Monday, November 03, 2008

العيل رجع في كلامه زي ما كنت متوقع

أفكار مبعثرة
هو عنوان بلوج حد صديقي بس مش فاكر مين حاليا
من كم يوم
نفسي أكتب بوست جديد
عنوانه
.
عدنا و الحمد لله و لكن للأسف أضعف ههههههههه
فكرته إني مش قادر أنساها و مش عاوز أنساها و هأعيش كده و هأستمر في الحياة لوحدي و أكمل لوحدي جت علي دماغي فكرة إننا ممكن نكمل كأصدقاء بس مش عارف هتنفع و لا لا
حتي الشغل مش مظبط خالص اليومين دول و الناس بقيت وحشة قوي و الله و كل أما علاقتك تزيد بهم سوادهم بيبان لك أكتر
أسوأ حاجة تلاقيهم بيصلوا و عايشين لي في دور المؤمنين
الله يخرب بيتهم
.
حاولت انساها بكل الطرق مش قادر حاولت أكرهها مقدرتيش حاولت أقول عليها عادي و هتلاقي واحدة تانية يمكن أقدر أنساها مقدرتش
سمعت أغنية أم كلثوم أهرب مني قلبي أروح علي فين ليالينا الحلوة في كل مكان ماليناها حب إحنا الأتنين و مالينا الدنيا أمل
أمل
.
مش عارف ليه معلق معايا اليومين دول الحتة اللي كنتي هتقعي فيها عند جروبي فاكرة لما كنتي هتقعي
:)
.
ساعات بأنساها خالص و أحس إنه خلاص الفترة الصعبة عديت
و الغريب إني بأفتكرها و أنا فرحان قوي و أنا زعلان قوي
و أنا فرحان فرحتي بتقل و ساعات بتروح و أنا زعلان بأقول كلام أقرب للكفر لربنا و أنام
أستغفر الله
.
من كم يوم
محمد مفيد أتخانق معايا
و قالي يا تنساها يا أما مش هأكلمك
و الله أنا نفسي أرتاح يا محمد
.
انا خلاص حاطط قطرة فايزين تحت المخدة للطوارئ لإزالة الإحمرار
بقالي فترة بأحاول أقرا يوتوبيا و مش عارف طبعا واحة الغروب في الدولاب و غالبا مش هتتقري
.
الأتنين الصبح
و أنا في طريقي للدورة لنفسي عادي ياعم مش مشكلة كأنها موافقتش علي اللي قلته لها ولا أي حاجة تانية
الحمد لله علي كل شئ
بأسمع أغنية علي الحجار علي قد ما حبينا و جت علي دماغي أغنية عيد ميلادك لمحمد فوزي هأنزلها لما أروح
الأتنين بردوا و أنا في الدورة
جت علي بالي و تعبت قوي و افتقدتها قوي مش عارف ليه
الأتنين بردوا
بأتفرج علي برنامج للغيطاني علي دريم قاهرة نجيب محفوظ أكيد طبعا أفتكرتها قوي
و العجيب إني قلت لنفسي أنت كنت هتعتمد عليها كتير في حياتك ليه متعتمدش علي نفسك
و كنت جامد قوي
:)
دلوقتي بقة
أفتكرتها قوي
رحت طلعت الكلام اللي قلناه علي المسنجر بعد أخر يوم كنا مع بعض و الحمد لله قفلته قبل أما الأمور تتطور قوي
هأكتب البوست ده علي الوورد و أنام مش عارف هينزل أمتي و هينزل و لا لا
بعد ساعتين تقريبا كل سنة و يويو طيب
ياتري هتديه الهداية أمتي و إزاي
.
رحت من كم يوم مقابلة لشغل جديد يارب أقبل و خلاص
حتي لو أية علشان شكلي هأضرب حد في الشغل اللي أنا فيه و ربنا يستر
.
من كم يوم بردوا
أديت لأول مرة لينك المدونة لصحابي من الكلية زيمو و منصو زيمو خلص المدونة تقريبا و الحمد لله لاقي بوست مكتوب عنه و منصو مش عارف هو فين غالبا راح ورا اللانهائية و ما بعدها
و حكيت طبعا لهم عن الموضوع ده
زيمو سألني يوم بعدها ليه مكنش باين عليك حاجة قلتله علشان الناس مش هتستفاد حاجة لما أنكد عليها و مش هتحل لي مشكلتي قال لي تفكير غريب قلتله عارف مين اللي علمني كده قلتله هي
حكيت لواحد صاحبي تاني عن الموضوع شردت لنفسي جامد أنا اليومين دول كويس إني مش بأركب المترو كان زمان مصر كلها عرفت
حكيت له قالي مش مصدق اللي أنت بتحكيه عنها ده قلتله صدق قالي هو لسه في حد كده أنت صعب تلاقي زيها تاني
و الغريب إنه لفينا بالعربية شوية و أشتري لب من الرجل اللي أنت أشتريتي من عنده لب لأختك فاكرة
حاليا اليومين دول فاتح حساب دائم علي البستان يتضمن شيشة تفاح بتنزل لوحدها و ينسون و نسكافيه بلاك الحساب ستة جنيه أو سبعة ونص لو تلاتة تفاح
.
علي فكرة المكان اللي قعدنا عليه في البستان أسمه شاورمة واحد
:)
عارف في ناس هتشتم علشان الموضوع ده بس الله يسامحهم
الله يسامحك خصوصا أنت يا مفيد
.
صحيح مش بتتصل ليه أنت كويس الحمد لله انا بصراحة خايف أتصل بيك انت لسانك طويل و كلامك طوب اليومين دول علي فكرة انا مش زعلان منك علشان طبعا مقدرش بس بجد مش قادر أنساها
الشغل في لخبطة كتير اليومين دول و ربكم يستر و لا نخلص منه كمان أصل الجدول ناقص في حتة مش كاملة نكد
أنا حاليا في دورة تبع الشغل و هتخلص يوم الأربعاء بس بجملة التعذيب هأنزل الشغل بكرة و بعده أي الثلاثاء و الأربع .
قدمت في دورة إنجليزي و طلعت المستوي العاشر أنا مش مصدق لحد دلوقتي باين عليهم كتع اللي بيمتحنونا
.
أمبارح جه فيلم بحبه لتوم هانكس أخويا خنق علي كالعادة و خلاني أقوم خالص

