Wednesday, January 09, 2008

بوست مالوش لازمة
.
البوست الجامد ده مش هيكون له أي ملامح و لا موضوع معين هأكتب و خلاص موضوعات مالهاش علاقة ببعضها بس هي في دماغي مش عارف أرتبها و لا أكتب كل موضوع لوحده
.
في مثلا خنقتي من جميع أهل المنزل الظراف اللي هنا بس الحمد لله وفقت في بداية حرق دمهم جميعا واحد تلو الأخر من بابا و ماما و أخوتي و مش عاوز نصائح بالنسبة للوالدين عارفها كلها بس مش قادر جوايا طاقة كبيرة لازم أخرجها و سعيد بصراحة كلمة لا دي حلوة قوي بس عاوز أحسن أدائي شوية ربنا يسهل هأبقي جامد جدا
.
و في واحدة صديقة ربنا وفقني كمان في قطع علاقتي بها بالرغم من إنها لسه صديقة جديدة بس مش عارف مكنتش مرتاح للكلام معها كنت حاسس بحاجز كبير بيني و بينها مش عارف أية
ربنا يوفقها ويسامحني
.
كمان في إنطلاق موقع دار الكتب لحبيبي مصطفي الحسيني بكرة إن شاء الله ربنا يوفقه و لازم نشاركه جميعا
.
في موضوع الأميرة السعودية اللي دهست مصري و أذربيجاني و اللي لو الموضوع ده أتطرمخ عليه انتظروا مني بوست اخير هأروح بعده السجن علي طول
.
في كلمة قريتها علي عربية ميكروباص شداني قوي الكلمة هي سلام يا بلد الكلام
.
كلمة جامدة قوي و معبرة عن اللي جوايا نفسي أقولها بجد يعني نفسي أقولها كده و أنا في طيارة و مسافر أو في مركب تهريب للخارج كده و أنا في عرض البحر و بأنظر لأنوار شواطئها و بردوا مش عاوز نصايح في الموضوع ده
.
في كمان حاجة نفسي أقولها قوي
تعرفوا أغنية خدني الحنين لمحمد فؤاد الجديدة كان نفسي أحسها بس أكيد عمري ما هأحسها لأني عمري ما حسيت الإحساس ده و لا هأحس بيه اللي ميعرفهاش يقراها في المدونة اليتيمة التانية
تعرفوا أغنية أمي لهشام عباس بردوا عمري ما هأحس بيها
تعرفوا أغنية أنا مهما خدتني المدن لعماد عبد الحليم عمري بردوا ما هاغنيها لأني عمري ما حسيت الأغنيتين
.
تخيلوا كينيا فيها صراعات سياسية و ناس مواليه للرئيس و ناس معارضة في قتال بسبب الديموقراطية و كان الفرق اللي بين الرئيس اللي كسب و المعارض ثلاثمائة ألف صوت حتي كينيا بصرف النظر عن القبلية اللي في الإنتخابات
ربنا يكرمنا كده و يكون في إنتخابات عندنا زيهم
حتي كينيا سبحان الله
.
لا تأسفن على غدر الزمان لطالمـــــا رقصت على جثث الأسود كلابا
لا تحسبن برقصها تعلو على أسيادها تبقى الأسود أسوداً والكلاب كلاب
تبقى الأســــــود مخيفة في أسرهـــــا حتى وان نبحت عليها كــــــــلاب.
.
كل سنة و أنتم طيبين بمناسبة رأس السنة الهجرية الجديدة ربنا يحقق فيها كل اللي نتمناه
.
بالرغم من كل المؤسويات دي كلها سعييييييييييييييييد مش عارف ليه
تقريبا الفترة دي من السنة لازم أحس فيها دايما بسعادة و الله أعلم الأيام دي هجريا توافق الأيام اللي كنت فيها في الأقصر و اسوان في سنة البكالوريوس و الذي كان
.
بالمناسبة تخيلوا أنا رايح أجدد شهادة التاجيل من الجيش بكرة تخيلوا مر ثلاثة سنين علي تخرجي و انا قاعد زي البيضة كده و لا عملت أي حاجة و لا نيلة
بس بردوا سعيد
.
أسوأ حاجة في البوست ده أنكم هتكرهوني بسببه بس معلش سامحوني
أكتئبت علي فكرة جامد قوي و هادخل أنام

12 comments:

A.SAMIR said...

