السلام عليكم و رحمة الله و بركاته
أزيكم يا شباب
مش عارف أبدأ منين و لا منين
حاجة حاجة كده و ربنا يكرم

.
إنتخابات حزب الجبهة
الحمد لله الناس اللي كنت هأنتخبها هي اللي نجحت في الإنتخابات و كان درس لي
الدرس فين
إن أنا كنت فاقد الأمل إن الأستاذة مارجريت عازر تكسب السيد السادات و ذلك بسبب الناس الكتير اللي حسيت إنها هتنتخبه
طبعا الرئاسة كان مفروغ أمرها للدكتور أسامة اللي أنا شخصيا داخل الحزب علشانه
حسيت إنه نفسه فعلا يغير بالدليل إنه أستقال من الحزب الوطني و أسس حزب الجبهة مع المؤسسين الأوائل بالرغم من إحباطي من الحزب كل مرة أروح إجتماع هناك هم مش كتير أتنين بس كنت بحس إني قاعد في برنامج العاشرة مساءا بس بردوا رحت أمبارح الإنتخابات بس كان لازم أمشي و كانت هتبدا بعد الميعاد المقرر بساعتين و كنت متخيل النتيجة و مشيت بدون ما أنتخب محدش يقول للحزب بس الحمد لله النتايج جت مشجعة لي شخصيا الناس اللي كنت أعرفها و نفسي تكسب هي اللي كسبت فلذلك هيطول إنضمامي للحزب و يارب يقوم بأي دور فعال و أقدر أشارك فيه و ميكنش كلام في كلام بس
بس كان في سلبيات كتير في الناس اللي موجودة و المرشحين و المنتخبين بس الحمد لله
سأطوي هذه الصفحة و سأبدا مع الحزب بداية جديدة و ربنا يكرم

هارد لك يا مريم
.
أمر الحمد لله هذه الأيام بحالة نفسية عالية جدا جدا جدا تقريبا أعلي حالة نفسية بأمر بها من ساعة أما دخلت التدوين أو تقريبا من ساعة أما تخرجت سنة ألفين و أربعة
الحمد لله يارب تتدوم
طبعا كله بأمر الله بس ربنا سبب لي أسباب كتير هي اللي صنعت هذه الحالة طبعا منها صداقتي بمفيد و منذر و خروجي معهم و طبعا ناس تانية كتير زي رفقة عمر و ساسو و مريم و عالم التدوين ككل
في ناس كتير مكنتش أتخيل إن أنا أكلمهم علي الميل فجاة لاقيت نمر تليفوناتهم معايا و بأقابلهم و بكلمهم علي المسنجر شبه يوميا
طبعا أنت مش منهم يا منذر أنا مكنتش أعرفك أصلا قبل كده

.
بالمناسبة الواد منذر تقريبا خاف لأحسن فضيحته السابقة مع الكرنب تنتشر و ميعرفش يتجوز قام جري خطب علي طول و بهذه المناسبة السعيدة نوجه للسيد منذر تحية ملعلعة بمناسبة خطوبته السعيدة و ربنا يتمم له علي خير و ربنا يكون في عون خطيبته

.
و كمان سبب الحالة العالية دي هي الحمد لله عودتي للصلاة بإنتظام كبير الحمد لله و رجوعي نوعا ما للصلاة في الجامع كنت الفترة اللي فاتت يادوب بأدخل الجامع في الجمعة بس
الحمد لله يارب كل ده يدوم و يزيد

.
و كمان اللي سبب لي الحالة دي إحساسي بثقة الناس و حبهم لي الحمد لله في الشغل و ربنا يزيد
يوم الخميس تعرضت لموقف ربنا يسلم من عواقبه
و هو إن في إتنين عندنا في الشغل اللي يحبه واحد منهم لازم التاني يكرهه و العكس للأسف مديري المباشر أظهر تعاطفه معي يوم الخميس فربنا يستر من رد فعل الرجل التاني الأقوي
هي كده كده مش فارقة معايا بس مش ناقصة قرف يعني
.
و كمان المذاكرة مش عارف لسه مذاكرتش أي حاجة بس حاسس بثقة مش عارف ليه و أية سببها بالرغم من إني أبيض يعني في المذاكرة بس حاسس إني هأنجح إن شاء الله
و سبب تاني كمان ممكن سياسة المقاطعة و تكبير الدماغ بالنسبة للبيت هنا بردوا ده سبب مهم
.
و كمان شجاعتي في عمل حاجات كتير قوي مكنتش أتصور نفسي باعملها قبل كده و ربنا يزيد
يارب الحالة دي تستمر و تزيد و بلاش أي إحباطات و خنقة و تراجع
.
في نقطة بس مستفزة هتكلم فيها و هو إن النهاردة كان إجتماع القمة العربية مش عارف ليه المذيعة علي التلفزيون الأرضي كانت بتقول وسط غياب نصف القادة العرب كنت بحس إنها ناقص ترقع زغروطة بعد الجملة دي هي سعيدة ليه كده مش عارف

.

الإخوة الأعزاء اللي بيدخلوا يقروا و ميعلقوش ياريت يخلوا عندهم دم و يعلقوا مش هينفع كده شكلي أية و سط المدونين يعني

.

أكتشفت إن ناس كتير قوي من شبرا زي الدكتور أسامة الغزالي حرب و تقريبا بردوا الأستاذة مارجريت و كمان تقريبا المرحوم مجدي مهني كان ساكن قريب قوي مني علي حسب كلام أمي يعني و الله أعلم ده غير بقة داليدا و علي الكسار و طاهر أبوزيد و مختارمختار و عباقرة كتير قوي قوي قوي فوق ما تتصورا يعني و في كل المجالات

لذلك عندا في الناس اللي بتروح تولد برة علشان ولادها تاخد الجنسية التانية لما ربنا يكرمني و أتجوز يحينا و يحييكم ربنا إن شاء الله سوف أحضر مراتي تولد هنا في شبرا عده لو أنا مشيت من هنا أساسا علشان ولادي يكونوا شبراوية

.

أنا مش عاجبني البوست ده الحقيقة مش عارف ليه بس هأنزله بردوا

سلام

السلام عليكم و رحمة الله و بركاته

أزيكم يا شباب أخباركم أية

البوست ده محبط شوية و مش عن نفسي قوي يعني

اللي أستفزني إني أكتب البوست ده هو الدوشة اللي موجودة بسبب الإختراع اللي ربنا يحرقه اللي مسمي دي جي دماغي وديتني كمان إزاي ممكن الناس تتغير و بما إننا عارفين إن الله لا يغير ما بقوما حتي يغيروا ما بانفسهم أصبت بحالة من الإحباط بسبب الحالة الأخلاقية السيئة اللي وصلنا لها يعني مش كفاية مشغل أغاني بصوت يجيب الجنان لا مستوي الكلام حاجة مقرفة الأصوات حاجة مقززة أصلا مش عارف حالنا هيودينا لفين و الله و الأغاني دي كمان بتطلع ناس ضايعة أساسا يعني بصرف النظر عن كون الأغاني حلال و لا حرام تخيلوا الناس كانت بتسمع أم كلثوم و عبدالحليم و موسيقي كلاسيكة طلع الناس العباقرة في كل المجالات تخيلوا بقة ناس عمالة تسمع يا لهوي يا لهوي و يا دلع يادلع من صوت أقرب ما يكون يعني لصوت الحمار و معاه موسيقي خزعبلية كمان فعلا يعني تخيلوا الجيل اللي هيطلع هيكون شكله أية أكيد مجرمين و مشردين و بلطجيةو مدمنين

.

أنا بعد أما خلصت البوست كتبت الجزء ده تخيلوا في أغنية بتشجع علي شرب الكونياك و بتقول العبد قال للشيطان

يا نهار أسود

و الله ده إحنا هنشوف أيام سودة

.

أخدني الموضوع لفكرة التغيير و هل ممكن يحصل و يتحقق

إزاي طيب يعني مين اللي هيساعدك علشان تغير أنت هتحارب كل الناس و لا هتعمل أية و معتقدش الناس بمجرد ما هتشوف حد كويس هتمشي وراه علشان خلاص الناس أدمنت الفساد في كل حاجة و بقينا فعلا نكرهه حتي الشئ الكويس الطيب يعني زي ما في فيلم الكيف عمل لما جميل راتب كان بيحط نشارة الخشب في الشاي و لما النجارين أتنمردوا و غلوا النشارة حط شاي طبيعي النس كرهت الشاي النظيف

إحنا فعلا وصلنا للمرحلة دي للأسف من الفساد و الأكثر خطورة هو الإستمتاع بالفساد

بجد مش عارف ممكن نخرج منها إزاي و هو فعلا ممكن أصلا نخرج منها بسهولة يعني مش بكارثة مدمرة يعني

يارب أرحمنا برحمتك

السلام عليكم و رحمة الله و بركاته
أزيكم يا شباب أخباركم أية يارب تكونوا دايما بخير و سعادة
أكيد طبعا في حالة من الزهق و الملل بما إننا في أجازة مش عارف ليه الحالة دي بتيجي لي مش بأكون عارف أعمل حاجة كالعادة و لا نوم و لا مذاكرة و لا راحة كمان النهاردة الجو جمييييل و حرررررررررو ترررررراب حاجة بقة خمس نجوم
يارب الحالة دي تنتهي من عندي النهاردة قبل بكرة علشان خلاص مفيش وقت يضيع كفاية اللي ضاع
الحمد لله علي كل شئ

بس إن شاء الله هأكتب البوست ده و هأقوم أذاكر
هتكلم في ثلاثة نقاط النهاردة

.
النقطة الأولي
هي عدم حبي للإشتراك في معالجة أي قضية تخص البلد ولأنني مقتنع إنه مش هو ده الحل ربنا هداني لتصوير أصور بيه اللي نفسي أشترك فيه و أعمله
نفرض إن عند باب شقتك مسمار طالع منه و أنت خارج كل يوم المسمار ده يقطع كم قميصك و أنت كل يوم تاخد قميصك ده و تروح بيه عند الترزي تصلحه و الغريب إنك بتسيب المسمار زي ما هو الحل الطبيعي أية إن تجيب شاكوش تدق بيه علي دماغ المسمار ده أو تجيب كماشة تخلع بيها المسمار ده من راسه علشان ميقطعش لك القميص تاني
فاهمين اللي أنا نفسي أشترك فيه اية
قولوا يارب

.
النقطة التانية
بصراحة أنا كنت زمان بحب البلد دي قوي قوي قوي و كنت بحلم إن أعدلها و أنميها و أكبرها بس طبعا لما كبرت شفت حالة الحقيقية اللي إحنا فيها و وحالنا وصل لأية من تعامل مع بعض و إستغلال و نفاق و كذب و غش
بس بجد رجعت أحب البلد دي تاني علشان خاطر الواد منذر الواد ده بيحب البلد قوي و بيحب الخير جدا جدا جدا بالرغم من إنه ممكن يعاني في سبيل ده بس بيحاول و يحاول و مش يأس زيي منذر رجع فيا الحب للبلد دي تاني ممكن حد يعترض علي و يقول إنت إزاي تقول كده مينفعش انت لازم تحب البلد دي لأنها كبرتك و شربتك و أكلتلك و علمتك و كلام القناة الأولي ده بس أنا مش هأرجع في كلامي اللي خلاني أرجع أحب البلد دي تاني قوي قوي قوي هو منذر بس بجد أنا خايف علي منذر جدا أنه يتصدم في الناس اللي مش حاسة و عايشة في البطيخ دي بس ربنا أكيد مش هيتخلي عنه و هيوفقه و مش هيخليه ييأس علشان اللي زي منذر ده لو يأس ربنا يستر عليه
شكرا لك يا منذر

.
النقطة الثالثة
منذر في ثوب مختلف
أمبارح كان ذكري المولد النبوي و قدرا كنت أمبارح مع منذر في مشوار كده المهم صديقي و حبيبي منذر قمت بتصويره متلبسا في مواضع مخلة و هذه المواضع سوف أقوم بنشرها الأن مع حذف صورة منذر و لو هو قال مفيش مشكلة هأبقي أنزلها بصورته
المواضع دي تمثل منذر و هو يقوم بشراء كرنب من الفلاح مباشرة و يقوم بعد ذلك بتهذيب الكرنب علشان ياخده لماماته في البيت متقلقش يا مفيد أنت هتأخد الصور و هأحول لك الفيديو بس أمانة عليك توصله لأبناء مصر علشان يشوفوا منذر اللي فاكرينه حاجة جامدة طلع اية
أة نسيت أقول أنه بعد أما هذب الكرنب قام بفعل مشين و هو إلقاء الورق الزيادة من الميكروباص و إحنا ماشيين و كمان ضحك علي واحد تاني معانا و خلاه يشتري كرنب المسكين

معلش أضطريت أشيل الصور علشان منذر زعل

السلام عليكم و رحمة الله و بركاته

أزيكم ياشباب دي مرحلة جديدة من مرحلة الإنطلاق البوستري اللي بتيجي لي كل فترة

كان في حاجات كتير نفسي أقولها البوست اللي فات بس منفعش لأنه كان بوست قوي قوي بدليل عدد التعليقات المهول اللي عليه منور يا منذر يعني مينفعش اللي هاقوله دلوقتي كان يتقال هناك

.

