Saturday, March 28, 2009

السلام عليكم و رحمة الله
عملا بما لايفعله بعض الإصدقاء هأكتب بوستات ورا بعض يعني لسه منزل واحد أمبارح و هانزل واحد طويل النهاردة معرفش طلبت معايا رغي
المهم
الكلام النهاردة كتير
علشان الناس اللي مش فاضية تقصر من الأول
و للأسف في حاجات كنت مجهزها بس في ناس سبقتني و كتب عنها
:)
كان في موضوع بأجهزه من زمان لاقيت الصديقة كوشيا للأسف كتبت واحد زيه و الموضوع التاني الأهرام كتبت عنه النهاردة
المهم
نبدا بالموضوع اللي الأهرام كتبت عنه النهاردة موضوع هل تتحول بؤر المخدرات بالقليوبية لباطنية جديدة
أنا شغلي في العبور و انا راجع ساعات الطريق الدائري بيكون مقفول فبناخد طريق خلفي كده أسهل نوعا ما المهم من فترة انا عارف الطريق ده بعد الإنتقال للشغل الجديد كنت في الطريق بأسمع اللي معايا في العربية بيقولوا هنا كوم السمن و الجعافرة و حتت تانية مكنتش واخد في بالي و يوم بعد يوم فهمت و عرفت إن الحتت دي معروفة لعامة الشعب إنها مصدر و معقل تجارة الحشيش في مصر تقريبا كنت بسأل نفسي لما الناس التعبانة اللي معايا في الشركة و متعرفش في حياتها غير الشغل و البيت و معاناة العيشة تعرف الحتت دي أومال فين الجهاز اللي يسمي المباحث و مكافحة المخدرات و كنت بسأل هم فين و بيعملوا أية؟
و جه طبعا في دماغي علي طول موضوع النخيلة و سيد حنفي اللي لحد دلوقتي مش عارف هو أعدم و لا هرب و كمان أفتكرت حملة كان قام بيها حبيبي مصطفي الحسيني أسمها أفضحوا تجار الكيف
و قلت هو الموضوع ده شغل مين الناس و لا البوليس و المباحث و طبعا الناس هتتبرع و تقول الشرطة فيها ناس بتاخد فلوس من الناس دي و حاجة مقابل حاجة زي فيلم الجزيرة كده
بس انا هأطلع طيب و أقول لا الشرطة مش بتعمل كده
بس الشرطة بتعمل أية؟
كانت فين اول ما المناطق دي أتعرفت و قويت كده معتقدش إنها طلعت فجاة و لا هبطت من السماء أكيد كانت لهم بداية و طبعا لما سكتنا عليهم كبروا للدرجة دي
و الشرطة للأسف و الجرايد حتي متحركتش جامد غير لما بدأ إستشهاد الظباط واحد ورا التاني لحد ما وصلوا تلاتة دلوقتي هنا كرامة الشرطة أتجرحت و بدأت في التتضييق عليهم و وضع الأكمنة و كأن مسئولية جهاز الشرطة حماية نفسه بس و الشعب لا
أكيد في ناس أبرياء كتير ماتوا هناك في خناقات و مشاجرات مكنش لهم علاقة بيها و محدش أتكلم و لا بان لهم أثر حتي
يارب الشرطة تنجح في السيطرة عليهم سريعا و في نفس الوقت تمنع وجود بؤر جديدة في مكان تاني
.
الموضع التاني
الجواز
:)
مش عارف أحيانا بيكون نفسي أتجوز علشان يكون عندي اولاد بس هو ده السبب الوحيد اللي بيخليني نفسي أتجوز بس في نفس الوقت خايف من حاجات كتير الجواز في حد ذاته مسئولية كبيرة
و خايف أظلم اللي أتجوزها لأني هأطلب منها تكون حد تاني انا نفسي فيه و هي مش هتفهم أنا باعمل كده ليه و خايف يكون في ده خداع ليها
و خايف منجحش في الجواز و مسئوليته
و نفسي اعرف مراتي المدونة بتاعتي و مخافش من اللي كتبته هنا قبل كده
ساعات بيكون نفسي اتجوز واحدة مدونة تعرف المدونة هنا علشان تقصر علي حاجات كتير و خلاص و هي تبقي فاهمة كل حاجة
و خايف أكون أب فاشل و زوج فاشل
و كمان في نفس الوقت نفسي ميكنش في شئ حد يلوي ذراعي بيه يعني لو في أي وقت حبيت أسيب الشغل و مفكرش في حاجة و خايف أضيع من أعول و ادخل تحت حديث سيدنا محمد كفي بالمرء ذنب أن يضيع من يعول
و الظروف و الجو و البيئة اللي حوالينا خليت تربية الأولاد شئ صعب قوي وسط البيئة الفاسدة اللي إحنا عايشين فيها
و كمان في حاجة خايف أكون ضعيف قدام أولادي
يعني تخيلوا كده واحد ماشي في الشارع لا ليه و لا عليه يلاقي واحد بيرمي بلاه عليه في الشارع و طلع عربجي و لا حاجة الواحد هيعمل أية لو معه عيلته
و كمان تخيلوا لو واحد سايق عربيته و دخل شارع غلط و أتجاه عكسي ممكن يتحبس فيها
:)
.
الشغل
الحمد لله الدنيا تمام في الشغل و مدير المصنع متهاون معايا شوية و أنا بدات أدخل الجو الحمد لله بس لسه طالب مني حاجات كتير و عمال يطلب و يطلب نوع من أنواع بيديني فرص يعني و ربنا يكرم
الغريب في موضوع الشغل إني مش قلقان مش عارف إيمان الحمد لله إن شاء الله و لا لامبالاة و بطيخ لا قدر الله
.
أحلي ما في الحياة عيشة البطيييييييييييييييييييييييييييييييييخ
أصدقائي علي المسنجر عددهم قل الحمد لله لستاشر و علي الفيس بوك إنهار العدد للعشرينيات و من أخر شهر فبراير الحياة لوووووووووووووووز و بطيييييييييييييييييييييييييييييييييخ و معرفش حاجة عن أي حاجة
و السلام ختام

