Sunday, January 27, 2008

السلام عليكم و رحمة الله و بركاته
أصدقائي أزيكم جميعا يارب تكونوا بخير
البوست ده ده بقة مش عارف أنا عندي إنطلاق في البوستات مش عارف ليه المعدل عالي قوي بالرغم من إني المفروض أقلل القعدة قدام الكمبيوتر أصلا و أقعد أذاكر بس مش بيحصل
.
أمبارح كان يوم صعب قوي أنتم طبعا متعودين مني علي بوستات جلد الذات بس بجد يا شباب أمبارح علي ما أعتقد أول يوم في حياتي أصعب علي نفسي قوي بجد علي ما أعتقد من ساعة أما وعيت علي نفسي دايما بألوم نفسي و بأقطع فيها و باندب حظي بجد أمبارح يعني عيطت بس مش كتير علي نفسي مش عارف هأستحمل لحد امتي
و الله كان نفسي أنقسم نصين نص يعيط و نص يطبطب علي اللي بيعط
.
انا دينيا مش ملتزم قوي و كمان في الحياة مش ملاك و بعمل حاجات غلط كتير بس بجد أول مرة احس إن الغلطات و التقصير اللي بعمله في أي حاجة تجاه أهلي و صحابي و الناس اللي في الشارع حتي لا يمكن يكون ده جزائه طبعا ربنا الوحيد اللي الواحد لا يمكن يشكره حق الشكر علي النعم التي أنعمها علي أي إنسان بس بجد أنا يارب تعبان قوي و خايف جدا علي نفسي مش عارف ممكن انهار في أي لحظة و أعمل حاجات او حاجة مقدرش أرجع فيها
أنا مش عارف أعمل أية و مش عارف رايح فين
بس كده
.
البوست ده بقة بسيط و سهل علشان الزباين اللي بتتدخل المدونة قلت خالص و كده مش لاقيين ناكل يعني
و كمان أمبارح الأخوة في حزب الجبهة اتصلوا بي مش عارف أية اللي فكرهم بيا و الغريب أنهم بيقولولي تعالي أستلم الكارنية الخاص بالعضوية مش عارف هم لسه فاكرين علي العموم أنا هأروح بس مش عارف هأستمر معهم و لا لا طبعا القدام منكم حكيت لهم اللي حصل و كده لا داعي أقطع في الحزب اللي لسه هأنضم له
.
بجد يا شباب الواحد خلاص علي أخره مش هينفع كده فعلا
و الله عارف كل اللي هتقوله و فعلا ياريت محدش يعلق علشان أنا عارف كل اللي هتقولوه بس بجد انتم مش ممكن تتخيلوا اللي أنا عايش فيه ممكن اكون أنا حساس شوية زي ما كتير من الناس بتقولي و بكبر المواضيع يمكن بس بجد حتي الجبلة اللي أسمه جبلة لو مكاني هيقول اللي بقوله
.
أخيرا أنا أتخنقت قوي من المدونة دي مش عارف بقيت اتكلم فيها كل اللي كنت باكتبه مع نفسي و مناجاتي مع ربنا مش عارف ده صح و لا غلط هو غلط عارف بس بجد أنا جوايا كلام كتير قوي لازم يطلع مش عارف أطلعه فين و لا إزاي علشان كده بيطلع هنا و مش عارف لو قدرت أكتمه هتكون حالتي أية
.
انا داخل في حوار كده مش عارف أخرته أية بس دخلت فيه و مش عارف أعمل أية و خايف منه قوي علشان هيكون محطم لو أستمريت فيه جامد و فشل لأي سبب
.
الأخوة حبايبي الزملكاوية عمرو زكي و محمود فتح الله مكفهمش الزملكاوية اللي أنا واحد منهم لا دخلوا علي مصر كلها علشان يجيبوا لهم الضغط
ربنا يوفقهم
.
و الله انتم شكلكم أي كلام و لا حد بيدعي لي خالص و لا بذاكر و لا الدنيا بتتغير معايا يا أما تتوضوا و تدعوا أو متدخلوش بقة هنا مش ناقص قرف بقولكم أهوة
.
و الله يا جدعان مش عارف انا بأضحك كده إزاي و بهرج كده إزاي مش عاوز أقولكم أنا كنت في الشغل النهاردة كأني أسعد إنسان علي وجه الأرض بالرغم من إني ماسك دموعي بالعافية
مش عارف ده مرض و لا هبل و لا عبط و لا بداية جنون ربنا يستر
.