المهم هتكلم النهاردة عن حالتين عجز بأمر بيهم

.

الحالة الأولي اللي طبعا كلكم خلاص حفظتوها و عرفتوها عني من إنني مش عارف الأقي نفسي و لا عارف الأقي هدف في الحياة يعينني عليها و علي هموها و حالة ضياع عايش فيها من فترة مش قصيرة و مش قادر أخرج منها مثلا أتخيل نفسي أغير مجالي تماما مش الكيمياء خالص يعني و أشوف حاجة تانية أو أعمل أي إختبارات لنفسي بحيث أكتشف أنا ممكن أبدع في أية أصل أكيد أنا في حاجة ممكن أبدع فيها يعني مش بطيخة كده خالص بس مش قادر هي دي حالة العجز الأولي

.

أما عن الحالة التانية فتقريبا مش ممكن كلكم تفهموا اللي هأقوله بس هأحاول أشرح علي المستخبي كده شوية إحساس صعب قوي إنك تحس إنك عاوز تنصح حد قريب منك قوي بصرف النظر عن كونه يستحق النصح و لا مين اللي المفروض ينصح مين بس تحس إنك نفسك تنصحه بس حاسس إن تجاربك في الحياة و خبرتك البسيطة مقارنة بخبرته و تجاربه مينفعش و مش هتقدر علي نصحه أو إقناعه بسبب ضعف قوة كلامك و ليس ضعف حجتك أو حتي إكتساب ثقته إنه يتكلم معك و يفضفض لك اللي جواه بالرغم من إنه نفسه يتكلم مثلا بس مش حاسس إنك هتفيده و تحاول تدور علي طريقة تعمل بها كده و متعرفش و تفكر و تفكر و تلاقي نفسك مش عارف إحساس عجز كبير و مؤلم للعلم

بس كده كفاية قرف بقة

.

معلش ربنا يكرمكم في حاجة تاني قارفاني معلش ربنا يكرمكم حاجة أخيرة بس مش عارف ليه بيكون عندي عشم كبير قوي في الناس يعني لو أتعرفت علي حد جديد بأكون منتظر منه أنه يعاملني زي أبنه أخوة صاحبة من تسعين سنة مثلا مش عارف ليه و باتضايق قوي لما مش بحس منه بكده هو أنا مقتنع إن أنا غلط في الموضوع ده بس مش عارف أعمل أية و كمان بيني و بينكم يعني أنا مش أمله قوي يعني إني حد يعرفني و يهتم بمعرفة أخباري و حالتي يعني مش عاوز ربنا يخليكم الكلام اللي هأتقوله أنا بأقر حقائق غير قابله للنقاش

فعلا فعلا كفاية كده

.

خمسة فرفشة عناوين الأخبار سابقا

.

أدعي عليهم أقول أية بس طبعا عارفين لاعيبة الزمالك بجد الله يسامحهم كفاية عليهم كده

.

أشتريت برنتر خزعبلية جميلة الحمد لله إتش بي إف واحد و عشريت تمانين طباعة و سكانر و تصوير حاجة كده خمس نجوم يعني و لا الحوجة يا منذر و من ساعة أما جبتها عمال أطبع حاجات كان نفسي أطبعها من زماااااان

.

أشتريت البرنتر دي يوم الجمعة يوم الماتش المنحوس كان ساعتها الجو جميل قوي و نزلت أشتري الكابل لها الساعة خمسة تقريبا و كنت في التحرير علي خمسة و عشرة شفت الشمس بقالي كتير قوي مشفتش الشمس علي الكورنيش حسيت إني كنت في الأدغال مثلا أو منفي نفسي أخرج يوم كده بالنهار الواحد نسي شكل الدنيا بالنهار أية في وسط البلد و أماكن الخروج بقة واخد علي الشمس في المصنع بس قدام المخازن الزرقا و الإنتاج اللي ماليان بودرة و معفر

.

أنا أخدت أجازة بكرة من الشغل بدون أجر علشان رصيدي خلص و المفروض أروح الكلية و طبعا مجهزتش التقارير اللي علي مش بقولكم عاجز و مش عارف أروح الشغل و أرجع في الأجازة و لا أروح الكلية و لا أقعد في البيت زي البيضة بكرة

.

أخر خروجة مع مفيد و منذر أشتريت بدلة جامدة ربنا يخليك ليا يا مفيد مظبطني

.

كان في خبر ظريف متابعة النهاردة طول اليوم الخبر بيقول أنباء عن فوز المحافظين في الإنتخابات الإيرانية إذا كان أساسا ثلاثة أرباع اللي داخلين الإنتاخبات محافظين مهو لازم يكسبوا

.

أنا أسف و الله يا أصدقائي عارف مقصر في حقكم كلكم و مش بأعلق عندكم بس و الله في ناس كتير بأدخل و مش بعرف أعلق علي اللي بتقوله و في ناس بيكون نفسي أعلق عندها بمزاج بس بأكون مش قادر من كتر النظر في الكمبيوتر علشان تجهيز الريبورتات اللي مطلوبة مني في الكلية و بردوا مش بأقدمها

.

تصبحوا علي خير

السلام عليكم و رحمة الله و بركاته

دايما يوم الأجازة بيجي لي إحساس كده غريب بعدم الراحة مش عارف ليه بحس إني مش مرتاح و خلاص و بحس بإحساس كده مالوش وصف المهم قلت أنزل أروح أدفع إشتراك النت بدل ما يتفصل و أناعندي تقارير المفروض أكتبها دفعت إشتراك النت و كان الشهر ده مجاني ربنا عالم بالحال علشان العطل اللي حصل و دفعت تأجير الروتر بس

.

المهم و أنا رايح و راجع من السنترال عديت علي منطقة يكثر فيها أصحاب النفوذ و القوة شوية بكلمة أبسط البلطجية نوعا ما طبعا اللي شدني اليفط اللي تهنئ و تبارك علي الترشيح و تقريبا المكسب في الإنتخابات المحلية و كنت قبل أما أنزل أتكلمت شوية مع مريم علي الفيس بووك مش عارف ليه تخيلت نفسي و أنا ماشي في جلسة مثلا في حزب أو مع ناس مشغولة بحال البلد فقلت كلام مع نفسي كالعادة كأنني بتكلم مع حد يعني و بأسخن جدا أنا لما بعمل كده المهم الكلام ده كان أية

.

أنا زمان كنت بتخيل إني كلمة بلطجي دي تعتمد علي القوة الجسدية فقط و عدم الخوف من البوليس مثلا الكلام ده و أنا صغير بس دلوقتي بعد سلسلة تجارب و ظروف و حاجات شايف إن ربنا كرمني بها فهمت حاجات و شفت حاجات مش كل الناس تتاح لها يعني المدارس اللي كنت فيها و تركيزي مثلا مع سواقين الميكروباصات و صحابي المتنوعين جدا لدرجة مش فاهم إزاي أعرف ناس مختلفة كده و وقوفي زمان كتير قوي في الشباك و أراقب الناس و الظروف و الخناقات و المصالحات

.

بدأت أخاف قوي و احس إنه مفيش أمل يعني تلاقي مثلا واحد له علاقة مع واحد بلطجي البلطجة هنا مش قوة بس لا بلطجة نفوذ كمان يعني تلاقيه له علاقة بحد واصل بوليس حزب وطني أو نفوذ مادي تلاقيه مرتبط بسواقين الميكروباصات اللي ممكن يعملوا البدع تلاقيهم مرتبطين بالبائعين اللي في الشوارع اللي بدورهم في اللي بياخد منهم إتاوة علشان محدش يكلمهم اللي بدورهم ممكن يتخانقوا ضد أي حد و تلاقي تربيطات و علاقات غريبة و عجيبة المشكلة إن التربيطات و العلاقات المتداخلة دي بتزيد قوي و بتنجب ناس و قاعدة كبيرة قوي قوي قوي فوق ما أنتم بتتصوروا

.

أنا مش عارف الحل ممكن يكون اية أو إزاي بس اللي متأكد منه الخوف اللي بقي ماليني قوي من كل حاجة و فقدان الأمان يعني النهاردة في المصري اليوم في الحوادث بنت أتعرضت للخطف من الشارع في مصر الجديدة يعني مسلمش من البهدلة أصحاب المناطق الراقية يعني إحنا خلاص أتعودنا كل يوم نفتح الجرايد نلاقي واحدة أتخطفت في التوك توك قدام الناس و ممكن يكون معها جوزها و لا أخوها و ميقدرش يعمل حاجة و يضرب و يتهتك عرضه بقة الموضوع ده طبيعي و مبقاش يأثر فينا خلاص بقة عادي يعني

مش عارف خايف قوي و ماليان خوف

.

ده إحنا حتي الناس العادية في البيوت تلاقيهم مثلا مشغلين الكاسيت بصوت عالي سواء القرآن أو الأغاني الهلس يا عم أسمع علي قدك لا لازم يسمع الناس الشتيمة و سب الدين ده حتي في ناس بتسب لربنا أتغفر الله العظيم مش فاهم أنا حالنا هيفضل في النازل كده لحد أمتي خلاص الشباب بطل السجاير بعد الصورة الجديدة اللي نزلوها علي علب السجاير و أتجهوا للحشيش أسهل من رغيف العيش و الناس بتتضرب بعض علي رغيف العيش ده

ده في الكورة ياراجل الناس بتشجع الفرق أكتر من منتخب مصر

.

المهم قلت اللهم أغزيك يا شيطان ياواد ده قرف المذاكرة و بلاش نكد أقعد شوية قدام التلفزيون تروق كده و تقعد تذاكر قلت كمان هات قناة زووم اغنية كده حلوة و لا حاجة الأقي أغنية الضمير العربي و تصويرها اللي مش فاهم فايدته أية أة الواحد أتأثر بس يعني إحنا مش عارفين مش حاسين مش شايفين و ساكتين و بنشترك في اللي بيحصل و ناس مننا بتقول حلو اللي بيحصل في العراق هم شعب خاين و ناس تقولك أيوة خلي الفلسطينين يموتوا بعض علشان اللي عملوه في رفح و لبنان دي بلد الفجور خليهم يقتلوا في بعض

طيب هنعمل أية و لا اية الحل

ده رسولنا أسيئ إليه و معملناش حاجة

.

المشكلة الأكبر تقعد مع أي حد تحس إنه ملاك من السما و يقولك حلول فعلا جميلة و روعة بس تلاقيه في الأخر يقولك إحنا اللي عملنا كده في نفسنا و إحنا اللي وحشين مع بعض و ممكن كمان يكون ضميره حي قوي و يقولك و أنا كمان مقصر و مش عارف أية

لحد أمتي هنتكلم بس و لحد أمتي هننش في بعض

.