مش عارلاف لما يجي فيلم حلو يجي بدري أنام بدري يجي الصبح مش عارف أعمل أية
.
قلت لماما عن الأخوة و الأخوات اللي زي الفل اللي بأشترك معهم في المشاوير الخيرية اللي مش بأعمل معهم حاجة غير إني بأروح قلتلها عرفتهم من النت قالت لي خلي بالك مش عاوزين مشاكل
أصل لسه في واحد ابن صاحبتها متاخد غلط مع الإخوان
.
بالمناسبة الناس دي عملت لي أحلي عيد ميلاد في حياتي و أشتروا لي هدية أي كلام بس أشتروا معها حاجة كده أسمها مستر شامبنزي شايلة في الدولاب و مهتم بيه أكتر من الهدية شكرا لكم جميعا خصوصا مروة طبعا
و أكيد مش هأنسي لك الموقف ده يا منذر ماشي
.
أية الصداع ده كله البوست شدني قوي و شكلي هأنزله بس مش عاوز عياط
يارب إذا كانت الحياة خيرا لي فأحيني و إذا كانت الوفاة خيرا لي فتوفني
و يارب فرجك يارب و يارب يكون الفرج في الوفاة علشان بجد مش حاسس بطعم أي حاجة في الحياة و حاسس إني مش هأحس بطعم أي حاجة تاني و مش عارف أعمل أي حاجة تاني
كفاية كده علي يارب
الحمد لله أنا راضي بس بجد مش قادر
يارب رحمتك و نهايتي يارب
يارب
يارب
يارب

7 comments:

Bella said...

