Wednesday, August 08, 2007

السلام عليكم و رحمه الله و بركاته
أزيكم يا شباب
أنا أسف لكم جميعا علي إن معظم أو تقريبا كل البوستات اللي بعملها كئيبة بس بجد كل ده بأحس به و بأرتاح شوية لما بأكتبه و حد يرد علي أو بنسي و أفكر في الرد
مش عارف من فترة طويلة حاسس إنه خلاص الفرحة الكبيرة جاية عارفين أنتم مش عارف بيقولوا العقدة أو ذروة العقدة الدرامية في الأفلام حاسس إني وصلت عندها و خلاص علي بعد خطوة من لحظة التحول للسعادة الطاغية و فرج ربنا قريييييييييب جدا
بس اللي مخوفني إني حاسس بكده من زمان حاسس إني ممكن أفتح باب أروح مكان انام و أصحي ألأقي الدنيا أو حياتي أتغيرت بس للأسف مفيش حاجة عاوزة تيجي لو في حد عنده تفسير ياريت يقول
إحساس و خلاص و لا ممكن يحصل
قولوا يارب
حول العالم
هنري ميشيل
رود كرول
الزمالك
للأسف مش عارف أتكلم
.
مبروك السوبر للأهلي من دلوقتي
.
أنا رايح دورة تدريبية من يوم السبت للأربعاء
.
الشرطة و حكايتها الكتير
.
قاعد لوحدي النهاردة و بكرة و ممكن بعده
وضبطت الأوضة بتاعتي و عامل أحلي جو و معايا النسكافيه التمام و الملفات المختفية للأسف
.
للأسف مفيش سهرات جميلة عارفها
.
نفسي أخرج يا جدعان خروجة جديدة
.
قالو يا ما إن القمر عالي و بعيد و الملايكة مستحيل تلمسها أيد
و أنا الليلة دي كله ده في أيديا يمكن في الدنيا دي أكون أنا الوحيد
.
الموبيل بتاعي الأستريك بتاعه للأسف من البنطلون الجينز بدأ يخرب ربنا يستر علشان معيطش
.
فتاة العرب المثالية زي القمر الحقيقة ربنا يرزقنا بس تكون دماغها حلوة
:D
من كم يوم كنت في الشغل و شغلت أغنية لكاظم الساهر علي الموبيل بتقول أية
عيناها بيتي و سريري و وسادة رأسي أضلعها تمحو كل هموم حياتي لو مس جبيني أصبعها
سألت واحد معايا هو في كده بصرف النظر عن أنه كان بيغني لبغداد الجريحة
قالي لا مفيش كده كاظم ده كداب يا زميل
و بعدين قالي حاجة غريبة قالي حتي لو موجود هيروح بعد الجواز
ليه بيروح بعد الجواز ده موضوع كبير جدا عارف
بس مبدئيا مش هأشغل نفسي به علشان هو مش موجود قبل الجواز عندي أصلا
.
تصبحوا علي خير
.
أرجو من كل من ضافني عنده يشيل البلوك اللي حاطه علي علشان ساعات كتير بأكون عاوز أتكلم مع حد و مش بلاقي ماشي علشان منزعلش مع بعضينا
.
حصلت حاجة غريبة قوي بتحصلي كتير
و أنا بأراجع البوست ده قبل أما أنشره حسيت إني كتبته قبل كده
أية اللحظة قربت قوي كده
في حد علق عندي و أنا بأحدث في البوست

21 comments:

smraa alnil said...

ههههههههههههههههه

يا ابني انت اصلا مش في حاجة جديدة
( وش بيطلع لسانه)

المهم خليك كدة بقي علي طول حاطط في دماغك ان الحاجة الحلوة جاية

عشان هو دة اللي هيخليك متفاشل
ولو اتاخرت في تحقيقها
قول ان انت اللي بعدت مش هي

طبعا يا ابني الاهلي جامد

عامة انا مش ضفتك اصلا

وبعدين ايه الكلمة اللي انت عايز تقولهالي
وكتبتها في بوستك اللي فات

قول بدل ما الغي الجزر

No Fear said...

السلام عليكم
سمرا
أتضح أنك أنت اللي بتعلقي و أنا بأحدث في البوست منورة و الله
أنا بعدت جداااااا شكلي
أنا عارف الأهلي جامد بس بالظلم
أنا عارف أنك مضفتنيش بس قلتي لو عاوزك تضيفيني أقول جزر و قلت جزررررررررر
الكلمة بلاش و متلغيش الجزر

حــكــايــة said...

