Tuesday, November 13, 2007

السلام عليكم و رحمة الله و بركاته
بلوجي العزيز وحشني قوي عارف من فترة أنا مقصر في حقك و حاسس إني مهملك حتي البوستات اللي كنت بأكتبها مكنتش زي بوستات زمان بس بجد و الله كنت بأكون حاسس قوي باللي بأكتبه مش مشكلتي إن أنت مش حاسس
بس بردوا حسيت إنك ممكن تكون زعلان مني فحبيت أفهمك علشان متكنش زعلان مني علشان أنا مش بحب حد يزعل مني و خصوصا أنت
.
مش عارف أنا حسيت بنوع من أنواع التكلف و أنا بأكتب فيك علشان بقيت أقابل الناس اللي بتعلق عندي
بس المشكلة إني بحبك قوي و بحب تصميمك جدا ساعات بفكر أعمل بلوج تاني علشان محدش يكون عارفني عليه بس مش قادر بحبك قوي بجد بس مش عارف أعمل أية و بعدين عقبال أما أتعرف علي ناس تاني و أدخل أعلق عندهم و عقبال هم ما يتعرفوا علي هياخد وقت و كمان مش هأقدر أخبي نفسي و هيبان إن أنا اللي عملت البلوج ده مش عارف أعمل أيةالمهم متكنش زعلان و ربنا يقدم ما فيه الخير
.
المفروض بقة تخلي عندك دم و تسألني عن أخباري و حالي
.
بص ياسيدي في التمهيدي للأسف طبعا كعادتي بأخر كل حاجة للوقت الحرج زي التقارير و التحضير اللي مش بحضره بالرغم من إن اللي المفروض أحضره هو مجال شغلي بس الكسل علي كمان حبه إن الوقت بيجري فعلا يعني أنا باروح الكلية يوم الأتنين من تسعة الصبح لسبعة بالليل عقبال اما بارجع بأكون أنتحرت و عقبال أما أفوق قوي بيكون يوم الخميس جه الحمد لله أفتكرت إن النهاردة الثلاثاء هأقوم لما أخلص أتفرج علي المصارعة علي الأية أر تي بس للأسف جون سينا مش هيلعب لمدة سنة يا خسارة
أنا نسيت كنت باقول أية أة كنت بتكلم عن التمهيدي بس هأحاول أجتهد و أظبط نفسي شوية و ربنا يكرم مش عارف فعلا الأيام بقت بتجري بسرعة رهيبة ربنا يستر
.
الشغل زهقان منه و لما ربنا بيكرمني فيه تلاقيني أتخنقت من الناس بس انا بأشوف ناس في التمهيدي مثلا أنا الحمد لله أحسن منها في الشغل اللي أنا فيه مليون مرة بس هتقول أية فعلا ميملاش عين إبن أدم غير التراب
.
في موضوع كده هتكلم فيه في النص يمكن محدش ياخد باله منه أنا زي ما أنت عارف أناني قوي مش عارف ليه بأحب أكون متميز و وفريد يعني الحاجة اللي بعملها محدش تاني يعملها مش عارف ليه حتي إذا كان لو هو عملها مفيش أي ضرر علي بس مش عارف باتضايق أكيد ده غلط بس مش عارف أعمل أية بأحاول أرود نفسي يعني فاكر زمان لما كان في أتنين من صحابي مثلا يقربوا من بعض كنت باتخنق قوي حتي لو كان ده بسبب ظروفهم هم و إنشغالي أنا بس أنانية مش عارف ليه الموضوع ده لسه موجود معايا يارب أقدر أسيطر عليه قبل أما يدمرني
.
في واحد مش عارف ليه هو بيعمل معايا كده بالرغم من إني واثق فيه قوي و هو عارف و متأكد من ده و بيعملي زي إختبارات كده هو مش واثق في أو مخبي عني حاجات كتيرأو كل حاجة عنه مش عارف ليه خايف من أية مش عارف علي العموم ربنا يسهله و يهديه أو أنا هأقلبه ياريت ياخد باله بدري
.
من أسبوع تقريبا أخويا عمل كارثة فعلا يعني و كل اللي في البيت عرف بها و مش هأقولكم هي أية علشان ربنا أمر بالستر الغريب اللي في الموضوع بقة أبويا حاسس أنه مش بيكلمني كويس و زعلان مني أنا ليه هو ده السؤال مش عارف و بيكلم أخويا عادي جدا
دي نقطة النقطة التانية بالنسبة لأبويا كل أما أحاول أفهمه يعني أنه لو طلب مني حاجة هأعملها يعني علشان هو ميتعبش نفسه في حاجات مالهاش لازمة و هو ساعات بيكون تعبان بيصدني مش عارف ليه أو للحق ساعات بيقولي علي أتفهه االحاجات اللي بيعملها و لما أسأله عن حاجات تخصنا يرد علي رد ناشف مش عارف ليه بالرغم إن لو حد من الشارع سأله عنها ممكن يعمل له البدع و يفهمه عمل أية و هيعمل أية
علي العموم عادي الحمد لله أهم حاجة رضي ربنا عني هو أينعم أنا ساعات باكون خلاص علي أخري و هأنفجر فعلا بس الحمد لله كفاية سعادتي ببداية عودتي لربنا تاني ربنا يديمها نعمة يارب
.
يارب يعدي الكم شهر الطحن بتوع التمهيدي علي خير علشان كل دكتور يهرش يقولنا عاوز تقرير عن الهرشة دي فاضيين إحنا نلف علي المكتبات كفاية إننا بنحضر أصلا فاكرينا صيع
.
الناس اللي فوقنا عمالين يكسروا في شقتهم من عشر أيام و صداع مش عاوز أقولكم و فتحوا السقف علي بعض مش عارف أنا كانوا هيعملو سلم داخلي بينا و بينهم تقريبا
.
التمهيدي فيه ناس كتير ربنا يستر ها فاهم
.
بفكر أخلع من الواد اللي معايا في الدي إس إل و أجيب واحد لوحدي أية رأيكم
.
منذر عاملها مناحة علشان هيدخل الجيش مش عارف ليه ربنا يكرمه و ميدخلش
منذر نفسي أشوفك يا بني
.
محمد مفيد مخنوق من المدونة التانية بتاعت الأغاني مش عارف ليه و كل شوية يسألني أنت عملت أية يوم سبعة و عشرين رمضان مش هأقولك يا محمد خلاص
.
هههههههههههههههههههههههههههههه الأهلي ههههههههههههههههههههههههههه
.
صوتي من يوم السبت عامل زي صوت القطر كده ربنا ما يوريكم بس الحمد لله شكله بدا يتعدل شوية
.
أنا سعيد قوي إني قدرت أحول الدعاء اللي شغال ده لإم بي ثري علشان أقدر أنزله علي البلوج
أنا تعبت بقة بصراحة هأقوم أتفرج علي المصارعة
كفاية عليكم كده النهاردة
بلوجي مش عوزك تكون زعلان
سلام

