Tuesday, January 01, 2008

السلام عليكم و رحمة الله و بركاته
المرة دي من المرات القليلة اللي بكتب فيها علي ورق قبل الكتابة المباشرة علي الكمبيوتر
و للأسف بكتب في الشغل من الفضي و من شدة إشتياقي للتدوين هذه الحدث الجمييييل
أمبارح توجهت مع الغالي منذر لقرية القرصاية للمشاركة في الحفلة التضامنية مع أهالها
أكيد كلامي مش هيعجب كتير من الناس ده فرضا لو حد من الناس قرأ الكلام ده و هو ميعرفنيش مش من أصدقائي في عالم التدوين يعني
حسيت بنفس الشعور اللي حسيت به و أنا في الأجتماع الذي حضرته بحزب الجبهة شعور بالغربة مش عارف السبب الحقيقي لشعوري ده يمكن علشان أنا شايف نفسي أقل من الناس دي إطلاعا و معرفة أويمكن كنت أعتقد أن هذا الشعور سببه عدم إقتناعي بأن فكرة التغيير هتكون بالطرق اللي سمعتها في إجتماع حزب الجبهة أو من خلال حفلة جزيرة القرصاية
لكن بعد كلامي في طريق العودة مع منذر أنا أسف بالمناسبة يا منذر علي التسعة كيلو الزيادة اللي مشيناهم غلط بس سيبك و لا يهمك هو شايف إنه ممكن حاجة زي الحفلة ممكن تكون من خطوات التغيير و يجب أن أحترم رأي منذر لأنه منذر يعني لو حد تاني قال لي الكلام ده مكنتش هأغير رأيي
الشئ المستفز في الحالتين إن الناس بحس بها أو المعظم للحق يعني بتتعامل مع التغيير أو الإصلاح زي ما بيقولوا من برج عالي قوي تلاقيهم غالبيتهم يعني علشان مش عاوز قلة أدب و كل اللي هيقرأ الكلام ده يعتبر نفسه مش من الناس دي شباب فرافير كده يخلصوا الحفلة و هيطلعوا علي الديسكوتك بعد كده و لما يروحوا يقولوا شفت يا باباي و ياماماي أنا عملت أية و كنت فين أو نوع أخر يريد الحياة بالطريقة الأمريكية التلفزيونية و طبعا مش هأنسي البنات الظراف اللطاف اللي كانوا عاوزين يلعبوا مع أطفال القرصاية كانهم لعب أول مرة يشوفهم هأقولهم لا الأطفال دي اللي أنتم لو شفتوهم في الشارع بتقرفوا تمشوا جنبهم و لو واحد منهم حط أيده علي عربيتك هتروحي تغسيلها بعد كده
و أنا هأقول للناس دي لو عاوزين تشوفوا و تعيشوا بجد حياة الناس دي أركبوا الأتوبيسات الساعة تلاتة الظهر و شوفوا الناس عاملة إزاي و حالها أية و بتتعامل إزاي مع بعض
الشئ الوحيد اللي مخليني مش مكتئب قوي من الحفلة دي إن منذر و ما أدراكم من هو منذر كان سعيد و متفائل بالحفلة دي علي العكس مني و أنتم الحكم بينا
مش هأقدر أنسي بقة في الحفلة دي الفضيحة اللي الجيزاوي عملها لمنذر و طقم الشتيمة اللي أستقبله بها عند لحظة وصولنا لركوب العبارة نوماندي تو و منظرنا و كأننا سائحين داخلين الجزيرة
و لا أنسي سعادتي برؤية معظم مجموعة أبناء مصر لأنه أنا كنت بقعد مع منذر و الحسيني و مفيد زي الأطرش في الزفة و هم بيتكلموا عنهم