ازيك يامحمد

ولو اني جاية اخنقك يعني علشان انا صاحبة بلوج افكار مبعثرة

هههههههههههههههههههههههههههههه

ماله بقى ياعم انت البلوج بتاعي؟؟

قول اتكلم

ساكت ليه

ههههههههههههههههه

شوف يامحمد انا مش عايزة اقول لك كلام نظري وصعب يتنفذ والكلام ده

انت ح تفضل فاكرها فترة وده امر طبيعي

وح ياخد منك وقت لغاية ماتنساها

بس يعني ماتحاولش تخرج من التجربة دي بتجربة جديدة حتى لاتظلم احد

يعني ببساطة شديدة لما الشخص يكون خارج من علاقة عاطفية بيكون في حالة عدم اتزان زي المريض اللى في فترة نقاهة
ومفروض انه يمشي بهدوء حتى لايفقد توازنه ويقع

بيكون ماشي دايخ كده وغير متمالك لنفسه

ولهذا افضل الا يدخل في علاقة عاطفية جديدة حتى يستكمل شفاءه ويعود لكامل لياقته العاطفية

وحتى لايظلم من سيتواجد في طريقه وبعد ان يتعافي عاطفيا ستكون التجربة الجديدة عبء على قلبه

علشان كده حاول تشغل نفسك بحاجات ماتفكركش بيها

يعني مش لازم تسمع نفس الاغاني اللى بتستدعي ذكريات معينة
ولا ضروري تروح نفس الاماكن اللى لها ذكريات معينة عندك

حاول يعني
وبمرور الوقت ح تلاقي الشفاء قرب

ولوحدك ح تحس انك مابقيتش بتفتكرها بنفس الشجن الحالي

يعني حاولت اقول لك حل عملي ينفع يتنفذ

وبرضه عندك مساحة ح تلاقي شبحها بيظهر في عقلك

عادي

حاول مرات كتيرة

لغاية ماتنسى
وده بياخد وقت ومجهود

فمتزهق

وماتتصورش الحل سحري ومرد ماتدوس زر ح تلاقي كله راح في الغسيل

واوعي تنسى اسمي تاني احسن لك

هههههههههههههههههههههههههه

مـحـمـد مـفـيـد said...

مش هعلق

مـحـمـد مـفـيـد said...

ومش هكلمك
:(

Unknown said...

والله انا حاسه بيك
لأني عشت الفتره دي من حياتي

بس انت عارف هي وقتها بتحس ان كده خلاص الدنيا جابت اخرها
وان خلاص بجد معدش لاي حاجه لازمه
وتعبت ومعنتش هقدر اكمل وكده كفايه بقي

بس لما الايام تعدي
وكل حاجه تاخد وقتها

منظورك للأشياء هيتغير

ربنا هيساعدك
هيوريك حاجات تقويك
وتخرجك من اللي انت فيه

خليك معاه وادعيه كتير

كل الدعوات اللي دعتهاله في الفتره دي تقريبا بتستجاب دلوقتي

ربنا يريح بالك ويصلح حالك يارب

منى said...

مش عارفه اقولك ايه
ربنا يهون عليك الصعب
ويثبتك على ما يحب ويرضى
ويغفر لك ويرزقك الخير كله
تحياتى

zoomy said...

3aref ennak mesh hate2dar we haterga3 tekteb tani, Welcome back man :)

rege3t we hatensaa we hafakarak ennak neseet :P

mestanni mennak aktar, 3la fekra Tom Hank's movie 3andi 3la DVD ;)

Zoomy

اعشق فى الليل ضوء القمر said...

بص يا صحبى بمر بنفس إللى بتمر بيه لكنى لم أتكلم عنه لأنى كلما تكلمت تذكرت وكلما تذكرت تألمت وكلما تألمت ينزف دما من عينى ومما يزيد أنها كانت زميله لى فى عملى يعنى كل شئ يذكرنى بها ولكنى أجتهد على النسيان
ليس لى غير قول
الله يسهل لها ويبارك لها