Saturday, April 07, 2007

السلام عليكم و رحمة الله و بركاته
أنا كنت فكرت أكتب الكلام ده في الرد علي التعليق في الموضوع السابق بس قلت أعمل له بوست لوحده أحسن
أمبارح رحت حفلة في جميعة عندنا علشان الإحتفال بتاع إمبارح أنا مش بحب أستخدم أسمه الحقيقة المهم أنا كنت قلت للي أقترحت عليه علشان يبلغ الناس اللي في الجميعة دي إني عاوز أشارك علي طول و بحاجة جامدة فقالي قلتلهم قالو يجي اليوم ده و نتفق بعد كده فعلا رحت و قابلت الناس و حاولت اعرف بيعملوا أية و أية الحاجة اللي الواحد ممكن يشارك فيها
المشكلة أنهم مركزين مجهودهم علي الجانب المادي أنا عارف و الله أهمية الجانب المادي بس ممكن يكون في جانب معنوي يعني مثلا رحلات للأطفال دول المساعدة في تعليمهم هم بيروحوا مدارس بس زي ما أي طفل بيحتاج حد يذاكر معه و يسأله عمل أية و كده يعني
هم اللي بيعملوه الحاجات المادية من فلوس و هدايا حسب المناسبات و تحفيظ قرآن بس أنا مش هيأس إن شاء الله و أروح و أساعد في اللي بيعملوه و ربنا يقدرني و أقدر أساعد المحتاجين زي ما انا حابب
هأقولكم حاجة بس محدش يضحك علي
بحلم في يوم ولد من الأولاد دول من حبه لي يجي يقلي ممكن أقولك يا بابا
و لا بنت لما تكبر تقل للي عاوز يتجوزها يجي يطلب أيدها مني الأول
شغل أفلام صح
مش عاوز تريقه و النبي هو حلم مش عارف كتيته ليه أصلا بس يمكن أقدر أحققه إن شاء الله
__
في حاجة كنت بعملها زمان في المدونة أسمها نشرة الأخبار مش عارف أفتكرتها دلوقتي بالرغم من أنه مفيش أخبار
.
الشركة بتاعتنا شكلها خلاص هيتباع ميه في المية
ضحكوا علي إيران و أول أما البحارة رجعوا قالوا أنهم قبضوا عليهم في المياه العراقية
الزمالك يارب يتحل بقة علشان خلاص معنديش دم عاوز يتحرق
الأهلي ربنا يوفقه و يكسب النهاردة كده وكده يعني
نفسي أذاكر حاجة بقة الواحد قرف
وفد من الكونجرس قابل وفد من الإخوان في السفارة الأمريكية نيهههههههه
الدستور بقت يومية
في مشروع مجنون داخل عليه و ربنا يستر
كفاية كده و صباح الخير

8 comments:

smraa alnil said...

ولا عندك حق
ثانيا حلمك مش بعيد ولا حاجة ممكن يتحقق
او كنت قادر علي انك تكفل طفل اكيد هيتحقق حلمك بجد

تصدق ان كمان نفسي اذاكر
امتحانات الماجيستير الشهر الجاي وانا في الطراوة
وربنا يوفقك في المشروع بتاعك يارب
وشكرا ويجعلوا عااامر

baby me said...

rabna ywf2k fe a7lamk elgmila d
w akid da sawabo kber awy 3nd rabna 7tta lw enta nawy bs w m3mltsh kda
rabna m3ak fe mshro3k w mozkrtk 7lwa awy fkrt elnshra d :)

يا مراكبي said...

أهم حاجة هي آخر خبر .. مشروع جديد .. ربنا يوفقك فيه إن شاء الله

albida said...

صباح النور!! ده انت شكلك مش نايم خالص
:) :)
بلاش موضوع الأخبار ده علشان مرارتك متتفقعش


ربنا يوفقك فى اللى أنت عايز تعمله يارب


manal

Unknown said...

حلم جمييييييل جدا وممكن يتحقق اوىىى

ربنا يوفقك فى المشروع الجديد اللهم امين

كاميكاز عايز يغلس عليك ويسألك
هو الزمالك عامل ايييييييييه؟؟؟؟

الأهلى عمهمممممم وحابس دمهمممممممم

هههههههههههههههههههه

سلام لحسن كاميكاز ده فضيحة

No Fear said...

السلام عليكم

سمرا
يارب كلنا نحقق أحلامنا
بصراحة يا سمرا أنا عندي نصيحة لك مش عارف من حقي و لا لا بس ربنا يعلم نيتي
أنا شايف أنك بتدخلي كتير علي النت بصراحة مفيش أيمدونة بأدخلها بالأقيكي منورة فيها هو حلو بس مش حلو لو بدا ياخد من وقتك
حاولي تكملي و تخلصي مذاكرة
علشان تشجعيني علي إني أكمل أنا كمان التمهيدي الأول و بعدين الماجيستير إن شاء الله علشان بصراحة لو أخدت الماجستير مش هأدخل عندك لو مش معاكي ماجستير علشان مش هتكوني من مستواي
متزعليش و النبي

lost
مش كل مرة هأقولك غيري الإسم بقة حتي رجعي الإسم الأولاني أحسن من ده كتير
ثانيا ترجعي لنا بالسلامة
و يارب كلنا نحقق أحلامنا

يا مراكبي
مشروع ربنا يوفق بحب أداري علي شمعتي في الأول علشان تقيد
معلش
هأقولك بعدين

البيدا
منورة و الله
لذيذ موضوع النشرة ده
انا بحبه جدا
بس للأسف اليومين دول مش متابع الأخبار قوي

إنسانة
أولا ربنا يخليكي و تنوريني
و إن شاء الله نتشارك كلنا فرحة تحقيق أحلامنا
ثانيا لولا أنك في مدونتي كنت قلتلك كلام مش حلو أنت و كميكاز
بس الزمالك راجع راجع أمتي الله أعلم بس راجع
نفسي بس الأهلوية يشيلوا الزمالك من دماغهم
أنتم نادي القرن سيبونا في حالنا مش عاوزين منكم حاجة
أنا هأوريه كيميكاز ده ماشي بس أما اشوفه

و الله كلكم مش ممكن تتخيلوا فرحتي أنكم معايا قد أية بجد
ربنا يخليكوا ليا
و ميحرمنيش منكم
و سلام علشان هأعيط

ShAb 3AdY said...

ربنا يوفقك فى مشروع اخر خبر دا

barbie girl said...

حلمك عسول خالص ومعتقدش ان حد مكن يتريق عليه..ربنا يكرمك