Saturday, September 22, 2007

السلام عليكم و رحمة الله و بركاته
أزيكم يا شباب
أنا بعد تفكير كبير أكتب و لا لا الحمد لله قررت أكتب
تقريبا أنا حسدت نفسي في البوست اللي فات و تقريبا اليومين دول من أيام الكأبة مش عارف ليه
بالرغم من إني بحب لما كلهم هنا يخرجوا و أقعد لوحدي أمبارح و النهاردة أنا قاعد لوحدي
بأشوف كل شوية الصورة اللي انا حاططها في البروفيل بتاعي و كمان حاططها علي الموبيل بحس بيها قوي فيها كمية وحدة مش موجودة غير عندي مش عارف في حد تاني بيحس بها و لا لا
حاولت أفكر في حاجات إيجابية زي مثلا صدقاتي الجديدة الجميلة اللي مكنتش أحلم بيها زي الكم بوست اللي فاتوا بس محصلش للأسف تغيير مش عارف ليه
إحساس الوحدة رجع لي تاني يارب خير
هو رمضان عموما بيقلب علي موضوع الوحدة ده بس بما إني كنت بأشغل نفسي أو بنام كنت مش مركز في موضوع الوحدة ده بس أمبارح و النهاردة مش عارف ليه رجع
تقريبا هي طلبت نكد خلاص
بردوا في حاجات في رمضان مش عارف أستمتع بها زي التروايح مش عارف أصليها للأسف
و كمان في شئ تافهة بس كان نفسي أعمله السنة دي قوي
السنة اللي فاتت أيام الكأبة اللي بحق كنت في أمتحانات و كنت بأصحي في السحور علشان أذاكر لأول مرة المواد قبل أما أروح أمتحن الصبح كنت بسمع برنامج قعدة سحور علي نجوم أف إم مش عارف أسمع البرنامج ده خالص هو شئ تافهة بالنسبة لكم بس كنت ساعتها بحس إني نفسي أسمعه كنت بحس أنهم صحاب مع بعض عايشين حياتهم و أنا في خنقة المذاكرة اللي مش فيها فايدة
حاولت أفكر أتصل بأي حد أكلمه بس بجد مكنتش عارف أقول أية و أكلم مين
فكرت في الشات دخلت أهوة و مفيش حد الطبيعي يعني
الحمد لله علي كل شئ
و الله الواحد بوستات الكأبة دي وحشته قوي
بس ياريت تقروا بردوا الكم بوست السابقين دول بعد البوست ده علشان ميجيش لكم أكتئاب أنتم كمان
مش عارف أغير الصورة و لا أية بس بجد الصورة دي جامدة جدا
أنا أهم حاجة عندي أن الموضوع ده ميكنش من غضب ربنا علي علشان أنا كل أسبوع تقريبا لازم أعمل بلوة كده في رمضان و كمان يارب الموضوع ميطولش معايا
كفاية عليكم كده
تصبحوا علي خير

17 comments:

فى القلب said...

محمد
كلنا زيك يا محمد حاسين بالوحده بالرغم من ان كل الناس حولينا
أنا برده زيك معنتش بفرح الا لما بقابل بلوجر بيبقى الوقت ممتع بجد
عموماً من ناحيه التراويح تقدر تصليها فى البيت
و أنا معاك برده فى حكايه سماع بعض البرامج فى الراديو تعرف فيه برامج كنت بسمعها و أنا صغيره مقصره فيه لغايه دلوقتى و نفسى أسمعها
أنت عارف يا محمد أحساس الوحده مش غضب ربنا ولا حاجه بس إيقاع الحياه و الضغوط و فقد أتجهات البوصله ألى توصلنا معدناش عارفين منين ولا فين هو ده ألى مسبب لينا الاحساس ده
يمكن بمزيد من الأندماج مع روح الدين ترفع عننا شويه من ده
معلش يا محمد طولت حسيت أنى عايزه أتكلم معاك كتير

البنت الشلبية said...

عارف انا من كتر الخنقة والفضا واملل بقيت بفكر اخترع اى مشكلة عشان اعيش فيها من باب التغيير
الفضا والوحدة وحشين اوى
بقولهم فى البيت انا خلاص بجد شوفولى حل لازم اشتغل بس اشتغل فين وهاخد كام يعنى لما هتعب فى الشغل
كمان هل هكون مبسوطة فى الشغل ولا لا
انا دلوقتى كل الى بعمله بسمع عايدة الايوبى وبسرح معاها احسن ما اطق
خد بالك من نفسك
ومعلش على موضوع الشات والله ما بدخله

سلام

No Fear said...

في القلب
السلام عليكم
أنت تتطولي براحتك أنا المدونة دي عاملها لكم جميعا
:)
مش عارف أنا في حاجات كتير بأستني تحصل و متوقع أن نهاية القرف اللي عندي هتكون لما تحصل و لما بتحصل بيكون عادي جدا كأن مفيش جديد
هو فاضل موضوع واحد يبقي كارثة لو حصل و حياتي متغيريتش
ربنا يستر
أنا نفسي أصلي التروايح قوي بس الجامع اللي ناوي أصلي فيه بعيد و بيطول
ربنا يقدرني
ربنا يعفو عنا جميعا من الإحساس بالوحدة القاتل ده

No Fear said...

