Saturday, August 04, 2007

السلام عليكم
أزيكم يا أصدقائي
من كم يوم كده نفسي أعمل بوست جديد بس مش عارف ليه الأفكار بتروح مني نفسي أعيشكم معايا و أعيش معاكم يعني مثلا أمبارح قلت لبعض الناس عن فيلم الراقص مع الذئاب علشان احس إن في حد مشاركني حاجة بعملها
الحقيقة في الأول كنت بعمل الموضوع ده مع روني علي فكرة روني دي حاسسيتني إنه ممكن يكون فعلا في صداقة في الحياة مشكلتها معايا أنها بنت مش باقدر أخد راحتي معها بردوا لازم أكون مؤدب يعني علشان هي أكيد هتسألني أقصد أية
و بعدين أنتم يا أصدقائي المدونين نفسي أشاركم معايا في كل حاجة في حياتي
ممكن يكون ده غلط علشان أحنا بنرسم للناس اللي بنتكلم معهم علي النت صورة خيالية أقرب للملائكة بس اهوة متنفس يعني مش معقول يبقي واقع مؤلم و نت مؤلم كمان
مشكلة النت أنه مفيهوش أحاسيس جامد حتي مفيهوش صوت ساعات كتير بيجي في دماغي إني أكتب رقم الموبيل بتاعي علشان حد يكلمني منكم بس الحمد لله مبيحصلش
يوم الأربعاء قبل اللي فات اللي فات تقريبا كان في مقالة في الأهرام الفكر الديني وصايا الأمام أبو حنيفة للشباب ملخص الكلام أنه بينصح الشباب بالعلم أولا و بعد كده المال و بعد كده الزواج و مينفعش حاجة قبل حاجة و لا حاجة مع حاجة
بصراحة الكلام ده يريحني قوي نظريا بس المشكلة في عمليا أنا نفسي أستقل في حياتي و أرتبط جدا نفسي أحب بجد و في نفس الوقت أكمل دراسة و لسه لم أبني نفسي ماديا يعني عكس كل اللي الإمام أبو حنيفة قاله خالص
مش عارف مشكلتي إني في حاجات مقتنع بها بس مش بأقدر أنفذها يعني مثلا مقتنع تمام أنه غلط ندور علي الحب بس بأدور
مقتنع إن الموضوع ده نصيب بس بردوا بأفكر في ناس كتير
مش عارف أعمل أية زهقتكم أنا بالموضوع ده عارف بس هي دي مشكلتي
عارفين الواحد بيمشي في الشارع يشوف بنات قمرات بس المشكلة نفسي واحد أحبها يعني من غير قلة أدب الواحد ممكن يجيب واحدة بفلوس علشان يعمل حاجة غلط بس مش هتكون السعادة اللي بأدور عليها مش عارف أنتم فاهمين قصدي و لا لا
نفسي في بيت دافئ أرجع أنام تحت رجليها و أكل و أشرب معها و نتفرج علي التلفزيون مع بعض و نتخانق نتفرج علي الماتش و لا علي الفيلم
مش عارف ممكن الحلم ده يحصل ولا لا
مش مشكلة المهم إني بأحلم
في موضوع كمان الحمد لله بعيد عن أفكاري تماما بس بما إن في حاجات كتير مكنتش متخيل نفسي ممكن أعملها و عملتها مش بعيد اعمل الموضوع ده بس يارب إلا ده
موضوع الإنتحار للأسف في موضوع البنتين و أبوهم اللي انتحروا بسبب الفقر
هو طبعا بلا شك انه غلط و حرام
و مدام حرام يبقي أكيد في منعه الخير و المصلحة
بس في حاجة أفتقدنا للأمان في حياتنا مشكلة صعبة جدا هتخلق فوضي كبيرة جدا
قال رسول الله صلي الله عليه وسلم
"من أصبح آمناً في سربه، معافىً في بدنه، عنده قوت يومه.. فكأنما حيزت له الدنيا بحذافيرها" (رواه الترمذي).
أول حاجة أمنا في سربه
ربنا يستر
مش عارف يارب موصلش للمرحلة دي و لا أي حد
بس يارب لو كانت الحياة خيرا لي فأحيني و لو كانت الوفاة خيرا لي فتوفني
و يارب أجعل الخير لي في الوفاة
مش ضعف و لا عن عدم ثقة بالله بس المشكلة إني حاسس إنه مش عالمي و لا وقتي خالص
حاسس إني من كوكب تاني بجد
كل حاجة بفكر فيها لوحدي مش ممكن يكون في حد في الدنيا دي كلها عنده أفكاري و لا أحلامي علي فكرة مش بأقول إن عبقري و لا مفيش حد زي لا أقصد أهتمامتي غير أهتمامات الناس حتي الناس اللي أفكارها كلها خير مش زيي خالص حاسس إني لوحدي جدا
ده غير الصفات السيئة اللي فيا ده موضوع تاني بس لما باكون في حالة كويسة باكون لوحدي بردوا مش عارف ليه
معلش هأحرمكم من حول العالم البوست ده علشان البوست طويل و دمه بايخ
سلام

