Saturday, February 14, 2009

الإحتياج

إحساس الإحتياج إحساس صعب قوي
ممكن الواحد يكون نفسه في حاجة ويحاول يحققها و ميقدرش يحققها بس لو هو نفسه في حاجة و حتي محرم عليه المحاولة لتحقيقها شئ صعب أكتر
.
من ساعة أما عرفتها كان نفسي أي مناسبة تمر علينا علشان اجيب لها هدية للأسف عرفتها بعد عيد ميلادها و ملحقناش نوصل لأي مناسبة بعد كده غير مناسبة الفراق
الشئ الوحيد اللي هي حققته معايا و كان نفسي فيه كان اليوم اللي قضيناه مع بعض في حديقة الأزهر
انا كنت رحت قبل كده حديقة الأزهر مرة لوحدي و قعدت أصور صور مع نفسي و نزلت الصور دي هنا
و دعيت ربنا إني أجي مرة مع حد بحبه هنا و نقضي يوم مع بعض
و تاني مرة أقابلها أتفقنا نروح حديقة الأزهر
حسيت إنك قربتي مني قوي قوي قوي اليوم ده
.
معلش انت كنتي طلبتي مني السكوت و عدم كتابة أي حاجة عن تفاصيل بينا بس بجد اليوم ده يوم صعب قوي علي حاولت مكتبش بس لاقيت نفسي هأنفجر و مش عارف أعمل أية
فقررت أكتب
المهم اليوم اللي روحنا فيه حديقة الأزهر كان نفسي أطلع لساني للناس و للدنيا كلها و أقولهم خلاص مبقيتش لوحدي و مش محتاج منكم حاجة
بس للأسف الدنيا هي اللي بتتطلع لسانها ليا دلوقتي
.
في موقف غريب حصل لي اليوم ده أول مرة أقولك عليه اليوم ده كان يوم جمعة قابلت فيه واحد صاحبي بعد الصلاة من الطفولة و قعد ينصحني و يقولي الدنيا فيها حاجات كتير غلط و لازم نعمل الصح و نصحني إني أروح أتعلم علوم الدين في معهد و أحفظ قرأن غالبا علشان مسمعتش كلامه اليوم ده المفروض بعد اللي كان قاله لي مكنتش قابلتك بس أنا قابلتك فغالبا عقابي من ربنا علي اليوم ده الإحساس اللي عندي اللي مش قادر أوصفه لحد دلوقتي إحساس أقرب للموت و محاولة خروج الروح بس مش عاوزة تخرج حاسس إنها واقفة عند رقبتي و كل أما تيجي تخرج خلاص ترجع تاني و تاني
.
كان نفسي أبعت لك رسالة أقولك هابي فالنتين و اللي وجعني أكتر إني حسيت إنك مستنية إني أبعت الرسالة دي و أنا خذلتك و مبعتهاش بس هو ده الصح
.
في الأخر بقة لازم أعتذر لكل الناس اللي للأسف بتحترمني و بتدخل عندي هنا و أنا خذلتهم و خصوصا البنات منهم و نزلت نمرة تليفوني هنا و بعتها للي عندي إيميلاتهم
بس بجد كان نفسي أكلمها قوي و كنت باحاول بكل الطرق إني متصلش بيها و كان أحد الحلول إني أسمع صوت اي بنت أو أخرج مع أي بنت و ده اللي خلاني أنزل النمرة هنا
معلش سامحوني
.
ده حتي في بنت مالهاش علاقة بالتدوين حظها اللي مش كويس في يوم خلاها تتدخل علي مدونتي غلط و عجبها كلامي و ضافتني علي المسنجر و تخيلوا واحدة أول مرة تتكلم معايا أديها نمرة تليفوني هي تقريبا خلاص اخر مرة كمان و هي غالبا مش هتعرف توصل للمدونة تاني
أنا أسف لها بردوا
.
بس بجد أنا عاوزكم تعذروني و تسامحوني و تدعوا لي ربنا يخفف عني و يهديني و يرحمني

20 comments:

Unknown said...

ربنا يخفف عنك و يهديك و يرحمك

barbie girl said...

السلام عليكم

عجبتنى اوى دى

إنما الأمم الأخلاق ما بقيت
فإن هم ذهبت أخلاقهم ذهبوا

انت حاطتها على مدونتك

.................

بص اللى فهمته انك كنت فى علاقة وانتهت
وانك كنت عايز تخرج مع اى بنت وخلاص عشان تثبت لنفسك انك مخسرتش حاجة.. بصراحة انا مدخلتش على مدونتك قبل كدا بس استغربت من الصراحة اللى انت كاتب بيها وحكاية انك نزلت رقمك على المدونة مش عارفة ياريت انت تحكم لو انت دخلت على مدونة حد سواء ولد أو بنت ولاقيته منزل رقمه او ايميله على المدونة ايه هى الكلمة اللى هتقولها عليه او عليها وياترى هتدخله مدونته تانى وللا لاءة؟؟؟؟؟؟؟

ياريتك كنت سمعت كلام صاحبك ولو حتى كنت بتحبها كنت دخلت البيت من بابه مش من شباكه

.............

مش عارفة اذا انت هتنشر التعليق اصلاُ وللا هتمسحه بس انا قلت اللى كنت عايزة اقوله وخلاص

وربنا يفك كربك ويحطك على الطريق الصح ويرزقك ببنت الحلال اللى تملاء الفراغ اللى فى حياتك بس بالطريق الصح.. يعنى طريق الباب وليس الشباك

No Fear said...

