أكتب

تقريبا أنا حسدت نفسي في البوست اللي فات و تقريبا اليومين دول من أيام الكأبة مش عارف ليه

بالرغم من إني بحب لما كلهم هنا يخرجوا و أقعد لوحدي أمبارح و النهاردة أنا قاعد لوحدي

بأشوف كل شوية الصورة اللي انا حاططها في البروفيل بتاعي و كمان حاططها علي الموبيل بحس بيها قوي فيها كمية وحدة مش موجودة غير عندي مش عارف في حد تاني بيحس بها و لا لا

حاولت أفكر في حاجات إيجابية زي مثلا صدقاتي الجديدة الجميلة اللي مكنتش أحلم بيها زي الكم بوست اللي فاتوا بس محصلش للأسف تغيير مش عارف ليه

إحساس الوحدة رجع لي تاني يارب خير

هو رمضان عموما بيقلب علي موضوع الوحدة ده بس بما إني كنت بأشغل نفسي أو بنام كنت مش مركز في موضوع الوحدة ده بس أمبارح و النهاردة مش عارف ليه رجع

تقريبا هي طلبت نكد خلاص

بردوا في حاجات في رمضان مش عارف أستمتع بها زي التروايح مش عارف أصليها للأسف

و كمان في شئ تافهة بس كان نفسي أعمله السنة دي قوي

السنة اللي فاتت أيام الكأبة اللي بحق كنت في أمتحانات و كنت بأصحي في السحور علشان أذاكر لأول مرة المواد قبل أما أروح أمتحن الصبح كنت بسمع برنامج قعدة سحور علي نجوم أف إم مش عارف أسمع البرنامج ده خالص هو شئ تافهة بالنسبة لكم بس كنت ساعتها بحس إني نفسي أسمعه كنت بحس أنهم صحاب مع بعض عايشين حياتهم و أنا في خنقة المذاكرة اللي مش فيها فايدة

حاولت أفكر أتصل بأي حد أكلمه بس بجد مكنتش عارف أقول أية و أكلم مين

فكرت في الشات دخلت أهوة و مفيش حد الطبيعي يعني

الحمد لله علي كل شئ

و الله الواحد بوستات الكأبة دي وحشته قوي

بس ياريت تقروا بردوا الكم بوست السابقين دول بعد البوست ده علشان ميجيش لكم أكتئاب أنتم كمان

مش عارف أغير الصورة و لا أية بس بجد الصورة دي جامدة جدا

أنا أهم حاجة عندي أن الموضوع ده ميكنش من غضب ربنا علي علشان أنا كل أسبوع تقريبا لازم أعمل بلوة كده في رمضان و كمان يارب الموضوع ميطولش معايا

كفاية عليكم كده

تصبحوا علي خير

بوست طويييييييييل
السلام عليكم و رحمة الله و بركاته
أزيكم يا أصدقائي يا للي مش بتتدخلوا في رمضان
و طبعا الناس اللي بتعلق في رمضان زي الفل
المهم جه علي بالي دلوقتي و أنا بكتب البوست ده في الوورد علشان النت فاصل و هيجي بعد نص ساعة إن شاء الله أكتبه و أسميه مراحل مش عارف ليه مع أنه كل جزء لوحده بس أنا بحب المترو شوية و المرحلة الأولي من كذه لكذه بنعجبني قوي بالرغم من أنها ساعات بتكون محطتين تلاتة
المهم
المرحلة الأولي
يوم عجيب
اليوم ده أو الليلة دي قضيتها مع محمد مفيد و صاحب البوابة و منذر و ابن ناصر و صديقة مازن هههههههه و أحمد الجيزاوي و نوشة و شمس الزناتي تمام كده
قعدنا علي القهوة شوية و بعدين أتمشينا للجحش في السيدة زينب ثم للكرنك صاحب القنبلة في السيدة بردوا ثم قهوة معفنة ثم للتحرير ثم رمسيس و صلاة الفجر ثم للبيت ثم للشغل ده كده لوحدي ثم يوم تهييس في الشغل علشان منمش منهم

_______________________________________
التفاصيل
يبدأ اليوم مش عارف أقول اية

الأربعاء
هو عادي جدا رحت الشغل و بعد خنقة الشغل الطبيعي يعني و أنا بجهز نفسي علشان أروح لاقيت أختي بتتصل بي تقلي أن جوز خالتي توفي إلي رحمة الله ربنا يرحمه و طبعا من الشغل علي الدفنة علي طول الغريب إني أشتركت في الغسل شوية بسيطة جدا في الأخر يعني مش عارف جت لي الشجاعة أدخل إزاي مش عارف لاقيت نفسي داخل كده ببساطة
و بعدين توجهنا للدفن و طبعا فطرنا في علي شوية عصير عند خالتي و بعدين روحنا و بعدين فطرنا في البيت علي العشا كده الغريب إننا مكناش جعانين كلنا خالص
علي فكرة جوز خالتي كان تعبان قوي قبل كده كنا متوقعين يعني قضاء ربنا و الحمد لله ربنا أكرمه في أيام مباركة و هو يستاهل ربنا يرحمه

.
كنت مظبط الخروجة مع محمد و مصطفي و لما عرفت قلت خلاص مش هينفع أخرج علشان العزاء سبحان الله ربنا كان مقدر لي الخروج معهم و عرفت أنه موصي أنه مفيش عزاء العزاء في المدافن و قت الدفن فقط
و رجعت هلكان طبعا بس طبعا بما أني متفق مع حبايبي خرجت و أتقابلنا في البورصة محمد و مصطفي و منذر و باقي الناس اللي فوق

.
الكلام اللي بينا
اولا عن موضوع تعذيب عرفناه من أحمد الجيزاوي و بعدين الأهلي و الزمالك و المعركة كانت حامية الوطيس بين محمد مفيد و ابن ناصر و صديقة مازن

.
المهم حكاية مازن ده أحنا منعرفش أسمه أنا شخصيا مش عارف أسمه هو ممكن يكون نور بس مش متأكد
أخونا مصطفي صاحب البوابة أستلم مازن من ساعة أما جه أنت حزب أية أنت أفكارك أية و مسبوش و مازن مش عاوز يتكلم علي راحته هو في الأول تقريبا كان خايف مني أنا و بعدين أتخنق من مصطفي بجد مصطفي يعني مسبوش و أنت شكلك شيوعي و أنت مش عارف أية كان خلاص هيجننه
مش ممكن يا جدعان أنا مش قادر أكتب من كتر الضحك بامانه

.
و بمناسبة مصطفي و مازن علشان أكمل كلام عن الناس في مواقف كتير هأقولها عليهم و أكمل
و أحنا بنتسحر عند الجحش في واحد نادي علي الناس اللي بتشتغل عند الرجل فراح مصطفي قال لمازن بيكلمك أنت مازن بكل بساطة راح باصص و كان خلاص هيكلم الرجل الرجل قال للواد انت سيبتنا ليه مش عاوز أقولكم مازن خلاص كان هيروح يقعد معهم
مش ممكن و الله

.
موقف تاني مازن كان معه شنطة قام يسلم علي نوشة و شمس الزناتي لما وصلوا و أحنا علي القهوة مصطفي أخدها منه قبل اما يقعد مازن أتخض جدا أفتكرها أتسرقت بجد بس فاق لنفسه علي طول

.
و كمان مصطفي مع مازن لما كنا علي القهوة في الأخر مازن جه له تليفون قام جري علي طول تقريبا من أهله علشان أتاخرنا إحنا فجاة مشفناش مازن قعدنا نقول راح فين و و قعنا من الضحك

.
مواقف مازن بقة مع مصطفي
هو تقريبا اللي جعل مصطفي يحط مازن في دماغه أنه أحرجة مرتين أو تلاتة أول أما وصل
و بعدين مازن كان جايب في شنطته صورايخ و حاجات بتفرقع قعد يحدفها علي مصطفي و مصطفي طبعا طوييييل و يتخض

.
و بعدين مازن قعد يضرب مصطفي بجد و يقله أنت رخم بجد حقيقي يعني
و في الأخر بقة بنسلم علي مازن علشان هو أول واحد يمشي مننا و مفيش حد ماشي معه عينه تقريبا دمعت من الزعل أننا هنروح مصطفي مسبوش بردوا
و هو بيعدي الشارع يعني قعد يشتم في مصطفي يا أخوان يا شيوعي كل ده قدام مجلس الشعب و هو بيعدي الشارع و خلاص العربيات كانت هتدوسه

