Saturday, August 08, 2009

بوست محتاج مدونة لوحده

مقدمتان و إستهلال لابد منه
المقدمة الأولي
نجحت
الحمد لله
و ها قد جاء اليوم الذي ذكرت فيه كلمة نجاح في هذه المدونة و الله أعلم سيأتي تاني و لا لاء إن شاء الله يجي كتييييييييير قولوا أمين
يوم الخميس واحد صاحبي أتصل بيا و قالي النتيجة طلعت رسمي إني الحمد لله نجحت يااااه بعد معاناة و كفاح دامي و مسلح دام ماي قرب من أربع سنوات نجحت الحمد لله في التمهيدي هو أينعم حتي مش عارف النقطة اللي هأكمل فيها و لا حتي الدكاترة بس أهوة الحمد لله ذكرت كلمة نجاح يارب تكون بداية لخير كتير
و لا أستطيع أن أترك هذه النقطة بدون أن أشكر إنسانة عزيزة هي بصراحة اللي شجعتني علي المذاكرة بعد أما كنت خلاص بأفكر أقدم إعتذار السنة دي
جزاها الله كل خير
بلاش إستظراف يا مفيد أنا عارفك مش زي ما نيتك السو هتسول لك أن تفكر
المقدمة الثانية
حقيقي انتم صعبانين علي فعلا مش فاهم إزاي ممكن تعلقوا علي البوستات بتاعتي أنا شخصيا لو قريتها مش هأعرف اعلق علي أية و لا أية
بس لازم تعلقوا بالذوق أهوة
البوست ده ملخص لأفكار كتير قوي جت علي بالي علي مدار أسبوع و أنا باقضي المصيف السعيد في مرسي مطروح
لذلك هتلاقوه متقطع و مش مترابط زيادة عن الطبيعي يعني
يعني ممكن تلاقوا نقطة فيها تفاؤل و سعادة و وراها نقطة في غاية الكأبة أو نقطة كلها إيمان و قرب رضا من الله و نقطة نكد كده يعني
محدش يقلق
أنا كنت فتحت نوت علي الموبيل سجلت فيها كل الأفكار اللي خطرت علي بالي علشان منساش اي نقطة
أوك
يلا بينا نبدأ
.
بسم الله
مش عارف أية اللي فكرني تقريبا لما كنت باتفرج علي موجة كوميدي في برنامج التوك شو البترول و الجاز أفتكرت هالة سرحان و إيناس الدغيدي و لا جو المصيف نفسه اللي فكرني مش عارف و الله أعلم هو أية السبب
كنت زمان أسمع اللي بيسموهم المدافعين عن المرآة و أنبهر بكلامهم عن إن الشهوة دي صفة حيوانية و لازم الرجل يتجنبها و يعيش في الحياة ويتعامل مع المراة عادي و كان نفسي أبقي كده
يعني طيب ماهو الأكل و الشرب و حب البقاء شهوة و غريزة حيوانية يبقي منجعوش و لا نعطش و واقفين و شايفين قطر داخل علينا نسيبه يدخل علشان حب البقاء ده غريزة حيوانية و إحنا مش عاوزين نبقي حيوانات يعني
كلام أهبل و عبيط و لو جه العيب من أهل العيب ميبقاش عيب
الحب أجمل شئ في الوجود فعلا بس لازم نحب في الوقت اللي لازم يكون الحب ده له معني يعني أية مثلا حب بين أتنين في ثانوي و لا حتي في كلية هيكونوا نفسهم في قد أية و هيعملوا أية خلال الفترة دي كلها يعني لازم نستقبل الحب في وقت نكون بينا و بين نفسنا مستعدين نتجوز
و كمان الحب ده مش بأيدينا يعني فجاة نلاقي نفسنا بنحب ده هيكون رد الناس أنا عارف و متأكد من كده الحب مش بزرار يعني أحب و محبش
أنا حبيت في الوقت الغلط و أتألمت بسبب كده و ما بالكم أنا الرجل و أتألمت كده البنت اللي المشاعر عندها أكتير و أهم هتتألم إزاي
هتسألوني يبقي أية الحل
الحل في اللي ربنا شرع به لأنه سبحان الله هو الصح أكيد و طبعا مش منتظر يعني إني أنا اللي أقول كده
اللي هو منع الإختلاط و منع التبسط و التساهل بين الشباب و البنات حل بسيط و سهل جدا
و و الله اللي هيعمل كده هيلاقي سعادة بعد كده في حياته محدش هيقدر يحس بيها غير اللي هيعمل زيه
ربنا يهدينا جميعا يارب
.
الأسرة أجمل شئ في الدنيا
اللي حسيت به في المصيف أحسايس متداخلة و مش مفهومة
شوق رهيب لتكوين عيلة و إني أتجوز و أخلف و أسعد مراتي و أولادي و نعيش عيشة و لا في الأحلام علي قد ما أقدر و في نقس الوقت إنا لا أستحق هذه العيلة و لا أستحق مساندة أي حد و غالبا أنا في زمن غير زماني مش عارف
و كمان وصلت لحل إني أستعد للوحدة و إستكمال حياتي لوحدي علشان مسببش ألم لأي حد سواء مراتي اللي هتكون تعيسة لو أتجوزتني و أولادي اللي ممكن يلعنوا اليوم اللي أنا كنت فيه أبوهم
.
