Friday, September 14, 2007

السلام عليكم و رحمة الله و بركاته
أزيكم ياشباب
أخباركم أية؟
يارب تكونوا في خير حال
و كل سنة و أنتم بألف خير
بلغنا رمضان و الحمد لله
اللهم أجعلنا ممن يستغلون هذا الشهر خير إستغلال و أجعلنا من عتقاء هذا الشهر الكريم
.....
في أتجاه موجود أن الناس تبطل تدوين في رمضان
بالنسبة لي أكيد كده كده غصب عني هأقلل تدوين في رمضان بس مش هأمتنع علشان أنا شخصيا التدوين بالنسبة لي حاجة مهمة جدا في حياتي ده ممكن يكون أهم شئ في حياتي حاليا و أكتر شئ أثر في قوي
و الله أعلم
......
سبحان الله
الواحد سبحان الله فعلا مش يقدر علي هداية حد حتي نفسه غير بهدي من الله و فعلا تتحقق الأية
و إنك لا تهدي من أحببت و لكن الله يهدي من يشاء
حتي نفس الواحد مش يقدر يهديها
محدش يسألني بأقول الكلام ده ليه
حتي أحساس السعادة بردوا من عند ربنا بس يعني ممكن يكون في واحد مليادير و تعيس و ممكن يكون في واحد ميملكش شئ و سعيد
......
يارب
يارب
يارب
......
مش عارف ليه في رمضان بيزداد أشتياقي لجو معين كده باحس بيه هو ده أكتر شئ بيتعبني في رمضان
......
سبحان الله كمان الجو أتغير بسرعة تحس ان الشتا بدأ من فترة بالرغم من أن الأسبوع اللي فات كان في كم يوم حر
الحمد لله ربنا عارف بضعفنا و مش عاوز يصعب علينا الصيام
أنا بصراحة هأفتقد رمضان في الشتا خالص انا متعود طول عمري علي الصوم في الشتا
......
زمان كنا بنفطر أول يوم عند جدتي كلنا فين الأيام دي للاسف مش هينفع ترجع بس اهوة يارب ترجع
......
النهاردة ماما لما رجعت من الصلاة قالت لي أشتري شبت و بقدونس و مش عاوز تريقة أنا مش بتاع الطلبات دي بس الظروف اللي بتحكم نزلت أشتريت تلاتة حزم هم أسمهم كده مش انا اللي مسيهم و لا يسوا بجنيه تذكرت أيام ما كانت جدتي ربنا يشفيها بتبعتني لنفس الغرض زمان كنت بانزل بأشتري بربع جنية أكتر من ضعف اللي أشتريته النهاردة رحمك الله يا أم شادية اللي كنت باشتري منها زمان و كانت الحقيقة بتتوصي بيا
أحنا المفروض نتدرب علي منع الأكل خالص مش موضوع صيام ده أحنا هناكل بعض بعد كده
.....
أمبارح أول يوم صيام طبعا مش بأصلي فيه التراويح لأني بأكون تعبان جدا جدا جدا عامل زي المفجوع بأكلو باشرب لحد ما أحس أن بطني هتنفجر و بنام طبعا بعد كده بس إن شاء الله مش هيحصل تاني هو بيكون أول يوم بس و عارف أن ده غلط بس بجد مش بأقدر أول يوم متفهموش ليه
....
الحمد لله رمضان هل بخيراته
الأهلي أتعادل
و الزمالك كسب
ربنا يستر يوم الأتنين
.....
هي مردة الشياطين أتسلسلت خلاص بس لسه في الشياطين الصغيرة و كمان في شياطين الأنس دول بقة اللي لازم تخلوا بالكم منهم
كل سنة و أنتم جميعا بخير

14 comments:

Monzer said...

كل سنة وانت طيب يا معلم
وسعيد ان اول تعليق عندك
بجد ربنا يكرمك
هي المتابعة تقريبا بتبقى ضعيفة شوية فى رمضان ن بس خير ان شاء الله
انت حاول ماتكولش كتير ع الفطار علشان تقدر تصلى، مع انى مش بعمل كده، بس أهو قدينابنظبط بعض
وتقريبا انت زملكاوى، فهعتبر نفسى ماعرفتش حاجة هههههههههههههه
سلام يا معلم

فى القلب said...

أخيييييييييييييييييييراً لقيتك يا نو فير
أنت فكرنى أنا و بنتى و لا لاء
فيلم العروسه ألى بتقتل كل ألى يصرخ
هههههههههههههههه

واللهى كان يوم رائع بيكم كلكم

أنت عارف أنك موجود عندى طول الوقت فى ماى فيفرت و أنا معجبه جدا بمدونتك من زممممممان بس الزهيمر زى القطر مش بيرحم
بس بعد كده هتلاقينى هنا على طول يا عبقرى


كل سنه و أنت بألف صحه و سعاده
وصوم مقبول و أفطار شهى

أه على فكره أنا زمالكاويه
ألف مبروك

No Fear said...

