Friday, November 28, 2008

فضفضة من بتوع زمان

السلام عليكم
ازيكم يا شباب أخباركم أية؟
يارب تكونوا بخير
عندي كده كم موضوع نفسي أقولكم عليهم
أولا أحب أطمنكم أنا غالبا تخطيت مرحلة إفتقادها من ناحية التعود علي عدم وجودها بس اللي مش متخيلة إني ممكن الأقي حد أي حد ممكن يجي مكانها هي دي المشكلة القائمة
و بالنسبة لموضوع التعود علي عدم وجودها مشكوك فيه علشان أخوكم حاليا مشغول بحاجة تانية و هي موضوع الشغل و إن شاء الله هأقدم الإستقالة يوم الأحد و ربنا يستر هي الشركة التانية بعتت لي عرض الشغل خلاص بس اللي مش عارفة الشركة اللي أنا فيها دلوقتي هتخلص الإستقالة بسهولة و لا لا و طبعا لو لا الشركة التانية مضمنش ممكن تستناني لحد أمتي أنا يعني مش أحمد زويل
يلا ربنا يستر
أخوكم في حالة عجيبة
لدرجة إن الحلاق أمبارح و أنا باحلق قالي مالك تحت عينك أسود ليه قلتله من قلة النوم قالي فاضي شوية و أنا أظبطك قلتله فاضي علشان مكنتش عاوز أروح علي طول هأقولكم ليه بعد شوية المهم سيبت نفسي للحلاق من الساعة حداشر و نص لحد الساعة واحدة و ربع معرفش كان بيعمل أية و أية الفرق بس السواد اللي تحت عينيا راح شوية الحمد لله
سبب السواد ده غالبا إن أنا مهما أنام لازم أقلق طول الليل و بأصحي بالأقي نفسي فايق جدا بس مش باكون نمت كتير يعني لو دخلت نمت الساعة حداشر لازم أقلق الساعة واحدة لو دخلت نمت الساعة سبعة لازم أقلق أكتر طبعا بالمناسبة نمت الساعة سبعة يوم ماتش الأهلي للأسف مشفتوش و هو بيتغلب يمكن النحس عندي
المهم بأصحي كمان الأقي نفسي في وسط التفكير يعني بأفكر و أنا نايم
و اللي مضايقني أكتر إني بقالي فترة طويلة قوي مصلتش الفجر في الجامع و نفسي أصليه في الجامع أصحي و أقلق دايما بيكونوا بيصلوا
.
تخيلوا الرجل اللي مطفشني من الشغل بقالي سنتين و شوية في الشغل و عارف إنه ساكن قريب مني و النهاردة أشوفه بيصلي الجمعة معايا و بالمناسبة هو مسافر يحج يوم الأتنين يعني لو أستندل و ممضاش الإستقالة يوم الأحد يبقي أنا كده لبست و لا مني طولت الشغل الجديد و لا ينفع أرجع الإستقالة و ربنا يستر
و بمناسبة إنه مسافر يحج ربنا يهدي بس أنا إن شاء الله ماشي ماشي
.
الشغل الجديد بالنسبة لي تحدي شخصي علي إنه مش فارقة
بس بيني و بينكم لو جد في الأمور أمور و ملحقتش الشغل بعد الإستقالة محدش منكم يدخل هنا المدونة هتبقي بلااااااااااااك أكتر من اللي هي فيه
الشغل ده مهندس إنتاج يعني بأتعامل مع عمال من جميع الأنواع و ناس أقل و أعلي منك في التربية و التعليم و الشغل في حركة و تنطيط و سهر و ورديات و بلا أزرق و ربنا يستر بردوا
بس أنا مرتاح للشركة الجديدة إن شاء الله شكلهم عندهم نظام محترم و عندهم حاجات بسيطة توحي إنهم ناس بتفهم و بتستغل كل حاجة صح و ده طبعا لأنها شركة خاصة بتاعت واحد له مجموعة كبيرة و دي شركة صغيرة من شركاته هو نشاطه الأساسي مش في مصر و ربنا يسهل
يعني مش مال سايب زي الشركة اللي أنا فيها يعني حتي لو الرجل بهدلني هيبقي أسمه بفلوسه لا مؤاخذه يعني
و ممكن أنتقل للمعيشة لوحدي قريب من الشركة و أخد شقة و أقعد هناك علي طول
.
البيت بقة
ركزوا معايا قوي
حصلت أمبارح مواجهة عنيفة ليست في الصوت لكن في الموقف نفسه أنفجرت في بابا و ماما بس مش بقلة أدب الحمد لله قلتلهم كل حاجة خنقاني
بالمناسبة كنت قلت لبابا كمان عن القرف اللي في الشغل اللي كنت شايلة في قلبي من سنتين وشوية
المهم كانوا بيقولولي علي موضوع و قالولي الموضوع ده لسه قريب و مكناش عاوزين نشغلك علشان موضوع الشغل قلتلهم موضوع الشغل ده من أربع أيام والموضوع ده من أمتي قالولي من قريب قلتلهم لا مش من قريب الناس كلها تعرف و مين جه كلمني عن الموضوع ده الموضوع ده و أنا أضطريت أعمل نفسي عارفو الموضوع ده بقالوا تلات أسابيع بأمارة كذا و كذا و حصل كذا و كذا و محدش رد و انتم كذا و كذا هم أنتم فاكرين إني هأزعل ليه
الغريب بقة إنهم مردوش يعني أنا صح و هم غلطوا في حقي و هم مقالوش السبب و مش مشكلتي السبب المشكلة الأكبر إن أنا كنت متخيل بالمناسبة أنا مكنتش متخيل اليوم ده يجي أصلا الغريب فعلا إن انا مش مرتاح مش عارف ليه بالرغم من إنا قلت كل اللي كان نفسي فيه و هم مزعلوش مني و لا غلطوني بس أنا مرتحتش مش عارف ليه؟؟
يلا معلش دوشتكم شوية كمان
و متنسوش الدعوات علشان لو الشغل حصل فيه لغبطة هتشوفوا أيام هنا مش عاوز أقولكم و بالمناسبة لو أشتغلت الشغل ده غالبا هأغيب شوية علشان هتبقي الدنيا طحن و بهدلة
يلا تصبحوا علي خير
و أياكم تنسوا تصوموا أيام ذي الحجة اللي هتبدا من بكرة إن شاء الله
كل سنة و أنتم طيبين
:))))))

