Friday, August 24, 2007

السلام عليكم و رحمة الله و بركاته
مقدمة
مش عارف ليه بقيت أحب عالم التدوين قوي أنا أحيانا من أول أما بأنزل بوست بأبدا أفكر و أكون عاوز أكتب بوست جديد بس الحمد لله بأسيطر علي نفسي و مش باعمل كده علشان محدش منكم يجي له شلل و أقعد بذنبه المهم أكيد طبعا تفهموا إن عندي موضوعات كتير عاوز أتكلم فيها و ياريت تعتبروا كل موضوع حلقة لوحده مفيش ربط بينهم و مش عاوز حد يربط أوك
اللي بيحب النبي يزق
بصراحة حالة الفرح و التفاؤل اللي عندي هي لسه موجودة الحمد لله حاسس إنها قربت تروح مني فياريت تقفوا جنبي قوي اليومين دول علشان مش عاوز أرجع تاني ربنا يكرمكم ماشي
أنا و الكابتشينو
يوم الثلاثاء الماضي قعدت كده مع صحابي و شربنا حبه كابتشينو هو الموضوع ده ممكن يكون غلط إني أتكلم فيه بس ممكن يكون نصيحة بردوا للشباب اللي مش بيدخلوا عندي صحيح مش ملاحظين إن معظم اللي بيعلقوا عندي بنات ما عدا أتنين و لا تلاتة
المهم الكابتشينو بقة مش بيعمل أي حاجة خالص من اللي الناس بتقول عليها بصراحة الواد صاحبي اللي قالي عليه بعضه حصل
المهم مفيش إحساس و لا بسعادةو لا ضحك و لا أي حاجة
أنت بتحس أنه فيه هلبين كل عين فيها هلب الهلب ده مربوط فيه بتاع تلاتة طن بيشدوا عينيك لتحت و طبعا عاوز تنام
بالنسبة للدماغ هي حاجة من حاجتين أولا تحس أن دماغك زي البلية محطوطة في حلة و واحد عمال يهز في الحلة ده نص كلام صاحبي أنا حسيت بالأولي التانية لا انا من سعتها حاسس إن دماغي تقيلة قوي بتتشد لورا
الخلاصة أنا جربت الموضوع ده علي أساس التجربة في حد ذاتها هو غلط بس اهوة
نصيحة بقة لأي حد بلاش تجربوا الموضوع ده مالهوش فايدة ده أنت حتي بتكون خايف تتقفش من البوليس و لا من عايلتك لما تروح أية إحساسك
و أية إحساسك بقة لو قضاء ربنا جالك و أنت في الموضع ده أية الفايدة مفيش
بجد عبيط اللي بيعمل كده
انا إن شاء الله مش هأعمل كده تاني علشان محدش ينصحني و يديني درس في الأخلاق ماشي يا روني
في موقف كوميدي بقة حصل انا لما بأروح من عند صاحبي ده باعدي علي كمين الواد قالي أية لما تعدي من الكمين رن علي علشان أطمن عليك قال يعني لو أتقفشت هو هيكون فايق لي أصلا علي العموم فيه الخير
حاولت أركب ميكروباص لاقيت مفيش غيري قلت خلاص أنزل و أخد تاكسي أخدت تاكسي و عديت من الكمين الأول مش أتنيل علي عيني و أصبر لما أروح و أرن عليه لا رنيت علي طول يا دوب مائة متر تانية لاقيت كمين قلت بس هو ده اللي هأتقفش فيه و لولا خفت يحسوا إن شارب و سكران ولا حاجة كنت مت من الضحك علي نفسي مادام أنت جبان كده بتعمل كده ليه و بعدين تخاف من الناس و متخفش من ربنا حتي أتكسف علي دمك المهم الحمد لله الليلة عدت علي خير
و دي كانت حكايتي مع الكابتشينو
أنا و الجامعة
نمت و صحيت تاني يوم فجأة كده محسيتش بالوقت من الصداع و الدوخان اللي كنت فيه رحت قدمت في الكلية علي التمهيدي الحمد لله و يارب أقبل فيه علشان أنا خايف لأحسن مقبلش ربنا يستر علشان لو مقبلتيش بس أنا أدعو الخير من ربنا
و طبعا لما رحت الجامعة حسيت بإكتئاب و أفتكرت أيام الجامعة و الشقاء العلمي و العاطفي و الخلقي و كل حاجة
بس بردوا الحمد لله
علي فكرة عيد ميلادها بكرة
و بردوا الحمد لله
أنا في الشغل
كنت في دورة تدريبية زي ما قلتلكم المدير بتاعي خانقني عاوز مني تقرير عن الدورة دي و هو كل أما يشوف ورق الدورة ده وأنا مدية لواحد عندنا في الشغل متخصص في المجال بتاع الدورة يفتكر التقرير و يسالني عليه أنا طلعت ناصح رحت جبت الورق من عند الرجل ده فهو كده مش هيفتكر التقرير
عندنا بنتين بيتدربوا حاولت أشرح لهم أي حاجة نوع من أنواع التعارف عليهم لاقيت نفسي فاشل شوية بس كويس إنه جت الشجاعة إني أتكلم معهم أصلا بس بيخنقوني بيقوليلي يا أستاذ محمد أستاذ مين
في الشغل كمان واحد عندنا اللي بيوزع المكافأة السنوية أنا مكنتش موجود و هو بيقسم علي الناس المهم انا هأقبض متخافوش بس اللي يضايق أنه في ناس كتير حقها مهضوم أنا منهم بس أنا مش متأكد يعني و الغريب أنه في ناس من بره واخدة من فلوس المكافأة بتاعتنا أنا مش فارقة معايا كتير بس اللي يخنق في ناس كبيرة حقها مهضوم و ربكم و الحق الظلم و قلة التقدير شئ بشع قوي للناس اللي عندها دم
مش عارف أنا بقيت اكتب كتير ليه فبأضطر أقلل في حول العالم بس مش مشكلة ربنا يقويكم
حول العالم
نقول ألف مبروووووووووووووووك لرنا علي خطوبتها أنا كنت عارف من زمان الحقيقة بس محبيتش أقول غير لما هي تقول
و كمان مرة مبروك و متزعليش مني و الله بجرب بس
الأهلي نادي المبادئ بيشغل ناس بيضحكوا عليه أسألو شريف أشرف
الأهلي نيههههههههههههههههههه أتبهدل في السودان بالرغم من إني فرحان قوي إن الأهلي أتغلب علشان ده من الحاجات اللي بنخليني متفائل و بتفكرني بأيام حلوة كانت و هترجع تاني إن شاء الله بس بجد الواحد زعل قوي كل الحقد و الغل ده عند الإخوة السودانيين مننا ليه طيب يعني قلنا شمال أفريقيا و كمان السودان
هي مصر بقيت ملطشة كده للكل
حسبنا الله و نعم الوكيل
و بما إن مصر ملطشة مش صعب يعني نسمع خبر تعذيب مصريين في الكويت أنا معرفش التفاصيل بس أرجع و أقول لو الناس دي عملت حاجة تتعاقب قانونيا حتي لو إعدام بس مش تتعذب و بردوا أرجع و أقول ما هو ده بيحصل عندنا مننا فينا مش حرام يحصل من الغرب سبحان الله قريبة قوي من العرب
أخيرا
الجو حر قويييييييييييييييييييييييييييييييييييييييييي
و تصبحوا علي خير