18 comments:

صاحب المضيفة said...

ده مش هبل ولا عبط ولا حاجه خالص

دي حالة بتيجي للواحد لما بيحاول يكون كويس بس

على العموم ادينا بنقولك يا سيدي وبندعيلك


كان الله لك وسهل لك كل عسير ونفع بك

أمين

رفقة عمر said...

اسفه انى مش اول تعليق
عايزة ااقولك انك احسن مننا كلنا
عارف ليه مافيش حد مننا بيلوم نفسه كدة زيك
كلنا شايفين نفسنا احسن ناس وشايفين نفسنا ملائكه ربنا اقسم بالنفس اللوامه وانت ماشاء الله تحمل نفس لوامه
الصحابه نفسهم مش كانوا راضين على نفسهم
ولو بتغلط كلنا بنغلط
بس مين بيلوم نفسه زيك
ربنا يرزقك النفس المطمئنه اللهم امين
ويبارك فيك يارب
وييسر لك كل امورك ويفتح عليك فى المذاكره ويرزقك الفهم اللهم امين يارب العالمين

مـحـمـد مـفـيـد said...

حبيبي
فتحت الصفحه ومش عارف اقولك ايه
كلنا كده يا محمد نخطئ ونعود ونخطئ ونعود
في حديث قدسي لله عز وجل يقول لملائكته
يا ملائكتي أناداني عبدي ؟
فيقوله له نعم يا الله
فيقول الله عز وجل أألح علي عبدي ؟
فتقول الملائكه لا يا رب ؟
فيقول الله عز وجل اخر مسأله عبدي فأني احب ان اسمع صوته

كلنا مقصرين ولكن النفس التي تلوم صاحبها دائما مثلك فهي نعمه من نعم الله عز وجل

ربنا يكرمك لانك بجد نقي ونضيف اوي يا محمد

mesh2dra said...

السلام عليكم

مش قادرة احط ايدي بالظبط على المشكلة

هل ده مثلا عشان كان نفسك تحقق حاجات كتير وبعدين تكاسلت وبعدين خلاص باي باي مع السلامة

ولا عشان معندكش اصلا هدف بعيييييد عشان توصله

ولا فقدت الامل

فعلا مش عارفة

بس اللي عارفاه
ان مش انت بس اللي يبتمر بده
وانت احسن من اى حد في فس مشكلتك
عارف ليه
عشان انت بتفكر
وبتفكر بصوت عالي كمان
بالاضافة الي انك مش راضي عن الوضع

بجد
ربنا يكرمك اوى
ويرفقك لما فيه الخير

عارف
ساعا كتير اوى بيبقى الواحد بيفكر في حاجة يعملها
والحاجة دي تبقى مصيبة ولو عملها تبقى حتسببله مشاكل كتير
وبنبقى محتاجين حد نقوله فكرتناالشريرة عشان يقولنا " لأ "
رغم ان احنا مقتنعين بلا
الا اننا محتاجين حد يقولهالنا

ربنا معاك ويرقفك

mesh2dra said...

يوفقك**

سوري

No Fear said...

صاحب المضيفة
السلام عليكم
منور
و الله ياريت يكون كده
ميكنش أقصي درجة من اليأس
ربنا يكرمك
أدعي لي جامد قوي علشان أخوك خلاص

No Fear said...

رفقة عمر
السلام عليكم
كفاية أنك بتشرفيني و تعلقي عندي
و الله انا مش زي ما أنتم بتفهموا من اللي بكتبه خالص
فعلا اللي بكتبه ده فضفضة مش متهيألي
و الله أتمني تكون فعلا نفس لوامة
بس بجدهي مش كده
ربنا يهدينا جميعا
ربنا يتقبل دعائك و يرزقك مثله

No Fear said...

