Friday, September 21, 2007

بوست طويييييييييل
السلام عليكم و رحمة الله و بركاته
أزيكم يا أصدقائي يا للي مش بتتدخلوا في رمضان
و طبعا الناس اللي بتعلق في رمضان زي الفل
المهم جه علي بالي دلوقتي و أنا بكتب البوست ده في الوورد علشان النت فاصل و هيجي بعد نص ساعة إن شاء الله أكتبه و أسميه مراحل مش عارف ليه مع أنه كل جزء لوحده بس أنا بحب المترو شوية و المرحلة الأولي من كذه لكذه بنعجبني قوي بالرغم من أنها ساعات بتكون محطتين تلاتة
المهم
المرحلة الأولي
يوم عجيب
اليوم ده أو الليلة دي قضيتها مع محمد مفيد و صاحب البوابة و منذر و ابن ناصر و صديقة مازن هههههههه و أحمد الجيزاوي و نوشة و شمس الزناتي تمام كده
قعدنا علي القهوة شوية و بعدين أتمشينا للجحش في السيدة زينب ثم للكرنك صاحب القنبلة في السيدة بردوا ثم قهوة معفنة ثم للتحرير ثم رمسيس و صلاة الفجر ثم للبيت ثم للشغل ده كده لوحدي ثم يوم تهييس في الشغل علشان منمش منهم
_______________________________________
التفاصيل
يبدأ اليوم مش عارف أقول اية
الأربعاء
هو عادي جدا رحت الشغل و بعد خنقة الشغل الطبيعي يعني و أنا بجهز نفسي علشان أروح لاقيت أختي بتتصل بي تقلي أن جوز خالتي توفي إلي رحمة الله ربنا يرحمه و طبعا من الشغل علي الدفنة علي طول الغريب إني أشتركت في الغسل شوية بسيطة جدا في الأخر يعني مش عارف جت لي الشجاعة أدخل إزاي مش عارف لاقيت نفسي داخل كده ببساطة
و بعدين توجهنا للدفن و طبعا فطرنا في علي شوية عصير عند خالتي و بعدين روحنا و بعدين فطرنا في البيت علي العشا كده الغريب إننا مكناش جعانين كلنا خالص
علي فكرة جوز خالتي كان تعبان قوي قبل كده كنا متوقعين يعني قضاء ربنا و الحمد لله ربنا أكرمه في أيام مباركة و هو يستاهل ربنا يرحمه
.
كنت مظبط الخروجة مع محمد و مصطفي و لما عرفت قلت خلاص مش هينفع أخرج علشان العزاء سبحان الله ربنا كان مقدر لي الخروج معهم و عرفت أنه موصي أنه مفيش عزاء العزاء في المدافن و قت الدفن فقط
و رجعت هلكان طبعا بس طبعا بما أني متفق مع حبايبي خرجت و أتقابلنا في البورصة محمد و مصطفي و منذر و باقي الناس اللي فوق
.
الكلام اللي بينا
اولا عن موضوع تعذيب عرفناه من أحمد الجيزاوي و بعدين الأهلي و الزمالك و المعركة كانت حامية الوطيس بين محمد مفيد و ابن ناصر و صديقة مازن
.
المهم حكاية مازن ده أحنا منعرفش أسمه أنا شخصيا مش عارف أسمه هو ممكن يكون نور بس مش متأكد
أخونا مصطفي صاحب البوابة أستلم مازن من ساعة أما جه أنت حزب أية أنت أفكارك أية و مسبوش و مازن مش عاوز يتكلم علي راحته هو في الأول تقريبا كان خايف مني أنا و بعدين أتخنق من مصطفي بجد مصطفي يعني مسبوش و أنت شكلك شيوعي و أنت مش عارف أية كان خلاص هيجننه
مش ممكن يا جدعان أنا مش قادر أكتب من كتر الضحك بامانه
.
و بمناسبة مصطفي و مازن علشان أكمل كلام عن الناس في مواقف كتير هأقولها عليهم و أكمل
و أحنا بنتسحر عند الجحش في واحد نادي علي الناس اللي بتشتغل عند الرجل فراح مصطفي قال لمازن بيكلمك أنت مازن بكل بساطة راح باصص و كان خلاص هيكلم الرجل الرجل قال للواد انت سيبتنا ليه مش عاوز أقولكم مازن خلاص كان هيروح يقعد معهم
مش ممكن و الله
.
موقف تاني مازن كان معه شنطة قام يسلم علي نوشة و شمس الزناتي لما وصلوا و أحنا علي القهوة مصطفي أخدها منه قبل اما يقعد مازن أتخض جدا أفتكرها أتسرقت بجد بس فاق لنفسه علي طول