يارب كفاية علينا كده يارب مفيش أمل غير فيك بس

إحنا مش قادرين نغير من أنفسنا علشان تغير اللي فينا و أنت رحيم اللهم غير حالنا و أصلحه لنا

السلام عليكم و رحمة الله و بركاته

أنا زعلان قوي علشان البوست اللي فات و حاسس إني هأكون واطي قوي لو أتكلمت عن أي حاجة تانية بعد البوست اللي فات من مشاكل شخصية و صعاب في الحياة و كمان للأسف الموضوع التافهة اللي هتكلم فيه بس بجد مش قادر و نفسي أخرج كلام كتير قوي هنا احسن ما أخرجه مع ناس باعتز بها و أخاف تزعل مني لو أتكلمت معهم عنه

نفسي أحب قوي نفسي أمسك أيد بنت و أحس بحنيتها و دفئها و نفسي أعيط و هي تطبطب علي أكيد ناس كتير هتقول ده تافهة بس بجد شعور الوحدة صعب قوي خصوصا لما تكون وحدة تامة و لا أهل و لا صديق تعري نفسك قدامه من غير خوف و لا حبيبة و لا زوجة نفسي أحضن بنت

تعرفوا وصل بيا الحال إني قلت لواحد صاحبي صايع يعني يظبط لنا بنتين تمام ندخل معهم فيلم حين ميسرة و الله اعلم الموضوع كان هيوصل لحد فين و الحمد لله لحد دلوقتي هو متصلش

مش عارف لو أتصل هيكون عندي الشجاعة و الرغبة في الذهاب و لا لا

بس مش ده الشعور اللي نفسي فيه نفسي في إحساس بجد صادق يتحس

أةةةةة

شعور بشع قوي حاسس إني عندي قوة كبيرة نفسها تخرج مني و مش قادرة و عمالة تلف جوا جسمي زي القطة المحبوسة في أوضة مقفولة مش قادر أقعد مش قادر انام مش قادر أتفرج علي تلفزيون مش عارف أعمل حاجة مش عارف أستمتع بحاجة

إحساس بعدم الراحة و خلاص مش عارف أعمل أية

نفسي بنت تحط أيديها علي وشي و أحس بإنتعاش من كده نفسي تنام علي أيدي نفسي أتجوز و نفسي أعيش عيشة معينة و حبيبتي مقدرش أبعد عنها يوم و أرجع جري من الشغل علشان أشوفها و أحضنها و اقعد أحكي لها علي كل حاجة و أقعد أحكي لها البلاوي اللي بعملها دلوقتي و مش عارف أتخلص منها

زهقت بقة

زهقت

زهقت

زهقت

زهقت

زهقت

و أنا بين خواتي
سمعت صوت القنابل
سألت ماما
قالت لي جيش غدار و قاتل
و أنا بين خواتي
سمعت صوت القنابل
سألت ماما
قالت لي جيش غدار و قاتل
طلعت بصيت في السما
لاقيت ورق
أة أة
مرمي علينا
سألت ماما قالت لي
بيقول سلموا
أة أة
تبقوا في عينينا
و سألت تيتة بوشوشة
إزاي يا تيتة نستسلم
قالت لي نرفع راية بيضا
فوق بيتنا و بلاش نتكلم
و وحدة وحدة
اخدت طرحة تيتة البيضا
و طلعت فوق بيتنا و ربطها بشريطة
و وحدة وحدة
اخدت طرحة تيتة البيضا
و طلعت فوق بيتنا و ربطها بشريطة
و نزلت أجري قوام و أنا حاضنة لعبتي
من خوفي قلت أنام تدرايني مخدتي
و نزلت أجري قوام و أنا حاضنة لعبتي
من خوفي قلت أنام تدرايني مخدتي
و شفت في الأحلام
ورد و أمل و سلام
و شفت في الأحلام
ورد و أمل و سلام
و صحيت علي الألغام و صرخة جدتي
و فضلت أجري و انادي
علي الناس في قريتي
اتاري الكل رافع راية بيضا يا أمتي
اتاري الكل رافع راية بيضا يا أمتي
اتاري الكل رافع راية بيضا يا أمتي

السلام عليكم و رحمة الله و بركاته
أزيكم يا شباب أخباركم أية؟
طبعا أنتم أكيد بتعتبروا الفترة اللي فاتت دي إنقطاع مني عن التدوين هي فعلا كانت كده و أنا محبيتش أعمل زي الناس و تقولك عذرا هذه المدونة قد تم إغلاقها زي الناس اللي بتعمل لما مش عاوز تتدون متدونش مش لازم تقول للناس علشان متقعدش تعيط و تترجي إنك ترجع تاني
المهم بلاش نتكلم عن حد مش موجود
المهم الحمد لله الواحد هدي شوية و سايب الدنيا لله خالص يعني مفيش هم و لا إكتئاب بإذن الله
هي الظروف هي هي بس أهوة الواحد بيحاول و يجتهد و بيفكر و يخطط و يحلم و يحاول مش مشكلة اللي يحصل يحصل
طظظظظظظظظظظ
خرجت من كم يوم مع واحد صاحبي غاويين ننكد علي بعض يعني في الكلام و المشي المهم هو حكي لي النكد اللي عنده من انه بيحب واحده و هو بيحبها بس الأيد قصيرة و مش عارف يعمل أية و كمان المشاكل اللي هو فيها بسبب الماجستير بس دي هانت و قرب يخلص ربنا يوفقه و عقبالي يارب و كمان خناقاته مع أهله العجيب في خناقاته مع أهله أنه هو عكسي يعني أبوة بيشركه في كل حاجة و بيختلفوا في الأراء و أنا محدش بيعبرني أصلا يعني سبحان الله إحنا الأتنين عكس بعض
و حكي لي عن بعض مغامراته القذرة نوعا ما و طبعا قلتله اشركني معاك في المغامرة القادمة بس مش هأبقي قذر قوي يعني
و حكيت أنا له مشاكلي و حالي و كان مستعجب قوي الواد ده دماغه نظيفة جدا جدا جدا و قالي يابني أنا شفت مشاكل ناس كتير و قليل حاولت أحلها و نجحت معهم بس أنت حالتك مستعصية و مش عارف لها حل من ناحية إنه حتي أنا ماليش حلم و لا هدف حتي و لا مهارات أستغلها و أعمل بها اللي بحبه اللي مش عارف أية هو
المهم روحنا عادي و خلاص
و كان يوم لذيذ
و يوم الأربعاء قابلت مفيد و منذر جدول عندي هم أصلي يوم الأربعاء مش عارف أية اللي بيحبوه في الأربعاء و أتعذب الصبح و أنا رايح الشغل
المهم
كان نفسي أخلع منهم اليوم ده نوع من أنواع الإنعزال زي عدم التدوين كده و أتصلت بمنذر علشان قلت ده سهل و أقدر أقنعه لاقيته الناصح أدي الموبيل لمفيد و طبعا مفيد هددني و أضطريت أروح و قابلتهم
و رحنا المكان الخزعبلي اللي عرفت منذر عليه و هو أدمنه و قعدنا شوية علي فكرة المكان ده في المنيل أخر شارع الملك عبدالعزيز أل سعود علشان اللي يحب يبلغ عننا إحنا مش هنروح هناك تاني
بس و بعد كده روحنا و منذر كان لونه متغير مش عارف ليه و هو مرديش يقول
في أية يامنذر
و يوم الأربعاء ده واحد صاحبي أتصل بي و قالي في مكتب سفريات طالب كيميائي خبرة في مجالي اللي مش بحبه بس سفر المهم أتصلت بالمكتب و أخدت ميعاد يوم الخميس
المهم رحت لاقيت هناك بقة سباكين علي سواقين علي محاسبين علي مهندسين علي كيمياجية زيي كده
المهم حسيت بشعور الهوان قوي
أنا كنت بحس بالشعور ده أيام ما كنت لسه بدور علي شغل و طبعا الحمد لله من سنتين محسيتش به بس المرة دي كان الشعور زيادة أنه شكل الناس غلابة قوي و قاعدين زي الشحاتين كنا الأول لسه متخرجين يعني عادي مش حاسين قوي بس المرة دي صعبة و تلاقي ناس كبيرة قوي و قاعدة و بتوع المكتب بيعاملونا كالخدامين اللي عندهم
كان إحساس وحش قوي اللي صبرني و خلاني مروحش إنه كان معايا واحد أعرفه و قعدنا نحكي
المهم
الرجل اللي هايقابلنا جه اللي معايا دخل الأول و بعدين أنا الرجل بقة قابليني أنا متكلمتش و لا كلمة غير سلام عليكم إن شاء الله سلام عليكم
هو بقة شكله و لا يفهم حاجة في البطيخ أنا أول مرة أعرف إن أنا متخرج من سنتين و نص بالرغم من أنا متخرج من سنة ألفين و أربعة تخيلوا
بيقولي أنت متخرج ألفين و أربعة يعني بقالك سنتين و نص متخرج هم غيروا الحساب و لا أية مش عارف
و قاعد يقول الجو حلو عنتدنا حلو و المرتب كذا و إحنا شركة مش عارف أية
فين الشغل ياعم مش عارف و قاللي في الأخر أنت معانا هنا نطقت و قلتله إن شاء الله هو الرجل ده حاجة من تلاتة يا شارب يا جاهل يا كفيف و أنا أتخيل التلاتة و كمان اللي معايا أكد لي الموضوع ده
مش عارف لو أتصلوا بيا تاني هأعمل أية
بس كان إحساس وحش ربنا يهدي حكامنا و يعملوا مشاريع في البلد للناس اللي مش لاقيا شغل دي و مفيهاش إهانة
يارب أرحمنا
في موضوع عاطفي كده علي السريع يعني
إحساس مؤلم قوي لما تحس إن في حد بيضحك عليك بالرغم من إنك معملتلوش حاجة هو ليه يخدعك مش عارف و ليه يقعد يخليك تتعلق بيه و أول أما تتعلق بيه يسيبك مش عارف الناس دي متعتها أية في جرح الناس مش فاهم
اللي مزعلني قوي إني ضعفت جامد و بسهولة و بالرغم من عدم إقتناعي و إحساسي بعدم الراحة من الأول
لا وثقت و أتخدعت للأسف بس الحمد لله الواحد واخد علي كده و الواحد الحمد لله معملش حاجة غلط و بيعامل ربنا قبل كل شئ
بس اللي مزعلني كلمة قلتها بسهولة بالرغم من إن أنا مكنتش عاوز أقولها بسهولة بس مش مشكلة ربنا يهدينا جميعا و يكرمنا يارب
حسبنا الله و نعم الوكيل
بس يا شباب كفاية كده النهاردة و أدعولي بقة الحالة الحلوة المنتعشة اللي عندي دي تستمر و أقلل شوية في التدوين بيني و بينكم و مش عاوز حد يتحايل علي
أخيرا شفتوا الحضري هههههه و اللي عمله مش فاهم أنا الناس دي بتفكر إزاي بالرغم من سعادتي يعني بس أنا بأكرهه الغباء يعني الحقيقة
بس خلاص كده ربنا يقويه علي اللي الأهلي هيعمله فيه

