Friday, September 28, 2007

السلام عليكم و رحمة الله و بركاته

أزيكم يا شباب

أخباركم أية محدش بيشوفكم ليه وحشني و الله أنا هأحاول أخلص قبل أما البوابة يكلمني علشان كان معايا علي التليفون دلوقتي و هو شكله مش هايسيبني غير لما أروح معه

المهم

البوست ده لازم يكون له مقدمه ليه بقة علشان أنا هاتكلم كالعادة عن حاجات كتير منها شخص عظيم و محترم و هو رمز بالنسبة لناس كتير بالرغم من جهلي به بس أنا هأمحو جهلي به قريب و منها حاجات خنقتني و ٍاستفزيتني و منها حاجات تافهة نوعا ما بس أنا حابب أتكلم عنها

أولا الشخص المحترم الرمز بالنسبة لناس كتير هو الأستاذ أبو الفتوح شوشة أنا بصراحة معرفتي به من خلال المدونات بس و إن ناس كتير بتطالب بإطلاقه من محبسه و صاحب البوابة عامل البوست الأخير عنه و بيقول أنه أتنقل للمستشفي في حالة حرجة و هناك من الإهمال الكتير تجاهه

أنا شايف في الموضوع ده أمل كبير قوي يعني تخيلوا معايا إنسان عنده ثمانية و سبعون سنة مسبب خوف لهذا النظام العسكري يبقي فعلا الخوف موجود في نفوسهم لدرجة أنهم خايفين من إنسان عنده ثمانية و سبعون سنة

يارب يكون عندنا دم و نزيل الخوف من جوانا بقة

أنت خصوصا خلي عندك دم و حس علي دمك


.

الموضوع التاني

أنا من أول رمضان مصليتش التراويح غير أول ليلة اللي هي يوم 30 شعبان و من ساعتها مش بصلي التراويح في الجامع علي ما أتذكر و كم مرة في البيت و كتير مش بصليها خالص طبعا غلط

و أسبابه لو صح يكون ليه أسباب هي عدم وجود شيخ أستمتع بصلاته عندنا و الشيخ الكويس بعيد بصراحة عن البيت و مش بلحق أروح و بكسل المهم النهاردة أستجمعت قوتي و حاربت الشيطان و قلت زي ما عمي جزاه الله خير ما لايأخذ كله لا يترك كله و ياواد متخليش ولا إبليس الصغيرين يضحكوا عليك و نزلت و بسم الله ما شاء الله لاقيت الناس بتصلي في الشارع كأنها صلاة الجمعة قلت حلو ربنا يكرم و طلعت للجامع و وجدت لنفسي مكان و صليت فوق بس مدخلتيش الجامع نفسه مش عارف أشرح لكم إزاي المهم صليت العشا و دخلت الجامع معرفتي بردوا أجد مكان كويس أصلي فيه رجعت تاني لمكاني و صليت أربع ركعات من التراويح المهم بعد كده دخلت جوة لاقيت الشيخ اللي كان بيخطب في يوم الجمعة المشهود اللي كتبت عنه و فجأة ببص شدني لون أحمر ببص لاقيت بنات كتير بتصلي ورا في أخر الجامع بدون فاصل و لا حاجة و الموضوع ده خنقني قوي يعني لو مفيش مكان خلاص تصلوا في البيت و الله أعلم أحسن يعني خصوصا الصغيرين منكن قلت ياواد أنسي و متبصش و متتخنقش من الموضوع ده فجأة لاقيت تراك تراك ببص لاقيت شباب زي الفل شايلين حاجة كده زي صناديق الحاجة الساقعة من الحديد بسم الله ماشاء الله يعني الواحد لو وقع علي دماغ حد مش هيقوم من مكانه و ماليان زجاجات مياة فيتراك و علشان الإعلان شايلين الورق من عليها زي الأفلام كده المهم للأسف بقة في زجاجات ساقعة و زجاجات ساخنة فالناس بتتنافس علي الساقع طبعا يعني خلاص هنموت من العطش ده حتي الشيخ ربنا يكرمه مش بيتعبنا و بيقرا خمس أيات تقريبا في الركعة المهم و الله زعلت قوي و نزلت روحت للبيت و قلت مش مكمل أو أصلي التراويح في البيت و هو تقريبا مش هيحصل

فين أيامك يا شيخ أمير ربنا يكرمك مكان ما أنت موجود

.

ربنا يكرمكوا أدعو لي بالهداية علشان كل فترة في رمضان كده بأضعف و أعمل بلاوي

و كمان أدعو لي علشان أقبل في التمهيدي علشان النتيجة المفروض ظهرت و أنا خايف لأحسن مكنش قبلت و هيكون ده يليه بتاع تسعين بوست كأبة دة لو لحقت أكتب قبل أما أكون في قاع النيل

و كمان أدعو لي ربنا يفرج كل همومي و ينهي وحدتي دي بقة علشان خلااااااااااااااااااااااااص

.