.
و كمان مصطفي مع مازن لما كنا علي القهوة في الأخر مازن جه له تليفون قام جري علي طول تقريبا من أهله علشان أتاخرنا إحنا فجاة مشفناش مازن قعدنا نقول راح فين و و قعنا من الضحك
.
مواقف مازن بقة مع مصطفي
هو تقريبا اللي جعل مصطفي يحط مازن في دماغه أنه أحرجة مرتين أو تلاتة أول أما وصل
و بعدين مازن كان جايب في شنطته صورايخ و حاجات بتفرقع قعد يحدفها علي مصطفي و مصطفي طبعا طوييييل و يتخض
.
و بعدين مازن قعد يضرب مصطفي بجد و يقله أنت رخم بجد حقيقي يعني
و في الأخر بقة بنسلم علي مازن علشان هو أول واحد يمشي مننا و مفيش حد ماشي معه عينه تقريبا دمعت من الزعل أننا هنروح مصطفي مسبوش بردوا
و هو بيعدي الشارع يعني قعد يشتم في مصطفي يا أخوان يا شيوعي كل ده قدام مجلس الشعب و هو بيعدي الشارع و خلاص العربيات كانت هتدوسه
.
خلاصة قصة مصطفي و مازن
أنا شخصيا خايف أن مازن يزعل مني علشان أنا فضيحة في الضحك الحقيقة و أنا أسف لو هو زعلان مني
و الغريب أن مصطفي قاللي بعد كده أنه بيرن له طول اليوم بعد كده سبحان الله
ياريت فعلا نكون أصدقاء يا مازن أنا شخصيا أتشرف بمعرفتك بس أنت بقة أسمك أية
.
أحمد الجيزاوي شخصية عندها مبادئ و أفكار واضحة و محددة و أنا الشخصيات دي بتعجبني قوي بصرف النظر عن أفكارها انا بحب الناس اللي عندها أفكار علشان قصر الديل اللي عندي في الموضوع ده
بس هو مشكلته أنه ديكتاتور شوية اللي يقول عليه أو مش بيقول عليه تلاقينا بنعمل اللي هو عاوزهه و خلاص
و كنا هننفجر من كتر الأكل و الشرب بس هو تقريبا كان عامل حسابه و هضم الأكل و هو مروح مشي بس أحنا لا
و كمان أنا لي عتاب عليك في موضوع هأبقي أقولك عليه
و صعب علي الحقيقة لما كنا بنتكلم في الكورة الرجل عمال يكلمنا عن التعذيب و نعمل أية و محمد و ابن ناصر بيتكلموا عن الكورة
كان هيشد في شعره يا عيني
.
نوشة و شمس الزناتي
هم الأتنين قابلناهم و إحنا قاعدين علي القهوة و قعدوا معنا و تحس أنهم صحاب من زمان قوي و الله أعلم و تحس أنهم ولاد بلد جدعان كده بس مشكلتهم معايا كانت في السجاير و هامنعم من التدخين بعد كده
هم الأتنين الوحيدين اللي كنت تحس أنهم متفقين مع أحمد الجيزاوي قوي خصوصا في موضوع الأكل
.
ابن ناصر
طول عمري بشوف أسمه في التعليقات مش عارف ليه مكنتش بأدخل عنده كنت بحس أني هلاقي كلام من الكبير ده و هاتعقد و مش هأفهم كلامه و كنت فاكر انه كبير قوي بس طلع لسه صغير و إن شاء الله هاتابع البلوج بتاعه
بس لي طلب عنده بلاش ياكل من عند تلوث و بكتيريا علشان هو مش ناقص يعني
أحنا عاوزينك يا ابن ناصر
و ابن ناصر طريقته في الكلام مؤدبة جدا و انا شخصيا حسيت أنه مقنع قوي بس هو شكله بيبذل مجهود كبير في كل حاجة في حياته و بيتعب قوي و لما يقرر يقول حاجة لازم يقولها حتي لو أية
فاكرين موضوع والده و جمال مبارك
فين الموبيلات بقة رجعت و لا لسه
.
منذر بقة انا مش هتكلم عنه علشان الأعلام اللي زيه مش محتاج حد يتكلم عنه بس أنا عاوز أقولكم انه خلاص كان هينام مننا في الأخر و ربنا يكون في عونك يا ابن ناصر علشان شكلك شلته لما نام منك في التاكسي
و كمان متناسش يا منذر لما تيجي تتصور بعد كده حاجة من أتنين أشفط بطنك أو متتصورش خالص أحسن
.
محمد مفيد
أو محمود فوزي