18 comments:

حــكــايــة said...

السلام عليكم

أولا عاوزة اعلق على آخر جملة فى البوست و بعدين بئا نمشى بالترتيب
البوست دمه مش بايخ ولا حاجة
انا شايفة انك خرجت اللى جواك بعفوية من غير ترتيب و دا كويس
تداعى الأفكار دا من اكتر الحاجات اللى باعزها
بتعرفك ايه اللى جوا اللى بيكلمك بجد , يعنى كلام من غير تذويق ولا تعديل ولا اى حاجة , كلام من القلب و لازم يوصل للقلب

نرجع بئا للأول

انا على فكرة حاسة باللى حضرتك بتقوله اوى , يعنى حاسة أد ايه مش عاوز تكون لوحدك , انا فى نظرى الوحدة من اصعب الأحاسيس اللى لازم تهرب منها بالمشوار حتى لو اتكلمت مع ناس متعرفهمش

و عارفة أد ايه الصداقة حاجة جميلة و مهمة اوى , صديقك اكيد مش هيكون انت بالظبط بس هيكون عامل زى روحك التانية , تحكيله من غير خوف على اى حاجة , ترمى معاه همومك , تستشيره , حياة تانية يعنى الصداقة دى

و مينفعش على فكرة ترسم صورة ملاك لحد ايا كان هو , احنا لو كان ربنا اراد يخلقنا ملايكة كان سبحانه عملها , لكنه خلقنا بشر
بشر ضعفاء و خطائين و عاديين جدا بس المهم ان ربنا كرمنا بالعقل اللى نعرف بيه غلطنا و نستغفر منه

بالنسبة بئا للحب فدا بجد احسن حاجة فى الدنيا
حبيبك بيكون غير كل البشر
هو فى كفة و الدنيا فى الكفة التانية
و طبيعى الانسان بيتمنى يشارك حبيب كل حياته , كل لمحة فى حياتك تتمنى تشاركها مع حد بتحبه و بيحبك
و الزواج طبعا هو المنفذ الوحيد للمشاركة عشان ديننا ميسمحش بالمشاركة غير بالطريقة دى

ربنا يرزقك زوجة صالحة تحبك و تحبها و يباركلكم فى بعض
و ربنا يعينك فى دراستك و يرزقك أى حاجة تعوزها و يجعلها خير ليك
باذن الله احلامك تتحقق بس انت فوض أمرك لله و اتوكل عليه و ان شاء الله ربنا هيكرمك باللى تعوزه

اما الانتحار فمش لوحدك اللى فكرت فيه , يمكن كل الدنيا فكرت فيه , و لو مكانش حرام كان زمان الناس خلصوا من زمان اوى , مكانش حد هيستنى

و على فكرة , كل انسان بيحس انه محدش فاهمه ولا حد عارف تفكيره و محدش زيه
دا طبيعى , ما هو فعلا مفيش حد زى حد تماما , حاجة كدا عاملة زى البصمة , مينفعش حد يبقى زى حد بالمللى , لازم يكون فى اختلاف
لكن فى ناس فيها كتير من بعض
اكيد انت بس لسة ماقابلتش الحد اللى فيه كتير منك
بس الغريب ان حضرتك اللى كنت بنتصحنى ماسيبش نفسى لمود الكآبة دا و اعمل اى حاجة تطلعنى منه و انت مش بتعمل بنصيحتك

بجد لو فوضنا امرنا لله و وكلناه سبحانه فى اى حاجة احنا عاوزنها و وثقنا فيه سبحانه و تعالى بجد , هنرتاح اوى و ان شاء الله كله هيكون خير

ربنا يفك كربك و كرب الناس كلها

معلش عارفة انى طولت اوى بس فعلا البوست دخل قلبى و حبيت ارد عليه بشوية ضمير و آدى أخرة اللى يمشى ورا ضميره :)

smraa alnil said...