.
خلاصة قصة مصطفي و مازن
أنا شخصيا خايف أن مازن يزعل مني علشان أنا فضيحة في الضحك الحقيقة و أنا أسف لو هو زعلان مني
و الغريب أن مصطفي قاللي بعد كده أنه بيرن له طول اليوم بعد كده سبحان الله
ياريت فعلا نكون أصدقاء يا مازن أنا شخصيا أتشرف بمعرفتك بس أنت بقة أسمك أية

.
أحمد الجيزاوي شخصية عندها مبادئ و أفكار واضحة و محددة و أنا الشخصيات دي بتعجبني قوي بصرف النظر عن أفكارها انا بحب الناس اللي عندها أفكار علشان قصر الديل اللي عندي في الموضوع ده
بس هو مشكلته أنه ديكتاتور شوية اللي يقول عليه أو مش بيقول عليه تلاقينا بنعمل اللي هو عاوزهه و خلاص
و كنا هننفجر من كتر الأكل و الشرب بس هو تقريبا كان عامل حسابه و هضم الأكل و هو مروح مشي بس أحنا لا
و كمان أنا لي عتاب عليك في موضوع هأبقي أقولك عليه
و صعب علي الحقيقة لما كنا بنتكلم في الكورة الرجل عمال يكلمنا عن التعذيب و نعمل أية و محمد و ابن ناصر بيتكلموا عن الكورة
كان هيشد في شعره يا عيني

.
نوشة و شمس الزناتي
هم الأتنين قابلناهم و إحنا قاعدين علي القهوة و قعدوا معنا و تحس أنهم صحاب من زمان قوي و الله أعلم و تحس أنهم ولاد بلد جدعان كده بس مشكلتهم معايا كانت في السجاير و هامنعم من التدخين بعد كده
هم الأتنين الوحيدين اللي كنت تحس أنهم متفقين مع أحمد الجيزاوي قوي خصوصا في موضوع الأكل

.
ابن ناصر
طول عمري بشوف أسمه في التعليقات مش عارف ليه مكنتش بأدخل عنده كنت بحس أني هلاقي كلام من الكبير ده و هاتعقد و مش هأفهم كلامه و كنت فاكر انه كبير قوي بس طلع لسه صغير و إن شاء الله هاتابع البلوج بتاعه
بس لي طلب عنده بلاش ياكل من عند تلوث و بكتيريا علشان هو مش ناقص يعني
أحنا عاوزينك يا ابن ناصر
و ابن ناصر طريقته في الكلام مؤدبة جدا و انا شخصيا حسيت أنه مقنع قوي بس هو شكله بيبذل مجهود كبير في كل حاجة في حياته و بيتعب قوي و لما يقرر يقول حاجة لازم يقولها حتي لو أية
فاكرين موضوع والده و جمال مبارك
فين الموبيلات بقة رجعت و لا لسه

.
منذر بقة انا مش هتكلم عنه علشان الأعلام اللي زيه مش محتاج حد يتكلم عنه بس أنا عاوز أقولكم انه خلاص كان هينام مننا في الأخر و ربنا يكون في عونك يا ابن ناصر علشان شكلك شلته لما نام منك في التاكسي
و كمان متناسش يا منذر لما تيجي تتصور بعد كده حاجة من أتنين أشفط بطنك أو متتصورش خالص أحسن

.
محمد مفيد
أو محمود فوزي
قعد يخنق في ابن ناصر علشان الكورة في الأول
ليه عندي نصيحة ياريت يخفف القعدة مع مصطفي شوية علشان بدا يكون زييه و يتريق علي الناس كلها
و كان هيقع مننا لما عرف أن ابن ناصر بياكل عند تلوث
في الأخر أفترقنا للأسف في التحرير

.
و بعد كده صلينا الفجر انا و محمد مفيد و مصطفي في رمسيس و روحنا
أنا بقة رجعت البيت علي الساعة خمسة و تلت و أنا المفروض بأصحي الساعة ستة إلا ربع علشان الشغل
و أنا لازم أروح الشغل علشان مش عاوز أخد أجازة و علشان كان في ناس كتير أجازة و مينفعش أنا كمان علشان المدير بتاعنا ميعملش لنا مشاكل و أحنا مش ناقصين

.
أخدت دش علشان أفوق و لم يحدث نمت نص ساعة كده و قمت رحت الشغل قعدت أتريق و أناكف في الناس كلها علشان منمش
و لأول مرة من ساعة أما أشِتغلت أنام في الميكروباص و أنا رايح الشغل الصبح
في ملحوظة واحدة مخوفاني بس زي ما قلتلكم من نص ساعة ده للي هيوصل هنا كنت في دفنه الصبح و أنا خايف مكنش أخدت منها العبرة دليل علي كده ضحكي و تهريجي مع الناس بالليل مش عارف خايف من الموضوع ده
أخيرا

.
أنا سعيد جدا بمقابلة الناس دي كلها و ياريت ميكنش فيهم حد متضايق مني و ياريت فعلا نكون علي أتصال علي طول

________________________________________
البوست اللي فات معظم التعليقات كانت علي ماتش الأهلي و الزمالك
و لكل الناس بقول الزمالك لو فضل علي ما هو عليه هيفوق بس مش عاوزين عملاء الأهلي يتدخلوا
و للزملكاوية الزمالك محتاج بس بطولة واحدة و انتم هتشوفوا هيكون حالنا إزاي
و بعدين لسه فاضل لنا تلات سنين كمان مش قضية يعني
و لا أنتم زملكاوية جداد مش واخدين علي كده و لا أية
ياما دقت علي الراس طبول

.
بردوا للي هيصمد و يوصل هنا
كل سنة وأنتم بألف خير
خلاص النهاردة تسعة رمضان أيام الرحمة علي وشك النفاذ يارب نكون أترحمنا و وصلنا صلة الرحم كلنا يارب
و يارب نكمل رمضان علي خير
في حديث أنا حاولت أبحث عن نصه الصحيح مش عارف لو حد يعرفة بالنص الصحيح ياريت يبعته لي أو ينزله بوست علشان الناس تاخد بالها
الحديث اللي فيه سيدنا محمد صلي الله عليه و سلم بيقول أمين أمين أمين
و لما بيسأل بيتكلم عن رمضان و والدين
ياريت حد يبعته أول ينزله بوست قبل نهاية رمضان

.
في خبر ظريف قريته النهاردة أن إحنا رصيدنا من الدقيق المدعوم في محافظتي القاهرة و الجيزة قرب من الصفر
ربنا يستر

.
في خبر سعيد كمان بالنسبة لي إن ابراهيم سعيد هيرجع الأهلي نادي المبادئ مرة تانية
يا مبادئ يا مبادئ

.
قريت في الأهرام مش عارف الجمعة و لا السبت اللي فات واحد بيقول للفنانة يسرا إن مشهد الإغتصاب في المسلسل بتاعها كان واقعي جدا لدرجة أن في أمهات منعت بناتها من الخروج بالليل
فعلا هو ده الفن طيب فين الحل و أية اللي عاجبك في المشهد مش فاهم انا و لا هي علشان يسرا
الله أعلم
الحمد لله مشفتيش المشهد علشان أنا بخاف علي نفسي

.
أحلي حاجة في رمضان ده الحمد لله أن أنا مش بتفرج علي تلفزيون تقريبا بس الحاجة اللي ناقصني و إن شاء الله هأتغلب عليها أن أنا مش بصلي التراويح بس إن شاء الله الموضوع ده هيتغير بعد أما لاقيت جامع إن شاء الله أرتاح له في التروايح
بس فعلا مش هتشوفوني تاني

.
ضهري واجعني جدااااااااااااااااااااااااااااااااااااااااااااااااااااااااااا ربنا يستر

.
كفاية عليكم كده ده لو حد وصل لهنا

تصدقوا أنا نسيت موضوع المراحل اللي في الأول ده خالص
مش هاقول كتير

سلام

السلام عليكم و رحمة الله و بركاته

أزيكم ياشباب

أخباركم أية؟

يارب تكونوا في خير حال

و كل سنة و أنتم بألف خير

بلغنا رمضان و الحمد لله

اللهم أجعلنا ممن يستغلون هذا الشهر خير إستغلال و أجعلنا من عتقاء هذا الشهر الكريم

.....