قعد يخنق في ابن ناصر علشان الكورة في الأول
ليه عندي نصيحة ياريت يخفف القعدة مع مصطفي شوية علشان بدا يكون زييه و يتريق علي الناس كلها
و كان هيقع مننا لما عرف أن ابن ناصر بياكل عند تلوث
في الأخر أفترقنا للأسف في التحرير
.
و بعد كده صلينا الفجر انا و محمد مفيد و مصطفي في رمسيس و روحنا
أنا بقة رجعت البيت علي الساعة خمسة و تلت و أنا المفروض بأصحي الساعة ستة إلا ربع علشان الشغل
و أنا لازم أروح الشغل علشان مش عاوز أخد أجازة و علشان كان في ناس كتير أجازة و مينفعش أنا كمان علشان المدير بتاعنا ميعملش لنا مشاكل و أحنا مش ناقصين
.
أخدت دش علشان أفوق و لم يحدث نمت نص ساعة كده و قمت رحت الشغل قعدت أتريق و أناكف في الناس كلها علشان منمش
و لأول مرة من ساعة أما أشِتغلت أنام في الميكروباص و أنا رايح الشغل الصبح
في ملحوظة واحدة مخوفاني بس زي ما قلتلكم من نص ساعة ده للي هيوصل هنا كنت في دفنه الصبح و أنا خايف مكنش أخدت منها العبرة دليل علي كده ضحكي و تهريجي مع الناس بالليل مش عارف خايف من الموضوع ده
أخيرا
.
أنا سعيد جدا بمقابلة الناس دي كلها و ياريت ميكنش فيهم حد متضايق مني و ياريت فعلا نكون علي أتصال علي طول
________________________________________
البوست اللي فات معظم التعليقات كانت علي ماتش الأهلي و الزمالك
و لكل الناس بقول الزمالك لو فضل علي ما هو عليه هيفوق بس مش عاوزين عملاء الأهلي يتدخلوا
و للزملكاوية الزمالك محتاج بس بطولة واحدة و انتم هتشوفوا هيكون حالنا إزاي
و بعدين لسه فاضل لنا تلات سنين كمان مش قضية يعني
و لا أنتم زملكاوية جداد مش واخدين علي كده و لا أية
ياما دقت علي الراس طبول
.
بردوا للي هيصمد و يوصل هنا
كل سنة وأنتم بألف خير
خلاص النهاردة تسعة رمضان أيام الرحمة علي وشك النفاذ يارب نكون أترحمنا و وصلنا صلة الرحم كلنا يارب
و يارب نكمل رمضان علي خير
في حديث أنا حاولت أبحث عن نصه الصحيح مش عارف لو حد يعرفة بالنص الصحيح ياريت يبعته لي أو ينزله بوست علشان الناس تاخد بالها
الحديث اللي فيه سيدنا محمد صلي الله عليه و سلم بيقول أمين أمين أمين
و لما بيسأل بيتكلم عن رمضان و والدين
ياريت حد يبعته أول ينزله بوست قبل نهاية رمضان
.
في خبر ظريف قريته النهاردة أن إحنا رصيدنا من الدقيق المدعوم في محافظتي القاهرة و الجيزة قرب من الصفر
ربنا يستر
.
في خبر سعيد كمان بالنسبة لي إن ابراهيم سعيد هيرجع الأهلي نادي المبادئ مرة تانية
يا مبادئ يا مبادئ
.
قريت في الأهرام مش عارف الجمعة و لا السبت اللي فات واحد بيقول للفنانة يسرا إن مشهد الإغتصاب في المسلسل بتاعها كان واقعي جدا لدرجة أن في أمهات منعت بناتها من الخروج بالليل
فعلا هو ده الفن طيب فين الحل و أية اللي عاجبك في المشهد مش فاهم انا و لا هي علشان يسرا
الله أعلم
الحمد لله مشفتيش المشهد علشان أنا بخاف علي نفسي
.
أحلي حاجة في رمضان ده الحمد لله أن أنا مش بتفرج علي تلفزيون تقريبا بس الحاجة اللي ناقصني و إن شاء الله هأتغلب عليها أن أنا مش بصلي التراويح بس إن شاء الله الموضوع ده هيتغير بعد أما لاقيت جامع إن شاء الله أرتاح له في التروايح

