Saturday, June 27, 2009

عن الأسماك أتحدث

هي كبرت في دماغي فجأة أجيب حوض سمك أنا كان نفسي فيه من زمان خصوصا زي اللي في توم جيري اللي من غير أي تجهيزات و كنت فاكر إنه مفيش كده يعني لازم أي حوض يبقي فيه تجهيزات بس عرفت مؤخرا إنه في ممكن يعيش من غير أكسجين زي اللي كنت عاوزة
المهم نزلن مع صديقي الصدوق من الكلية و أتمشينا شوية في شارع شبرا و أشتريت شبشب أحمر عجب و بعد كده رحت أشتريت بللورة متوسطة و سمكتين نحس مش عارف حتي أسمائهم غالبا يا فانتايل يا إما جولدن المه جيت ظبطت التظابيط و حطيت المية و الأكل الصيني و سميت البرتقالي نيمو و التانية كيمو مش عارف ليه كرهتهم أساسا شكلهم في البللورة اللي بتعمل كعدسة مكبرة كبير قوي و مقرف و نيمو كان بيفتح بقة بطريقة مش كويسة و تخين كده المهم نمت و صحيت لاقيت نيمو إنتقل إلي رحمة الله و كيمو كان لسه صاحي قلت خلاص الحمد لله رميت نيمو و رحت الشغل و رجعت من الشغل لاقيت كيمو أنتقل إلي رحمة الله هو كمان لم أيأس بس نمت الخميس كله من بعد الشغل كان الجو حر و عطشان و نمت و صحيت الجمعة بالليل لاقيت صديقي الصدوق من ايام ثانوي بيتصل بيا تعالي ننزل قلت ماشي و قعدنا علي قهوة و الحمد لله لم أشرب شيشة و رحت علي محل تاني للسمك أشتريت خمس سمكات أتنين جوبي و أتنين فيتر و واحدة جرامي ظبطت التظابيط أبص الأقي الجرامي ماسة الفيتر الرجل و مبهدلة في أمه عملتلها عزل في كيس و أتصلت بالرجل قالي هاتها بكرة و بدلها شوية لاقيت الفيترة الست ماسكة جوزها مبهدلاه قلت اعزل الرجل الهفا ده لحد ما يسترد صحته و صحيت رحت للرجل بدلت الجرامي باتنين زيبرا و حطيتهم مع الفيترة و الأتنين الجوبي لاقيت الفيترة ماسكة الرجل الزيبرا مبهدلة أمه مش عارف أنا أية السمك المتشرد البلطجي اللي أنا جايبه ده رحت عامل حاجة حلوة رجعت الرجل الفيتر من الحجر الصحي اللي كان فيه لوحده في برطمان التانج و عزلت الفيترة الست عقاب لها يمكن تهدي كده و تعرف ربنا في العزلة و في إنتظار المتابعة و ربنا يستر و كنت رميت شوية الصخور المعفنة اللي الست الأولانية بتاعت السمك اللي مات أديته لي هي الست كانت ضحكت علي تقريبا بكلمتين و قالت لي خد الملونين دول علشان العيال تفرح بيهم و أمهم أنا بصراحة أي حد بيقولي كده لو باع لي تراب هأشتريه قلت بشرة خير بس رجعت كرهت الست علشان لم أحتفظ بشئ أشتريته من عندها غير البللورة يعني السمكتين ماتوا و الصخور الملونة رميتها و الأكل حتي بيعكر المياه أشتريت كيس تاني من عند الرجل الجديد و أشتريت مزيل الكلور و أهوة في عملية مراقبة ربنا يكرم الرجل الفيتر يسترد قوته و أرجع له مراته يبقي عندي زوجين فيتر و زوجين جوبي و زوجين زيبرا و ربنا يستر و مش عاوزين أرررر و أنا مشغل لهم موسيقي هادية أهوة خالص علشان ربنا يهديهم كده الله يسامحها الفيترة شكلها جابت أجل الرجل الزيبرا راقد في قعر الحوض أهوة شكله بيطلع في الروح ربنا يسترها بقة مش عاوزين حد يكون لوحده حلو قوي كده أتنين و أتنين و أتنين مش عاوزين حد وحيد
:)))
مش عارف أنا أية الحوسة اللي أنا فيها دي و أية اللي عملته في نفسي ده
أنا تقريبا منمتش طول الليل قاعد مستني ياتري هيطلع عليهم النهار و لا هيحصلوا إخواتهم
لاحول و لا قوة إلا بالله الرجل الزيبرا الله يرحمه
حسبي الله و نعم الوكيل ثلاث سمكات في أقل من يومين
أنا زعلان هأكمل بعدين

8 comments:

Unknown said...

