Thursday, December 31, 2009

ملخص 2009

السلام عليكم
أزيكم ياشباب
كل سنة و أنتم طيبين و ربنا يوفقكم دايما يارب
و يارب 2010 تكون أحلي من 2009 يارب
فكرت أكتب بوست عن اللي أنا عملته امبارح في الشغل
و يارب يكون اللي عملته صح
بس لاقيت نفسي عاوز أكتب ملخص سريع الأول عن 2009
العلاقة مع ربنا في تحسن الحمد لله إن شاء الله نستمرعلي نفس الطريق
الشغل خبرة محترمة الواحد أكتسبها السنة دي في الشغل الجديد
الماجستير الحمد لله نجحت في التمهيدي بس لسه مسجلتش
البيت الدنيا ماشية حبة فوق و حبة تحت
الحب لا تعليق
مصر لا تعليق بردوا
الزمالك يامسهل
*
بالنسبة للي عملته أمبارح في الشغل بقة
أخدت قرار من أسبوعين تقريبا إني مش هأستمر في الإنتاج السنة اللي جاية لأنه مينفعش أستمر تحت سيد بزازة و حتي لو هو مشي لأي سبب مش هينفع أنا تعاملي مع الناس يتغير لأنه ببساطة كسر حاجز معين كان المفروض يكون موجود بيني و بين العمال
فكان قدامي حل من اتنين في الشركة إما أتنقل لأي إدارة تانية أو خلاص نهاية عقدي يوم تسعتاشر يناير و يبقي كده شكرا و علي هذه الأساسا بدأت في البحث عن شغل جديد للعلم حتي لو ملاقيتش شغل جديد و منفعش أتنقل إدارة تانية مكنتش هأستمر بردوا حتي لو قعدت في البيت
المهم كنت قبل كده كلمت مدير المصنع في الموضوع ده و أوضاع الشغل في الإنتاج و مدي التدهور اللي فيها و الهبل و عدم التنظيم اللي موجود
هو طبعا كلامنجي جامد جدا و ضحك علي بكلمتين كل مرة و خلاص
و أحيانا كتير كنت بأدخل أكلمه و أنا كاتب إستقالتي بس هو كان بيلفني بكلمتين و خلاص
و أنا كان أهم شئ عندي أكمل سنة في الشغل
و الحمد لله صمدت هذه السنة الصعبة بس بصراحة الواحد أكتسب خبرة كويسة جدا الحمد لله
من أسبوع تقريبا دخلت لمدير الموارد البشرية و كلمته و ده كان بعد موقف معين حصل في الشغل الموقف ده مش معايا بس مع سيد بزازة المهم هو قالي أنا عارف شوية حاجات و في مؤشرات عن اللي بتقوله بس عاوز تفصيل منك شوية و لينا قاعدة تانية مع بعض
و حصلت شوية مواقف في الشغل منعتني من القعدة مرة تانية معاه
أمبارح بقة كلمت الشباب في إدارة الموارد البشرية و قلت لهم إني يا أتنقل يا إما مش هأجدد عقدي هم أفتكروا في حاجة معينة حصلت قلتلهم عادي مفيش حاجة و أنا كنت كلمت أ طارق قبل كده بس مش عارف أقعد معه تاني
خمس دقايق لاقيتهم بيتصلوا بيا تعالي كلم أ طارق
طلعت حكيت له كل حاجة
و قلتله عن البوظان اللي تحت و الدنيا ماشية عشوائي بدون تنظيم و تخطيط و توزيع مهام شغل
و حتي في كيميائي جديد جه الإنتاج المفروض سيد بزازة كمدير يقعد معانا و يقسم و ينظم الشغل بس ده محصلش
و أكدت له إمبارح إني مش هأستمر في الإنتاج يا أتنقل أو أمشي
هم حاولو الأول يقوليلي ممكن ننظم قعدة بينكم نوضح فيها الخطوط الأساسية قلتلهم لا موقفي مش هيتغير
يا النقل يا البيت
أية رأيكم فيا بقة يا شباب؟
:)
كنت علي وشك دور برد امبارح قضيتها كونجستال و نمت و مرحتش الشغل النهاردة
عملتها و هربت
:)
دعواتكم
*
أحلام 2010
أحلام و أمنيات كتير قوي مش هتكفيني المدونة لذكرها
يلا
كل سنة و أنتم طيبين

3 comments:

زهرة الجنة said...

كل سنة وانت طيب
وسنة سعيدة عليك ان شاء الله

بالنسبة لموقفك اللي انت اخدته
اعتقد ان وقته كده صح
الخبرة انت اخدتها خلاص
فكان لازم فعلا تاخد الخطوة دي والا كنت هتتراجع

كمل الخطوة اللي انت بدأتها وخليك واثق ان ربنا مش بيضيع تعب اي شخص

ربنا يكرمك وسنة جديدة سعيدة عليك

No Fear said...

زهرة الجنة
السلام عليكم
منورة
بالنسبة للي عملته في الشغل اللي حصل حصل خلاص
:)))
الحمد لله علي كل شئ
جزاكي الله كل خير
و كل سنة و أنتي طيبة
و يارب السنة دي تبقي سنة خير عليكي يارب

Towtor said...

السلام عليكم
كل سنة وانت طيب .. بأذن الله السنة دى تكون خير عليك وتحقق فيها كل اللى تتمناه .
شكلك كده وحشتك قعدة البيت والقعدة قدام التليفزيون ..ممكن برده تكون فرصة علشان تسجل موضوع الماجستير ..وتبتدى فيه.
أظن ان فى الكام يوم دول .. فيه جديد .. على الاقل انتقلت لادارة تانية ..حتى لو مفيش جديد قبل نهاية عقدك .. فكر الف مرة قبل ما تسيب المصنع ..على الاقل يكون فيه عرض شغل افضل . خليك فاكر ان القرارات اللى بناخدها وقت ضغوط او ظروف احنا مش قادرين نتكيف معاها.. بتكون على حساب مستقبلنا... ربنا يوفقك.. ربنا ييسرلك اللى فيه الخير.
Meshmesha