14 comments:

Monzer said...

باشا ذكرتنى ف البوست بتاعك يا ريس
يا مسيطنى

أصلك يا باشا مادخلتش الجيش علشان تعرف ليه انا مش عاوز اخشه :(((

ماشى يا ريس

ان شاء الله هاتعمل ماجستير وهاتروح شغل أحسن

ويا عم انت الناس كلها لازم تعرف وتعرف قد ايه انت ملاك
انت فعلا ملاك
ماشفتش حد زيك
وتقريبا مش هاشوف
وأستبعد انك تغير من أي حد ولا أي حاجة من ده
انت نفسك النقية
بتهيئلك ده والله
جمعة والله العظيم ....
حط كل صفة حلوة موجودة فى الدنيا

رفقة عمر said...

حمدا لله على سلامتك
على فكرة لو غيرت البلوج هانعرفك برضه مش تتحاول
اسلوب الانسان وانفعالاته مش بتتغير ومش بيعرف يداريها
ربنا يوفقك ويثبتك اللهم امين يارب العالمين

إنـســـانـة said...

ياخبر ابيض

هو مين راح فين بكام؟؟؟

مش حعترض لان ده اسلوب حضرتك من ساعة ما عرفت البلوج بتاعك .. فضفضات ولازم فى اخرها تتريق ع الأهلى

يلا مش حرد عليك .. ربنا يسامحك

بس اول مرة اعرف انك بتعمل تمهيدى .. لالالا ربنا يوفقك بجد وابقى ذاكر وركز عشان ترفع راس مصر لفووووووووق زى الزرافة بالظبط
:D
ربنا يعينك ويوفقك يارب

ابو مفراح said...

السلام عليكم
تحياتى اليك يا سيدى و الى مدونتك
و كمان الخلفيه الصوتيه اكثر من رااااائعه
تحياتى اليك و اول زياره لى بالمدونه
ابو مفراح

فى القلب said...

