Friday, September 07, 2007

وضاعت الجمعة
السلام عليكم و رحمة الله و بركاته
أزيكم يا شباب
أنا مش هأتكلم عن منع حماس للصلاة خارج المساجد لأنصار فتح
بالرغم من إنه المفروض أتكلم فيه أو أي حد تاني يتكلم فيه
بس بما إني مش عارف التفاصيل هتكلم بقة عن صلاة الجمعة عندنا هنا
أنا بيتي بين جامعين واحد كبير قوي و واحد كبير بس مش قوي
المهم الكبير اللي مش قوي ده عينة الخطباء الله بيجوا فيه من نوعية الناس اللي بتقعد تقول الأمريكان الكفرة و اليهود الخنازير و أنا بصراحة مش بحب الكلام ده
الجامع التاني الكبير قوي بقة بيجيبوا فيه خطباء يعني ملتزمين بالثلث ساعة أو نص بالكتير بس فيهم واحد من دار الإفتاء ده بصراحة اللي بنقعد نستني يجي و كمان الجامع ده كبير و أنا بحب الناس الكتير كده بحس بقوة بينهم بصرف النظر عن اللي بيعملوه أهوة أمل و خلاص
المهم أنا كمان بنزل متأخر شوية علي الصلاة و بحاول و الله أنزل بدري
نفسي أصلي في جامع حلو كده بس للأسف موضوع التأخير ده هو اللي تاعبني
المهم النهاردة بقة بعيد عنكم داخل الجامع لاقيت هرج و مرج كده قلت في سري لا حول و لا قوة إلا بالله مع إن الأذان أذن و الخطيب بدأ لاقيت شاب محترم كده راح مديني شنطة ببص لاقيت جواها علبة تمر معرفتيش اعمل أية حاولت أرجعها تاني انا مش فاهم و مش عارف أعمل أية بجد
قلتله طيب خاليها أخدها و أنا ماشي و أنا أصلا بعيد عنكم و أنا رايح الجامع باكون حنفية مش عارف أعمل أية
و أضطريت أخدها كنت مخنوق قوي
و كده الجمعة راحت ده من مس الحصي فقد لغي
أولا تخيلوا الخطيب شغال و كأنه مش حاسس و لا شايف حاجة خمسين واحد رايحين جايين في الجامع و الأخوة المصلين قاعدين هات أنا مأخدتيش ده مأخديش هات شنطة
و أية طبعا اللي بيصلي السنة مثلا مش ملاحق يوقف حد بيعدي من قدامه
كنت بغلي و الله ضيعوا الجمعة و ضيعوا فلوس في محل غير محلها يعني
تخيلوا مثلا تمن العلبة الواحد ة عشرين جنيه ده أقل تقدير في بتاع ألف علبة يعني عشرين ألف جنيه تخيلوا الجامه ده أصلا بيطلع زكاة مال حوالي مية ألف جنيه علي كم أسرة اللي فاكرة لما بأحسبها و الرجل اللي ماسك الجامع بيذلنا بالكلام ده يوم العيد بأحسبها بيطلع للأسرة تقريبا خمسين جنيه و النبي مش كان أولي أنهم يوزعوا فلوس البزخ اللي عملوه النهاردة علي الناس دي
كل ده علشان الناس تقول الحج فلان عمل و سوي يعني هو من جيب أهله
و الله حرام
أنا فكرت أقوم حتي أقول للخطيب يقولهم يوزعوا بعد الصلاة بس قلت لا مادام الناس مستمعته خلاص و بعدين مش بحب اللي بيعمل بطل في وسط الجامع
بس بجد أنا مخنوق منهم قوي
و محدش يقولي أنت أخدت و لا لا علشان مكنتش هأخرج من الجامع غير معايا علبة متحاولش يعني
و طبعا الخطيب اللي كان موجود النهاردة أصلا بيقعد يقول خطب روحانية قوي يعني الكلام اللي يخلي الناس طول ما هي قعدة عمالة تقول الله يسلام و الحاجات دي
أقول أية بس
لا حول و لا قوة إلا بالله
.....
في الشغل
كنت خلاص هايجيلي الضغط أمبارح
عاوزين نجيب بويلر في الشغل حلو مفيهاش حاجة و قلنا اللي مش عاوز يشترك معانا مش هيشرب فيه في عيب في كده قوم المدير الحليوة بتاعنا بتسخين من ولاد أبليس اللي معانا في الشغل يقول لا محدش يجيب علشان الأمن الصناعي ده الطريقة اللي بنعمل بها الشاي دلوقتي أنيل من ناحية الأمن الصناعي
اللي مضياقني هم زعلانين ليه
أحنا عاوزين نجيب حاجة نضيفه لنفسنا هم أية اللي يزعلهم مش عارف
و الحليوة التاني مجرب الظلم من رئيسه يعمله علينا
بس مش هأسيبهم
أنا هأعمل ثورة في المعمل الله يسامحك يا صاحب البوابة خليتني ثورجي و مش هأسيبهم
بس بردوا السياسة حلوة
بس ليه زعلانين مش عارف
...
حول العالم
مفيش جديد الحقيقة أة أفتكرت حاجة جديدة
التوقيت الشتوي بدأ
أنا في الشتا بتألق يعني أستنوني بقة في الشتا ده هأقطع الدنيا
رمضان جه كل سنة وأنتم بخير