بس فعلا مش هتشوفوني تاني
.
ضهري واجعني جدااااااااااااااااااااااااااااااااااااااااااااااااااااااااااا ربنا يستر
.
كفاية عليكم كده ده لو حد وصل لهنا
تصدقوا أنا نسيت موضوع المراحل اللي في الأول ده خالص
مش هاقول كتير

سلام

16 comments:

عين ضيقة said...

أولا كل سنة وانت طيب

صانيا مش هكذب واقول انى قريت كل البوست
هو فعلا طويل

اكتر شىء لفت نظرى عندك هو افيش فيلم رسالة فى زجاجة
انت لاتتخيل انا بحب الفيلم ده أد ايه


ياللا كل سنة وانت طيب بقى

عين ضيقة said...

ثانيا بالثاء والله بس ده خطأ كيبوردى ولابد من الاستدراك منعا للضحك


سلام بقى

loumi said...

العزيز محمد
كل رمضان وانت بخير
بالرغم من إن البوست طويل بس
الاحداث سلسله ولطيفه
انا قريته كله و جميل ان الواحد يقرب من الناس ويتعرف على ناس
وربنا يديم المعروف بينكم
بس هو بجد فى حد اسمه تلوث وبيكتريا
بيبيع أكل؟
:):):)
تحياتي ورمضان كريم

مـحـمـد مـفـيـد said...

يخرب عقلك يا محمد
ده انا مت ضحك من البوست يخرب عقلك وانا اقول انت ساكت ليه اتاريك عمال تدون
:)))
بجد من اروع الايام اللي قديها معاكم يا محمد
وموضوع مازن ده يموت من الضحك
يااخوان يا شيوعي
وموضوع الراجل بتاع الاكل اللي كان بينده
بس بجد كان يوم فظيع
والا محمود فوزي
هو مقتنع ان اسمي محمود فوزي أعما انا ايه
وبعدين ما اتكلمتش ليه عن ماركوس؟
:)))
والله انا ميت ضحك
ربنا يجازيك يا محمد يا جمعه

فى القلب said...

يا أستاااااااااذ محمد

الخروجه دى تتكرر بعد رمضان عشان تكون الصبح عشان أخرج معاكوا فاهم و لا لاء
و أنا بقراء كنت ميته من الضحك و أبنى كل شويه يبصلى و أكيد قاعد يقول فى سره ماما مهيسه من الصيام
هههههههههههه

و العسوله بتسأل عليك ديماً و فرحت أوى لما قلتلها أنك بتسلم عليها

و بتستعجلنى فى خروجه تانيه


الزمالك مقدرش مستحملش عميله السودا فيه ده بيجرى فى دمى أتولت قالولى أنتى زملكاويه

و أحنا ولاد أصول بنشيل فى الحلوه و المره

شكراً ليك أوى يا محمد على البوست ده بجد أسعدنى جدا و المره الجايه فيها لأخفيها

No Fear said...

