Tuesday, November 02, 2010

عارف عيل

السلام عليكم
أزيكم ياشباب يارب تكونوا بخير
عارف طبعا هتقولوا كالعادة عيل و رجع في كلامه هو أة رجعت في كلامي و هأكتب في المدونة بس مش ناوي أكتب حاجة شخصية غير يادوب إنهم لعبوا معايا الدنيئة في الشركة السابقة و قدمت إستقالتي وسيبت الشغل من 27 سبتمبر 2010 و مش عارف هأشتغل أمتي بس مش قلقان مش عارف ليه مشكلتي الكبيرة إني أشتغلت في 3 من أكبر الشركات في المجال و مش عارف الشركتين تلاتة اللي باقين محتاجين ناس و لا لأ و معتقدش إني هأعرف أشتغل في شركة صغيرة و ربنا يسترها
المهم وحشني الصحيان الصبح و ركوب الميكروباصات و الدائري وحشني أوي الدائري ده و حشني الشغل أوي أوي أوي أنا كنت عارف إني بحب الشغل بس مش بالقدر ده ربنا يبعت بقة علشان الواحد ميفقدش الأمل
بالمناسبة أتفرجت علي فيلم أمبارح كان فيه جملة إنسانية جميلة أوي واحد بيقول لواحد لكي تحافظ علي حياة إنسان أديه شخص يحبه و لم معرفتش أديه أمل و لو معرفتش أديه حاجة يعملها معرفش هي عجبتني و مش عارف أية دخلها بالموضوع المهم الواحد قرف من التي في بصراحة كل القنوات بتقول نفس الكلام ده حتي بيعرضوا نفس الأفلام
البوست بقة و بجد وحشتوني
.

الوطن

- أنا من أنصار نظرية المؤامرة خصوصا علي التعليم و الزراعة و أقدر أقول للقائمين علي نظرية المؤامرة ألف مبروك نجحتم نجاح ساحق بس أرجوكم كفاية لحد كده الحاضر أتدمر سيبوا شوية أمل للمستقبل

- العنف المتصاعد في المدارس و في كل مكان بيخليني أقول ربنا يسترها و في نفس الوقت بيؤكد فكرتي إن التغيير مش هيحصل غير عن طريق الثورة الفرنسية

- سؤال برييييء علي رأي اللمبي ضرب الرصاص حصل في شارع رمسيس لمدة نص ساعة تقريبا لحين وصول الشرطة هل الشرطة كانت هتاخد نص ساعة لو عرفوا إن في 3 بيقولوا يحيا الحزب حتي لو ملحقوش يقولوا اسم الحزب

- القعدات و التربيطات الإنتخابية اللي بدأت تتنظم عندنا في المنطقة اليومين دول بتقول بالصوت العالي علي بلدنا السلام

- مني الشاذلي لا تزال تثبت أنها مقدمة برامج من الطراز الملكي ضيوف عظماء و حديث عن عظماء و موضعات هادفة ليست و في نفس الوقت لا تنسي أن تتضيف بعض المواضيع اللي إحنا كمصريين بنحبها للمتابعة و الفرجة بس

- عرفت من كم يوم بس إن الفريق سعد الشاذلي لسه عايش و الله العظيم كنت فاكره مات من زمان و عرفت إمبارح بس قصته مع السادات أثناء و بعد الحرب عندنا مقدرة نحسد عليها الحقيقة لمحو الناس من الذاكرة لكن أمثال الأبطال دول مش هيمحوا من التاريخ

- تخيلوا لو كان محمد نجيب إستطاع أن يتنصر في صراعة مع عبدالناصر و باقي الظباط أعتقد إن مصر كان هيكون لها شأن تاني

- بمناسبة عيد ميلادي اللي في شهر أكتوبر تحية لعبد المنعم رياض و سعد الشاذلي و أحمد اسماعيل و الجمصي و السادات و مبارك و جميع الشهداء و الرجال بحق و أقولهم سامحونا ضيعنا اللي ضحيتوا بدمكم علشانه

.

الوفد

- سبحان الله أزمة الدستور لم تحل غير تاني يوم ما ابراهيم عيسي قال إنه هيعمل جرنال جديد و عجبي

- الحزب الوطني بيخنق علي الوفد قال أية منعوا نشر إعلانات حزب الوفد لأ فعلا و نعم التخنيق قال يعني الناس هبلة و كده الوفد حزب معارضة و هننسي اللي عملوه في الدستور

- عندي إحساس إن قناة الحياة بتحاول تصنع من هبه الأباصيري مني الشاذلي الخاصة بهم ده إحساسي بس أعتقد مش هيعرفوا

.