لا انا ماكرهتكش من البوست
الصراحة انا كرهتك علشان الزمالك...هههه
بهزر معاك طبعا
بالنسبة للاميرة السعودية..احب اطمئن سيادتك ان الموضوع في طريقه للطرمخة
طول ما في ضباط بيبيتوا البت دي في اوضة لوحدها مش في الحجز يبقى باطمئن اهلها
عموما
شوية افكار وانفعالات جامدة جدا
تحياتي

hesham said...

لا كره و لا حاجة يا عم

فضفض براحتك امال المدونات معمولة ليه

تحياتى

صاحب المضيفة said...

معلشي بقى

انا هاكرر الكلام عن بر الوالدين وبقولك مش هاينفع الكلام ده

أحلى كلمة في البوست ...سلام يابلد الكلام

كلمة جااااااااااامده وحلوة قوي

دمت بخير

يا مراكبي said...

أنا ما كرهتكش يعد البوست ده .. بس مستني البوست اللي هيدخلك السجن

هههههه

mariam said...

مين ده اللى يكرهك قلى عليه و انا هتصرف
ههههههههههه

واحده واحده بقى لأنى بقالى كتير مش بدخل مدونات و تقريبا نسيت اعرف اعلق

بص يا محمد مشاكل البيت دى اساسيه عند كل الناس و تقريبا مش بتخلص بس لازم اننا مش نديها اكبر من حجمها طبعا المفروض اقول الكلام ده لنفسى بس الحقيقه احنا دايما بنكبر مواضيع على الفاضى


السعوديه اللى خبطت مصرى و اذربجيانى
انا هدخل السجن معاك فيها لأن مش كل واحد ييجى من الخليج يموتله شويه و يخلع احنا صحيح 70 مليون بس مش معنى كده انهم يموتونا
انا شفت والدها بيكلم معتز فى 90 دقيقه بيقوله ايه يعنى ده قضاء و قدر هما يحبسوا البنت ليه و كان بيتكلم بقمة التعالى و سوء الأدب لدرجة انه حظه حلو انى مش شفته و الا كنت ارتكبت جريمه

على فكره خدنى الحنين دى جامده جدا اكتر اغنيه بحب اسمعها و اعيط مع انها مش بتفكرنى بحاجه و لا حاجه بس مؤثره و خلاص

كل سنه و انت طيب

No Fear said...

a.samir
السلام عليكم
ربنا يكرمك
الزمالك ده انت المفروض تشفق علي علشان الزمالك
الحمد لله متطرمخش قوي يعني لحد دلوقتي

ياريت تكون مبسوط بالإنفعالات دي
اي خدمة
بجد شرفتني بالزيارة
سلام

No Fear said...

hesham
السلام عليكم
انا بفضفض أهوة أكتر من كده أية
منورني
سلام

No Fear said...

صاحب المضيفة
السلام عليكم
انا عارف و الله بس ساعات الواحد بيضغط جامد قوي فوق طاقته بيضطر يعمل أي حاجة علشان ميتعبش
ربنا يغفر لنا كلنا و يهدينا

ركز كده في الكلام اللي بيكون مكتوب علي الميكروباصات و العربيات النقل هتلاقي تحف بجد مش تهريج
منورني
سلام

No Fear said...

يامراكبي
السلام عليكم
الناس عرفت اللي هاعمله حولوها للمحاكمة العاجلة الحمد لله
و بعدين هديني يعني بلاش تشعللها كده يعني
:)
سلام

No Fear said...

مريم
السلام عليكم
كتير بس أنا خايف عليهم منك
:)))
أنت كده نسيتي التعليق أومال لو فاكرة هتقولي أية
بجد مش هأقدر أتكلم عن البيت أكتر من كده بس بجد أنا تعبان جدا جدا جدا
و حاولت كتير بجد بس مش عارف أعمل أية
مبقتيش شايف حل غير اللي بعمله


الحمد لله الأميرة السعودية أتحولت للمحاكمة العاجلة

أنت شكلك أصلا بتعيطي من غير حاجة
:)
سلام

shams said...

كرة اية من اولها ينفع كدة
لا بس زمالك اية يا جمعة انت متعرفش اني اهلاوي

No Fear said...

شمس باشا
السلام عليكم
ربنا يكرمك
معلش ياباشا الحلو ميكملش
نفسي أغير بس مش قادر
بيب بيب زمالك