Sunday, January 13, 2008

السلام عليكم و رحمة الله و بركاته
طبعا الناس كلها منتظرة مني بوست عن اليوم الفظيع الرهيب الشنيع اللي قضيته مع منذر و مفيد و ناس تانية كتير و إحنا بنشارك نبع الأفكار مصطفي الحسيني في إفتتاح موقعه الإلكتروني الشنيع الفريد دار الكتب
.
بس هتكلم عن اليوم ده في أخر البوست لأن عندي كم حاجة كده عاوز أقولكم عليها
.
أولا مش عارف ليه عكس جميع محاولاتي السابقة من لقاءات مدونين و حضور لقاءات و حفلات التجمع الوحيد اللي حسيت فيه أني منهم و حسيت أنه في أمل هو لقاء إفتتاح دار الكتب مش عارف ليه
ياريت بس مصطفي لو كان فاضي و دخل هنا ميمسكهاش علي ذلة يعني
.
تاني حاجة و هي الأهم عندي شكرو تقدير كبيرين قوي لأتنين لأول مرة أحس و أفهم يعني أية حد يحب حد في الله هم طبعا الغاليين قوي منذر و محمد مفيد بحبهم قوي يا جدعان بجد
الأتنين بيقفوا جنبي قوي و يشجعوني و منذر بالرغم من إنه أنا أكبر منه سنا بس هو بيحسسيني إني زي أخوة الصغير و يقعد يسأل علي و يهتم بيا مبسوط و لا لا في كل حاجة و محمد مفيد كان عاوز يسألني علي اللي كتبته في البوست اللي فات بس متكلمش في كل اللي هو عاوزة بس سألني عن حاجات تانية و أطمن إن أنا أحسن دلوقتي
ربنا يكرمهم يارب و يبارك لي فيهم و في أخوتهم
.
تبدا أحداث اليوم بإستيقاظي مبكرا مش قوي يعني للإستعداد للرحلة المعتادة يوميا للعبور بس هذه المرة مش للشغل لا للهايكستب لإستخراج الإعفاء النهائي من الجيش
يوم الأربعاء كانت الدنيا مطرة و زحل بس انا كنت أجازة من الشغل الأربعاء و الخميس
المهم صحيت قلت هأروح الأقي الميكروباصات فاضية عادي يعني ساعات بأركبها لما بتفتني عربية الشغل رحت مكنش فيه و لا واحد وقفت في البرد ميكروباص كبير جه و الدنيا زحمة أضطريت أركب و وقفت لغاية الهايكستب مش مشكلة
معرفش كان معايا شباب كتير قوي في الميكروباص أشكالهم كبيرة علي صغيرة علي فافي علي ناس شقيانة كان يوم من أيام التلاحم و ربنا سهل و أخدت الإعفاء النهائي الحمد لله و رجعت و أنا راجع كلمت الحسيني يمكن يمكن يكون محتاج حاجة حد يرص كراسي يعلق نور كده يعني هو طلب مني رقاصة بس ده مكنش إختصاصي
:)
.
مكنتش عاوز أروح نزلت رمسيس أشتريت فطار من عند اخر ساعة و بعدين رحت قعدت علي القهوة و شربت شاي و عملت دماغ و روحت وسط البلد كان إحساسه غريب في المطرة و الغيوم
.
روحت قعدت كلمت منذر و مفيد علي المسنجر و اتفقنا علي المقابلة و أتقابلنا و قابلنا دومة و الجيزاوي و بعدين توجهنا لمكان الإفتتاح مكتبة البلد بوسط البلد بس و شفت ناس مشتفهاش من زمان زي حبيبي ابن ناصر و شفت ناس لأول مرة زي مريم هو أينعم متكلمناش خالص بس كويس شفت حد كان نفسي أشوفه و كنت سعيد باللقاء ده قوي و كان مفيد هو اللي بيقدم الحفلة و قعدت أضحكه و الناس كانت عاملة زي المدرسة عمالين يتكلموا و مفيش إحترام خالص بس كان يوم لذليذ ربنا يوفقه الحسيني في تحقيق حلمه الخبز و الكتاب مش فاهم أنا أية الحلم العجب ده بس ربنا يوفقه
.
وبعدين قعدنا شوية علي البورصة و روحنا و كان معنا ناس كتير علاء و أحمد مهني و محمد هانئ الشخصية التي فعلا سعدت بمعرفتها و بعد كده روحت انا و منذر و محمد هانئ و كنت ماليان طاقة و تفاؤل وسعادة الحمد لله
.
دي حاجة بيني و بين مفيد
أستني يا منذر
.
الواد الحسيني مش عارف ليه ذلني و مرضيش يديني كارت من بتوعه مش عارف ليه بس الحمد لله حبيبي مفيد أداني واحد منه
.
مش عارف طولت عليكم و لا لا
أهوة فضفضة بقة أنتم عارفين إن أنا رغاي قوي علي النت بس
في حاجة أخيرة أقولها طلعت عيل و رجعت صداقتي مرة تانية مع صديقتي اللي قلتلكم إن أنا قطعت كلامي معها البوست اللي فات
و بقولها متزعليش مني انا أسف
:)

13 comments:

MerMaid said...