السمك زي حيوانات كتير بيجيله اكتئاب لما بيغير مكانه اللي عايش فيه

كمان الاكل الكتير بيلوث المايه

خلي بالك من الحاجات دي

المهندس said...

الاخ / محمد
بصراحة اضحكتني جدا بهذة البوست الجميل... اضحك الله سنك.
ثانيا : الواضح انك حاطط البلورة قدام التلفزيون ... فعشان كده السمك بيتعلم العدوانية ... ابعده عن التلفزيون ... التلفزيون به سم قاتل.
ثالثا : السمكة المفترية دي اللي ماسحة ببقية السمك قاع البلورة ... رأي انك تدور عليها .... اكيد متنكرة ... وهي لا " فيترة " ولا حاجة .... دي " عترة " ومش بعيد لو دورت في اوراقها تلاقيها منضمة " للحزب اللي بالي بالك " انا رأيي لو استمر الوضع كده ....تاخد البلورة وتتبرع بيها لاقرب قسم شرطة... اريحلك
رابعا : .. يعني هوه ده مش قر ... بس الواضح انه الامور سالكة معاك ... كل ده سمك تشتريه ... يبدوا انك غير متأثر بالازمة المالية العالمية ... وعشان كده ... هنتقدم بطلب للوزير " الغالي " انه ياخد قرض منك ...بدل ما انت عمال تبعتر في الفلوس علي السمك كده
خامسا : مدونتك ظريفة ... واتمني لك استمرار " التدوينات " ذات المذاق المحبب

No Fear said...

إسراء
السلام عليكم
ربنا يجازيكي خير علي ملاحظاتك بس أنا خلاص شفت بعيني محدش قاللي بس بجد متعة
ربنا يبارك في الباقي
الفيتر الولد الله يرحمه هو كمان
:(((

No Fear said...

المهندس
السلام عليكم
تشرفت بزيارة حضرتك
و ياريت تتكرر تاني يعني
أنا بالعكس مش حاططهم قدام التلفزيون و بيناموا بعد العشا علي طول
السمك بتاعي مستقل مش منتمي لأي تيار
مش عاوزين مشاكل ربنا يكرمك
الحمد لله ربنا ميسر الحال و كله تمام بس السمك ده مش غالي علشان تبلغ غالي يعني السمكة بتلاتة جنيه
ربنا يكرم والله و التدوينات المبهجة دي تستمر علشان ربنا ما يوريك التدوينات السودا اللي بتكون هنا
تشرفت بزيارتك و ياريت تتكرر
:))

انا ماما said...

ههههههههههههه
تعرف
والله بقالي فترة طويلة طالعه في دماغي اجيب سمك في بلورة زي اللي بشوفة في توم وجيري بردو
بس بعد تجربتك دي خلاص حرمت تفكير
ربنا يرحم نيمو وكيمو
والراجل الزيبرا
ويخليلك الباقي يتربو في عزك
سلام

مـحـمـد مـفـيـد said...

ههههههههههههه
ياع موانت ليك في السمك ؟
يا طوله بالك
المهم انت عامل ايه ؟
ما المدونه ميه ميه اهي
والحياه زي الفل
:))))))))))))))

No Fear said...

pinky
السلام عليكم
و الله جمييييييييييييل جدا ياريت فعلا تجيبيه حلو قوي
بس ممكن تاخدي نصايحي يعني
:)
أول نصيحة متشتريش حوض سمك
:)))))))))))
التانية أشتريه و هاتي نوع واحد بس الجوبي كتييييييييييير و كيش صخور ملونة
و هتلاقي حاجة وهمممممممممممم

No Fear said...

مفيد
السلام عليكم
أنا ليا في كل حاجة ياحج أنت مش عارفيني و لا اية؟
ياربي علي الأررررررررر بتاعك بلاش الحقد ده
:)))
هنتقابل يوم الثلاثاء جاي و لا لا