26 comments:

صاحب البوابــة said...

اعجبني سردك لخواطرك

بالمناسبة

احترمتك للغاية

في تلك الجملة

( و بعدين تخاف من الناس و متخفش من ربنا حتي أتكسف علي دمك )

تحياتي لك عزيز

catroz said...

اييييييييييييوه
هو الجر حر اوووووىى
و تصبح على خير

عجبتنى اوى خواطرك
الاول انا تنحت على موضوع الكابتشينو
كنت ناويه مجيش هنا تانى
:D
بس لقيتك بتتكلم بطريقه عجبتنى اوى
فعلا افرض ربنا قبض روحك بالمنظر ده
فعلا عبيط اللى يعمل كده
طبعا ده بيشمل الكابتشينوو و الشجاير و العك دل كله
معرفش بيعجب الشباب فى ايه

يارب تقبل يا عم فى التمهيدى
و خليها على الله
ربنا يكرمك يارب

و كل بوست جميل و انت طيب
:D

loumi said...

اول مرة
اجي هنا يا استاذ محمد
:):)
اسلوبك جميل ويشد
انا فى الاول كنت فاكراه كابتشينو بجد
معلش
في ناس بتحب تجرب عشان تتأكد وده مش وحش
بس المهم انها تكون عارفه نتيجه اللى بتعمله
وواضح تماماً إنك عارف
تحياتي

mariam said...

لأ لأ بلاش ترجع لمود الزهق تانى
احنا ما صدقنا

على فكره انا اول مره اسمع الكلام ده عن الكابتشينو
اول مره اعرف كده
انا و صحابى بنشربه كتير و بنعتبره نوع من القهوة مش اكتر
لكن تعالى هنا بقى مالهم البنات؟

الف الف مبروك لرونى

التعذيب بره و جوه
خلاص بقينا ملطشه

بالتوفيق فى الدوره التدريبيه

تحياتى

No Fear said...

السلام عليكم
صاحب البوابة
أنا سعيد بزيارتك دي
ربنا يخليك إحترام أية بس هو ده اللي المفروض يكون طبيعي
ياريت تشرفني كتيييييييير

No Fear said...