أما عن القرصاية بقة في حد ذاتها و مشكلتها أنا مش عارف التفاصيل قوي و الظروف بس الحقيقة هي مكان رائع جدا جدا جدا و في رأيي و مش عاوز طوب مش مستغلة صح أنا طبعا معرفش مساحتها قد أية للأسف كان معايا ورقة عنها و فيها التفاصيل و معلومات عن الجزيرة بس في واد رخم من عيال القرصاية زي الواد ابن أختي كده أخدها مني علشان فيها صورة جده
المهم ممكن يتعمل فيها مشاريع سياحية فعلا و يشتغل فيها أهل القرصاية مع عمل جزء منها أو بديل لها فيه مساكن قريبة لهم
و اللي هيعترض علي المشاريع السياحية ممكن يتعمل فيها حاجة زي الأزهر بارك و تخصيص أماكن للصيد علشان الصيادين اللي فيها و أمكان للزراعة علشان و الله أعلم أرضها خصبة جدا يعني بدرجة رهيبة و هي شكلها فعلا مش مستغل صح
أكيد ناس كتير مش هتوصل هنا الحمد لله يعني أخد راحتي في الكتابة
بس بجد أحنا لو نزلنا قبل هوجه القرصاية و أهتمام الحكومة بها أو بمعني أخر إن الحكومة حطتها في دماغها و سألت أي واحد فيها كنت هتلاقيه مش طايق عيشته و حالته المادية و ظروفه الإجتماعية و الله أعلم كأغلب أهل الريف في بلدنا و الدليل علي كده أتجاه الناس من الريف للعمل بالقاهرة و تركهم للزراعة
أكيد في حلول كتيرة للمشكلة دي فعلا تخلينا نستفيد من الأرض و الموقع الرائع و الجمال اللي فيها و انعدم تماما من حياتنا و في نفس الوقت عدم تشريد أهالي القرصاية و الله أعلم
كفاية عليكم كده سياسة و حبه فور فن و الله أعلم هأقدر أكتب كل ده علي الكبيوتر اصلا و لا لا و الحمد لله قدرت و هانزله حالا
بعد الحفلة ضحكت علي الواد منذر و أخذته مشي حاولي خمسين كيلو و كان هأيعيط و جعان و الحمد لله ربنا وفقنا للوصول لمؤمن في المنيل و الرجل ضحك علينا بسندوتش غريب جديد كان حاجة اععع خالص و لولا إننا جعانين و محروقين من الفلوس اللي دفعناها كنا رمينا السندوتش
و بعد كده أتجهنا للبورصة شربنا كوباية الشاي الظريفة و روحت و سيبت منذر مع مجموعة أبناء مصر
أة نسيت حاجة مهمة جدا كمان معلش هو بيزعل لما بتكلم عليه في المدونة بس هو بجد حبيبي قوي و الله و ربنا يعلم بس بجد مش ممكن يعني اللي حصل كنا كل ما نسلم عليه انا و منذر نرجع نقابلة تاني و هو حبيبي مازن سلمنا عليه بتاع تسعين مرة و أخر مرة علي بعد خمسة كيلو من القرصاية كنت خايف لأحسن أروح البيت أفتح الباب الأقيه جوة
و لا ينقصني حلوة ينقصني دي غير إن أنا أبدي أسفي حلوة اسفي دي كمان علي عدم وجود حبيبي محمد مفيد معنا و ربنا يشفيه و يخفف عنه علشان ألم الأسنان جامد أو يمكن هو كان بيتلكك علشان ميجيش الحفلة دي زي الحج مصطفي الحسيني اللي حلق لنا حلقة جامدة قوي
و بعد كده روحت و عملت كوباية نسكافيه ظريفة طبعا مشربتهاش علشان
نمـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــت

14 comments:

رفقة عمر said...

انا فعلا مش عارفه قريه القرصايه دى
وعلى فكرة والله كلامك صح جدا يعنى ايه ممكن حد يعترض لا طبعا احنا نازين مؤتمرات وحفلات و اجتماعات وبجد ولا حاجه بتتغير قولى كدة حد من بتوع العباره اخدوا حقهم او بتوع قطر الصعيد احنا بس بنحب البروباجندا وخلاص
بجد ابوست دة عجبنى جدا او مرة تخرج من نقدك لنفسك الى نقدك للواقع المر اللى احنا عايشين فيه
والف سلامه لاستاذ مفيد ربنا يشفيه ويعافيه اللهم امين يارب العالمين

No Fear said...

السلام عليكم
أنت متعرفيش و الله كلامك ده بيؤثر فيا قد أية
و كمان سرعة تعليقك دي مش ممكن بجد
ربنا يكرمك
و يارب تكوني خرجتي من بداية الحالة اللي شبهي اللي كانت عندك

مـحـمـد مـفـيـد said...

حبيبي ورفيقي واللي بفتقده والله
محمد باشا
والله يا ابني انا لو مش عايز اجي كنت هقول مش هاجي
انا عارف ان كانفي اغاني وكده بس الهدف كان اسمي من كده
وربنا ما يوريك يا حبيبي اللي انا فيه
انا هعمل العمليه يوم الاربع بالليل
عارف لو مكلمتنيش تطمن عليا
هفضحك علي المدونه
وبجد فرحت جدا انك عرفت مجموعتنا المحترمه
ابناء مصر ومستنينك
وسلمليلي علي الحاج مصطفي بقي
:)))))

sarah la tulipe rose said...

هو انا برضه مش من المعارضين لان تتم مشروعات في الجزيرة بس مش مشروعات استثمارية كهدف اول و وحيد مشروعات تنموية عشان خدمة اهل الجزيرة و استغلال امكانيتها بس المشكلة ان مفيش اي ثقة بتاتا في الحكومة و لا في صدق نواياهها في التية لان فعلا هي معندهاش الية دي بدليل عمليات الخصخصة و البيع بالخسارة لاصول و اموال الدولة بدل من تنميتها عشان كدة الحل الوحيد لتحسين المستوي العام في مصر مش حيجي غير مننا كافراد
بالنسبة للفرافير..هههههه..هي برضه مش تعميم لان في كدة و في فعلا ناس محترمة جدا و واخدة القضية بشجاعة و بايمان و دة زي يوم اليتيم مثلا تلاقي ناس جاية منظرة تلعب مع الاطقال "المساكين" ياحرام و متعرفهمش باقي ايام السنة هي جزء من ثقافة الرياء عندنا في مصر
لكن دة ميمنعش ان فعلا الواحد بيقابل ناس محترمة للغاية و معدنهم اصيل و بيحسسوك ان فيه لسه امل
عليالعموم هي تجربة ثرية باي حال من الاحوال حتي لو مكنتش سعدت بيها بس اكيد وريتك عالم جديد مختلف

إنـســـانـة said...

هو انا من رأيي ان لا غنى ولا هتافات بتعمل حاجة مع العالم دى .. اللى هما عايزينه بيعملوه شئنا ام ابينا ولا بيهم رأينا ولا اى حاجة

المهم الحمد لله حسيت بشوفة تفاؤل صغيرين اااد كدة هو فى البوست ده .. يارب مساحة التفاؤل دى تكبر فى حياتنا كلنا ولو حتى مجاملة ل2008
:D

ألف سلامة ع الأستاذ محمد مفيد

وهابي نيو يير يا أستاذى نو فير .. حلو السجع ده
:D

No Fear said...

أخي محمد مفيد
السلام عليكم
ربنا يطمنا عليك يارب
و ربنا يخفف ألمك
أنت هتمثل أنت شكلك مكنتش عاوز تيجي
و انا عمال أتصل بك و مش عاوز تعبرني
أنا هأعملك اية تاني
:)
أنت عامل مجموعة تانية أسمها مستنينك
هههههههههههههههههههههه
نفسي أشوفك قوي و تقعد قعدة حلوة

No Fear said...

sara la tulipe rose
السلام عليكم
منورة المدونة بعد طول غياب
فعلا نقطة مهمة قوي كنت عاوز أقولها بس نسيت
إننا مش بنثق في حكومتنا يعني ممكن تلاقيها الصبح هتقولك هنعمل و هنعمل و لما يخدوا اللي هم عاوزينة أبقي قابليني لو عملوا حاجة
أنا الحقيقة مشفتيش فرافير من النوع اللي أنت بتحكي عليه أتمني و الله أكون أنا اللي غلطان بس بجد ده اللي بحسه
تحياتي ليكي
و كل سنة و أنت طيبة
أكيد ثرية جدا كفاية شوية الرغي اللي مع منذر

No Fear said...