يااااااااه يا محمد

بجد مش عارفة اقولك ايه
بس انا عيني بجد دمعت وانا بقرالك

عارف

ساعات كتيرة اوي بتجنن واعمل افكار جنونية
واقول يعني انا لقيت الحب وارتبطت وفي غيري لا

واوقات كتيرة اوي بففكر اني افشكل خطوبتي عشان ابقي معاكو

بس برجع واقول لا ليه
اكيد زي ما ربنا اكرمني
اكيد هيكرم الناس دي
زي ما لقيت اللي يحبني وهو اصلا مش كان علي بالي
اكيد هما هيلاقوا برضه الي بيدوروا عليه

وخليك مؤمن ان هي كمان بتدو عليك زي مانت بتدور عليها
ديتها بس مساله وقت عشان الزحمة والمواصلات
بجد
خليك مؤمن بدة

ولا تتمنوا الموت
دة جزء من حديث الرسول صلي الله عليه وسلم

انا كمان بحس اوقات كتيرة اوي اني مختلفة

واني مش من العالم دة
واني جاية في عصر مش بتاعي
مش مسالة ملاك
بس مساله اني انا كمان بحس اني متيمزة جدا

ومش مشكلة انك تلاقي صداقة بنت ولا ولد
المهم ان فيها احترام واهتمام

والانتحار لست وحدك هذا الرجل
بل كلنا هذا الرجل
من اول طوبة صغننة بنتكعبل فيها بنتمني دة
بس بنرجع نفوق
مش عارفة اقولك ايه تاني بس خايفة اوجعك واقولك انايمانك ضعيف

انت بتقول انالموت هو طريقك وانك حاسس الموت هو العالم بتاعك
محمد
انت مستعد للموت
شايف ان اعمالك في الدنيا تكفي ان مش تتعذب

اتقرب من ربنا اكتر واكتر
عشان يكون عندك يقيقن اكتر بالخير
خلي قلبك متعلق بربنا

والخير هيترمي تحت رجليك

علي فكرة
اللي انت بتحلم بيه لما تروح بيتك انا كمان بحلم بيه اوي
وبدعي ربنا انه يتحقق

وربنا يفك كربك يا محمد يارب

ولو احتجت ليا بس قول جزر
وانا اضيفك واكلمك

mariam said...

ازيك يا محمد
شكرا جدا انك قلت لى على فيلم الراقص مع الذئاب
بكره ان شاء الله تقابل البنت المناسبه
زى ما نجى قالت
اكيد هى كمان بتدور عليك

انا عارفه قد ايه الوحده شعور صعب و سىء و حاسه بيك كويس
يا رب تلاقى اصدقاء شبهك

بس انسى موضوع الأنتحار ده خالص
مش كل مشكله نفكر فى الأنتحار
لأنه مش بس حرام
لكن انت كده بتحرق اعصابك

تحياتى و سلاماتى

No Fear said...