في أتجاه موجود أن الناس تبطل تدوين في رمضان

بالنسبة لي أكيد كده كده غصب عني هأقلل تدوين في رمضان بس مش هأمتنع علشان أنا شخصيا التدوين بالنسبة لي حاجة مهمة جدا في حياتي ده ممكن يكون أهم شئ في حياتي حاليا و أكتر شئ أثر في قوي

و الله أعلم

......

سبحان الله

الواحد سبحان الله فعلا مش يقدر علي هداية حد حتي نفسه غير بهدي من الله و فعلا تتحقق الأية

و إنك لا تهدي من أحببت و لكن الله يهدي من يشاء

حتي نفس الواحد مش يقدر يهديها

محدش يسألني بأقول الكلام ده ليه

حتي أحساس السعادة بردوا من عند ربنا بس يعني ممكن يكون في واحد مليادير و تعيس و ممكن يكون في واحد ميملكش شئ و سعيد

......

يارب

يارب

يارب

......

مش عارف ليه في رمضان بيزداد أشتياقي لجو معين كده باحس بيه هو ده أكتر شئ بيتعبني في رمضان

......

سبحان الله كمان الجو أتغير بسرعة تحس ان الشتا بدأ من فترة بالرغم من أن الأسبوع اللي فات كان في كم يوم حر

الحمد لله ربنا عارف بضعفنا و مش عاوز يصعب علينا الصيام

أنا بصراحة هأفتقد رمضان في الشتا خالص انا متعود طول عمري علي الصوم في الشتا

......

زمان كنا بنفطر أول يوم عند جدتي كلنا فين الأيام دي للاسف مش هينفع ترجع بس اهوة يارب ترجع

......

النهاردة ماما لما رجعت من الصلاة قالت لي أشتري شبت و بقدونس و مش عاوز تريقة أنا مش بتاع الطلبات دي بس الظروف اللي بتحكم نزلت أشتريت تلاتة حزم هم أسمهم كده مش انا اللي مسيهم و لا يسوا بجنيه تذكرت أيام ما كانت جدتي ربنا يشفيها بتبعتني لنفس الغرض زمان كنت بانزل بأشتري بربع جنية أكتر من ضعف اللي أشتريته النهاردة رحمك الله يا أم شادية اللي كنت باشتري منها زمان و كانت الحقيقة بتتوصي بيا

أحنا المفروض نتدرب علي منع الأكل خالص مش موضوع صيام ده أحنا هناكل بعض بعد كده

.....

أمبارح أول يوم صيام طبعا مش بأصلي فيه التراويح لأني بأكون تعبان جدا جدا جدا عامل زي المفجوع بأكلو باشرب لحد ما أحس أن بطني هتنفجر و بنام طبعا بعد كده بس إن شاء الله مش هيحصل تاني هو بيكون أول يوم بس و عارف أن ده غلط بس بجد مش بأقدر أول يوم متفهموش ليه

....

الحمد لله رمضان هل بخيراته

الأهلي أتعادل

و الزمالك كسب

ربنا يستر يوم الأتنين

.....

هي مردة الشياطين أتسلسلت خلاص بس لسه في الشياطين الصغيرة و كمان في شياطين الأنس دول بقة اللي لازم تخلوا بالكم منهم

كل سنة و أنتم جميعا بخير

السلام عليكم و رحمة الله و بركاته

أزيكم يا شباب

...

السبب الاول إني أكتب البوست ده إني أنسي البوست اللي فات علشان كل أما بأشوفه بيتحرق دمي

الحمد لله

في حاجات كتير كالعادة نفسي أقولها لكم

...

أولا صديقاي العزيزان مصطفي و محمد أخبروني عن لقاء المفروض كنت أروح معهم بس للأسف مرحتش

أولا علشان أنا جبان زي ما قلتلهم و قلتلكم قبل كده و ثانيا علشان رجعت من الشغل لاقيت واحد جارنا توفي و روحنا دفناه بعد صلاة المغرب

...

النت كمان كان فاصل عندي اليومين اللي فاتوا دول و كنت هاتجنن علشان مش بعرف أعمل بوستات و لا تعليقات من الشغل

...

أمبارح معرفش ليه طلبت غم و نكد معايا حاولت أتصل بحد اكلمه معرفتيش

مش عارف جه لي أحساس بالخوف من إني مش هألاقي الإنسانة اللي أكون سعيد معها مش عارف ليه

كل ده بسبب أبويا كلمني مرة تانية في موضوع الجواز

مش عارف خايف جدا من الموضوع ده

مش متخيل أني أعيش مع واحدة كده و خلاص

نفسي حياة حياة يعني

و بعدين خفت من المستقبل أنا عارف أنه بأيد ربنا بس خفت أعمل أية

...

يارب

...

و بعدين بإقتراب رمضان تذكرت كأبة السنة اللي فاتت و أمتحانات التمهيدي الفاشلة اللي فيها و تضيعي لوقتي و للفلوس و مكملتيش الأمتحانات و رمضان مصليتش التراويح و مختمتيش القرأن يارب كل ده يتمحي السنة دي يارب

الحمد لله علي كل شئ

...

مع تغيير الساعة بأحس إني بأروح الشغل الظهر مع أني بأنزل الساعة ستة و نص

أحلي حاجة أني بارجع من الشغل مصلي الظهر و العصر و كمان العشا بدري الواحد بيخلص اللي عليه و هو مرتاح مش قلقان ينام يكسل أو أي حاجة من اللي بيحصل في الصيف

و بحب الشتا جدااااااااااااااااااااااااااااااااااااااااااااااااااااااااااا

و يارب الجو اللي إحنا فيه ده يدوووووووم علي طول

أو البلد اللي أهاجر لها يكون جوها كده علي طول

...

أخيرا كل سنة و أنتم بالف خير و ربنا يتقبل منكم الصيام و القيام و قرأة القرأن

و اتمني ما أعملش أي بوست طول رمضان علشان ده هيدل علي شئ عظيم بس ما أعتقدش ده هيحصل

سلام يا أصدقائي

وضاعت الجمعة

السلام عليكم و رحمة الله و بركاته

أزيكم يا شباب

أنا مش هأتكلم عن منع حماس للصلاة خارج المساجد لأنصار فتح

بالرغم من إنه المفروض أتكلم فيه أو أي حد تاني يتكلم فيه

بس بما إني مش عارف التفاصيل هتكلم بقة عن صلاة الجمعة عندنا هنا

أنا بيتي بين جامعين واحد كبير قوي و واحد كبير بس مش قوي

المهم الكبير اللي مش قوي ده عينة الخطباء الله بيجوا فيه من نوعية الناس اللي بتقعد تقول الأمريكان الكفرة و اليهود الخنازير و أنا بصراحة مش بحب الكلام ده

الجامع التاني الكبير قوي بقة بيجيبوا فيه خطباء يعني ملتزمين بالثلث ساعة أو نص بالكتير بس فيهم واحد من دار الإفتاء ده بصراحة اللي بنقعد نستني يجي و كمان الجامع ده كبير و أنا بحب الناس الكتير كده بحس بقوة بينهم بصرف النظر عن اللي بيعملوه أهوة أمل و خلاص

المهم أنا كمان بنزل متأخر شوية علي الصلاة و بحاول و الله أنزل بدري

نفسي أصلي في جامع حلو كده بس للأسف موضوع التأخير ده هو اللي تاعبني

المهم النهاردة بقة بعيد عنكم داخل الجامع لاقيت هرج و مرج كده قلت في سري لا حول و لا قوة إلا بالله مع إن الأذان أذن و الخطيب بدأ لاقيت شاب محترم كده راح مديني شنطة ببص لاقيت جواها علبة تمر معرفتيش اعمل أية حاولت أرجعها تاني انا مش فاهم و مش عارف أعمل أية بجد

قلتله طيب خاليها أخدها و أنا ماشي و أنا أصلا بعيد عنكم و أنا رايح الجامع باكون حنفية مش عارف أعمل أية

و أضطريت أخدها كنت مخنوق قوي

و كده الجمعة راحت ده من مس الحصي فقد لغي

أولا تخيلوا الخطيب شغال و كأنه مش حاسس و لا شايف حاجة خمسين واحد رايحين جايين في الجامع و الأخوة المصلين قاعدين هات أنا مأخدتيش ده مأخديش هات شنطة

