Wednesday, April 22, 2009

بوستات في بوست

السلام عليكم و رحمة الله و بركاته
عارف مكتر أنا في الكلام اليومين دول بس اللي مش عاجبه عنه ما عجبه و ميدخلش هنا تاني
المهم
حاولت من الساعة تمانية إلا ربع إني أنام علشان أصحي علي الساعة تلاتة الفجر علشان أكمل ترجمة قائمة المراجعة العالمية للتصنيع المعروفة ب دبليو سي إم شيك ليست اللي المفروض أقد منها جزء بكرة و ربنا يستر علشان شكلي مش هأقدمه علشان طبعا بعد أما أخلص البوست هأنام و مش هأصحي بدري و مش هأخلص الجزء اللي متحدد له الأسبوع ده
قلت أقوم أخرج الكلمتين المحشورين في نفسي يمكن أنام تخيلوا باحاول أنام ساعة
مش عارف أبدأ منين في خزعبلات كتير في دماغي
نبدأ بسم الله
.
الصبح قبل أما بانزل من الشغل بأشغل في المطبخ وأنا باعمل النسكافيه إذاعة القران الكريم بيكون فيها قران من ستة لستة و نص و بعد برنامج بريد الإسلام الحلقة الصباحية
المهم
النهاردة كان جزء صعب قوي من سورة الحج ربنا يرحمني و مكنش منه و يرحكمك و متكونوش منه
يقول الله تعالي
وَمِنَ النَّاسِ مَنْ يَعْبُدُ اللَّهَ عَلَى حَرْفٍ فَإِنْ أَصَابَهُ خَيْرٌ اطْمَأَنَّ بِهِ وَإِنْ أَصَابَتْهُ فِتْنَةٌ انْقَلَبَ عَلَى وَجْهِهِ خَسِرَ الدُّنْيَا وَالْآَخِرَةَ ذَلِكَ هُوَ الْخُسْرَانُ الْمُبِينُ (11)
ربنا يستر
خسر الدنيا و الأخرة ذلك هو الخسران المبين
بعد كده جه برنامج بريد الإسلام
السؤال عن المنتحر
كانت إجابة الشيخ واضحة و صريحة
مرتد و لا يصلي عليه و لا يدفن بمقابر المسلمين
قشطة يعني
واضح الكلام ماشي
و قفلت باب الشقة و نزلت علي باص الشغل
.
اللي بعد كده
لماذا لا نتعلم من الشيطان و لماذا نتبع أسلوب اللمبي و الكراسة الصفرا
لا عنوان جامد صح
الفكرة
في حوارات تدوينية و ثقاقية و سياسية كتير بتحصل اليومين دول
من العدد الثالث من مدونات مصرية للجيب مثلا بالإضافة لتوقيع دشليون كتاب و أخيرا حفل توزيع جوائز دار الكتب
يارب محدش من العيال المفترية اللي عاملة الموقع ده ميقروش التدوينة دي
خلاصة الموضوع إنهم مكسبوش حد جديد من سنة و لا أتنين تقريبا
يعني هنفرض عدد الناس كلها ألف هتلاقيهم هم هم اللي في كل حاجة يعني اللي عمل منهم كتاب يدعوا الناس يروح ناس تانية عاملة حاجة جديدة تروح دعاية نفس الناس اللي عزمتهم و الناس اللي الناس راحت لها في الأول تتضطر تساند الناس التانية ردا للجميل و هكذا
هلم جر
دي نقطة
النقطة التانية
كنت قاعد مع جماعة مثقفين يوم شم النسيم منهم الناصري و منهم الناصري التائب و منهم و الله اعلم الشيوعي أو المهلس يعني
المهم عمالين يتكلموا في التاريخ و بس و مين غلطان و مين صح و المهلس يقولك اليهود مؤثرين و العالم بيحترمهم علشان إنجازاتهم و المسلمين هم اللي فشلة كنت هأموت و أناقشه بس أبويا كان قاعد و طبعا مش عاوز أفهمه إني بأفهم يعني المهم كان نفسي أقوله خلاص نتهود كلنا بقة و الإسلام هو اللي غلط و هو اللي جايب لنا التخلف
يعني بروح أهلك يعني عملت أية للإسلام علشان تتكلم أنت طول عمرك بتشرب و بتتسرمح في الشوارع و أنت اللي بتقول كده
و يقولك تلاقي اللي بياخد رشوة ده ميرضيش ربنا يعني هو ربنا موافق علي الرشوة
خلاصة النقطتين دول
ليه منتعلمش من الشيطان ربنا يزيد النار اللي هيولع فيها و نروح للناس في الجوامع تلاقيه بيروح للناس في الجوامع يخليهم ينتشوا الركعتين و يخرجوا جري و تلاقيه أبعد ما يكون عن الخمارات و البارات لأن الناس اللي فيها شياطين أساسا
يعني تلاقي المثقفين قافلين علي نفسهم و هم هم في كل محفل حلوة محفل دي ليه مش بنكسب ناس جديدة
ليه بنتبع أسلوب اللمبي في المجاملة نصرف فلوس و نديها للناس و نرجع نلمها مع إننا لو كنا أستثمرنا الفلوس دي كان عائدها هيبقي أكبر
مش فاهم حد فاهم حاجة و لا لا
و غالبا محدش فاهم حاجة لأني أنا شخصيا مش فاهم حاجة
.
أية كمان ياسيدي
الإمتحانات بعد شهر و لسه مفتحتش حاجة و ربنا يستر
.
بمناسبة جلسة شم النسيم و المثقفين اللي فيها ربنا يستر علشان العلاقة شكلها هتتوطد قوي بيهم
و ربنا يستر
.
للأسف مش هأحضر حفلة تخرج ابن أختي من كي جي تو و اللي هيغني فيها و أااسفاه
.
تفتكروا هأقدر أصحي الساعة تلاتة أخلص ترجمة
معتقدش
:)))
:((((