السلام عليكم
حكاية
و الله بتحرجيني بذوقك بس أنت لسه جديدة هنا بعيد عنك من ساعة أما عملت المدونة هم كم موضوع اللي بتكلم فيهم مش بغير الناس القديمة تلاقيها زهقت مني
.
ربنا يكرمك بلاش حضرتك دي بحس إن عندي تسعين سنه
.
الوحدة رخمة جدا فعلا
.
الصداقة أجمل شء في الدنيا بس للأسف قليلة اليومين دول
.
مش فكرة ملاك فكرة بترسمي أن هو ده اللي أنت عاوزة تعرفيه بس أكيد مفيش حد زي اللي في خيال أي حد سواء الصديق أو الحبيب
.
فعلا مينفعش الحب المزيف بس ممكن يكون أرحم من عدم وجود الحب أصلا بصراحة مجربتيش الحب المزيف بس جربت أنك متحبيش
شعور غبي جدا
.
ربنا يسمع منك
.
الأنتحار الحمد لله بعيد عني خالص دلوقتي بس خايف يبدأ يدخل دماغي خصوصا إني بعمل حاجات مدمرة اليومين دول
.
مش فكرة إن مفيش حد زي بالظبط و لا حتي من قريب تعرفي أنا متخيل نفسي شبه فهمي اللي في ثلاثية نجيب محفوظ في حد زيه دلوقتي لا هو ده اللي أقصده
.
سهل جدا الواحد ينصح أي حد ما عدا نفسه حقيقة أكتشفتها و متأكد منها
.
الحمد لله الواحد بيفوض أمره لله بس الواحد نفسه يجتهد بس
فعلا أدي أخر اللي يمشي ورا ضميره هتتعبي جدا في حياتك بس هتكوني سعيدة لو عملتي كده في كل حاجة
ربنا يكرمك و يخليكي

No Fear said...

السلام عليكم
سمرا
أنت هتخليني أصعب علي نفسي ليه
.
أنا نفسي أقلك كلمة بس لسه مينفعش يعني أقولهالك دلوقتي
بس الحمد لله إن طارق مش بيدخل عندي

ربنا يكرم الناس كلها و يفرحها و يسعدها

هي تقول بس أنها بتدور و أنا مستعد أروح لها كوالامبور

ساعات بحس إن الموت هو الحل
أنامش مستعد للموت خالص طبعا من كتر الذنوب و الضعف اللي الواحد فيه بس الواحد ذنوبه بتكتر يعني نموت دلوقتي ممكن يكون أخف
المهم ربنا يرزقنا التوبة قبل الموت

زي ما قلت لحكاية أنا مش حاسس إني متميز أنا حاسس أنه مش وقتي يعني حاسس إني شبه فهمي اللي ثلاثية نجيب محفوظ كان شخص عادي جدا و في كتير زيه في وقته
انا مش شايف حد زيه دلوقتي

انت فكرتي في الإنتحار
بلاش

متقلقيش أنا عارف إن للأسف إيماني ضعيف و أسوأ حاجة إن ده يحصلك بعد ما تكوني كنتي قريبة قوي من ربنا و تبعدي عارفة اللي بعيد من الأول أهو عايش في البلوظة و خلاص بس اللي داق حلاوة القرب من ربنا مش عارف إزاي بيبعد تاني معنديش دم بعيد عنك

مش عاوز يترمي تحت رجلي في أيدي مش هأقول لا

يارب يتحقق لينا إحنا الأتنين و يتحقق لكل الناس بجد مش رومانسية لو الناس كلها حبيت بجد و عاشت الحب كل حاجة في الحياة هتتغير حتي حال بلدنا
يارب يفك كربنا كلنا و يكرمنا من فضله العظيم
جزرررررررررررررر
:)

No Fear said...

السلام عليكم
دكتورة مانو
طيب لو قابلتيها وسألتك علي قوليلها العنوان ماشي
:)
يارب صديق طيب مبدئيا دلوقتي
الحمد لله مش بفكر فيه بس خايف يحصل

saso said...

كان في بلوجز تاني واتسرقوا
انا كنت بحب اغاني عجباني مسحتة؟
ماشي

كاست اواي ... ااااه
توم هانكس ده لو بايدي اخلي شانيل تو تحطلة كل يوم فيلم
بما ان كبيري في اليوم ساعة ونص تليفزيون ..عشان اتفرج عليه

ممممممممممممم
احلي صاحب ممكن تلقاه هو انت
من حبه كده الدنيا معايا كانت سبحان الله .. اول مرة تكشر كده
منفعش فيها اي حاجة .. لا قعاد لوحدي ولا شوفان ناس

يمكن عشان كنت باهرب مني انا وباقعد مع الناس او باقعد لوحدي افكر بس مش بحاول اخرج من اللي انا فيه ... بس دلوقت
:D
محدش هيخرجك من موودك غيرك، علشان محدش هيفهمك ولا يحس بيك مهما كان قدك انت
صاحب وشوف ناس واخرج واشتغل بس بالليل ارجع اقعد مع محمد حبه

مممم
صفحة فكر ديني مستواها اصلا في النازل من ايام ملف الشيعة الظريف اللي كان فيه الراي وعكسة في نفس المقال ما علينا
طبيعي يعني تفكيرك ميبقاش مثالي قوي اللي انت بتقولة طبيعي جدا
ربنا يحققلك كل اللي بتحلم بيه
**
اه صح ..لما تتخانقوا ابقي خليها تتفرج علي الفيلم
:)

البنت الشلبية said...