9 comments:

انا حره said...

بحب انا الفضفضه دى جدا رغم انها مش بتعجب الناس

بحسهم عاوزين يسمعو اخبار حلوه وكلام يضحك وبس يجو بقى عند النكد ويقولو سورى مالناش فيه مش ناقصين

بيتهيالى ان كل القلق اللى انت فيه اساسه حبيبتك وجه الشغل زودها كمان

المشاكل لاتأتى فرادى ومشيها مشاكل عشان ربنا يكفيك شر المصائب يارب

كل سنه وانت طيب وربنا يكرمك فالشغل الجديد عشان اظن انك محتاج لبارقه امل او طاقه نور حاجه تفرحك من الاخر عشان ميبقاش كله سواد فسواد كدا

صاحب المضيفة said...

جميل الفضفضة دي

ربنا يكرمك يارب ويعزك


ادعي واستخير بس وربك كريم يا جميل


كل التحية

Unknown said...

كل سنة وانت طيب

وربنا يوفقك في الشغل يارب

kochia said...

والله الشغل احسن حاجة فعلا تخلي الواحد باصص للامام
واترك التفكير في موضوع مين يجي مكان مين
كل واحد ربنا خالقه مكانه محجوز من غير ما يجتهد .. هو بيوصل لوحده

ربنا يوفقك

يا مراكبي said...

إنت حالتك دي محتاجة تغيير ضخم عشان كده بأنصح بالتغيير للشغل الجديد

حياة جديدة وريتم جديد للحياة هيغير كتير من كل حاجة فيك

إنت محتاج تغيير

انسااااااااانة....غريبة said...

ههههههههههههههههههههههههههههههههههههههههههههههههههههههههههههههههههههههههههههههههههههههههه



مش ممكن بجد فضفضة غريبة جدا نا حسيت انى قاعدة معاكوا على المستبة

فى حاجة لازم بجد اعرفها اشباعا لفضولى الحلاق عمل ايه للسواد تحت عينك مش فاهمة ايه دخل الحلاق فى ده؟؟؟؟


ربنا يوفقك يا رب ومتياسش كده وخليك متفاؤل

وانت كده صح اشغل نفسك بالشغل وصحابك وانت هتنساها


ربنا يوفقك للخير يا رب

maioya said...

كل سنه وانت طيب
وعيد سعيد عليك
وكويس الفضفضه اهم حاجه
تطلع اللي في قلبك:)

saso said...

كل سنة وانت طيب
وفي شغلك هوا هوا بلاش دلع

:)
عيد سعيد يافندم

kochia said...

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)