يوم الخميس قبل أما أسافر في واحد أتصل بيا لعرض شغل جديد هو لسه مش أكيد بس بنسبة كبيرة هيكون في عرض أستعدوا علشان نتناقش قي الموضوع ده بس الشغل الجديد الإستقرار فيه أقل شوية لو جه العرض رسمي هأبقي أخد رأيكم
دعواتكم
.
كان في متعة كمان في المصيف ده إني أتفرجت علي التلفزيون من فترة طويلة مش باتفرج علي تلفزيون كتير كان في قناة موجة كوميدي الرهيبة و القناة الأولي و التانية الأرضي و الحياة
موجة دي بشعة و سيد أبو حفيظة رهيييييييييييييييييييييييييييييب بجد و التوك شو و اتفرجت علي شوية أفلام جميلة و الأولي و التانية و الشنرات العقيمة بتاعتهم و كده و الأفلام و السهرات بتاعتهم و البيت بيتك كانوا حلوين و الله
و شوية إعلانات جميلة
بيبسي مين قدك
و شويبس الله يرحمك يا حسن ياعابدين إحنا بقالنا خمسة و عشرين سنة معملناش إعلان
و عندنا فائض في الميزانية هنوفر ليه في الإنفاق أعيادنا هتبقي يومية و الدبدوب هيقول واك واك ده إعلان عن برنامج أبوحفيظة
و الحياة خنقتني كل شوية إسأل مجرب من رمضان اللي فات
.
و مرة في سهرة كان في فيلم فريد الأطرش حكاية العمر كله و كان في تصوير في القناطر سبحان الله علي الجمال و الروعة و النظافة فين القناطر دي دلوقتي بقيت مرتع للمدمنين و قلة الأدب و القذارة مكان نضيف و جميل و قريب من القاهرة
و طبعا منساش أذكركم بعبط الفيلم يعني و جماله
:))
.
كان معايا حتة بنوته صغيرة عندها ست شهور في المصيف بسم الله ماشاء الله عليها زي القمر حاجة زي الأطفال بتاعت البوسترات كده ربنا يبارك فيها و يخليها لباباها و ماماتها
الواد ابن أختي بردوا جه يوم الثلاثاء و كمل المصيف معايا عملتله البدع بدال و عجل و ملاهي و طفطف و كله عيشت دور الأب شوية
:))
يمكن منعرفش نعيشه في الحياة دي
.
و أنا في المصيف عرفت إني في واحد في شركتي السابقة قدم إستقالته و رايح شركة تانية أحسن طبعا ربنا يوفقه هو ولد مجتهد بصراحة بالرغم من إن عنده سلبيات بس هو مجتهد
و لا أنكر ظهور شعور مش كويس من ناحيتي تجاهه
حقد يعني من الأخر
ربنا يهدينا جميعا
.
طبعا الناس اللي عندي علي الفيس بووك مبسوطة بالتغطية الحية اللي كنت عاملها و أنا في المصيف
:)
نفسي أفتح الكونت تاني
.
عندي شعور بشع قوي نفسي أقول لناس كتير أنا بحبكم أو مش نفسي أقول نفسي أحس بإحساس الحب تجاه ناس لازم أحبهم و نفسي أقولهم كده و نفسي يحسوه بس للأسف مش بيحصل أي حاجة من دي خالص
الحمد لله علي كل شئ
.
أتفرجت كمان علي فيلم حكايتي مع الزمان و كان نفسي أبعت لكم أنتم كمان و أقولكم
وحشتوني وحشتوني وحشتوني بجد
ربنا يكرمكم و يخليكم ليا يارب
.
أنتهيت و أنا في المصيف من قراة واحة الغروب و بدات في عزازيل
و هم الأتنين رووووووووووووووعة بجد
شكرا جدا للي أقترح علي قراة واحة الغروب و شكرا للي جابها لي هدية
بجد شكرا
.
أكتشفت إن المتعة مش في الماضي بس ليه منستمتعش بالحاضر و نستعد للمستقبل يعني لما كنت بأتفرج علي نشرات الأخبار علي التلفزيون الأرضي أفتكرت نشرات زمان و بنرامج انباء و أراء يوم الجمعة حتي الموسيقي اللي كانت بتيجي قبل الأذان زمان و صوت الموسيقي بتاع القناة التانية بدل الأذان و السهرات بتاعت زمان و جمالها
الواحد كان ساعتها مش بيستمتع قوي بالحاجات دي ساعتها دلوقتي بيشتاق لها طيب ليه منستمتعش بالحاجات المتاحة لنا دلوقتي علشان أكيد قدام شوية هنشتاق لها و هنكتشف إننا عديناها منغير ما نستمتع بيها و عشنا في ألم و خلاص
.
و أبي المصيف يعني رفض إني أرجع علي الحالة الجميلة اللي كنت عليها هناك و إحنا راجعين لاقيت واحدة بتقولي لما ماما تعمل العملية بالسلامة تبقي تتصل تقولنا و تتطمنا
عملية أية او هتتعمل أمتي أو أية ظروفها الله أعلم عملت عبيط و سكت
يرضيكم كده
عارف في واحدة هترد علي المسنجر و تقولي أنا كمان حصل معايا كده و أنت عارف بس في فرق كبييييييييييييييييير
.
كفاية عليكم كده لحد هنا
معلش ياشباب شحططتكم معايا
كان نفسي أحقق رغبتك يا بينكي بس زي ماأنت شايفة مش نافع خالص
سلام