أنا شيفاك المره دى راضى كده ومبسوط شمه ده من بين السطور

وده الظاهر البدايه و الانطلاق ليك ا

أى حد بيديقك طنشه وبص للأمام المهم تبقى راضى عن نفسك من جوه

No Fear said...

منذر المنذر
السلام عليكم
أنا اللي أتشرف ياباشا إني أذكرك
أنا اليوم الوحيد اللي خفت فيه من الجيش يوم الإرجاء بسبب خوف الناس أنا زي ما أنت عارفني مش فارقة معايا أي حاجة بس من رعب الناس أنا خفت الغريب إن أكتر واحد من صحابي كان خايف هو اللي دخ و خلص وسافر كمان متقلقش أنت بس
فكرك هأعمل ماجستير ده أنا نسيت المذاكرة إزاي أصلا بحاول بقالي ساعة أهوة و مش عارف
ملاك مين أنت يا دوب تعرف الجزء الحلو اللي في بعيد عنك عن الجزء السو اللي فيا حاجة بشعة
مش عارف إزاي أنت دايما بتعلق عندي أول واحد
سلام

No Fear said...

السلام عليكم
رفقة العمر
أزيك أخبارك أية بجد متعرفيش لما بتعلقي عندي باكون فخور قد أية
ربنا يكرمك يارب زي ما بتشجعيني كده
للأسف فقدت جزء كبير من حريتي علي المدونة بسبب المقابلة و التعرف علي الناس
ربنا يسهل
أنا عارف إني مش هاعرف أعمل مدونة تانية مش عاوز أقلك بحب المدونة دي قد أية
بس نفسي حريتي ترجع لي تاني
سلام

No Fear said...

أنسانة الرائعة
السلام عليكم
أزيك أخبارك أية و أخبار كيمكاز أية؟
يارب تكونوا بخير
أنا مش بحب الأهلي و مش عاوز أقلك باحس بسعادة قد أية لما بيتغلب مش عارف السواد اللي عندي من ناحية الأهلي جه منين بس هي دي الحقيقة
ربنا يوفقنا كلنا
سلام

No Fear said...

أبو مفراح
السلام عليكم
المدونة منورة
أتشرف بزيارتك طبعا
جزاك الله كل خير

No Fear said...

في القلب
السلام عليكم
منورة المدونة
الحمد لله هذه فترة جميلة ربنا يديمها و يزيدها
أنت أخبارك أية؟
يارب تكوني بخير و العائلة كلها بخير

البنت الشلبية said...

ازيك عامل ايه
رجوعا حميدا
ضحكتنى اوى لما جبت الاهلى وجنبه ضحكة ههههههههههههههه
سلام

MerMaid said...

حقيقي

انت رائع بجد

========

اتمني اني اتعرف بيك

تهمني فعلا معرفة انسان زيك

ربنا يوفقك و يكرمك في شغلك و في ماجستيرك ان شاء الله

انا كنت في علوم ميكرو

بس اتخرجت السنة دي

و مستنية شغل في مشروع خريطة مصر البيولوجية في سانت كاترين

انت كيمياء طبعا

و كيمياء مبيحبوش بيولوجي

عندنا كان زمايلي الولاد في كيمياء بيقولوا علينا تافهين و لسة بدري قوي لما عقليتنا توصل لعقليتهم

الكلام ده صحيح؟؟؟؟

تقبل مروري البسيط علي مدونتك الرائعة

MerMaid

:))))))

No Fear said...

البنت الشلبية
السلام عليكم
ربنا يكرمك
مكنتش غايب جامد يعني
أيوة لازم نفرح في الأهلي لو مفرحناش فيه هنفرح في مين يعني
بس بيني و بينك ده حقد أسود
المشكلة إن كلاب الزمالك معندهمش دم خالص
بس بردوا
النجم
ههههههههههههه

No Fear said...

mermaid
السلام عليكم
ربنا يكرمك علي ذوقك و كلامك الحلو ده
أنا أتشرف أنك دخلتي عندي
أنا كيمياء
إحنا مكنش لينا علاقة بميكرو خالص و لا بيولوجي تماما
بس للأسف حصلت علاقة في البكالوريس الحمد لله علي كل شئ
المهم ميكرو دول أحلي ناس في الدنيا
ربنا يوفق كل بيتوع ميكرو و يكرمهم
علشان اللي كنت أعرفهم منهم يستاهلوا الحقيقة بجد