8 comments:

sahr said...

ربنا يعوض عليك في صلاة الجمعة الجايا ان شاء الله
وكل سنة وانت طيب

صاحب البوابــة said...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

شـــــهــــروزة said...

رمضان كريم
وكل سنة وانت بخير

No Fear said...

sahr
السلام عليكم
منورة المدونة و الله
الحمد لله علي كل شئ
أنا هاغير البوست ده و خلاص علشان كل أما أدخل بأفتكر و يتحرق دمي
كل سنة و أنت طيبة
و تشرفت بزيارتك

No Fear said...

صاحب البوابة
السلام عليكم
يا عم أنت لازم تصعبها علي و خلاص
كل سنة وأنت طيب تكفي مش لازم قصيدة أرد عليك باية و النبي
كل سنة وأنت طيب
و ربنا يكرمك بحسن العبادة في رمضان و غير رمضان

No Fear said...

شهروزة
السلام عليكم
المدونة منورة
كل سنة و أنت طيبة و بخير دايما إن شائ الله

saso said...

في الشتاء بتتألق
!!!!!
كنت مبسوطة البوست وماشي تمام.. وفجاة فكرتني بالشتا
انا بقي باختفي
نلقاكم في مارس القادم
----
بويلر ايه اللي مضر بالامن الصناعي هو سخان مكشوف؟ المدير بتاعك هيرجع في كلامة مع اول مج شاي وسط الشتا
عن الجامع.. انا اساسا مبنزلش تراويح لاسباب كتير بس السنة دي ماما ماسكة فيا ومش راضية تروح لوحدها فباروح

كل يوم افضل اغني نفس القصيدة .. تشربي تمر هندي.. يا ستي مبشربش
الكوبايات بلاستيك.. متشكرة مش عاوزة
حبه ولقيت شوكولاتة ببتوزع وتمر ومسابقة بنظام الجايزة الكبري وحاجات مسلية جدا
وطبعا الولاد الصغيرين عاملينها ملاهي

طنط طنط انا مخدتش
:D
لو الفلوس دي اتجمعت تعمل الفات وراحت لناس تحتاجها
يلا كل سنة وانت طيب

No Fear said...

Saso
السلام عليكم
ياريت تبقي تقولي أنت بتعلقي فين مش لازم كل شوية أتفاجأ كده بيكي
علي العموم أنت تعلقي في أي مكان تحبي و لا يهمك
بس أية موضوع نلقاكم في مارس بتهرجي صح
ربنا يكرمك تكوني بتهرجي
ليه يعني مش بتصلي التراويح
عارف أنا الجو اللي أنت بتقولي عليه بس بجد ساعات بتكون الحاجات البسيطة دي تحسسك بسعادة يعني الحاجات الرمزية مش المبالغ فيها
أومال بقة لو نزلتي صليتي المغرب في رمضان في الجامع
تحسي أن الناس بترمي الأكل في الجامع و اللي مبيعرفش يصلي أصلا بس داخل علشان الأكل
ربنا يهدينا جميعا
كلس نة و أنت طيبة
بلاش مارس دي ربنا يكرمك