عين ضيقة
السلام عليكم
كويس إن في حاجة شدت أنتباهك في البلوج ياريت زيارتك تتكرر في بوست قصير كده بس بجد البوست ده جامد جدا
ثانيا بالثاء
بمناسبة الفيلم أنت مش ممكن تتخيلي الفيلم ده بيمثلي أية في حياتي
الغريب كمان انك من ميت غمر هتسألني ده معناه أية
هأقولك حاجة زي الفيلم كده بردوا
متاخديش في بالك
كل سنة و أنت طيبة
منورة

No Fear said...

loumi
أنا سعيد أنك وصلتي للأخر بجد و الله
أنا معرفش موضوع تلوث و بكتيريا ده بس أكيد في اللي خلي في الحجش و البغل مجتيش علي تلوث يعني
يارب فعلا ربنا يديم المعروف بينا
الله أكرم
كل سنة و أنت طيبة

No Fear said...

محمد مفيد
السلام عليكم
أي خدمة بوست مالوش حل
تصدق أنا كنت ناوي أكتب عن ماركوس بس نسيت
خلاص نعمله بوست لوحده بعد كده
ده فيلم لوحده

No Fear said...

في القلب
إن شاء الله الخروجات كلها تتكرر علشان أنا لاجئ بعد كده في كل خروجات المدونين بس ياريت تبعدوني عن مصطفي علشان محدش يزعل مني
لما تكوني بتقري عندي لازم تكوني لوحدك علشان محدش يقول عليكي مهيسة خالص علشان أنا البوستات بتاعتي كلها هتكون كده لفترة قادمة
كان نفسي تدخلي عندي أيام الكأبة فين الأيام دي
ربنا ما يرجعها
ياريت و الله تكون العسولة لسه فاكراني أنا جهزت لها كم نكتة و فزورة بس يارب أفضل فاكرهم
كل سنةو انتم بألف خير

ابن رشد said...

اية الجمال دة و اية الحلاوة دية
دة انت كاتب كبير بقى
على فكرة كان شرف لية معاك اول خروجة و ان شاء الله اشوفك تاني برضة

No Fear said...

شمس
السلام عليكم
أي خدمة عجبتك يا باشا
بس غير ماشفتني خالص صح
أنا اللي لي الشرف إني تقابلت معكم و ياريت فعلا تتكرر

nosha said...

مساء الفل يا حمادة
إيه يا باشا الكلام الكبير ده والحاجات الحلوة دي .... وعمال تقول بس أنا مبكتبش .. ومبعرفش أكتب .
وأحب أشكرك جداً على الإشادة الجميلة جداً دي .... وحاجة عظيمة جداً ليا أني أتعرف وأقابل كل واحد منكم وإن شاء الله يكون لينا مقابلات تانية كتيرة جداً ... وعلى فكرة أنت سارد القصة بكل محتواها لدرجة والله العظيم إني خدت بالي من حاجات مكنتش واخد بالي منها وأنا موجود فعلاً
تحياتي ليك جداً يا حمادة

No Fear said...

nosha
السلام عليكم
أي خدمة يا باشا حاجات جامدة صح
أنا مرشد قديم أصلي متخافش التقرير وصل خلاص
:)

saso said...

تصدق بقالي يومين مش عارفه اكل بسبب الكرنك وقنبلته
كانت فكره اخويا الله يكرمه
:S
مش عاوزة افتكر
---
المفروض اقول الله يرحمه في الأول.. بس تهييس ما قبل الفطار

No Fear said...

saso
السلام عليكم
و الله هي حلوة بس لو أتنين ياكلوا واحدة بس مش واحد يفتري يعني
هو لحق لا حول و لا قوة إلا بالله
:)
و الله بأكون سعيد قوي لما بتمري عندي
أية ده ده النهاردو الكلام ده
مش ممكن

ibn nasser - ابن ناصر said...

هههههههههههههههههههه
مت من الضحك حرام عليك
هههههههههههه
وفي تعليق بيقولك تلوث ويكتيريا!
لا ده في كمان سعيد خرابة
وسعد قطط كيلو الكباب بتسعه جنية ونص!!
تحياتي