انا كتبت كلام كتير وراح
المهم كل الى عايزة اقوله ان اى خير او شر بيحصلك ده نصيبك,,حاول تتقبله وتحوله لصالحك فى كل الحالات
وبعدين انت احسن من غيرك
انا فشكلت موضوع الخطوبة قبل ما نحدد موضوع الخطوبة بكام يوم لو انت مكانى تعمل ايه وانت كنت حاسس انك هتبدء حياه جديدة مع شخص استريحتله
عارف لما تكون حاسس بأمل كبير ومرة واحدة يروح منك الامل ده ويتحول لاحباط ويأس

حلم كان هيتحقق ومرة واحدة راح ,,,
شوف ازعل احزن مش عيب لكن مطولش فى الموضوع ده

شوية حزن على شوية فرح واهى الدنيا ماشية

ربنا يوفقك فى حياتك ويحققلك كل امانيك يارب...الحياه لسه قدامك اصبر يا محمد,,,وان شاء الله حياتك تبقى اكترها فرح وسعادة

البنت الشلبية said...

على فكرة انا ضيفتك على الايميل باسم شلبية لو حبيت تدردش ولا حاجة
سلام

رفقة عمر said...

كلامك بجدزعلنى كتير
ويمكن انا مشبدخل عندك كتير
بس دايما فى المرات اللى بدخلها
دايمااتفاجأ ان بوستاتك كلها حزينه
وفيها تشاؤم
وبعدين حلم الزواج والبيت دة حلم مشروع وهايتحقق ان شاء الله فى الوقت المناسب
لما تظهر الانسانه اللى تستحققك
فعلا
حاول تحب نفسك اكترمن كدة
ومشكله احساس انك لوحدك بيجلنا كلنا
لان مشكله الزمن الى احنا فيه
انا كل واحد بقى بيفكر فى نفسه وبس
ربنا يكرمك يارب
ويحقق لك كل امالك
وييسرلك كل امورك
ويعطيك اكتر ما تتمناه
اللهم امين يارب العالمين
ولاز تعرف انك مش لوحدك لان ربنا احسن من اى صحبه
بجد اساله بيقين
هايعطك فوق ما انت تتمنى

No Fear said...

السلام عليكم
ساسو
بالرغم من إني زعلان منك جدا فوق ما تتصوري واجب علي أرد عليكي مش بحب أطنش حد
المهم حمد لله علي السلامة و كويس إننا أطمنا عليكي
البلوجات التنية مسحتها خالص لاقيت مش عليها قبول كان نفسي أعرف أعمل تحميل للأغنية علي البلوج ده بس للأسف مش عارف
في حد كان قال هيقولي إزاي بس تقريبا نسي
فعلا ممثل عبقري توم هانكس
أمبارح كان في له فيلم ذا جرين ميل
فيلم عبقري هو كمان
الواحد أتخنق بصراحة من الموود اللي هو فيه و كل شوية يحس أنه خلاص هيخلص يلاقيه يتجدد تاني
محمد مش لاقي نفسه أصلا و تقريبا مش هيلاقيها خلاص
مش متابع بصراحة الأهرام أصلا بس أهيه مقاله جت تحت أيدي
لما هنتخانق ده لو أتخنقنا أصلا هأديها بالج و لا بلاش هي هتبقي تشوف

No Fear said...

السلام عليكم
البنت الشلبية
أولا ربنا يعلم أنا زعلت علشانك قد أية أنت ملحقتيش بس في نفس الوقت أحسن أنه حصل من بدري ألمه هيكون أخف
أنا مش معترض أن الحياة تكون حزن و فرح معترض إني أفرح و أحزن لوحدي
أنا بأحاول أصبر بس خايف مقدرش أكمل
علي العموم ربنا يكرمك أنت كمان و يفرحك علشان أنت تستاهلي كل خير

No Fear said...