و أية طبعا اللي بيصلي السنة مثلا مش ملاحق يوقف حد بيعدي من قدامه

كنت بغلي و الله ضيعوا الجمعة و ضيعوا فلوس في محل غير محلها يعني

تخيلوا مثلا تمن العلبة الواحد ة عشرين جنيه ده أقل تقدير في بتاع ألف علبة يعني عشرين ألف جنيه تخيلوا الجامه ده أصلا بيطلع زكاة مال حوالي مية ألف جنيه علي كم أسرة اللي فاكرة لما بأحسبها و الرجل اللي ماسك الجامع بيذلنا بالكلام ده يوم العيد بأحسبها بيطلع للأسرة تقريبا خمسين جنيه و النبي مش كان أولي أنهم يوزعوا فلوس البزخ اللي عملوه النهاردة علي الناس دي

كل ده علشان الناس تقول الحج فلان عمل و سوي يعني هو من جيب أهله

و الله حرام

أنا فكرت أقوم حتي أقول للخطيب يقولهم يوزعوا بعد الصلاة بس قلت لا مادام الناس مستمعته خلاص و بعدين مش بحب اللي بيعمل بطل في وسط الجامع

بس بجد أنا مخنوق منهم قوي

و محدش يقولي أنت أخدت و لا لا علشان مكنتش هأخرج من الجامع غير معايا علبة متحاولش يعني

و طبعا الخطيب اللي كان موجود النهاردة أصلا بيقعد يقول خطب روحانية قوي يعني الكلام اللي يخلي الناس طول ما هي قعدة عمالة تقول الله يسلام و الحاجات دي

أقول أية بس

لا حول و لا قوة إلا بالله

.....

في الشغل

كنت خلاص هايجيلي الضغط أمبارح

عاوزين نجيب بويلر في الشغل حلو مفيهاش حاجة و قلنا اللي مش عاوز يشترك معانا مش هيشرب فيه في عيب في كده قوم المدير الحليوة بتاعنا بتسخين من ولاد أبليس اللي معانا في الشغل يقول لا محدش يجيب علشان الأمن الصناعي ده الطريقة اللي بنعمل بها الشاي دلوقتي أنيل من ناحية الأمن الصناعي

اللي مضياقني هم زعلانين ليه

أحنا عاوزين نجيب حاجة نضيفه لنفسنا هم أية اللي يزعلهم مش عارف

و الحليوة التاني مجرب الظلم من رئيسه يعمله علينا

بس مش هأسيبهم

أنا هأعمل ثورة في المعمل الله يسامحك يا صاحب البوابة خليتني ثورجي و مش هأسيبهم

بس بردوا السياسة حلوة

بس ليه زعلانين مش عارف

...

حول العالم

مفيش جديد الحقيقة أة أفتكرت حاجة جديدة

التوقيت الشتوي بدأ

أنا في الشتا بتألق يعني أستنوني بقة في الشتا ده هأقطع الدنيا

رمضان جه كل سنة وأنتم بخير

السلام عليكم و رحمه الله و بركاته
أزيكم يا شباب أخباركم أية؟
يارب تكونوا بخير
كنت هأضيع منكم يا شباب تخيلوا
بس الحمد لله
.
حكيت لكم اللقاء بالمدونين السابق من حظي الحلو قابلتهم تاني او مجموعة منهم مع ناس تانية جديدة يوم السبت بردوا الساعة 1 حكينا و أتغدينا و دخلنا سينما تاني بناءا علي رغبة واحدة عسولة كانت معانا مش عارف في ناس أتضايقت إن أنا قلت عليها المرة اللي فاتت فانا مش هأقول قابلت مين بس أكيد هم هيعرفوا إن أنا بتكلم عنهم يعني
المهم بردوا عبده الصامت اللي هو أنا خنقهم كالعادة ده حتي لما بأتكلم مش بيسمعوني و أية أية بتقول أية بس الحمد لله هم كانوا كتير و كانوا فايقين و أول مرة معظمهم يقابلوا بعض فمحدش أتخنق مني قوي يعني

.
المهم كان معانا زي ما قلتلكم واحدة صغيرة عسولة لها شخصيتها أنا أتخيلها محامية بصراحة تخلي القاضي يترهب منها الحقيقة و هي اللي دخلتنا الفيلم اللي دخلناه الغريب إن كلنا بعد الفيلم يعني قلنا الحمد لله إننا خرجنا من السينما بس هي كانت فرحانة و زعلت إننا خلاص هنروح

و قعدت تحكيلي عن شوية نكت عسل

.
و كمان كان معانا واحد تمام جدا مسرحي هو يعني أنا حبيته جدا و هو شخصية غريبة دماغه كبييييييرة جدا جدا
أنا مش عارف أحكي براحتي عن اللقاء ده خايف حد ميكنش بيحب أقول أسمه و لا هو مين
المهم كان يوم حلو قوي كمان

.
بس بصراحة قبل أما أقابلهم بخمس دقايق مش عارف ليه محسيتش براحة زي يوم ما كنت رايح أول يوم في الشغل اللي أنا فيه ده حسيت بعدم راحة و فعلا صراحة في بعض حاجات معجبتنيش في اللقاء ده محدش يسألني عليها علشان مش هأقووووول
بس بردوا مجمله كان راااااااااااااااائع

.
مفيش فعلا حاجة كاملة بس بردوا مش هأقول
و كمان أتقابلت مع صاحب البوابة ده هأقول عليه علشان هو بلطجي مش فارقة معه
ياله و المسرحي ده فاوست
مش فارقة و اللي بيخاف يروح
بس و اليوم خلص و روحت و نمتتتتتتتتت
و شغل

.
و بعدين رجعت لاقيت إيميل من مدون رهيييييييب علي إتفاق إننا نتقابل يوم الأتنين أيوة النهاردة يعني
قابلت النهاردة يا جدعان محمد مفيد تخيلوا مش ممكن و كمان منذر و كمان صاحب البوابة تاني محسسيني أنه مفيش غيره ده أنا خايف أفتح الدولاب الأقيه ماسك كتاب و قاعد لي

.
أنا هأخلي البوست ده حكاية عامة عن اللقاءات علشان مش هينفع أقول كل اللي فيها مرة و احدة
المهم مجمل اللقائين دول لاقيت نفسي كنت خلاص هأشت و فكرت أعمل تقسيم للمدونة و أعمل عناوبن و و أعمل مدونات تانية و حاجات من الهبل و الخزعبلات دي بس الحمد لله ظبطت نفسي
كنت خلاص فعلا هأروح منكم
بس عرفت الحل

.
شغلت فولدر الشعبيات و الحاجات اللي قلبكم يحبها علشان أعرف أكتب البوست ده من الأخ عماد بعرورو سعد الصغنن و المرحوم رمضان البرنس و ناس مجهولة تانية

.
هو هو هو العنب مقطع من أغنية العنب

.
أصل بجد يا جدعان كلامهم غريب الحل البديل و اليسار و إنطباعات و صفصطة فارغة و حاجات كده من يعني ميكلش معايا خالص الحمد لله رجعت علي طووووول
المهم لو حسيتوا إن هاتغير فكروني بنفسي و النبي علشان الناس دي تأثيرها جامد قوي و ربكم و الحق يعني نفسي يغيروني بس هأوحش نفسي قوي لو أتغيرت و الكأبة شكلها هتمشي و طبعا هأكتئب علشان الكأبة هتسيبني
بس في داهية يعني

.
الأخ صاحب البوابة شكله حطني في دماغه و مش هأيسبني

.
انا عاوز أقوله بس أنت جميل قوي بس بتحلم جامد قوي خايف عليك مش منهم خايف أنك تصطدم بالواقع و يارب أكون أنا اللي غلط بس بردوا خايف عليك و ربنا يوفقك و أنا معاك يا زعيم

.
العجيب بقة أن كل الناس اللي قابليتني الحمد لله مش مصدقة إن أنا اللي علي البلوج هنا لذلك أنصحكم محدش من اللي بيحبني هنا لو في يعني يقابلني علشان ميتخنقش

حول العالم
أنا نفسي اعمل ملف يا نهار أسود ملف انا لسه متعدلتيش الله يسامحك يا صاحب البوابة و لا أية عن أغاني الميكروبازات الحقيقة نفسي حد ياخد الفكرة دي و يعملها حاجات خزعبلية

.
الأهلي أةةةةةةةةة كسب
الزمالك أةةةةةةة مشاكل
مش عارف أحمد فتحي ده الزمالك بيقرصه و لا أية مش عاوز يجي ليه مادام ما هو في الشارع كده

.
الواد محمد زيدان جاب حتة جون في أوليفر كان حكاية
كنت هأطير من الفرح لما عرفت إن ريبيري أسلم و أسمه بلال ريبيري لسه في أمل الحمد لله

.