طب ربنا يسهل و الفرحة تجيلك باذن الله و تطول معاك اوى متعتقكش
ربنا يجعل كل ايامك حلوة

بالنسبة بئا لقبل و بعد الجواز
مش علاطول بيكون مفيش بعده
اعتقد انه على حسب الشخصيات
و على حسب الحب و استعداد الطرفين او اى واحد منهم انه يدى للى معاه
مش فلوس لا :p
مشاعر بئا و اهتمام و كدا , الحاجات اللى بتخلى الحب يفضل موجود

بالنسبة بئا لأنك بتحس انك كتبت البوست قبل كدا
فدا يا سيدى يرجع لأن فص فى المخ وصلته المعلومة قبل التانى
دى النظرية بتاعة لما تحس انك شفت موقف بيحصل ادامك حالا قبل كدا بتفاصيله بالظبط

اعتقد ان الحاجتين زى بعض

المهم يعنى , هو كويس و خلاص

ربنا يكرمك يعنى
هامشى انا بئا قبل ما اقول كلام عجيب تانى

catroz said...

اول مره ادخل هنا
و مش اخر مره ادخل هنا
البوست سكر اوى
شويه فضفضه
على فكره انا بموت فى اغنيه كاظم دى
و هتلاقى واحده كده فعلا لو دورت صح
زميلك ده تقريبا مش فاهم الموضوع صوح
:D
سيبك منه
المهم عيش حياتك
و كلنا بنحس اننا بنكتب بوستات شبه بعضها
ليه يعنى
اصل الايد اللى بتكتب واحده
يلا
سلامااات
:D

Anonymous said...

اه الزمالك والدورى المصرى مأثرين عليك اوى خيرها فى غيرها من ده كتير
بس ربنا يهديك وتطلع من مود الكابة ده

البنت الشلبية said...

سلام عليكم

بص انا مش هتكلم على موضوع الزمالك عشان مخنوقة منه بجد

وبالنسبة لمود الكآبة
عادى كلنا فيه
سلام

حــكــايــة said...

آدى حال كل الزملكاوية
تلاقيهم يا عينى دمهم محروق كدا علاطول
انتو لو تركزوا شوية بس هتعرفوا مصلحتكم فين :p

ولا انا مالى , مش ناقصة الواحد يتشتم من الجماهير الغاضبة

ربنا يكرم الزمالك و يفرح قلبكم كدا يا رب

No Fear said...

السلام عليكم
حكاية
ربنا يسمع منك
و الله معرفش علشان مجربتيش بس اتمني أنه يكون في علشان الحياة متبقاش بؤس زي قبل الجواز كده بس هي فين بنت الناس الطيبة اللي تخصني يارب تقرب بقة

من المرات القليلة اللي أستفاد علميا من عالم البلوج
بس واثقة في الكلام بتاع المخ ده علشان هأبقي أتفزلك به علي صحابي :)
ربنا يكرمنا كلنا يارب و يفرحنا في الدنيا و يفرحنا بطاعته و يفرحنا بالجنة

أنا زعلان منك علشان مشيتي قبل أما تقولي كلام عجيب

No Fear said...

السلام عليكم
catroz
بالرغم من إني مش فاهم معني الأسم بس يارب متكنش أخر مرة
و بلاش موضوع السكر ده علشان النمل
و الله يارب علشان متحسبش كدبة علي كاظم الساهر
هو جرب ربنا موفقوش حظه
يارب حظي يكون أحسن
كمان نظرية في نظرية علمية عند تعليق حكاية أقريها
سلامااات

No Fear said...

السلام عليكم
هند
يعني أنت بتعلقي عندي قليل و كمان بتتريقي
الله يسامحك
بس الزمالك راجع أمتي الله أعلم بس راجع
نورتي أنا بهرج علي فكرة
يارب يهدينا و يسعدنا كلنا يارب
سلام

No Fear said...

السلام عليكم
البنت الجميلة الشلبية
مبدئيا أسف
ثانيا
هنعمل أية بس حظنا كده ربنا يكرم الزمالك علشان الألسنة تتخرس
ليه مود الكأبة ده منتشر الله أعلم يمكن بقة فيروس في الجو
ده لو فيروس مش هينتشر كده
الحمد لله علي كل شي
في حاجة حلوة الحمد لله حصلت لي عارفاها بس مكملتيش :)
ربنا يفرحنا كلنا و يخرجنا من أم مود الكأبة ده
سلام

No Fear said...