Monzer
السلام عليكم
أنا مواريش غيرك و لا أية
:)
أنا كمان سعيد أنك أوك تعليق
بس ياريت نخف شوية
أيوة زملكاوي
و مش بخاف
إن شاء الله أنا ظبط مع محمد و هو هيقولك
سلام

No Fear said...

في القلب
أكيد طبعا فاكر
أخبار العسولة اللي أختارت الفيلم أية؟
أنا يشرفني طبعا أنك بتقولي الكلام ده علي بيتي ده أنا بعتبر المدونة بيتي في فضاء الأنترنت
أنا كمان قضيت يوم جامد جدا بس للأسف من ساعتها متكررش
ياريت يتكرر بعد العيد إن شاء الله
بس تقريبا الناس كلها بتقفل المدونات دلوقتي
بس أنا لا
و أنا زملكاوي
و مش بخاف
ربنا يستر يوم الأتنين
:)
ربنا يتقبل منك و مننا الصيام إن شاء الله
و كل سنة و أنت و الأسرة كلها بألف خير و في سعادة دايما إن شاء الله
سلام

صاحب البوابــة said...

يعنى كمان زملكاوي

وليك عين

هههههههههههه

:)

مبروك واحد صفر ( بس )

ده كدة يعتبر الزمالك فاز

:)

البنت الشلبية said...

كل سنة وانت بالف صحة وسلامة
معلش انا غبت فترة كده النت كان فاصل والله وكنت مضايقة اوى بسببه
المهم رمضان كريم وربنا يتقبل منا
وبالنسبة للخضار ده بقى مولع نار يلا موسم بالنسبة لهم
والزمالك للاسف خسر لكن ده ميمنعش انه لعب كويس اوى واكتر الهجمات كانت بيضا
بس هوا ايه الى عمله شيكابالا فى الاخر ؟ليه؟
خد بالك من نفسك
سلام

فى القلب said...

شفت يا نو فير
أنا بس جايه أفضفض معاك
من همى

خيبه الناس السبت و الأحد و أحنا خبتنا ما وردت على حد

كان نفسى أجى أهنيك و أهنى نفسى بفوز المحروس الزمااااااااااالك

بس هو ديماً مقصر رقبتى و مخليها زى السمسمه

يا لا حظ ربنا يهد الأهلى قول أمين فى الأيام المفترجه دى
ههههههههههههههه
صوم مقبول يا عمنا

mesh2dra said...

السلام عليكم

كل سنة وانت طيب

و
:
:
:

مبرووووووووووووك
علينا فوز الاهلي
:p

رمضان كريم

سلاماتي

shams said...

كل سنة و انت طيب
و بعدين الاهلي غلب يا معلم

No Fear said...

صاحب البوابة
السلام عليكم
فينك يابني محدش بيشوفك ليه أنت فين
هأجيب لك مازن بقولك أهوة
:)
الزمالك زمالك بيب بيب

No Fear said...

البنت الشلبية
السلام عليكم
حمد لله علي السلامة
و كل سنة و أنت طيبة
هو تقريبا معظم الناس النت فاصل عندها او مش بتدخل في رمضان مش عارف ليه
يا ستي متقلقيش هناكل بعض بعد كده و زي ما أنت شايفة الناس كتير يعني مش هنجوع
ربنا يستر و الله
أنا نفسي الزمالك يكسب بطولة بس هيتغير الحال خالص
يارب
شيكابالا أتوقف تلات مباريات و أحمد السيد مفيش عليه غلط
هنقول أية بس

No Fear said...

في القلب
السلام عليكم
هأقولك أية
بس مش عارف ليه أنا متفائل قوي بالزمالك دلوقتي و الله محتاجين بس نكسب بطولة
متقلقيش
علي ضمانتي اللي جاي أحسن كتييير بس يسيبونا في حالنا

أخبار العسولة أية
سلمي لي عليها قويييييييييي

No Fear said...

mesh2dra
السلام عليكم
و أنت طيبة و بخير
مش هأكلمك علشان أنت في مدونتي
بس أشوفك لما الزمالك هيكسب
هو أنت تقريبا مش بتعلقي عندي غير لما الزمالك يخسر
ماشي
ياريت تعلقي علي طول علشان ملفك ميكنش أسود عندي
انا بهرج
كل سنة وأنت بألف خير

No Fear said...

شمس
هو كسب
بس الزمالك راجع بعون الله
كل سنة و انت طيب ياباشا