و كمان شفتوا المنقذ محمد حلمي بس هأقول أية

اللهم أنتقم لنا مما يفعله لاعبوا الزمالك بنا
و ختاما
لكم ألف سلام

السلام عليكم و رحمة الله
بوست جديد و أمركم لله
أنا البوست ده عمال أؤجل فيه و ساعات كبرت في دماغي أبطل تدوين و حسيت إن التدوين ده أثر علي علاقتي بربنا محدش يسألني إزاي انا كنت بأدعي ربنا و بحكي له كل اللي بكتبه هنا في المدونة حسيت إني غلط لما كلمتكم بالتفاصيل الكتيرة عن حياتي و أشتكيت كتير من نفسي و من الظروف
.
و كمان جت أحداث كتير مريت اليومين دول و كمان خطرت علي بالي حاجات كتير قوي أكتبها أنا كنت بعمل كده زمان هأكتب حاجات كتير قوي هي منفصلة عن بعضها و كمان حصلت لي مواقف كتير قوي المهم أنا هاكتب لحد اما أتعب بس ياريت لما تيجوا تقروا تقروا كل فقرة لوحدها في يوم منفصل ساعات بتكون ساعات سعيدة و ساعات كأبة و ساعات أنتم فاهمين بقة
.
أبدأ منين أنا مش هأبدا بالحاجات الشخصية علشان انتم قرفتم مني و هأسيبها للأخر بحيث اللي هيقرأ و هيتعب مش هيوصلها و هي طبعا نكد في نكد
.
أنا اصفراوي و حقود
طبعا الكلام اللي هأقوله ده مش هيعجب ناس كتير منكم و ممكن ميعجيش حبيبي مفيد بس ده رأئي طبعا كلكم أخدتم بالكم بالمنتخب الوطني بتاعنا اللي عمل إنجاز تاريخي سيحسب لهذا الجيل من اللاعبين و هذا المدرب المعلم حسن شحاته انا مش بقول إننا منفرحش بس مش كده فرحة زيادة عن اللزوم و فلوس زيادة عن اللزوم في ناس بتقول الشعب لازم يفرح بصراحة أنا مكنتش عاوز الشعب يفرح كنت عاوزة يفضل غاضب غاضب لعل و عسي ينفجر في يوم من الأيام القريبة لكن الفرحة دي هديت الناس و شغلت الناس عن كل حاجة حظي العاثر أشتريت المصري اليوم يوم الأحد يوم الماتش أجد الحكومة الرشيدة بتاعتنا عملت أية رفعت اسعار الزيت و السمن و الدقيق و الفول و العدس حتي العدس يوم الماتش و بحسب المصري اليوم هذا هو الإرتفاع الثالث في أقل من شهر أنا علي ما أعتقد الحكومة رفعت الأسعار بصرف النظر عن حقيقتها ليه بقة علشان هي عارفة إننا شعب أهبل لا مؤاخذه يعني سواء طسبنا ماتش النهائي ولا لأ هننشغل بالنتيجة سواء بالأفراح أو الشتايم في حسن شحاته و تقريبا الناس لسه مأخدتيش بالها من إرتفاع الأسعار علشان المنتخب كان إمبارح في دبي و عملوله حفلة كبيرة الحمد لله مشفتهاش و كمان اللعيبة و عائلتهم هيحجوا مجاننا هو اللي هيدفع الفلوس معروف بس علي حساب مين من الشعب اللي هيتحرم من الحج لأننا لنا عدد معين من التأشيرات و ده موضوع كبير
و كمان الملايين اللي نزلت ترف علي اللعيبة مش بقولكم أنا أصفراوي و حقود و طبعا لا ننسي تكرم السيد الرئيس بتأخير سفره لأبوظبي للمشاركة في إستقبال الأبطال
.
المحزن فعلا إننا نقدر الذين يستحقون التقدير البسيط تقدير الأنبياء و الملائكة و الذين يحتاجون التقدير الكبير لا ينالوا أي تقدير مثل الدكتور زويل و الدكتور فاروق الباز و غيرهم كتير
.
ما الذي فعله هذا الشعب الذي أنتمي له عند معرفته بوفاة الصحفي المحترم الوطني الشجاع مجدي مهنا كم واحد علم بخبر وفاته كم واحد عرف قيمته كم واحد أتأثر بيه أنا بأحزن قوي لما بسمع ناس كتير قوي حاليا بتقول أنا بأدعي ربنا عيالي تفضل في الدراسة و تتطلع لعيبة كورة أنا مش بقول إن لاعيبه الكورة وحشين لا بس مش نوصل للدرجة دي فين تقدير العلماء الوطنين المثقفين المعلمين يارجل مش هأقولك حاجة كبيرة المعلمين مين بيقدرهم
يا نهار ابيض البوست ده شكله طوييييييل قوي و كده كده أصلا الزائرين في تناقص بس هأكمل بردوا أنا سخنت خلاص
.
رحم الله مجدي مهنا و أسكنه فسيح جناته و رزقنا أخر مثله إن شاء الله يساعد علي إفاقة هذا الشعب المتبلد
كان نفسي قوي أحضر جنازته لكن للأسف مقدرتيش ربنا يرحمه
أنا زعلان قوي إن أنا معرفتيش الرجل ده من زمان لسه متابعه تقريبا من سنه
بس الحمد لله سمعت أنهم هيعملوا كتاب مجمع لكل مقالاته التي حاول بها إصلاح و تفويق هذا المجتمع
.
أسقف كانتبري
في موضوع تاني حصل و محدش من الأخوة الحنجورية أتكلم عنه و هو إن في أنجلترا أسقف كانتربري روان ويليامز نادي بتطبيق الشريعة الإسلامية بين المسلمين في الأمور الشخصية زي الجواز و الحاجات دي و هناك قامت الدنيا و لسه مقعدتيش لحد دلوقتي مش عارف ليه محدش هنا أثار الموضوع ده و وقف جنب الرجل ده و لا إحنا فالحين في المصايب بس علي العموم أبشركم المصايب جت الصحيفة الدنماركية التي نشرت الرسوم المسيئة أعادت نشرها مرة تانية ردا علي محاولة إغتيال أحد رسامي الكاركتير الذين رسموا الرسوم المسيئة هنشوف يقة الثورة الشعبية و حهود الإستنكار أية شكلها المرة دي و هل شركات الألبان هتسكت و لا هتقوم بدورها بتسخين الناس و إعادة نشر الرسوم يدل علي النجاح الكبير الذي قام به الأستاذ عمرو خالد و الدكتور طارق السويدان و الحبيب علي الجفري و الزيارة اللي مش فاهم لها معني لحد دلوقتي

.
في حاجات غريبة سمعتها كمان اليومين اللي فاتوا دول
يعني تصريح السيد أبو الغيط أنه هيكسر رجل أي فلسطيني يدخل مصر ياعم عاوز تهدد ماشي بس اختار حتي الألفاظ شكلك كده طالع من المدبح مثلا مش من وزارة الخارجية
بردوا الهوجة اللي قامت للوقوف جنب اللاعب المحترم أبوتريكة في رأئي بردوا كانت كبيرة قوي يعني في ناس و حاجات و مواقف كتير إحنا تجاهلنها يعني جت علي الحتة دي خلاص دمنا غلي في عروقنا ده لو لسه عندنا دم
أحكي أية تاني أنا رحت مع مفيد و منذر معرض الكتاب و قضينا هناك كم ساعة عجب شايفيني يا مفيد

:)
:)و كمان مفيد فاصل جامد في المراجع اللي أشتريتها من سوق الأزبكية و منذر عرفنا علي مكتبة الحرافيش و إن شاء الله هنروحها تاني في مقرها الرئيسي و مفيد قرفنا بركن دار ميريت عاوز أروح عاوز أروح و رحنا الحمد لله قبل أما يقفلوا و كمانو إحنا مروحين مفيد ربنا يكرمه فاصل لي تاني في أربع شربات أشترتهم من رمسيس جامدين قوي وفر لي كتير مفيد اليوم ده بس أنت شايفيني يا مفيد

:)
:)و انا معهم حزب الجبهة أتصل بي و قالي إن أجتماع بكرة أتأجل لأجل غير مسمي بيني و بينكم مكنتش فاكر أصلا إني هأروح بس كويس إنه أتأجل و في أنتخابات يوم تسعة و عشرين فبراير ربنا يكرم ويستر
نخش علي الشخصي و النكد يا معلم
كان في أمتحانات في الكلية محضرتهاش بالرغم من إني كنت واخد أجازة بس مقدرتيش أذاكر هتقوليلي ليه هأقولكم علشان أنا بفكر بدماغي كلها في موضوع واحد إني أسيب الشركة اللي أنا فيها و مش عارف أعمل أية و طبعا مش قادر أفاتح حد من البيت في الموضوع ده علشان علاقتي اللي زي الفل معهم سياسة المقاطعة اللي متبعها
تعبان قوي
أنا صحيت النهاردة حسيت إن دماغي كانت بتفكر لوحدها و أنا نايم تعبان قوي و خايف و قلقان و خايف أدمر حياتي زي نماذج كتير قابلتها في حياتي و وصلت معايا إني قلت لواحد صاحبي يكلم الرجل اللي شغال معه في مصنع إني أشتغل معه ساعات شغل أكتر و مرتب أقلل من اللي أنا فيه و أستقرار أقلل بس أنا تعبان قوي و محتار و عمال أخد مشورة ناس كتير بالرغم من انهم ممكن يبيعوني بالرخيص في الشركة ربنا يستر و يقدم مافيه الخير
بمناسبة سياسة المقاطعة اللي متبعها أبويا أمبارح نادي علي و قالي عاوزك في موضوع قلتله ماشي قلت حلو هيتكلم معايا و يا إما أنفجر و يا إما يصالحني بس للأسف كالعادة كلمني في موضوع تافهة مرة أخري
يعني الخلاصة قرف في البيت و الشغل و الدراسة و مع نفسي و كل ده في رأيئ بسبب علاقتي الغير ملتزمة مع ربنا للأسف
ربنا يهدينا و يصلح لنا الحال
معرفش المقطعين دول حبيت أكتبهم هنا علشان مضطريش أكتب الأغنية كلها في المدونة المهجورة
يارب تفضل حلاوة سلام أول لقا في أيدينا
و فرح أول ميعاد منقاد شموع حوالينا
رائعة أم كلثوم ألف ليلة و ليلة
الكتابة من أول هنا النهاردة اللي فات كتبته أمبارح بالليل علشان النت فصل عندي
و أنا راجع النهاردة من الشغل سواق العربية اللي راجع فيها شغل شريط عجب اللي فاكرة منه شوية كلام زي
نانسي هتخش النار روبي هتخش النار نجلا هتخش النا
و في أخر الأغنية اللي هتلبس هتخش الجنة و اللي هتقلع هتخش النار
يعني خلاص مش ناقص غير أمثالكم اللي يتكلم مين هيدخل الجنة و النار بصرف النظر عن الهدف و معني الكلام معتقدش يعني المغني ده هيغني الأغنية المقرفة دي في حفلة للتضامن مع فلسطين و لا مناهضة للرسوم المسيئة بس بيني و بينكم كنت بسمع و أموت علي نفسي من الضحك و في أغنية تانية تقريبا واحد بيغنيها و هو في السجن بيقول لمراته لو أبني سأل علي قوليله مات و لو أخويا سأل علي قوليله مالكش أخوات شريط عبقري هأحاول أجيبة و أنزله علي المدونة المهجورة
.
الجو النهاردة كان جميل الحمد لله و الدنيا مطرت و أنا بحب المطرة قوي و كمان النهاردة الفالنتين بصرف النظر عن إني مش بأقضيه مع حد بس كويس إني مش خارج النهاردة علشان الحقد اللي عندي تجاه الأحبة ميظهرش
كان نفسي بجد أدي هدية الفالنتين لحد بس للأسف لم يحدث مش مشكلة مجتيش علي السنة دي
.
قبل اما السواق يرخم و يشغل الشريط الخزعبلي اللي حكيت لكم عليه كنت بسمع الموبيل من كم يوم كده مكنتش بحب أسمع حاجة بحس بدوشة و أي حاجة شغالة جنبي كنت حسيت إن ربنا هداني و مش هأسمع أغاني تاني بس رجعت سمعت سمعت أية بقة
نانسي عجرم
و أحلم تكبر تبقي بيكاسو
كان يوم طفل و كان من نفسه
لكن و لا شخبط علي الحيط
معرفش حسيت إن الكلام موجهة ليا و إنه في أمل مش عارف ليه هو النهاردة الحمد لله متفائل علي أية و بسبب أية و الله العظيم مش عارف و مفيش سبب مادي حصل علشان أتفائل بس هو كده فلذلك ربنا يستر علشان أنا باكتئب دايما في أيام الأجازة خير إن شاء الله
.
أنا مصدع جدا ياشباب بأفكر بغباء الأيام دي في الشغل مش عارف اعمل أية أسيبه أستمر و التعارض مع الدراسة و هم الدكاترة اللي فاكرنيا عواطليه بالرغم من أنهم أشترطوا اللي يتقبل في الدراسة يكون شغال مش فاهم أنا
حسبنا الله و نعم الوكيل بس لن أستسلم و سنقاتل
.
في واحدة كانت معايا في الكلية و هي في الكلية حاليا شافتني و انا بأحضر قبل كده و أتكلمنا مع بعض أنا نسيت أقولكم إني كنت بعبع البنات في الكلية معرفش أشوف اي بنت أركب لها وش خشب لله في لله مع إني كنت بأهرج و اضحك مع الولاد اللي أعرفهم و اللي معرفهمش بس عن البنات وش خشب
هي كلمتني مرة في الشهر الأجازة و بعدين قعدنا أتكلمنا مع بعض في الكلية الأحد اللي فات و حكيت لي عن حياتها في الكلية العجيب بقة إنها في الأخر قالتلي أنا حبيت أتكلم معك علشان أنت نقي كنت هأقولها أنت تعرفي منذر و لا مفيد أنا أتخنقت من الكلمة دي يا جدعان بحس إنها زي أنت عبيط مثلا في الزمن ابن الحلال ده
.
مش عارف كان نفسي أعمل بوست لهم مخصوص بس في ناس نفسي قوي يعرفوا أنهم غاليين علي جدا بجد هم مفيد و منذر و الحسيني و رفقة و ساسو و إنسانة و سمراء و مانو
.
مش عارف اللي هأقوله ده صح و لا غلط و لا تفاهة بس بجد بحمد ربنا قوي أنه عرفني بالتدوين لأنكم بجد مش ممكن تتخيلوا حياتي من غير التدوين كان ممكن يكون شكلها أية
.
كفاية كده و أدعولي ربنا يكرمكم و أنا هأدعي لكم إن شاء الله

السلام عليكم و رحمة الله و بركاته
أزيكم يا شباب
صدق الذي قال إننا نتخلص من نصف همومنا عندما نتكلم عنها فعلا مقولة في الصميم أخت مدونة في الصميم بجد ياشباب قضيت يوم فضفضة جميل مع منذر و مفيد
أبدأ منين