طيب كويس انه كان يوم حلو
وكويس انك كنت مبسوط
وكويس انك لقيت حاجة تركبها
و كويس انك رجعت صداقتك تاني
و كويس انك بقيت كويس

:))
تحياتي

saso said...

lol @ mermaid's comment

:D
وعليكم السلام ورحمة الله وبركاته بقي

امممم يعني اتبسطت
وفهمتني فكرة المكتبه علشان كنت فاهماها حاجة تانية
:(
ربنا يخليكم لبعض انت ومنذر ومفيد

-------
الاعفا دي مبروك تانية كبيرة وبخط تقيل شويتين
:)
عقبالك ياللي ف بالي
------
أكل ايه ف المطر ده يا محمد، ده كان يوم مينفعش فيه غير نوم ودفا
ماعلينا
المهم اليوم كان حلو ربنا يوفق مصطفي كمان
:)
سلام يافندم ومتبقوش تعلوا صحابكم تاني وتصالحوهم

مـحـمـد مـفـيـد said...

:))
والله يا محمد انا ميت من الضحك
أستني يا منذر
والله يا محمد بجد انا ببقي سعيد لما بقابلك واتكلم معاك
لانك نقي اوي
ربنا يديم علينا الحب والاخوه في الله
واسيبك مع الايميلات الجامده اللي انت طلبتها مني
وبجد حاول متزعلش حد منك لانك بجد انسان لازم الناس كلها تحبك

No Fear said...

mermaid
السلام عليكم
الحمد لله مبسوط
و ربنا يسعدك و يجعل أيامك كلها سعادة
ربنا يخليكي
ذوق و الله طول عمرك

No Fear said...

saso
السلام عليكم
حمد لله علي السلامة المدونة منورة
الحمد لله كان يوم حلو
ربنا يسمع منك
الله يبارك فيكي
مين بقة اللي ف بالك
؛)
كان يوم جامد جدا
ربنا يسهل
ساعات الواحد بيكون بيفكر في مصلحة حد من طرف واحد بس
هو ده اللي بيخليني أتهور شوية
بس الحمد لله المرة دي رجعت لعلقي قبل فوات الأوان

No Fear said...

مفيد
السلام عليكم
بتحرجني بكلامك الجامد ده قوي
أستني يا منذر
و يارب يديم علينا أخوتنا دي لأخر العمر
ياعم بلاش الكلام الجامد ده
و بعدين مش عيب عليك تتطلع أسرار صحابك و تبعتلي الإيميلات

Anonymous said...

طب الحمد لله ان الامور رجعت لمجاريها وتمنياتنا بالتوفيق ان شاء الله

sherehan84 said...

أنا عايزه بجد أشكرك على اهتمامك بوجودي أو بغيابي عن المدونه ومتابعتك ليّه ..
مع اني بقالي فترات طويله مش بدون ومش برد على التعليقات بس انت دايما كنت حاضر في البوستات بتاعتي .. حابه اني أشكرك :)
شكرا

ibn nasser - ابن ناصر said...

قعدت علي القهوة وشربت شاي و"عملت دماغ"
......
يعني ايه عملت دماغ؟
وماذا كنت تنوي بعد فعل هذة الدماغ؟
هل كنت تنوي لاغتيال الرئيس؟
ام التخطيط لقلب نظام الحكم؟
او كنت تفكر في قلب الدستور ؟
ومن اعطاك كباية الشاي صاحبة الدماغ؟
ومن حرضك علي هذا؟
ومن كان معك وفي ماذا كنت تفكر ؟
والكباية كان طولها ايه؟شكلها ازاي؟ عاملة ايه؟
.. اعترف ,, مش عاوز تتكلم طـيب يا زينهم هات الخرارة
ههههههههههههههه
..
والله بوست جميل ههه
حبيبي جداًَ والله

No Fear said...

hend
السلام عليكم
حمد لله علي السلامة المدونة كانت مفتقداكي
الحمد لله علي كل شئ
و ربنا يستر
:))
سلام

No Fear said...

sherehan
السلام عليكم
بتحرجيني بذوقك
و لا شكر و لا حاجة
أنا بس بحب التدوين قوي و هو أثر فيا بدرجة كبيرة بحاول أرد الجميل لناس كتير قوي وقفت جنبي و أثرت فيا
ربنا يوفقنا كلنا و يكرمنا و نكون مع بعض في الأوقات الصعبة قبل الحلوة
ياريت متغيبيش تاني
سلام

No Fear said...

ابن ناصر
السلام عليكم
مش مصدق
المدونة منورة بيك ياباشا
هأبقي أقولك الدماغ دي اية علي إنفراد
و إذا بليتم فأستتروا
و بلاش فضايح
بجد ياريت يكون عاجبك بجد هو مش قد المقام بس دمااااااااااااغ
:)))
و الله ربنا يعلم أنا كمان بحبك قد أية و بجد سعيد بمعرفتك جدا جدا جدا

sherehan84 said...

قريت البوست القديم عن صديقتك اللي افترفت انت وهي .. شيء محزن أوي انك تفترق عن شخص انت حاسس انه فارق قوي في حياتك ..بندم كل يوم على البلاوي اللي أناعملتها مع صديقي واللي لولاها مكناش افترقنا بس زي ما قلت في البوست لا يفيد البكاء على اللبن المسكوب :)
ميرسي تاني على تشريفك مدونتي
وان شاء الله هتكون انسان يشرف كل حد عرفك بس انت اجتهد وخللي عندك طموح وايمان هتوصل ان شاء الله