إنسانة الرائعة
السلام عليكم
انا زيك كده بالظبط بس مش هينفع لازم يكون عندنا رؤية إزاي طيب ممكن تغير حالتنا يحصل
للأسف الحقيقة أنا مش عارف إزاي
بس أتمني أنك تعرفي
تفائل فين ده شاوري عليه علشان أقتله لا المدونة دي إكتئاب بس

كل سنة و أنت طيبة و بخير

MerMaid said...

سؤال بجد

هي جزيرة القرصاية دي موجودة فين؟؟
في مصر ؟؟
----------------------------
بما ان انا معرفش اي حاجة عن الموضوع فانا مش هاعرف اقول اي حاجة عنه

احكيلي عنه بس وانا اقولك رايي علي طول

:))

Monzer said...

عارف يا أبو حميد
انك رجولة فعلا

فاكر لما ميدو وتامر بيدوروا على الشنطة
فاكر انت كنت قلقان عليهم ازاي وعمال تدور معاهم

رجوووووووووووولة

وصحبتك زي العسل

بس من غير ماشي بصراحة
أوا اكون مجهز بكوتشى متين .. وزاد وزوادة لمواجهة الرحلة بتاعتك :))

بص يا جميل معاك حق والله ان تضامن سطحى وتافه ولا يرقى لاي مستوى

لكنه خطوة على الطريق
وقلتلك .. لازم نطلع أفكار مناسبة للتضامن .. متى وجدت الأفكار ووجدت آليات مناسبة لتحقيق تلك الأفكار لازم ننفذها فورا .. لو لم يتوفر ذلك يبقى عليان نشتغل بالمتاح .. لكن معاك اننا نطوره .. بدل ما يكون مافيش خالص

ونور مش عارف حاسس انه لكان قاعد فى مؤمن او كان قى البورصة واحنا ماشفناهوش =))

بس كان يوم جامد ماتنكرش

كان جامد بيك والله وبصحبتك المحترمة

سلام يا معلم

ومش هاسيبك غير وانت قائد مظاهرة

انا وراك يا جمعة لغاية ماتتحبس .. هو ده الى هاظيطبك ههههههههههه

No Fear said...

السلام عليكم
mermaid
يعني شرحتلك الموقف و ملاقتيش تعليق من حضرتك يعني يارب خير
و بعدين إزاي متعرفيش و عماليلي بتاعة جرايد و خلاص
سلام

No Fear said...

منذر
السلام عليكم
يعني أنا قلت متكلمش عن التفاصيل دي علشان البوست ميطولش أكتر من كده تيجي أنت تتكلم
يله حصل خير
بس أفتكر إن أنا قلتلك اول ما تتعب من المشي قولي علشان أنا مش هأتعب
و الله يا منذر أنا مش شايفها خطوة علي الطريق غير إن علشان أنت مقتنع بكده
و الله أتمني أكون غلطان
ياريت تكون الخطوة الأولي بس أعتقد إن الحاجات الرمزية دي تؤثر في المجتمعات اللي الوعي عندها كبير قوي عكسنا يعني
و الله أعلم
يابني مظاهرات مين؟
أنا مستحيل أشترك في مظاهرة
علي جثتي
:)
كفاية كلام علي نور علشان ميزعلش
و الله كان يوم جامد فعلا بك أنت و أبناء مصر بس للأسف تأثيره مطولش معايا
الحمد لله
إلي اللقاء في حفلة أخري إن شاء الله

david santos said...

Happy New Year, No Fear! And best wishes for a healthy and successful 2008

No Fear said...

ديفيد سانتوس
ده لو دخلت تاني
صباح الخيييير
شكرا يا باشا
و ربنا يعود عليك الأيام بخير
أبقي قابلني لو فهمت حاجة