السلام عليكم
حكاية
ماشي هنشوف قريب

mariam said...

ازيك يا محمد
سيبك من الكآبه
دى حاله عامه بجد

مش هتكلم فى موضوع الزمالك
و مبروك مبدئيا للأهلى

على فكره اغنية الليله دى جامده جدا
انا بحبها اوى

ربنا يرزقك البنت اللى انت عايزها

سلام

حــكــايــة said...

no fear

بالنسبة يا سيدى لموضوع فصوص المخ دا
فأنا كنت عرفته من أخويا الكبير
هو ما شاء الله دماغه حلوة و بيقرا كتير , مثقف يعنى
استغفر الله بئا
ربنا يهديه :D

لا بجد , انا باثق فى اللى هو بيقوله , اعتقد يعنى انه مصدر موثوق منه و الله اعلم

baby me said...

alsalamo 3lykom ezyk ya no fear ana 3rfa eny m2sra w b2aly ftra msh b3ml comments
ana kman dymn mstnya 7ga 7lwa t7sl m3a eny moktn3a en da ghlat w byt3b awy w bd2t a3wd nfsy en a7awl eny aesh enhrda mfkrsh fe elly fat velly mmkn yt3bny aw elly gai elly nfsy ykon a7sn 3shan tol ma elwa7d mstny 7ga t7sl hwa msh hy3ml 7ga w hyfdl mstny w mmkn my7slsh 7ag w ydy3 3omro mstny
mthy2ly el7gat el7lwa hya elly bt7slmn gher mnstnaha
kman elentzar s3b awy w byzh2

ana lsa brdo kda zyk bs adeny b7awl

www.naute.com/thinkery/way.php

e2ra elklam elly fe elpage d
bytklm enk lazm t3esh yomak w mtstnash 7ga t7sl tghyr 7yatk 3shan mdy3sh 3mrk wnta mstny

w yarab ywf2k w tla2y kolk 7ga nfsk feha

No Fear said...

السلام عليكم
حكاية
ربنا يهديه صحيح
متسكتوش عليه علشان مترجعوش تندموا
شكرا علي توضيحك

No Fear said...

السلام عليكم
Just born
بالرغم من إني زعلان منك شوية بس منورة البلوج
أنا عارف كل اللي قلتيه و متأكد من اللي قلتيه كمان صح
بس بجد مش قادر أنفذه مش عارف ليه يمكن من ضعفي
مش عارف
أنا لسه مشتفتيش الموقع اللي قلتي عليه بس مش عارف لما أشوفه هأقدر أعمل اللي فيه و لا لا
ربنا يهدينا و يكرمنا و يرشدنا للصواب و يعينا عليه
ياريت متبقيش تتأخري كتير كده تاني
سلام

smraa alnil said...

اه انا جاية بس

عشان اعازيك في الزمالك
بقي دة فريق يا راجل تشجعه

اهلىىىىىىىىى
اهلىىىىىىىى

اوه اوه

جيت اطمن عليك واعرف اخبارك من جوة

علي فكرة
حبيت اطبق جزر دي

لقيتك علي جوجل

طب ايه يا مان
ايه نظام الهوت ولا الياهو

No Fear said...

السلام عليكم
أنت زعلتيني مرتين في التعليق ده مرة علشان الزمالك و مرة علشان أنا كتبت الإيميل في بوست فات قبل كده أنت مش بتقري و لا أية
:)
newmido26@hotmail.com

saso said...

:)
علي الاقل في حاجة ثابتة
بطولة فيها الاغلي يبقي هياخدها
بقيت بارتاح للعبه دي

مستنية معاك الدنيا الجديدة يارب يديهالك قريب

الدور التدريبية خلصت .. كانت كويسة ولا لا الاول

صاحبك متشائم.. متركزش جايز اللي جاي يبقي احلي من الاغاني

No Fear said...

السلام عليكم
ساسو
يعني خلاص مفيش غير ده اللي يثبت علي العموم الحمد لله
أنتهي زمن يبقي ياخده هنشوف من الموسم الجديد
لا حضرتك لسه الدورة بدأت أمبارح
بلاش أقولك علي اللي فيها كتبته في أخر بوست
المهم أنت أخبارك أية؟
مش فل إن شاء الله
تخيلي رمضان قرب قوي
و كل مرة أفتكر البوست بتاعك