Catroz
السلام عليكم
أنا أسف إني خضيتك
أياكي تفكري أنك متجيش هنا تاني
أزعل منك
شفتي كلام منطقي جدااااا
ربنا يسمع منك
ربنا يكرمنا جميعا إن شاء الله

No Fear said...

Loumi
السلام عليكم
أنت تنوري في اي وقت بس ياريت بلاش أستاذ دي باحس إني عندي تسعين سنة
أسلوب جميل و يشد أكيييد في مدونة تانية و أنت مش واخدة بالك
:)
أنا عارف نتايج حاجات كتير غلط بس للأسف بعملها
يارب يهدينا جميعا

No Fear said...

السلام عليكم
مانو
أنا حاسس أنك كنتي مثلا صاحية من النوم أو مش مركزة في البوست ده أقريه تاني و مستني منك تعليق
لو محسيتيش بفرق هأبقي أشرح لك البوست تاني
:))

Malk Almasria said...

رمضان كريم



ملك المصرية

mariam said...

المهم الكابتشينو بقة مش بيعمل أي حاجة خالص من اللي الناس بتقول عليها بصراحة الواد صاحبي اللي قالي عليه بعضه حصل
المهم مفيش إحساس و لا بسعادةو لا ضحك و لا أي حاجة


انا قريت الببوست فى كامل قواى العقليه
االجزء ده انا فاهماه غلط؟
هو الكابتشينو بيعمل حاجه؟

البنت الشلبية said...

ازيك عامل ايه
هوا الكابتشينو ده الى احنا عارفينه الى بيتشرب فى الماج؟
هههههههه اوعى ترجع لحالة الزهق
فكها ونعنش كده
والجو طبعا طبعا حر لكن اهم شهرين والجو يتعدل ونروح لاحلى فصل بحبه فى السنة فصل الخريف المنعش
خد بالك من نفسك
سلام

saso said...

!!!
ما علينا من الجزء اللي مش عاجبني
اللي هوه بتسال عنه مانو .. ايوه تمام هو ده

حالة التفاؤل امسك فيها علي قد ماتقدر

ليه كمية الغل دي مع الاهلي.. دي مش حرب يا محمد
:D
المفروض تكونوا اتعودتم

ممممممممم.. معظم اللي بيعلقوا عندك بنات.. قعدت اعدهم دلوقت
هو انا مبركزش بس اعتقد ان عندي نفس الكلام اغلب المعلقين مش بنات !! بس فين المشكلة ده تدوين مفيهوش انواع الحمد لله
:)
بس ممكن تكون الكتابات الشخصية بتوصل للبنات اكتر

سيبك احتفظ بجد بحاله التفاؤل .. ارجوك
هممم .. سلمتلي علي البنت ولا لسه
:P

No Fear said...

ملك المصرية
السلام عليكم
اولا حمد لله علي السلامة منورة المدونة
كل سنة و أنت بألف صحة و سعادة و خير إن شاء الله

No Fear said...

مانو
السلام عليكم
أقولك أية بس الكابتشينو ده
عارفة فيلم كراكون في الشارع أنا شربت مش عارف أية يا سعاد
بلاش إحرج أكتر من كده
لو مفهمتيش مفيش قدامي غير إني أبعتلك إيميل
سلام

No Fear said...

البنت الشلبية
السلام عليكم
أزيك أخبارك أية منورة
إن شاء الله مش هأرجع لحالة الزهق أو مش ناوي بس كله بأيد ربنا
و ربنا يسترها معايا

No Fear said...

ساسو
السلام عليكم
سيبك من الجزء اللي أنت مش راضية عنه
إن شاء الله مش ناوي أرجع لحالة الزهق بس قولي يارب
مش غل أنا مش باحب أي حد يسيطر علي حاجة علي طول مش بحب القوي المفتري بصراحة و أنا بصراحة أشهد للأهلي أنه قوي بس بيفتري
أنا سعيييييييييييييد أن معظمهم بنات مش هتفزلك عليكي يعني
البنت من ساعتها مش باشوفها أونلاين قوليلي ممكن أشوفها أونلاين أمتي علشان أسلملك عليها
:)

حــكــايــة said...

و عليكم السلام و رحمة الله و بركاته
جاية انا متأخرة , معلش
بس عالم التدوين هو كمان بيحبك يا محمد :)

و اكتب براحتك و متخافش , لو اتخنقنا هنتهمك بأى حاجة نبلغ بيها عنك و نخلص الموضوع بسرعة :p

تصدق انا كمان مكنتش مستوعبة موضوع الكابتشينو دا , و عمالة اقول هى قدرات الكابتشينو جامدة كدا , اومال مش بيعمل معايا كدا ليه
لحد ما فهمت بئا الحمد لله

المهم ربنا يبعدك عن اى حاجة وحشة

و الف مبروك لرنا . ربنا يتم ليها بخير

الأهلى بئا , زعلتنى يا راجل بالفرحة اللى فيه دى
طب داحتى انا مع انى اهلاوية اهه بس مش بافرح فى الزمالك كدا

و مصر ملطشة من زمااان , احنا اللى اتسببنا فى كدا بنفسنا , منه لله بئا اللى كان السبب

لسة الجو حر لحد دلوقتى , عادى جدا

رفقة عمر said...