.
اتصل بي مفيد و أتفقنا علي المقابلة و طبعا كنت في أمس الحاجة لها و قلتله ماشي علي طول علشان اللقاء مع الناس دي بجد بقي البنزين بتاعي في الأيام اللي فاتت دي و بجد ربنا يجازيهم خير علي اللي بيعملوه معاياو الحمد لله إن ربنا عرفني بهم في الفترة دي من حياتي

المهم شوية كده و أتصل تاني و قال مش هينفع نتقابل بجد زعلت جدا جدا جدا المهم رحت الشغل و أنا مروح لاقيت مفيد بيتصل بيا و يقولي تعالي إحنا في وسط البلد بجد كنت هأطير من الفرح كان نفسي أقابلهم قوي المهم طلعت بمعدات الشغل عليهم علي طول و أتقابلنا و الحسيني كلمني و قال لي إنه مسافر المهم قعدت أنا و مفيد و منذر علي القهوة شوية و بعدين طلعنا علي الكورنيش و كان الجو تلج و كنا علي النيل علي طول الموج بتاعه كان بيغرقنا بجد مش تهريج المهم كل واحد اتكلم عن نفسه مفيد أتكلم عن حياته شوية و بعدين أنا أتكلمت عن أكبر مشاكل حياتي و منذر كذلك

.
بالنسبة لي هم الأتنين صدموا من الكلام اللي قلته لهم و خصوصا منذر مش عارف ليه و بعد كده و حسيت أن زعل من نفسه حس إن مشكلتي تقريبا أكبر من مشكلته و هو حاله أحسن من حالي

.
و بعد كده أتجهنا للسينما و دخلنا فيلم الجزيرة هو فيلم درامي بس أنا و مفيد كنا قالبينه كوميدي لدرجة الرجل اللي جنبي و الرجل اللي قدام مفيد كانوا مش طيقنا من كتر الضحك اللي ضحكناه علي دور عبدالرحمن أبوزهرة واخد بالك يا مفيد
بس و بعد كده روحنا و من ساعتها باتصل بمفيد و منذر محدش بيرد مش عارف ليه ربنا يستر

.
مش عارف في حاجات كتير قوي نفسي أتكلم عنها تاني مش عارف إزاي
بأحلم تكون البلد دي كويسة و حلوة و نظيفة
بأحلم بالناس تبقي نظيفة كده
بأحلم بالناس تبقي مش شايلة هم
بأحلم بالأطفال تلعب و هي صغيرة
بأحلم بالأطفال تتربي كويس

بأحلم الأخلاق و الرجولة و الشهامة ترجع تاني
بأحلم يكون قلبنا علي بعض و بنحب بعض
بأحلم تختفي الطوابير من حياتنا أو علي الأقل متزيدش يعني
بأحلم نبقي منظمين
بأحلم لما نشوف لوحة ممنوع الدخول محدش يدخل مش لازم يوقفوا أمن
بأحلم نبقي ملتزمين
بأحلم أبقي دكتور و أعالج الناس ده مش هيتحقق طبعا مش مشكلة
بأحلم إن الدكاترة يكون قلبها حنين علي المرضي
بأحلم المرض نفسه يختفي أو يقل
بأحلم الجهل يختفي من حياتنا
بأحلم خلق العربجية تختفي من حياتنا
بأحلم بالبلطجة تختفي من حياتنا
بأحلم الفقر يختفي من حياتنا
بأحلم الشحاتين يختفوا من حياتنا
بأحلم اليأس يختفي من حياتنا
بأحلم الأمل يرجع تاني لحياتنا
بأحلم الدفء يرجع لحياتنا
بأحلم الأمن يرجع لحياتنا
بأحلم قلة الأدب تختفي من حياتنا
بأحلم الإنحلال يختفي من حياتنا
بأحلم أذاكر و أخد الماجستير و الدكتوراة
بأحلم بشغل أحس فيه بنفسي
بأحلم ربنا يرزقني فرصة حياة جديدة في مكان جديد
بأحلم أرجع أفرح تاني
بأحلم بيها ياريت الأقيها بقة
بأحلم إني أحس إني من أهل الزمن ده و أتأقلم علي العيشة فيه
و أديني عمال أحلم يعني مش حرام

و ربنا يحقق كل الأحلام دي مفيش حاجة صعبة عليك يارب

.
و لا تيجوا أحلم حلم تاني
لا بلاش نكد

.

مش بقدر أعدي بوست من غير نكد بحس أنه مش أنا

عندي شعور عجيب حاليا مش عارف سعيد و لا مش سعيد مش عارف عندي حالة من الرعشة كده مش عارف في أية بجد مش عارف أنا فرحان و لا زعلان و لا قلقان أيوة هي قلقان بس ليه و لا من أية مش عارف و حالة بجد عجيبة مش لاقي لها وصف بس مش مرتاح هو ده ملخصها

يارب تعدي الحالة دي و أخلص منها

السلام عليكم و رحمة الله و بركاته

أصدقائي أزيكم جميعا يارب تكونوا بخير

البوست ده ده بقة مش عارف أنا عندي إنطلاق في البوستات مش عارف ليه المعدل عالي قوي بالرغم من إني المفروض أقلل القعدة قدام الكمبيوتر أصلا و أقعد أذاكر بس مش بيحصل

.

أمبارح كان يوم صعب قوي أنتم طبعا متعودين مني علي بوستات جلد الذات بس بجد يا شباب أمبارح علي ما أعتقد أول يوم في حياتي أصعب علي نفسي قوي بجد علي ما أعتقد من ساعة أما وعيت علي نفسي دايما بألوم نفسي و بأقطع فيها و باندب حظي بجد أمبارح يعني عيطت بس مش كتير علي نفسي مش عارف هأستحمل لحد امتي

و الله كان نفسي أنقسم نصين نص يعيط و نص يطبطب علي اللي بيعط

.

انا دينيا مش ملتزم قوي و كمان في الحياة مش ملاك و بعمل حاجات غلط كتير بس بجد أول مرة احس إن الغلطات و التقصير اللي بعمله في أي حاجة تجاه أهلي و صحابي و الناس اللي في الشارع حتي لا يمكن يكون ده جزائه طبعا ربنا الوحيد اللي الواحد لا يمكن يشكره حق الشكر علي النعم التي أنعمها علي أي إنسان بس بجد أنا يارب تعبان قوي و خايف جدا علي نفسي مش عارف ممكن انهار في أي لحظة و أعمل حاجات او حاجة مقدرش أرجع فيها

أنا مش عارف أعمل أية و مش عارف رايح فين

بس كده

.

البوست ده بقة بسيط و سهل علشان الزباين اللي بتتدخل المدونة قلت خالص و كده مش لاقيين ناكل يعني

و كمان أمبارح الأخوة في حزب الجبهة اتصلوا بي مش عارف أية اللي فكرهم بيا و الغريب أنهم بيقولولي تعالي أستلم الكارنية الخاص بالعضوية مش عارف هم لسه فاكرين علي العموم أنا هأروح بس مش عارف هأستمر معهم و لا لا طبعا القدام منكم حكيت لهم اللي حصل و كده لا داعي أقطع في الحزب اللي لسه هأنضم له

.

بجد يا شباب الواحد خلاص علي أخره مش هينفع كده فعلا

و الله عارف كل اللي هتقوله و فعلا ياريت محدش يعلق علشان أنا عارف كل اللي هتقولوه بس بجد انتم مش ممكن تتخيلوا اللي أنا عايش فيه ممكن اكون أنا حساس شوية زي ما كتير من الناس بتقولي و بكبر المواضيع يمكن بس بجد حتي الجبلة اللي أسمه جبلة لو مكاني هيقول اللي بقوله

.

أخيرا أنا أتخنقت قوي من المدونة دي مش عارف بقيت اتكلم فيها كل اللي كنت باكتبه مع نفسي و مناجاتي مع ربنا مش عارف ده صح و لا غلط هو غلط عارف بس بجد أنا جوايا كلام كتير قوي لازم يطلع مش عارف أطلعه فين و لا إزاي علشان كده بيطلع هنا و مش عارف لو قدرت أكتمه هتكون حالتي أية

.

انا داخل في حوار كده مش عارف أخرته أية بس دخلت فيه و مش عارف أعمل أية و خايف منه قوي علشان هيكون محطم لو أستمريت فيه جامد و فشل لأي سبب

.

الأخوة حبايبي الزملكاوية عمرو زكي و محمود فتح الله مكفهمش الزملكاوية اللي أنا واحد منهم لا دخلوا علي مصر كلها علشان يجيبوا لهم الضغط

ربنا يوفقهم

.

و الله انتم شكلكم أي كلام و لا حد بيدعي لي خالص و لا بذاكر و لا الدنيا بتتغير معايا يا أما تتوضوا و تدعوا أو متدخلوش بقة هنا مش ناقص قرف بقولكم أهوة

.

و الله يا جدعان مش عارف انا بأضحك كده إزاي و بهرج كده إزاي مش عاوز أقولكم أنا كنت في الشغل النهاردة كأني أسعد إنسان علي وجه الأرض بالرغم من إني ماسك دموعي بالعافية

مش عارف ده مرض و لا هبل و لا عبط و لا بداية جنون ربنا يستر

.

مقدمة
السلام عليكم و رحمة الله و بركاته
سبب شغفي لكتابة هذا البوست هو محو البوست السابق ده أولا الحمد لله علي كل شئ و كمان الحمد لله حالتي حاليا كويسة نوعا ما بسبب بعض التغيير الذي حدث لي في حياتي أدعوا لي بالتوفيق

.

أنتم طبعا عارفين إحساس إنك تكون عاوز تكتب و مش لاقي أفكار أنا كنت كده عاوز أكتب علشان ألغي أخر بوست الغريب أنه كان رقم مائة و مش لاقي أفكار و إذ فجأة نزلت عليا تسعة ألأف فكرة و مش عاوز أكتب كل نقطة في بوست لوحدها مش بحب كده بحب اللي علي بالي أكتبه علي طول

.
المهم
حوار زميلي الأكبر مني في الشغل
تبدأ القصة من إن في واحد كان حاططني في دماغة من ساعة أما أشتغلت المهم حظه معايا كان وحش كان كل أما يحطني في حاجة زي الإختبار كده منجحش فيه أو يحدث إختلاف في وجهات النظر المهم الرجل ده متفهموش بيحبني لله في لله كان الأول اللي يعلم عليه من أول مرة مفيش فرصة تانية المهم الرجل ده إداني فرصة و التانية المهم كان المجمل كويس

.

بس هو كان عاوز تظبيط من حاجة تانية مش عارف أسميها بإسمها و لا أية بس طبعا مش بإسمها علشان الناس اللي بتتدخل هنا كلها محترمة هو عاوزني أتملقه يعني و أطلع أصبح عليه كل يوم كده يعني المهم طبعا أنا معرفش أعمل كده و لا هأعمل كده المهم زميلي ده بقة كان أخد زنبة من واحد قبل كده عن الرجل ده فمن ساعتها الرجل مش بيحبه و هو شايفني كويس الحمد لله بالتعامل مع كل الناس الكبير و الصغير في السن و المقام

.

المهم الرجل الأولاني ده إداني شغل تاني إختبار تاني فأنا عادي بقول للناس و هم كده كده بيعرفوا المهم زميلي ده أنا كنت مرة سألته عن شخصيتي في الشغل كويس و لا لا قالي الحمد لله و الله مش تفاخر و لا منظرة قالي أنت احسن واحد من التلاتة الجداد اللي جم هنا انا اشتغلت ومعايا و احد و جه بعد سنة واحد تاني جديد

.