إسراء
السلام عليكم
سعيد بسرعة تعليقك الحقيقة
:)
.
ربنا يسمع منك يارب و يعفو عني

No Fear said...

barbie girl
السلام عليكم
لا طبعا مش همسح التعليق
.
أنت في حاجات فهمتيها غلط
أولا أنا ملحقتش أدخل و لا من باب و لا من شباك الموضوع كبير
.
أنا كمان مش عاوز اخرج مع بنت علشان أثبت لنفسي إني مخسرتش
بصي لو عاوزة تفهمي الموضوع أقري البوستات القديمة
لو عندك وقت
:)
.
ياريت فعلا
الحمد لله علي كل شئ
.
مهو أنا عارف إن اللي عملته غلط خصوصا إن الناس اللي بتتدخل عندي محترمة و هي بتحترمني
علشان كده أعتذرت لهم
شكرا لمرورك
ربنا يكرمك و يستجيب لدعوتك

زهرة الجنة said...

السلام عليكم
لما دخلت المدونة عند حضرتك شدني شيئين
الأول صورة المصحف
التاني الأية الموجودة فوق صورة المصحف
اكدي عارف الأية الكريمة بتقول ايه
طيب هاذكر حضرتك

قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ
صدق الله العظيم

أننا نغلط ده شيء عادي لأننا بشر
ولأننا بشر بنغلط ونتعلم
ولو مش غلطنا مش هنكون بشر ولا هنتعلم
اي تجربة بتمر بيها في الدنيالازم نتعلم منها شيء جديد يمكن بنتألم وبنتعب لكن في الأخر بنتعلم
ودايما دايما قول الحمدلله علي كل حال
حضرتك مش تضمن الخير فين

اسمحلي أحيي حضرتك علي اعترافك بخطأ ان عملته في وقت من الأوقات دي شجاعه كبيرة جدا

اعتذر للأطالة
وادعو الله ان يخفف عنك ويهدينا جميعا
دمت بحفظ الله ورعايته

يا مراكبي said...

إنسى بقى كل للي فات وإبدأ من جديد .. بلاش تتجرع الماضي كده

صاحب المضيفة said...

ربنا يرضى عنك ويرضيك ويهدي بالك ويريحه يارب


تحياتي يا صديقي

MerMaid said...

plz try to change alittle bit ,do something in ur life actually get a life.
you are crying over the spilled milk and nothing will ever get back together.
try to be useful and optimistic,maybe you have nothing else to think about but ur beloved one who left you or u left her it doesnt matter,get ur head out of the gutter,take a deep breath and MOVE ON.

dodo said...

السلام عليكم ولا ثانيا انا مبسوطه انى لاقيت لاول مره شاب بيحب وبيحب بجد مش زى الشباب اللى يقول تروح واحده تيجى عشره رغم ملاحظاتى على اخطاءك بس هى دى طبيعة البشر انها بتخطأ وربنا يسامحك ويسامحنا واحترمت فيك كمان انك ظهرت ضعفك امام حبك ربنا معاك ويرزقك باللى تقدرك وتقدر حبك

روح said...

ربنا يهديك ويثبتك علي الحق
بس ماتعملش كدة تاني
ماشي؟؟
خلي دة كله بينك وبين ربنا
واجمد
كلنا بنغلط
بجد بنغلط
والمهم نرجع بسرعة
ان شاء الله هعمل عمرة قريب
وهدعيلك انا بقولك عشان تفكرني لو نسيت
ماشي

mulan said...

ربنا يخفف عنك يا محمد يا رب بس انت الي تاعب نفسك اصلا دي حاجه شكلها في طبعتك حاول بس متقعدش مع نفسك كتير وتبطل تفكير واكتئاب اصل دا كتير اوي الي بتعملوا في نفسك دا والله المهم ربنا يهدي

No Fear said...

زهرة الجنة
السلام عليكم
تشرفت بزيارتك
أنا عارف و الله كل اللي قلتيه بس مش قادر بجد
.
الحمد لله علي كل شئ

No Fear said...

يامراكبي
السلام عليكم
أخبار حضرتك أية مش هنشوفك في مصر تاني قريب
.
و الله مش بمزاجي أنت تتخيل يعني أنا فرحان بحالتي دي
الحمد لله

No Fear said...

صاحب المضيفة
السلام عليكم
ربنا يبارك لك و يكرمك يارب

No Fear said...

MerMaid
السلام عليكم
أزيك أخبارك أية؟
يارب تكوني بخير و في أحسن حال يارب
.
مش سهل و الله أنا بحاول و ربنا يكرم

No Fear said...

dodo
السلام عليكم
كويس اهوة في شئ إيجابي في الموضوع
مش عارف ليه في ناس كتير قالت لي كده
هو الرجالة أة جامدة شوية بس عندها إحساس و الله
.
الحمد لله علي كل شئ
تشرفت بزيارتك
ربنا يتقبل دعائك

No Fear said...

روح
السلام عليكم
ربنا يكرمك و يستجيب لدعائك

No Fear said...

mulan
السلام عليكم
يارب
نفسي و الله أفرح كده و أرجع زي ما كنت
أستمري في الدعاء ربنا يكرمك
.
أنت مش ناوية تكتبي بقة

rona said...

ربنا يخفف عنك
الايه الكريمه تقول لك ذلك

No Fear said...

Rona
السلام عليكم
يارب