حبيبي مفيد
السلام عليكم
و الله يا محمد أنا تعبان قوي
و زهقت من نفسي
أنت مش بتشوف أنا بعمل أية
و مدي الضعف اللي أنا فيه
محدش يعرف البلاوي اللي بعملها و لا تفكيري و لا اي حاجة غير ربنا علشان كده أنا وهقان و متضايق
كرهت النفاق اللي أنا فيه
الناس معظمها مش شايفاني علي صورتي
و لا الكويس و لا الوحش
و الله و لا نقي و لا نيلة
ده أنا مليان سواد بعيد عنك يكفي بلد
المهم كفاية بقة علشان مبهتش عليك علي رأي منذر
:)

No Fear said...

مش قادرة
السلام عليكم
بجد سعيد بتعلقاتك عندي بإنتظام كده
:)
لا فعلا شكلي فقدت الأمل للأسف
أستغفر الله العظيم
بس بجد مش عارف أعمل أية
مخنوق خنقة جامدة قوي
عارف إن حالي أحسن من ناس كتيييييير قوي بس بجد تعبان

مـحـمـد مـفـيـد said...

وتفتكر انك لما تقعد تعدد الاخطاء بتاعتك كده
يبقي ده الحل ؟
لازم تبدأ تغير من نفسك
وانت قادر علي كده
جرب وهتشوف

MerMaid said...

طيب عاوزنا نقولك ايه؟؟؟
انت متعرفش البوست ده عمل فية ايه
بجد زعلانة قوي علشانك
بس زي مارفقة و مفيد قالولك
و انا دايما بقولك
انت كويس قوي قوي
بس انت مش شايف كدة
لما اتنين يقولولك كدة يبقي انت اكيد كدة
صدقني يا محمد كلنا كدة والله واكتر كمان
و فينا بلاوي و متنيلين بنيلة واحنا اللي ممكن نبهت عليك مش انت اللي تبهت علينا
و يا سيدي كلنا عاوزين حد يطبطب علينا ..مش انت بس
بس شعور جميل و مؤلم اللي انت حسيته
محمد مش عارفة اقولك ايه؟
خلص الكلام
تحياتي ليك
خللي بالك من نفسك
:)
هاجر
MerMaid

mariam said...

ازيك يا محمد ايه الخبار؟

معلش انا هعلق فى النص كده
بالنسبه لموضوع حزب الجبهه لو عايز تروح قولى قبلها او قولى و خلاص و انا اساعدك ان شاء الله لو عايز طبعا
اتمنى اكون مش بتدخل

طبيعى جدا تكتب كل اللى انت عايزه فى المدونه على الأقل نوع من المشاركه الحلوه

Mohamed_sobhy84 said...

ايوه فعلا فتح الله قرب يجيب الضغط لمصر كلها
اعزرني على الغياب لأنه مع الجميع فعلا

No Fear said...

مفيد
السلام عليكم
قول يارب
بس أية رأيك في اللي سمعته
:)

No Fear said...

مفيد
السلام عليكم
قول يارب
بس أية رأيك في اللي سمعته
:)

No Fear said...

هاجر
السلام عليكم
ربنا يبارك لي فيكي
و الله بجد تعبان و كنت في فترة وحشة قوي الحمد لله عديت منها شوية بس بجد ممكن ترجع تاني
و في حاجات كتير قوي جوايا نفسي أتخلص منها
قولي يارب

No Fear said...

مانو
السلام عليكم
منورة
بالنسبة لموضوع الحزب هأبقي أكلمك علي اللي حصل في الإجتماع
أنا سعيد أنك بتتدخلي
بالنسبة للبوست هو أة مشاركة بس معتقدش أنها حلوة في ناس كتير قوي بتعيط لما بتقرا اللي بأكتبه
:)

No Fear said...

محمود
السلام عليكم
يا باشا أنا يكفيني أنك بتعلق عندي
عمرو زكي رفع راسنا و جاب جون ربنا يكرم
لما نشوف هنعمل أية مع أنجولا و فلافيو
:)
منورني