المهم اللي خنقني بقة وضايقني قالي أن الأتنين الزملاء الجداد اللي معايا دول الأتنين بيعملوا يتحججوا بأي حاجة علشان يطلعوا لدرجة أن هو شخصيا فوجئ بزميلي الجديد اللي جه بعدي بيطلع للرجل ده و الله أعلم بينقلوا أخبارنا و لا اية و يقلوا مش عارف مين حضرتك بيسلم عليك و كده يعني و بيقولي التاني اللي أشتغل معايا بيعمل كده بس مش قوي علشان هو كارهه الرجل ده علشان كلمه في موضوع أول أما أشتغلنا ضايق زميلي ده
هو قالي أنا عارف أنك مش هتعمل كده و حتي لو عاوز تعمل كده مش هتعرف بس أنا بقولك علشان متكنش زيي حاول تبقي تتطلع للرجل ده

.
أنا كنت بين نارين سعي جدا بكلامه إني أحسن واحد من الناس الجديدة و الناس الحمد لله حاسة بكده بس كنت بتقطع علشان مش هأعرف أعمل كده مش عارف هأقدر أستمر في الشغل إزاي
أنا نفسي في شغل محترم يا جدعان مش هأقدر علي كده
أو أدعو لي إني أكون لامؤاخذه علشان أقدر أعيش و أستمر في الشغل ده
مش عارف بجد أعمل أية

.
أنا و الله يا شباب باكون صاحي من النوم مش طايق أقوم و مش عاوز أروح الشغل من القرف اللي فيه حتي لو نمت عشرين ساعة مش بأقوم فايق لأني نسيا مش مرتاح و مش عارف أعمل أية
أففففففففففففففففف
أستغفر الله العظيم

.
لقطة بهجة
انا و أنا رايح الشغل يا شباب الصبح بأكون علي الطريق الدائري و بشوف بقايا الأراضي الزراعية التي هربت من التجريف و لكنها لن تهرب منه طويلا و كأنه الموت و القدر في منطقة جميلة باعدي عليها النهاردة كان شكلها رائع وساحر كان هناك طبقة من الشبورة فوق الزرع و يطلع منها شجيرات و أشجار و كأنها سبحان الله الجنة علي الأرض و الشمس حاجة جميلة و لكني للأسف غير مستمتع بها لأني أعرف أنها لن تستمر و لن أراها و لأنني ذاهب إلي الشغل و مافيه

.
كلنا بلاوي
كنت بأشرب سيجارة في الحمام في الشغل لأن مش كل الناس تعرف إني بدأت أدخن هبل علي كبر بعيد عنكم المهم في أتنين تلاتة يعرفوا المهم رجعت لاقيت واحد منهم بيتكلم عن أية برنامج هزي يا نواعم و بسم الله ماشاء الله المحروسة اللي كسبت كسبت كم سبعين ألف دولار يا ربي بتتعب بجد

.

و حكي لي عن العبقري ظاظا اللي بيعلمهم الرقص أستفزني جدا الموضوع ده و أستفزني أني أفتكرت أنه صديقي ده كان كل أسبوع بيقعد يكلمنا شوية عن البرنامج ده أنفجرت فيه قلتله يابني حرام عليك أنك تتفرج علي البرنامج ده أنت كده بتديه أهمية و تخلي الناس بتعمل برامج تانية مشابهة ليه قالي يا عم هو أنا باتصل و لا بأصوت قلتله كفاية أنك بتتفرج عليه قالي اللي يشوفك بتتكلم كده ميشوفكش جاي منين انا أتحرجت بصراحة و كمان أفتكرت كل الذنوب و البلاوي اللي بعملها عرفت إننا فعلا كلنا بلاوي و مذنبين و مش بنعمل حاجة مش فالحين في غير إننا نمثل إننا بتوع ربنا و خلاص

.
المهم في أتنين تانين حكوا لنا النهاردة مش عارف النهاردة كان ألعاب في الشغل حكوا لنا مواقفهم القذرة قبل الزواج و عما كانوا يفعلوه واحد منهم حكي أنه كان القطر مرة و أتعرف علي واحدة أرملة و كان بيكلمه بعد كده في التليفون و بعد شهر من تعرفه عليها عمل معها حاجات مش كويسة في ميكروباص الغريب أنه لما كان بتصل بها كان أبنها واخدين بالكم أبنها بيقوله بتصلي

.

مش فاهم الناس دي عايشة إزاي الواد ده بحبه قوي طبعا قرفت من أهله أصلا انا مش بأقول إني ملاك بس متوصلش للدرجة دي خالص يعني الحمد لله مستحيل يعني المهم الحوار جابنا و أتكلمنا علي الناس اللي عندنا في الشغل و بتتفرج علي الأوربي يعني و نتخيل مرة بنته تتدخل عليه و تشوف لقطة كده و لا كده نتوقع من بنته دي أية و كمان الواد ده كان عمل اللي عمله مع أرملة جه في دماغي نظرتنا السيئة للأرملة و المطلقة و إننا حتي مش بنشجع الرجالة علي الزواج منهم من الأخر وصلت لحاجة مهمة جدا إننا فعلا اللي بنعمل كده في أنفسنا و الفساد و قلة الأدب و البلطجة سببها إحنا كلنا بلا أستثناء كلنا مدانين

.
المهم و أنا راجع من الشغل كمان خطرت علي بالي كم موقف كده يعني أخواتي البنات المصريات اللي عملوا مظاهرة علشان تامر حسني هرب من التجنيد و الدفاع عن بلده بصرف النظر عن اللي بيحصل في الجيش يعني و رعبي إن أدخله عملوا اية لما واحد مدون أتقبض عليه و لا واحد أضرب في مظاهرة و لا أتعذب في السجن علشان يخلي البلد تعيش في العدل و الحق

.
جه علي بالي أقولها متزعليش يا أختي لو حد اتحرش بك في الشارع لأنك موقفتيش جنب اللي حاول يدافع عن شرفك و عرضك و و قفتي جنب اللي بيهز و لا مؤاخذه و اللي هرب من الدفاع عن أرض بلده

.
و هأقول لأمهاتي متزعلوش لو واحدة من بناتكم أنتهكت في الشارع لأنكم معملتوش حاجة غير مصمصة الشفايف للي وقف قدام الظلم و قعدتي حضرتك تتفرجي علي الساعة العاشرة بعد المسلسل العربي و نمتي و لا علي بالك

.
و هأقول لأبائي و اخواني متزعلوش لو حد من ولادكم طلع بيشرب مخدرات و لا بانجو علشان أنت سمعت الأغاني اللي بتحيي المخدرات و البانجو و العنب و متزعلش علي بنتك لو عملت حاجة غلط علشان كانت بتشوفك و أنت بتتفرج علي الأوربي يعني انت بتعمل حاجة مش غلط أكيد علشان أنت أبوهم هي و هو لازم تقلدك

.
و هأقول لنا كلنا متزعلوش لو جعنا بعد كده و مش لاقيين حد يأكلنا علشان شفنا أهلنا في غزة جعانين و مش لاقيين الدوا و سكتنا و سيبكم بقة من فتح المعبر و الكلام ده الناس الجعانة هي اللي فتحت السور بالقوة مش عاوز حد يضحك عليكم يعني لأن الجوع يصنع المعجزات

.
و أقسم لكم أننا جميعا سوف نشعر بما أقول أنتم أو من في ظهوركم و أصلابكم و سوف يلعنونكم علي سكوتكم ضد الظلم و ليس سكوتكم فقط و لكن تشجيعكم له و محدش منكم مش مذنب

.
و أخيرا أقسم لكم أيضا أن النصر قادم لا محالة و سيكون من مصر لأن مصر هي بلد الشجاعة و النصر عفوا لكل إخواني العرب و المسلمين النصر فعلا لا يبدأ غير من مصر لكن أدعو الله أن أكون ممن يعيشوا هذا النصر و يشاركوا فيه بأي صورة و لو حتي بكلمة حتي يسقط من علي ظهري الذنب و الأثم الذي أشارك به الأن
مش عارف أية الرغي الكتير ده
الناس كلها قالبة المدونات صحافة و كل من هب و دب بيتكلم مجتش علي يعني
:)
كفاية كده

أةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة

السلام عليكم و رحمة الله و بركاته

أزيكم يا أصدقائي الأعزاء

بما إن الحياة الحمد لله لذيذة معايا لأسباب كتير منها إنها مبقتيش فارقة معايا و اللي يحصل يحصل وكمان إن ربنا رزقني بكم صاحب كده زي الفل ربنا يزيدهم و يزيد الحب و الأخوة بيني و بينهم و حاجات تانية و نعم ربنا الكتير علي و كمان النهاردة قريت بتاع ثلاثة أوراق كاملة من إحدي المواد الخزعبلية اللي بدرسها يعني اهو تلاتة أحسن من مفيش المهم قلت أكتب بوست مش عن نفسي شوفوا التواضع

.

حبيبي محمد مفيد علمني إزاي أستخدم الريدر و ده إختراع يا جدعان مكنتوش تتصوروا كنت بضيع وقت قد أية ألف علي كل صحابي المدونين العظام لأن العظماء بس اللي يعرفوا بعض علشان الأقي منهم حد نزل بوست جديد و كان في ناس بتعتزل التدوين و أفضل أدخل عندهم كل يوم

المهم

.

و أنا بأجهز الريدر لأقيت بوست قديم عند واحدة مش هأقول هي مين مش عارف ليه مع إنها عاملة بوست عن اللي هأقوله بس مش عارف مش حابب أقول هي مين

الخلاصة إنها كادت تتعرض لمحاولة لتصويرها في أوضاع مش كويسة بعد تخديرها من واحدة كانت تعتقد إنها صديقتها و أكلوا مع بعض عيش و ملح زي ما بنقول بس الحمد لله ربنا نجاها بجد متتخيلوش إحساسي و أنا بقرا البوست ده كان عامل إزاي يمكن يكون ده السبب الرئيسي إني مش هأقول هي مين علشان محدش يقرأ البوست البشع ده

.

جه علي دماغي سؤال فعلا إستفهامي مش إستنكاري حاشا لله لماذا خلق الله الظلم

دخلت علي جوجل حاولت ادور علي حاجات في علم النفس و لا الدين عن الموضوع ده مش عارف كان نفسي أكتب بوست عن الموضوع ده بس مش عارف قلت اكتب بوست و أسألكم فيه عن الموضوع ده

ياريت يكون في عند حد منكم شرح و توضيح يمكن نستفاد كلنا

.

في كمان جريمة بشعة للأسف كثرت في حياتنا هي الإغتصاب جريمة بشعة فعلا يعني ممكن أتخيل القتل السرقة حتي الزنا مش هأعترض إنما الإغتصاب فعل بشع بجد مقرف و بيحطم الإنسانة اللي بتتعرض للموضوع ده

مش عاوز بقة فزلكة و لا نقول علشان البنات مش لابسة مش عارف أية و الرجالة مش عارفة تتجوز

ده فعل حقير

مش عارف اللي بيعمل كده بيعمل كده إزاي و بيكون حاسس بإية جوة نفسه أنا كرجل يعني معتقدش إنه بيكون في متعة يعني من الموضوع ده

.

الخلاصة الظلم عموما سببه أية و ليه ربنا خلقه و ليه إحنا بنظلم بعض و بنفتري علي بعض و ليه بتقوم الحروب و ليه القتل سهل و ليه بقينا نصور حوادث القتل و نوزعها علي موبايلتنا و كأننا مش بني أدمين و ليه القوي بيظلم الضعيف و هيستفاد أية ما هو قوي أساسا

و ليه أشكال الظلم كثرت هذه الأيام و ظهر منها أنواع بشعة مقرفة

كل دي أسئلة بتدور في ذهني من فترة و حاولت ادور لها عن إجابة بس بجد مش عارف ياريت حد يكون عنده إجابة

.