السلام عليكم
البنت الشلبية
سبحان الله
أنا قبلتك من زمان و كمان محتاج أدردش من زمان و تقريبا علي طول بس تقريبا مواعيدنا مش متقابلة خالص
يشرفني أنك ضيفتيني عندك

No Fear said...

السلام عليكم
رفقة العمر
منورة أي وقت تزوريني فيه
أنا عمري ما هنساكي لأني أخدت من عندك الجملة الرائعة اللي نشرتها في الأوضة عندي و في المكتب في الشغل و علي الموبيل و علي البلوج
لا تجعل الله أهون الناظرين إليك
بس للأسف كتير مش بحققها
الحمد لله علي كل شئ
أنا مش عارف أنت هتقري ردي و لا لا بما أنك مش بتيجي كتير بس لازم أرد
أنا كمان و الله نفسي أفرحكم معايا في أي حاجة أنا زهقت كمان من الحزن ده بس أعمل أية مش عارف
ربنا يكرمك و يوفقك و يسعدك دايما يارب
أنا بصراحة مش قادر أحب نفسي علشان هي متتحبيش أصلا فبالتالي طبيعي إني ملاقيش حد يحبني
معلش نكدت عليكي كمان مرة أسف
سلام

رفقة عمر said...

انا دخلت
وقرات الرد مين قال مافيش حد بيحبك
دةشئ مستحيل
انا متاكدة انا فيه ناس كتير بتحبك
لازم يكون فيه حد تالف معك
لان الارواح جنود مجندة
واكيد فيه ارواح مشابهه روحك ونفسك
وكل واحد فينا فيه الشئ الوحش والشئ الحلو مش كلنا فيه كل حاجه حلوة
واكيد انت فيك حاجات كتير حلوة
بس واضح انك مش عايز تشوفها
على فكرة انا مش بعرف اعلق عندحد الا لما يكون حسيت انه بجدانسان بيتكلم من قلبه
انسان جواه حلو وعلى فكرة دة بيبان قوى من الكتابه
بجد انت شخصيه جميله
وانا متاكدةانك ان شاء الله
هاتكون احسن وسوف تجدمن يقدر هذه الشخصيه فى يوم منالايام
كفايه انك تحمل نفسا لوامه
ونفسا تريد ان تكون افضل غيرك
بيعمل كبائر ولا يرى انه غلط
المؤمن يرى ذنوبه كانها جبال تقع عليه
والكافر يرىذنوبه كانها ذباب يهشه من على وجهه
انا هادخل عندك بعد كدة ان شاءالله
واتمنى تكون افضل اللهم امين يارب العالمين
ربنا يشرح صدرك وييسرلك امرك

No Fear said...

السلام عليكم
رفقة العمر
و الله أنا أتمني إن اللي بتقوليه حقيقي مش هأزعل يعني
يارب الأقي الروح دي بسرعة علشان خلاص
مش عاوز أشوفها
عارف الذنوب اللي بعملها ممكن تكون قليلة في أنواعها أو هي نوع أو اتنين الذنوب الكبيرة يعني بس مش مشكلتها مش لسني و لا لشخصيتي
فهو ده الشئ اللي بيخليني أتضايق قوي من نفسي
تاني أقول يارب أكون زي ما أنت شايفاني مش زي ما أنا شايف نفسي
يارب
يارب
يارب
أكون زي ما أنت بتقولي
ربنا يكرمك و يسعدك يارب
ياريت فعلا تشرفيني كتيررررر
سلام

saso said...

:S
طيب اعمل ايه بس
البوست اللي فات بتقول اني حارقه دم
بعد الشر عنك من حرقة الدم اولا
ومتزعلش ثانيا
:)

وبعدين ايه بقي هنهرج
مش بعتلك لينك لصفحة فيها تحميل الغنوة
موصلش؟

savefileانا متاكده كنت رفعاهولك علي

No Fear said...

السلام عليكم
ساسو
مش فاهم معني كلامك الأول أية
ثانيا بردوا مش قاهم لينك أغنية أية
لو تقصدي بنام أنا نزلتها من زمان لو غير كده ياريت التوضيح
بصراحة ساسو مش عارف أنا زعلان منك قوي الحقيقة
بس و لا يهمك
خير إن شاء الله