11 comments:

المهندس said...

قرأت اول سطر... فقلت لازم اعمل الواجب اولا

مبرررررررررررررررررررروك

مبروووووووووووووووووووووك

مبروووووووووووووووووووك

الف مليون مبروك ... يا صديقي العزيز .... شفت مين وشه حلو علي التاني

سعد جدا من اجلك ... ودائما من نجاح لنجاح

سلام مؤقت

Towtor said...

السلام عليكم
الف مبروووووك وعقبال الدكتوراه. روايه واحة الغروب جميلة جدا ..كل حرف شدنى للحرف اللى بعده ... لكن عزازيل على العكس ...كلامك هيخلينى اجرب تانى ...ايه اخبار السمك .. ياريت توصف ليا المكان اللى جبت منه السمك .. نفسى اجرب .
ربنا يكرمك ويوفقك
Meshmesha

No Fear said...

المهندس
السلام عليكم
الله يبارك فيك
فين بقية التعليق
وشنا حلو علي بعض
و ربنا يجعلها بداية أفراح كتير لكل الناس ياسيدي
ربنا يكرمك و يعزك يارب

No Fear said...

towtor
السلام عليكم
الله يبارك فيكي
و ربنا يسمع منك يارب
لازم تجربي تقريها تاني و تقري واحة الغروب تاني و تاني و تاني
بمناسبة السمك أنا عندي 3 سمكات كل سمكة نوع أكسبي فيه و فيهم ثواب و خديهم
ببلاش
:)))

saso said...

مبروووووووك
مبروووك مبروووك
مصيف سعيد وألف سلامة علي طنط وربنا يخلي السمك وكل الحاجات بس خبر النجاح بجد فرحني اوي
:‏)‏
يارب دايما يا محمد

Monzer said...

ما تحسسنيش ان عندك أربعين سنة

ولا فاتك قطر الجواز مثلا

ولا تكونش ياض معوق وانا مش عارف

ما انت زي الحيطة بكرة تجوز وتخلف، وعيلك يقعد يسرخ جنبك وتبقي عاوز ترميه م الشباك هاتمثل ياض ولا ايه

ابشر كده واسعي ودور علي بنت الحلال يا مخنق

No Fear said...

saso
السلام عليكم
المدونة منورة
الله يبارك فيكي
الحمد لله هو مفيش حاجة بقيت تفرح بس أهوة خير من ربنا بردوا
الحمد لله
أخبارك انت أية و مفيش تدوينات جديدة ليه
يارب يكون خير
كل سنة و أنت طيبة

No Fear said...

monzer
السلام عليكم
أنت داخل تنبر فيها بقة كمان علي شوية الصحة
كل سنة و أنت طيب
بس أية التعليقات المحترمة دي
:)

saso said...

عليكم السلام ورحمة الله وبركاتة
وانت طيب يا محمد
محاولة الكتابة دلوقتي زي اللي قافل علي ايده باب وبيحاول يغني

بس صعبان عليا المدونة اقفلها برضة :)
الدنيا بتستهبل حبة بس ولا يهمني احنا داخلين علي أيام حلوة.. كل سنة وانت طيب وناجح

زهرة الجنة said...

السلام عليكم ورحمة الله وبركاته

كل عام وانت الي الله أقرب

والف مبروك للنجاح ربنا يوفقك دايما ويكرمك
ربنا دايما كريم معانا وعمره ما بيضيع تعب حد

ربنا يرزقك دايما بالخير والسعادة في حياتك
ويكرمك ويوفقك لتكوين أسرة سعيدة

يا مراكبي said...

بالعكس انا شايف ان البوست ده من اوله لآخره فيه روح جميلة متفائلة .. كفاية خبر النجاح الجميل .. وكويس التفكير الإيجابي في موضوع الأسرة ده .. صحيح إنت مقلق منه جدا في البوست ده بس مجرد التفكير في الموضوع هيلين دماغك حبة حبة

الف مبروك وكل سنة وانت طيب