عَنْ أُمِّ المُؤمِنِينَ أُمِّ سلَمَةَ رضي اللَّهُ عنها أن النبيَّ صَلّى اللهُ عَلَيْهِ وسَلَّم كانَ إذَا خَرجَ مِنْ بيْتِهِ قالَ : « بسم اللَّهِ، توكَّلْتُ عَلَى اللَّهِ، اللَّهُمَّ إِنِّي أعوذُ بِكَ أنْ أَضِلَّ أو أُضَلَّ ، أَوْ أَزِلَّ أوْ أُزلَّ ، أوْ أظلِمَ أوْ أُظلَم ، أوْ أَجْهَلَ أو يُجهَلَ عَلَيَّ » رواه أبو داود والتِّرمذيُّ

تخيلوا سبحان الله سيدنا محمد صلي الله عليه و سلم بيستعيذ من الظلم كلما خرج من بيته سواء منه أو عليه يعني الظلم حاجة بشعة جدا طيب ليه كتير قوي اليومين دول و كمان بتزيد في حاجات و موضوعات بشعة

في الأخر ربنا يعافينا كلنا من الظلم و لا يجعلنا من الظالمين و ينصرنا علي الذين ظلمونا

السلام عليكم و رحمة الله و بركاته
طبعا الناس كلها منتظرة مني بوست عن اليوم الفظيع الرهيب الشنيع اللي قضيته مع منذر و مفيد و ناس تانية كتير و إحنا بنشارك نبع الأفكار مصطفي الحسيني في إفتتاح موقعه الإلكتروني الشنيع الفريد دار الكتب

.
بس هتكلم عن اليوم ده في أخر البوست لأن عندي كم حاجة كده عاوز أقولكم عليها

.
أولا مش عارف ليه عكس جميع محاولاتي السابقة من لقاءات مدونين و حضور لقاءات و حفلات التجمع الوحيد اللي حسيت فيه أني منهم و حسيت أنه في أمل هو لقاء إفتتاح دار الكتب مش عارف ليه
ياريت بس مصطفي لو كان فاضي و دخل هنا ميمسكهاش علي ذلة يعني
.
تاني حاجة و هي الأهم عندي شكرو تقدير كبيرين قوي لأتنين لأول مرة أحس و أفهم يعني أية حد يحب حد في الله هم طبعا الغاليين قوي منذر و محمد مفيد بحبهم قوي يا جدعان بجد
الأتنين بيقفوا جنبي قوي و يشجعوني و منذر بالرغم من إنه أنا أكبر منه سنا بس هو بيحسسيني إني زي أخوة الصغير و يقعد يسأل علي و يهتم بيا مبسوط و لا لا في كل حاجة و محمد مفيد كان عاوز يسألني علي اللي كتبته في البوست اللي فات بس متكلمش في كل اللي هو عاوزة بس سألني عن حاجات تانية و أطمن إن أنا أحسن دلوقتي
ربنا يكرمهم يارب و يبارك لي فيهم و في أخوتهم
.
تبدا أحداث اليوم بإستيقاظي مبكرا مش قوي يعني للإستعداد للرحلة المعتادة يوميا للعبور بس هذه المرة مش للشغل لا للهايكستب لإستخراج الإعفاء النهائي من الجيش
يوم الأربعاء كانت الدنيا مطرة و زحل بس انا كنت أجازة من الشغل الأربعاء و الخميس
المهم صحيت قلت هأروح الأقي الميكروباصات فاضية عادي يعني ساعات بأركبها لما بتفتني عربية الشغل رحت مكنش فيه و لا واحد وقفت في البرد ميكروباص كبير جه و الدنيا زحمة أضطريت أركب و وقفت لغاية الهايكستب مش مشكلة
معرفش كان معايا شباب كتير قوي في الميكروباص أشكالهم كبيرة علي صغيرة علي فافي علي ناس شقيانة كان يوم من أيام التلاحم و ربنا سهل و أخدت الإعفاء النهائي الحمد لله و رجعت و أنا راجع كلمت الحسيني يمكن يمكن يكون محتاج حاجة حد يرص كراسي يعلق نور كده يعني هو طلب مني رقاصة بس ده مكنش إختصاصي
:)

.

مكنتش عاوز أروح نزلت رمسيس أشتريت فطار من عند اخر ساعة و بعدين رحت قعدت علي القهوة و شربت شاي و عملت دماغ و روحت وسط البلد كان إحساسه غريب في المطرة و الغيوم

.
روحت قعدت كلمت منذر و مفيد علي المسنجر و اتفقنا علي المقابلة و أتقابلنا و قابلنا دومة و الجيزاوي و بعدين توجهنا لمكان الإفتتاح مكتبة البلد بوسط البلد بس و شفت ناس مشتفهاش من زمان زي حبيبي ابن ناصر و شفت ناس لأول مرة زي مريم هو أينعم متكلمناش خالص بس كويس شفت حد كان نفسي أشوفه و كنت سعيد باللقاء ده قوي و كان مفيد هو اللي بيقدم الحفلة و قعدت أضحكه و الناس كانت عاملة زي المدرسة عمالين يتكلموا و مفيش إحترام خالص بس كان يوم لذليذ ربنا يوفقه الحسيني في تحقيق حلمه الخبز و الكتاب مش فاهم أنا أية الحلم العجب ده بس ربنا يوفقه

.
وبعدين قعدنا شوية علي البورصة و روحنا و كان معنا ناس كتير علاء و أحمد مهني و محمد هانئ الشخصية التي فعلا سعدت بمعرفتها و بعد كده روحت انا و منذر و محمد هانئ و كنت ماليان طاقة و تفاؤل وسعادة الحمد لله

.

دي حاجة بيني و بين مفيد

أستني يا منذر

.
الواد الحسيني مش عارف ليه ذلني و مرضيش يديني كارت من بتوعه مش عارف ليه بس الحمد لله حبيبي مفيد أداني واحد منه

.
مش عارف طولت عليكم و لا لا
أهوة فضفضة بقة أنتم عارفين إن أنا رغاي قوي علي النت بس
في حاجة أخيرة أقولها طلعت عيل و رجعت صداقتي مرة تانية مع صديقتي اللي قلتلكم إن أنا قطعت كلامي معها البوست اللي فات

و بقولها متزعليش مني انا أسف
:)

بوست مالوش لازمة

.

البوست الجامد ده مش هيكون له أي ملامح و لا موضوع معين هأكتب و خلاص موضوعات مالهاش علاقة ببعضها بس هي في دماغي مش عارف أرتبها و لا أكتب كل موضوع لوحده

.

في مثلا خنقتي من جميع أهل المنزل الظراف اللي هنا بس الحمد لله وفقت في بداية حرق دمهم جميعا واحد تلو الأخر من بابا و ماما و أخوتي و مش عاوز نصائح بالنسبة للوالدين عارفها كلها بس مش قادر جوايا طاقة كبيرة لازم أخرجها و سعيد بصراحة كلمة لا دي حلوة قوي بس عاوز أحسن أدائي شوية ربنا يسهل هأبقي جامد جدا

.

و في واحدة صديقة ربنا وفقني كمان في قطع علاقتي بها بالرغم من إنها لسه صديقة جديدة بس مش عارف مكنتش مرتاح للكلام معها كنت حاسس بحاجز كبير بيني و بينها مش عارف أية

ربنا يوفقها ويسامحني

.

كمان في إنطلاق موقع دار الكتب لحبيبي مصطفي الحسيني بكرة إن شاء الله ربنا يوفقه و لازم نشاركه جميعا

.

في موضوع الأميرة السعودية اللي دهست مصري و أذربيجاني و اللي لو الموضوع ده أتطرمخ عليه انتظروا مني بوست اخير هأروح بعده السجن علي طول

.

في كلمة قريتها علي عربية ميكروباص شداني قوي الكلمة هي سلام يا بلد الكلام

.

كلمة جامدة قوي و معبرة عن اللي جوايا نفسي أقولها بجد يعني نفسي أقولها كده و أنا في طيارة و مسافر أو في مركب تهريب للخارج كده و أنا في عرض البحر و بأنظر لأنوار شواطئها و بردوا مش عاوز نصايح في الموضوع ده

.

في كمان حاجة نفسي أقولها قوي

تعرفوا أغنية خدني الحنين لمحمد فؤاد الجديدة كان نفسي أحسها بس أكيد عمري ما هأحسها لأني عمري ما حسيت الإحساس ده و لا هأحس بيه اللي ميعرفهاش يقراها في المدونة اليتيمة التانية

تعرفوا أغنية أمي لهشام عباس بردوا عمري ما هأحس بيها

تعرفوا أغنية أنا مهما خدتني المدن لعماد عبد الحليم عمري بردوا ما هاغنيها لأني عمري ما حسيت الأغنيتين

.

تخيلوا كينيا فيها صراعات سياسية و ناس مواليه للرئيس و ناس معارضة في قتال بسبب الديموقراطية و كان الفرق اللي بين الرئيس اللي كسب و المعارض ثلاثمائة ألف صوت حتي كينيا بصرف النظر عن القبلية اللي في الإنتخابات

ربنا يكرمنا كده و يكون في إنتخابات عندنا زيهم

حتي كينيا سبحان الله

.

لا تأسفن على غدر الزمان لطالمـــــا رقصت على جثث الأسود كلابا

لا تحسبن برقصها تعلو على أسيادها تبقى الأسود أسوداً والكلاب كلاب

تبقى الأســــــود مخيفة في أسرهـــــا حتى وان نبحت عليها كــــــــلاب.

.

كل سنة و أنتم طيبين بمناسبة رأس السنة الهجرية الجديدة ربنا يحقق فيها كل اللي نتمناه

.

بالرغم من كل المؤسويات دي كلها سعييييييييييييييييد مش عارف ليه

تقريبا الفترة دي من السنة لازم أحس فيها دايما بسعادة و الله أعلم الأيام دي هجريا توافق الأيام اللي كنت فيها في الأقصر و اسوان في سنة البكالوريوس و الذي كان

.

بالمناسبة تخيلوا أنا رايح أجدد شهادة التاجيل من الجيش بكرة تخيلوا مر ثلاثة سنين علي تخرجي و انا قاعد زي البيضة كده و لا عملت أي حاجة و لا نيلة

بس بردوا سعيد

.

أسوأ حاجة في البوست ده أنكم هتكرهوني بسببه بس معلش سامحوني

أكتئبت علي فكرة جامد قوي و هادخل أنام

مستنيكم يوم الخميس في مكتبه البلد أمام الجامعة الأمريكية الساعه 6 علشان حفل افتتاح موقع دار الكتب هذا الموقع الأول من نوعه
و لنشارك جميعا مصطفي الحسيني نبع الأفكار في رؤية حلمه يتحقق

السلام عليكم و رحمة الله و بركاته

المرة دي من المرات القليلة اللي بكتب فيها علي ورق قبل الكتابة المباشرة علي الكمبيوتر

