Sunday, October 01, 2006

اللعنة
مش عارف الموضوع ده أنا اتكلمت فيه مع ناس كتير و طبعا في ناس هتقرا الكلام ده و تقول تاني يا محمد حرام عليك مش أتكلمنا مليون مرة في الموضوع ده هو موضوع العلاقة مع البنات أنا كنت في الكلية مش بتكلم مع بنات تماما علشان بصراحة مش بعرف و تاني حاجة شايف ده حرام من ناحية إني مش بأرضي الموضوع ده لأختي لذلك لا أرضاه لأخت حد و في حديث عن سيدنا محمد صلي الله عليه و سلم لا يؤمن أحدكم حتي يحب لأخيه ما يحبه لنفسه لحد هنا الكلام حلو و جميل المشكلة فين إن الموضوع ده يشغل دائما في دماغي نسبة 99.99% مع الإعتذار لأصدقائنا أصحاب هذه النسبة لكن الفرق إن السنبة دي واقعية أنا متأكد من كده
مش عارف أعمل أية
نفسي أحب و أجد واحدة أحبها و يسلام لو ربنا يسهل و الموضوع يكمل
لكن مش بعرف خالص
مش عارف ده عيب في
مش عارف أعمل اية
و مش قادر أشيل الموضوع ده من دماغي بالرغم من إني شايل موضوع الجواز في الفترة دي من دماغي
و للعلم لو في واحدة جت لحد عندي و قالت لي بحبك و ده مش بيحصل هأقول لها لا
علشان دع غلط
مش عارف أنا منافق و لا أهبل بصراحة محتار جدا
منافق أهبل مجنون مش عارف
بس بجد جوايا أحسايس جميلة جدا نفسي تترجم لحد و مش عايز و مش قادر مش عارف أعمل أية
للعلم الموضوع ده ممكن يكون سبب وقوفي في الحياة
في حد عنده علاج للحالة المستعصية دي بس و النبي الحل يكون واقعي بلاش الكلام الكبير اللي مش بقدر أنفذه

5 comments:

إنسان || Human said...

أولا يا أستاذ(نو فير) أنا ولد ولست بنت معرفش إنت ليه مصر في كل تعليقاتك عندي بمناداتي بصيغة المؤنث...........................
عموما حصل خير أما عن موضوعك أنت كلامك مظبوط بنسبه كبيره دلوقتي أنا بقولك قبل ما تدخل أي موضوع من دول لازم تعرف إن الحل الوحيد الخطوبه وبعدين البنت إيها لو انت حاسس ناحيتها بمشاعر روح أخطبها ونظام العلاقات المهلبيه ده ماينفعش وبعدين هيبقى قدامك وقت تتدرس شخصيتها ............والله أعلم

Anonymous said...

الموضوع ده مش محير ده محير جدا وكتير جدا من الشباب واقعين في نفس الدوامه يدورون في دائره مغلقه لا اول لها ولا اخر
بمعنى
انك عايز تتجوز يبقى لازم تعرف بنت وتدرسها و تدرسك وتفهمها و تفهمك وطبعا تحبها وتحبك لكن الموضوع ده حرام ومحدش يرضاه لأخته - بس يا ترى انت مش عايز تكلم واحده لأنه حرام ولا قصر ديل

طيب جميل

لو رحت لواحده لا تعرفها ولا تعرفك - جواز صالونات - ياترى هتقدر تعرف عنها كل حاجه قبل الجواز ولا هتتخدع زي كتير وتعيش حياه ممله- وكله يهون عشان خاطر العيال- ده على اساس انك
اتجوزت وخلفت

طيب جمبل

الحل ايه بعد الحكاوي دي
1-اظفر بذات الدين تربت يداك
2- الطيبون للطيبات والخبيثون للخبيثات يعني خلي بالك

No Fear said...

أصدقائي
هيومان
للعلم أنا عارف أنك ولد بس هي كانت غلطة مرة واحدة و قلت مش هتاخد بالك بس علي العموم أنا اسف
موضوع الخطوبة ده زي ما قلتلك مش في دماغي خالص الارتباط سواء حي أو زواج لأني لسه مش عارف الحياة ماشية معاي إزاي و محبيش أقول لحد حاجة و متحصلش
لما الحياة تستقر و تبقي فل أو علي الأقل يبدأ يبان لها ملامح أفكر في الارتباط علشان أشرح ظروفي علي قد ما أنا عارف


واحد من الناس
تصدق بالله أنت كتبت تعليق أحسن من الكلام اللي أنا كتبته في شرح المعاناة التي أعانيها
بس المشكلة أنك في الحل قلت تقريبا نفسي حل هيومان و أنا رديت عليه و أكيد أنت قرأت التعليق

بس مبدئيا ربنا يطمنكم إني مش لوحدي في هذه المعاناة
يارب أرشدنا جميعا للصواب و الخير

saso said...

البارت بتاع الحب والزواج ده حاجة شخصية انت اللي تقدرها
بس مفهمتش انك مش بتتعامل مع البنات في الكليه مادام في حدود الصح اية يمنع
وفي الشغل هتعمل ايه

رايي اللي غالبا غلط بس مناسب ليا عن نفسي انك لما بتبعد عن الحاجة بتفكر فيها اكتر انا كنت باكلم صحابنا عادي ومحدش فهم التاني غلط
المهم تختار صح وتتفقوا علي اللي هتتعاملوا علي اساسه
ممم بس انا كنت فاهمة انك و (روني) اصحاب

rony said...

جايبلنا الكلام والله يامحمد
ياجماعه انا وهو اصحاب بس تقريبا هو مش معترف بيا كبنت بقى ولا ايه ابقوا اسألوه ...ماشى يافاضحنى
انت فى ايدك انك تغير حياتك كلها ...بس لو انت عايز وانا شايفه من واقع خبرتى فيك يعنى انك مستسلم للدنيا خالص وسايبها تعمل اللى هى عايزاه ...بنتاقض نفسك بس كمان مش قادر تنافقها ودى ميزه مش عيب لانك لو وصلت لمرحله النفاق هاتبقى مشكله
وعلى فكره مش كل بنت قابلتها فى الجامعه يبقى لازم تحبها وتقع فى غرامها علشان الحياه مش حب وبس لأ فيه علاقات تانيه ومشاعر انسانيه كتير اوى حلوه بس احنا دايما فاكرين ان اى علاقه بين ولد وبنت تبقى حب واستهبال اذا مكنش جواز
دور على نفسك الاول وشوف اللى يريحك وحب الناس لمجرد الحب مش شرط اولاد او بنات وزى ما (saso)
قالت لما تبعد عن حاجه كتير بتشغل كل تفكيرك...اشغله باصحاب جداد يكونوا محور حياتك لحد ما تلاقى حب حياتك
وبلاش تحسسنى انى كيس جوافه فى الموضوع الناس ابتدت تستغرب