خبر شؤم كنتاكي اللي في التحرير قلبها صابون خلاص يعني محدش يتقابل هناك تاني هئ هئ هئ

انا كنت فاكر بتوع الكشري بس اللي بيعملوا كده اتضح أنه حتي كنتاكي

.
مش عارف مين الحاقدين اللي طلعوا إشاعة موت الرئيس الحاقدين
هو في رئيس بيموت يا جهلة

.
أنا من يومين كده مش بقرا الجرايد بإنتظام بس باقرا كل العناوين اللي في جرنال الأخبار من اللي بيركب قدامي في عربية الشغل في أيامك يا مترو حلوان المهم عاملين ملفات كل يوم مرة اللحمة الحمرا غالية و مرة الفراخ غالية و مرة الخضار كل بقي مجنون مش الطماطم بس مش عارف هناكل أية

.
اة
هو البوست بيكبر ليه كده

.
بما اني من رواد الطريق الدائري كل يوم بالأقي ناس بتبور الأراضي الزراعية بطريقة مهولة في اراضي تانية في حتة تانية في أي مكان في العالم يعني ممكن نروح نتسنكح و نبلطج عليهم و ناكل أكلهم و لا العالم كله زينا كده بيبور الأراضي و هنجوع كلنا إن شاء الله

.
و أخيرا مش عاوز أقول لكم اغنية عمرو دياب خليك معايا علي الدائري ليها إحساس تاني خالص غير اللي أنتم بتحسوه خالص خصوصا مع سواق يا عم أهدي مش عاوزين نروح الشغل بدري بس أبدا
خلاص بقة كفاية علشان أنا صدعت الحقيقة

.
يادي النيلة

خلاص أخر حاجة

أنا من ساعة أم الكابتشينو ده حاسس إني دماغي مشدودة لورا مش عارف ليه عاوز انام و أرتااااااح شوية

ربنا يستر
تصبحوا علي خييييييييييييييير

السلام عليكم و رحمة الله و بركاته

أزيكم يا شباب

إحساس بالعجز الشديد حاسس به من ساعة أما دخلت عند سمرا النيل

الصبح قعدت أعمل بلوج تاني لنفسي عن الأغاني و بعد أما جهزته قلت أشوف الناس أخبارها أية

للأسف دخلت عند سمرا النيل و شفت البوست اللي هي كاتبه

حاولت بجد أعلق عندها مقدرتيش ملقتيش حاجة أقدر أكتبها

قلت أكلمها علي المسنجرو لا أبعت إيميل مقدرتيش

قلت أكلمها مقدرتيش

إحساس عجز فظيع مش عارف اعملها أية

سبحان الله أنتم مش ممكن تصدقوا سمر عاملة إزاي في الحقيقة حاجة مختلفة تماما عن اللي بتكتبه

سبحان الله الفرح و السعادة و الشقاوة دي كلها مخبية وراها حاجات مؤلمة

بجد حاسس إني مهما قلت مش هأقدر أكتبلها حاجة

علشان فعلا الإحساس اللي عندها ده مش ممكن حد يتغلب عليه

أنا قريت تعليق طارق و رفقة العمر عندها

هو تعليق طارق اللي مش عارف إزاي هو مش بيخرجها من الحالة اللي هي فيها ممكن يكون زي ما رفقة بتقول خوف منها أنه يضيع أو مش مصدقة أنه خلاص أيام الحزن راحت

أنا كمان مقتنع جدا بكلام رفقة عن انه ده ممكن يكون أمتحان من ربنا و هيجازيها خير إن شاء الله علي صبرها

بس أنا شخصيا كنت بأحس بالإحساس اللي عندها إحساس الوحدة ده فظيع أو إحساس إن في المفروض حد معين يحسسك بشئ و أنت مش تلاقيه منه ومع إن ده الطبيعي

عارف إن ربنا إن شاء الله جنبي بالرغم من ذنوبي و ضعفي بس بجد ساعات الواحد بيكون محتاج أي حد يسمعه يكلمه يطبطب عليه يترمي في حضنه و مش بيلاقي

بيكون الألم كبير

و بعدين إحنا للأسف بشر عاديين جدا جدا مش متدينين و قريبين من ربنا قوي هو ده غلط بس دي الحقيقة للأسف مش عارف أنتم فاهمين اللي أقصده و لا لا

و كمان أحمد الهواري مش عارف هو كمان مسح كل اللي في البلوج بتاعه مش عارف ليه

أنا وشي نحس عليهم و لا أية

بالرغم من إني من ساعة أما قابلتهم حاسس بسعادة مرحتيش من عندي غير لما قريت البوست بتاع سمرا

و إحساسي بالعجز إن في ناس نفسي أقف جنبها و مش قادر حتي بالكلام

نفسي هي أو أحمد حد منهم يفوق من اللي هو فيه و يقولي أبقي أساعده إزاي علشان أنا عاجز للأسف

سامحوني

يارب فرج كرب سمرا و أحمد و كل الناس

و اسعدهم و أرحمهم برحمتك يارب

أنا عارف أنه من سنن الحياة يكون في ناس مش سعيدة في حياتها بس أنت أرحم الراحمين

يارب أسعد كل الناس و أهدي كل الناس لعبادتك اللي تجعلهم مش محتاجين لأي إنسان

السلام عليكم و رحمة الله و بركاته

مقدمه و أستهلال لابد منه
أخباركم أية يا أحسن ناس
مبدئيا أنا بتأسف لأي حد قرا البوست اللي فات و ممكن يكون اتضايق مني بس ربنا يعلم بنيتي في كتابة الموضوع ده أنا مش ندمان علي إني كتبته بس مش عاوز حد يزعل مني و إن شاء الله مش هأشرب كابتشينو تاني
أما بعد
انا من يوم السبت نفسي أكتب لكم عن يوم رهييييب عيشته
الحكاية تبدا أنه حصل لي الشرف و فجأة لاقيت نفسي بأتكلم مع سمرا النيل علي المسنجر و قالت لي أنت فاضي بكرة علي يوم السبت قلتلها أة خير ليه قالت لي تعالي هنتقابل بكرة كم مدون كده قلتلها لا بسابق خبرتي في الموضوع ده حكيت لكم عن لقاء المدونين السابق قالت لا تعالي الناس مش هتكون كتير و فعلا رحت الميعاد كان الساعة الثانية عشر ظهرا بعيد عنكم الجو كان فل

.

كان نفسي ناس تانية تعرف و كانت ممكن تيجي زي مانو مثلا و لا ساسو و لا رفقة العمر و لا أي حد تاني من الناس الجميلة اللي الواحد يعرفها هنا بس الحمد لله

.
المهم المحترمين محدش جه لغاية الساعة كم الثانية عشر و النصف كنت يأست و شكيت في اللي كلمتني علي المسنجر الحقيقة بس كنت متأكد أنها سمرا بس مش عارف ليه محدش ظهر المهم كنت خلاص هأمشي قلت أقعد علي القهوة و أشرب حاجة و أروح الحمد لله محصلش و قمت حتي قبل أما أشرب حاجة المهم خرجت الحمد لله لاقيت سمرا و كنت عرفت شكلها من اللقاء السابق و سلمنا علي بعض و بعد كده جت واحدة مشعاوزة تقول علي أسمها و بعد كده أحمد الهواري و أتفقنا نروح علي كافيه أهم حاجة فيه التكييف علشان مش عاوز أقولكم الجو كان عامل إزاي المهم قعدنا و أتكلمنا أو بمعني أصح أتكلموا علشان صاحبكم سكتم بكتم خالص بس أنا كنت سعييييييييييد جدا مكنش في حاجة مضيقاني غير إني مش بتكلم معهم و هم حاسين إني خنقة شوية الحقيقة و بصراحة عندهم حق