اللهم اهلك الظالمين من لاعبي الزمالك

.

تلفزيون رمضان

أنا الحمد لله مش متابع غير ظاظا و جرجير بالرغم من تدني مستواهم بالنسبة للسنة اللي فاتت و كمان متابع يتربي في عزو بالرغم من تافهتها بس هي اللي بتيجي في الوقت اللي فيه بأكون قدام التلفزيون

مش عارف ليه طالبة معايا أتكلم شوية عن الإعلانات

أول في إعلان

سمنة جنة جنة جنة أة جنة

و في إعلان عن أية أر تي رياضة جامد جدا خصوصا لما بيفتح الدولاب يطلع له المعلق

و كمان إعلان تي إي داتا جامد

و إعلانات موبينيل بتاعت ياسمين و القرد

و إعلان هيونداي لما الميكانيكي بيقوله خمساية تلاتة و قول سبعمية جنيه

للأسف أنا مش متابع إعلانات كتير لأن تقريبا بتوع القنوات الفضائية بيحترموا و طبعا مش بعرف أجيب تلفزرونا المخضرم اللي بيكون مردوم إعلانات علشان الإريال مش هيكون مظبوط

لو أفتكرت حاجة هأضيفها

.

أنا مخنوق من الشغل و نفسي في شغلانة تانية و مش عارف فكرة أني أفتح مشروع لوحدي تروادني أية و منين الله أعلم

كنت زمان و أنا في الكلية مش عارف ليه كانت عندي رغبة أفتح محل بقالة فكرة جامدة جدا

.

خلال كتابتي للبوست اللي وشه حلو ده

كلمت مصطفي علي الموبيل و محمد مفيد و روني و ساسو مش ممكن ساسو كمان علي المسنجر ده شرف كبير لي
.
أستلمنا حتة جزمة سيفتي في الشغل روعة حاجة كده بتاع 3 كيلو بتوجع الرجل اية مش عاوز أقول كم
.
في أية كمان أتكلم عنه
.

كفاية كده النهاردة

بس نفسي أقول

الحمد لله

الحمد لله

الحمد لله

أستغفر الله

أستغفرالله

أستغفر الله



22 comments:

البنت الشلبية said...

اول واحدة اخيرا
ازيك بقى
وعلى فكرة الاعلانات انا كمان بتجذبنى اوى بالذات بتاع ياسمين والقرد اساسا ياسمين دى سكرة
حاول تشتغل بنفس مفتوحة شوية ومعلش محدش لاقى شغل انت احسن من غيرك
وربنا يوفقك يارب

رفقة عمر said...

اخبارك ايه
ربنا يفرج كربك وييسر لك كل امورك
ويرزقك راحه البال اللهم امين
ويرب تقبل فى التمهيدى وتتيسر لك الامور اللهم امين يارب العالمين

ibn nasser - ابن ناصر said...

ممم
موضوع جميل
اهم حاجه الواحد يقعد مع نفسة يقول عمل ايه ومعملش ايه
,وان شاء الله حالنا يتصلح كلنا
تحــياتي

عين ضيقة said...

أولا ربنا يهديك يارب

ثانيا يارب تكون نجحت

أنا ضحكت كتير جدا على فكرة
بس عايزة اقولك ان المسلسلات مش فيها حاجة تتابع اصلا
ولا الاعلانات كمان

بخصوص الصلاة فجاهد نفسك ياريت ع الاقل رمضان وكده

بص بقى
مش تدعى ع الزملكاوية ولا لاعبيتهم
لأن بابا زملكاوى وانا اميل اليهم بعض الشىء انا مش متابعة جيدة للكورة لكن ... شوية

مش علشان ماانت من ميت غمر وبلديات ؟

فيه سؤال ملح جدا عليا
هو انت كارت وللا خط؟
آه ماهو لما يبقى كل المكالمات دى فى زمن كتابة بوست واحد يبقى خراب بيوت

وللا انت كنت بتستقبل بس
هههههههههههه

كل سنة وانت طيب
ان شاء الله

No Fear said...

البنت الجميلةالشلبية
السلام عليكم
الشرف لي أنك أول واحدة تعلقي عندي
أنا شخصيا بحاول أتفرج علي القنوات الأرضية علشان أشوف الإعلانات
و بلاش نفسنة في موضوع الشغل ده كمان ماشي
:)
غريبة أنك مجبتيش سيرة الزمالك
ربنا يوفقنا جميعا إن شاء الله
سلام

No Fear said...