البنت الشلبية
السلام عليكم
هو الله اعلم
بس علي ما أعتقد لازم يكون للإنسان هدف نفسه يحققه علشان يحس بالحياة ممكن يكون ده اللي ناقصنا علي فكرة لو الشغل كان شغل و خلاص يعني مش محتاجك يعني روحتي بالواسطة يعني مش هتحسي باي تغيير
لازم يكون الشغل محتاجك علشان تحسي بنفسك
أسأليني أنا

sahr said...

السلام عليكم
محمد
مش لوحدك كتير مننا بيجيله الاحساس بالوحده بالرغم انه مش عايش لوحده وان في ناس كتير حوليه
هي الوحده اه احساس وحش وبيقلب المواجع بس برده بيكون فرصة انك تقعد مع نفسك وتحاسبها
واهي الوحده عبادة
كل سنة وانت طيب
رمضان كريم

ياسر مدني ...دينامو الإخوان said...

أدعوكم للمشاركه وإبداء الرأئ في مسابقات الشعر وهي عباره عن خلق وصحابي ..ولا تنسوا
1-المشاركه
2-إيجابيتات
3-سلبيات
4_مقترحات

No Fear said...

sahr
السلام عليكم
بس بجد الوحدة صعبة جدا جدا جدا جدا جدا جدا جدا جدا جدا
خصوصا لما تحسي أن مالهاش نهاية
أو مفيش حاجة تقضي عليها
الله أكرم

No Fear said...

ياسر مدني دينامو الإخوان
السلام عليكم
علي ما أعتقد أنك مش هتدخل هنا تاني
بس كل سنة و أنت طيب

dr.Roufy said...

اكيد احساس قاتل ..الوحدة..
لكن ساعات بنشوف فيه نفسنا بوضوح
وبننظر للدنيا حوالينا بنظرة مختلفة
من منظور اكثر هدوءا وتأملا
حاول تستفيد من وحدتك ..تفكر فيها..حاول تشحن طاقتك من جديد..علشان ترجع تاني للدنيا اقوى..واحسن

كلنا بنحس باحساسك دا..مش انت لوحدك..لكن في الأول وفي الآخر
لسة الحياة مستمرة..واحنا لسه فيها..عايشين
وربنا يآمن وحشتنا..ويساعدنا في غربتنا

تحياتي

القلم السكندري said...

السلام عليكم

اولا كل سنة وانت طيب

ثانيا

ربنا يفرج همك ويبدل حزنك بفرح وسعادة

تحياتي

دولة خرابستان العظمى said...

الكابة هى جزء لا يتجزء من حياتنا من يستسلم لها تقتله ومن لا يستسلم توقعه فى براثنها
تحياتى

rainbow said...

محمد
الكآبه والحزن سمه الكاتب والفنان خصوصا اللى مهموم بمشاكل وطنه
وبقت دلوقتى سمه شعب بأكمله هو شعب المحروسه المهروسه المفروسه
الحزن اصبح اهم اصدقائى لما يغيب بيوحشنى !!! الحزن احساس نبيل ما تقاوموش لانه هو اللى بيفرقنا عن كل المخلوقات التانيه وهو اللى بيخلينا نستطعم السعاده لما تيجى

ما فيش وحده لو فيه كتاب معاك ده احسن واحد تفهمه ويفهمك خصوصا وانت حزين

وبما اننا فى اغلى واحلى شهر يبقى خد منى نصيحه .. كلم ربنا .. مش بدعاء محفوظ وذو قافيه لأ كلمه من قلبك كانه سبحانه وتعالى امامك ويا له من شعور جرب ومش هتندم

كل سنه وانت طيب من غير كآبه

No Fear said...

dr roufy
أنا متفق معاكي أن إحساس الوحدة قاتل بس مش متفق في إننا بنشوف نفسنا بوضوح فيه أو بالنسبة لي ده مش صح أنا بأكون مشتت جدا و تايهة و متوتر لما بحس بالإحساس ده
ساعات بحس إني خلاص بدأت أتغلب علي الشعور ده و أغلبه لكن بيحدث دايما أنتكاسة و أرجع أسوأ مما كنت
ربنا يكرمنا بطاعته و هدايته
تحياتي

No Fear said...

القلم السكندري
و عليكم السلام و رحمة الله و بركاته
و أنت طيب
ربنا يفرج همومنا و و يفرحنا كلنا
شكرا لمرورك
سلام

No Fear said...

دولة خاربستان العظمي
كل سنة و أنت طيب
تقريبا أنا وقعت في براثنها
شكرا لمرورك
سلام

No Fear said...

rainbow
أنا و لا كاتب و لا فنان ليه بقة في كأبة
و كأبة أية كتيييييييييير
و مش علي طول مهموم بمشاكل وطني ساعات بأكون هايف يعني عادي
كمان مش بقرأ كتير
لا كفاية كده هيزيد الإكتئاب
:)
شفتي أنت كمان زودتي الكآبة زمان كنت بتكلم مع ربنا و بأدعيه زي ما بتقولي كده دلوقتي الموضوع ده قل بس الحمد لله لسه في أمل و بدأ يعود شوية بشوية
ربنا يديمه و يزيده
شكرا علي كلامك

ameer adel fares said...

انامعجب بالبلوج دا اوي والموضوع بتاع الوحدة دا مئزمني جامد واتمني اكون صديق ليك وبجد دا بلوج هايل ومحترم ومفهوش اي تجاوزات