.
احمد الهوراي ده شخصية عبقرية بس كان صعبان علي قوي إني مش بتكلم معه بس كنت حاسس أنه مخنوق مني بس أنا كنت سعيد بالكلام معه و كمان كان حاطط سماعات الموبيل في ودنه يعني كان في حاجة بتهون عليه اليوم الشخص المجهول طلعت ساكنة قريب مني البنت دي بقة حكاية بتتكلم معاك كأنها تعرفك من زمان و تلقائية خالص و شكلها طيب قوي و سمرا بقة مش عاوز أقولكم فضيحة الحقيقة ربنا يكون في عون طارق ممكن تعمل له مشاكل في أي مكان بس هي تقدر تجذبك لكلامها و كأنك تعرفها من زمان و هي للعلم متختلفش عن اللي في المدونة خالص بس أفظع كتييييييييييييييييييييير

.
و بعدين قررنا نتغدي في كنتاكي و بعدين رحنا هناك جبنا الغدا بعد معاناة شوية و الأخت اللي شغالة هناك مكنش في حد طايقها من الناس كلها و تحس أنها شبهه عروسة المولد كده

.
المهم بعد كده أثناء الغداء أو أثناء غداء سمرا علشان إحنا كلنا قلبنا علي طول بس هي أبدا جه أخف دم و بهدل سمرا علي الأكل الحقيقة و أتكلمنا شوية و بعدين قلنا ندخل سينما بس الأخت سمرا ضيعت علينا ميعاد الحفلة و هي بتتغدي أو تقريبا ده كان شئ كويس علشان طارق يجي معانا السينما و بعدين قلنا نقعد علي قهوة لحد اما ميعاد الحفلة التانية يجي و قعدنا نتكلم أو بردوا أتكلموا أة الشخص الخفي مشيت من غير ما تسلم علي أنا و أحمد ماشي ماشي

.
المهم قعدوا بردوا يتكلموا عن الصحافة شوية و أنا بردوا بسمع بس مستمتع جدا جدا جدا و بعديت جت واحدة كمان مش مدونة صديقة أخف دم و راح أخف دم بايع أحمد قدمها و قالها بيقول علي الجرنال بتاعكم عميل و خاين مصيبة أخف دم ده و كان ماتش الزمالك و البلدية شغال و قمت و الزمالك مغلوب واحد صفر بس الحمد الله الزمالك كسب بعد كده عرفت و أنا في السينما من واحد صاحبي

.
دخلنا فيلم كده رضا و أحمد الهواري لم يدخل معانا
و العبد لله اللي حجز لهم التذاكر و أخترت لهم أحسن مكان في السينما كلها حاجة كده تكسر الرقبة و طارق جه و إحنا في السينما و كانت سمرا حجزت له و كانت خايفة طبعا لأحسن ميدخلش بس الحمد لله دخل و بعد الفيلم طبعا كلنا كنا ضايعيين سلمنا علي بعض و روحنا
ياااااه أخيرا وصلت للنهاية

.
تعليقي بقة علي اليوم ده
أنا فرحاااااااااااااااااااااااااااااااااااااااااااااااااااااااااااااااااااااااان قوي
بس زعلان أنهم ممكن ميقولوش لي علي أي خروجة تانية من الخنقة اللي خنقتهم بها بس مش مشكلة اليوم ده يكفيني بجد كان يوم حلو قوي
و حبيتهم كلهم و الله متعرفش ليه تحس أنك تعرفهم من زمان

.
رسائل
أحمد الهواري معلش يا أبو حميد أنا و الله اللي شكلي كده دايما تحس إني خنقة بس مش خنقة قوي يعني
سمرا شكراااااااااااااااااااااااااااااااا علي دعوتك و انك عرفتيني علي الناس الروعة دي
الشخص المجهول انا زعلان منك جدا علشان مشيتي من غير ما تسلمي
أخف دم أخف دم أقول أية أكتر من كده انت شكلك كنت حاسس بمأساتي إني مش بتكلم بس أنا بارغي هنا كتيييير
طارق معلش أنا عذبتكم في السينما بس و الله مكنش في غير كده و كان نفسي نتعرف علي بعض أكتر
.
مش أنا كنت قلتلكم إني حاسس إن ربنا الحمد لله بدا يعفو عني أهوة دليل كمان إني اتعرفت علي الناس الروعة دي كلها
و كمان الزمالك كسب ده شئ مهم
:)

بس

.
لما رجعت بقة كان عندي تقرير المفروض يتكتب من عشر أيام تقريبا ربنا قدرني و كتبته و نمتتتتتت و محسيتش غير الصبح و انا عايش بروح هذا اليوم من ساعتها
أنا عارف أنهم ممكن ميكنش اليوم ده يفرق معهم كتير بس أنا يفرق معايا كتير قوي لذلك ممكن محدش يتكلم عنه غيري
مش عارف أكتب تاني و لا لا انا عندي كلام كتير قوي
حول العالم بقة و خلاص

.
حول العالم
أنا متضايق قوي قوي قوي من موقف حصل عندنا في الشغل في حوار المكافأة في ناس من برة أصلا أخدت و إحنا أتخصم مننا كتير إحساس الظلم سئ قوي أنا الحمد لله الفلوس مش فارقة معايا بس حاجة تحرق الحقيقة

.
و لاد الحلال بتوع الشغل التاني مش عاوزين يتصلوا مش عارف ليه

.
أنا عملت حاجة عبقرية نزلت موسيقي أخير علي البلوج المتواضع بتاعي سعييييييد جدا شكرا لساسو علي مساعدتها

.
في خبر ظريف قريته في المصري اليوم عن الضابط المسئول عن تنظيم الإخوان في أمن الدولة ميعرفش مقر مركز الإرشاد و لا يعرف إن الأخوان بيعملوا مائدة رمضانية أية مش بيتفرج علي العاشرة مساء

.
كفاية عليكم كده
كل سنة و أنتم طيبين
ياريت نعمل حاجة جامدة في رمضان أية هي مش عارف بس ربنا يقدرنا علي فعل الخير

السلام عليكم و رحمة الله و بركاته
مقدمة
مش عارف ليه بقيت أحب عالم التدوين قوي أنا أحيانا من أول أما بأنزل بوست بأبدا أفكر و أكون عاوز أكتب بوست جديد بس الحمد لله بأسيطر علي نفسي و مش باعمل كده علشان محدش منكم يجي له شلل و أقعد بذنبه المهم أكيد طبعا تفهموا إن عندي موضوعات كتير عاوز أتكلم فيها و ياريت تعتبروا كل موضوع حلقة لوحده مفيش ربط بينهم و مش عاوز حد يربط أوك
اللي بيحب النبي يزق
بصراحة حالة الفرح و التفاؤل اللي عندي هي لسه موجودة الحمد لله حاسس إنها قربت تروح مني فياريت تقفوا جنبي قوي اليومين دول علشان مش عاوز أرجع تاني ربنا يكرمكم ماشي
أنا و الكابتشينو
يوم الثلاثاء الماضي قعدت كده مع صحابي و شربنا حبه كابتشينو هو الموضوع ده ممكن يكون غلط إني أتكلم فيه بس ممكن يكون نصيحة بردوا للشباب اللي مش بيدخلوا عندي صحيح مش ملاحظين إن معظم اللي بيعلقوا عندي بنات ما عدا أتنين و لا تلاتة
المهم الكابتشينو بقة مش بيعمل أي حاجة خالص من اللي الناس بتقول عليها بصراحة الواد صاحبي اللي قالي عليه بعضه حصل
المهم مفيش إحساس و لا بسعادةو لا ضحك و لا أي حاجة
أنت بتحس أنه فيه هلبين كل عين فيها هلب الهلب ده مربوط فيه بتاع تلاتة طن بيشدوا عينيك لتحت و طبعا عاوز تنام
بالنسبة للدماغ هي حاجة من حاجتين أولا تحس أن دماغك زي البلية محطوطة في حلة و واحد عمال يهز في الحلة ده نص كلام صاحبي أنا حسيت بالأولي التانية لا انا من سعتها حاسس إن دماغي تقيلة قوي بتتشد لورا
الخلاصة أنا جربت الموضوع ده علي أساس التجربة في حد ذاتها هو غلط بس اهوة
نصيحة بقة لأي حد بلاش تجربوا الموضوع ده مالهوش فايدة ده أنت حتي بتكون خايف تتقفش من البوليس و لا من عايلتك لما تروح أية إحساسك
و أية إحساسك بقة لو قضاء ربنا جالك و أنت في الموضع ده أية الفايدة مفيش
بجد عبيط اللي بيعمل كده
انا إن شاء الله مش هأعمل كده تاني علشان محدش ينصحني و يديني درس في الأخلاق ماشي يا روني
في موقف كوميدي بقة حصل انا لما بأروح من عند صاحبي ده باعدي علي كمين الواد قالي أية لما تعدي من الكمين رن علي علشان أطمن عليك قال يعني لو أتقفشت هو هيكون فايق لي أصلا علي العموم فيه الخير
حاولت أركب ميكروباص لاقيت مفيش غيري قلت خلاص أنزل و أخد تاكسي أخدت تاكسي و عديت من الكمين الأول مش أتنيل علي عيني و أصبر لما أروح و أرن عليه لا رنيت علي طول يا دوب مائة متر تانية لاقيت كمين قلت بس هو ده اللي هأتقفش فيه و لولا خفت يحسوا إن شارب و سكران ولا حاجة كنت مت من الضحك علي نفسي مادام أنت جبان كده بتعمل كده ليه و بعدين تخاف من الناس و متخفش من ربنا حتي أتكسف علي دمك المهم الحمد لله الليلة عدت علي خير
و دي كانت حكايتي مع الكابتشينو
أنا و الجامعة
نمت و صحيت تاني يوم فجأة كده محسيتش بالوقت من الصداع و الدوخان اللي كنت فيه رحت قدمت في الكلية علي التمهيدي الحمد لله و يارب أقبل فيه علشان أنا خايف لأحسن مقبلش ربنا يستر علشان لو مقبلتيش بس أنا أدعو الخير من ربنا