رفقة العمر
السلام عليكم
الحمد لله كله تمام
ربنا يكرمك
و ربنا يسمع منك و يرزقك زي ما بتدعي لي و أكتر إن شاء الله

No Fear said...

ابن ناصر
السلام عليكم
مش ممكن المدونة منورة ياباشا
ربنا يصلح حالنا كلنا إن شاء الله
مش هنشوفك قريب و لا أية

No Fear said...

عين ضيقة
السلام عليكم
ربنا يهدينا للخير دايما يارب
لسه نتيجة القبول مظهرتيش
ميزة الإعلانات أنها مش طويلة حتي لو وحشة بتخلص علي طول
أنا بحاول إن شاء الله و ربنا يكرم
أنا حضرتك زملكاوي بأدعي علي الله اللاعيبة اللي تحرق الدم أسألي باباكي كده هتلاقيه بيدعي عليهم زيي
أنا مش من ميت غمر
أنا بحب ناس ميت غمر كلهم زيهم زي الفيلم كده
أنا موبينيل ألو السحري و موبينيل رخصت كروت الشحن
انا كلمتهم كلهم علي المسنجر
مصطفي بس اللي علي الموبيل
كل سنة و أنت بألف خير و تفضلي منورة المدونة بتاعتي كده علي طول

فى القلب said...

أزيك يا محمد و الله و حشنى جدا جدا
و عايزه أشوفكم
حقيقى يا محمد كا ما بتتكلم على الوحده بزعل أوى ربنا يا رب يبعتلك بسرعه البرق الى يسعدك و يونس هذه الوحده
و أنا معاك ربنا يخرب بيت الظلمه فى الزمالك
أما الأعلانات أنا مش بشوفها كده غير صدفه

ربنا يهنيك يا محمد و يعذك يا رب

sahr said...

ايه كل دا؟
انت كنت بتفك مع نفسك في البوست دا ولا ايه؟
عموما هي فكرة حلوة
وربنا يعينك على صلاة التراويح ويقويك على صلاة التهجد
ويارب تتقبل في التمهيدي
بس سؤال انت بتدعي على الظالمين بتوع الزمالكويه طيب الاهلويه مفيش فيهم ناس ظالمين برده؟ انا على فكرة لا زملكاوية ولا أهلوية
وربنا يوفقك ويبعد عنك الوحدة

صاحب البوابــة said...

خبر عــــاجل

ألف ألف مبروك

تم فجر يوم الثلاثاء 2 أكتوبر 2007 م الافراج عن شيخ المجاهدين أبو الفتوح شوشة 86 عاماً

ومما هو جدير بالذكر أن الإفراج لم يتم إلا بعد تدهور حالة الشيخ الصحية تدهوراً خطيراً

بعد إصابته بجلطة قلبية مفاجئة وهو قيد الإعتقال في محبسه

جعله الله في ميزان حسناتك يا شيخي العزيز

------------

جاري التحديث

Monzer said...

بجد انا مبسوط جدا انى عرفتك واتكملت معاك وقعدنا
نفسى كل واحد بيقرالك انت بالذات يقابلك
هههههههههه

بجد انت عسل، وطيب ومؤدبوخجول
انت حاجات كتير كويسة والله
بس تكلم كل دول وماتكلمنيش انا
ينفع كده
يا ع ولا يهمك
أنا الى هالكلمك أي خدعة
اما عن صلاة الترايح
فبجد ده حاجات صغيرة لو على ده
عديها علشان خاطرى:))
عادى باه كل سنة وانت طيب

dead man said...

هههههههههههه

اللى شدنى أوى بين كل الكلام ده قمت رامي جملة كده .. اللهم اهلك الظالمين من لاعبي الزمالك
.... والله معاكو حق يا راجل.. انا اصحابي الزملكاوية بيصعبوا عليا اوى

ومبروك التعادل ومكسب النقطة من ماتش الأسمنت يا جميل

:))

No Fear said...

من القلب
السلام عليكم
ربنا يسمع منك و يبعت أي حد علشان الوحدة خلاص هتقلب و ترجع زي زمان
يارب لا
الزمالك بقة الواحد حرام يتكلم عليه
الإعلانات جامدة حاولي تتابعيها علي التلفزيون العادي
سلمي علي يويو
و إخبار تامر حسني أية؟
:)

No Fear said...

sahr
السلام عليكم
منورة
أنا المدونة بتاعتي كده علي طول فضفضة و تفريج عن النفس و أحيانا جلد الذات علي رأي بعض الناس يعني
الحمد لله علي كل شئ
ربنا يسمع منك كل الدعاء الجميل ده
أنا مش هتكلم تاني عن الزمالك
كل سنة و أنت طيبة
سلام

No Fear said...