5 comments:

نبض اسكندرية said...

هو مافيش ملخص للبوست

انا مقدرتش اكملة والله

هحاول مرة تانية وارجع

:)

نبض اسكندرية said...

كملتة الحمد لله

بالنسبة لموضوع تجار المخدرات دول

انا شايفة ان الموضوع عمال يوسع وحتى بيع المخدرات بقة فى الشارع عينى عينك

وكأننا رجعنا فى زمن الفتوات

هما شكلهم عملوا السجون للناس الحرامية بس ولا اية؟

بالنسبة لموضوع الزواج انا مش هاقولك غير ربنا يعنيك ويقويك

بفضل انك نستعين بربنا وانت بتختار العروسة واسمع كلام الحبيب صلى الله علية وسلم
فاظفر بذات الدين طربت يداك

وهو لا ينطق عن الهوى صلى الله علية واله وسلم

واكيد لما تشوف البنت المحترمة المتدينة اكيد هتساعدك ومش هتخاف انك تقولها على اى حاجة وان كان امر المدونة دة موضوع سهل وممكن ان شاء الله تبقة تشاركك فية وفى المواضيع اللى تنزلها

ربنا يصلحلك شأنك
دمت بخير
خالص تحياتى

No Fear said...

نبض أسكندرية
السلام عليكم
أنا قلت هتحاولي بعد كم يوم مش في نفس الوقت كده
:)
المهم
ماشي عملوا السجون للحرامية بس عملوا بقة مكافحة المخدرات ليه
.
بالنسبة للجواز
الحيرة مش في أختيار الزوجة دي لسه حيرتها حيرة تانية بس زي ما قلتي كلام سيدنا محمد يغني عن أي حاجة
الحيرة الحالية في الخطوة نفسها مش قادر اخدها خالص
خايف و ساعات إحساسي بالوحدة و العيشة مع نفسي بيكون حلو و ساعات بيكون مش حلو خالص
مش عارف أعمل أية
.
بلاش موضوع الأهلي ده
مش هنتفق ماشي
:))

يا مراكبي said...

الجواز ما يخوفش خالص وكل الل قلته ده شوية مخاوف هتزول لما تخوض التجربة

تحمل المسؤلية شيء جيد وهتعتادة .. والمسؤولية دي ما تجيش حاجة أبدا جنب المزايا العديدة اللي هتجنيها بالزواج

مـحـمـد مـفـيـد said...

صدقني يا ابني
علاجك الحواز
سيبك من الاوهام دي