و طبعا لما رحت الجامعة حسيت بإكتئاب و أفتكرت أيام الجامعة و الشقاء العلمي و العاطفي و الخلقي و كل حاجة

بس بردوا الحمد لله

علي فكرة عيد ميلادها بكرة

و بردوا الحمد لله
أنا في الشغل
كنت في دورة تدريبية زي ما قلتلكم المدير بتاعي خانقني عاوز مني تقرير عن الدورة دي و هو كل أما يشوف ورق الدورة ده وأنا مدية لواحد عندنا في الشغل متخصص في المجال بتاع الدورة يفتكر التقرير و يسالني عليه أنا طلعت ناصح رحت جبت الورق من عند الرجل ده فهو كده مش هيفتكر التقرير
عندنا بنتين بيتدربوا حاولت أشرح لهم أي حاجة نوع من أنواع التعارف عليهم لاقيت نفسي فاشل شوية بس كويس إنه جت الشجاعة إني أتكلم معهم أصلا بس بيخنقوني بيقوليلي يا أستاذ محمد أستاذ مين
في الشغل كمان واحد عندنا اللي بيوزع المكافأة السنوية أنا مكنتش موجود و هو بيقسم علي الناس المهم انا هأقبض متخافوش بس اللي يضايق أنه في ناس كتير حقها مهضوم أنا منهم بس أنا مش متأكد يعني و الغريب أنه في ناس من بره واخدة من فلوس المكافأة بتاعتنا أنا مش فارقة معايا كتير بس اللي يخنق في ناس كبيرة حقها مهضوم و ربكم و الحق الظلم و قلة التقدير شئ بشع قوي للناس اللي عندها دم
مش عارف أنا بقيت اكتب كتير ليه فبأضطر أقلل في حول العالم بس مش مشكلة ربنا يقويكم
حول العالم
نقول ألف مبروووووووووووووووك لرنا علي خطوبتها أنا كنت عارف من زمان الحقيقة بس محبيتش أقول غير لما هي تقول
و كمان مرة مبروك و متزعليش مني و الله بجرب بس
الأهلي نادي المبادئ بيشغل ناس بيضحكوا عليه أسألو شريف أشرف
الأهلي نيههههههههههههههههههه أتبهدل في السودان بالرغم من إني فرحان قوي إن الأهلي أتغلب علشان ده من الحاجات اللي بنخليني متفائل و بتفكرني بأيام حلوة كانت و هترجع تاني إن شاء الله بس بجد الواحد زعل قوي كل الحقد و الغل ده عند الإخوة السودانيين مننا ليه طيب يعني قلنا شمال أفريقيا و كمان السودان
هي مصر بقيت ملطشة كده للكل
حسبنا الله و نعم الوكيل
و بما إن مصر ملطشة مش صعب يعني نسمع خبر تعذيب مصريين في الكويت أنا معرفش التفاصيل بس أرجع و أقول لو الناس دي عملت حاجة تتعاقب قانونيا حتي لو إعدام بس مش تتعذب و بردوا أرجع و أقول ما هو ده بيحصل عندنا مننا فينا مش حرام يحصل من الغرب سبحان الله قريبة قوي من العرب
أخيرا
الجو حر قويييييييييييييييييييييييييييييييييييييييييي
و تصبحوا علي خير

السلام عليكم و رحمة الله و بركاته
منذ كتابة البوست اللي فات وأنا نفسي أكتب قوي مش عارف ليه
اولا شكل البلوج بتاعي عاجبني قوي و بحبه و كان نفسي أقول كده
ثانيا كنت عاوز أقولكم علي اللي حصل معايا في الدورة و المقابلة
ثالثا خروجي مرة تانية مع صاحبي بتاع البوست السابق
رابعا أصدقائي الجدد
خامسا قضية تعذيب طفل المنصورة و برودي
سادسا بلطجي منطقتنا
سابعا روح التفاؤل بداخلي

.

.
أولا شكل البلوج بتاعي بحس فيه بسعادة و دفء الحمد لله
الدورة و المقابلة
بعيد عنكم المنحوس منحوس رحت لاقيت اللي معايا في الدورة من شركتي بس يعني مفيهاس و لا مزز و لا حتي ناس جديدة اتعرف عليها و كان المحاضر علي قده كمان و كنت كرهت الدورة دي كمان علشان عرفت إنها نص كم و ناس تانية في الشركة بتروح الدورات الأحسن
في أيام الدورة دي كان في موعد المقابلة علشان الشغل الجديد بعد جري و تنطيط الحمد لله وصلت للميعاد و المكان بالثانية و كنت رحت بالبدلة طبعا و كنت حضرت الأول الدورة فكانت الناس فاهمة تقريبا أنا رايح فين بس عملت عبيط
رحت بنت زي القمر عملت معايا المقابلة و مش عاوز أقولكم علي أسمها أسمها لوحده حكاية
بس هي اللي كانت كلمتني في التليفون قعدت تكلمني أنجليزي بصوت مش ظاهر أصلا و طبعا أنا كنت بفهم اللي بأسمعه بس مش بفهم اللي مش بسمعه المهم قعدت اهبل معها في الكلام و تأكدت إني مش هأقبل في الشغل ده بس لاقيتها قالت لي هأبعت الورق بتاعك للشركة اللي عندها الوظيفة و هم هيكلموك يحددوا ميعاد و لما يكلموك أتصل قلنا أدعو أنهم يتصلوا بقة
و انا في الدورة عرفت إن رئيس القطاع بتاعنا طايح في الناس كلها ولما رحت يوم الخميس كنت مرعوب الحقيقة و بيقول للناس كل واحد يكتب اللي بيعمله يوميا و إحنا طبعا مفيش شغل كتير و هو عارف كده بس مش عارف أية اللي هيحصل ربنا يستر
عديت الدورة الحمد لله

__________________________________________________
خرجت تاني مع صاحبي و هو عنده الجديد دايما يعني عنده منحة نصف مجانية بيحاول ياخدها مجانية كلها و بيعمل إختبارات و راح تدريب في كم شركة كده و جاب لي شوية كتب علي الكمبيوتر في الكيمياء مش ممكن الحقيقة و كمان أسعد خبر أنه قابل خطيبته الأولي تاني يوم كنت معه و هو إن شاء الله إن شاء الله هيرجع الموضوع مرة تانية

__________________________________________________
أصدقائ الجدد انا بشكرهم جدا جدا جدا بلاش أسامي بس بجد كلامي معهم بيسعدني فوق ما هم متصورين

__________________________________________________
للأسف شفت فيديو بتاع طفل المنصورة اللي أتعذب
بجد بانصح أي حد ميشفوش لو لسه مشفهوش خصوصا الأنسات
مش عارف أقول أية و لا أية