صاحب البوابة
السلام عليكم
الحمد لله
ربنا يفرج عننا كلنا من هذا السجن الكبير
يارب يتم شفائه علي خير

No Fear said...

منذر
السلام عليكم
بتحرجيني بكلامك و الله يا واد يا منذر علي رأي أخونا صاحب البوابة
أنا عاوزك تركز هو بيقولك واد يا منذر إزاي
:)
يا عم كلمتهم دول علي المسنجر و بعدين أنا لو كلمت حد بكلمك أنت كمان
ده انا حتي كلمتك دلوقتي و مردتيش علي ماشي
لما أشوفك
الحاجات البسيطة عندي كتير عاوز أخفف منها
عاوزين نشوفكم بقة
و أنت طيب

No Fear said...

dead man
السلام عليكم
أزيك يا باشا
ده أنا قلت أنك خلاص نسيتني
فينك يا عم أخبارك أية
يارب تكون بخير و رجعت من الحالة اللي كنت عليها
شكلك كده مظبط في رمضان تمام
ربنا يوفقك
بمناسبة الزمالك فعلا الواحد كان زمان يسمع كلمة حرق دمي و مش فاهم معناها أنا فهمت دلوقتي كويس قوي
الله يسامحهم أو يا خدهم و نخلص

سلام

mariam said...

ياااه بقالى كتير مش بدخل

بس كويس انك مش بتشوف غير يتربى فى عزو
علشان حرقة الدم اللى فى معظم المسلسلات السنه دى

على فكره النساء كانوا بسصلوا خلف الرجال مباشرة ايام الرسول عليه الصلاه و السلام
و ممكن تسأل فى الموضوع ده

زمالك تانى
انت صعبان عليا
خليك اهلاوى بقى و خلص نفسك


تحياتى

No Fear said...

مانو
السلام عليكم
المفروض أزعل منك بس أحنا في أيام مفترجة
منورة دايما
يتربي في عزو هي تافهة بس أهوة كويسة
.
بالنسبة لموضوع صلاة النساء خلف النبي
علي ما أعتقد كان من وراء حجاب
و لو مكنش موجود أيام الرسول كان موجود أيام الأئمة الأربعة
ده أولا
و الله أعلم
نفرض بقة أنه مكنش في حجاب خالص
هأقولك النساء أيام الرسول غير الأيام دي و الرجال أيام الرسول غير الأيام دي
و مش عاوز أذكر لك أمثال تشيب الجنين في بطن أمه
علشان كده أنا متضايق بصراحة
.
للأسف خلاص راح زمن أن الواحد يغير و يكون أهلاوي أنا قدامي حل من أتنين أصاب بأزمة قلبية أو أبطل أتابع كورة خالص علشان لاعيبه الزمالك ترتاح
.
ياريت متنسيش تمري هنا تاني علشان مترجعيش تندمي
:)
سلام

ابن رشد said...

اية يا عم الجمال دة
انت عايز تفضفض بكتير اوي

saso said...

بلاش انا اتكلم عن الصلاة في الشارع وبدون فاصل.. اخر رمضان قدرت اقنع ماما نصلي في بيتنا والحمد لله
---
مريم الصلاة كانت في الخلاء
:)
هاتيلي ربع متر خلاء الايام دي.. لو رحتي صلاة العيد هتعرفي انا قصدي ايه
السنة دي بعد ما نشفت راسي مش نازلة يعني مش نازلة ..ماما فرحانة اوي قالتلي انا صليت في الجنينة
:D
شفت الهنا اللي احنا فيه .. البنات بيصلوا في الجنينة ف نص الشارع في السيدة نفيسة
والاطفال احباب الله بيتنططوا حواليهم وناس رايحة جايه ولاد وبنات بقي

وعموما من غير عيد انا كنت بصلي والناس في العمارة اللي قصاد الجامع كانهم قاعدين معانا بالظبط
-----------
مفيش فايدة فيا يا محمد نزلت رغي برضه

اعمل نفسك مش واخد بالك بقي
تصدق اول مرة اعرف منك دلوقت ان ظاظا وجرجير كانت بتتعرض السنة دي
:s
زعلتني بجد مش تقول ..وانا اللي فرحانة اوي بالتتر انه بقي عندي اخيرا -الفضل لسيادتك طبعا- تقوم تفوتني الحلقات
يلا خير

يتربي في عزو ..بيقولوا كانت حلوة في الاخر
قال انا اتنقط تلات ارباع رمضان وفي الاخر لما اتوب تحلو
!!!!
الله يكرمك يا يوسف يا معاطي

سلام وكفاية رغي بقي