Friday, February 09, 2007

Happy Valentin
السلام عليكم
أنا بما أني خبير عبقري في هذا الموضوع عندي إقتراح لشراء هدية قيمة جدا بمناسبة هذا العيد الذي يمثل لنا أهم شئ في الحياة فمشهد البنات هم الأكتر الحقيقة اللي بيشتروا هدية الفالنتين جميل و ممتع و منظر الشباب و هم عائدون للبيوت يحملون الأقفاص الحمرا في نشوة و فخر أنهم جعلوا هذه الجميلة تشتري له هدية الفالنتين أروع
و بعد مشاهدة برنامج فالين ويك علي القناة العملاقة زوووم علي المكشوف
و بعد خمس دقائق امام الجزيرة مباشر مش فاهم أية العلاقة
هبط علي الإلهام في هذه اللحظة تماما لهذا البوست الرائع و جاْت علي بالي هدية رائعة كنت أتمني أن يكون لي حبيبة هذه الأيام لأشتري لها هذه الهدية تتمثل في قطعة حجر من المسجد الأقصي
ما رأيكم في هذه الهدية الجميلة ؟ روعة صح
خلي بالكم لأن هذه القطعة ستصبح نادرة الوجود بعد إزالة الأقصي في القريب
و سيصبح ثمنها غالي جدا بعد إتمام الحياة الزوجية ممكن يعني بعد إتمام الزواج إن تم ممكن تبيعوها بالشئ الفلاني علشان تدخلوا الأولاد المدرسة الأمريكية أو ممكن حتي عقبال أما تخلفوا يكون في فرع هنا للمدرسة الإسرائيلية مش صعب و بردو ستايل
أقول أية بس حسبنا الله و نعم الوكيل
حرام عليكم
يارب نفوق كلنا و أنا معكم
سامحوني علي كلامي بس بجد مش قادر
مش في دماغي غير جملة واحدة عمالة ترن في دماغي كنت بسمعها أيام الجامعة
هذا الأقصي قد نادنا من سيعيد القدس سوانا
للأسف مكنش عندي الشجاعة و لسه مش عندي علشان أنفجر بالكلمة دي في أي مكان
تصبحوا علي خير
و هابي فالنتين

20 comments:

DoOoOoOdY said...

بوست رائع جدا احييك عليه وياريت لو نقدر نعمل حاجه ونساعد ان المهزله دى توقف

mariam said...

ازيك يا محمد
فينك كل ده
كل سنه و انت طيب
و ربنا يستر على المسجد الأقصى و يحميه و يبعدهم عنه يا رب

Yasmine Adel Fouad said...

بوست رائع بجد
و بيقول المفيد

مـحـمـد مـفـيـد said...

كم هي دعوه رائعه

-_- said...

ابكيتنى

إنسان || Human said...

لا حلوه يامحمد ..طبعا القنوات وتعددها بيعمل اكتر من كده ..ممكن تتفرج على كليب لنانسي او مسرحيه وتقلب بعد كده عل مجازر في نشرات

يا مراكبي said...

أنا بقى لي كام يوم عايز اعلق على الموضوع الجميل ده بس للأسف كنت مشغول جدا

أولا من الناحية الإجتماعية .. مش لازم يكون فيه يوم للحب نروح نفتكر فيه اللي بنحبه .. لو بنحب حد بصحيح يبقى لازم التعبير عن الحب يكون في كل وقت من غير عيد مخصوص ولا حاجة .. وده مبدأ مهم جدا جدا جدا

ثانبا من الناحية الدينية .. أعيادنا إتنين بس .. الفطر والأضحى .. وعيد الحب ده بالذات تخليد للراهب فالنتين اللي قصته معروفه .. يعني حتى مش بنحتفل بحاجة عدلة زي نصر أكتوبر أو المولد النبوي أو ذكرى الهجرة

ثالثا موضوع حجارة المسجد الأقصى ده جميل جدا .. ندعوا الله إنه يحفظ المسجد الأقصى اللي ما فيش حد دلوقت بيدافع عنه .. وأكرر تاني لكل الناس .. من زمان وإنت بتفخر بالإسلام .. إمتى يفخر الإسلام بيك؟

Unknown said...

هعلق اقول ايه
لو الصرخة ينفع تتكتب وتفيد كنت كتبتها بدمى

Anonymous said...

حسيستنا بالوضعه !!!!ا

هو فعلا إيه الناس بتعملوا ده ؟؟ فلانتين و الأقصى ؟؟



على فكره ..لو حصل و كان فى مدارس إسرائليه ...مش هدخل ولادى مدارس أصلا ...لان المدارس و العلام ...مفدش أبائهم الأول وملاهش لازمه

mariam said...

انا مررت لك تاج
تعالى خده

mariam said...
This comment has been removed by the author.
3asfortels7ab said...

جميل اوي ان حد افتكر اصلا
علي فكرة انا اول مرة ادخل عندك وعجبتني كتاباتك استمر
وياسلام لو تضيف حاجة بسيط كده للبوست وتفكر الناس بالمقاطعه
ربنا يكرمك وينصرك

Memo said...

قطعت قلبي و الله بالبوست ده
حسبنا الله و نعم الوكيل
و بعدين احنا في ايه في ايدنا بس نعمله
اذا كان الحكام زي مانتا شايف
المهم ان انت زملكاوي و دي الحاجه الوحيده الي بيقيدك
و انت حر بقا

rony said...

happy valentine's day
ايه ياابنى الحقد الاعمى الدفين اللى عندك ده
ماتسيب الناس تفرح وتنبسط واهو على راى المثل
ورانا ايه ورانا ايه
المهم يعنى انت ليك عندى تاج
ادخل جاويه ياجميل

albida said...

يارب يستجيب لدعوتك ودعوات المسلمين جميعا يارب ويعيد لنا المسجد الأقصى سالما

على فكرة موضوع عيد الحب ده بيشلنى وبيعلنى وبيجبلى النقطة.. خاصة فى الجامعة عندنا!! كله ماشى وفى أيده هدية قد دماغه مش فاهمة ايه لازمتها ولا مناسبتها!! تحس- سبحان الله- أن الشوارع كلها اتملت ورود والناس كلها بتحب فى بعضها!!

يارب نفوق بقى يارب


manal

-_- said...

ان شاء الله الاقصى هيرجع يا منال

smraa alnil said...

حسرتني علي حالنا
وجبت انت من الاخر

واحد من الناس said...

اليهود مش بالحمق انهم يدمروا المسجد الأقصى هي بس وسيله بيستفزونا بيها عشان يعرفوا اخرنا ايه
وكل مده يستفزونا باي حاجه عشان يفضلوا متطمنيين اننا لسه خانعين و ساكتين

كلبوزة لكن سمباتيك said...

تحياتي

No Fear said...

السلام عليكم
شكرا لكم جميعا لتعليقكم
ربنا يحرر الأقصي و ينصر الإسلام بأيدينا أهم شئ بأيدينا دي مش بأيد ناس تانية يارب