اللي يضايقك أنك تحس إن الناس اللي نشرت الكليب ده بتاجر به مش عارف ليه
حسبنا الله و نعم الوكيل ميتقلش غير كده تعرفوا نفرض يعني الولد ده ربنا يرحمه كان زي التوربيني كده حرام اللي حصل معه ده
ربنا ينتقم من اللي عمل كده و اللي بيساعد علي كده و اللي بيتستر علي كده و ينتقم منا إحنا كمان علي سكوتنا
حسبنا الله و نعم الوكيل

نفسي اعمل حاجة و أنا باقول كده مش عاوز ادعي بس يارب ساعدني

__________________________________________________
بلطجي منطقتنا ده بقة حكاية إحنا منطقتنا فيها بلطجية كتير مش بالصورة اللي هتتخيلوها بس بانواع الأخ ده بقة متفهموش بيكون شارب و لا هو متخلف عقليا أصلا المهم مرة لاقيته بيرمي نفسه علي العربيات و هي ماشية تخيلوا بجد شفتها بعيني يعني ممكن يموت و يجيب مصيبة لواحد برئ
و مرة كمان صحيت من النوم علي خناقة في الشارع شارع رئيسي كبير واقف الأخ في النص و مانع العربيات انها تمشي تخيلوا و العربية اللي تعدي يخبط عليها و يبوظها لصحابها تخيلوا و مفيش أي عسكري و لا ظابط و لا أي حاجة و الناس بردوا اللي يعتبروا بلطجية في المنطقة بيتحايلوا عليه علشان يمشي تخيلوا
حسبنا الله و نعم الوكيل

نفسي أعمل حاجة يارب

__________________________________________________
بالرغم من البلاوي دي كلها الحمد لله حاسس بتغيير داخلي يارب يستمر و المنغصات دي كلها متأثرش فيه
و حاسس بفرج ربنا قريب قويييييييييييييييي إن شاء الله
في حاجة كمان أكتشفتها أمبارح بس تأكدت إن ضعفي أمام البنات هو عيبي أنا علشان أنا كمان عادي تلاقيني ممكن أبص علي بنت محترمة و محجبة مش فكرة أنها تكون لابسة مش محترم ده كده تأكد أنه ضعف مني ربنا يهديني

__________________________________________________
و كمان انا حاسس إن البلد دي حالها مش هيتغير غير بثورة زي الثورة الفرنسية
أنا معفن قوي بعد أما شفت كليب الطفل بتاع المنصورة عادي جدا قمت أتغديت و بسمع دلوقتي عمرو دياب و لا كأن حاجة حصلت بالرغم من إني و أنا بأتفرج كرهت نفسي و البلد و الدنيا كلها
أخيرا

__________________________________________________
كل سنة و أنتم جميعا بألف خير و في سعادة و فرح و طاعة دايما
و يارب تكونوا أصدقائي علي طوووووووول و تزيدوا
و اللهم بلغنا رمضان و أرزقنا صيام نهاره و قيام ليله و شفع فينا الصيام و القران و حبيبك المصطفي صلي الله عليه وسلم

لو في جديد هأبقي أضيفه

سلام

السلام عليكم و رحمة الله
شكرا يا رفقتي لو تسمحي لي أقولك كده
علي فكرة بفرح لما حد بيعمل لي تاج بحس إني في دماغ حد
بس الموضوع دع صعب جدا
ياريت بلاش تاجات تاني
بس طبعا شكرا
و ياريت إجابتي تحوذ رضي السادة الزائرين
و لو محذتش عادي يعني
_____________________________________

اسم مدونتك؟
No Fear
لماذا اخترته ..وماهي نيتك من وراء اختياره؟
أنا علاقتي بألأسم ده من زمان قوي كان أخويا أشتري بوستر أسود كده و مكتوب عليه نو فير و لزقته علي دولابي بس و من ساعتها الأسم عجبني قوي بستخدمه في حاجات كتير
هل فكرت في إغلاق مدونتك؟ والسبب؟
ياااه كتير بس في الأول لأنني كنت بأزور ناس كتير في مدونتها الأقي اللي كاتب شعر و اللي كاتب قصص أحسن من نجيب محفوظ و اللي بيحلم حلم كبير و اللي بيكتب في السياسية كأنه مصطفي كامل حسيت إني صغير قوي بالنسبة للناس دي علشان كده فكرت أقفلها بس أنا كنت متعود أصلا أكتب حاجات ظي مذكرات أو يوميات قلت خلاص بدل ما أكتبها علي الورق أكتبها علي النت بالرغم من شعور إنها تافهة بس أهوة علي أمل الحاجة اللي أحبها تبقي تدخل و تقري
صورتك في المدونة ورمزيتها ؟؟
الكابتن الصغير اللي واقف في الشباك مستني فرج ربنا في أي صورة
بحس إن و أنه اللي في الصورة يعني مستنين إي تي فون هوم كده يعني
لماذا دخلت عالم التدوين من الاساس؟
كنت عرفت هذا العالم من الكاتب الكبير محمد حسنين هيكل لما جه في الجزيرة و بعدين عرفت تفاصيله من رنا و هي كانت قالت لي عليه من غير ما أسألها علي فكرة توارد أفكار يعني
جمله قيلت لك فى وصف مدونتك؟
و الله كتير أنا أصلا لما بالأقي حد معلق عندي أصلا بأطير من الفرح
التعليقات بالنسبه لك ,اهميتها؟
أهم من كلامي شخصيا علي فكرة ساعات في ناس بتعلق عندي و تقول كلام عن الموضوع اللي بتكلم فيه أحسن مني
تحس كده بروح تتكلم و ناس ترد عليك

احلى بوست كتبته ...ضع اللينك , ثم اذكر لماذا؟
كلهم أبنائي
حتي البوستات اللي شايف أنها سيئة أو هي فعلا سيئة بردوا بحبها علشان كان لها تأثير في بعد كده و الحمد لله حالتي كويسة و أنا بأجاوب علي التاج ده
و يارب تكون كويسة و في طاعة دايما
أفضل بوست قرأته؟ وضع لينكه؟
و الله كتير قوي
أنا مش عاوز أقول أسامي بس بجد مدونات مانو و سمرا و ساسو تحس أنهم عاليين قوي خصوصا مانو خسارة في صيدلة الحقيقة دي سياسة و اقتصاد خسرتها جامد
أفضل مدونة قرأتها؟
كتيرررررررر
حد قل أدبه فى التعليق إيه رد فعلك؟
الحمد لله لا و يارب دايما
أسوأ مدونة؟
سمعت عن مدونات كتير سيئة بس الحمد لله لم أقع في أي منها
أسوأ بوست أسوأ مدون
الحمد لله مشفتيش و بعدين لو شفت هأغتاب الرجل يعني
هيحصل ايه لإيميلك لما تموت ؟؟
أسألو الهوتميل و الجيميل و ياهوو
اديت الباسوورد لحد قبل كده؟
عمري
في هذه اللحظة حسيت إني جاوبت التاج ده قبل كده بس هأكمل بردوا
كانت إيه طبيعة علاقتك بيه؟
قلنا مفيش
اسمك؟
محمد
المشهور بيه وسط اصحابك؟
أسم العيلة
شخصيتك نوعها إيه؟
تشريد بتشريد
جبان
قليل الأدب مع نفسي
حالم كبير
عمل مفيش
أفكار مؤدبة
أفكار قذرة
السفر بالنسبة لك؟
حلم عمري
وقت فراغك بتعمل فيه إيه؟
نوم
كمبيوتر
رايح جاي في الشقة
المود بتاعك؟
عتيق تحس إني من أيام الهكسوس
الأكلة المفضلة؟
كتير
بس البفتيك أهم
الصفات اللي أخدتها من بابا؟
بعيد عنكم السلبية
الصفات التي أخدتها من ماما ؟
معتقدش في
اكتر ست حاجات بكرهها؟
الخيانة

الظلم
الفقر
بعدي و بعد الناس عن ربنا
التكبر
ضعفي
البنات الجميلة لحد ما أتجوز
الأهلي
اكتر ست حاجات بحبها؟
هي مش حاجات بس بحبهم
ربنا
سيدنا محمد صلي الله عليه و سلم
الإسلام
:
:
:
النجاح
الطموح
الإخلاص
العلاقات الإنسانية الدافئة اللي بأشوفها و نفسي أعيشها
:
:
:
:
الزمالك
عمرو دياب
الشغل بالنسبة لك؟
أهم شئ في الدنيا بس لو شغل حقيقي يارب أجده
الانترنت بالنسبه لك؟
الصداقة حاليا

فيضان معلومات