Thursday, December 23, 2010

مش عارف

السلام عليكم
مكنتش حابب أكتب خالص و أنا في هذه الظروف(إني من غير شغل يعني حاليا)بس لاقيت نفسي أتكلم و المدونة وحشتني و مش لاقي حد يسمع أو يمكن مش لاقي حد نفسي هو يسمعني أو يمكن مش لاقي حد يسمعني زي ما أنا عاوز مش عارف
المهم ضعفت و كتبت هأكتب أية؟ لسه مش عارف بالظبط
أكتب اللي حصل في 2010 و لا اللي نفسي يحصل في 2011 و لا أدعي ربنا يكون 2012 يكون حقيقي زي الفيلم
السنة دي حصل فيها حاجات كتير أوي
مبدئيا الحمد لله مش ناقم علي نفسي أوي اليومين دول مش عارف ليه يمكن علشان كبرت شوية و لايمكن علشان روح الطفولة الكتير اللي كانت جويا بتروح حبه حبه مش عارف ده شئ يفرح و لا يزعل أويمكن دي عوارض الإقتراب من التلاتين مش عارف أو يمكن صعبان علي نفسي فمش عاوز أوجعها أكتر ماهي موجوعة مش عارف
أنا بقيت راضي أوي مش عارف ده بردوا كويس و لا وحش هو الرضا عموما أكيد كويس بس مش عارف أنا راضي عادي و لا راضي زيادة عن اللزوم أقرب للإستسلام الحياة تحتاج شوية من الحماس و الطموح و الأمنيات اللي المفروض نجتهد علشان نحققها
ساعات بأحس إن الحياة حلوة و ساعات قاسية و ساعات بأحس إنها مش حياتنا أساسا
يمكن من أحلي الحاجات اللي حصلت لي السنة دي إني حاسس إن بقي جنبي أصدقاء بجد هو ده ممكن يكون متناقض مع الكلام اللي قلته في الأول إني مش لاقي حد أتكلم معاه مش عارف
علي فكرة أنا هأسمي البوست مش عارف
لسه مش عارف أرجع زي زمان في العبادات
لسه مش عارف أية اللي ممكن لو حصل يفرحني
من الحاجات الكويسة القراءة زادت عندي شوية هي أة مركزة في المجموعات القصصية و الروايات بس أهوة شغال أحسن من القعدة بلا فائدة علي الشات ربنا يكرم و تبقي في حاجات تانية متنوعة
الكلام راح من دماغي
عقبال ما الكلام يرجع هأحكي لكم عن يوم هذه الأيام المملة
بأنام تقريبا الساعة 6 الصبح و بأصحي الساعة 3 العصر أتفرج شوية علي التلفزيون و بعدين أتغدي و أتفرج علي خالد الغندور يليه شوية نت يليه فترة المساء و السهرة بين معتز و مني الشاذلي الأستاذة و بعدين أقعد أقرأ لحد الفجر و أقعد شوية أسمع البي بي سي العربية و أنام و هكذا ساعات مش بأكون قادر أقوم من النوم أساسا انا أتذكر زمان كنت أيام الأجازة أصحي الساعة ستة الصبح أييييييية أيام فعلا ياجدعان النوم الكتير ده مرض فعلا شئ مقرف جدا
من أصعب اللحظات عندي هي لحظات النوم لأني مش بأكون عارف أنام أفرد جسمي علي السرير النوم يطير من عيني أقوم النوم يجي أقعد ساند ضهري علي السرير علشان أنام و لا الهوي فين و فين عقبال ما بأنام و بمجرد ما أنام مش بأقدر أقوم أو يمكن بأكون مش عاوز أقوم أو يمكن بأكون زعلان إن لسه عايش السر الإلهي مطلعش و أنا نايم أصلي هأصحي أعمل أية؟
زهقت من لبس البدل و أنا رايح الإنترفيوهات الحقيقة و زهقت من القصص ليه سيبت أخر شغل و ليه و ليه حفظت الأسئلة الواحد بقي متمرس و محترف إنترفيوهات
الشئ الفقر صحيح ياجدعان هو الزمالك من ساعة أما أشتغلت و هو متقطع و أنا كنت بردوا بأقاوح مع الناس في جميع الأشغال عليه و يوم ما ربنا ينفخ في صورته أكون قاعد في البيت و مش لاقي حد أقطعه بنفس نحس الزمالك ده
رسالة إلي 2010 ربنا يخليكي أعملي شئ كويس بقة قبل ما تمشي و تغوري بالسلامة
رسالة إلي 2011 ربنا يخليكي تبقي أحلي من أختك اللي قبلك خدي منها الكويس و سيبك من المقرف اللي فيها
كفاية عليكم كده النهاردة
يارب أرجعني إليك أنا محتاجك و سامحني
يارب إن كنت كتبت علي الشقاء فألهمني الصبر و لا تجعلني أضعف
و يارب أرزقني و أهديني و أجعلني من الشاكرين

6 comments:

رفقة عمر said...