الأهلي والزمالك

- المستشار جلال ابراهيم سايب النادي و عمال يطلع في كل القنوات مش فاهم بيفكر في أمور النادي أمتي؟؟

- عرفت إن محمد صبري هو مدرب الناشئين في نادي الزمالك طبعا أنتم عارفين مين محمد صبري اللي بيطلع أجيال الزمالك الجديدة و عجبي

- الكابتن أحمد رفعت الحقيقة وضح لنا ما هو مستوي الرياضين في مصر كلهم كوسط و محدش يقولي ده إستثناء هم دول صفوة المجتمع أصحاب أعلي أجور و أهم متابعات و إهتمام الناس

- الأهلي عاقب محمد طلعت بعد مبارة الترجي بالإبعاد عن مباريات الأهلي مبارة واحدة كانت العقوبة في الأول تدريب مع الناشئين لأجل غير مسمي سبحان الله الأجل غير مسمي لا يتعدي أسبوعين و نعم المبادئ

- الأهلي داق و عرف معني الظلم و غياب العدل في مبارة الترجي علشان يعرف هو بيعمل أية في أندية الدوري و بعدين علشان يعرف إنه متدلع زيادة عن اللزوم في الدوري المصري

- أنا عاوز أسأل سؤال قنوات الرياضة دي كلها بتملي الساعات الأربعة و العشرين بأية و قناة الأهلي بالتحديد بتملي بأية تشوف مودرن كورة يقولك بقية القنوات مطبلين تسمع مودرن سبورت يقولك بقية القنوات جاحدين تسمع الأهلي تحس إن الأهلي أهم من البلد نفسها و نسمع دلوقتي مداخلة الدكتور وليد دعبس و إعلان جامعة إم تي جامعتنا كلنا و هتححق حلمنا وصبرني ياربي

- بمناسبة قنوات الرياضة تفتح القناة تلاقي واحد مذيع و واحد ضيف تقلب القناة تلاقي اللي كان مذيع بقي ضيف و الضيف بقي مذيع و بيتكلموا في نفس الموضوع

و ختاما حسبي الله و نعم الوكيل

8 comments:

عبقرينو said...

ان شاء الله هاتفرج وهاتنور وربنا هايكرمك يشغلانة كويسة
المهم الصير والرضا ختى يقدر الله امرا كان مفعولا

Anonymous said...

hahahahhhhhh qwya awe elahly welzmalk di:D bs elfekra en elqnwat de sora mos3'ra ll7yah kolo bylf 7alin nafso w kollo by3'any w yrod 3la ba3do
w 5ally amalk fe rbena kbiiir msh hynsak w zy mrz2ak 2abl keda hyrzo2k ktiiiiiiiiiir isa .. tfa2alo bl5air tgedo isa :)

رفقة عمر said...

عادى كلنا عندنا حاله حنين للنتدوين

المدونه هى اللى بنقدر نقول فيها عن اللى جوانا
هى زى البيت مهما غابنا عنه مش بنرتاح غير فيه
استمر ولا تتوقف ابدا
ربنا يوفقك وييسر لك كل خير

Shaimaa said...

حمدلله على السلامه .. نورت مدونتك
حلوة جملة الفيلم اوى
والبوست وقفت فيه عند حاجات بجد حلوة.
حاول تتمسك بشغلك شويه .. كل مكان بيعملوا فيه اللى يجنن .. الدنيئة اللى مش فاهمه هى ايه بالظبط وغيرها .. بلاش نفسك يكون قصير ..وخد حقك على قد ماتقدر .. ربنا يوفقك وييسرلك الخير
Meshmesha

No Fear said...

عبقري الوطن
السلام عليكم
أزيك ياريس
الحمد لله الواحد صابر و واثق بالله بس مش عاوز أخسر وقت
الحمد لله علي كل حال

No Fear said...

مها
أي خدمة البوست عجبك
الحمد لله متفائل بس مش مضمنش نفسي مستقبلا
:))

No Fear said...

رفقة عمر
السلام عليكم
مهو أنا واضح إني مستمر مش بمزاجي غصب عني
:))
دعواتك

No Fear said...

شيماء -مشمشمة
السلام عليكم
أية الكلام الجامد ده
ربنا يخليكي
بس ملحوظة أنا سيبت الشغل من شهر مينفعش أتمسك بيه :))
الشغل الجاي بقة إن شاء الله
دعواتك
هو أنت ليه البلوج بتاعك يتعذر الوصول له