اخبارك ايه
ربنا يديم عليك نعمه الرضا والسعادة يارب واخبار لشغل ايه والمقابله يارب يكون خير
بس سؤال هو الكابتشينو دة حاجه غلط يعنى ولا ايه
ياريت توضيح اكتر
ربنا يكرمك يارب وييسر لك امورك وربنا يسهل فى موضوع الدراسه وتقبل الاوراق ان شاء الله
ويرزقك الله بالزوجه الصالحه

No Fear said...

حكاية
السلام عليكم
أزيك أخبارك أية؟
منورة
و الله كنت زعلان أنك معلقتيش
المهم
عالم التدوين بيحبيني
بتحرجيني بذوقك و الله
بس علي أية
:)
تصدقي الموضوع سهل جدا فعلا هم دول الأصدقاء
انا زعلت أنك فهمتي
أنا كنت بفكر أشيل البوست ده بس لن و لم و لا
علشان خايف اي حد يزعل مني بس ربنا يعلم نيتي أية بالبوست ده
الحمد لله
ربنا يبعد عننا كلنا الشر
أنا بأكرهه الأهلي هو كده و خلاص
ملطشة ماشي بس مش السودان كمان
خير إن شاء الله
الجو مش حر
لا ده موووووووووووت
بس بردوا الحمد لله
كل سنة و أنت طيبة
و ياريت متبقيش تغيبي عننا كده
سلام

No Fear said...

رفقة العمر
السلام عليكم
كنت خايف جدا و شبه كنت متأكد أنك دخلتي و قريتي الموضوع و فهمتي و قلتي مش هتتدخلي متسألنيش ليه حسيت كده معرفش عندي تاني بس الحمد لله اتضح أنك مكنتيش لسه دخلتي
يعني الكابتشينو ده أختصار لشئ سئ مش الكابتشينو العادي
ربنا يكرمنا و يوفقنا جميعا
أدعي لي بس بقلب ربنا يكرمك
كل سنة و أنت طيبة
سلام

Anonymous said...

أنا مش هقول كلام انت متعرفهوش ولا حاجة بالعكس كلنا عارفينه ان الكابتشينو اللى انت قصدك عليه ده حرام وغيره بس انا قلت اقول كلمة عسى الله ان يجازينى عليها
قال النبي صلى الله عليه وسلم : ((كل خمر - وفي رواية: كل مسكر - حرام)) رواه مسلم
انت اه بتقول عاملها على سبيل الفضول وغيره بس الحمد لله ربنا ستر المره دى نصيحة منى معتش تقررها تانى لا فضول ولا غيره كفاية انك تعرف انها حرام حتى علشان صحتك لان اكيد للحاجات دى تاثيرات على البشر وضارة جدا

loumi said...

العزيز محمد
انا مكسوفه منك بجد
بس انا انشغلت اليومين اللى فتوا
كويس ان انت لقيت الاغنيه
دي طفله فلسطينيه
اكرر اسفي
تحياتي

No Fear said...

Hend
كلام كله صح
و إن شاء الله مش هأجربه تاني بجد
الحمد لله علي إن الموضوع عدي بسلام
انا عارف إن نفسي ضعيفة للأسف بس بردوا الحمد لله حاسس إن بدات أتغير للأحسن اليومين دول
كل سنة و أنت طيبة
أدعي لي

No Fear said...

Loumi
السلام عليكم
و لا يهمك زي ما قلتلك أنا عرفت أجيب الأغنية الحمد لله و خنقتهم منها هنا مشغلها علي طول
كل سنة و أنت طيبة

رفقة عمر said...

شوف انا طبعا مش فهمت تقصد ايه من الكابتشينو بس بعد التعليق فهمت
انا مش عارفه ااقولك ايه انا مش زعلانه منك انا زعلانه علشانك
علشان انت احسن من كدة بكتييييييير قوى
الشيطان يقول
حيرنى امر بنى ادم مازات اغلبهم بالذنوب ومازالوا يغلبونى بالاستغفار

No Fear said...

رفقة العمر
السلام عليكم
انا نفسي متزعليش مني و محدش يزعل مني خالص
ياريت صورتي متتغيرش في نظرك
أنا مش كويس قوي يعني
بس الحمد لله علي كل شئ
أستغفر الله العظيم