8 comments:

روح said...

البوست الجاي قولنا صحيت الساعة كام
ههههههههههههههه
اية يعم دة دوختنا معاك
وخلاص الليلة ماتصاحبش حد وخلاص
واللي مش عاجبك فكره او
حاسس انة مش صادق مع نفسه ومذبذ
قفل عليه وادي لة الوش البستيك
مش ناقصين سلبيات مكتسبة
وخلي بالك من نفسك
اول تعليق اهو
تحياتي

انا ماما said...

1- ربنا ما يجعلنا ان شاء الله ممن يعبدون الله على حرف

2- مجموعات كتير هتلاقيها مش بتتجدد وخصوصا المجموعات الثقافية نظرالأولا حالةالجهل العام اللي فيها الناس ثانيا الظروف المعيشيه اللي اخدت كتير من تفكير الناس

3- بتدايق جدا من الناس اللي مفكرين نفسهم مُفكرين وان التاريخ والآراء اللي موجوده في الدنيا دي كلها غلط وهم بس وتفكيرهم هو اللي صح وان هم اتولدو في زمن غلط ولو كانو اتولدو في زمن غير ده كان زمانهم بتفكيرهم بقو حاجه تانيه
ناس تخنق والله

4- بقه وده الاهم انك تخلي بالك من المذاكرة مفيش حاجه هتنفعك دي امتحاااناااااات واه من الامتحانات
ربنا معاك ومعانا ومع كل اللي بيمتحنو ومتزعلش على حفلة التخرج ان شاء الله تلحق حفلة تخرجه من الجامعه
وربنا يستر وتعرف تصحا الساعه 3 :)

يا مراكبي said...

طيب من الآخر صحيت وخلصت والا لأ؟

No Fear said...

روح
السلام عليكم
مش بيهمني الترتيب بس مهم تعلقي أساسا
:)
صحيت الساعة 2 الصبح قلت خلاص أكمل لتلاتة زي ما أنا مظبط
هب صحيت الساعة ستة
:(
أنا مش هأصاحبهم مش علشان هم مش صادقين لا
علشان حاسس إن في حاجة فاصلة أية هي مش عارف و يمكن عارف و بأستهبل

No Fear said...

Pinky
السلام عليكم
1-أمين
2- مش فكرة تجديد و مش فكرة فزلكة منهم بس أنا متضايق إنهم قافلين علي نفسهم و منعزلين و مش بيكسبوا ناس جديدة يبقي التغيير مش هيحصل
بس هي دي الفكرة
3-ربنا يستر علشان فاضل شهر علي الأمتحانات
صحيت الصبح و مجهزتش الترجمة
:)

No Fear said...

يامراكبي
السلام عليكم
سعيد جدا إن حضرتك بتتابع المدونة بالرغم من فيض البوستات اللي أنا بأكتبه
:)
ترجع بالسلامة من ميلانو البلد إن شاء الله
صحيت الصبح و مخلصتش بس الحمد لله نفدت من موعد المناقشة علشان كان في تدريب عن إدارة الجودة الشاملة
:)

Lady E said...

مش عايز تعرف باباك انك بتفهم :)) ليه ؟؟

وعندك حق اللي بينتقدو الاسلام هما اول ناس مبيعملوش حاجه للاسلام

وبالنسبة لكلامك في الاول انك مش هتصحى فكده بتقول لعقلك الباطن انك فعلا مش هتصحى وده اللي حصل معاك لأن عقلك اتأثر بكلامك
معلش بقول كلام غريب :)

No Fear said...

Lady E
السلام عليكم
الجميل في الناس اللي بتتدخل لأول مرة بتفصص البوست
بالنسبة لموضوع بابا
ده موضوع يطول شرحه
بس ملخصه القلق بقة من الحاجات اللي أنت عارفاها
و بعدين هم واخدين عني فكرة مش عاوز أغيرها
:)
ياريتهم يقعدوا ساكتين بس
.
أنت شكلك بتتابعي دكتور إبراهيم الفقي و التنمية البشرية
صح
:)