و للأسف بكتب في الشغل من الفضي و من شدة إشتياقي للتدوين هذه الحدث الجمييييل
أمبارح توجهت مع الغالي منذر لقرية القرصاية للمشاركة في الحفلة التضامنية مع أهالها
أكيد كلامي مش هيعجب كتير من الناس ده فرضا لو حد من الناس قرأ الكلام ده و هو ميعرفنيش مش من أصدقائي في عالم التدوين يعني
حسيت بنفس الشعور اللي حسيت به و أنا في الأجتماع الذي حضرته بحزب الجبهة شعور بالغربة مش عارف السبب الحقيقي لشعوري ده يمكن علشان أنا شايف نفسي أقل من الناس دي إطلاعا و معرفة أويمكن كنت أعتقد أن هذا الشعور سببه عدم إقتناعي بأن فكرة التغيير هتكون بالطرق اللي سمعتها في إجتماع حزب الجبهة أو من خلال حفلة جزيرة القرصاية
لكن بعد كلامي في طريق العودة مع منذر أنا أسف بالمناسبة يا منذر علي التسعة كيلو الزيادة اللي مشيناهم غلط بس سيبك و لا يهمك هو شايف إنه ممكن حاجة زي الحفلة ممكن تكون من خطوات التغيير و يجب أن أحترم رأي منذر لأنه منذر يعني لو حد تاني قال لي الكلام ده مكنتش هأغير رأيي
الشئ المستفز في الحالتين إن الناس بحس بها أو المعظم للحق يعني بتتعامل مع التغيير أو الإصلاح زي ما بيقولوا من برج عالي قوي تلاقيهم غالبيتهم يعني علشان مش عاوز قلة أدب و كل اللي هيقرأ الكلام ده يعتبر نفسه مش من الناس دي شباب فرافير كده يخلصوا الحفلة و هيطلعوا علي الديسكوتك بعد كده و لما يروحوا يقولوا شفت يا باباي و ياماماي أنا عملت أية و كنت فين أو نوع أخر يريد الحياة بالطريقة الأمريكية التلفزيونية و طبعا مش هأنسي البنات الظراف اللطاف اللي كانوا عاوزين يلعبوا مع أطفال القرصاية كانهم لعب أول مرة يشوفهم هأقولهم لا الأطفال دي اللي أنتم لو شفتوهم في الشارع بتقرفوا تمشوا جنبهم و لو واحد منهم حط أيده علي عربيتك هتروحي تغسيلها بعد كده
و أنا هأقول للناس دي لو عاوزين تشوفوا و تعيشوا بجد حياة الناس دي أركبوا الأتوبيسات الساعة تلاتة الظهر و شوفوا الناس عاملة إزاي و حالها أية و بتتعامل إزاي مع بعض
الشئ الوحيد اللي مخليني مش مكتئب قوي من الحفلة دي إن منذر و ما أدراكم من هو منذر كان سعيد و متفائل بالحفلة دي علي العكس مني و أنتم الحكم بينا
مش هأقدر أنسي بقة في الحفلة دي الفضيحة اللي الجيزاوي عملها لمنذر و طقم الشتيمة اللي أستقبله بها عند لحظة وصولنا لركوب العبارة نوماندي تو و منظرنا و كأننا سائحين داخلين الجزيرة
و لا أنسي سعادتي برؤية معظم مجموعة أبناء مصر لأنه أنا كنت بقعد مع منذر و الحسيني و مفيد زي الأطرش في الزفة و هم بيتكلموا عنهم
أما عن القرصاية بقة في حد ذاتها و مشكلتها أنا مش عارف التفاصيل قوي و الظروف بس الحقيقة هي مكان رائع جدا جدا جدا و في رأيي و مش عاوز طوب مش مستغلة صح أنا طبعا معرفش مساحتها قد أية للأسف كان معايا ورقة عنها و فيها التفاصيل و معلومات عن الجزيرة بس في واد رخم من عيال القرصاية زي الواد ابن أختي كده أخدها مني علشان فيها صورة جده
المهم ممكن يتعمل فيها مشاريع سياحية فعلا و يشتغل فيها أهل القرصاية مع عمل جزء منها أو بديل لها فيه مساكن قريبة لهم
و اللي هيعترض علي المشاريع السياحية ممكن يتعمل فيها حاجة زي الأزهر بارك و تخصيص أماكن للصيد علشان الصيادين اللي فيها و أمكان للزراعة علشان و الله أعلم أرضها خصبة جدا يعني بدرجة رهيبة و هي شكلها فعلا مش مستغل صح
أكيد ناس كتير مش هتوصل هنا الحمد لله يعني أخد راحتي في الكتابة
بس بجد أحنا لو نزلنا قبل هوجه القرصاية و أهتمام الحكومة بها أو بمعني أخر إن الحكومة حطتها في دماغها و سألت أي واحد فيها كنت هتلاقيه مش طايق عيشته و حالته المادية و ظروفه الإجتماعية و الله أعلم كأغلب أهل الريف في بلدنا و الدليل علي كده أتجاه الناس من الريف للعمل بالقاهرة و تركهم للزراعة
أكيد في حلول كتيرة للمشكلة دي فعلا تخلينا نستفيد من الأرض و الموقع الرائع و الجمال اللي فيها و انعدم تماما من حياتنا و في نفس الوقت عدم تشريد أهالي القرصاية و الله أعلم
كفاية عليكم كده سياسة و حبه فور فن و الله أعلم هأقدر أكتب كل ده علي الكبيوتر اصلا و لا لا و الحمد لله قدرت و هانزله حالا
بعد الحفلة ضحكت علي الواد منذر و أخذته مشي حاولي خمسين كيلو و كان هأيعيط و جعان و الحمد لله ربنا وفقنا للوصول لمؤمن في المنيل و الرجل ضحك علينا بسندوتش غريب جديد كان حاجة اععع خالص و لولا إننا جعانين و محروقين من الفلوس اللي دفعناها كنا رمينا السندوتش
و بعد كده أتجهنا للبورصة شربنا كوباية الشاي الظريفة و روحت و سيبت منذر مع مجموعة أبناء مصر
أة نسيت حاجة مهمة جدا كمان معلش هو بيزعل لما بتكلم عليه في المدونة بس هو بجد حبيبي قوي و الله و ربنا يعلم بس بجد مش ممكن يعني اللي حصل كنا كل ما نسلم عليه انا و منذر نرجع نقابلة تاني و هو حبيبي مازن سلمنا عليه بتاع تسعين مرة و أخر مرة علي بعد خمسة كيلو من القرصاية كنت خايف لأحسن أروح البيت أفتح الباب الأقيه جوة
و لا ينقصني حلوة ينقصني دي غير إن أنا أبدي أسفي حلوة اسفي دي كمان علي عدم وجود حبيبي محمد مفيد معنا و ربنا يشفيه و يخفف عنه علشان ألم الأسنان جامد أو يمكن هو كان بيتلكك علشان ميجيش الحفلة دي زي الحج مصطفي الحسيني اللي حلق لنا حلقة جامدة قوي
و بعد كده روحت و عملت كوباية نسكافيه ظريفة طبعا مشربتهاش علشان
نمـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــت

السلام عليكم و رحمة الله و بركاته

أزيكم يا أصدقائي كل سنة و أنت طيبين

فكرة البوست العبقري ده جت علي بالي علشان أوضح لكم مدي كسلي و ضعفي ده بالنسبة للناس اللي علقت علي البوست اللي فات و كان نفسي أرد عليهم بس بجد مش لاقي حاجة أقولها

الأسئلة دي كانت في مدونة واحد مش فاكر مين بالظبط بس اللي فاكره إنها عجبتني قوي و كان نفسي أرد علي الأسئلة دي و أخطط و أعمل اللي فيها بس طبعا بسبب فشلي و ضعفي معملتش أي حاجة منها و لا حتي كنت قريت الأسئلة كلها غير و هي علي المدونة و لما أخدت منها نسخة مقريتهاش كلها غير دلوقتي النسخة دي كنت أخدتها بتاريخ 7/1/2007 والمرة دي أول مرة أقرها شفتم كسل و فشل أكتر من كده

الأسئلة أهيه يمكن حد منكم يستفاد منها

.

يا ترى ناوى تعمل ايه بخصوص دينك وعلاقتك مع ربنا؟ هل أنت قريب منه كفاية؟ايه اللى نفسك تعمله على المستوى الأسرى؟ هل أنت مزعل حد من قرايبك ونفسك تصالحه؟ مقصر فى حق فرد من أفراد عيلتك؟
ايه أهدافك على المستوى العملى سواء كانت فى دراستك أو شغلك؟
بالنسبة للعلاقة العاطفية؟ هل أنت راضى عن علاقتك بالنصف الأخر فى حياتك؟
يا ترى أنت مقصرفى حقه أو حقها؟ليك اهتمامات معينة أنت اهملتها ونفسك ترجعلها تانى؟
على المستوى الشخصى, ياترى أنت متصالح مع نفسك؟ راضى عن حياتك؟
أخر سؤال بقى علشان أنتم شكلكم جعتوا وهتأكلونى… ايه الأمنية أو الحلم اللى
فى بالك دلوقتى ونفسك تحققه فى السنة الجديدة سواء كان على المستوى
الشخصى أو الأسرى أو حتى العالمى؟

.

شكرا لكل اللي علق عندي المرة اللي فاتت مفيد و رفقةو ميرمايد وإنسانة و محمود و مازن و الباشمهندس و منذر بالرغم من إنه معلقش

.

نفسي يكون عندي أمل

No Hope

تعرفوا فكرت أغير عنوان المدونة و أسميها كده بس قلت بلاش سواد قوي كده حرام علي انتم بتتعذبوا بردوا مش عارف ليه هأقولكم علي حاجة مكنتش حابب أنكم تعرفوها عني أنا بشرب شيشة و سجاير نوع من أنواع الموت البطئ هو حرام إني أقول كده بس بجد انتم غاليين قوي علي و نفسي تعرفوا عني كل حاجة حاولت اخبي عنكم الحاجات السيئة دي بس مش عارف ضعفت المرة دي معلش يا مفيد مش هأقدر أقولك علي اللي نفسك فيه

.

الحمد لله عرفت من ميرمايد شكرا لها أنه لسه فرصتي في الحصول علي الجرين كارد ممكنة لأن السحب بيكون لسه في شهر سبتمبر أو أكتوبر اللي جاي قال يعني هأكسب بس أهوة

.

في فكرة في دماغي حاليا إني أسيب البيت و أعيش لوحدي هو هيكون صعب أو مش صعب مش هأعرف أكون نفسي لو عملت كده بس أهوة يمكن أرتاح بحاول و بافكر في الموضوع ده

.

في واحد كان جاب لي شغلة في السعودية مش شغلة يعني مقابلة لسه لما أتصلت عرفت إن الرجل مسافر و مش هألحق أقابله نحس بعيد عنكم بس عادي و لا تفرق

:)

.

بدأت اذاكر النهاردة يا مسهل يمكن

.

خايف قوي أعمل اي حاجة أرجع أندم عليها و أنا في الحالة دي ربنا يستر

.

بسم الله الرحمن الرحيم
أسباب كتيرة ورا كتابتي للبوست ده و في الحقيقة هم بوستين مش بوست واحد الموضوعين مش مرتبطين ببعض قوي بس موضوع هو اللي قسم ضهر البعير في الموضوع التاني
و كنا أصدقاء
البوست ده عن إنسانة غالية قوي في حياتي وقفت جنبي كتير و جه الوقت اللي لازم نفترق فيه عن بعض هي طبعا مش قصة حب هي قصة صداقة أولا أنا كنت مش مقتنع أنه ممكن يكون في صداقة علي النت و ثانيا مش مقتنع أنه ممكن يكون في صداقة بين ولد و بنت هي قدرت تفهمني الأتنين و تفهمني حاجات كتير قوي تانية
هي اللي طلبت إننا نفترق و طبعا انا وافقت علشان ده كان إتفاق بينا
مبدئيا أنا مش عاوزها تزعل مني علشان بكتب الكلام ده هو المفروض يكون بينا بس بما إني مش بقدر أمسك نفسي عن المدونة دي فكتبت الكلام ده بعد رسالتي الأخيرة لها و تفكيري إني أتصل بها بس قلت لا الإيميل هو الأخير و الأحسن و بعد كده حاولت أنام و اللحاف أهوة قدامي و قلت مش هأكتب البوست ده غير لما أهدي كده بس علشان يكون بوست يليق بها فجأة أفتكرت حاجات كتير اديت إني عملت شئ المفروض معملوش بس عملته و بعدين مسحت وشي و قمت شغلت الكمبيوتر و بكتب دلوقتي هي تقريبا لسه متعرفش إني فقدت جدتي لأنها كانت في مرحلة صعبة لكلامنا مع بعض بس مش مشكلة هو الواضح إن الفترة دي فترة فراق
عمري ما هأنسي خناقتنا في الأول مع بعض أنت مهتم بيا لا أنت مش مهتمة بصداقتنا
عمري ما هأنسي إنها هي اللي علمتني أسمع مروان خوري صوتك وشك عطرك
و لا هأنسي أغنية أصالة أكتر
و لا هأنسي وقوفها جنبي كتيييييييييييييييييييير
و لا هأنسي لما كانت عاوزة تتجنن و فاكراني أهبل و أخليها تكلم أختي
و لا هانسي حاجات كتير

و كفاية أنها هي اللي عرفتني التدوين يعني
و لا هأنسي إني كلمتها في حاجات مينفعش أكلمها فيها و هي اتكلمت معايا و نصحتني
بس اللي عمري فعلا ما هنساه لما كنا متخانقين جامد و مش بنكلم بعض لمدة شهر تقريبا و هي أتصلت بيا و أنا في السينما لوحدي بتفرج علي فيلم 300 و كنت مش طايق نفسي و انقذتني من علي حافة الإنهيار بمعني الكلمة ربنا يكرمها و يوفقها في حياتها
أنا بجد نفسي أكتب عنها أكتر من كده
و أكيد إن شاء الله بعد أما أهدي هأكتب عنها تاني
الموضوع التاني اللي فراقي عن صديقتي أشعله بداخلي هو
نفسي أبقي بني أدم يشرف
يارب نفسي أكون بني أدم يشرف انا عارف بابا و ماما و أخواتي مش فخورين بيا و لا بأي حاجة بعملها
و مفيش إنسان علي وجهه الأرض فخور بيا و فخور أنه يعرفني
أنا عارف إني مستاهلش بس بجد بحاول
مفيش حد من عيلتي فخور بيا ده لو حد واخد باله مني أصلا
الشئ اللي وجعني قوي النهاردة كمان إن محمد مفيد كاتب أسمي عنده نفسي يبقي فخور أنه يعرفني زي ما أنا فخور إني عرفته هو بيقول عني إن طيب أنا ممكن أكون طيب بس مش إيجابي لأي حد و لا أي حاجة مين يقول إن أنا عندي خمسة و عشرين سنة ده أنا أعيل من أعيل عيل
انا عارف يارب إن أنا كلب و لا أسوي بس حاولت كتير و فشلت في حاجات كتيرة قوي
و عارف أنك أنت يارب حتي مش فخور بيا و باللي بعمله بس مش عارف أنا ضعيف قوي يارب انت اللي خلقتني علي الضعف ده و أنت عارف أنا حاولت قد أية في حاجات كتيرة
نفسي في حياة تانية يارب
اللهم إن كانت الحياة خيرا لي فأحيني و إذا كان الموت خيرا لي فأقبض روحي إليك يارب
اللهم أجعل الموت راحة لي يارب

معلش نكدت عليكم

سلام