السلام عليكم ورحمه الله وبركاته

هو اكيد الانشغال بالرزق من حقك
ودة شئ طبيعى
بس لازم تعرف انه ليس هناك اماكن عمل مثالية فى كل شئ يعنى كل عمل وهاتلاقى فيه حاجات تتضايقك
لازم تأقلم نفسك مع اى عمل تعمل فيه مستقبلا ان شاء الله
حب ما تعمل حتى تعمل ما تحب

ودايما بعد العسر يسر وطالما انك عدك احساس بالرضى ان شاء الله اليسر قريبا منك جدا
ولو عاوز ترجع لربنا
جرب تصلى العشاء جماعة فى المسجد وصلاة الفجر
وشوف التغير اللى هايحصلك
لانك ضيف على الله فى افضل الاوقات التى يحبها
وحق على الضيف ا يكرم زائرة
وعليك بالاستغفار المستمر
وصلاة قيام الليل لها مفعول رائع على النفس
طالما انك كدة كدة بتسهر
فاستغل وقت نزول الله فى التودد اليه وساله ان يرجعك له
نسال الله الهداية لنا جميعا
اللهم امين

رفقة عمر said...

قال رسول الله صل الله عليه وسلم نعمتان مغبون فيها بنى ادم الصحة والفراغ
وقال ايضا صل الله عليه وسلم
استغل فراغك قبل شغل
فاستغل فراغك فى القرب من الله وتعلم القران والعلم الشرعى
حتى يجعل لك الله من امرك فرجا قريبا
اللهم امين

No Fear said...

السلام عليكم
رفقة عمر
جزاكي الله كل خير
فعلا كلامك منطقي جدا
بس للأسف مش عارف ده ضعف مني و لا مدخل للشيطان ليا بس أنا بأحس إني مش عارف أركز في حاجة علشان أنا مشغول بعدم وجود الشغل
ربنا يهديني يارب
بمناسبة المشاكل اللي موجودة في الشغل أنا عارف بس و الله دي مكنش ينفع الواحد يستحملها خالص و كل الناس لما بتعرف اللي حصل بتقولي عندك حق اللي يعرفني و اللي ميعرفنيش
الواحد الحمد لله بيتأقلم بس في حاجات مينفعش

رفقة عمر said...

مش يمكن ربنا عمل كدة علشان ترجعله تانى
بالعكس لازم تشغل فسك فى امر تانى
حتى لا تصصاب بالاحباط من تأخرر العمل
عندما تشغل نفسك ان شاء الله
ستجد كل شئ بيتيسر وسيرزقك الله من حي لا تحتسب
لان هو وحده اللى بيده الخي
من فضلك
ممكن تقرأ الموضوعين دول الاول والثانى
واتمى انك نجد فيهم ما يفيدك


http://ahlam-ahlam.blogspot.com/2010_11_01_archive.html

Towtor said...

شاطر يامحمد .. كنت صريح اوى مع نفسك فى البوست ده .. غريبة ان الواحد دايما بيدعى ان ربنا يرزقه بالرضا وساعة ما يلاقيه يحس انه مستسلم او فى حالة لامبالاة او مغيب .. النوم زى البير كل ما تتعمق فيه بيبقى صعب تخرج منه .. والنوم اكتر من 8 ساعات ده اكتر ذنب بنعمله وبنضر بيه نفسنا ومستقبلنا ..بكرة ربنا ييسرلك الامر ونغلب الاهلى وتنطلق .. ربنا يوفقك وييسرلك كل خير

Meshmesha

catroz said...

سبحان الله
كنت فاتحه اصلا ادور على البلوج ,,
بتاعتك اقلب فيها شويه.. لقيتم اخر حد عاملى بوست
...
معرفش كانت على بالى ليه ...

المهم ...
سيبك من الشغل اللى راح ... خليك واثق ف ربنا... ان ربنا هيكرمك بحاجه احسن بعد كده
خليك واثق برضوا ف نفسك اوى .. انت تستاهل احسن من كده
خليك حاطط النقطه دى ف دماغك و اوعى تنساها


حساك هتعرف تفرق بين الرضا .. و الاستسلام .. انا واثقه انك هتعرف تفرق ما بينهم .. و مش هتوصل نفس لمرحله لاستسلام

يمكن تبقى فتره نقاهه بس و ترجع قبليها زى الاول و احسن كمان ..
ساعات بنحتاج نفصل... عشان نقدر نكمل


كل مرة تحس فيها ان حواليك اصحاب قريبين منك .. بيخافوا عليك .. لما تقع ف مصيبه بتلاقيهم جنبك .. قول الحمدلله .. النعمه دى مش عند ناس كتير :)

و اوعى اوعى اوعى تفكر و لو ثانيه انك تبطل تكتب ..
عشان انا ممكن اموتك فيها